تزوجت كارهتي (رواية مغربية)

الجزء 69

♊تزوجت كارهتي ♊

♊بقلمي: مونيا لوباروس♊

💠بدونك اشعر و كأنني اصبحت خريطة بدون إتجاه . .

                  🔼🔼🔼🔼           🔼🔼🔼🔼

###فلاش باك###

زياد(كيغوت بحر جهدو):عااااااااييدة....... عاااااايييدة..... مكيهمونيش لولااااد ا عايييدة.....(تبعها كيجري ..طالع لبيتها وعروق وجهو و عنقو باينين)

جهاد(تمات غادة تابعاه)
سهيل:غير خليهم بحدهم....
خالد(ناض غادي لبيتو و جار معاه خديجة): خليهم يفكو مشاكلهم براسهم.....(عنق خديجة لي كتبكي و داها لبيت)

هدى شافت حتى عيات فيهم و هزات لوطو ديالها وخرجات مقدراتش على داك الجو لي خنقها....محاساش بحتى ديك لپيجامة لي لابسة...

خرجات من لڤيلا وهي مقاداش تشوف ختها كتعاني قدامها وغير غادي تزيد تعذب بهاد القرار لي خدات....عارفة مزيان زياد شنو كيعني لعايدة....

كسيرات حتى لجيهة ماكدو باش تاخد الطلبية ديالها غير من لوطو... حيت لماكلة هي لي كتنفس عليها شوية... معارفاش راسها كيف دارت حتى وصلات وهي مدايراش نظاراتها.....
دخلات لپاركينغ مكسيريا محسات براسها غير ولووطو تزدحات مع لوطو وحدة أخرى كانت قدامها.....

هدى(معصبة):هيييه واش مكتشوفش قدااامك..... وا لبشار... (هبطات كتغوت وكدق عليه من لوطو حتى خرج عندها) شوف شنو درتي....
أنور(رجع كيشوف فلوطو ديالو كاملة مضروبة ...وديالها بقات مزيانة) كنظن نتي لي دخلتي فيا اولا....مغاديش نتحاسب معاك تقدري تمشي....
هدى(طلعات ليها لقردة للراس):دابا انا دخلت فيك.... باينة مكنتيش داير نظاضرك....
أنور(تنهد):حتى دابا موقع والو للوطو ديالك... تقدري تمشي.. مغاديش نطلب منك فلوس لإصلاحات...
هدى(ضحكات بعصبية و هزات تيلي ديالها):غادي ندير كوسطا... والله مندوزها ليك...
أنور(هز كتافو) :واخا...

بعد نصف ساعة....

هزات لورقة كتقرا فيها و مقرباها باش تشوفها مزيان مع الشمس قاتلاها فعينيها وحتا نظاراتها ناسياهم....

الموظف:نتي ا مدموزيل لي فيك لفوتيڤ...وعندك مخالفة حيت مكنتيش دايرة نظاراتك أثناء السياقة
هدى(بدات كديماري باش تبكي):كيفاااش....واش... واش تسطيتو.... ماشي أنا....
أنور(شاف فساعتو):نتي لي كنتي مصرة نجيبوه....انا خاصني نمشي.... (شاف فحوايجها) وحتى نتي خصك تمشي... مجاتش تبقاي هكا برا....
هدى(بداو دموعها كيطيحو وركبات فلوطو بعداتها على الطريق وخرجات گلسات فوق طريطوار):اش هاد النهار يا ربي......
أنور(دار نفس الشي بلوطو ديالو.. ورجع هبط عندها):مادموزيل....غير مشكل بسيط ميحتاجش هاد الحالة كاملة......
هدى(هبطات راسها كتبكي):سيير بعد مني حتا نتا خليني...
أنور(گلس حداها  فلأرض ومد ليها لبرغر)
هدى(شافت فيه وخداتو من عندو كتاكل):احم.... سمحلي حست دخلت فيك...
أنور(بتاسم):ماشي مشكل... كتوقع ...لإنسان فاش كيكون معصب كيقدر يفقد لإحساس ديالو بلمنطق....
هدى(كتاكل ودموعها سايلين):انا ممعصباش.... ومكنتعصبش... انا غير بقا فيا لحال على شخص عزيز عليا...
أنور(بتاسم):بما أنه عزيز عليك لهاد الدرجة تقدري تعاونيه يخرج من هاد الحالة...
هدى(طلعاات فيه عينيها): ولكن... انا... خصني نسافر.... (بتردد) زعما.. نبقى هنا...
أنور(شاف فبعيد):ماشي بالضرورة.... تقدري تعاونيه عن طريق تحسسيه انك قريبة ليه...
هدى(حذرات راسها)
أنور:...مم وفين باغا تسافري..
هدى(كتلعب بيديها):نيويورك... على قبل لجامعة ...
أنور:مزيان .....يعني لا جيت لنيويورك نقدر نلقا معامن نتوانس....
هدى(ضحكات ليه):اهاه.. مرحبا... (حلات باب لوطو ديالها ومدات ليه ورقة صغيرة فيها نمرتها) هاهي نهار تجي علمني (هزات حاجبها) ولكن عنداك يگولك راسك نديرو انا وياك ركن التعارف...مامعاياش دكشي....
أنور(خدا لورقة و شاف فيها كضحك عليه):هههه واخا كوني هانية...
هدى(شافت راسها شنو لابسة وباش خارجة):ويليييي على فضيحة.... خرجت بهادشي.....
أنور(حبس الضحكة): الصراحة خصك ديري إعادة النظر فلألوان...
هدى(خنزرات فيه وضرباتو لكتفو):ومخليني خارجة هكا.... كان عليك غير تعلمني....
أنور(شاف فيها مصدوم)
هدى(دخلات للوطو وكتطل عليه من الشرجم):تهلاااا....

### نهاية لفلاش باك ###

أنور:ومن تما جيت لنيويورك تلاتة لمرات ...وتلاقينا...وهادي لمرة الرابعة....
عايدة(كتضحك):هههههه هاداك غير شوية من هبالها....
أنور(كيشرب من لعصير وكيضحك حتى بدا كيحس بيه غادي يخرج من نيفو)

هدى(وقفات عليهم):ناري خلعني سهيل.. تفكيت منو غير بزز گالك بغا يهدر معاك.... گتليه راك فتواليت فيك لإسهال...
عايدة(شافت فأنور لي تفرشخ بالضحك): هههه وما لقيتي غير لإسهال....
هدى(حكات شعرها):وا هو لي جا ليا فبالي....
عايدة(ضحكات ودارت لجيهة الطبلة هزات منها مشروب...):يععع شنو هذا لي شربت....
انور(شاف فهدى):ڤودكاااا هادييك...

⭐⭐⭐⭐⭐

جزء بعد قليل 👇👇👇