#العشق_المتمرد "اختبار"
الجزء113القسم الأول
#جمان_فريد
🌟..
الساعه 7:00صباحا..
لو ماندمتش ع الأيام اللي بعدتها..
لو مادفعتش ثمن الغربه اللي انا عشتها..
لو ماشربتش كاس المر اللي شربتها..
مابقاش أنا..
مقعمزة في الفيراندا..
وحاطه السماعات فوذانها وتسمع في الأغنيه..
وتذكر في اللي صار أمس بكل تفاصيله..
والدموع ادمنت النزول ع خدودها..
تمسح فيهم..وهما ينزلوا..
في الدار..
عمتها وهي راقده..
ناضت مفزوعه فجأه..
مالقتش بنت خوها جنبها..
شبحت لوطا لقت رفقه راقده بروحها..
غاليه بهمس:حي عليا!..
ناضت من السرير بحذر بش ماتنوضش رفقه..
ومشت طلعت من الدار..
وصلت في الصاله شافتها مقعمزة في الفيرندا..
تنفست براحه..
بعدين مشتلها..
رزان بصوت منخفض بعض الشي:لو مارجعتش ليا بقلبك تاني هنى..
لو ماآمنتش إن الثانيه فبعدي سنه..
سكتت لما حست بيد انحطت ع كتفها..
شبحت جنبها بعدين قامت عيونها فوق..
غاليه اشرتلها تحول السماعات..
حولتهم رزان
طبست عليها غاليه وقالت:رزان..ردي بالك بنتي تحاولي تكلميه مرة تانيه ردي بالك
ابتسمت تهكما وحركت راسها ايمين ويسار بالنفي وهي تقول:مستحيل
غاليه خدت نفس شبحت حواليها بعدين شبحت لرزان وقالت:نهارتها قدام امك وحناك وعمتك زينب..خش علينا وقال وصلولها معاد تكلمني اني راجل خاطب ومانبي مشاكل..
رزان بصدمه:شنو!؟؟؟
غاليه:قتلك توا بش نزيد نوقضك...
رزان قعدت ترجف مع بعضها وهي تشوف القدام...
نزلوا دموعها سيل....وقعدت تتنفس بسرعه..
شدت غاليه يدها وقعدت تمسح عليها:رزونه بنتي..نعرفك قويه..ديما قويه انتي...اللي صار هدى مفروض يزيد يقويك اكثر واكثر..مانبيش نقول قسي قلبك..لكن حافظي عليه..وسامحيني..
شبحتلها ..
غاليه تنهدت وقالت:سامحيني لما زمان كنتي تقولي نخاف منه واني كنت كل مانسمع منك هالكلام نهزبك ع شانه..طلعتي تفهمي اكثر مني..
غمضت عيونها وحطت ايديها ع ظهر عمتها وخشت فحضنها وهي تبكي بصمت..
وغاليه ضامتها وهي تمسح ع راسها..
🍁🍁🍁🍁
الساعه 9:00صباحا
في داره..
ع السرير...
مستلقي ع بطنه..
كان لابس شورت للركبه...
بس..
والمكيف مفتوح ومقوي عليه..
الدار متلجه..
برغم هكي..
هو كان مش قادر يبرد..
نار وتحرق فيه..
ع المخده في اثار دموع..
هو كان فاتح عيونه...
ويرمش ببطئ...
يذكر في اللي صار امس..
يذكر فيها..
جاية تحضر وعادي جدا..
تحط عينها فعينه وهي مبتسمه..
تتفرج عليه هو وخطيبته طول الوقت وكأنها وحده غريبه لاتعرفه لايعرفها..
اصلا ماتوقعش انها تجي من الأساس!!
فوق كل اللي داره بش يبرد شويه ع قلبه المجروح..
تفاجئه هي بتصرف يحسسه بالعجز...
وعمره ماحس روحه عاجز الا بعد ماعشقها..
طق باب داره..
"عماد"..
ماردش..
طق تاني..
وامه تنادي"عماد"...
لارد..
كفايه:مازال راقد..
مشت امه..
وهو مازال ع حاله..💔
💔💔💔💔💔
🍁🍁🍁🍁🍁
الساعه 10:00صباحا..
خش حميد للحوش...
سمع اصوات هدرزة تبعها لين وصل لدار التقعميز..
حميد:السلام عليكم..
ردوا عليه السلام وصبحوا عليه..
حميد:صباح الخير صباح الخير..غاليه رزان وتوا ارواحكم..
لطيفه رفعت حاجبها وهي تشوف لصفرة القهوة..
غاليه:هي..
ناضوا غاليه ورزان ومشوا فاتوا من حداه وطلعوا من الدار..
شبحلهم..
بعدين شبح للدار..
لقي رفقه تشرب في القهوة وتشبح لأمها..
شبح للطيفه لقاها تشبحله..
ارتبك بس مابينش طول مشي طلع..
ناضت لطيفه ولحقاته..
وبنتها معاها بعيونها وهي مبتسمه برفعة حواجب..
برا..
"حميد"..
وقف والتفت..
لطيفه وقفت وقالت:في حاجه بنقولهالك من امس وماحصلتش فرصه..
حميد ضيق عيونه وقال:كانك ع الفلوس اللي طلبتيهم نهارتها حطيتهم فدولابك امس قبل لنطلع..
ابتسمت وقالت:لا مش عليهم..
قاطعها وقال؛اجلي شويه حكاية شري سيارة جديده...ولا خودي وحده سعرها معقول..
لطيفه:لا مش ع السيارة..
حميد بضحكه:اها زبطتك تبي تسافري لتركيا فرمضان قلتيلي قبل خاطري نقعد اسبوع فرمضان غادي..ع العموم..
"اني حامل"
صاعقه ونزلت عليه الراجل..
تبت ع لقطه وشواربه مازالوا مضمومات بعد نطق حرف الميم في اخر كلمة ع العموم..
رفع حواجبه ..
ونزل عيونه وركز بيهم ع بطنها..
لطيفه بإبتسامه:حا..مل...
شبحلها وعيونه متوسعات قريب يطلعوا من مكانهم..
حرك راسه فوق ولوطا مرتين وكأنه يتسائل..
"حامل حامل!!"
ضحكت لطيفه..
هو واخيرا فتح فمه وتكلم:كيف!؟
هي تلاشت ضحكتها وفنصت..
حميد رمش عيونه وقال:قصدي امتى؟..
لطيفه بضحكه:حميد...خيرك!؟
هو شيئا فشيئا بدي يضحك بصدمه..
ولطيفه تضحك معاه..
حميد بضحكه:ياوالله عليك حال..هههههههه
لطيفه بضحكه:تو انت فرحان ولاشنو..
حميد ضحك وقال؛نعمه من ربك بنفرح بيها...
لطيفه هدت ضحك وقالت:يعني مش مضايق..
هو ابتسم وقال:تس..
ع جية غاليه ورزان كانوا لابسات وواتيات..
طلعت رفقه من الدار لما رتهم..
حميد :نراجي فيكم برا..
لف ومشي ولطيفه تشوفله..
حست انه جاملها مجامله حست انه زي اللي ارتكب غلطه ومستسلم لنتايجها..
ماكانش هكي يدير قبل لما كانت تخبر فيه بخبر حملها..
وياما زمان تحايل عليها بش تحمل وهي ترفض وتقول سادنا تلاته صغار هكي لازم يكون عدد افراد
العيله المثالي في دول العالم الأول ..
🍃حرماته حتى حقه في انه يجيب صغار..وهو بطبعه مش راجل متجبر ومايحبش يجبر حد ع شي هو مايبيشي حاول فيها بالكلام الطيب والعقل مانفعش..يضربها..يطلقها!!..
الزوز ابدا مش حل....
وبعد كل شي صار...
لطيفه عرفت انه تزوج عليها وماأهتمتش..
بس لما عاشت الوضع بحذافيره وعن قرب..
استاقضت فجأة..
وتوا خطرلها كل شي!!!
ع العموم...
لطيفه...لهاللحظه تفكر بس فنفسها بس...🍃
🍁🍁🍁🍁
الساعه 1:30ظهرا..
واقفات في الكوجينه يشوفولها وهي مقعمزة فالصاله تمشط فشعر بنت عمها..
غزلان:حجزت في موزارت وكلمت البنات كلهم..
ابتسمت غاليه..
غزلان وهي تشوفلها:انصدمت لما سمعت من نور ان عيدميلادها كان امس..هو اني مانعرفش تفاصيل اللي صار بيناتهم..بس ماتوصلش لهني..يخليها تكره النهار اللي جت فيه ع الدنيا!..
غاليه تنهدت بألم وقعدت ساكته..
غزلان شبحتلها وقالت:المهم توا..بعدين العشية ع اساس طالعين للمحل باهي..
غاليه هزت راسها بإيجاب..
وغزلان ابتسمت بعدين مشت تشوف الغدي..
🍁🍁🍁🍁
بعد الغدي..
مقعمزين في الصاله يهدرزوا ..
حميده وامها وكفايه ومروان ومالك..
والصغيرونات حداهم..
حميده :ايه بكري اتصلت بيا غاليه وقات غزلان عازمتنا برا طلعه للبنات بنات نعيمه وزينب ورفقه ورزان تقريبا في مكان اسماه موزارت..وقالتلي قولي لواحد من الولاد يجيبك..
مروان ومالك مع بعض:اني نرفعك..
شبحوا لبعض..
كفايه:علاش العزومه للبنات بس..
حميده:مفاجأة لرزان..مش عيدميلادها كان امس..
انصدمت كفايه..
ومالك ومروان كذلك..
وفاطمه تشوف لكفايه..
كفايه بصدمه:امس..امس عيد ميلاد رزان؟!..
مروان"نذكر رفقه 20/6 لكن رزان مش مار عليا قبل تاريخ ميلادها"
مالك"كترتها وخترتها ياعماد.."..
حميده ابتسمت وقالت:ايه امس...
ناضت كفايه وقالت:شويه وتو نجي..
حميده وامها والولاد شبحولها لين طلعت..
مشت طول..
ركبت الدروج..
وهو من الكوجينه كان واقف يشوفلها وع وجهه ملامح الحزن..
لحظات..
ونزلت..
وين جت بتتوجه للصاله شبحت للكوجينه..
هو دار روحه يشرب في ميه..
حركت راسها ايمين وايسار بأسف بعدين كملت طريقها للصاله..
خشت..
ومشت طول لحميده..
مدتلها باكو صغير وقالت:قوليلها هدا من عمتك كفايه..
ابتسمت حميده وخداته..
والولاد مع امهم بعيونهم لين قعمزت ع الكرسي..
وفاطمه تسبح ومازالت محافظه ع موقفها اللي خداته منهم..
حميده:باهي من بيرفعني..
مروان ومالك:اني..
🍁🍁🍁🍁
الساعه 6:30مساءا..
خشوا كلهم للمحل..
وطول للطاوله اللي حاجزين فيها..
برا..
كانوا مروان ومالك مقعمزين ع طاوله ويشوفولهم..
داخل..
رانيا بضحكه:كان تندري علينا رباب..
غزلان بضحكه:امتى روحت؟.
رانيا بإبتسامه:الصبح الساعه 10 جو مؤنس وخالي الهادي واللي هدا روح بمرته..
نور:امتى بيجيكم محمد..
غاليه:غدوة الصبح ان شاء الله..
دلال:قبل امي تبي تعزمكم..
رانيا:وحتى امي..
غاليه :لالالا خلاص هداك هو..رمضان مازال عليه 5ايام في حاجات واجده مازلت ماوتيتهن..
رفقه:السنه هادي بيجي فعز الحنحاطي..
حميده:معناها ياقعادنا ع المولدات..
غزلان ابتسمت بتهكم:هي هادي..
وكملوا هدرزة ورزان بس مستمعه ماشاركتش نهائي ساكته وخلاص ومرات تسرح وتستاقض كان علي صوتهم..
هما منتبهين لوضعها لكن مابوش يضغطوا عليها ولايحرجوها..
برا..
كانوا مروان مالك مركزين بأنظارهم ع اللي سرقوا قلوبهم ومعاش ردوها..
نور ورفقه لا وحده فيهم معبرة واحد فيهم..
🌴🌴🌴🌴🌴
تو مش قالتلك بروحها طالعه تدهور هي والبنات؟
سعيده:امال بنتي ونعرفها كويس صوتها مش عاجبني..
امال:طبيعي سعيده يعني انتي شن متوقعه اكيد بكت لين عييت..معليشي سيورها تنسى..
سعيده:عندك حق تتكلمي ببرود هكي ماهيش مئاب..
وناضت طول ومشت طلعت من حداها..
وامال تنادي فيها وهي مابتش تعبرها..
🍁🍁🍁🍁
غزلان:معناها مناقشتك أخر السنه هادي..
رانيا بإبتسامه :بإذن الله..
دلال :اني ل2017 كان حيانا ربي..
غاليه:سيورهن يعدن هالسنتين وتكملي وتفتكي
دلال:يارب..
غزلان:مخططين تخدموا؟..
دلال:إن شاء الله..
رانيا بإبتسامه خجوله:ع الظروف..
ضحكوا البنات..
ورزان شبحتلها وابتسمت..
غزلان فهمت عليها حتى هي وقعدت تشوفلها بإبتسامه..
غاليه:ايه دلوله شن دايرة آسو مع الببغا..
دلال غمضت عيونها وقالت:اسكتي..فتحتهم..ترقد بحدا القفص..
ضحكوا..
نور بضحكه:دارتلها نهاراحرف فأخر يوم فالروضه دايرين حفله وتبي ترفعه معاها..
غاليه بضحكه:رفعاته؟
دلال:رفعاته عينها تختخها بابا وعرف كيف يقنعها ماترفعاش..
رانيا بضحكه:سلامتها..
غزلان بإبتسامه:البنات مافيش احلى منهم..ربي يرزقني بوحده تانيه..
رفقه شبحتلها ع جنب..
غاليه شافت لرفقه بعدين شبحت لغزلان وقالت:ربي يعطيك ماتمني..
غزلان:تسلمي يارب..
فهاللحظه جاهم عامل يخدم في المكان وفيده قالب الطورطه بشماعي متاعه..وحطه قدامهم..
استغربت رزان..
ولعهم ..
بعدين ابتسم ومشي..
بدوا يغنوا مع بعض بصوت متوسط المستوى:
سنه حلوة يارزونه سنه حلوة يارزونه..
هي حطت يدها ع فمها وعيونها مغمضات وتضحك..
وكملوا يغنولها ..فتحت عيونها وهي تشوفلهم ..
امتزجت السعاده بالحزن فنظرة عيونها وهي تشوفلهم..
عارفتهم يبوا يخففوا عنها..
وهي فرحت انها قدرت تحوز ع محبتهم...
فرحت ان في ناس في الدنيا غير امها وبوها وخوتها لو شافوها حزينه يديروا اللي يطلع بإيدهم بش يسعدوها..
هي هني جابلها قلبها شي منه..
《 رزان:انت هكي ديما تبصر وتضحك وواخد الحياة عادي مافيش شي يضايقك
عماد:والله مايرتاح الا اللي ياخد الحياة هكي ياقليبي صدقيني ماتكسبي شي من الزعل ولا من الحقد ولامن الكره ..
ماغير تخسري صحتك واحلا لحظات عمرك..》
نزلوا دموعها وفيسع مسحتهم وهي تضحك قالت:نجيكم ليا يارب..
حضنتها رفقه وقالت:ونجيك ليا ياتوأمتي..
ضحكت رزان وهما ضحكوا معاها..
من برا..
كانوا مروان ومالك يشوفوا فيهم وهما مبتسمين..
ومن بعيد شوي🍃
حتى هو كان واقف بسيارته..باينه عليه من ورا مرش المحل..
كانت تضحك..
كان شاد ذقنه بيده
وشاد دمعته بقوة..
اه بس..
لو كان ماصار شي من اللي صار..
راهو توا هي مرته..
وهو مفاجئها فعيد ميلادها بشي حلو هلبه يقعد محفور فذاكرتها....
راهم توا مع بعض يحتفل بيها وقلبه يرفرف حواليها وهو يدور في فلكها ويقول...
" غير شن تبي نديرلك يابنية قلبي المهم تقعدي تضحكي وفرحانه"
لكن الأقدار جت بعكس الأماني..
🍁🍁🍁🍁
خلاص المغرب قريب..
وجي وقت مرواحهم...
دلال روحت هي واختها فسيارتها..ومالك مشي وراهم..
وسند جي روح برانيا..
ولطيفه جت روحت ببنتها..
ومروان روح بحميده وغزلان ورزان وغاليه..
حط غزلان وغاليه ورزان فحوش خاله حميد التاني ومشي روح هو وخالته حميده لحوشهم..
🍁🍁🍁🍁
فحوش غزلان..
فالدور التاني..
غاليه وهي متفاجئة:ماشاء الله..
ابتسمت غزلان :هدا علاش بكري قلت هداكا الكلام ع البنات..
غاليه" شكله حميد بيدير قبيله بروحه":تحلي عويناتك ع خير يارب...
غزلان :آمين..
لوطا..
مقعمزة في الصاله بحداها صغارعمها يتفرجوا ع التلفزيون..
النت مفتوح وهي تقلب في الفيس بملل..
جت بتطلع منه لكن هي ماتبيش تهني روحها..
طلعت من حسابها هدا وخشت لحسابها التاني..
ومش طول ادور ع صفحته..
خشت عليها..
لقت اخر منشور ليه..نازل من دقيقة بس...
فيك إحساس يااااا...
وعندك مشاعر كيف باقي الناس..
انريد ننشدك..
بالله فيك إحساس..
فيك مشاعر...
تحس الغلا وتحس نبض الشاعر..
والا مخالفه للناس طبعك واعر..
معدوم فيك الحن من الأساس..
فيك إحساس...
فيك اعروق..
اتحس الغلا وتحس نار الشوق..
ولا اقليبك ع الغلا مغلوق بينه وبين الحب باني ساس..
فيك إحساس..
يلي المحبه خصمك..
ويلي على زهر الجناين اسمك..
لانك اللي قسمي ولاني قسمك..
بيناتنا ستين وادي ياس..
فيك إحساس..
رزان بدموع:قوله لروحك..يلي ماعندك قلب مش بس احساس..مصح وجهك وخلاص..يلي ماتحشم..ياتافه..
تنشت صبعها وهي تعاود وتقرا ودمها محروق بعد كملاته قالت من بين دموعها بعصبيه:ضربني وبكا سبقني واشتكى..
مصحححح وجهههك..
اما عند هو..
نزله وواثق مليون في الميه انها تراقب في حسابه من حساب تاني..
وقلبه حسه انها حترد عليه..
مشي طول خش لحسابها من حسابه التاني حتى هو..
قعد كل مرة يدير تحديث لعند مانزلت فعلا..
طعني طعن مامنا شفا..جرحني جرح ياصاحب عطيب
ظلمني ظلم في أيام الزها..سقاني السم وامراره غريب
جبد القلب من جسمي خدا..لحق الكبد وبسهمه يصيب
الله الله ياماضي مضا..خذنا ايام ومعاي الحبيب
فبحر الحب وغرقنا سوا..جانا الموج وبسرعه عصيب..
وكنا الزوز في مركب غلا..جاته ريح خلاته خريب..
عماد بغضب:اقسم بالله ماتحس ولاتستحي ولاتتحشم اللي تتكلم ع الطعن وع المر وع الظلم....
كان نوصل فيها بس..
قلبه بدي يدق بقوة شديده..💓
بربكه قال..ماعندي ماندير بيها.. كمل يقول بغيظ..عقرب..لفعه مبرقطه..مسمومه..
وطلع طول من حسابه ومن الفيس بكل..
رن تليفونه كانت سناء..
عماد غمض عيونه بشده:تس..افففففففف..
فتح عيونه بعدين فتح الخط وقال:هلا ..
سناء:اهلين حبيبي وينك اليوم ؟
عماد وهو يفرك فجبهته قال:انشغلت شويه اليوم اسف..
سناء :ولايهمك عمادي..المهم حبيبي بنسألك شن قصته البوست اللي نزلته توا..
عماد ضيق عيونه وقال:كيف يعني بتبدي اديري في الجو من توا وتحاسبيني شن انزل وشن مانزلش وشن ندير وشن مانديرش..
سناء بربكه:لا مش قصد...
قاطعها وقال؛ردي بالك اديريه الجو هدا اكره ماعندي تبي تخسريني ديريه باهي!!
سناء بخوف:خلاص حبيبي اني اسفه..
عماد رفع حاجبه وقال تهديدا:اهو نبهتك..
🍁🍁🍁🍁
الساعه10:30ليلا..
طلعت من دار نومها وهي تساوي فشعرها متوجهه للصاله..
كيف قربت توصل وقفت لما سمعت حماتها تقول..
"ايه لطيفه حامل تصدقي!"..
انصعقت..
جمدت فمكانها معاش قدرت تتحرك..
غاليه:هن الزوز ماشاء الله............ايه سبحان الله....ههههههه..مرات.......ايه......آمين...لا والله مافيها كيف يازنوبه.......لالا والله صعب........باهي....إن شاء الله.....تصبحي ع خير.....بالسلامه..بالسلامه...
وصكرت بعد صكرت اختها..
شبحت لبنت خوها وقالت:سمح..
رزان وهي تشوف للخاتم اللي هدتهولها عمتها كفايه قالت:ايه سمح..
غاليه غمضت عيونها وفتحتهم بنعس:خلاص اني بنعدي نرقد.
ناضت رزان وقالت:خوديني معاك..
غاليه:وغزلان !!
رزان بضحكه:عمي بيجي بعدين شوي مابتلهى بينا ..
قرصتها غاليه وهي تضحك..
رزان وهي تتحسس فذراعها:احححهههه..
ومشوا طلعوا هما الزوز من الصاله وتوجهوا للدار اللي يرقدوا فيها..
خشوا وصكروا الباب..
بعد حوالي 10دقايق جي حميد..
قعد يمشي ويدور مافي حد زبط انهم رقدوا..
طول مشي لدار النوم..
فتح الباب وخش..
انصدم لما لقي غزلان مقعمزة ع السرير وتبكي..
حميد بخوف:غزلان!..
صكر الباب وجاها قعمز مقابلها..
حميد:خيرك غزيله؟!!
غزلان رشفت وهي تشوفله بحده من بين دموعها:حق لطيفه حامل؟..
هو غير عيونه عنها وضم شواربه لداخل بضيق..
غزلان:علاش ماقلتش؟..علاش اني مانعرفش بحاجه زي هادي؟..
حميد :اني امس بس عرفت..
غزلان:مش ع حكاية الحمل..
شبحلها شويه بعدين قال:شوفي غزلان...اللي صار بيني وبين لطيفه بغض النظر عن كل شي هو شي شخصي بيني وبينها ايه صح اني قتلك قبل ان حياتنا باردة تماما..لكن مازالت ع ذمتي يعني..بإختصار حاجه زي هادي تصير فأي وقت..فاهمه عليا يعني حق للطيفه مانقدرش نمنعها عنه..
غزلان:قصدك هي اللي بادرت مش انت؟..
حميد بضحكه:شن الفرق؟
غزلان بحده:في فرق كبييييير...
ابتسم بعدين قرب منها وشد وجهها يإيديه :الحاجه الوحيده اللي اني عارفها ومتأكد منها انها ثابته ومستحيل تتغير...ان قلبي ليك انتي وبس..بس...صدقيني..
ارتسمت ع وجهها ملامح البكاء..
قربتله طول وضماته ليها بقوة..بحب..بتملك..بخوف..بغيره..
وهو ضمها ليه شغفا وعشقا وهو مبتسم...
🍁🍁🍁🍁
واه من الحب...
واهين من العشق..
اللي يخلوك من الغيره تبي تملك الحبيب وكان تلقى تحبسه فوسط صدرك وضلوعك يصكروا عليه..ومايكون لحد فالدنيا غيرك..
مقعمز برا في الفيراندا يشم فريحة البحر وهو مغمض عيونه..يحاول يهدا..يرتاح..يحاول يرتب نفسه يكون ثابت ع قراراته ويكون قد اللي اقدم عليه مايقعدش مجرد رد فعل..
"عماد"..
فتح عيونه وشبح للباب..
حميده:مازلت مارقدت..
عماد:ماجاش النوم..
قدمت حميده وخرت كرسي وقعمزت مقابلاته وهي تقول:وين خطيبتك..
ابتسم ع جنب وشبح للبحر..
حميده بضحكه:عارفه روحي حشرت نفسي في اللي ماليش فيه..هدي حركه الباين اني مش حنقدر نسيبها...
شبحلها وقال:اممم .باهي اني بنسأل غاليه خيرها..امم؟؟ ومحمد خيره..والهادي!؟شن صار بيني وبينهم بش يديروا هكي؟!ولا خدوا موقف مع صغار خوهم!؟..ابتسم سخرية وقال وهو يشوف اللي ايديه المحطوطات ع الطاوله والمشبكات فبعض..ماعليهمش لوم..فالنهايه صغار خوهم اقرب واولى..
حميده ضيقت عيونها وهي مبتسمه قالت:قاعد تبرر لروحك ع فكرة..لانك انت اكثر وحده تعلم ان حني مانديروا في الفرق بين صغار خو واخت..كلكم كيف بعض بعضكم عندنا..كلكم صغارنا..بدال ماتقول كلام فاضي كيف هدى..راجع روحك وشوف اللي درته لو اندرالك كيف تكون ردة فعلك..
ابتسم تهكما وقال؛نسامح ياحميده وننسى لانكم اهلي..
حميده بنفس الإبتسامه:بعد اللي درته هدى كله تأكدت ان قلبك مش كبير ولانك متسامح ياعماد..
رفع حواجبه..
حميده:المتسامح ياعماد هو اللي يسامح ع حاجات السماح فيهن صعب احيانا الا ع اللي يملك قلب كبير..المتسامح لو يوم خدي موقف من حد جرحه ماياخدش اللي حواليه بجريرته...وبعدين تعال قولي شن هو الغلط اللي غلطاته رزان..حط نفسك مكانها يوصلك اللي وصلها ومن ناس موثوقه وفي منه بالدليل ياعماد شن دير..
عماد بعصبيه :نمشي نسأل نتأكد نتبين..
حميده:هي ماكانتش واثقه فيك هديك الثقه وانت تعرف وبعدين اللي يخون منين يجوه يسألوه انت خنت مش حيقول ايه..
ضحك بسخريه...جاي بيرد رفع ايديه فوق بعدين رجع نزلهم ع الطاوله وهو يضحك ويشبحلهم قال:قصدي مش عارف شن نقول الحق..
حميده:باهي ياسيدي هي غلطت والغلط راكبها من كرعيها لقبوعة راسها..كم مرة جت واعتذرت كم مرة تنازلت قديش حد بعتتلك شن دارت بيش توصل فيك وتفهمك اللي صار وتردك ليها؟!
عماد بتهكم؛بنت خوك وانتي ادرى بيها انانيه متملكه تبي من يدور ففلكها ديما..قالها وهو يحرك فسبابته حركه دائريه..
حميده:بنت خوي..ايه..بس نعرفها هدي ماظنش..اني ماكنتش قريبه عليها بش نعرفها كويسه وتوا عرفتها كويس واجد..غاليه النسخه التانيه..حنينه واجد قلبها كبير..عطوفه عطوفه واجد واجد..برغم اني منافسه امها ولازتها من الحوش ماخدتش مني موقف..كل يوم لازم تجي تلعب مع حنين وتهدرز عليا تحاول ترفعلي معنوياتي..تهدرز ع حناها وتعاونها..مونسه غاليه وتعامل فيها كأنها امها..عمامها كلهم تحبهم ويحبوها ومايرضوا فيها دقة الشوق لانها دايرة معاهم طيب..الصغويره..مافي عيل مايحبها ياعماد..
هو بلع ريقه وقال بتهكم مصطنع:اوووفر راك..
حميده بمسايرة:باهي..كيف ماتبي..لكن بنقولك حاجه وحده..عندها حق زمان لما كانت تقول نخاف منه..نخاف مايكونش صادق معاي.. طلع عندها حق..
عماد بنفاذ صبر:بالله عليك ياحميده اسكتي..بنت خوك هادي لفعه من تحت لتحت..خادمه ع راسها كويس وهوينا عن قريب تسمع بيها انخطبت للسرتاوي..
حميده الكلام وجعها ع الآخر ردت عليه بغضب وهي وتقول:قسما بالله رزان هدي وحده غبيه وحماره اللي مازالت دايرة لواحد كيفك قيمه..ناضت وقفت وهي تقول..وكانك ع السرتاوي بعد حضرتك خطبت..جاها لحد عندها فالكليه وقال بيخطبها...ولانها حماره ماتفهم..قالتله لا..رداته..وردت قبله الطرابلسي وغيرهم وغيرهم..ع خاطرك..ريتك طلعت تحبها ربع ماتحبك..خسارة فيك...خطبت بيدها ع الطاوله وقالت..خساره..
وخرت الكرسي بقوة ومشت طول خشت داخل وهي معصبه ع الآخر...
🍃🍃🍃🍃يتبع
