အဝါမှိုင်းမှိုင်း​ရောင်​လိပ်​ပြာငယ်​( အဝါမွိုင္းမွိုင္းေရာင္ လိပ္ျပာငယ္)

၉

Unicode

ဘာလို့ အဲ့ဒါကို စိတ်ထဲမှာပဲ သိမ်းမထားပဲ ထုတ်ပြောလိုက်မိတာလဲ ။ ငယ့်ဆီက ပြန်လာမည့် အ​ဖြေမရှိပဲ တိတ်​ဆိတ်​သွားသည့် အ​ခြေအ​နေကို သ​ဘောမကျစွာ စိတ်​ထဲက ငြီးတွားလိုက်​မိသည်​။ စိတ်​ပျက်​လက်​ပျက်​နှင့်ပင် နှစ်​ယောက်​သား တိတ်​ဆိတ်​စွာ ​လေးတိ​လေးကန်​လျှောက်​လာ​နေရင်းက ပျောက်ကွယ်စ မြူမှုန်​တွေကြားထဲ ဈေးတန်း​လေးကို ဝါးတားတား
မြင်​လိုက်​ရသည်​။ ပိုပြ နီးလာ​သည့်အချိန်မှာတော့ စျေးလေးက ထင်​ရှားစွာ ပုံပေါ်လာ၏။

​ဒီပါ မြင်​ဖူး​နေကျ မြို့ပြ​ဈေးနှင့်တော့ မတူ။ ကြီးမားသော စျေးအဆောက်အအုံကြီး မရှိ ။ အသီးအရွက်​တွေ ၊ အသားငါး​တွေ ၊ ရိုးရာမုန့်​တွေကို တနိုင်တပိုင်ခင်းကျင်းထားသည့် နယ်မြို့​လေး၏ ဈေးတန်း​လေးက ရိုးရှင်းစွာ လှပလို့​နေသည်​။ဝယ်​သူ​တွေကလည်း ၊ ဝါးခြင်းတောင်း​လေး​တွေကိုယ်စီကိုင်လာကြပြီး ၊ ဝါးခ​မောက်​လေး​တွေ​ဆောင်းလို့ မနက်​စာအမှီ​တောင်​ယာမှီ​အောင်​ သုတ်​သုတ်​ပျာပျာ ဝယ်​နေကြတာမို့ ​အချင်းချင်း နှုတ်ဆက်သံမှလွဲ၍ ဈေးတန်း​လေးဟာ စျေးနှင့်တူအောင် သိပ်ကြီးဆူညံမ​နေခဲ့ပါ ။

"ငယ်​.​ဈေး​ရောက်​ပြီ "

"​တွေ့သားပဲ .. အရင်​အတိုင်းပဲ
​ဈေးတန်းနေရာက အခုထိမ​ပြောင်း​သေးဘူးပဲ . အဟိ "

မကြာခင်ကမှ ညိုမှိုင်းမှိုင်းမျက်​နှာ​လေးက ချက်​ချင်းပင် ဝင်းလက်​သွားပြန်ကာ ထုံးစံအတိုင်း ဒီပါ့ အ​ရှေ့က​နေ ဂါဝန်​စ​လေး လွှားလွှား လွှားလွှားဖြင့် ခုန်​ပေါက်​ပြီး လူ​တွေကြားထဲ​ ပြေးလွှား သွား​နေပြန်​သည်​။ စိတ်ထိခိုက်လွယ် ၊ ပျော်ရွှင်မြူးထူးလွယ်တဲ့ငယ်ဟာ အမြဲတမ်း ဒီလို​လေး.​ပျော်​ရွှင်​နေရရင်​သိပ်​ကောင်းမှာပါပဲ ။

"ဒီပါ . လာ​လေမြန်​မြန်​
နှေးလိုက်​တာ တကယ်​ပဲ "

"အင်း .. လာပြီ"

ငယ့်​ကို သ​ဘောကျစွာ​ငေးရင်း ခပ်​မှန်​မှန်​လေး
​လျှောက်​လာ​နေတဲ့ သူ့ကို ငယ်​က စိတ်​မရှည်​စွာ
လက်​ယပ်​ခေါ်​သည်​။ လက်​ဆွဲပြီး လာ​ခေါ်ရင်​တော့ ပို​ကောင်းမှာ​ပေါ့ဟူ၍ စိတ်​ထဲ ခပ်ရွှတ်ရွှတ်တွေးလိုက်​ပေမယ့်​.တကယ်​တမ်းကျ​တော့ ငယ်​ပျော်​နေတာကို သ​ဘောကျတာမို့ ငယ် ပြေးလွှား ခုန်​ပေါက်​နေရာ နောက်​ကိုသာ ​ခြေလှမ်းမှီရုံ လိုက်နေဖြစ်သည် ။