သူငယ်ချင်းသုံးယောက်အကြောင်း [ Zawgyi + Unicode ] Completed

Chapter ( 36 )

နေခြည်မိုးက မိမိအပေါ် ဘာကြောင့်အခုလို ဆက်ဆံနေရသလဲဆိုသည့် အကြောင်းအရင်းကို သုတ အဖြေရှာမရဘဲ ရှိနေခိုက် ရောင်ဝါ့ထံမှ အားလုံးသိခွင့်ရလိုက်သဖြင့်
အံ့အားသင့်သွားရလေသည်။

“ ဟိုတစ်နေ့က မင်းနဲ့ စုလှိုင်ဝင်းရှိန်တို့ ရယ်မောစကားပြောနေကြတာကို နေခြည်မိုးက မြင်ပြီး
မင်းတို့နှစ်ယောက် မကြာခင်ကြိုက်တော့မယ်ထင်ပြီး
ရှောင်နေတာတဲ့။ ငါ့ကို ကိုလရောင်မိုး ပြောပြတယ် ”

ထိုအကြောင်းတွေကို ကန်တင်းမှာ ရောင်ဝါက စကားအဆက်အစပ်မရှိ ပြောပြလာသောအခါ သုတ ပျာယာခတ်စွာ ရှင်းပြရ၏။

“ ဟင် မဟုတ်ဘူးလေ။ သပ်သပ်အထင်လွဲနေတာပဲ။
ငါ စုလှိုင်ဝင်းရှိန်အပေါ်မှာ ဘာခံစားချက်မှ မရှိတော့ဘူး။ ငါ တကယ်ချစ်တာ နေခြည်မိုးဆိုတာ
ကိုလရောင်မိုးကို မင်းမပြောပြလိုက်ဘူးလားကွာ ”

“ အဲတာတော့ ငါတို့နဲ့ ဘာဆိုင်လဲ။ မင်းဟာမင်း
နေခြည်မိုးကို ရအောင်ပြောပေါ့ ”

“ မင်းက အားကိုးလို့ကို မရဘူး။ အဲ ... ဒါနဲ့ နေပါဦး။
မင်းကို ဒီအကြောင်းတွေ ကိုလရောင်မိုးက ဘာလို့ပြောပြတာလဲ ”

နောက်ကွယ်က ပက်သက်မှုကို ခန့်မှန်းနေဟန်ဖြင့်
အကဲခတ်သလို ကြည့်လာသော သုတ၏ မျက်လုံးများကို ရောင်ဝါ ရဲရဲမကြည့်ရဲဘဲ အိုးတမ်းအိုးတမ်းဖြစ်သွားလေသည်။

“ ဟို ... အဲ။ ငါတို့နဲ့ နှစ်ခေါက်တောင် တွေ့ဖူးတယ်လေ။
အဲတော့ ခင်သွားကြတာပေါ့ ”

“  ဟင် ... ငါနဲ့လည်း နှစ်ခေါက်တောင် တွေ့ဖူးကြတယ်လေ။ ဘယ်နှယ့် သူ့ ညီမကိုကြိုက်နေတဲ့ ငါနဲ့ကြ ရင်းနှီးအောင်မလုပ်ဘူး။ ငါ့သူငယ်ချင်းနဲ့ကျ
အဟင်းဟင်း ”

ရောင်ဝါသည် မသိချင်ယောင်ဆောင်လျက် အအေးပိုက်ကို စုပ်နေ၏။ ပြီးမှ

“ ကဲ အပိုတွေပြောမနေနဲ့။ မင်း နေခြည်မိုး ကို ကြိုက်နေတာကြာပြီကို လာလို့အခုထိ ဖွင့်မပြောသေးတာလဲ။
ကြာလာရင် သူများနောက်ပါသွားတော့မှာပဲ။ တနေ့တခြား  လှလှလာတဲ့ နေခြည်မိုးကို စိတ်ဝင်စားနေတဲ့သူတွေ အများကြီးပဲနော်။ မင်း ကျန်ရစ်ဖြစ်မယ်ဗျ ” ဟု
အမှန်တကယ် စိုးရိမ်စိတ်ဖြင့် သတိပေးသောအခါ
သုတ လေးလံမှိုင်းတွဲ့စွာ သက်ပျင်းတစ်ချက်
မှုတ်ထုတ်လိုက်လေသည်။