غارقات في دوامة الحب

البارت الحادي عشر

البارت الحادي عشر.......
يوم الجمعه.... اذن الاذان لصلاة الجمعة وبدت الخطبة.... وندى وشوق إلى الحين نايمين من بعد ماسهروا سهرة امس.... تعبوا امس من الدجة ما ينلامون.......
طلع ابو فهد من غرفته بعد مااستحم وتعطر وتجهز للصلاة وتوجه لغرفة فهد يصحيه عشانها..... دق عليه الباب.... مرة ومرتين وثلاث.... لكن مامن مجيب.....
رجع يدق الباب : فهد..... فهد..... فهد......وكل هذا نوم.... ثم يامال القام......
واخييييييرا وصله الصوت..... بس صوت كلله نوم : سم..
ابوفهد : افتح الباب
ثواني وانفتح...
ابو فهد : حشا ماصارت نومة.... نفسي اعرف متى تنوم انت؟!
فهد : يبه كنت سهران امس للفجر
ابو فهد بحزم : سهران ولا مو سهران مو بمشكلتي.... يالله الحقني عالمسجد... الخطبة بدت
فهد وهو يتثاوب : ان شاء الله
نزل ابو فهد... وفهد سكر الباب وهو يحك راسة.... توجه للحمام وهو مدرووخ.... لما نزل ابو فهد راح للمرايه المعلقة على وحدة من الجدران يعدل شماغة... كانت أم فهد توها مسكرة سماعه التليفون....
الجوهرة بابتسامة عريضة : تدري من اللي متصل تو؟!....
عبد الرحمن منشغل بتضبيط العقال والشماغ : مين؟!...
الجوهرة والفرحة ماسايعتها :..... نجلاء التفت لها مبهوت والفرحة تطل من عيونه.....
........................
_ شوق...... شوووووووق.... شوق قومي.... هووو شوووووووق...!!!
فتحت عيونها ببطء وبتكاسل لقت ندى فوق راسها وتهزها باستمرار....
شوق : وش تبين خليني نايمة...
ندى : ماصارت.... تدرين كم الساعه الحين؟
شوق : لو انها المغرب بس خليني نايمة.....
ندى : طيب ابوي قال لي اقومك عشان الغدا قومي ينتظرك تحت
سحبت شوق وحده من المخاد وضمتها تبي ترجع للنوم
يوم شافتها ندى بتسترسل بالنوم سحبت المخدة من بين يديها.....
ندى : اقوووولها قومي تقوم تاخذ المخدة.... هيه قومي بس خلاص يكفي نوم...
شوق : ندى تكفين والله مالي نفس خليني نايمة...
ندى : يعني وش اقوله؟!
شوق : قولي له اني تعبانة من امس... لاني صدق تعبانة وراسي يعورني
ندى : طيب.... بس قومي صلي الجمعه وارجعي نومي
شوق : ان شاء الله بقوم....
طلعت طلعت من عندها ونزلت تحت لطاولة السفرة اللي الكل مجتمع عليها...
ابو فهد : ها قومتها؟
ندى : ايه.... تقول ماتبي...
ابو فهد باستغراب : ليش وش فيها؟
سحبت ندى كرسي وقعدت عليه : مافيها شي بس صداع... وخليتها ترتاح احسن
ام فهد :لايكون برد من عقب امس...؟!
ندى : هزت كتوفها... يمكن
فهد : اكيد... البنت مرضت من عقب ردحتكم البارحه وخبالكم...
ندى رفعت حواجبها يعني انت وش دخلك : اهم شي انها استانست....
هز ابو فهد راسه... وسمي بالله وبدأ ياكل والكل تبعه.....
.........................
في بيت ابو احمد.... كانوا ام احمد وسهى ونوف جالسين بالاله عند امل...
امل : ياربي كل ماتذكرت موعد الولادة اخاف....
ام احمد : ماله داعي تخافين.... إن شاء الله يسيرة...
امل : امين يمه امين
نوف : عاد لازم عقب ماتطلعين منها تشرحين لنا وش صار أثناء الولادة وش ماصار... ناخذ درس انا وسهى...
امل : تكفين انتي بعد... مارحت الا احبالي الصوتية.. احس اني بصارخ لما تتقطع....
ام احمد : ههههههههههه... انتي ياحبيبتي القصص اللي سمعتيها من الناس مأثرة عليك...
موكل الناس تكون صعبة معهم...
امل : يمة مدري ليش عندي احساس انها بتكون صعبه علي...
ام احمد : لا كل هذا من الخوف....
امل : يارب يسر علي يارب...
ام احمد : الا ياامل... مو انتي قايلة لي أمس أن عندك موعد في المستشفى اليوم...
امل تذكرت : ايه صح!!.... اشوى بمة ذكرتيني ولا كان فات علي...
سهى : ومتى الموعد.... ؟
امل : اظني بعد ساعتين... ورقة المستشفى تلقينها فوق الطاولة بغرفتي..
نوف : يعني بتروحون كلكم للمستشفى...؟!
سهى : ايه انا بروح عشان مرة وحده امر المكتبة... محتاجة بعض الأغراض للجامعه...
ام احمد : وانتي نوف بتقعدين؟
نوف : ايه وش يوديني؟!..... تعرفوني ماحب المستشفى ولا اطيق ريحته.... والمكتبة مالي خاجة فيها... (وبدلال) الا ماكان تودوني السوبر ماركت رحت معكم...
ام احمد باستنكار  : مافي سوبر ماركت... بتقعدين لحالك في البيت يعني؟
استغربت نوف من امها : ايه اجلس في البيت لحالي وش فيها... مو باولىمرة وبعدين الخدامات معي....
ام احمد : طيب اطلعي معنا شوفي العالم والناس... شوفي وش صار بالدنيا...!!
نوف : هوو يمة... تبيني اروح للمستشفى اكبر مكان للاكتئاب... لا والله اقعد في بيتنا ابرك لي... هزت ام احمد راسها...
نوف في بالها مستانسة... البيت بيفضى علي.... اتفرج عالتلفزيون براحتي... امي اكيد بتاخذ معها ريم ومحمد... لأنهم يحبون الطلعه... ولا يقعدون يزعجوني ويضاربوني عالقنوات...
لا وبعد بطلب برغر من.... ياسلام... من زمان مافضالي الجو....
امل كانت تراقب نوف ووجهها المبتسم... قالت بخبث : نوووووف... وش ناوية عليه انتي... انا عارفة انك ناوية على شي...
نوف تمثل انها بريئه : انا؟!!!.... ابد ماني بناوية على شي... سلامة قلبك
امل : عيني بعينك...
نوف : امل لا تقعدين تظنين شي... ابي اقعد في البيت يعني عيب...
امل قاطعتها  : الا ماقلتوا لي... شخبار الحفلة امس في بيت خالتي... والله لو ماكنت حامل كان جيب رزيت وجهي معكم....
نوف : حلللللللللوة... من زمان ما سوينا مثل هالحفلات البنوتية....
امل بسخرية : حلوة بنوتية... ليش يعني انا مانيب بنت... انا لساتي بنت ترا مو بعجوز.....
سهى تذكرت وضحكت : ياعمري شوق... ماشفتي شلون صاحت امس؟!
امل استغربت : صاحت؟!... ليش؟... وش صار؟
نوف : من الفرحة
سهى : خلتنا ندى نغني لها... والظاهر ماتسحملت وصاحت....
امل كشرت : ياعمري... من شفت شوق وانا اقول هالبنت شكلها حساسة والرقة تفيض منها...
نوف : ايه ماشاء الله عليها حبوبة مرة....
ام احمد قامت ' يالله اجل انا بروح البس عشان نطلع...
امل : وانا بعد الله يعيني...
قامت امل بصعوبة وبتثاقل وبجهد منهك...
وتوجهت للغرفة اللي كانوا حاطينها لها بالدور اللي تحت عشان الدرج بيكون صعب عليها.. ونوف توجهت لغرفتها تخطط وش بتسوي اثناء غياب أهلها عن البيت...
***********************
كانت ماتزال نايمة لما انفتح الباب.... شوي ووقظتها هزات يد صغيرة.... التفتت له بعدها ابتسمت...
شوق : هلا حبيبي..
عمر : سوق ليس نايمة؟
استقعدت على فراشها بكسل وقالت مبتسمة : عشان فيني ببوه هنا.. (وتأشر على رأسها )
عمر براءة وهو يحرك يديه : وينه ببوه؟...
شوق : هنا ببوه...
عمر وهو يدور الببوه : ماسوفه....
ضحكت شوق عليه... اكيد ماتشوفه... جوا راسي هو....
شوق : عموري ليش جاي هنا؟
رفع عيونه يتذكر هو ليش جاي.... بعدين أشرق وجهه بابتسامة برييييئه : ابي حلاوة....
شوق : وليش مارحت لندى تعطيك...؟!
هز راسه مبرطم : ندى ما في حلاوة... خلص...
مدت يدها على راسه بحنان بعدين فتحت درج الكومدينه وطلعت منها علبة ام اند امز وعطته... وقبل مايطلع مد يده ولفها حول رقبتها وطبع على خدها احلى بوسة ممكن تطلع من طفل... وطلع يركض فرحان....
اما هي رفعت الساعه تشوفها لقتها 5 الا ربع....
تذكرت انها للحين ماوصلت العصر.... قامت متوجهة للحمام... كانت لاتزال تحس بالصداع لكنه اخف من الاول....
بعد ماوصلت خذت لها حبة بندول....
دخلت ندى...
ندى : اخيرا قمتي.... مابغيتي....
شوق : حبيب قلبي عمر هو اللي قومني...
ندى : وش الطاري عليه... اكيد يبي شي
شوق وهي تضحك : يبي حلاوة... ويوم قلت ليش ماتروح لندى تعطيك... قال لي انه خلص.... وانا متأكدة انه ماخلص يالبخيلة....
ندى : اجل تبيني ابذر حلوياتي على بزران... إن عطيته كل مرة بينشب فيني
شوق : يالمجرمة هذا اخوك.... إن ماعطيتيه انتي من يعطيه؟!!...
ندى : انت موجودة الله يخليك له... المهم ترا ابوي يبيك تحت...
شوق : وش يبغى؟
ندى : مدري... بس قلتله انك تعبانه واكيد يبغى يتطمن عليك....
شوق : لحظة شوي خليني ارتب شعري... حوسة
وقفت قدام المرايه للحظات.... ولفت طالعه من الغرفة وندى وراها.... نزلوا مع بعض للصالة...
ابو فهد : هلا ببنت شوق تعالي اجلسي...
(وياشر بيده لمكان جنبه )
راحت وجلست.......
مسك يدها بحنان... وبإبتسامة : ها حبيبتي شلونك الحين...
شوق بادلته نفس الابتسامة : الحمدلله احسن بكثير
ابوفهد : ماتبين اوديك للدكتور؟
شوق : لا عمي ماله داعي... احسن اني طيبة الحين....
ابو فهد : طيب تراني قايل لهم يعزلون لك غدا.. اذا جايعة روحي كلي...
شوق : شوي مو بالحين... (وبأبتسامة )  ودي اجلس معك...
ابو فهد ضحك: هههههههههههههههه.... يابعد عمري...
جلست مع عمها يسولفون ويضحكون وندى معهم تشارك في الحوارات......
***********************
كانت نوف جالسة بغرفتها تنتظر البيت يفضى.... وفعلا لما كانت قاعده حست بالهدوء يعم البيت فطلعت تستطلع....
اشوى الحمدالله محمد مو بموجود ولا ريم هالصيوحة تنشب فيني.... تمغطت وراحت نزلت للصالة..... قعدت قبال التلفزيون تفرفر في القنوات وتدور وتبحث عن شي يجذبها......
لقت لها فلم اجنبي في وحدة من القنوات المختصة بالأفلام وحطت عليه..... ماكان فلم حلو مرة بس نوف تمت تناظره... شوي حست بالجوع ينغز بطنها فاستقرت على فكرة انها تطلب من هرفي....
ركضت للتليفون ودقت... وطلبت لها طلب وقالوا لها أن الطلب بيوصل خلال ساعه....
فكرت تروح تأخذ لها شاور بسرعه تنشط به جسمها قبل مايجي الاكل.... طنشت الفلم ولا سيما انه ماعجبها مرة ورقت لغرفتها وخلت التلفزيون مفتوح... ماتحب تخلي البيت هاجد مافيه صوت....
خذت  لها روب ولفت شعرها وغته بغطا عن المويه.... ودخلت الحمام.... وبدت الدش وهي تغني كالعادة....
خلصت وطلعت تلبس.... راحت وفتحت دولابها تختار...
رن الجرس...
استغربت... التفتت تشوف الساعه الموضوعة  عالكومدينة.... هم قالولي انهم بيجيبونه بعد ساعه مو بنص ساعه....