LOVE or ANGER [Completed]

Chapter 28 : ជួបជុំ

Jin ប្រញាប់ប្រញាល់នាំ RM មកមន្ទីពេទ្យធំដែលអ្នកស៊ើបផ្តល់ដំណឹងថាមានតម្រុយនៅទីនេះ ទោះបីមិនទាន់បានព័ត៌មានពីគ្នីគ្នារបស់ RM ដែលកំពុងស្វះស្វែងប្រើគ្រប់វិធីដើម្បីលួចយកដំណឹងបញ្ជាក់ថានៅទីនេះពិតមែន តែថ្ងៃនោះគេមានអារម្មណ៍ថាជា Jimin គ្រាន់តែវាមិនច្បាស់ហើយក៏ទាន់ហន់ពេកទើបមិនហ៊ានសន្និដ្ឋានដោយចិត្តឯង តែពេលនេះវាគាប់ជួនពេកហើយ គេត្រូវតែរកក្មួយប្រុសរបស់គេឱ្យឃើញទោះត្រូវប្រើវិធីណាក៏ដោយ

“ សួរស្តី! លោកមានអ្វីឱ្យនាងខ្ញុំជួយទេ? ” គិលានុបដ្ឋាយិកានៅផ្នែកផ្តល់ព័ត៌មាននិយាយរាក់ទាក់ស្វាគមន៍ពេលឃើញ Jin និង RM ដើរចូលមកដោយទឹកមុខអន្ទះសារ

“ អ្នកនាងជួយប្រាប់បានទេថាអ្នកជំងឺឈ្មោះ Park Jimin កំពុងសម្រាកនៅបន្ទប់ណា? ” អ្នកជាពូអន្ទះសារស្ទើរស្លរឈាមខណៈ RM នៅតែស្ងប់ស្ងាត់ព្រោះមនុស្សដែលគេបញ្ជូនមករកនៅមិនទាន់រាយការណ៍អ្វីនៅឡើយ

“ ពួកយើងគ្មានអ្នកជំងឺឈ្មោះ Park Jimin ទេ ” នាងក្រមុំញញឹមស្រស់និយាយបំភ្លៃការពិតទាំងស្រុង ព្រោះថ្នាក់លើដាក់បញ្ជាមកបែបនេះ ដោយសារសាច់ញាតិរបស់អ្នកជំងឺប្រើប្រាក់និងអំណាចឱ្យបិទដំណឹងនេះហាមឱ្យអ្នកក្រៅដឹងទោះបីជាគេអះអាងថាជានរណាក៏ដោយ JHope បារម្ភខ្លាច Suga តាមស៊ើបមកដល់ទីនេះទើបនាំ Jimin ចេញត្រឡប់ទៅផ្ទះវិញដោយយកលេសថាអ្នកជំងឺមានមនុស្សតាមសម្លាប់ទើបត្រូវរស់នៅលាក់ខ្លួនមួយរយៈចាំឱ្យខាងមន្ទីពេទ្យបញ្ជូនគ្រូពេទ្យទៅមើលថែរៀងរាល់ថ្ងៃ

“ អ្នកនាងមិនទាន់ឆែកឈ្មោះអ្នកជំងឺផង ហេតុអីដឹងថាគ្មាន? ”

“ អឺ...គឺ..គឺនាងខ្ញុំចាំបានថាមិនមានឈ្មោះមួយនេះក្នុងបញ្ជីឡើយ ទោះមិនឆែកក៏ខ្ញុំប្រាកដចិត្តដែរ ”

“ បើនិយាយបែបនេះ មានន័យថាអ្នកនាងចាំឈ្មោះអ្នកជំងឺទាំងអស់ក្នុងមន្ទីពេទ្យមែនទេ? ” Jin ហកឱ្យវិញលឿនដូចព្យុះមិនទុកស្អែកធ្វើឱ្យនាងស្ងាត់មាត់រកពាក្យតបមិនត្រូវ គេដឹងថានាងព្យាយាមកុហក Jimin អាចនឹងកំពុងនៅក្នុងដៃអ្នកមានអំណាចណាម្នាក់ជាមិនខាន