تكملة البارت الساد....
شوق طيب تتوقعين قام الحين
ندى : ايه اكيد... روحي
شوق : طيب تعالي معي...
ندى تهز رجلها وتركيزها كله عالسطور اللي قدامها : لا... هو قال يبيك انت بالموضوع ما قال جيبي ندى معك....
شوق : ندى عاد ساعديني شوي
ندى : مالي دخل... انتي روحي لحالك...
شوق وهي طالعة : ياللئيمة....
طلعت شوق ونزلت تحت..... لقت عمها قاعد يشرب شاهي مع مرت عمها ومافي احد من العيال موجود
ابو فهد : هلا شوقتي.... تعالي تفضلي
شوق : تسلم
جلست وهي على اعصابها.... تم العم ساكت فترة ويقرا الجريدة.... لمدة ربع ساعه يمكن وشوق معها بيالة الشاهي وعيونها عالتلفزيون لكنها كانت تفكر....
تمت تنتظر عمها يتكلم لكن ساكت.... خلاص تلفت.... وقررت هية اللي تسأله....
شوق بهدوء : اقول عمي...
رفع ابو فهد راسه مبتسم : لبيه....!!
شوق مرتبكة : ا.. ا.... انت قلت.... انك.... انك تبيني في موضوع.... وشو؟
ابو فهد تذكر لانه كان ناسي : اه الموضوع..... احم... شوق ؟
شوق استعدت تسمع.... وتعدلت في جلستها : سم....
ابو فهد : سم الله عدوك.... انت مرتاحة هنا؟
تفاجأت من السؤال : وش هالسؤال عمي.... اكيد مرتاحة
ابو فهد : لا.... مااقصد من ناحية الاكل والشرب والنوم.... انا اقصد........ من ناحية فهد....
شوق : فهد؟........ وش فيه فهد؟
ابو فهد : انا أسألك مرتاحة؟!.... من ناحية دخول فهد وخروجه من البيت ؟!
هزت كتوفها : وش اقول عمي.... هذا بيته يدخل ويطلع مثل مايبغى....
ابو فهد هز راسه مبتسم : ادري وهو بيتك بعد
شوق مرتبكة من هالسالفة : طيب عمي... وش المطلوب مني؟
ابو فهد : شوفي عيوني.... انت عارفة ان فهد من كم يوم يتغدا ويتعشا برا البيت... صح؟!
شوق : ايه ادري...
ابو فهد : وانت اكيد بتقعدين عندنا لما يجي نصيبك ان شاء الله صح ولا لا؟
شوق هزت رأسها :.... صح.....
ابو فهد : ومو بمعقول يتم فهد على هالحال إلى ذاك الوقت...
شوق نظراتها على كوب الشاهي بيدها :..... صح.....
ابو فهد : عشان كذا اطلب منك طلب تاخذين راحتك بالبيت وتعيشين زي ماندى عايشة
شوق بلعت ريقها : ويعني؟
ابو فهد : يعني يابنتي.... اعتبري فهد اخوك.... وانت اخت فهد.... عشان أنت تاخذين راحتك وهو ياخذ راحته..... هاه وش قلت؟
شوق عيونها للارض :... وش اقول عمي.... خلاص اللي تشوفه انا موافقة عليه
ابو فهد : شوفي حبيبتي انا مابي اغصبك على شي انتي ماتبين... و عالعموم انا بكلم فهد بهالموضوع....
شوق تهز كتوفها : خلاص عمي..... انت ابخص...
ابو فهد رفع يده وحطها على كتوفها يطمنها : يعني اكيد موافقة...؟
شوق ابتسمت : ايه عمي موافقة
ابو فهد : بارك الله فيك.... الحين خذي هالفلوس واشتريلك اللي تبين.... وان بغيتي اكثر لايردك الا لسانك
شوق : مشكووووور عمي ماتقصر
قامت حبت راسه ورجعت راقيه فوق... دخلت الغرفة... وندى على حالها مثل العادة اذا مسكت روايه معد فكتها
ندى وعيونها عالسطور : ها شوشو... وش السالفة؟
جلست شوق على السرير تتنهد : احزري....!!
تحمست ندى وصكت الرواية واعتدلت بجلستها....
ندى : يالله عاد قولي
شوق وهي تعفس بوزها : موضوعي انا وفهد..
ندى : اي موضوع؟..... اه.... لا يكون ذاك
شوق تهز رأسها : هو نفسه
ندى : شفتي قايلتلك ان الموضوع بيطلع من ابوي بنفسه....!!
شوق : ياخوفي تكونين انتي اللي قالتله....!!
ندى رفعت يدها تدافع عن نفسها : لا والله ماقلت شي ولا فتحت فمي بكلمة....
شوق تمد يدها بالفلوس : المهم هذي الفلوس خليها عندك لما نطلع
ندى خذت الفلوس منها : خلك من الفلوس الحين وقولي لي وش رديت عليه
شوق : اقنعني وقلت له موافقة
ندى : أحلفي!!!
شوق : هههههههههههههه والله.... ليش منتي بمصدقة؟
ندى : لا مني بمصدقة.... لاني قاعدة ايام اقنع فيك ولا اقتنعت.... صدق ابوي عنده قوة عجيبة
شوق : لاقوة عجيبة ولا شي..... انا قلت لك مااقدر افتش لفهد الا لما يكون عمي راضي..... وبعدين هو قالي انه بيكلم فهد....
ندى : انا قايلتلك من قبل.... ابوي يثق في فهد.... ولو واحد غيره ماقلك هالكلام.....
شوق : وهذا شي يريح بعد....
ندى : المهم وش رايك نروح للسوق بعد صلاة المغرب
شوق : كيفك مثل ماتبين
ندى : بس خلينا ندق على نوف يمكن تبي تجي معنا....
*********************
في بيت ابو احمد..... وتحديدا بالصالة..... كانوا احمد وسهى ونوف يلعبون اونو.....
ابو احمد وأم أحمد يتقهوون ويضحكون عليهم وعلى نوف خصوصا اللي كل ما خسرت صرخت وقومت الدنيا وقعتها....
نوف : لا..... انتوا متامرين علي.... يامخادعين...
احمد : ههههههههههههههه
سهى : هههههههههههههههه.... اجل اخليك تطمرين دوري... اعطي الدور لأحمد عشان ماتفوزين... احمد معه أوراق كثيرة....
نوف : انتوا غشاشين.... متفقين من قبل انكم تتبادلون الأدوار عشان مقدر العب....
احمد : ههههههههه.... اذا عندك اي اعتراض روحي كلمي اللي حط القوانين..... احنا نلعب على حسب القوانين...
التفتت نوف لابوها بدلع تطلب النجدة منه : باباتي.... شفهم..... يأمرون علي....
ابو احمد يضحك على دلع بنته : وش فيكم على حبيبتي.... خلوها تفوز... كل ماجنت تفوز سكرتوا عليها...
سهى ويدها على خصرها : ياسلام!!..... نخليها تفوز علينا... لا مايصير....
نوف بحسرة : الثلاث مرات اللي لعبنا فيها كلها بغيت افوز.... ومابقى معي الا بطاقة وحدة.... رحتوا اتفقوا علي وخسرتوني.....
احمد : ههههههههههههههه.... انتي مك مسكر ماتفكرين..
نوف بعصبية : يعني انا غبية؟!
احمد وهو يرمي بطاقة من بطاقات : والله اللي تفهمين...
نوف رجعت لفت على ابوها : باباتي.... شوفه يقول لي غبية....
ابو احمد : اها عاد حميد..... لاتغلط على حبيبتي....
نوف مثل الأطفال : ايه لاتغلط على حبيبته تفهم؟
احمد : كملي كملي..... يالله هالمرة دوري افوز.... مابقى معي غير ثلاث بطاقات...
سهى عشان تغيظ نوف : انا فزت مرتين وانت مرة.... بخليك تفوز عشان نتعادل انا وياك وشرايك؟
احمد بنبرة باردة عشان يغيظ اخته هو بعد : اوكي...
نوف رمت أوراقها : بطلت..... بطلت معد ابي العب....!!
احمد : هيي هيي..... خلاص انا بفوز الحين.... كملي اللعبة بعدين بطلي....
نوف : عناد فيك... منيب مكملة.... خلك عشان ماتفوز...
احمد : اقوووول عن الدلع.... بتكملينها غصب عليك..
نوف : ومين الي بيغصبني.....؟
احمد بثقة : انا..... ولا مرة ثانية مافي لعب معنا ان نجيب محمد ونخليه يلعب بدالك..
انصاعت نوف لهالكلام.... وتوها بتلعب دورها يرن التلفون....
قامت بترد وكانها تبي تهرب من اللعب...
احمد : تعالي... خللي امي ترد....
سفهته نوف وردت... : الووو...
ندى : السلام عليكم
نوف : وعليكم السلام هلا ندى..... شخبارك؟
ندى : تمام.... وانت؟
نوف : بخير.... بس قبل شوي مو بخير....
ندى : هههههههههههه..... ليش؟
نوف : احمدو و وسهى هالخايسة... متامرين علي بالانو.... وهزئوني....
ندى : هههههههههههههه...... ماتدري... احمد من صغره وهو فنان باللعبة.... مو بشي جديد...
نوف : برطمت.... متامرين علي ياندى... خلوني مااسوى...
و التفتت لاخوها احمد لقته يضحك عليها....
نوف توجه كلامها لاخوها : وش تضحك عليه انت بعد.....؟
كمل احمد ضحكةةوهو ساكت...
نوف : أوووووفففف كرهوني باللعبة.....
ندى : ههههههههههه... مادامك مشغولة باللعب اجل منتي بجاية معنا...
نوف بفرح : وين؟
ندى : بنطلع بعد شوي انا وشوق للسوق تبغى بعض الأغراض للجامعة ونروح ل shopping ... وقلت بدق عليك بشوف بتروحين ولا لا...
نوف : لا لا بروح اكيد.... من زمان ماطلعت للسوق...
ندى : اوكي ربع ثلث ساعه وبنجيك...
نوف : خلاص بقول لأمي...
ندى : حلو... باي
نوف : باي
سكرت والتفت لأمها : ماماتي
ام احمد : يانعم
نوف : ندى وشوق بيطلعون للسوق بعد شوي وابي اروح معاهم
احمد قاصد يغيظها : تروحين ليش؟!..... ماعندك شغل هناك...
نوف : وانت وش دخلك.... بروح أوسع صدري
ام احمد : بكيفك
من سمعت هالكلمة من امها طارت لغرفته تغير ملابسها.... لبست عبايتها وخذت شنطتها ونزلت لقت احمد وسهى على حالهم وكأنهم ينتظرونها تجي تكمل....
نوف : مابي العب كملوا لحالكن...
احمد : اقول تعالي بتكملين غصب عليك....
رن جوال نوف في هاللحظة..... طلعته من شنطتها لقت اسم ندى يتصل بك
نوف : مارح اكمل انطق انت وياها... ندى وشوق ينتظروني عند الباب..
ردت : هلا ندى.... اوكي طالعتلكم الحين...
سكرت والتفت عنهم ماشية بكل غرور وكبرياء... اول مافتحت الباب الصالة بتطلع للحوش استوقفها احمد
احمد : تعالي تعالي...
التفتت له لقته قايم بسرعة وكأنه ناوي يلحقها ومسكها ويمنعها من الطلعة
صرخت هي وركضت للحوش وبعده للشارع راحت فتحت باب السيارة
نوف برعب : وخروا وخروا خلوني اركب...
ندى خافت : هوو.... وش فيك مرعوبة... احد لاحقك؟
ركبت نوف وقعدت بينهم في وسط عشان مايقدر احمد
يطلعها.... ومدت يدها تسكر الباب
نوف بأطراف مرتجفة : احمد لاحقني... يمه يمه يخوف!!
شوق : هههههههههههه.... اخوك تراه مو بجني...
ندى : وليش يلحقك يالخبلة وش مسوية..
في هاللحظة طلع احمد لهم وتوجه للسيارة وضرب شباك ندى يطلب منها تفتحة
نوف تاشر بخوف : شوفيه شوفيه جا...
التفتت ندى.... اهتزت الأرض من تحتها... أنفاسها بدت تتسارع بشكل جنوني ودقات قلبها يعد.... بدت تحس باضطرابات عنيفة تزلزلها... ضرب الشباك مرة ثانية..
شوق : ندى افتحي الدريشة شوفي وش يبغى
نوف برعب : لا لا لا.... خليه مسكر...
لكن من غير ماتحس ندى بنفسها.... رفعت يدها وضغطت على الزر.... وظهر وجه احمد القريب منها بوضوح زلزل كأنها بعنف....
احمد : مين؟.... ندى؟
ندى بهمس : ايه ندى...... شخبارك؟
احمد تبدل عبوسه بسبب نوف إلى الابتسامة وسيعة : تمام.... شخبارك انتي... وشخبار الاهل؟
ندى : كلهم بخير....
أنت تقرأ
غارقات في دوامة الحب
Romansaطبعا هذي الرواية باللهجة السعودية ومن اروع الروايات و بالنسبة الي صار اكثر من مرة اقرأ بيها واتمنى ان تعطوني رأيكم بيها واذا فهمتو هذي اللهجة وحبيتوها رح اكمل باقي الحلقات وهي تكون وعدد حلقاتها (109)
