LOVE or ANGER [Completed]

ភាគទី 55 : គ្រួសារ...

ពេលថ្ងៃត្រង់ឈានចូលមកដល់ នៅក្នុងក្រុមហ៊ុនមានសភាពអ៊ូអរជាងពេលផ្សេងៗ ព្រោះបុគ្គលិកដល់ពេលសម្រាកទទួលទានអាហារថ្ងៃត្រង់ តែមិនយូរប៉ុន្មានភាពអ៊ូអរដ៏សាមញ្ញក៏ប្រែក្លាយជារញ៉េរញ៉ៃនិយាយគ្នាស្តាប់លែងយល់ បុគ្គលិកទាំងស្រីទាំងប្រុសជ្រួលច្របល់ ខ្សឹបខ្សៀវ ហុចទូរស័ព្ទឱ្យគ្នាមើលចលាចលពេញក្រុមហ៊ុន

Joo ពិនិត្យឃ្លាំងទំនិញនៅរោងចក្រធំហើយក៏ប្រញាប់ត្រឡប់មកវិញជាមួយឯកសារពាក់ព័ន្ធ ចំនួនផលិត នាំចេញនាំចូល ដើម្បីយកទៅឱ្យ Suga មើល រាងក្រាស់សម្លឹងនាឡិកានៅដៃខាងឆ្វេងបណ្តើរដើរញាប់ជើងសម្តៅជណ្តើរយន្តប្រអប់នៅខាងមុខបណ្តើរ តែភាពរញ៉េរញ៉ៃក្នុងក្រុមហ៊ុនញ៉ាំងឱ្យគេត្រូវងាកមើលឆ្វេងស្តាំពីរបៀបរៀបរយឱ្យទាល់តែបាន

“ ហួសម៉ោងសម្រាកហើយ ហេតុអីមិនធ្វើការរៀងខ្លួន? នាំគ្នាឆ្លងកន្លែង ចង់ដូរឋានៈ តួនាទី និងប្រាក់ខែគ្នាមែនទេ? ” Joo ស្រែកបន្ទោសដូចរាល់ដង រំពេចនោះហើយដែលគេសង្កេតឃើញថា គ្រប់គ្នាមិនត្រឹមតែខ្សឹបខ្សៀវគ្នានិងបង្ហាញអ្វីម្យ៉ាងក្នុងទូរស័ព្ទ តែពួកគេក៏ប្រើកែវភ្នែកចម្លែកមកតាមសម្លឹងគេដូចគ្នា

“ ក្នុងទូរស័ព្ទមានអីឬ? ” នាយកម្លោះបញ្ឈប់ការឈរធ្មឹងរង់ចាំចម្លើយដែលគ្មានបានការ ដោយដើរទៅយកទូរស័ព្ទពីដៃបុគ្គលិកប្រុសម្នាក់ក្នុងចំណោមពួកគេមកមើល

Joo គាំងមួយសន្ទុះអំឡុងពេលសម្លឹងអេក្រង់ទូរស័ព្ទ នេះជាអ្វីទៅ រូបភាពលើគ្រែដែលគេនៅជាមួយ XianNu ត្រូវបានសារព័ត៌មានធំៗយកមកចុះផ្សាយពេញប្រព័ន្ធអ៊ីនធឺណេត ដោយដាក់ចំណងជើងខុសៗគ្នា

“ ពួកវាបានរូបឆ្គួតឡប់ទាំងនេះមកពីណា? ” ម្ចាស់រូបក្តាប់ទូរស័ព្ទគប់ឱ្យម្ចាស់វាវិញទាំងក្តៅមុខឡើងក្រហមដូចភ្នំភ្លើងផ្ទុះព្រោះកំហឹង

រូបទាំងនេះមិនអាចជា XianNu ជាអ្នកបញ្ចេញនោះទេ ព្រោះនាងគ្មានហេតុផលដែលត្រូវធ្វើបែបនេះ បើរូបភាពបែកធ្លាយ នាងមានតែខូចខាត និងខូចខាតប៉ុណ្ណោះ

បរិយាកាសក្នុងក្រុមហ៊ុនក៏ប្រែជាស្ងប់ស្ងាត់មិនមាននរណាហ៊ានមាត់ក ពេលឃើញថាសុភាពបុរសចិត្តត្រជាក់ដែលពួកគេធ្លាប់ស្គាល់ ខឹងក្រោធដល់ថ្នាក់គួរឱ្យខ្លាចបែបនេះ