حكايات للكاتب " إسلام شاهين"

مشهد

-"قلبك عامل إيه دلوقتي؟! لسّة خايف؟!"
="أحسن شوية، بس لسّة الخوف مراحش"
-"متخافش"
="صدقيني مش بمزاجي"
-"طب قولي، خايف من إيه؟!"
="حاجات كتير"
-"خايف تموت؟!"
="خايف مَعِشْ"
-"ايه الفرق طيب؟!"
="مُمكن أفضل روح ف جسد، نفس طالع ونفس خارج وخلاص، من غير قلبي مش هعرف أحس، القلوب هيّ اللي بتضحك وهيّ اللي بتدمّع، لو قلبي بطل يحس مش هعرف أعيش، هبقى مُجرد جُثّة بتتنفس، ميّت مع إيقاف التنفيذ"
-"كمّل"
="بحس دايمًا إن عُمري قُصيّر، عشان كده بحتار، أجرب كُل احساس حلو ف الدُنيا؟! ولا بلاش أتعلق بحاجة كده كده هتروح منّي قُريّب؟! أقول كُل اللي ف قلبي قبل ما يتحوّل لحتّة حجر؟! ولا، ولا بلاش أقول حاجة أنا مش قدّها؟!"
-"خايف تقول اللي ف قلبك؟!"
="جدًا"
-"متخافش"
="صدقيني مش بمزاجي"
-" طب حاول، قول أي حاجة، أنا سامعاك"
="مش هقدر"
-"أنا فاهماك"
="مش هعرف"
-"جرّب، عشان خاطري، قولي مثلًا، نفسك تقولها إنّك بتحبّها؟!"
=".....................أيوة!!"
-"كمّل"
="نِفسي.......نِفسي تحس بيّا، وأخاف برضه لو حسّت، نِفسي ألمس إيدها، وأخاف لا أتعود على نعومتها، نِفسي أرقص معاها سلو على نغمات عُمر خيرت ونِفسي، نِفسي أجرّب حُضنها"
-"وإيه تاني؟!"
="عايز أقولها إنّي مملكش غير قلب ضعيف جدًا، بس بيحبّها بكُل قوّته، عايز أقولها إن قلبي لسّة مماتش عشان هيّ اللي بتسقيه إكسير الحياة، بضحكة منها، بنظرة من عينيها، بكلمة صادقة طالعة من قلبها، عايز أقولها إنّي...."
-"إنّك بتحبّها"
="أيوة"
-"طب ما يلا؟! قولها دلوقتي"
=ايه؟!"
-"اعتبرني هيّ، وقولها"
="ايه اللي انتِ بتقوليه ده؟! آآآه، احم، لأ لأ مش هينفع!!"
-"ليه بس؟! أنا سامعاك"
="مش هقدر"
-"أنا فاهماك"
="مش هعرف"
-"متخافش"
="صدقيني مش..."
-"بمزاجك؟! لأ بمزاجك، وبمزاجك تبطل تخاف"
="أنا........"
-"عايزة أسمعها"
="أنا....."
-"نِفسي تقولها"
="أنا..."
-"متخافش"
.
.
.
.
.
.
.
="................... بحبّك؟! "
-"حلو، قلبك عامل إيه دلوقتي؟! لسّة خايف؟!"
="أحسن.. أحسن كتير! حاسس وكأن خوفي راح!!"
-"هو فعلًا راح، وحلّ مكانه حُبّي ليك"
="بتقولي إيه؟!!!"
-"كُنت عارفة"
="إزاي!! كان باين عليا؟!"
-"كان باين عليك بتحب، ودي حاجة محدش يعرف يخبّيها"
="يعني.........يعني انتِ......؟!"
-"يعني انت من النهارده هتبطّل تخاف، عشان....."
="عشان.....؟!"
-"عشان أنا كمان بحبّك" =))