Moonlight Serenade (Complete)

Chapter 9

Isang bilugang mesa ang nadatnan niya sa dining area. Nakaupo si Gideon doon habang nagbabasa ng isang devotional book. Agad siyang naupo sa katapat nitong upuan at napansin niyang lumiko si Tang papunta sa back door.

"Kuya Tang, sa'n ka po?" tawag niya.

Nakangiting lumingon sa kaniya ang matanda. "Tapos na ako Maam Laine. Maghahardin na muna ako para makapagsarinlan kayong mag-asawa."

Napatingin siya kay Gideon nang umikhim ito. Nakita niyang bahagyang nakangiti ang lalaki. "May nilutong saging at kamote si Tang." Tinuro nito ang nilagang saging at kamote sa mesa.

Umasim ang mukha niya. "Hindi ako kumakain niyan."

Tumango-tango si Gideon. "Napansin ko nga sa mansiyon. Di bale, ipagluluto na lang kita ng maruya."

"Maruya?"

Napangiti si Gideon. Tumayo ito at nagpunta sa kusina. Ilang minuto itong hindi nakabalik. Napanguso siya. Inabot niya ang binasa nitong libro at binuklat.

The road to eternal life is a long and narrow path. Many do not, can not, and will not take that path. For they have forsaken the salvation that leads to life. They are the people who hardened their hearts and turn away from the truth.

They will never see life unless God permits them to do so and they turn away from wickedness. For anyone who hears the word but do not obey is not counted as worthy for the kingdom of God.

Napataas siya ng tingin nang marinig ang yabag ni Gideon. Agad niyang isinara ang libro at binalik sa dati nitong puwesto. Nakangiti ang lalaki at may dala-dalang plato na naglalaman ng isang... saging na nilagyan ng harina?

"Masarap ang maruya," sabi ni Gideon.

"Maruya pala 'yan?"

"You've never tasted a bit?"

Umiling siya. "Nakita kong binibenta sa University pero hindi ako bumibili."

Mas lalong lumawak ang ngiti ni Gideon. "Subukan mo."

Agad siyang dumampot pero nabitawan dahil sa init. Nangunot ang noo niya. Gideon suppressed a laugh. Marahas siyang bumaling sa lalaki. "Tinatawa mo?"

"Pasensya na. Gamitin mo 'yong tinidor para 'di ka mapaso."

Kinuha niya ang tinidor na nasa nilagang saging at makailang ulit na sinaksak ang maruya. Doon na nakawala ang pinipigilang tawa ni Gideon.

"Ano ngang tinatawa mo?" naiinis niyang tanong.

Naiiling namang natampal ni Gideon ang noo. "May problema ka ba?"

"Problema? Oo naman! Naiinis ako sa 'yo kaya imbes na sa 'yo ko isaksak 'tong tinidor, sa maruya na lang. Ayos?"

Marahang ngumiti si Gideon at hinawakan ang kamay niyang nakahawak sa tinidor. Nangunot ang noo niya nang dahan-dahan nitong tinusok ang maruya na katabi ng maruyang nasaksak sabay lagay sa platito niya. Agad naman nitong binitiwan ang kamay niya.

"Do you have your monthly..." Umikhim ito. "You seem too grumpy today, Jewel."

"Excuse me?"

Kumibot ang sulok ng labi ni Gideon pero hindi nagsalita.

Umikot ang mga mata niya. "You're really something, Hernandez."