تزوجت كارهتي (رواية مغربية)

الجزء 1

اول حاجة بغيت نهضر على دوك البنات لي كيهزو لقصص و بلعاني كيحيدو السمية ديال الكاتبة....الأخت واش صافا شوية فراسك ...انا كنعيا و انا كنكتب فيها تجي نتي تهزيها باردة.....معنديش مشكل تهزيها ولكن تكتبي سميتي ...راه حشومة هادشي لي كديرو....
ونتمنا لي بغات تهز شي قصة تطلب مني الإذن ولا على لأقل تهزو سميتي معاها....وحتى سمية القصة متبدلوهاش ايلا كان ممكن

🍃كيقرب لجيهتها وهي كتبعد منو حتا لصقات مع الحيط كتشوف معندها كيف تهرب منو ....هاد المرة عارفة راسها غادي تمشي فيها فمرة لأنه حالتو مكتبشرش بالخير ...كتشوف فيه بكل إحتقار وإشمئزاز :متيقش راسك بزاف راك راجلي ... قرب ليها جبدها من خصرها وعينو كاملة كتوحي بالشر :نتي لي جنيتي على راسك ....شنو ندير فيك دابا امراتي الزوينة ....هااا شنو ندير فيك .........
شافت فيه بكل كره:گول شنو لي مزال مدرتي ....كرهت النهار لي قبلت نتزوج بيك ....كرهت النهار لي شفت فيه وجهك اول مرة .....نتا لي جبرتيني على هاد الزواج ...تحمل لعواقب
جرها من عنقها مزير عليها بكل جهدو حتا كتحس بعنقها غادي يتقلع ..حاط راسو فعنقها ....وكيتفكر نهار شافها اول مرة وقدرات تحرك قلبو ..القلب لي معمر شي وحدة حركاتو ولو شوية :عقابك وخيم هاد المرة متنتاظريش نرحمك ولو شوية (جرها بجهد مطلعها لبيت)
طلعات معاها الخلعة:طلق مني .....طلق ا زياد 🍃

غالبا غادي تكونو مفهمتو والو ؟؟وسمحوليا على هاد الدخلة ...هادو غير أبطال قصتنا لي المشاحنات بيناتهم من نهار تلاقاو مكيساليوش .....البطلة ديالنا هاد المرة بنت عندها 24 عام ...مغرورة وعنيدة ...كارهة للجنس الذكري ...حياتها كاملة وهي كتشوف فماماها كيفاش ساكتة على خيانات باها بحجة معندها فين تمشي من بعد ماماتو عائلتها وحتا الخدمة متعلمات حتا حاجة لي تقدر تصرف على راسها بيها و للأسف هذا هو لواقع ديالنا بالأخص فلمجتمع العربي ، لمرا ديما هي لي كتصبر ....
گالسا معاهم فوسط الطبلة ديال لعشا ساهية ...هادي هي حالتها فاش كتكون معاهم ديما

خديجة(الأم):بنتي غادي تباتي معانا ياك
عايدة(البطلة ديالنا ):لا منقدرش ....غدا عندي خدمة
خديجة:مفيها باس غدا فالصباح وسيري ...راه الطريق قريبة ماشي بعيدة
عايدة(تنهدات):ماماا ..بلاش مزال خصني نخدم على شي تصاميم هاد الليلة
هدى (ختها صغر منها بعامين قربات ليها ):منسيتيش دكشي لي واعدتيني بيه (غمزتها)
عايدة(بتاسمات ليها ):لا منسيتش ....غدا فليل غادي نجي ليك
هدى (كضحك من تحتها)
خالد(باباها):بنتي عايدة ...مكليتي والو
عايدة(دورات وجهها بلاما تهضر ):نخليكم ....تصبحو على خير
خديجة(تبعات عايدة):عايدة ...بنتيي تسناي راني سخفت بجرا
عايدة(ركبات فلوطو):نعااام اماما باقي شي حاجة أخرى
خديجة:متنسايش خوك سهيل راه فأخر السيمانة غادي يجي
عايدة:عارفة اماما ...(قربات ليها باستها)تصبحو على خير

خرجات عايدة بعد متفتح ليها باب ديال لڤيلا وكسيرات لشقة ديالها ...لي جات فوسط لمدينة ف منطقة فاخرة ..كيعيشو فيها ناس نقيين ..مكاينش حضيني نحضيك