العشق المتمرد

الجزء التاسع

#العشق_المتمرد
#جمان_فريد

#الجزء_التاسع

يقدر ويلطف سبحانه...
الفاسكيه مقابله حوش عمهم...
طيحة الهادي جت قدام عيون حميدا وهو طالع من المربوعه الخارجيه..
حميدا بصوت عالي : ياسااتر..خليييفااا...
ومشاله يجري وخليفة طلع يجري لما سمع صوت حميدا..
وصل حميدا في الفاسكيه...
لقي الهادي شاد في حبل السطل لكن ايده كان تزلق ..
الهادي بخوف : حميدااا!
خليفه جاهم :يالطيف!!
حميدا : بسرعه جيب الحبل الغليظ من المخزن...
طار خليفه يجري..
ع طلعة سليمان من الحوش لقي خليفه يجري للمخزن..
سليمان بإستغراب : شنو في!؟
خليفه وهو يجري: الهادي طاح في الفاسكيه..
انصدم سليمان ومشي يجري لفاسكية حوش عمه...
وهذاااا كللللله والجماعه يفطروا ويهدرزوا مايندروا عليها منين زارقه...
ع جية "رمزي وتوفيق " ولاد ميلاد..
رمزي مواليد 88...
توفيق مواليد 89...
"لو لاحظتوا في صغار في العيله جو في نفس السنه لأن عراس ميلاد وزينب وكفايه جو ورا بعض... وفي العيله اللي نحكي عنهم صار شي زي هذا...تلات مواليد جو فنفس السنه لا والشهور متواليه 6..7...8😁"
المهم...
رمزي بهلع: سيدي...عمي الهادي طاح في الفاسكيه..
انفجعوا كلهم وسيبوا الفطور وناضوا يجروا....
شد عمر رمزي..
عمر: رد بالك تقول للنسوان انت وياه..
رمزي :باهي..وجبد خوه معاه ولحقوهم..
وصلوا في الفاسكيه..
ميلاد : الهادي!!!
خيري يشبحله: خليك شاد في الحبل متاع السطل ...
هانيبال : كيف طاح ؟!!
حميدا: طلعت من المربوعه طاح قدامي..
جي خليفه يجري بالحبل..
حميد: ترا هات جاي..
عطاهوله...
خداه حميدا وفرده : شد ياهادي كويس..
خداه الهادي...
حميد: هانبيال ..حميدا اجبدوا معاي..
"بنية جسمهم قويه"..
شدوا معاه الحبل..وبدوا يجبدوا...
سعيدة كانت تتفرج من روشن الكوجينه ع الجري ...
لبست رداها وطلعت تجري لحوش عمها..
طول خشت للحوش والنساوين يفطروا..
سعيده تندب: الهادي طاح في الفاسكيه..
كلهم بصوت واحد وعياط: شنووووووو...حييييي علياااا..
اما فاطمه مسكينه غمضت عيونها بشدة
ضغطها ركب...
حميده بفزع : اميييي!؟؟
....
طلع الهادي وهو يقطر اميه..
هانيبال: كيف طحت قول؟!!
الهادي: مش عارف كيف كراعي زلقت..
خليفه: خلوه يعدي يغير دبشه وبعدين ساهل..
خدي هانيبال الهادي ومش بيه ووراه خوته..
وولاد عمه صكروا الفاسكيه كويس ومشوا لحوشهم...
وهما ماشين بالهادي بيركب فوق لقوا
البنات طالعات ومعاهم امهم ترعش وين رت الهادي مشتله طول حضناته...
فاطمه وهي مغمضة عيونها بشدة:ووك عليا وليدي ووك..
زينب ببكي: هادي انت كويس!!؟
خيري : مافيه شي غير بروا خشوا..
عمر التفت لولاد خوه: اني مش قلت ماتقولوش!!؟
رمزي :والله ماقلت..
سعيده وهي شاده طرف ردها ع وجهها: اني خبرتهم..
هانيبال شبحلها بحده..
وعمر هدا كان فيسه😑..
ميلاد: خلاص عدن خشن هيا..حتى انتي يمي ..
كفايه مسحت دموعها وشدتها : هيا يمي حتى حوايجك انبلوا...
وخرت فاطمه: كويس مافيك شي؟
الهادي باسها ع راسها: وراس امي مافيا حاجه..
ابتسموا..
حميد: خلاص يمي خشي خليه يعدي يغير...
هزت راسها فاطمه بإيجاب..
ومشت مع بناتها وخشوا وسعيده معاهم..
وهما خاشين: رباب وين اختك؟
رباب: في الدار تلعب
خشوا كلهم للصاله ولطيفه قاعده مقعمزة..
لطيفه :شن صارله..
زينب قعمزت:الحمد لله طلعوه مافيه شي..
لطيفه: باهي الحمد لله..
سعيده🙄..
حميدة : باهيه يمي تو..
فاطمه ؛الحمد لله الحمدلله...باهي اللي سيدكن عدى للوادي من الفجر كانهدى دار يوم اسود..
سعيده ؛ ليش ياعمتي ؟قضاء وقدر..
زينب😒
فاطمه:ماك غابيه في عمك يابنيه يقعد يعارك وخلاص..
تنهدت سعيده وزعت نظرها عليهم..
جت عينها فعين لطيفه..ابتسمت لطيفه وهي ردتهالها..
غيرت عيونها جو فعيون زينب شقلبوا عيونهم الزوز وغيروهم عن بعض..
****
الساعه 2بعد الظهر...
عروبه تقرض في السلاطة بتذمر: وقتهم المصايب هدوما..
عودة توتي في الصفر: عزموا رواحهم برواحهم..بس ع فكرة انتي السبب..
عروبه مطت شواربها بملل ...
عودة : توقعي تخطبك لهايل اليوم لأن الجيه مفاجئة..
طلت الموس والتفتت لأختها: زعم!؟
عودة ابتسمت بتهكم: ماه حضرت جنابك عاطيتيه امل..
عروبه : اففففف..التفتت القدام وكملت تقريض...ماه غبية الغبيات اختك..
عودة: من غير كلام..
عروبه بضحكه:حقيرة..
عودة كملت حطان كواشيك وجتها : لو كان هانيبال مكانه..
عروبه وجهها ولا طماطم: عدي انتي وياه 😳..
عودة بتنهيده:يااااااااريييييت ..
عفست عروبه ع رجلها...
عودة : ااااي ههههههههه ياحمارة...
******
مقعمزين يتغدوا في المربوعه..
النسابات والولاد ..
اما الكابو فحوش واحد من وجوه القبيله متاعهم عازمه
سعد بمزح : قلت فنفسي مسكين ماعاشش شبابه ماخشش دنيا وجعتني ياراجل..
الهادي بضحكه: اني بروحي قلتها فنفسي ياربي مازال ماريت شي من الدنيا مازال بكري وحق الله..
ضحكوا...
خيري : فتحة الفاسكية هادي كبيرة خافوا حتى ع الصغار منها ..
ميلاد: تو ندبرولها...
هانيبال:لكن ولاد عمك يبوا عزومه برواحهم..
حميد: عزومه شني ؟!! ولد عمهم وفزعوله وهدا واجب..
ميلاد: لازم يشكرهم تو هو خوك يدير معاك حاجه كيف هدي تحسها جميله منه..
حميد: نساباتك عاد..
ميلاد: لانساباتي لاغيره اني نتكلم بوجه عام..
شبحولهم وخافوا يحتد النقاش اكثر..
الهادي : بعد العصر بنعدي نشكرهم ..المهم تو بتعدوا لحوش عيت ****..
حميدوهو يشوف للصونيه : ايه..
خيري : حتى اني نبي نمشيلهم في بيناتنا قرابه...
كملوا هدرزة وهانيبال شبه تسكرت نيته ...
معجباش النقاش اللي صار بين خوته والحده اللي تكلم بيها ميلاد خاف لو يكونوا خوته من النوع اللي نساوينهم يتحكموا فمواقفهم ويشكلوا علاقتهم...
بالذات وهو مركز ع ميلاد كيف سعيدة باديه تسيطر عليه...
.....
اني ممكن ماشيتلها مرتين ولاتلاته...لاتلاته تلاته..عندنا غادي اقارب ..الحق ماشاءالله..
سعيدة: اخر مرة عديت السنه اللي فاتت لايعلا ع جوها ..
لطيفه :جيتي طرابلس..
سعيده : مرة وحده وقديمه واجد..
لطيفه : تجوا لعمتك اللي غادي..شبحت لزينب ..عزوزة زينب..
زينب تشبح للصونيه وخلاص...
سعيده : عمتي هي اللي تجينا واجد ويعز عليها جونا..
البنات شبحولها..
لطيفه: اني كنت نقرا مع بنتها نجيه ايام الثانوي تهبل..
سعيده : ايه نجيه دمها خفيف...
زينب تذكر في كلمة راجلها لما قاللها سكري عيونك وودانك وفي نفس الوقت حاسه ان امها تشوفلها مرة مرة ..
ع خاطرهم بس طنشت..
وخواتها ساكتات ويسحنوا...
****
عاطفه: نقدر نسمع منها هي ياأمانه..
امانه تنهدت : مادام مصرة باهي.لكن ياعاطفه مانبي رد البنت يفسد بيناتنا..
عاطفه بإبتسامه: شن تقولي ياأمانه هدى نصيب مش بالسيف...
ابتسمت امانه ونادت: عرووووبه...
...
شاديه : اكيد امي حكتلها ع الموضوع كيف ماقتلك عروبه صح هو خوي لكن والله مايستاهلك...
عروبه ابتسمت وهزت راسها بإيجاب وطلعت من حداهم..
عودة شبحت لشاديه : شن تتوقعي ردة فعل خوك...
شاديه : مايقدر يدير شي عروبه في النهاية بنت عمه..
عودة تنهدت وسكتت...
****
الساعه 6مساء..
حدا الفرن..
ع جذع الشجرة..
كفايه :مصرع ولوا زيت وشاميه..
زينب : من حظنا السمح..
غاليه : الله غالب..
حميده دارت كم فردة...وغطت الفرن وجتهم: سجلت معانا في الدورة..
زينب مسحت بيدها ع وجهها بعدين صبعها: هنهنهنهاا...ياكبدي المسحونه..
كفايه : ماناقص الكلب غير السروال..
غاليه :ههههههههههه...تخيلتها لابسه سروال..
البنات:هههههههههههههه
"جسمها معبي تعبايه خيييي وقصيرة"..
من جهة تانيه..
الهادي :وهادي تيلجة رنرونه..
خدت رانيا الجيلاطي..
الهادي : هي عدن لأمكن..
رباب : باهي..
خدت اختها ومشوا جهة الفرن..
والهادي طلع من القطعه..
في الوقت اللي خش فيه رمزي يجري امه باعتاته يجيب حاجه..بدون قصد منه ناش رانيا طاح الجيلاطي متاعها..
شبحت للجيلاطي اللي طاح شويه..
عيونها تعبوا دموع ..فمها تقوس..
وتبدا بالأداء الأوبرالي المعروف للصغار 😅..
هو يشوف للجيلاطي..
ورباب شبحتله بحقد: علاش هكي ياحمار ..
رمزي : ماريتهاش..
رباب : ماهو حمار ماهو..
رانيا : يامااال.."حمار..بنت اختي فعمرها تقول فيها هكي😁"..
رمزي غز ع سنونه بعدين قال: عدن ياكلبات..
ومشي يجري..
رباب: تفوووو..ياكلب..
رانيا تبكي وتعيط وخلاص...
ورمزي طنشهم وخش حوشهم..
......
زينب نار جهنم من يقربها...
لطيفه: وكفايه؟
سعيدة : اهوو..لكن حتى هي لسانها طويل..عندك غاليه ونعيمه اهون وحدات ..حميده هدي كيف زينب لسان كي وسم..
لطيفة: وووك ياكبدي انتي بنت عمهم وماسلمتي كيف اني البرانيه..
سعيده: خودي كلامي وخليك معاهن في الرسمي..انتي اصلا مش قاعده معاهن لما تجي هنا ماتختلطيش بيهن واجد..
لطيفة هزت راسها بإيجاب..
سعيده ناضت: بنعدي ندير قهوة..
ابتسمت لطيفه بربكه : لاالا صحيتي ماتعبيش روحك.
سعيدة:لاتعب لاشي..ومشت للكوجينه...
لطيفة بهمس : وواااك😣
*****
بعد المغرب..
طالعين من الجامع...
هانيبال :حسيته مكان باهي..
سليمان: ايه والراجل اسلوبه كويس وجانا بدغري قال بنجربكم بعدين نخدمكم وتخلصوا..
هانيبال هز راسه بإيجاب..
فات من حداهم ضو: خير..
ردوا عليه : خير...
سليمان: تحسه متغير..
هانيبال ابتسم : هو راجل كويس غير مرات يريح كيف الفروخ..
ضحك سليمان ..
سكتوا شويه..
بعدين سليمان قال : غدوة الهم والغم..
هانيبال قلبه دق بالقوة وقعد ساكت..
سليمان شبحله ع جنب: عاد انت تراجي فيها ..
هانيبال شبحله ووجهه ولا احمر : من هي؟!
سليمان بضحكه : المدرسة يازعيم..
رجع شبح القدام وقعد ساكت وقلبه💓..
وسليمان شاد ضحكته...
******
خش صكر الباب بتقربيع..
هايل:كيف قالتها ترا؟
عاطفه :الله يااااربي...قالت هايل كيف خوي وربي يبعتله اللي خير مني..
هايل هز راسه بإيجاب وهو فقمة الغضب..
فتح الباب وطلع ورفعه وراه بقوة..
شاديه : مانظني في وحده تتحمله..
عاطفه تنهدت بضيق: ربي يهديه..
****
في الليل..
الساعه 9ليلا...
مقعمزين فم البوابه...
هههههههههههههههههههه...
كفايه بضحكه: وشن صار فطرفزيون..
حميده بضحكه : دسيناه في الدار نفتحوا فيه كيف السراقين..
زينب تنهدت : ربي يهديه بوي قاعد عايش فعهد الطليان..
كفايه : خشي البسي رداك مرات يجي ع غفله..
زينب وهي تشوف لبنتها اللي فحجرها : امي قالت بيعطل وبعدين نو واني مانتحملاش تعرفوني...
غاليه تنهدت:خسارة حمزة كان جبتهوه كله يوم اللي بيغيب فيه..
زينب بضحكه؛ يومين مش يوم غدوة بنروحوا العشيه..وبوه حريص فحكايه القرايه هلبه...
كفايه ؛ اني عماد ضاربها في الحيط قالي يانمشي معاكم ولانهرب ومعاش تلقوني..
ضحكوا..
حميدة: عماد منظره من عند غادي مش متاع قرايه..
كفايه : لاوخيتي بالله ماتقولوش الكلام هدا قدامه مايصدق اني من غير شي مش قادراته...
ضحكوا..
غاليه : خسارة غير رباب اللي راحت عليها السنه..
زينب شبحت لرباب اللي راقده ع رجل خالتها حميده: قالوا جايه في بداية العام ماندخلوهاش..
سمعوا صوت تخطيف شباشب...
قعدوا يشبحوا للجهه اللي يسمعوا منها..
كفايه : كان يطلع سيدي يازينب..
غاليه ؛ لالا هادوما الولاد..
شويه...
وبانوا عليهم هانيبال والهادي جايين...
الهادي : مقعمزين..
كفايه بإبتسامه : تعال حداي يامتاع الرعايش..
ضحك الهادي وجي قعمز حداها..
وهانيبال جي حدا زينب وقعمز: تعالي رنوا..
خداها وقعمزها فحجره.
زينب : قدر ولطف ياهويدي..
الهادي بضحكه: انسوا ياجماعه..
كفايه ؛ وين ننسوا!!والله الرعشه فعظامي لتو...
غاليه : ربي مازال كاتبله عمر..حتى هانيبال صارله زيه..
شبحلها بحده.
والبنات شهقوا..
زينب ؛ حي عليا شن صار..
كفايه :تكلموااا..
هانيبال: اسكتن... اهوا قدامكن مافيا شي..غير الحمارة هدي لسانها ديما مطلوق..
نزلت عيونها غاليه وحميده شدت ضحكتها..
زينب: تي باهي قول شن صار؟!
حكالهم الهادي. اللي صار بإختصار...
زينب غطت وجهها بإيديها : وووك..
كفايه : بخروا ولا ديروا حاجه هادي عين..
هانيبال: ياحبكن لتكبير الدواوي 😒
زينب : والنبي اسكت شن يفهمك في الحاجات هادي حني ادرى..
ضحك الهادي..وهانيبال حرك راسه يمين ويسار..
شويه
وسمعوا صوت جري..
غاليه : واحد من ولاد ميلاد..
وفعلا كان رمزي...
وقف حدا غاليه: عندكم بصل..
حميدة : ليش امك شن بدير عشاها..
رمزي: مكرونه مسقية..
شبحوا لبعض..
والولاد طبعا مش مدورين..
ناضت غاليه خشت بتجيبله..
زينب: رمزي ..علاش ضربت رانيا..
رمزي شبح لرانيا اللي كانت فحجر هانيبال:والله ياعمتي ماضربتها نشتها بس وحق الله.
زينب :رباب قالت ضربتها..
رمزي : وحق الله ياعمتي ماضربتها..
الهادي : رمزي مايحفلش كذب يازينب.
زينب : واني بناتي مايكذبوش ياهادي..
هانيبال: والنبي يازينب تسكتي بديري مشكله ع قطاف فارغ..
سكتت زينب..
ورمزي شبحلها شويه بعدين شبح لرانيا اللي كانت تشوفله
لما شبحلها ...ضمت شواربها القدام ع اساس بتدفل عليه..
هانيبال: عيب..
رانيا : إلاااا...تفووو...ياأووو أوووو" ياهو ياهو..يعني الكلب"
الهادي بضحكه؛ شن أوو اوو هدي..
زينب بضحكه:قصدها ياهوهو...الكلب...
هانيبال : عدي معاش نحبك..
رانيا شدت فيه : حلاش.
هانيبال: اللي درتيه توا البنات اللي خيي عليهن بس يديروه..
زينب : عيل ياهنيوه..
هانيبال: حتى رمزي عيل يازوبه!!.
زينب ضحكت وسكتت..
طلعت غاليه : هاك خود..
خداهم ووجهه كان احمر من الضيق...
ومشي طول..
حميده: حرج منك يازينب..
زينب : يحرج ولايطربق..
هانيبال: زينب هدى ولد خوك فاهمه..
زينب بتهكم: خوي!!اللي من لما جيت وهو موطي عليا عينه ع خاطر ست الحسن..
كفايه شحتها من كم القفطان : اسكتي تسمعك امك..
حميدة ؛ فكونا بالله عليكم..
حطت زينب يدها ع فمها : همممم..
هانيبال :احسن حاجه ...
ضرباته ع ذراعه..
قعدوا يضحكوا ...
شويه من الجهة التانيه بان عليهم الحاج رمضان..
حميدة بهلع : سيدي سيدي سيدي.
زينب :حي عليا😨...ناضت وخشت جري..
وكلهم يضحكوا عليها...
*****
الساعه 11ليلا..
كملت تحديد لبستها وحطتها ع الكرسي...
ومشت تمددت ع السرير..
واختها كملت ترتيب جدولها...
حطت شنطتها حدا الزيانه ومشت لسريرها..
تمددت وشبحت لأختها اللي كانت سرحانه وتشبح للسقف وابتسامتها ع وجهها: عروبه..
عروبه غمضت عيونها بنفاد صبر: همممم..
عودة بضحكه:هو سؤال بعدين ولي فكري فيه...
عروبه شبحتلها ع جنب : شن تبي ياصامته..
عودة ضحكت بعدين قالت: زعم عمي مايتحسسش من ردتك لولده!!؟
عروبه :ابله عاطفه عاديه جدا وحتى هو اكيد عادي عنده...
عودة:لكن الخوف اكثر من هايل..
عروبه : ماعنده مايدير ياعودة ووالنبي ترقدي نبي نرقد..
وعطتها بالظهر ...
عودة تنهدت وعطتها بالظهر وغمضت عيونها...
🍁🍁🍁🍁🍁
طلعت من الدار بش تشرب..لقت الدار القبليه ضيها والع..
شافاته يحدد في البدله متاعه..
ابتسمت ومشتله...
اتكت ع الباب: هنيوة...
هانيبال ضحك: قاعده مارقدتي..
زينب بضحكه: كنت راقده نضت نشرب ميه..
ابتسم وهو يحدد..
زينب:امم شن جو المدرسه ..سمحه؟!.
هانيبال وهو مبتسم وجهه احمر : عدي ارقدي عدي..
ضحكت زينب :باهي بنعدي بس هاه لازم تكون سمحه هلبه وواجد ...
شبحلها وكشخ عليها بضحكه: تي عدي قلت..
زينب:ههههههههههه...ولفت ومشت للكوجينه..
وخلت قلب خوها يدق بعنف...من غير شي ملهوف ع الصبح امتى يصبح💓..
طلعت من الكوجينه وقالت؛ زيد انزل عليها بالحديد زيد..
هانيبال يضحك وجهه احمر ويحرك فراسه ايمين ويسار..
وهي ضحكت وخشت للدار...
💕💕💕💕💕💕💕
🌄اليوم التالي...
طلع الصبح اللي استنوه الزوز بالدقيقه والتانيه...
💕ناضوا وهما فقمه النشاط ..وملهوفين هلبه..
وعيون اللي يحبوهم تراقب فيهم بتشوق..
عودة وعمر الزوز ..
كل منهم يراقبوا في هانيبال وعروبه..كيف كانوا غيييير الغييير فصبح هدا بالذات...💓💓💓💓💓💓
🍁فنفس الوقت..
كانوا غاليه وحميدة ملهوفات اكثر منهم..
لبسوا...وكملوا..
ولبسوا كنادرهم...
كفايه دست طرف روج في شنطة غاليه : ديروا شويه لمسات
ضحكت غاليه: باهي...
"يابنات"..
زينب وهي تفطر فبناتها وولاد اختها قالت بهمس:صبحنا ربحنا...
غاليه :هيا هي..
فاطمه؛ ردن بالكن..
حميده وغاليه:حاضر...حاضر يمي..
ومشوا لسعيده وطلعوا مع بعض..
كانوا لابسات بلايز طوال وقونات وشاربات...
اما سعيده فرشايه...
مشوا...
كفايه : ربي يفتحها عليهم وخياتي ويجيهم نصيبهم..
فاطمه وزينب: آاامين...
🍁🍁🍁🍁🍁🍁🍁
عند المدرسه..
هو وصل في نفس الوقت اللي نزلت فيه هي واختها من السيارة ...
وقف وقعد يشوفلها..
عودة جت حداها ونخصتها..
عروبه طول شبحت جيهة الولاد...
جو عيونهم فبعض..
💓💓💓💓💓💓💓💓💓...
هو هالمرة كان مدخل سورية البدله في السروال ...
وتاني الكمام للمرفق والطاقيه ع راسه..
كان يشبحلها بنظرة المعهودة..الحاده والحواجب مقرونه..
اما هي قعدت تشوفله بغرور..
خدت اختها وخشت..
هو ارتسمت ع وجهه ابتسامه..
بعدين مشي خش..
وسليمان وسالم اللي كانوا خاشين قبله قعدوا يشبحوله كيف خاش مبتسم...
قعدوا يضحكوا..
وعمر اللي كان واقف ع صاحبه ابتسم ع جنب...
💕💕💕💕💕💕💕💕💕
الساعه 9:30صباحا..
حي عليا!!!
الهادي : وطي حسك..خيرك مافيا شي اهو قدامك زي الجن..
نزلوا دموع سميه ..حطت يدها ع وجهها وقعدت تبكي..
الهادي بضحكه:تي خلاص يامهبوله مافيا شي..
مشت وخلاته ..
هو ضحك ولحقها...
********
مقعمزة تتأفف بملل وهي تسمع في كلام جارتهم اللي تعطي فيهم فدورة الخياط..
بعد كملت كلام بدي الشغل..
وكبدايه...التطريز هو اول شي يتعلموه..
قعدت تفوت عليهم بالوحده...
فهالوقت في وحده مقعمزة جنب سعيده...
عيونها مرة مرة يجوا ع حميدة وغاليه..
: احمم..سعيده ..
سعيدة : امم..
: معليش بنسألك ع حمواتك...عادي يعدن يعيشن فطرابلس..
فنصت سعيده:كيف يعني؟
:والله شن بنقولك عندي خوي دكتور وتعين فطرابلس ومدا بيه يتزوج ويعدي بمراته..واني بصراحه عجبني حمواتك من لما شفتهن في عرس حواء بنت الكادرونيه..
سعيده بدت تغلي والحسد عماها تماما ابتسمت وقالت: لاحمواتي متسميات ع خوتي...

....يتبع....