عَهـَد

19

" قفل ريان بوجهها وهو مقهور و التفت بيدخل .. بس الصدمة كانت لما طلع رعد وراه

وسامع

كل

شيء

رعد : وش اللي أنا سمعته ؟ "

ريان : لا تتدخل بأشياء ما تعنيك

مسكه رعد من تيشيرته و الصدمة معتليه وجهه

رعد : وش مسوي بالبنت؟

طالعه ريان و قال بكل برود

ريان : أتوقع إنك سمعت يعني مايحتاج أعيد كلامي

ضربه رعد بكس بوجهه خلّاه يرجع لورى لما صدم بالباب

رعد : ريان تسويها بدنا؟ زوجة ولد خالتك يالنذل؟

ريان : تضربني عشان المتخلف الطفل اللي مدري ليه كلكم معتبرينه زوجها؟

عدّل وقفته و رعد واقف قدامه مو مصدق اللي سوّاه صاحبه

رعد : أنت مستوعب حجم الخطأ اللي سويته ولا لا؟ ريان أنت مريض ولازم تتعالج

مشى ريان عنه ما يبي يضيع وقته بالكلام معه، ولحقه رعد لداخل بالمجلس

رعد : ريان اصحى على نفسك

ريان : أنا ماسويت شيء غلط

انفعل رعد بقوة وصرخ بوجهه

رعد : كيف ماسويت كيف؟!

ريان : أنا أحبها وهذا يكفي، لا تزيد بالكلام خلاص

رعد : لو تحبها ماضريتها يا النجـس ولا سويت سواتك السودا هذي، والله إنها ما راح تحبك وهذا أنا حلفت

ريان : ولأنها مب راضية تحبني خلها تاخذ جزاها، أجل تتزوج خالد تحسب إني بخليها؟ بأحلامها

سكت رعد مصدوم من عقلية ريان اللي كانت غريبة عليه مرّه، من متى وصاحبه واصل لهالدناءة بالتفكير؟

قرب منه وصار يضربه بقوة مغبون من اللي جالس يسويه، كان أعظم ذنب قد سواه هو إنه يشرب الخمر، و من يوم رجع رعد الرياض صار يمنعه عنها و فعلًا وقف ريان لفترة، وآخرتها يزيد ذنبه ذنب أقوى؟

ريان : فكني منك مب شغلك، مو أنت اللي تعلمني الصح من الغلط وأنت حتى أهلك تـ

كان ريان معصب من لقافة رعد اللي جالس يضربه ويهاوشه بدون حق على ما يعتقد، بغى يقول كلام قوي يخرب كل علاقة السنين اللي بينهم بس سكّته رعد