خضوع الاحلام +21 // Submission of dreams

الفصل الحادي والعشرون

همشت التليفون من ايد ام احمد "دجيبي صفر سبعة سبعة ..." ، 

ام احمد:"هاي شجاي تسوين؟ " ، 

ندى: "هاج خالة نقالج ، وفدوة انطيه رقمي يخابرني ، اني اسفة بس راح تشكريني بعدين" ، 

ندى سجلت رقم حيدر بورقة وركضت لسيارتهه ، وبسرعة فائقة رجعت للمستشفى حته مالحكت تبدل ركضت لغرفة احلام جان تلكه عمامهه يحاولون يكوموهه من السرير ، احلام عيونهه تصرخ "ساعديني" بس ندى من المفاجئة ماتعرف شنو تسوي...

راسا صاحت عليهم وين موديهه ، ابراهيم بخزرة وصوت عالي "نمنه بصالة الانتظار متنه من البرد ، وين رايحين بعد؟ راجعين لاهلنه" ، 

ندى "لا تعلي صوتك لا اجيب الامنية يسحلوك بره ، بعده الدكتور ما فحصهه يجي الدكتور وتوقعون عله تعهد وتطلعون هسه رجاء طلعوا" ، 

احلام عيونهه تغرغر بالدموع ، ما حجت ولا كالت 

ابراهيم كال "والله لو مو مرة" ، 

ندى بصوت عالي "شنو تسوي؟ اتحداك تحجي لو مو مرة شتسوي؟ خليني محترمتك واطلع بره لا اراويك وجه ثاني " ، ابراهيم خنس وماحجه و

اسماعيل حاصرته الضحكة "اي ابراهيم شتسوي؟" 

ابراهيم "انته انجب ، يلا طلعوا خل نشوف تاليتهه ويا احلام خانم" ، 

يحيى يلعب بنقاله "يبه انتوا روحوا واحنه نلحككم" ، 

ابراهيم "يا الاغم وانته تدبرهه تجي لوحدك امشي اطلع برة" وكلهم طلعوا...

ندى تقربت يم احلام ولزمت ايدهه ، احلام لا شعوريا ذبت روحهه باحضان ندى ، وبدت تبجي بحركة وتضحك وماتدري شتسوي ، ندى كالت "هاج هذه رقم حيدر ، وجواتهه كتبتلج رقمي ، حيدر هسه عنده واجب ومارد على اتصالاتنه ، رغم هذه الطريق كله اخابره ، وهسه دزيتله مسج بس راح يقراه اكيد يتصل" ، 

احلام "مشكورة حبيبتي ما قصرتي ، ماعرف شون اجازيج " احلام طبكت الورقة وخلتهه بصدرهه "بالخزنة المتحركة" ، ندى انطرحت عل السدية اللي بصف احلام ، 

ندى:"نعسانة ، شمسوية قابل؟ جاي احارب من اجل حبكم مثلما انتي تحاولين وبلكي الله يكتبلي قسمة حلوة اذا ماكدر اعيش قصة حب ، عل الاقل احارب من اجل وحدة" ، 

احلام: "الله يفتحهه بوجهج ، بس ندى سؤال خاص وبما انوا انتي تعرفين كل خصوصياتنه ، انتي حلوة وجميلة ..." وقبل لا تكمل احلام قاطعتهه ندى "حلوة وجميلة بس شعجب لحد هسه ما مرتبطة؟ مو ؟ هوه هذه سؤالج ؟" ، "

احلام: "اي بالضبط" ، 

ندى: "احلام اني ممرضة ، مرات خفر وابقى الليل بالمستشفى ومجتمعنه ما يتقبل هلشي ، لا الممرضة لا ام الصالون ، مجرد سمعتنه حسب مفهومهم مو زينة ، انتي بت البصرة وتعرفين هذه الشي وهسه من تعديت الخمسة وعشرين اللي يتقدملي لو جبير بالعمر لو يريدنه زوجة ثانية ويتزوج بالسر ، والاغلبية طمعانين بلحمي ..." ، احلام رادت اي طريقة تطلعهه من القلق اللي هي بيه ، تسولف باي موضوع دكات قلبهه عاليه ، تحس باختناق الدقايق تمر وحيدر لحد الان ما رد ...