غارقات في دوامة الحب

تكملة البارت العاشر

تكملة البارت العاشر.....
فهد ببراءة : لا وش يدريني؟!
ندى : بلاك ماتجلس في البيت ابد... ولاتدري باللي يصير فيه....
فهد : عن الهذرة..... وردي علي......
ندى : اليوم مسوية حفلة سبيشل وعازمة بنات....
فهد بسخرية : وعلى شرف مين بالله؟
ندى : على شرف شوق... ارتحت... يالله عاد عطني الأشرطة....
فهد : وش معنى شوق بالذات...؟!
ندى بنفاذ صبر : اللهم طولك يارووووووح... بنت عمي وبسوي لها حفلة.... حرام يعني!!!
فهد والابتسامة في وجهة من شكل اختة : لا مو بحرام...
ندى : طيب بتعطيني الأشرطة ولا لا؟
فهد : وش تبين؟
ندى ابي أشرطة ترقص.... تردح.... يعني راشد الماجد.... عبد المجيد....  اللي اغانيهم تصلح لرقص....
فهد : روحي شوفي كل الأشرطة في درج الكومدينة... خذي اللي تبغين...
ماصدقت على طول ركض لغرفته.....
دقايق ودخلت ندى غرفة شوق....
ندى : شوق شوق.... شوفي..
كانت شوق واقفة قدام الدولاب تفتش في ملابسها : اووه اوه!!!.... وش ذا الأشرطة كلها... ؟!
راحت ندى ونثرت كل اللي في يدها عالسرير....
ندى :  هذي للحفلة.... عشان نرقص....
قعدت شوق على طرف السرير وبدت تقلب في الكاسيتات وتشوف..
شوق : وش جبتي؟!.... الله راشد الفارس...
ندى : تحبينه؟!
شوق : صوته مرة مرة حلو.....
ندى : جبت راشد الماجد وعبد المجيد وكذا مطرب خليجي....
شوق : والحفلة متى تبدي.... ؟!
ندى : يعني بعد صلاة العشا.....
شوق : طيب ندى انا محتارة وش اللبس؟
قامت ندى على طول للدولاب تتفحصة : ليش.... ماعندك اي شي شيك؟!
شوق : الا عندي.... بس مدري..... محتارة...
ندى : انا بلبس بنطلون.... وانت بعد البسي مثلي...
طلعت ندى واحد كان حلو : هذا حلو... البسيطه... والبسي معه اي شي زهر...
ظلوا يتناقشون لما استقروا على رأي....

بعد ساعتين... الساعه 7:30
كانت ندى تدور بالمطبخ تتطمن على كل التحضيرات بعد ما رقت شوق اللي كانت معها تساعدها عشان تلبس وتجهز.....
بعدها طلعت راقية فوق عشان تتجهز هي الثانية.... انتبهت لفهد بالصالة....
ندى : فهد.... ماطلعت؟!!
فهد : لا شوي وبطلع...
ندى : طيب البنات عالساعه 8 واصلين...
فهد : قلت لك شوي وبطلع.... لا ترنين فوق راسي
ندى : طيب اتمنى اذا طلعت ماترجع قبل 12..... اوكي... عشان تضمن انهم يكونون قد راحوا كلهم....
ورجعت لطريقها فوق..... قبل ماتدخل لغرفتها راحت لغرفة شوق وطقت عليها الباب
شوق : مين؟
ندى : ها شوق خلصت؟
شوق : تقريبا بس باقي الميك اب...
ندى : لما تخلصين... لا تنزلين انتظريني.... اوكي
شوق : اوكي
كانت شوق لابسة بنطلون جينز فاتح أنيق (اللي اختارته ندى لها )... ومطرز بشكل ناعم جدا.... ومعه تي شيرت بدون أكمام يعني cut ولونه زهر وفيه كلمات انكليزية مختلفة متداخلة مع بعض.... سشورت شعرها اللي يوصل لتحت كتفها بشوي  على فوق... ومع المكياج الوردي الهادي طلع شكلها مرة مرة كيوووت...!!!
بعد ماخلصت طلعت من غرفتها لغرفة ندى طقت عليها الباب.....
شوق : ندى انا خلصت....
ندى : ون مينت
في هاللحظة كان فهد طالع من غرفته ولابس بدله بنطلون وقميص وبيده كاب... ومبين عليه انه ناوي يطلع.... بس كان شكله جذاب وانيق هو الثاني.... قفل غرفته وخل المفتاح بجيبة والتفت... تسمر بمكانه!!!.... الطول والجسم المتناسق .....
كانت واقفة متسندة عالجدار وتلعب باظافرها اللي توها ملونتهم بالمناكير..... تنتظر عند باب غرفة ندى....
تقدم هو بخطوات هادية ووقف عند أول عتبة للدرج يبي ينزل.... رفعت راسها فجأة بدون ماتدري انه كان  واقف ..... وهو انصدم اكثر لما شاف وجهها.... من وين جا هالحلا كله مرة وحدة!!!..... لما انتبهت له بغت تروح لغرفتها بس هونت لما شافته لابس وناوي يطلع....
لكن وقوفه عند الدرج طول وابتسامته اربكتها... حست ان دقات قلبها بدت تتسارع بشكل جنوني ورهيب...
رفع فهد يده ولبس الكاب على راسه اللي خلى شكله أروع... شوق كانت عايشة بحاله رهيبة مو حاسة بنفسها ولا بالنظرات اللي كانت متركزة على ولد عمها... كانت تحس بشي مثل المغناطيس يجذبها هي ونظراتها...
في الاخير رفع فهد يده لها بعلامه الاوكي.... والتفت عنها ونزل الدرج بسرعه... وهي للحين مافهمت اللي صار... وذهنها ظل غايب عن الواقع ومشوش... الا لما سمعت صوت الباب الصالة يتسكر ويرجع لها وعيها...
التفتت للجدار ومدت يدها له تحاول تخلي بعض ثقلها عليه.... للحظات حست بالخمول ماهي قادرة توقف... لذا جلست عالارض واسندت راسها على يدينها...
طلعت ندى...
ندى : انا خلصت شوشو... قومي ننزل... رفعت شوق راسها وتسندت عالجدار عشان تقوم.... طاقتها كلها اختفت فجأة...
ندى : الله الله.... وش هالكشخة كلها... يجنن يجنن يجنن.....
شوق ضحكت : كله من عيونك الحلوة....
وانت بعد تهبلين رووعه مرة... لو يشوفك احمد بيموووووووت عليك....
فتحت ندى عيونها على آخرهم وضربت شوق بخفة : وش جاب طاري احمد الحين....
شوق غمزت : علي انا؟!!..... انا عارفة شعورك تجاه احمد من شفت الصورة... وذيك المرة اللي رحنا فيها لبيتهم اثبتت لي انك..... انك عايشة love story صح ولا لا؟!
ندى حمر وجهها : يالدبا.... خلاص ترا اصير طماطة...
شوق ضحكت : ههههههههههههههه..... يلله خلينا ننزل الساعه 8 الحين....
نزلوا مع بعض وشوق وقلبها اللي ماهدا للحين.....
كانت ندى في نفس مستوى كشخة شوق....
كانت لابسة بنطلون جينز بعد بس لونه غامق وفوقة بعد بلوزة كت بدون أكمام ألوانها مموجه مابين الأسود والسماوي والاورنج الهادي..... ومجعدة شعرها اللي يوصل لنص ظهرها وحاطة شارب اورنج عليه... وطلعت كأنها عروسة صغيرة... كتكوته ونعومة.....
جلسوا في الصالة ينتظرون ضيوف الحفلة... بعد دقيقتين اندق الجرس... نادت ندى الخدامة عشان تفتح الباب.... دقيقة وطل وجه بنت ومعها اختها.... واول ماشفتها ندى انعفس وجهها وقالت بهمس... : اوف وش جاب هالبلشة الحين....!!!
سمعتها شوق وعقدت بين حواجبها... من هذي اللي تضايقت منها.....
ندى تقدمت للبنت مبتسمة : هلا هلا مها...
مها : كيفك ندى.... وشلونك... وينك من زمان عنك...
ندى : بخير الحمد لله.... تعرفين كنت مشغولة... شخبارك انتي وشخبار الوالدة؟
مها : الوالدة بخير وتسلم عليكم
ندى : الله يسلمك وياها من الشر....
التفتت مها على شوق وعبست... وبشكل غير لائق أشرت باصبعها لشوق وقالت تكلم ندى : من هذي؟!
ندى استفزتها هالحركة : روحي سلمي عليها وتعلمك هي مين تكون؟....
تقدمت مها لشوق وهي مبتسمة ابتسامة مجاملة : هلا والله
بادلتها شوق الابتسامة وهي في قلبها ما هضمتها : هلا فيك.... كيفك؟
مها : الحمد لله... انت شلونك؟
شوق : تمام الحمدلله... انا شوق
مها قطبت حواجبها : شوق؟!!... مين شوق؟
ندى التفتت ترد عليها بعد ماسلمت على رشا اخت مها : هذي شوق بنت عمي... معقولة ماسمعتي ان بنت عمي جت تسكن عندنا....
مها بكبرياء : سمعت!!... لكني بصراحة ماصدقت...
ندى بنفس الكبرياء : لا صدقي... هذي هي قدامك...
شوق دخلت في الحوار : انا بعد ماصدقت في البداية ان عندي عم وعيال عم لما خبرني ابوي... لكني شوي شوي تقبلت الفكرة وفهمت ان مالي غيرهم...
هزت مها راسها مجاملة....
ندى : عن اذنكم شوي.... شوق انتبهي للجرس اوكي...
شوق : اوكي
راحت ندى راقية فوق...
التفتت مها لشوق : اجل انتي بنت عم فهد؟
استغربت شوق من سؤالها : ايه بنت عم فهد واخوان فهد بعد....
هزت راسها وخذت شنطتها وطلعت عطر وتعطرت.... وبعدها مراية عشان تعدل شعرها ومكياجها....
دخلت ندى غرفة امها اللي كانت تتعطر ولابسة....
ندى : يمة وين طالعه؟
ام فهد : بروح انا ونايف واختك منى لبيت خالتك سارة ازورها.... وانتوا بعد عشان تاخذون راحتكم....
ندى بضيق : اووووفف وش هالورطة؟!
ام فهد : خير وش فيك؟
ندى : جت مها واختها رشا بنات بنات جيراننا... مدري وش دراهم بالحفلة.... انا ماكلمتها ولا خبرتها ولا قلت لها شي...
ام فهد : انا اللي قلت لها...
ندى : ليش قلتي لها يمه... تعرفيني مااحبها  ولا اطيقها... اصلا متى قلتي لها؟!!
ام فهد : امس وانا عندهم بالبيت ازور امها بعد ما ولدت... سألتني عنك وكسرت خاطري وقلت  لها...
ندى : الله يهديك يمه.... ليش سويتي كذا؟
ام فهد : معليش ياندى جامليها..
ندى : تعرفين يايمة اني مليت من كثر مااجاملها... هي ماتخلي الواحد يعرف يحبها اصلا...
وراحت طالعه من الغرفة بعد ماعرفت كلامها مع امها مارح يفيد شي... البنت هذي راح تقلب الحفلة لنكد ونرفزة...
الله يعيني.... نادتها امها
ندى : سمي
ام فهد : شوفي اخوك نايف اذا لبس ومنى وتاكدي ان عمر بعد لابس وخالص... وقولي للخدمة تقول للسواق يشغل السيارة
ندى : ان شاء الله
راحت ام فهد وعيالها منى ونايف وعمر لبيت اختها... وبعد دقايق دق الجرس...
كانوا اللي جايين نوف وسهى وبنات عمهم.... (فرح... وحنان.... ودلال )
قامو ا ندى وشوق يرحبون فيهم... والوضع كان حلو الكل يضحك ويرحب ويسلم.....
بعد ماجلسوا.....
ندى : يالله من زمان عنكم يافرح.... وحشتيني؟
فرح : حتى احنا من زمان عنكم... من زمان ودي اشوفك مشتاقه لك مووت....
ندى : ياحبي لك... تشتاق لك العافية... عالبركة... سمعنا انك انخطبت... وتملكت قبل كم يوم...
فرح..... والحيا ياكل وجهها : الله يبارك فيك عقبالك
ندى : من ولده؟
فرح : من جهة خوال امي...
ندى : الله يسعدك يارب... وعقبال حنان
حنان : انا مافكر في الزواج الحين... بعد التخرج ان شاء الله
ندى : باقي هالسنة وتخرجين... استعدي
فرح التفتت لشوق : شخبارك شوق؟.... ان شاء الله مرتاحة...
شوق : الحمدالله... مادام اني مع ندى فأنا مرتاحة ومليوووون مرتاحه... مع انها تلعوزني بعض الأحيان..
ندى ضحكت : العوزها من حبي لها.... الله لا يخليني منها
نوف : من باقي ماجا؟
ندى : باقي صاحباتي ابتسام وخلود وهدى ونادية.... تلقينهم جايين بالطريق..
ماكملت جملتها الا والجرس يرن