Moonlight Serenade (Complete)

Chapter 20

Madilim-dilim ang paligid kahit alas-cinco pa lang ng hapon. Marahil ay dahil 'yon sa papasok na Low Pressure Area na ngayon ay nasa timog-silangang bahagi ng Samar. Inaasahan na lalabas ang LPA sa Philippine Area of Responsibility sa weekend, ayon sa News.

Ilang minuto pa ay bumuhos ang malakas na ulan. Mabigat ang bagsak niyon pero hindi nagpatinag si Jewel. Determinado siyang naglakad sa ilalim ng mabagsik na ulan at pabugso-bugsong hangin.

Dumadagundong ang kulog at ilang segundong nagliwanag ang kidlat sa kalangitan. Napalunok siya at nagpatuloy sa paghakbang.

Pinuntahan niya ang faculty office para makita si Gideon pero sinabi ng faculty staff na wala roon ang hinahanap niya. At malamang ay nasa Agriculture building.

Bumuntong-hinga siya at pumasok sa gusali. Isinara niya ang payong at isinabit sa umbrella section na nasa gilid ng entrada. Niyakap niya ang sarili at naglakad papunta sa elevator. Sumakay siya at lumabas nang muling bumukas ang pinto sa 7th floor.

Tahimik niyang binaybay ang hallway. Mangilan-ngilang estudyante ang nakita niya. Marahil ay nagsisibalik na ang mga ito sa dormitoryo. Kunsabagay, uwian na at malakas ang buhos ng ulan.

Huminto siya sa dulo at tumayo sa harap ng pinto ng classroom ni Gideon. Kumatok siya at naghintay. Pero walang nagbukas. Siya na lang mismo ang pumihit sa seradura at pumasok sa loob.

"Gideon Manasseh?"

Madilim. Nakasara ang bintana at walang katao-tao. She should know. Wala si Gideon. Kaya pala tahimik at walang ilaw. Sinara niya ang pinto at binuksan ang switch sa gilid. Nagliwanag ang loob ng classroom.

Nilibot niya ang tingin sa loob, at nasamyo niya ang pinaghalong amoy ng perfume ni Gideon at ink. Tumingin siya sa white board.

Maraming nakasulat doon. Agricultural machineries, organic at inorganic fertilizers, tungkol lahat sa agrikultura. Nagbaba siya ng tingin. Mukhang hindi niya makakausap si Gideon ngayong araw.

Pumihit siya para sana lumabas kaso... bumukas bigla ang pinto. Niluwa niyon si Gideon. Basa ang suot nitong polo at tumutulo pa ang tubig-ulan sa noo at pisngi nito. Nang mag-angat ito ng tingin ay nagtama ang tingin nilang dalawa.

"Jewel?" Malalim at malamig na boses ang narinig niya mula rito.

Kagabi pa nang huli niyang marinig ang boses ni Gideon. Nag-iwas siya ng tingin at hindi umimik.

Nakita niya sa gilid ng mata ang paghakbang nito palapit sa kaniya. Huminga ito nang malalim at napahilamos ng mukha. "Why are you here?" tanong nito.

Nilampasan siya nito. Tinungo nito ang professor desk sa likuran niya at may kinuhang folder sa ilalim. May nilabas din itong water-proof envelope at nilagay doon ang folder.

"We need to talk," aniya at lumunok. Hinarap niya si Gideon. Wala itong sinabi kaya nagpatuloy siya sa pagsasalita. "Are you still considering a certificate to transfer for me? You know you can't do that. Nakasaad na sa contract na UDM ang college admission ko. Saka, hello? I'm starting a new life here."

Pinagmasdan niya ang mukha ni Gideon. Pansin niyang namumutla ito. Kumurap siya nang bumaling ito sa kaniya at humakbang palapit. Huminto ito sa harap niya.

Inabot ni Gideon ang buhok na tumakas sa mukha niya, at inipit ang hibla sa tainga niya. Ramdam niya ang lamig sa palad nito. "For you, Jewel... I can," bulong ni Gideon.

Nangunot ang noo niya. "W-What ---"

"If you're not behaving well, love." Tumaas ang sulok ng labi ni Gideon saka nilapit ang mukha sa kaniya. "Binigay ng security ang footage nang pagpuslit mo at ng mga kaibigan mo sa kabilang dormitoryo. If you think that you can hide everything from me, think again Jewel."