في قلعة الرُسحان

part 28

في قلعة الرُسحان
الكاتبه : زهراء الهاشمي

بناتي الحلوات لا تنسون التصويت على البارت والتعليق على الفقرات حتى يصعد تفاعل القصه واستمر بالنشر

ليّش ما مَليت مِنهُم؟
وليش ما مات الحَنين
شِعاجبك باقي بدربهُم
عاجبك هَذا الونيّن ؟
عِيش يا گلبي مِثلهُم
هُمَه طِين وأنتَ طِين .

~~~~~~~~~~~~~~~~~~~~~

رفعت راسي واشوف نفسي بمكان اظلم والريحه كلش مو طيبه شفت من بعيد خالة ليث واكفه كدامي وتضحك ويمها نفس الشخص الي يطلع يهددني كل مره صرت اردد

وتر : بسم الله ما اكدر كل شي ما اتذكر غير بس اسم الامام علي (عليه السلام)

بقيت ابجي وانخى بي بيني وبين نفسي اجه هو
نفس الشخص كال
:- لتحجين بأسمه ولا تذكري

عفته مجاوبته وبقيت اردد
وتر : ياعلي يا علي

ابجي وهو يصيح عليه ما احس بس اجا وضربني على وجهي وبعدها ضربني براسي بالكاع ما استسلمت وبقيت اردد يا علي اخر شي اجا يجر ايدي وجواها بالنار صرخت من كل كلبي بأسم الإمام علي
وتر : ياااااا علييي

فزيت كعدت لكيت نفسي بيت الشيخ الي يعالجني ولكيت قيس وجلال يمي صافنين عليه وليث يبجي يم راسي والشيخ وابوه موجودين يمي بقيت صافنه كعدت راسي وجسمي يوجعني كوه حجيت

وتر : اني منو جابني هنا

قيس : جبناج لأن كلتي تعبانه وخل نروح للشيخ يعزم عليه

بقيت صافنه عليّ ما اتذكر اني هيج حجيت ولا اتذكر هيج موقف بس مشيتها وسكتت لأن مابيه حيل احجي رجعوني للبيت واني حرف ما نطقت ساكته

مرت يومين ارتاحيت بيهن بس ما عافوني
وصار يطلعلي ويحجي ويايه

:- شوفي هاي الكتابات اكتبيها على ايدج

هزيت راسي بالرفض
وتر : لااا روووح عوفني ما اريد

عشت بصراع وحرب ويا كائن محد يشوفه بس اني والي يدري بي الشيخ بقيت فتره طويله ابقى الليل كله بدوامه مابين انام واحلم بي يحاول ويايه يعلمني كلمات غريبه وكل مره يخدعني بشي

:- اعوفج بس احفظي هاي الكلمات

من اجيت اريد احفظ الكلمات صعبه ما اكدر
وبسرعه يجي صوت الشيخ بأذاني واصحى

بس ابد ما يعوفني ويرجع يحجي
:- راح تصيرين قويه ومحد يكدر يأذيج والي اذوج يخافون منج

وهم ارفض وابقى كاعده ابجي وأتوسل بالله واهل البيت ميعوفوني كل مره جنت انخى بيها ابو الحسن جان يطلعلي رجال لو يسحبني منه وهذاك ميكدر يسوي شي لو يأذن بأذاني

واصحى من الحلم بس هو مو حلم لأن احسه حقيقه جان يا مكان يضربني بي من انام اكعد الصبح الكاه صاير ازرك