لؤلؤات عبر الزمن

البـارت السـابع

شسولفلك ..
ولك كبران بيني وبين المرايه سوالف شيب
العمر مستثگل بروحي يريد يروح
ياا .. ليش ؟
وصلت يمك غشيم شطوط واستاهدت يمك گيش
يلبايع سواليفك ..
شلونك .. بيش ؟

((عقيل العرد..))

...............
” لـؤلـؤات عـبـر الـزمـن “
..بـ قلمي ˝فـاطـمه أحـمـد˝ ..

البـارت// الـسابـع

❄️

°• فيـروزه °•

كعـدت الصبـح مثل كل يوم
شعـري مكفش وكوه فاتحه عين وساده عيـن ولازمه الكتاب ..

الامتحانات قربت وبهاي الفتره كله اكعد من الصبح
وانـي ابد مااحب كعدة الصبح بس اجبـاري..لان مااركز اذا مو الصبح

،،
اخذت كوب الجاي وصعدت لزمت الكتاب وكعدت عود ادرس ، بس حالتي النفسيه زفت،  ضايجه وافكر بوضعنا..

الى متى نبقى هيج بين مشاكل اميمه وبين هلوضع هذا ..

وخصوص بيبي شكريه ابداً ماالها صوت وماتدخل بأي شي يصير ويانه..

وحتـى بدت تطلع عندها امراض وكبـرت حيل واخر شي صار بيها زهايمـر واجتها حالات ان ماتذكرتنا وحالتها زادت
خصوصاً بعدما طلع حيدر جانت متعلقه بي حييل ..

اول ماسافر حييل انقهرت وبقت قلقه عليه وتفكر بي ودائماً جانت تكعد تنعى علي لو تحجي عبالك تسولف وياه ودموعها تجري ..

ـ يااا بيبي يااحيدوري ليش عفتتي يمممه ولك بس انت البقيت الي من ريحة ابوك ولك يمه حويدر ليش تبهذل روحك هيج وتعوفنا ..

وتبقى تبجي الا ان توكع ونكومها نغسل وجها ونوكلها شوي تكعد ،
.. بعد بابا وعمو هو الوحيـد الرجال الكبير بيناتنا لان ماهر جان صغيير بعد وفاة ابو،  مو بكد حيدر!
، اخذ معزتهم وحبته هي وربته مثل ابنها الي يشوفه يكول ابنها مو حفيدها على حبها واهتمامها بي ..

هـي تحبه من جان هو طفل واول حفيد للعائله وبعدين كبر وصار الرجال الكبير بعد وفاة عمو وبابا

.. اهل امي مااعرف عنهم اييي شي ولاشايفتهم
ويمكـن لو فد يوم اشوف احد منهم بالشارع مااعرفه!

..مااعرف اسباب اختفائهم من حيـاتنا وابتعادهم عنا او ليش مايجون ياخذونا نعيش عدهم بحكم هنا مالنا احد او هم من الاساس مو موجودين بحياتنا..

..حتى امي ناسيتها ناسيه شكلها وملامحها
صاااار هواي
مشتاقتلها ومازايرتها ماادري بيها هسه بردانه،دفيانه،مشتاقتلنا !
وهم تجينا وتشوفنا يكولون الميت يحس بـ الي يحبهم ودائما يزورهم ..

اخذتنا مره اميمه زياره لقبرها ..
اخذوا كوستر للمنطقه كلها وانـي اصريت اروح اخذتني بس انـي ووضحه
جنت صغيـره بس اتذكر اليوم بتفاصيله ..