تزوجت معاقًا🖤
الحلقه الثالثه ٣ 🔥
ونلقاه هاذك الطرف نفسه يبحت في ومنشرك ضحك
وانا خلاص وجي بندفنه فالتراب من الاحراج والبنات يظاحكن......
وقعد يقدم شوري وانا قلبي يبي يطيح و............
هو:-عارف مش وقته بس هاكي رقمي ورني عليا...
انا:-لالا معلش مانحكيش مع شباب اولا ثانيا ماعنديش فون وكريت سهى من يدها هي نمشوا ي بنات
هو:-والله غرضي شريف نتعرفوا بس فتره وطلع فون من جيبه هاكي هذا خليه معاك توا نرن عليك
انا:-😨شن هذا لالا مانبيش .......
هو:-حطه في شنطتي وعدا وقعدت في صدمه من الموقف😰
سهى:-انتي هاي ....اووووي عويشه ي كلبه شن الفيلم الهندي يلي صار توا ناقص علينا غير مطر وريح شن تعرفيه هذا
انا:-هذا اهني....حي عليااااا😭😭😭شن اندير للفون حي عليا من باتي كان يشوفه
هدى:-تحركن تحركن وانتن معنزات فالطريق تقول سعي العرب قعدوا يتفرجوا علينا.
ربى:-هي ي بنات نروحوا وتوا نلقوله صرفه المغرب قريب ....
سعاد:-حي علي ام العار باهي يلي ماشافنا واحد بعدك انس(ولد عمتي حنان)محله قريب من هنا.
انا:-😭😭😭كرعيا من شايلاتني.
هدى:-مايخافن غير عيونك الحراره الزايده وين عمرك طلعتيها الكناسه.
سهى:'كناسة شنوا حسكن دوختني....😒
هدى:-عليكن وعالكنايس من يوم وغادي 🤣🤣🤣🤣🤣ي حنه عمتكن عويشه اليوم عالعصر طلعت تكب فالكناسه حشاكن.........
ربى:-🤣🤣🤣🤣🤣🤣عن جد الرومانسيه وخلاص
سهى:-،خزي ي كلبه وساكته لعند توا ماقلتيها لنا
انا:-الدوا في الفون وين نحطه😭مانعرفش نطمر
سهى:-جيبيه هنا خذاته ودكاته ف جيب سروالها
ربى:-هذا شكله هاي هاي عطاك تلفون من عين عينه تخيلي هربتي بيه
هدى:-هذا حقه قريب الف خلنا نبيعوه ونهيجوا بيه🤣🤣🤣🤣🤣
روحنا للحوش لقينا ماما وعميمه فتحيه فالكوجينه يديرن في براك وشربه
هدى:-الله الله عالروائح🤤
ماما:-وين بدري كنتن تباتن تخيلن باتكن جا قبل ماتجن
سعاد:-والله نجاروا علي حيلنا
خشينا للدار نغيروا في دبشنا وانا في صدمه من يلي صار ومستكه اول مره نحس بالشعور هذا خوف وقلبي يدق بسرعه ونرعش .....
البنات ردن باب الدار
هدى:-شن تبي اتديري فوتيه باتي يشنقك كان لقاه عندك تخيلي يطلع ضايع
سهى:-لالا منظره مش منظر واحد فاشل واضح عليه ولد عيله
سعاد:-ردي بالك شباب توا ينخاف منهم عويشه فوتك منه الوجيج مازلتي صغيره وتوا تخشي فالجامعه وتلقى شخصيات اخرة وتغير نظرتك له....
ربى:-،انا نحس فيه صادق مش عارفه....
هدى"-توا انتي شهاده تبي تركيز وتوا تشوشي زيدي عليها الفون فكينا من المشاكل كان باتي يحقه ولا يسمع سمع تي والله يحطنا فوق بعضنا......
انا:-نسمع ف كلامهن وقاعده ف دوامه مش عارفه
نزلنا تعشينا وغسلنا المواعين ودارت ماما شاهي خضره التمينا عليها كلنا وقعدنا نهدرزوا.......
خش علينا باتي وزوجته المصون نحنا ونهدرزوا فجأه اختفت الضحكه ع وجوهنا
بابا:-السلام عليكم شخبارك ي علي....وسلم عليهم
عمي علي :-هيا عاد تبقوا عالخير ...هيا ي بنات
نخنا:-،خليهن ي عمي مازال بدري
عمي علي:-،لا وين بكره وراي شغل بدري
بابا:-اقعدوا تعشوا صبن ديرن عشاء قالها بغل😡
عمي علي:-لا وين تعشينا من بدري ماقصرتش مسكينه مافي حاجه ماحطتها قدامنا
ماما:-مش من واجبكم بالكم تقعدوا
بابا:-ازلط من الموقف ومطبس راسه رغم انه عارفه ماما عمرها ماقصرت مع هله لكن سبحان الصبايا كيف يغيرن
عدوا عيت عمي علي...
باب:-صبي ي بت ديريلنا عشاء ....
صبيت نجري نسخن فيه ...طبعا هذا حالنا كيف الخدم تجي تاكل وعالوجبه استحاله تقربلك حاجه مجبورين الله غالب.
جبت الصفره وجت قعدت تاكل معاه المسمومه💦....كنت فالمطبخ نا وهدى
هدى:تعرفي ال..... غايبه عليا .....ونحس بألم بكل ليه
انا:-لخبطة هرمونات اطبخي تفاح شاهي قالو كويس
هدى:-غايبه عليا لها شهرين وحسني مضايقه ....
مع خشت ام السعد جايبه السفره......عطت نظره للهدى كان وراها كيد كبير .....وطلعت تكشخ من حالها.......
ام السعد ماتحبش هدى عشان باباةهدى اكثر وحده مدلعها ايام زمان😔وطبعا هدى ديما تبز فيها ف اباري حتى قدام باتي ماتخافش .......
كملنا غسل المواعين وعده باتي للحوشه بدون حتى مايقول كيف دبرتن العشاء اليوم والتلاجه كانت تصفر ولا قال شن ناقصكم ولا بالك ي بنات تبن حاجه ..... كيف العرسان.
كنا مقعمزين عالتلفزيون نتفرجوا نا سارحه نفكر ف قصتي والبنات منسجمات عالمسلسل......وباب الحوش يدق علي حيله طلعت نجري كريت ملايه الصلاه نفتح فالباب طلعن وراي البنات وماما تلبس ف محرمتها ان شآء الله خير.....ان شاء الله خير فتحت الباب كانن وراي البنات وماما ......
نلقاه بابا خاش هايج وعيووونه حمررررر كيف الجمر يدفني علي حيله ع مطلع السطاح يلي قدام الباب نين خبطت فالحديد .....آاااااي
بابا:-حولي حولي من قدام وجهي وينها وينها الكللللبه
ماما:-باسم الله كنك ي راجل خاش علينا هكي كنهن البنات شن دايرات
بابا:-ماجابلي العار غير بناتك وينها الكلبه هدى وينها هدى كانت مصبيه ورى سعاد تسمع ف اسمها ومنصدمه مش عارفه روحها شن دايره ......يجي باتي يكرها من شعرها ونحنا نتعايطوا....
لالالا كنها شن دايره لاياباتي هذه هدى حرام عليك
ماما:-حرام عليك خلي البنت مش دايره حاجه
بابا:-عزقها في دار المعيشه وطلع يجري سكر باب الشارع سكرن افوامكن سكرن افوامكن كشفتن بيا قدام الجيرااان
ونحنا نتباكوا ويسلح سير متاعه يقعد يضرب فيه مره بكراعه مره يشلطها بالسير.....
نحنا:-لالالا ياباتي خشيت نجري ندف فيه حرام عليك بناتك نحنا شن ذنبنا
بابا:-سكتن ي فرخات يدفنا بره وسكر الدار
بابا:-حامل حامل اه كيف نبي نغسل عاري كيف نبي نوري وجهي قدام الناس
هدى:-مش فاهمه باتي شن يحكي والله مادرت حاجه وحق ربي مادرت حاجه
بابا:-مع من ي كلبه مع من انطقي ظيعتي سمعتنا ي كلبه امك ماعرفتش تربيك
هدى:-وتربت جدي ماقربني واحد وحق الله جيبلي المصحف نحلفلك عليك والله والله والله ماواحد مسني
بابا:-صمي فممممممك تفووو عليك وقعد يزيد يضرب فيه بكراعه علي بطنها ....بلكي نغسل عاري يلي كيفك تندفن وهي حيه ي كلبه
ونحنا نخبطوا نسمعوا في عياط هدى💔ومش قادرين انديرولها شي وفجأه اختفى الصوت
انا:'،قعدت نندب حي عليا ماتتت حي علي ووووو
ماما:-ياناعلي بنتي افتح الباب افتح
اسماء:-تبكي وحاطه يدها علي فهمها .....
انفتح باب الدار وطلع باتي وجه اسود وعيونه حمر بحت فينا و ماما قعدت تخبط ع صدره حسبي الله ونعم الوكيل حسبي الله ونعم الوكيل والله كان صار ف بنتي حاجه ماني مسامحتك دفها وطلع يجري ولع سيارته وعدى.
نحنا خشينا علي هدى لقينا وجها دم ومتورم
اسماء:'قعدت نخبط في وجها هدى هدى نوظي سعاد عطر عطر بسرعه بسررررعه
ماما:-ياناعلي بنتي ماتت قعدنا نتباكوا وماما اظبطتها وقعدت تبكي علي حيلها شوي بحتت لقت دم تحت منها
ماما:-حي علي حي علي عوقها حي علي ....عدي كلمي عمك علي بسرررررعه ولا اي واحد
انا:-خذيت تلفون ماما كانت الساعه ١.....حاولت حاولت ماحد رد عليا يلي مقفل ويلي ماردش ضعت حسيت يدي فاشلات طلعت نجري حفيانه لجيرانا دقيت دقيت ماحد رد عليا حسيت للحظه اني بنفقد اختي رديت للحوش نبكي ومش حاسه بكرعيا من الخوف والالم والضياع .....
عديت نجري للدار
ماما:-ي عويشه ي عويشه ماحصلتي حد بسرعه جيبيلي عباتي نطلع فالشارع بلكي نلقى ولد حلال..
انا:-ماحصلت حد ماحد رد عليا .....
اسماء:-شن انديروا سعاد كذا شوفي علي
سعاد:'علي زارد مع اصحابه مش قاعد
انا خطر عليا التلفون خشيت للدار كبيت دولابي وطلعته ماكنتش مفكره في لحظتها شن قاعده اندير كنت نفكر ف هدى وبس كيف بنساعدها ........فتحت التلفون ماكنتش عارفه نستعمله .....حاولت ونا بندور بين الاسماء حتى اسمه مش عارفته من ويدي يرعشن التلفون قعد يرن في يدي
فتحت وقعدت ساكته
محمد:-الو
انا:-قلبي قعد يدق بسرعه وحسيت نفسي بينقطع للحظه ....الو الو
محمد:-واخيرا فتحتي الفون
انا:-😭😭😭😭😭😭😭يرحم بيك ساعدني ساعدني ماعنديش حد يرحم بيك ...اختي بتموت تعال تعال .....
محمد:-كنك شن صاير معاك وين انتي وين قاعده تي انطقي
انا:-اختي بتموت وماعندنا حد يشيلها انا فالحوش تعال يرحم بيك ربي يستر عليك وعلى خواتك
ي اني اني جايك توا خمس دقايق وسكر ف وجهي
طلعت نجري للبنات لبسنها عبايتها هي يا ماما البسي حتى انتي
ماما "-من حصلتيى😢
انا:-كذبت علي ماما......هذا صاحب تاكسي ملاته علي صاحبتي قالتلي نتعاملو معاه
اسماءوسعاد :حتى نحنا بنمشوا مانقدروش نقعدوا هنا علي نار....خوذنا معاكن ......
لبسنا قعدنا فالحاجر ماما كانت سانده هدى عليها يلي كانت مغمى عليها وتبكي........
يرن جرس الحوش طلعت نجري........
محمد:-السلام عليكم وجت عينه عليا وطبس راسه خير خير ي عمتي ان شاء الله لاباس ....
ماما:-الله يربحك ي وليدي ساعدني البنت ماتت وبكى ماما يبكي الحيط
محمد:-هياهيا طلعنها للسياره نراجي فيكن.......
طلعنا كلنا ركبنا ماما من قدام ونا وسعاد واسماء لاوره حطينا هدى علي كرعينا سيارته كانت واسعه من جوا طووول الطريق نتباكوا ......😢
وصلنا للمستشفى نزلنا وجو متاعين الاسعاف خذوها منا واستدعوا دكتور نساء جوا ومعش حد طلع علينا قعدنا نص ساعه علي اعصابنا يطلع الدكتور مفلم
الدكتور ايهم :-هل المريضه وين
ماما:-ها ي وليدي طمنا عليها الله يربحك وتبكي
الدكتور ايهم: ي عمتي المريضه متعرضه للعنف وقبل ضرها يلي ضربها من دار فيها هكي مفروض ماتسكتوش عالشي هذا انا عطيتها شوي مسكنات حاليا راقده ولما توعى ايسير خير .....قعد يسأل في ماما اسإله وخش للدار.....
اما محمد كان يراقب في من بعيد كنت سانده راسي عالساس ونبكي.....وحسيت بشي يقرب مني التفتت القيت محمد.......حسيته فاللحظه هذك اماني رغم اني مانعرفش ولحد الآن مافيش حد فينا يعرف حتى اسم اللاخر ولا نعرفوا شي علي حياة بعضنا وثقت فيه بدون مانعرفه .....
محمد:-......
يتبعععع🔥
تعديل 😕آسفه عاللخبطه متاعت الاسماء توا كيف انتبهت وياريت تاقات للصاحباتكن😢التفاعل ضعيف بكل ...شاركوا حتى بملصق😕
