تزوجت كارهتي (رواية مغربية)

الجزء 5

تمشات جيهت لوطو بعدما حل ليها شيفور لباب ...غير دخلات طلعات مع نيفها ديك الريحة الرجولية لي ملأت لوطو كاملة ....ركبات حداه من جهة لأخرى و حاسة كأنه رجليها مقادينش يهزوها
عايدة(كتهضر مع نفسها):اش هاد لوحلة...سير ا سهيل اش بغيت ليك...(دورات راسها جيهت الشرجم ديال لوطو بلاما تشوف فجيهتو نطقات بصوت خفيف ):صباح النور
زياد(شاف لجيهتها ونطق بصوت رجولي ):صباح النور
عايدة(كتهضر مع راسها):ناري على صوت عندو كيف داير
زياد(محيدش عينو عليها...وجه هضرتو لشيفور):تحرك

عايدة دورات راسها كتشوف فيه و دغيا رجعاتو لا يعيق بيها..بقات كتشوف فالطريق حتا وصلو لجيهت لمطار و دخلو مع شي باب من لور...غير كتشوف مفاهمة والو ...حتا تحطات لوطو ديالهم قدام طائرة خاصة...
خرج هو و عاد تبعاتو هي ..كتشوف فلهيئة ديالو من لور كيف عريض و طويل وهي كيف النملة قدامو...
طلع هو و موراه هي باقا كتحنزز كيف كيتمشى بكل غرور ..دارت نصف ضحكة على هاد الرجال لي معرف اش كيصحابو راسهم ...گلسات فكرسي وهو كيهضر مع لپيلوط ...عاد جا گلس مقابل معاها و كتفصل بيناتهم طبلة محطوط فوقها مشروب
عايدة:لقا غير هاد لبلاصة ...تف تف على نهار وكلت عليك الله ا سهيل و حتا نتي ا جهاد

بدات كتقلع الطيارة ووجهها بدا غادي و كيحمار...رغم انها دايرة راسها صعصع مع كلشي ...ولكن غير كتوصل لطيارة كيتقاداو ليها ....شدات فلكرسي و ضفارها مغروسين فيه مغمضة عينيها وعاضة على شفايفها  ....لمحها زياد لي أصلا محيدش عينو عليها ...كيحقق فتفاصيلها لي جذبوه ...صدرها لي كيطلع و يهبط والرجفة ديالها لي حمقاتو ....علاش بنت فحال هادي كتبعد عينيها عليه فكل فرصة جاتها...بل وأنها ممخلياش فرصة لي يگول ليها حتا كلمة....سمع منها كلمة وحدة هي "صباح لخير " ...
معرفش علاش كيفكر هكا ولكن حاجة وحدة  مأكد منها هي شي حاجة مميزة فيها مكاينة حتا عند وحدة أخرى من غيرها....
طلقات من لكرسي بعدما حسات بالطيارة طلعات....حلات عينيها..بانو شفرانها فازگين ....توجه نضرها نيشان لجيهتو هو بدورو لي ضربو الضو فاش شاف جيهت عينيها  لي أول مرة يلاحظ داك اللون العسلي لمفتوح ولي زادها جمال شفرانها لكثاف لي فازگين  ....بعدات عينيها عليه وهي متوترة من شوفاتو و حنيكاتها ولاو حمرين...خرجات ضحيكة صغيرة على وجهو مخفية من تحت اللحية السوداء ديالو، كيعبر بيها على مدى اعجابو ...

##بعد 3 ساعات كانو فمطار باريس :

هبطات هي ومعاها زياد...
عايدة (هزات لڤاليز ديالها وتمشات خارجة)
زياد(جعر من داك التصرف):مادموزيل
عايدة(دارت عندو):معايا؟
زياد(زير على سنانو):فين غادا
عايدة(هزات حاجب و حطات لأخر ):غادة فحالي ...لأوطيل ...نقدر نعرف علاش كتسول
زياد(شير ليها جيهت لأوطو):طلعي
عايدة(خرجات فيه عينيها):اش هاد ل..
زياد(زير على يدو وكيحاول يتكالما ):خوك وصاني عليك ....دابا طلعي بلا قوة لهضرة
عايدة(ضربات برجليها فلأرض وطلعات حداه ..هو لي كان سايگ)

جهاد(كتقلب فلبيت ديال عايدة ):فين دوك التصاميم عوتاني ... اوف انا مأكدة خليتهك هنا ....(جبدات تيلي )بففف نسيت غادي تكون دابا فالطيارة ..(قاست لڤاز بيديها حتا طاح)اش هاد الزهر عوتاني....
خرجات جيهت صالون تقلب فين حطات لملف ديال التصاميم....حتا جراتها شي يد
جهاد(يالله غادي تبدى تغوت حتا تسد ليها فمها):هاااآآآآ.....شنو كدير هنا ....
سهيل:نتي لي شنو كديري هنا داخلة مهجمة
جهاد(عقدات حجبانها):لا...غير جيت نقلب على ملف نسيتو هنا
سهيل(قرب ليها حدا وذنيها):اينا ملف ..
جهاد(هبطات عينيها...هو عاد حس بيها و بعد):احم ...غير نسيت ملف لبارح عند عايدة و جيت نديه...
سهيل:ولقيتيه ولا مزال
جهاد(عضات على شفايفها):لا ....مم...مزال
سهيل(خوا ليها الطريق):اه دخلى قلبي عليه
دخلات لصالون بزربة كتقلب....لقاتو محطوط مع ملفات اخرين محطوطين فالرف....قلباتو و تآكدات عاد خرجان
جهاد(دارت عند سهيل):انا لقيتو....باي
سهيل(يالله ناوي يهضر حتا بانت ليه خرجات هربانة خلاتو كيضحك موراها)

وصلو لڤيلا جات فلأخر ديال لمدينة...دخلو مع لباب كبير..دخلو مع جردة طويلة وهي كتشوف فديك لخضورة و لألوان ديال لورد لي حمقها....هبطو وطلع هو قبل منها وخلاها واقفة ...وصلتها غير لخدامة للبيت ديالها ...
عايدة(كتصوني على سهيل):واش انا غادي نبقا مع هذا فدار وحدة واش تسطيتي....
سهيل(بعد تيلي على وذنو):ايي...غير بشوية ...انا غدا غادي نكون تما ...
عايدة(قطعات عليه معصبة)
دخلات لبيت حيدات حوايجها و دخلان للدوش تغسل حالتها...خرجات نشفات شعرها و خلاتو على  راحتو و تكات فوق الناموسية ناعسة بلپينوار محاساش براسها بقوة لعيا....ضربتها بنعسة وحدة حتا الدنيا كلها ضلامت ...فيقها غير الجوع...لبسات عليها پيجامة على شكل شورط و تيشيرت فلأزرق طالع على خصرها و فيهم نجيمات بيضين...و دارت سماعات على وذنيها ....حلات لباب مبان ليها حد ...هبطات نيشان لكوزينة كتقلب على متاكل صايبت ساندويش دغيا وكلاتو عاد طلعات كتمايل على أغنية أجنبية...وهي حفيانة..كتحرك خصرها بكل إحترافيه مع لإيقاع وكطلع درجة بدرجة ....وكتغني فنفس لوقت وشعرها لي مطلوق و واصل لخصرها كيتمايل معاها... دخلات لبيت وهي مملاحظاش  دوك العينين لي كانو متبعينها فكل خطوة دارتها منين خرجات من لبيت حتا عاودات دخلات ليه ....

متنساوش تخليو معاكم ⭐و آرائكم