تزوجت كارهتي (رواية مغربية)

الجزء 26

قادات راسها...و خرجات دارت مكالمة ....وكلها كترعد وعينيها كلهم كره و ناوية على خزيييت ....و ناوية على خطوة غادي تهنيها من صفحة زياد فخطرة وحدة....هبطات للتحت تأكد انه خرج من لقصر فخطرة وحدة ....حتا تأكدات عاد تمات طالعة ....بانو ليها سمية و نيڤين گالسين كيشربو قهوة
سمية :عايدة.....كنگولو صباح الخير
دازت من حداهم و هي طالعة ليها لقردة للراس..طلعات فحالها بلاما تديها فيهم )
نيڤين(مفقوصة):شوف كيف طلعات بلاما تعطينا حتا وجه
سمية:انا غادي نوريها وجهها مزيان باش تعرف قيمتها...

طلعات لبيتها هزات تيلي ديالها و توجهات لبيرو ديالو لنفس لبلاصة فين لقات داك الملف بعدما حضات الطريق مزيان لا يشوفها شي حد ..دخلات و سدات لباب وراها وتوجهات للمكتب ...من حسن حظها لقات الملف باقي فبلاصتو مخفي بطريقة متقونة ....جبداتو وبدات كتصور ...رجعاتو لبلاصتو كيفما كان ....و خرجات كتسلت ....دخلات للبيت و تكات فوق ناموسية كتشوف فدوك التصاور واش واض واضحين مزيان...و إبتسامة عريضة على وجهها .....
بدات كتقرا فيهم عاد فهمات فين غادي يديها هاد لمرة.....حيت كاين مؤتمر فإيطاليا الأسبوع الجاي هادشي بان ليها فلجدول ديال المؤتمرات و بالضبط فميلانو كاين هاد المرة....نيت توحشات ميلانو...راه دوزات فيها أجمل أيام حياتها
(للناس لي معقلوش....عايدة كانت قرات لموضة فميلانو لمدة 4 سنين)

عيطات للخدامة باش طلع ليها لفطور ...حيت الشهية تحلات ليها ....حطاتو ليها فلبالكون ولالاهم عايدة حاطا رجل على رجل و فرحانة بلإنجاز لي دارت والتصاور لي سيفطات لواحد الشخص من بعد وتعرفوه شكون هو....

تعاشات لعشية وهي مزال فلبيت ....طلات بان ليها لپيسين تشهات شي عومة فيه....بلخف لبسات عليها لمايو و فوقو پينوار حريري و هبطات مشهية داك لماااا ....دازت من حداهم لتاني مرة ممعبراهمش.......نيشان مشات للجردة حيدات عليها لپينوار و تخشات فلما.....كتسبح فحال شي حورية و شعرها الطويل كيتحرك مع لما....
بدات كتعوم...حتا حسااات براسها كتجبد و شي قوة كبيرة دافعاه....كتجر مع لما....عياااات متقاوم ووالو لما لي غادي لمجرة باش يتخوا ..كيديها معاه....حتا بدات كتخنق.....
زياد لي يالله كان جاي فالطريق سول لي گارد باش يعرف فين كاينة....غير گالو ليه فلپيسين...دور لكاميرا لجيهتها ....حاط تيلي كيشوف فيها....وندمان على تصرفو معاها.....ولكن فعلا خاصو يبقا صارم معاها... كان وصل للقصر ديك الساعة ..حط لوطو و بقا شاد تيلي كيشوف فيها حتا فجأة كيشوف لپيسين كيتخوا من لماا...وعايدة كيجرها لمااا للمجرة لي كيتخوا فيها.....محسش براسو ايمتا وصل لتما ....تخشا هكاك بحوايجو ...بعدما وصاهم يحبسو إفراغ لما من لپيسين....غطس وهو قلبو كيحس بيه غادي يوقف....لقا رجليها واحلا ليها فلمجرة لي كتجر لما.....بدا كيحاول يجر رجليها....ولقوة لي كيتسحب بيها لماا..قوية ...دغيا تحبس دكشي.....جر ليها رجليها و طلعها...كانت فاقدة الوعي تماما....حطها فلأرض كيدير ليها التنفس الإصطناعي....بعد محاولات عاد بدات كتكحب و كتخرج داك لما لي دخل لجسدها.......

زياد(كيضرب ليها حنكها):عايدة....نتي مزيان دابا؟؟
عايدة(كتحس براسها دايخة وباقا كتكحب )
زياد(جرها عندو متكيها على رجلو):تنفسي بشوية
عايدة(كتحاول طلع النفس)
زياد(مخلوع):انا غادي نعبط للطبيب
عايدة(كتحاول تنوض...):لا انا مزيان دابا.....
زياد(جر داك لپينوار وغطاها بيه وهزها مطلعها للفوق...وهي بلاما تعتارض حاسة براسها جهدها كامل مشا ليها غير هزها تكات عليه )
سمية(جات كتجري):اويلي اش واقع....شنو طرا ليها
نيڤين(حتا هي جات لعندو):واش غرقات مكتعرفش تعوم
زياد(دار فيها تخنزيرة ...حتا طلعات معاها لخلعة): غادي نجي و نتفاهمو...(وطلع بعايدة للفوق)

نيڤين(طلعات معاها لخلعة)
سمية(شافت فيها):ياكما نتي مولات الفعلة ......يا ويلي منك گتلك مديريش شي حاجة من راسك....وكون قتلتيها دابا...
نيڤين(گلسات ):باش غادي نعرف غادي يطرا ليها هكا....غير بغيت نخلعها وصافيي
سمية(تمات طالعة):دابا ضبري راسك معاه....نتي عارفة زياد مزيان كيف داير ....انا غادي نخرج سوقك...نتي وياه
نيڤين(گلسات معصبة غير بحدها......تمات نايضة باش تهز لوطو ديالها و تفلت بلحمها)
لگارد(بالإنجليزية):متقدريش تحركي من هنا ...موسيو زياد وصانا ...ممنوع تخرجي)
نيڤين(هنا صافي عرفات راسها كحلتها گلسات بلاصتها و كلها كترعد.....من ديما غبائها كيخرج عليها)

عند زياد طلعها وهي دايخة...دخلها للدريسينغ لبسها پيجامة سخونة شوية...و حط ليها فوطة على شعرها لفازك ...عاد حطها فلفراش...دغيا نعساات محاساش براسها بقوة لعيا.... جبد علبة لإسعافات كيداوي ليها رجليها لي تجرحو فاش كانت كتحاول تجبدهم ...جا گلس حداها و يدو كيتحسسو حناكها لي بانو فيهم لي طراس زرقين مطبوعين...بقا شحال وهو حداها ويديه كدوز على شعرها ،جبد تيلي لقا لگارد مسيفط ليه لڤيديو لي مشات فيه نيڤين للغرفة لي فيها كيتم التحكم بإفراغ ولا تعمار ديال لپيسينات لي فلقصر كامل.....عينيه رجعو نقطة حمرة... غطا عايدة و خرج من لبيت.....هابط لعند نيڤين

⭐⭐⭐⭐