((((سكة السلامه )))))))
#لولو_محمد
الحلقه الثامنه
محمد / تصدقوا انا الغلطان انى مصاحب عيال انا مروح
سمره / خلاص ياعم همسحها خلاص متزعلش اهو مسحتها خلاص اهدى
محمد يلم حاجته و يسيبهم و يمشى
سمره / عاجبك كدا
محمود / ايه مكنش قاصدى
سمره / طب يلا نمشى احنا كمان
..........................
فى الفيلا
ساندى بتعوم رايح جاى فى البسين تاخد بالها مالبوكس تغطس تجيبه و تطلع تفتحه تلاقيه بايش خالص تفتحه تلاقى فيه ازازه او دو تويلت رجالى تحطها قدامها و تدحك و تعوم و هى بتدحك و ثوانى و تطلع تتنشف و تتصل بكريم
سندس / ايوه يا كريم انا بيس و انت .... تمام بقولك ايه عاوزه اعرف كل حاجه عن الرزل .... اه ابو فنله شاطر هو ...... مزاجى يا كريم لو مش هتعرف قولى هتصرف ..... مش هغلب يعنى .... اوك .... لا مش خارجه النهرده هستنى الاخبار بكره فى الكليه ... اه الصبح يا كريم الصبح سلام
سندس تقفل و هى بتنفخ و ساره تدخل عليها بمج نسكافيه
سندس / ميرسى
ساره / انبسطتى امبارح
سندس / كان يوم حلو انتى اخبارك ايه
ساره / كويسه بس اكيد كنا هنفرح اكتر لو خلتيه عائلى
سندس / هى فين العيله دى يا ساره انا و انتى و تيته فعلا عيله كبيره اوى عن اذنك
ساره / لو انتى مستشوياها فاحب اقولك ان دى كل اللى عندى انا كمان
سندس / يمكن جه الوقت انك تخرجى للدنيا و تكسبى صحاب جداد
ساره / انهى صحاب يا سندس صحاب يوم مموت محدش فيهم يحضر لا الدفنه و لا الصلاه عشان نصهم ياما نايم تعبان من حفله يا سهران لسه فى حفله
سندس / اهو على الاقل احسن ميبقى مفيش حد اصلا
...........................
فى شقه سلامه
سلامه / مالك ياض راجع مدايق ليه فى ايه
محمد / مفيش
صوت مالشارع / انزل يا برنس انزل
سلامه و محمد يبصوا لبعض و يطلعوا عالبلكونه يلاقوا محمود و سمره و اقفين
سلامه / ازيك يا محمد ازيك يا محمود
سمره / ازيك يا سلامه امال البرنس فين
محمد / عاوز ايه ياله
سمره / انزل بدل منطلعلك
محمد / طب لو راجل اطلع و انا احدفك من هنا
سمره / وله بلاش الجمله دى عشان انت عارف
محمود / خلاص ياعم احنا اسفين يا صلاااح انزل بقى عاوز ايه طيب
سلامه / هو فى ايه يا رجاله
محمود / سمره صور محمد و هو فى الجيم و نزلها عالنت
سمره / دى جابت مزز الدفعه يا برنس و ربنا
محمد / هنزلك
سلامه / ههههههههههه لا انا لو منك انزل دى منطقه اعراض
محمد / سلامه مش ناقصك
سمره / طب قسما بالله لو منزلت يا برنس لشير صورتك و انت عالبحر و انت عارف الصوره دى كويس
محمد / طب و ربنا لوريك
سلامه يدحك و محمد ينزل يجرى و سمره و محمود يجروا فى الشارع و محمد يجرى وراهم و ينط عليهم و يمشوا سوا
حنان / مشيو
سلامه / اه مشيو
حنان / مالك
سلامه / متجيبى طبق رز بلبن من جوه اما اطلعه لمصطفى فوق الراجل قاعد لوحده برضه
حنان / حاضر
..............................
فى الكليه تانى يوم
كريم / دا طلع سواق ميكروباص
واحد / ياريت سواق دا اللى بيقعد ينادى ورا عتبه عتبه عتبه ده عرفاهم
سندس / والله من اول مشوفته و قولت عليه بيئه
واحده / مشوفتيش دى يا سندس
برنت اسكرين من الصوره اللى شيرها محمود
البنت/ نزلت تلت دقايق امبارح على صفحه صاحبه و اتشالت علاطول
كريم يشد الموبايل منها و يشوف
كريم / تافه اوى
البنت / تافه ايه يابنى بصله و بعدين كلنا شوفناه ازاى كوم امجد الخميس فبلاش انت ماشى
كريم / و بلاش انا ليه يعنى ان شاء الله
سندس / خلاص يا جماعه صورته دى متهمنيش فى حاجه انا كل اللى يهمنى انى احرق دمه و خلاص
واد تانى / انتى اصلا شاغله نفسك بيه ليه تحرقى دمه و لا متحريقوش انا لو منك اطنشه
سندس / عشان مدايقنى البيه جه بكل بجاحه عيد ميلادى و جايبلى برفيوم رجالى هديه و ياريت بيرفيوم دا او دو تويلت تخيلو المعفن
كريم / انتى اصلا ازاى تسمحيله يدخل الحفله مطردتيهوش ليه
سندس / متعودش اطرد حد من بيتى انا برده زوق
كريم / كنتى نادينى و انا هطلع عينه انا
سندس / المهم ملقيناش عليه غير انه بتاع ميكروباص الحمد لله بصراحه حاجه تفرح
الواد الاولانى / بصى يا ساندى مالاخر كدا الواد ده فله دحيح و مش بتاع مشاكل ففكك منه هو تلاقيه بيعيش عليكى شويه
البنت / كان بيحب بنت فى دفعته و قلشته
سندس / و انتى عرفتى منين
البنت / دا جروب تلجرام عملوه البنات يوم الخميس بعد الخناقه و اهو كل واحده بتدور بمعرفتها
سندس تخطف منها الموبايل و تقلب فى الكلام و الصور
البنت / امال يعنى انا جبت الصوره منين
سندس / ايه البنات دى كلها و ايه الصور دى كلها هو فى ايه مالكوا
كريم / ممكن تهدى
سندس/ انت مش واخد بالك انا بدل مزله شهرته شهرته يا كريم
البنت / و اللى بتعمليه ده هيديله اكبر من حجمه على فكره انا بقول تشيليه من دماغك خالص
محمد و صحابه معدين سندس تقف ثوانى و بعدين تنادى
سندس / عتبه
محمد يلف و يبص تخبط ايدها فى ايد كريم هاى فيف لو فايف
كريم / عتبه عتبه عتبه عبوووووود
محمد يرجعلهم و يبص لكريم
محمد / مش عيب والله احسن مركب عربيه جوز امى هو اللى جايبهالى
كريم / انت بتكلم مين كدا ياله
محمد / انت يا حيلتها
البنت / كريم كريم خلاص
كريم / البيئه اللى زيك لازم يتربوا عشان يعرفوا يكلموا اسيادهم ازاى
محمد / اسياد مين ياله دانت لولا واقف معاها كنت خدت معاد عشان تكلمنى
محمود / خلاص يا برنس سيبه دا خفيف
محمد / صح يلا بينا
سندس تبص لكريم
سندس / والله دا اخرك ..... ليها حق تسيبك
محمد يقف
سندس / انا اصلا مش عارفه هى اصلا شافت فيك ايه عشان تحبك و لا يمكن اصلا كانت بتتسلى بلعبه تافهه زيك لحد ملقت حد يملى عينها تتجوزه
محمود يلف لسندس محمد يشده و يمشوا
........................
فى الفيلا
مهاب فى المكتب شغال عاللاب سندس تدخل و عنيها حمره دم
مهاب / فى ايه يا ساندى حد عملك حاجه كريم زعلك
سندس / لا يا ابيه كريم معملش بس
مهاب / فى ايه احكيلى اقعدى شكلك معيطه
سندس/ انا مش عارفه افتح الموضوع ده ازاى بس فى حاجه لازم تعرفها عشان
مهاب / عشان ايه يا بنتى اتكلمى
سندس / عشان لو حصلت اى مشاكل بعد كدا تبقى فى الصوره
مهاب / قولى يا قلبى فى ايه
سندس / فى واحد فى الكليه بيدايقنى دا وصلت بيه الجراه انه يجيلى لحد هنا يا ابيه جوه الفيلا
مهاب / واحد مين ده
سندس / اسمه محمد حسن عبد الهادى البرنس هو اسمه كدا فى رابعه
مهاب / محمد البرنس انا عرفه كويس انا درستله دا
سندس / هو انا هكدب يعنى هتبلى عليه
مهاب / لا بس يمكن اللى اداكى اسمه اداكى اسمه غلط
سندس / لا يا ابيه هو و مش اول مره حدفنى مره بازازه ميه فاضيه و رمى نفسه قدام عربيتى و بيخبط فيا فى الرايحه و الجايه و كل الناس تشهد دانا مره جبت واحد صاحبى الكليه اتخانق معاه و ضربه كان هيموته دا خنقه بالحزام يا ابيه انا خايفه منه اوى يا ابيه بقولك دخل الفيلا
مهاب / انا مش مصدق بس اكيد طبعا مش هسكت
سندس / لازم تفصله لازم لازم انا خفت اقول لابله فريده انت عارف انها هتكبر الموضوع و ممكن تروح للعميد و تبقى فضيحه يا ابيه انا معرفتش اروح فين غيرك بليز ساعدنى انا خايفه منه اوى اوى دا حتى اتخانق امبارح فى الكليه مع كريم و كان هيضربه لولا الناس حاشت بينهم
مهاب / لا الموضوع كدا ميتسكتش عليه انا عندى بكره محاضره لرابعه و هاخده المكتب و نشوف
...................
فى الكليه
فى مكتب مهاب مهاب جوه الباب يخبط و محمد يدخل
محمد / ايوه يا دكتور حضرتك طلبتنى
مهاب / فى شكوه متقدمه ضدك انك بتدايق طالبه فى الكليه هنا
محمد / محصلش و لو فى اى حد بيتهمنى بحاجه زى دى ياريت حضرتك تواجهنى بيه
مهاب / سندس المصرى
محمد / مين سندس
مهاب / بنت عمى و اخت مراتى انا بكلمك ودى و مش عاوز الموضوع يكبر
محمد / ساندى
مهاب / ايوه ساندى
الباب يتفتح و ساندى تدخل تبوس مهاب و تقعد
سندس / ازيك يا ابيه
مهاب / اقعد يا محمد
محمد يقعد قدامها و هى مدايقه
مهاب / محمد بيقول انه مدايقكيش
سندس / مهو لازم ينكر طبعا
مهاب / سند قصدى ساندى بتقول انك دخلت الفيلا عندنا و خوفتها
محمد / المره الوحيده اللى دخلت فيها الفيلا عند حضرتك كانت يوم عيد ميلادها و كانت قايله انها عازمه الدفعه كلها فانا روحت اعتزر و كنت جايب هديه اللى هى رمتها فى حمام السباحه فمشيت مش اكتر من كدا
سندس / او دو تويلت رجالى
محمد / الله انتى نزلتى جبتيها طب مكان مالاول
مهاب / محمد
محمد / اسف يا دكتور
مهاب/ طب اتخانقت اكتر من مره مع اصحابها
محمد / طب تمام انا اول يوم فى الكليه الاستاذه سندس
سندس تجز على سنانها
محمد / كانت هتخبطنى بعربيتها و مش بتعتزر لا دا الاستاذه سندس نزلت مالعربيه و شتمتنى و انا مردتش عليها و كمان جابتلى واحد يضربنى جوه الكليه دا غير يوم السبت لما وقفت هى و صحابها يدايقوا فيا قولتيلى ايه يوميها اصلى مش فاكر
مهاب يبص لسندس
سندس / و انت خبطت فيا اكتر من مره و وقعت الكاتشب على هدومى
محمد / كانت حادثه لما خبطت فيكى كانت حادثه مش مقصوده و الازازه والله مانا اللى رميها و رحمه ابويا مانا اللى رمتها و جيت و اعتزرت بس على فكره حوار السبت مش هسامح فيه
سندس / اعلى مافخيلك اركبه دا لو كان عندك خيل اساسا
محمد يبص لمهاب
مهاب / اوك خلاص انا سمعت ممكن يا ساندى تسبينى انا و محمد لوحدنا
سندس / و حقى
مهاب / اوعدك ان الغلطان هيتجازى
سندس تطلع و ترزع الباب وراها
مهاب / سندس بنتى الصغيره و انا اسف ان كانت دايقتك بس انا ليا عندك طلب
محمد / اتفضل
مهاب / انا عارف سندس مبتستسلمش و لو مش انا هيبقى غيرى و مش هتسكت لحد متعمل اللى هى عوزاه
محمد / اسف مش فاهم
مهاب / اعتزرلها راضيها
محمد / اسف انا مغلطتش عشان اعتزر
مهاب / محمد انا عمرى فى حياتى مظلمت طالب عندى خصوصا لو زيك و صدقنى هزعل اوى لو الموضوع كبر عن كدا
محمد / انا بحترم حضرتك جدا يا دكتور بس اسف انا بحترم كرامتى برده
مهاب / ماشى اتفضل
محمد يمشى و يطلع بره يلاقى سندس واقفه عالباب يروحلها
محمد / كل لعب العيال اللى فات انا كان ممكن اعديه بس انك تحاولى تاذينى فمستقبلى ده اللى مش هسامحك عليه يا ....سندس
سندس / ابو فنله
محمد يسيبها و يمشى
.......................
فى الفيلا
فريده / انتى ازاى تعملى كدا ازاى تحطى مهاب فى موقف زى ده
سندس / انا معملتش حاجه غلط انتوا اللى مش عاوزين تصدقونى و صدقتوه هو انا اختك على فكره المفروض تبقى فى صفى
فريده / و لانى اختك عارفه كويس انك بتكدبى انتى ايه اللى جرالك من يوم مبابا مات و انتى بقيتى عاله علينا انتى متخيله انا بسمع كلام ازاى من زمايلى بسبب ان انتى اختى انتى متخيله انا ببقى محرجه قد ايه اختى بالمنظر ده
سندس / تقدرى تتبرى منى قوليلهم مجرد تشابه اسماء و لو انا اعر اوى كدا فعلى الاقل انا مش بخبى حقيقتى زيك
سندس تمشى و تروح اوضتها و تقفل على نفسها الباب
فريده / عاجبك يا ساره عاجبك اللى هى بتعمله ايه اللبس ده فى واحده تروح الكليه كدا فى واحده تحضر محاضره بشعر ازرق مهاب كل يوم فى حوار مع دكتور شكل بسبب منظرها احنا خلاص تعبنا منها شوفيلك حل
الست الكبيره تدخل
الست / ودوها ملجا لو اختك تقيله عليكى اوى كدا وديها ملجا مهى يتيمه برضه او اقولك ارميها فى الشارع او سميها ايه رايك تدفنيها بالحيا و هو محدش هيسال عليها
فريده / يا تيته انتى مش شايفه تصرفاتها مش شايفه بتعمل فينا ايه مهاب النهرده بسببها طالب عنده رد عليه الهانم بتاجر بلطجيه و تدخلهم بعربيتها جوه الكليه يضربوا الطلبه و بتتبلى عليهم دا غير الغياب كل الدكاتره بيشتكوا منها ايه اللى جرالها بس
ساره / انا هحاول اتكلم معاها
الست / لو كان اسلام هنا
فريده تصرخ / اسلام مات اسلام مات يا تيته مات
الست / و بتعيبى على ربايه سندس ربنا يسامحك انا طالعه اوضتى انام على الله اطلع منها على قبرى اكرملى عن اذنكوا
ساره / فريده
فريده / نعم فى اى حاجه عاوزه تضيفيها عاوزه تقولى حاجه تجرحينى بيها انتى كمان
ساره / سندس محتاجاكى تملى فراغ ماما الله يرحمها
فريده / انا ماليه فراغى بالعافيه متحملنيش اكتر من طاقتى
ساره / طب اهدى بس انا هتكلم معاها
........................
عالقهوه
حمدى / بنت الكلب هو فى كدا يا جدع فى جباروت كدا
محمد / المشكله معدتش فى البنت المشكله فى اختها و جوزها بيدرسولى يعنى مادتين طاروا و مش بعيد بقى زمايلهم يجاملوهم على حسابى
حمدى / ليه يا جدع هى فوضى
محمد / مشوفتش الدكتور و هو بيقولى لو مش انا هيبقى غيرى راضيها
حمدى / تراضى مين ياعم هى سايبه و لا ايه
محمد / انا مش عارف اقول لسلامه و لا لا
حمدى / لا هو فيه اللى مكفيه بقاله فتره مش معانا خالص لا بيقعد عالقهوه و لا بيلعب معانا زى زمان حتى حنان بتقول انه علاطول ساكت و سرحان
محمد / انا سالته كام مره قال انه مرهق
حمدى / لا يا محمد اخوك زعلان فى حاجه كاسره نفسه
مصطفى يدخل
مصطفى / السلام عليكم
حمدى / اهلا يا هندسه تعال اشرب شاى
مصطفى يشد كرسى و يقعد
مصطفى/ مالك يا محمد فى حاجه و لا ايه
محمد / شويه مشاكل فى الكليه
مصطفى / خير ان شاء الله
حمدى / بقولك ايه يا هندسه لا مؤاخذه يعنى حنان قالتلى ان سلامه طلع قعد معاك فوق كذا مره
مصطفى / اه حصل
حمدى / مقالكش ايه اللى مدايقه
مصطفى / لا مخدتش بالى انه مدايق اصلا كان بيطلع يشرب شاى و ينزل علاطول مكنش بيتكلم عشان افهم يعنى
حمدى و محمد يبصوله
مصطفى / هو فى حاجه مديقاه
محمد / سلامه متغير بقاله فتره
حمدى / من يوم مولاد الكلب دول رفضوه
مصطفى / بس هو قال ان الموضوع ده مش فارق معاه
محمد / مهو قالنا كدا برضه بس متغير من يوميها
مصطفى / طب منكلمه يا جدعان
محمد / حاولنا كتير مفيش فايده
مصطفى / طب اجرب معاه انا يمكن ربنا يكرم
حمدى / يعنى محكاش لعشره عمره و هيحكيلك انت
مصطفى / الله اعلم
........................
فى اوضه سندس
سندس قاعده عاللاب و حاطه الهاند فرى و بتسمع اغانى بصوت عالى تدخل ساره و معاها علبه ايسكريم كيلو شيكولاته و جواها معلقتين و تقفل الباب و تروح جنب سندس و تشد بنه السماعات تطلع موسيقى بلاك ميتال سندس تقفل الصوت
ساره / ايه اللى بتسمعيه ده
سندس / اى دوشه و السلام عاوزه ايه لو ناويه تدينى دروس وفريها مليش مزاج
ساره / انا قولت نهدى اعصابنا بايسكريم احسن
سندس / قشطه هاتى
ساره / اجيب ايه كلى معايا مش خديه
سندس / ماشى اى حاجه
سندس تاكل مع ساره
ساره / عملتى ليه كدا
سندس / عملت ايه
ساره / الواد ده
سندس / هو اللى بدا
ساره / كنتى عاوزه تفصليه عمل ايه عشان يتاذى كدا
سندس / اهو بقى بكرهه و خلاص
ساره / عمل حاجه مش عاوزه تقوليهالى و قلبى بيقولى انك مش هتقوليها لحد عمل حاجه و جعتك صح
سندس / ميقدرش يوجعنى و لا هو و لا غيره انا اوجع اه لكن اتوجع لا
ساره / اهو كلامك ده اكبر وجع
سندس / انا عندى كليه الصبح و عاوزه انام ممكن
ساره / تصبحى على خير
سندس تحط السماعات فى ودانها و تشغل الاغانى ساره تقف تبص عليها و تسيب الايسكريم و تمشى سندس تمسكه و تقعد تاكل فيه تانى يوم الصبح اميره تدخل الاوضه تلاقى علبه الايسكريم خلصانه عالارض و سندس نايمه و نص جسمها بره السرير اصلا و اللاب مفتوح جنبها و الاغانى شغاله فى الهاند فرى عالارض
................................
اميره / ساندى ساندى قومى اصحى
سندس تفتح
اميره / اغيب يومين ارجع الاقيكى مزعله الكل كدا
سندس تغمض تانى
اميره / عندك كليه النهرده
سندس / مش رايحه سبينى انام و اطلعى بره
اميره / لو احتجتى تتكلمى مع حد انا هنا
سندس / روحى حلى مشاكلك مع جوزك لاول يلا سبينى فى حالى
اميره تقف و تدمع و تمشى
........................
أنت تقرأ
سكه السلامه بقلم / لولو_محمد (كامله )
Romansaشاب فقير يجد اهله الاثرياء بعد غياب عشرون عاما ليجد نفسه امام تحديات كثيره لم يكن يتوقعها
