Moonlight Serenade (Complete)

Chapter 36

"It's been a week, Laine."

Nangunot ang noo niya at nagpalinga-linga sa paligid, nagbabakasakaling makita ang Professor na nagngangalang Gideon. 

"Laine."

Bumaling siya ulit kay Jasmine at bumuntong-hinga. "Sorry? What is it again?"

"Hindi ka naman nakikinig, e. Sino ba kasi ang hinahanap mo?"

Nag-iwas siya ng tingin at bumuntong-hinga na naman. "Si Gideon."

"Gideon?" Nangunot ang noo ni Jasmine. "Well, maraming Gideon sa Pilipinas. Pero may kakilala akong isa. Si Professor Gideon. Siya ba, Laine?"

Napakurap siya, pagkuwan ay ngumiti. "Yes. N-Nasa'n siya ngayon?"

"Naku, sorry. Nag-resign siya, Laine. Mga three days after ka sinugod sa hospital. Hindi naman nagpaalam sa amin kaya hindi ko masasabi kung bakit."

"N-Nag-resign?" Tumango si Jasmine. Napalunok siya. "Kaya pala wala siya kanina sa klase?"

Umiling agad ito. "Partly yes. May bagong pumalit na Professor sa kaniya. Si Professor Isagani sa BSABE. Hindi ko alam kung sino sa ibang department."

"Pero bakit same room?"

"Sinabi ni Prof Isagani na bakante ang puwestong iniwan ni Prof Gideon kaya 'yon na lang ang pinili niya."

Nagbaba siya ng tingin at bumuntong-hinga na naman. Ulit. Natawa si Jasmine. "Uy, grabe ka. Ilang buntong-hinga na 'yon, a." Ngumiti ito nang makahulugan. "Nami-miss mo si Prof Gideon?"

"Who wouldn't?"

Huminga ng malalim si Jasmine at tinapik-tapik ang balikat niya. "Same feeling. Siya lang yata ang gwapong Professor na nakilala ko."

Ngumuso siya at pinaglaruan ang straw ng mango juice. Hindi lang naman kagwapuhan nito ang hinahanap niya. She is truly looking for her husband. The feeling is strange when he is not around.

KANINA pa niya hawak ang Iphone pero wala siyang lakas ng loob para tumawag. Hindi niya alam kung bakit hinahanap niya ito, at wala naman siyang maidahilan para tumawag dito.

Lumunok siya at nagpasyang pumasok na lang sa loob ng classroom. Naroon at nagsasaya ang buong B1, dahil nakapasa ang lahat sa midterm exam noong isang linggo. 

Siya lang yata ang hindi maka-relate dahil absent siya noong examination days. Tuloy, kailangan niyang magpunta sa Admin building para mag-take ng special test. Nagpakita naman siya ng Medical Certificate sa Dean ng Engineering kaya pinayagan siyang kumuha ng pagsusulit bilang alternatibo. 

Napangiti siya. Naalala niya kasi ang sinabi ni Gideon na kailangan niyang humanap ng paraan para masolusyonan ang problema niya. Kaya hiniling niya sa ama na ipakuha siya ng Medical Certificate bilang ebidensiya at dahilan kung bakit absent siya noong isang linggo. 

Hay, ngayon lang niya naintindihan kung bakit sinabi 'yon ni Gideon. Totoo nga, hindi sa lahat ng pagkakataon, may taong sasalo sa problema niya. Hindi sa lahat ng pagkakataon, may taong mag-aayos sa ginawa niyang gulo. 

Napailing siya. Oo nga, wala siyang makakapitan ngayon dahil nasa poder siya ng Papa at Mama niya. Mga istrikto at palaging pinagdidiinan na dapat maging perpekto. Okay. Magtitiis na muna siya ngayon. Kapag makakabalik na siya sa poder ni Gideon, may makakapitan na rin siya. 

Ang lalaking 'yon lang ang tanging pag-asa niya para makawala sa hawla. Si Gideon lang naman talaga ang taong palagi niyang hinihingian ng tulong. And she's confident, that he will never let her down. She knew it. 

Kailangan lang niya ng isang magandang rason. Isang rason na pwede niyang magamit para... naningkit ang mga mata niya. Umawang ang labi niya at masayang tumili. "I knew it!"