သူငယ်ချင်းသုံးယောက်အကြောင်း [ Zawgyi + Unicode ] Completed

Chapter ( 3 )

ယာယီစာသင်ခန်း၌ စာသင်ကြားတာ ဆယ်ရက်ပြည့်ပြီးသည့်နောက်မှာတော့ မေဂျာများခွဲပြီးသည့်
စာရင်းထွက်လာလေသည်။

တစ်နှစ်ထက် တစ်နှစ် အမှတ်စာရင်း အပြောင်းအလဲ
အတိုးအလျော့ကြားထဲမှာ ကိုယ်တက်ချင်သည့်
မေဂျာမရကြသည့်သူများ တငိုငို တရယ်ရယ် ဖြစ်ကုန်ကြသည်မှာ ဆရာတွေကတော့ နှစ်တိုင်းကြုံနေရသဖြင့် ရိုးလို့နေလောက်ပါပြီ။

သူတို့သုံးယောက်ကတော့ အမှတ်မြင့်မြင့်နှင့် ဤတက္ကသိုလ်မှာ ဝင်ရောက်ခွင့်ရကြသူများဖြစ်သောကြောင့်
လျှောက်ထားသည့် မေဂျာအတိုင်းပင် တက်ခွင့်ရကြ၏။

စည်သူ က Civil က။
သုတနဲ့ ရောင်ဝါက Archi က။

ပထမနှစ် ဗိသုကာစာသင်ခန်းမှာ ပထမဆုံး စာသင်ရသည့် နေ့ နေ့လယ်ပိုင်း  သင်္ချာအချိန်တွင် Senior များကိုယ်စား ဦးဆောင်သူ ကျောင်သားများက Junior လေးများကို ကြိုဆိုသည့် သဘောဖြင့် နှုတ်ဆက်စကားလာပြောလေသည်။

စာသင်နေသော ဆရာမကို ခွင့်တောင်းလျက် အတန်းထဲသို့ ဝင်လာကြသည်။

“ မင်္ဂလာပါ အကို့နာမည်ကတော့ မင်းထင်လို့ ခေါ်ပါတယ်။ အကိုတို့ အခုရောက်လာတာက မင်းတို့လေးတွေကို ကြိုဆိုပါတယ်လို့ Senior တွေကိုယ်စား လာပြီး Welcome လုပ်ရတာဖြစ်ပါတယ် ” ဟု Intro ဝင်ကာ
နောက်တစ်ပတ်မှာ Fresher Welcome လုပ်ပေးမည်ဖြစ်သဖြင့် မပျက်မကွက် တက်ရောက်စေလိုကြောင်း၊
ပုံဆွဲသည့်အခါ သပ်သပ်ရပ်ရပ်ဖြစ်အောင်
ဘယ်လိုဆွဲရမလဲ စသဖြင့် ၁၅ မိနစ်လောက်ပဲ အချိန်ယူလျက် လိုရင်းကို ပြောပါသည်။

သူ့စကားသံသည် ဩရှရှနှင့် ဆွဲဆောင်မှုအားကောင်းလွန်းသည်ဟု နားထောင်နေရင်း ရောင်ဝါက သုတကို ခပ်တိုးတိုး ကပ်ပြောသည်။
မင်းထင်က လှမ်းကြည့်နေသဖြင့် သူတို့နှစ်ယောက်
ခါးမတ်မတ်ထားလျက် ခပ်တည်တည်နေလိုက်ကြရလေသည်။

“ EC ဘယ်သူလဲ ”

ပြောစရာရှိတာ ပြောပြီးသွားတဲ့နောက် မင်းထင်က
မေးလာသည်။ သူတို့ အတန်းမှာ အတန်းခေါင်းဆောင်
မသတ်မှတ်ရသေးပါ။  အားလူံး ပြန်မဖြေဘဲ နှုတ်ဆိတ်နေမိကြသည်။

သူက Black Board ပေါ်မှာ မြေဖြူဖြင့် သူ့ဖုန်းနံပါတ်ကိုရေးသွား၏။ EC ရွေးပြီးသွားလျှင် သူ့ကို ထို EC က
ဆက်သွယ်ပါဟု မှာပြီး ထွက်သွားပါသည်။

“ တော်တော် အထာကျတာပဲ ”

ရောင်ဝါက တိုးတိုးကျိတ်ကျိတ် မှတ်ချက်ချသောအခါ သုတသည် မင်းထင်က
ဘယ်နားက ဘယ်လို အထာကျလိုက်သလဲဆိုတာ ယောက်ျားချင်းဘယ်လိုမှ တွေးမရခဲ့ချေ။