تزوجت معاقًا"
الحلقه الأولى💫
وقفت عالمرايا بحتت في شكلي كيف وجهي شاحب وعيوني ذبلانات وناقصه ....كيف تغيرت عن قبل قعدت انطوائيه وممله ....
انا اسمي عائشه ع اسم حني ... اصغر وحده في خواتي طويله وبيضاء كيف هاللامبه ع قولة حني😂✋عيوني عسليات وحواجبي سود وعراض وشعري طويل واسود واصل لنهاية ظهري نقرا في ثالثه ثانوي شهاده يعني...نحنا اربع بنات اختي الكبيره اسمها اسماء مدرسة كيمياء متخرجه لها ٣ سنين حنطيه عيونها خضر ودبدوبه شويه طولها متوسط ويلي بعدها سعاد ثالثه جامعه تاريخ سمراء وعيونها واسعات ولونهن بني وشعرها كستنائي قصير مخطوبه لها ثلاث سنين خطيبها اسما علي وبعدها هدى اولى جامعه طشونه قصيره لكن جذابه بيضاء وشعله وعيونها عسليات وشعرها اشقر تقرا فيزياء ..وطبعا ماعنديش خوت وبابا اسمه مرعي يشتغل موظف فالمصرف ... وماما فتحيه كانت سكرتيره اداريه بس بعد ما جابتني صارنلها ظروف صحيه سيبت العمل ومنعها الدكتور انها تحمل لأنه الحمل ممكن يأثر علي حياتها....ماما كانت في حوش العيله كانوا معاه جدي وحني ومتحمله مسؤوليه كل شي وبعد سنين زواج وتضحيه تزوج عليها عشان الولد......فالبدايه ماما عارضت بس بعدها ماكنش عندها خيار الا توافق بس شرطت يكون حوش بروحها .....بنينا حوش بعد وفاة جدي وجنبه حوش نسخته للمدام الثانيه بينا صور بس وانتقلت معانا حني فيه....
بابا من اول ماتجوز (ام السعد)تغير علينا ماكإنش الشخص يلي مدلعنا ومايحمل فينا شي تغير جذريا في تصرفاته معانا ومع ماما المسكينه يلي تحبه وخذوا بعضهم علي حب قعد يسحب في روحه منا تدريجيا مره يجي يبات وعشرة يتحجج....وبعدها حملت ست الحسن بولي العهد وجابت ابراهيم هي يلي انقلب معانا ستين درجه ومع الاحداث حتتعرفوا ع كل حد فينا عشان مانلخبطممش...
فتحيه:-ي بنااات ي بناااات نوظن وحده منكن تمشي تشوف حنها تخششها للحمام ظهر جمعه وتبي حد يدوشها
أنا:-نعم ي ماما هيا هيا آني جايه توا نجيها نا .
انا :- خشيت للدارها ...صباح الخير ي حني(،حني مقعده وعندها فقدان فالذاكره احيانا تذكر واحيانا لالا مرات تذكر حاجات قديمه بكل واحداث مزعلاتها فالماضي صارلها هكي بعد توفايه عمي الله يرحمه في حادث سياره هو وعريس جديد بعد وفاته صارلها زهايمر ومعش قدرت تصبي علي رجليها)
الحاجه عائشه-صباح الخير بنيتي الله يربحك ساعديني نخش للحمام .....خششتها للحمام حشاكم ساعدتها تدوش وغيرتلها حوايجها وطلعتها ....
ماما:-عويشه عويشه ....
انا:-نعم ي ماما
ماما:-شيلي للحنك فطورها
انا:-هيا هيا...مشيت خذيت للحني فطورها وقعمزت هدرزت بحذاها شوي .....
طلعت من الدار وخشيت للماما فالمطبخ نساعد فيها ....ونسمع صوت بابا جا.....عايشه ي عايشه.......
طلعت نجري نرعش ......
انا:-نعم ي بابا شن في ...
هو"-امسكي ابراهيم خليه معاك وغيريله ام السعد عندها عياده توا انجوا مانطولوش.
انا؛-حاظر ......خطمت علي ماما.
ماما:-كنه باتك شن يبي فيك.
انا:-المدام ماشيه تنش يبيني نمسكلها ابراهيم....خزيه هالحقيره دازته مع باتي عشان تحطنا فالامر الواقع
ماما:-هاتيه هنا حرام مليكه شن عرفه.
انا:-سبحان الله علي طيبة قلبك ي ماما خساره فيها هالمخمجه العيل مخمج ونين ملتهب من القطن شكلها بعد امبارح.
ماما:-والله كله اجر عند ربك بعدها خلاص هذا خوكن.
انا:-مشيت للدارنا انتأفف .....خشيت لقيت هدى كابه دولابها تطبق فيه وسعاد عالفون تشلط.
انا:-افففف
هدى :-كنك تأففي ....شن صاير
انا:-هالحقيره دازه هيما تذوح حتى يوم الجمعه ماتقعد دزاته مع باتي عشان ماتبينش نتكلموا.
هدى"-وباتي طبعا في جرته تقول ساحرته
انا:-قالك ...
اسماء :-خشت علينا فالدار ...ي بنات يلي عندها حاجه تبي غسل تعطيها ليا مولعه الغساله توا .
سعاد:-اسسس اسسس وتوصف ع فونها..
هدى:-عليك طروح كلا انتي كيف علاوي ماعندهمش دبش معفن يغسلوا فيه ولا نظاف😂😂😂😂
انا واسماء:-😂😂😂لالا نظيفين...
سعاد :-قعدت تندب وطلعت بفونها للدار اللخرى.
انا:-عليك حاله وخلاص.
هدى:-خليها بالك يطلع الفرح بسرعه حتى هو مزط كبدي على هالشقيقه توا مخطوبه لها ٣ سنين.....
أسماء:-الله غالب الحياه ظروف توا مسكين هله برواحهم رقاد ارياح.
(سعاد اختي علي ماتبيش شافتها امه في فرح بنت جيرانا يقعدوا صحبه هما وياهم شافتها وجت طلبت وقتها سعاد كانت صغيره ووافقت عشان تفتك من العيشه يلي عايشينها وخلاص وحطت قلبها ع جنب لكن الحق علي راجل كويس مواليد ٧٧ مدرس تاريخ ويبني فوق هله )....
ماما:-يابنات ي بنات....تعالن انزلن تغدن
انا:-هيا هيا ي بنات ماما تنادي عالغداء
طلعنا من الدار وخذيت المفرش وسفرة حني في يدي حطيتها لها عالسرير وطرحت مفرشنا وقعمزنا نتغدوا ....
خش علينا بابا ومراته☻
بابا:-خير عليكم
ام السعد:-خير ...خير ي عمتي كيف حال صحيحتك
حني:- هذه من ......
بابا:-ام السعد يمي كنتك بنت عيت الفلان(بما انه حني عندها زهايمر مره تذكر ومره تنسى تذكر الحاجات القديمه والحاجات يلي صارن معاها فالسنوات الاخيره تنساهن)
حني:-ياناعلي من هبالك درتها وجوزت ي مطيوح السعد وسيبت بناتك طلعها طلعها من قدام وجهي
ام السعد:-طلعت تخبط في الباب وعدت للحوشها
بابا:-من جدك يمي كنك مع الوليه
حني:-لاني امك ولا نعرفك هذه حتى هلها متبريين منهاحتى راجلها طلقها في ليله غراقها مطر ولزها للهلها وزرطونا فيها
ماما:-وحدي الله ي عمتي ....نحطلك غداء ي مرعي
بابا:-معش نبي ماعنديش نيه وطلع ولحقها...
انا:-كلا باتي مافيش دايرتله بسبوسه
ماما:-بلا قلة ادب انتي وياها باتك هذا
هدى:-صح ي ماما شوفي البقره حتى ولدها لا دوراته لاسألت عليه ماني عارفه عليش تجري عالضنوه...
انا:-ربي عيالك الله لايسيئك😂😂😂..عند ابو لهب ان شاء الله 🤷♀️☻
هههههههههه.....
وكملنا الغداء ...
ماما:آه ي بنات نسيت عيت عمكن علي جايين بعدين يسألوا علي حنكن صبن لمه الحوسه بسرعه العصر معش عليه واجد....
انا:-عليا المواعين ....
سعاد:-توا نصبي اندير بسبوسه عالسريع ....
هدى :-وانا نطلع للجنان يبي تسييق
وأسماء برمت عالحوش ...وانتشرنا نا خشيت نغسل فالمواعين .
انا:-كملت غسل المواعين عالعصر ونشفت المطبخ وخذيت سطل الكناسه حشاكم وطلعت للحاجر بنحطه قدام الباب وكان يوم ريييييح بما انه شارعنا كان فرعي واغلبيته حيشان قروض مش مرصوف قلت خليني نحطه في السله الكبيره متاعت الشارع قريب قدام حوشنا هيا ونا فتحت الباب وطلعت حطيت وبرمت بنرد لباب الحوش لقيته مسكر مع طلعة الرجاله من الجامع😱😱😱😱😱.......
يتبعععععع........
تعديل#🔥
الاسم يعكس معنى الروايه ....الروايه بناقش فيها حقوق الناس هاظوما يلي هما عايشين مهمشين في مجتمعنا كانهم ماليهمش حق يحبوا ويتزوجوا كيف غيرهم.....
