အဝါမှိုင်းမှိုင်း​ရောင်​လိပ်​ပြာငယ်​( အဝါမွိုင္းမွိုင္းေရာင္ လိပ္ျပာငယ္)

၄

Unicode

"ဒီ​နေ့ည​တော့ အိမ်​မက်​မမက်​ပဲ အိပ်​ရရင်​ကောင်းမှာပဲ ၊ ဒါမှမဟုတ်​ပျော်​ရွှင်​စရာ​ကောင်းတဲ့ အိမ်​မက်​လေး ဆိုရင်​
​ရော "

ရေချိုးပြီးနောက် နောက်ဆုံးပေါင်မုန့်လက်ကျန်ဖြင့် ညစာကို ပြီးဆုံးစေရင်း အိမ်မက်ကောင်းလေးမက်ဖို့ကိုသာ အမှန်တကယ် တောင့်တောင့်တတပင် ငြီးငြူလိုက်ရင်း ကုတင်​ပေါ်​ပစ်​လဲချပြီး မျက်​စိမှိတ်​ထားလိုက်​သည်​။ ထိုအချိန်ထိ ဒီပါ့အနားက လိပ်​ပြာငယ်​လေးက ပျံထွက်​မသွား​သေးဘူးထင်​ပါရဲ့ ။ ​တောင်​ပံခပ်​သံသဲ့သဲ့​လေး နားထဲဝင်​လာသည်​။ ထို့နောက် ဒီပါ့ မျက်​ခွံ​တွေက​လေးလံလာပြီးနောက် အိပ်​ပျော်​သွား​လေ​တော့၏။

ငုဝါငယ် ။ ငုဝါငယ် ဆိုတာကို သိနိုင်သည့် ခံစားချက်မျိုး နှင့် နောက်ကျောပြင်ကိုသာ မြင်ခဲ့ဖူးသည့် ကောင်မလေးကို သေချာမြင်ရသည် ။ တစ်ယောက်တည်းတော့ မဟုတ် ၊ စုံတွဲထဲမှ အမျိုးသမီးပါ ရှိနေသည် ။

"မမအတွက်​. ငယ်​သီထား​ပေးတာ "

စံပါယ်​ပန်းကုံး​လေးဆိုမှ သာမာန်​စံပန်းကုံး​လေး
တစ်​ခုပါပဲ ။ ဒါ​ပေမယ့်​ ဘာကို အဲ့​ဒီလောက်​ထိ ကြည်​နူး​နေမိသလဲ ဆိုတာ ကိုယ်​တိုင်​တောင်​မ​ဝေခွဲတတ်​တော့ ။

"မမ လာ .. ငယ်​ပန်​ပေးမယ်​" ဆိုပြီး
ကလစ်​လေးနဲ့ ဆံပင်​အုံထူထူထက် တယုတယ ပန်ပေးတော့လည်း နှလုံးသားဟာ ခပ်ငြိမ့်ငြိမ့်လှုပ်ရှားမှုနဲ့အတူ ကြည်နူးရပြန်တာပဲ ။

"ငယ်​ရော မပန်​တော့ဘူးလား "

"ပန်း​တွေက လှတဲ့သူ ပန်မှ လှတာမမရဲ့
ငယ်​က လှမှမလှတာ "

ငယ်က မျက်နှာလေးကို ရှုံ့မဲ့လျှက်က ဆိုလာသည် ။ ငယ်​က မလှဘူးတဲ့ ။ ဟုတ်​တော့လည်း ဟုတ်​ပါသည်​။ မိန်းမသားးျအအတို့၏ အလှစံချိန်​နှင့်တော့ ငယ့်ကို တိုင်းတာ၍မရ။ ငယ်​က ပါး​ဖောင်း​ဖောင်း မျက်​လုံးဝိုင်းဝိုင်း​လေးနှင့်
ငယ်​ငယ်ကဆော့​နေကျ ချစ်​စရာ​ကောင်းသည့် ဘိုမရုပ်​လေးနဲ့ ပိုတူ​သေးသည် ။ ပြီး​တော့
ငယ့်​မှာလည်း ကျောလယ်လောက် ဆံပင်​အရှည်​ကြီး​တွေရှိသည်​။ ထူထူထဲထဲမဟုတ်​ပဲ ပါးပါး​ပျော့​ပျော့ ဆံပင်​ရှည်​လေးများကို တွေ့ကရာဖဲကြိုးများဖြင့် ဖြစ်သလို စည်းနှောင်ထားတတ်ပေမယ့် ငယ်က ချစ်စရာကောင်းတာပဲ ဟု ငုဝါငယ်ကို မြင်ရသူတိုင်း တွေးမိကြမည်သာ ။