في قلعة الرُسحان

Part 1

في قلعة الرُسحان
الكاتبه : زهراء الهاشمي

بناتي الحلوات لا تنسون التصويت على البارت والتعليق على الفقرات حتى يصعد تفاعل القصه واستمر بالنشر

شـايـف مـن تـهـز حـسـراتـك الـگـاع
ومامـش بشـر گـدهـا يصيـرلـك بـيـر
شـايف مـن يـسـألونـك علــه الـحـال
تگـول بخـيـر وأنـت مضيـع الـخيرر

~~~~~~~~~~~~~~~~~~~~~
المكان / بغداد الكاظمية

-راجعه من المدرسه امشي بالطريق الوحدي تعبانه وحارة والشمس فوك راسي تحرك حرك ما صدكت اوصل للبيت دفعت الباب ودخلت

رحت للمطبخ شربت مي وطلعت لكيت اهلي مجموعين بالصاله ووجهم ما اعرف شلونها استغربت شكو دخلت سلمت عليهم

وتر : هلو

ابو وتر : هلا بابا شلونج بالدوام

وتر : زينه الحمد الله بابا حبيبي اخذت درجه عالية اليوم بالعربي 

ابو وتر : عفيه ببنيتي الشاطرة السباعيه تعاي اكعدي يمي

وتر : شكو شبيكم ؟

ام وتر : ماكو شي ماما حبيبتي لا تخافين

ابو وتر : تعاي اكعدي يمي واني اسولفلج

عفت جنطتي على صفحه ورحت كعدت بصفه
مد ايده خلاها على جتفي وصار يحجي

ابو وتر : شوفي بابا هسه جنت احجي ويا اخوانج هل فترا ان شاء الله راح ننتقل من هذا البيت

فلت وجهي وهمست
وتر : ها

ابو وتر : بابا وتر مثل متعرفين اني نقلت شغلي بغير مكان والبيت صار بعيد على مكان شغلي

وتر : اي صح

ابو وتر : من هيج قررت اشتري بيت قريب على مكان شغلي وننتقل هناك نكعد وهم المنطقه أمان وحلوه واني قريب عليكم

سكتت بس هزيت راسي واني ما مفتهمه شي شنو نشيل وليش نعوف بيتنه ابوي جان يروح محافظات يلزم واجب وعادي نبقى أبيتنه شمعنى هل مره كال ننتقل ؟؟

محد من عدنه جان عنده الجرئه حتى يسئل من الصغر امي معلمتنه شيكول بابا نكول اي وما نسئل ولا أناقش

بيومها بلشت امي تحظر وتشيل بالغراض جنت اساعدها اني واخواني شدكول احنا نسوي

وصلت الغرفتي صرت اشيل بالغراض واضمهم بالكراتين جريت حسره ورفعت راسي اباوع على غرفتي شلون راح اكدر اعوفها واروح
طبعي صعب اتعود على الشي بسرعه

عشت طول عمري البنيه الوحيده بين اربع ولد
أطباعي صارت صعبه ما اعرف من كثر الدلال
لو اكو سبب ثاني خلاني هيج اصير ..

عائلتنه صغيره عايشين حياة هادئة وسعيدة طبعاً ما تخلو من المشاكل والصعاب بس جانت اهون عليه
الحد ما اجا اليوم إلي انتقلنا بي من بيتنا هنا بدت
حياتنه تتغير شوي شوي