Phone Call

Chapter 15 - Friends

Chapter 15 - Friends

Unti unti ng nararamdaman ni Ronron ang hapdi dulot ng mainit na sikat ng araw.

Ngunit wala syang pakialam.

Tanging ang mahalaga sa kanya ay ang hapding unti unting tumutupok sa kanyang katinuan.

Nasa harap sya ng mismong puntod ni Angel.

Katabi ang mga magulang nito na sina Angelo at Paloma habang nasa likod ang mga kamag anak at kaibigan na nagdadalamhati sa maagang pagkawala ng dalaga.

          "Nagtitipon tayo ngayon, para alalahanin ang isa nating mahal sa buhay. Maaga syang kinuha ng ating AMA, sa batang edad ay nakasama na ni Angel ang ating lumikha. Huwag tayong manangis, kundi'y magbunyi sa bagay na ito. Payapa na sya at walang kasing saya. " sambit ng pari.

Tumiim ang mga bagang ni Ronron.

Nagtagis ang kanyang mga ngipin sa pagpipilit na huwag kontrahin ang sinabi ng pari.

          "Hindi!, hindi pa payapa si Angel. " bulong nya.

Pasimpleng nilingon ng binata ang mga katabi.

Nakapalibot ang mga braso ni Angelo sa tumatangis na kabiyak.

Kita rin nya ang mga luhang nagbabantang maglandas sa mga mata ng lalake ngunit dahil marahil sa kailangan ng asawa ang masasandalan, hindi ito nagpapakita ng kahinaan.

Tama, sinisimbulo ng kahinaan ang pag iyak.

Kaya kahit na kating kati na ang kanyang mga mata, ayaw nyang bigyan ng pagkakataon na makawala ang mga luha mula rito.

Ayaw nyang may makakitang mahina sya.

..

Tumingala si Ronron.

Para ibalik sa mga mata ang mga nagpipilit kumawala.

Tagumpay naman sya kahit papaano.

Pasimple nyang nilingon ang mga kasama sa pagtitipong iyon.

Unang nahagip ng kanyang mga mata ang bestfriend ni Angel, si Jamaica.

Tahimik itong lumuluha sa isang tabi.

Marahil ay mga mga magulang ang katabi ng dalaga.

Hindi nya maisip kung ano ba ang dahilan ng pagluha nito.