#العشق_المتمرد "اختبار"
#جمان_فريد
الجزء 119 القسم الرابع...
🌟..
العاشق الحقاني مايستسلمش ومايسلمش..
وعماد تعلم من درسه كويس..
يعني لو هي سكرت بابها هو مش حيعاود يطق ويطق لين تفتحله مرة تانيه؟!
بل ان لزم الأمر يقلع الباب يقلعه المهم يرجع يخش حياتها ويكون هو الأساسي والاهم فيها..
💓بعد طول تفكير..
تفهم موقفها..مجرد زعل..ايه صح قوي بس يقعد زعل..
وعارف ان عشقها ليه هو شي ثابت مستحيل يتغير بعد كل اللي صار فيها ع خاطره تأكد انه هو اغلى عندها من نفسها..
🍁روح للحوش..
نزل من سيارته..
ومشي ركب الدروج..
فتح الباب وخش..
الساعه وقتها 12:45ليلا..
كان الحوش هادي..
صكر الباب بهدوء وكمل طريقه للدروج..
بس هناك من كان ساهر يراجي فيه امتى يخش..
"عماد"..
وقف فمكانه ابتسم ع جنب..بعدين التفت..
سعد:مانكش راقد قبل تفهمني ليش درت هكي..
ضحك..
بعدين اشر بيده للصالون..
بوه شبحله بطرف عينه بعدين مشي وهو لحقه..
🌴🌴🌴🌴🌴
حميده..
حميده:اممم..
غاليه:ملاحظه ان حلمي هداك قاعد يتفسر شوي شوي..
حميده:حلمك بميلاد وزينب ومحمد؟..
غاليه:ايه..
حميده؛ملاحظه كويس..وكل ماتعدي حاجه نحمد ربي ليل نهار..
غاليه:نخمم تو فمحمد..زعم شن تفسير الحلم عليه؟..
تنهدت حميده وقالت:ماعندنا مانقولوا غير اللهم اجعله خير..
غاليه:آااامين..
🍁🍁🍁🍁
محمد..
محمد وهو مغمض عيونه:امممم..
بلقيس:مش جايني نوم..
محمد تأفف وقال؛بالله ارقدي وخليني نرقد عندي ماندير الصبح..
بلقيس:حمودي..
محمد فتح عيونه وقال بعصبيه؛شن قلنا ع امها حمودي هدي؟؟!..وبعدين ارقدي ادمدري وخليني ندمدر الزفت..
وحط المخده ع راسه..
هي غمضت عيونها وخدت نفس محاوله منها لضبط اعصابها..
بعدين فتحتهم..كانوا مليانات دموع..
قالت فنفسها"مانكش نعنوعه انتي بيش تبكي من اتفه شي مش اي شي يبكيك يابلقيس..وبعدين هو هكي طبعه وانتي عارفتيه من الأول..صح عصبي..لكنه حنين واجد معليش تحملي مافيش بنادم كامل"..
هدت بعد حديثها هدا مع نفسها ..
انقلبت ع جنبها اليمين وغمضت عيونها وبدت تقرا فسرها آية الكرسي..
🍁🍁🍁🍁
متأكد منه الكلام هدا؟!!
عماد:زي مانشوف فيك..راهو قبل مش ناوي نفضحها قدام اهلها..كنت نبي نتفاهم اني وياها برواحنا..ونبينوا قدام الكل ان حني الزوز معاش نبوا نكملوا مع بعض..لكن..رفع حاجبه وقال..صار اللي صار..
سعد سكت شويه وهو يفكر بعدين شبح لولده وقال:باهي انت علاش ضربت خوها؟..
غير عيونه عن بوه وقعد يمسح فلحيته بتوتر..
سعد:عماااد..
شبحله وقال:التافه يبي..غير عيونه وقال..يبي يخطب بنت خالي ميلاد..
سعد غمض عيونه بنفاذ صبر وهو مبتسم بعدين فتحهم وقال:خالك حالف راهو..
عماد رفع حاجبه اليسار وقال:يصيم تلاته ايام..
سعد ضحك وهو يحرك فراسه ايمين ويسار..
عماد نزل عيونه وقال:نبيك تحس بيا يابوي وتفهمني..
سعد:اني فاهمك كويس..لكن ياعماد الحكايه اكبر من كونها انك انت وبنت عمتك تبوا بعض ولالا..الحكايه حكاية عيله وخوت..تصرف لاعقلاني منك يخلي امك تخسر خوها ممكن للأبد..
عماد ابتسم وقال:لا بإذن الله المرة هادي كله حيكون محسوب يابوي وبالعقل..بس نبي منك شي واحد..توقف معاي..
سعد بإبتسامه : كان هكي...اكيد اني معاك..
ابتسم عماد بفرح وقرب منه شد راسه بإيديه وكب عليه..بعدين ناض وقال:تصبح ع خير..
سعد:وانت من اهله..
ضحك عماد..بعدين مشي طلع من الصاله..
اما سعد قعد مقعمز فيها وهو يفكر في اللي سمعه من عماد ويذكر فكلام كفايه عن اختياره الغلط لسناء..
🍃حكي عماد القصه وقص منها الحاجات اللي تخلي رزان مدانه قدام بوه..وقال انهم خشوا ع محادثات لرزان نازله في عماد فيهم بكلام قوي وواعر ماينقبلش لما وصلتها عنه معلومات غلط..وصورها وبعتوهاله..المهم حاولوا يفرقوا بيناتهم🍃
🍁🍁🍁🍁
تبكي فحضن اختها..
واختها تمسح ع شعرها وتقول:اني مش حذرتك ياسناء درتيها فروحك بروحك..
سناء ببكي:عمره ماحبني يالمياء عمره..قلبه مع رزان ديما..اني غبيه..ماعرفتش نخليه يحبني زي ماانتي خليتي عمر يحبك..
لمياء فهديكا اللحظه جت بين عيونها ليلى..واذكرت الموقف اللي عرفت بيه ليلى علاقتها بعمر..
برغم الخوف اللي تسلل لقلبها ..لكن قالت بمكابرة:عمر ماكانش يحب ليلى كانت مجرد تسليه بالنسبه ليه لكن اني حبه الحقاني..
سناء قعدت تبكي لما سمعت كلام اختها..
لمياء:معليشي..تو غدوة ربي يبعتلك سيد سيده..
سناء ببكي:مانيش رادتلهم ولاحاجه من حاجاتهم..
لمياء برفعة حاجب: ايه..هو اللي مسيب مايحلم يجيه شي..
🌴🌴🌴🌴
الساعه 2:00ليلا..
مقعمزة في الكوجينه بروحها..
لافه روحها بشال صوف من الصقع..
مرام:امممم..خاطري فجيلاطي بنموت..ياربي وين بنلقاه فهالوقت!!..
قعدت تزمط فريقها وكأنها تاكل فيه..
ع طلعته هو من الدار جاها..
هانيبال بملامح ناعسه:خيرك مش راقده..
مرام:ماجانيش نوم...
اتكا بيده ع قفص الباب:بلا كذب وقولي خيرك..
مرام بضحكه:باهي بنقولك..رفعت حواجبها وقالت..خاطري فجيلاطي..
هانيبال بتضييقة عيون:شنووو؟
مرام:ههههههههه..خلاص برا كمل ومادورش..
خشلها ..ووصل فيها شد راسها بإيديه ونطحه وقال:كم مرة....نطحها مرة تانيه..نقول..نطحها مرة تالته..كان تبي حاجه قولي...
مرام تضحك وعيونها مغمضات:اللي نبيه هالمرة صعب..
بعد وهو قاعد شاد راسها قعد يشوفلها وهي تشوفله وتضحك..
هانيبال :مافيش حاجه صعبه بإذن الله..
قرب باسها من خدها..
بعدين بعد وقال :شويه وجاي..
ولف ومشي...
ناضت هي وراه تنادي:ياهانيبال..تعال ..ياهانيبال..
طلع من الحوش وصكر الباب..
فنفس الوقت اللي عيط فيه عمار..
وقفت فمكانها وتنهدت بقلة حيله..
بعدين لفت ومشت لولدها..
🍁🍁🍁🍁
2:30ليلا..
نزل من الدروج ومشي طول طلع من دار الدروج بطريقه لباب الحوش البراني...وصل فيه..
وفتحه..
سالم بخلعه:شنو في شن صاير؟!
هانيبال بضحكه:عليك منظر منظرك..
سالم رفع حواجبه .
هانيبال:عندك جيلاطي..نعرفه مايتمش من عندكم صيف ولاشتي..
سالم:جايني نصافات الليل تخلع فيا ع خاطر الجيلاطي..
هانيبال:تي غير هيا سقدني بسرعه مسيب العيله برواحهم فالحوش..
سالم رفع حاجبه وقال:باهي..
لف ومشي..
بعدين وقف وتلفت وهو يقول:خش..
هانيبال:مش لازم نراجي فيك فالسياره..
مشي سالم..
وهانيبال ولى لسيارته..
🍁لحظات وطلع سالم بحافظه..ومشي لسيارة صاحبه ومدهوله...
سالم:خود..
خدي هانيبال الحافظه ومد لسالم فلوس..
سالم :بالله عدي فحالك..رووح ..روووح..
ولف ومشي للباب خش وصكر وراه الباب..
ضحك هانيبال وقال:متخلف..
تنهد بعدين شغل سيارته وتحرك..
🍁فحوش سالم..
فدار النوم..
امال بملامح ناعسه:خيره هانيبال؟..
سالم خش السرير وقال:يبي جيلاطي..عارفنا قاعدين نستعملوا فيه فمحلات الحلويات.. واضحه شكلهم هله توحموا عليه..
امال :اممم...
بعدين عطت بظهرها بترقد..
جاها سالم وحضنها من الخلف وقال:فات فينا ونضنا نخلوها سهرة للصبح..
هي تنهدت بعدين التفتله..
وادت واجبها زيها زي اي زوجه تزوجت بدون حب..وكملت زواجها بدون حب...
ايه هي وياه كانوا علاقه سنين..
مش حبا فيه..بس لأنه مافيش غيره..
هلبه زي امال..عايشين حياة زوجه عاديه جدا لاليها لون ولاطعم....
🍁🍁🍁🍁
واخيرا رقدت ياماما..
قالت كلامها بهمس..
حطت ولدها فسريره بحذر..
بعدين مشت طلعت من الدار وقلبها واكلها ع راجلها..
وصلت في الباب..
انفتح وخش هو بالحافظه..
ضحكت بصدمه:وين لقيته؟!
هانيبال وهو مبتسم بقرنة حواجب:وين مالقيته لقيته..مدلها الحافظه وقال ..شدي..
خدتها مرام وهي تضحك..
هانيبال صكر الباب وهو يقول:متأكد انها بنت مدام جي خاطرك فجيلاطي...
مرام بضحكه؛ع اساس شنو ؟..
هانيبال:هكي قلبي يقولي..بتجيني بنت سمحه يتعاركوا عليها حتى هي بطيح سوق ملعقة ميلاد..
مرام:ههههههههه..
هانيبال بضحكه:هي عدي خشي داخل صقع ..
خشت مرام وهي تقول؛تاكل معاي..
هانيبال وهو خاش وراها؛اممم..باهي..
🍃🍃🍃🍃
وعدوا يومين..
كان الهدوء فيهم مسيطر ع الوضع بعد اللي عاصفه اللي دارها عماد..
مافكروش البنات بتاتا يفتحوا سيرته لرزان..
رزان اللي بدت تستعد للرجوع لقرايتها وامتحاناتها ومنشغله بيهم..
جتها يوم السبت تغريد تتحمدلها بالسلامه وجابتلها معاها المحاضرات اللي فاتوها وقالتلها ع الحاجات المهمه..
وعيون رفقه وحدهم يراقبو فيها..كيف تحاول جاهده انها تشغل نفسها عن التفكير فيه..
🍁يوم الأحد..
امتى بتروحي..
رفقه:بابا قال جايك الساعه 10..
ابتسمت رزان بعدين قالت:تعالي..حضنتها وهي تقول..بالسلامه..
رفقه بإبتسامه:بالسلامه قلبي موفقه..
بعدت رزان وقالت:تسلميلي..
سمعوا صوت كلاكس سيارة توفيق.
رزان:باااي..
ومشت تجري ..
ورفقه معاها بعيونها لين طلعت من ممر فم البوابه..
وصلت رزان فسيارة توفيق لقت حدهم تراجي فيها..
رزان:صباح الخير حدود..
حدهم بإبتسامه:صباح الورد..
ابتسمت رزان بعدين فتحت الباب وركبت جنب خوها..وحدهم ركبت من الخلف..
توفيق:مانسيتن شي..
الزوز مع بعض:لاا.
هز راسه بإيجاب وشغل السيارة وتحرك...
وخاله حسن كان واقف فوق السطوح يشوف فيهم..
بعد مشوا..
رفع عيونه القدام..
جو ع خزان حوش برقه الإسمنتي اللي كان باين عليه من بعيد..
ضيق عيونه بعدين..
حط ايديه فجيوبه ولف ومشي بينزل..
🍁🍁🍁🍁
الساعه 10:30
في المستشفى العام..
كانت طالعه من مكان الدورة اللي بدت تاخد فيها بش تمارس مهنة التمريض الى جانب بنت خالتها..
وين ماتخطم..
عيون الرجاله تتعلق فيها..
كلهم يعرفوها من تكون...وعارفين وضعها..
والعين بدت عليها....ولأن التعدد من غير سبب ولى موضة الفترة هديكا..
كانت هي حلم كل راجل يبي يعدد..
بس في راجل...وحداني..
ماعنداش ونيسه وشريكة حياة..
برغم انه سبقله الزواج بس كانت تجربه فاشله جدا..مالقاش فيها ونيسته وشريكة حياته..وممكن هو اللي ماباش يلقى..
لعند ماشافها..
ولى تواق...لتكون هي الونيسه وشريكة الحياة...
🍁البارقه وهي تمشي:افف..وين عدت فضيله هدي؟!..
وهي تمشي وتوزع فنظرها وادور...
وقفت فمكانها لما جو عيونها عليه..واقف من بعيد شوي ويشوفلها..
ارتبكت..
بعدين تجاهلاته و كملت طريقها ..
هو لما فاتت من حداه مشي وراها..
حسن:معليشي..بارقه..
هي سرعت مشيتها وهي تحرك فعيونها هني وهني..
حسن:بالله عليك وقفي شويه..
هي مابتش تعدل عليه..
وصلت فحجرة خشت وصكرت الباب فوجهه..
البارقه بتذمر:افف..اوووفف..
"الصوت يااختي"..
التفتت لقت روحها خاشة حجرة فيها مرضى كبار سن..
ابتسمت بربكه وقالت:اسفه..
برا..
حسن اضايق هلبه من اللي صار..
مشي وهو يفكر كيف بيدير..يبي يحصل معاها فرصه يتكلموا ويحاول يقنعها بيه..لكن مش عارف كيف..
مشي طول طلع من المستشفى وهو يفكر..
🍁🍁🍁🍁
الساعه 4:00قبل العصر..
متكيات فالدار ويهدرزوا..
غاليه:قات لو عاودها مرة تانيه بنحرش خوتي..
رباب وهي شاده بنتها ترقد فيها:حرام يصخف الباين يبيها بجديات..
حميده:اني والله ماني عارفه ولد عمي هدى كيف يفكر ماسد انها بنت برقه اللي بينه وبينها تار..وفوقها المراة طالعه من عيله شردوها تشريده العدو..مهبوله هي بش ترمي روحها هالرميه مرة تانيه..
رباب وهي تحط فبنتها ع الفراش قالت:لكن ياخالتي خالي حسن تغير هلبه..مؤنس ديما يشكر فيه..
غاليه:والله حتى اني ملاحظه تغييره..
حميده بحده:اني مانشوف شي غير ان ضراري عمك كلهم جنس كلاب وحيقعدوا طول عمرهم هكي..
شبحوا رباب وغاليه لبعض..
اما حميده غيرت الموضوع طول وقالت:عميمتكن لميا روحت اليوم..
غاليه:وووااك..ماني عارفه شن بنقولولها بعد اللي صار مانيش طايقه نجاملها..
حميده:ع خاطر امي وعمر بنسايروا وخلاص..
رباب:هو هدا..بعدين غيرت عيونها لبلقيس اللي كانت متكيه وسرحانه..قالت..بيسو..
شبحولها غاليه وحميده..
غاليه:بلقيس..بلقيس..
استاقضت وشبحت لغاليه..
غاليه:صبي ارقي لشقتك وارتاحي..
بلقيس:لالا نبي نقعد هنى مانبيش تقعد بروحي فوق..
ناضت غاليه ومشت للدولاب..
فتحاته وخدت منه بطانيه..
وجت لبلقيس غطتها وقالت:مال ارقدي توا وردي بالك تتحركي باقي اليوم فهمتي..
ابتسمت بلقيس بتعب..بعدين غمضت عيونها..
وغاليه ردتلها الإبتسامه وولت للدولاب وصكراته..
بعدين مشت قعمزت وهي توزع فنظرها بين رباب وحميده اللي كانوا يشوفوا لبلقيس بضيق..
🍁🍁🍁🍁
الساعه 5:30 عصرا..
نزل من شقته بسرعه..
وخش لحوش اهله..
لقي خواته ومعاهم رباب وسعيده فالصاله يهدرزوا..
محمد:السلام عليكم..
ردوا عليه:وعليكم السلام..
محمد:هديك وين..
غاليه اضايقت من اسلوبه وقالت بشي من الحده:المراة مريضه وراقده..
محمد:خيرها!!؟..
غاليه:هوينا فالدار خش شوفها..
هو حول سبيدروه ومشي للدار..
وهما معاه بعيونهم..
🍁خش عليها..
لقاها متكمكمه فالبطانيه وراقده..
قعد يشبحلها وهو يفكر..
من هديكا الليله اللي كشخ فيها عليها وقلبه واجعه..مشكلته مستصعب يرضيها..فتفكيره ان المراه لو خدت ع هكي حتدلع وتتشرتع وتركب عليه ومايعرفش كيف يسيطر عليها بعدين..
هي كعادتها مشت الوضع عادي وكأنه ماصار شي..بس هو قعد مضايق من نفسه..ولأنه مضايق من نفسه قعد يتعامل معاها باسلوب جاف جدا..
🍃في هلبه رجالة هكي شخصياتهم معقده وصعبه🍃
قدملها وقعمز حداها..
قعد يشوف لوجهها وهي راقده كيف مولي اصفر..
قلبه انعصر..
حط يده عليها وبدي ينوض فيها:بلقيس..بلقيس..
هي فتحت عيونها شوي شوي..
لما شافاته ابتسمت وقالت بنعس:حمودي..بعدين فنصت وقالت..اسفه مش قصدي..
هو ماتحملش يشوفها هكي..
قربلها وضمها وباسها..
هي غمضت عيونها وشعورها هداكا الوقت كان مختلط بين الزعل والحب❤..
شويه وبعد وحط انفه ع انفها قال بصوت هادي:قالوا مريضه..
بلقيس بإبتسامه:تعب الوحم بس.
محمد:باهي صبي نرفعك تعايني..
بلقيس:لا مش لازم..انت كيف مروح من العمل..
محمد:شن دخلك بيا انتي كيف مروح ولاماروحت...قتلك صبي نرفعك اني..
بلقيس بإبتسامه:حاضر..
هو قرب باسها من خدها ..
"ياغاليه"..
بعد طول لما سمع صوت امه..
ناض وقال:هي صبي سقدي روحك..
ولف ومشي طلع بسرعه..
وهي تضحك عليه..بعدين هدت ضحك وقالت بهمس:
نحبه نموت فيه💓
🍁🍁🍁🍁
بعد المغرب..
كانت غاليه فالكوجينه تشبح فالتقويم فتليفونها..
ابتسمت بعدين طلعت منه وحطت تليفونها ع السكريات..
ع خشة حميده قالت:غاليه..
التفتت غاليه وشبحتلها وهي تقول:نعم..
حميده مشت وقفت ع الحيط وهي تقول:نبي مساعدتك فحاجه..
غاليه بإستغراب:اللي هي؟..
حميده:نبي نرجع نخدم فالمستشفى..
ابتسمت غاليه وقالت:احسن قرار تاخديه..
حميده بقلق:خايفه خوتك يقولوا ليش ع خاطر وضعي..
غاليه:وخيره وضعك ؟لاك اول ولااخر وحده تطلق وتخدم..
حميده:مش عارفه؟خايفه من خوتك يوقفولي فيها..
غاليه:اني تو نفتح الموضوع معاهم ونقنعهم وامي معاي..
حميده:تتوقعي امي ترضى؟..
غاليه:هي بروحها تبيك تخدمي ماتبيكش تقعدي فالحوش..
حميده تنهدت بعدين قالت:باهي..نعبا عليك خلاص؟!
غاليه بإبتسامه:اطمني..بإذن الله موافقين..
حميده ابتسمت بألم وقالت:يارب...
ع خشة بلقيس ومحمد للحوش..
مشوا طول للكوجينه..
هما الزوز:السلام عليكم..
ردوا عليهم :وعليكم السلام..
غاليه ابتسمت وين شافت السعاده باينه ع وجه بلقيس..
محمد:امي وين..
غاليه وهي ماشيه:تعال معاي..
مشت طلعت ومحمد وراها..
حميده؛ها شن دارولك..
بلقيس:تغذيه...
برا..
وصلت فنص الصاله ووقفت..
وهو وقف معاها..
غاليه؛محمد..شن جوها بلقيس معاك..كويسه؟..
هو ضيق عيونه وقال:ايه كويسه..ليش تسألي؟..
هي تنهدت بعدين قالت:بلقيس طيبه واجد وبنت متربيه ومحترمه..حاول تتعامل معامله كويسه..
محمد رفع حاجبه وقال:شكتلك ولاشنو؟..
غاليه:لا والله العظيم ماصارت من نهار خديتها لتوا مادوت لحد عن حياتها معاك نهائي..وكان جابت سيرتك تشكر بس وربي شاهد..لكن اني لاحظتك انت اسلوب معاها مش حلو..حتى بكري كيف قلت قدامنا وين هديك! الكلمه هدي خلتني نتخيل شكل معاملتك ليها..
محمد قرن حواجبه وقال:نعامل فيها احسن معامله تريحي ياغاليه..
ومشي طلع من حداها..
هي حركت راسها ايمين ويسار..وبعدين مشت ولت للكوجينه..
🍁🍁🍁🍁
مشكورة رغوده تعبتك واجد......هههههههه تمام يللا بايات..
سلام...
صكرت ..حطت تليفونها حداها..ولهت باللاب توب..
رن تليفونها..
شبحتله..
لقاته رقم غريب..
طلعلها الكاشف الإسم..
جميله الزايدي..
ضيقت عيونها بإستغراب..بعدين قالت:زعم وحده تقرا معاي؟!
خداته وفتحت الخط وحطاته ع وذنها...
"يامسهر عيني...حبك على عيني..
يامحير قلبي..روحي فداك..
جنبك خليني..
قربك يواسيني ..ياحياتي وروحي انا بهواك..
حارمني طعم النوم ..
ياحبيبي عليك اللوم..
بعمري احلى يوم يوم كنت معاك..
رزان بعصبيه وقلبها بيفر💓:من الحيوانه اللي عطاتك الرقم..
رد ..
تسأل عن حالي ايه اللي جرالي..
ولالحظه ابدا انا هنساك..
ياما ليالي سهرت الليالي..
شاغلني انت همي رضاك..
رزان بغضب ودموعها ينزلوا:الحقيرة اللي عطاتك الرقم حنمسحها من حياتي كيف مامسحتك..
ضحك ورد..
ياحلاوتك وانت ع قلبي قاسي..
ياغلاوتك وانت هاجر وناسي ..
رزان بنبرة صوت فيها عياط؛نكرهك..نكرهك ياتافه...تفو عليك..
وصكرت فوجهه..
هو حط التليفون ع مقدمة انفه وهو يضحك بعيون مغمضات..وعاض ع شاربه التحتاني..
بعدين بعد التليفون وفتح عيونه وقال؛نستاهل شن ماديري فيا نستاهل..
خودي حقك..خودي بتارك..نارك برديها معليشي..المهم فالأخير تكوني ليا ومعاي لأخر يوم فعمري وعمرك❤
💓اما هي..
اتصلت برفقه هزبتها تحسابها هي عطاته..حلفتلها رفقه انها ماكلمتاش نهائي من يومها..
صكرت منها وكلمت حدهم..
كذلك حدهم حلفت ان ماليهاش اي علاقه..
صكرت منها وكلمت عمتها غاليه..
غاليه كذلك حلفت انها ماعطاته حاجه ع قد ماتجداها..
رزان وهي ترشف:باهي..منو عطاهله ياعمتي الرقم عندك انتي ورفقه وحدهم بس من العيله..
غاليه:مش صعب عليه يلقاه يارزان راهو..
رزان مسحت دموعها وقالت:مش مهم لو يوقف ع راسه معاد مازال نحسبه مخلوق اصلا..باي..
صكرت رزان..وطول بعدها حطت رقمه فالحظر..وهي عارفه كويس ان هدا مش حل بس ماتقدرش ادير غير هكي حاليا..
بينما غاليه اتصلت بعد صكرت رزان بعماد كدا مرة لكن ماباش يرد عليها نهائي..عارفها بتهزبه..
🍃🍃🍃🍃
بعد يومين..
الساعه 7:00مساءا..
الجو برا كان ممطر بغزاره..
وهما داخل في المربوعه الداخليه يتكلموا فموضوع مهم..
تقعمز وتهني روحها
هانيبال:اني مع الهادي ماعندها عليش تخدم..
محمد:بنتها ماناقصها شي وهي لاناقصتها حاجه
غاليه:كيف هكي؟؟!تقعد محبوسه فالحوش يعني لأنها مطلقه..
الهادي بسخريه:مش لأنها مطلقه..لأنها ضحكت عليها الناس وخلت روحها كلبه ماتسوى..
هانيبال؛هادي!
الهادي وهو يحرك فيده قال بنرفزة :لاهادي لامعتوق..
غاليه تنهدت بضيق وقالت:هي غلطت ماحد ينكر..لكن عاد مش لهالدرجه خلاص ساد ماتعاقبت..
طق باب المربوعه..
هانيبال:خش..
انفتح الباب
غاليه اتفاجئت
والهادي طول لف وجهه للجهة التانيه..
حميده خشت وصكرت الباب بعدين قالت:طلاق واطلقت وكل حد عدا فحاله..حتى كان ارتكبت خطا..فالنهايه لاوطيت روسكم ولا وسخت سمعتكم..اني توا معاد عندي شي نتمناه غير اني نربي بنتي احسن تربيه ومانخليها معتازة لشي ولاتراجي من حد يعطف عليها..امها توكلها وتشربها وتسد حاجتها..امها تصرف عليها..نبي نجنبكم الناس اللي يقولوا ولد رحيم هزي عليهم وهما يربوله فبنته..
هانيبال:ومن قالك القطاف هدى في حد معدل عليه؟!..
شبحت هي وغاليه للهادي..
محمد:القطاف هدى سمعناه وماناش مدورينه بكل..
حميده وهي شاده دموعها وتتكلم برجاء واصرار؛ارجوكم بالله عليكم خلوني نطلع ونخدم ونصرف ع نفسي وبنتي..كل واحد فيكم داير عيلة وعيلته قاعده تكبر والمصاريف تزيد والدنيا غاليه..واني بنتي العام الجاي بتقرا مازالت ياما تبي..بالله عليكم ماتعاندوا..
هانيبال تنهد بعدين قال:باهي..
شبحوله الهادي ومحمد..
هانيبال:لكن حطي فبالك لو ماكانتش غاليه معاك فنفس المكان ماكنت خليتك تقصي خطوه برا الحوش..
انوجعت هلبه من كلمته..بس تغاضت عنها..
هانيبال:خلاص عدن توا..
غاليه:باهي..
ناضت غاليه ومشت لحميده اللي كانت تشوف للهادي بنظرات حقد هانيبال انتبهلها وركز عليه كيف قالب وجهه..
حس ان في شي تاني صاير..
راجاهم لين طلعوا..
بعدين شبح للهادي وقال:صار بيناتكم شي تاني؟..
الهادي شبح القدام وقال :لا...بعدين ناض وقال..والقرار اللي خديته غلط وحميده هدي حتخليك تندم عليه..
ومشي طول للباب فتحه وطلع..
هانيبال بإزدراء:مولي دراه كبد..
محمد:مش منه وضعه تاعب وهله مش مريحينه..
هانيبال:قاعدين ع موالهم الاول؟..
محمد؛واحرف..
هانيبال بإستياء:عليك حاله....باهي وهداك اللي سماه عمر قص كراعه من هنى ليش..متبع جرة مراته؟..
محمد:تس..عمر مش مزبوط من قبل ماتروح ملاحظه فيه شي..
هانيبال شبحله بتضييقة عيون وقال:حتى اني حسيت...واضح ان في وراه شي..
محمد:يستر الله وخلاص..
هانيبال هز راسه بإيجاب وهو قارن حواجبه قال:تو ندوره..
🍁ودور هانيبال عمر..
فالقهوة..مالقاشي
مشاله لحوشه..طق لين عيي مابي حد يفتح..
اتصل بيه مايردش
طارتله منه..وفنفس الوقت عرفه هارب من حاجه شن هي مش الله اعلم..
🍃🍃🍃🍃🍃
25\12\2015..
الساعه 11:00صباحا..
"السلااام..ياقوم"..
زينب بضحكه:كيفو جت..
ناضت غاليه فتحت باب المروحه..
لقت كفايه تفك فبطم بالطوها وهي تضحك ومعاها ونورهان اللي جت تجري لخالتها وحضنتها..
غاليه:سلم نوراتي..
كفايه:من في داخل؟..
غاليه:زينب بس اللي جت لتوا..
بعد حولت كفايه كندرتها سلمت ع غاليه..
وبعدها خشت داخل..
وقفت وهي متفاجئة بعدين قالت وهي ترمش فعيونها:اووو لااالااا زنوبيا ماهدا ياهدا..
ضحكوا..
كانت زينب متغيره هلبه..
قاصه شعرها وصابغاته باللون العسلي..ووزنها نازل باين جسمها مثالي وطالعه حلوة بالمرة..
رباب :اني حداها نبان امها نهاري..
فاطمه؛تو يجيها هانيبال ويعطيها ع راسها..
كلهم:هههههههههه..
زينب بضحكه:تعالي سلمي انتي وسادك تبلحيق محسديه راك قاصه قبلي وميشه..
كفايه وهي تتحلف بيدها:والله لما نقلدك باهي..
ضحكوا وقدمت كفايه لزينب وهي مازال تعلق عليها..
سلموا ع بعض..
وبعدين.سلمت ع الباقي ماعدا امها لأنها استقبلتها من برا..
حميده:وين الولاد..
كفايه بإبتسامه؛شويه ويوصلوا..
فجأة سمعوا صوت كلاكس..
غاليه:هدي نعيمه..
بعدين سمعوا كلاكسات تانيه..كانوا اصوات متداخله..
رانيا بضحكه:اهو جي اللي يبيها..اهو جي جاب كساويها..
ضحكوا..
بعدين مشوا طلعوا من الباب القدامي
لقوا سيارات تلود ورا بعض
عبدالسلام..وهانيبال..وعمر..وولاد كفايه التلاته..
قعدوا يدوروا ع شجرة النبق اللي متوسطه الساحه وهما يكلكسوا ..
والنساوين يتفرجوا ويضحكوا..
شويه ودرسوا..
نزلوا عيله عبدالسلام..
ونزلت مرام بولدها ..
ونزلت لمياء..
وكلهم كانوا يضحكوا..
حميده:ريتوها كيف تضحك ولاكأن صايرة حاجه..
بلقيس تشوفلها بكره..
ورباب قالت:ومع هدا خايفه منها
بعدين ابتسمت رباب لما وصلت فيها دلال
دلال:ربوبه..
رباب:دلوله..
ضحكوا بعدين قعدوا يسلموا ع بعض
الكبار قعدوا يسلموا
اما الصغار
مشوا الولاد مع بعض ع تركينه وهما يسلموا بطريقتهم..
وحنين ونورهان خدوا اسيا وخشوا بيها لروان..
صح توا افضل حال رجلها لكن مازال تبي مدة اطول ع ماترجع تتحرك وتلعب مع البنات زي قبل..
🍁🍁🍁🍁
هاتي يا فرخه خير ماتاكلي زوز كفوف..
رانيا:غير جرب بس..
عماد:جيبي جاي الشاميه خيرلك..
جبدت دلال حكه الشاميه من رانيا ع حين غرة وهي تقول؛لا انت ولاهي..
ولفت بتطلع بيها..
يتلقاها مالك ويجبدها من يدها وهو يقول :هي طيري..
وخداها وطلع بيها فم البوابه..
غاليه بضحكه:هدى كله ع خاطر طشة شاميه!؟
عماد مشي شبح من الروشن لقي مالك ونور ياكلوا فيها مع بعض:مجاعه..
ولا عدلوا عليه..
ولت خشت دلال وهي تضحك وقفت حدا الغاز وقالت:يهبل الشتي هني..
عماد مشي اتكا ع الرخامه وقال:فبالي حاجه..شن رايكم نديروا زرده فالجردينه..
رانيا وهي متكيه ع الدولاب:علاش مش فالوادي..
تلفتلها عماد وقال:هدا مامزال...مش عارف كم انتايه يدوروا فالوادي!!
مطت شواربها رانيا بإزدراء..
ودلال وغاليه ضحكوا..
بعدين غاليه مدت الصفره وقالت:عدي قول اقتراحك للرجاله قبل..
خدي الصفره وقال:ok
مشي طلع بالصفره..
وهو طالع من فم البوابه قعد يشوف لنور ومالك كيف يهدرزوا تنهد بإبتسامه وكمل طريقه
وين وصل للمربوعه الخارجيه..
لقي خاله ميلاد ومعاه توفيق مقعمزين...
عماد"هي توكل ع الله"..
مشي حط الصفرة ع طاوله..
بعدين مشي لخاله..
مد يده وقال بإبتسامه:خالي شنو حالك..
ميلاد صافحه وقال من فوق نفسه:الحمد لله..
طبس عماد كب ع راسه..
بعدين جي لتوفيق ومد يده وهو يقول:كيف الحال..
توفيق مد يده بدون مايرد..
صافحه..وابتسم وهو يقول فنفسه"المهم مد يده "..
ومشي قعمز حدا خاله هانيبال ومروان يفرق فالضيافه..
🍁🍁🍁🍁
اصوات الهدرزة والضحك مسموعه من حوش رمضان..
واصوات الصغار..
اللي يلعبوا..
واللي يعيطوا ..
واللي يناغوا..
الحوش كان عامر باللي فيه...
كلهم ملتمين بعد نادتهم غاليه اللي مرتبه لهاليوم الحلو..
اللي حيديروا فيه عيد ميلاد روان وحنين مع بعض..
هو روان عيد ميلادها سابق بهلبه بس من باب جبر الخاطر داراته غاليه مع ذكرى ميلاد حنين..
كان تبي تجبر بخواطرهم..وتنسيهم التشوهات النفسيه والجسديه اللي اصابتهم الزوز..
بالذات حنين..تبي لعدد ذكرياتها الحلوة يزيد ويطغى عالسيئة..
🍃محلا قلبك ياغاليه..قطعه من الجنه هالقلب..وكأنه ربي عطاها حنان كبير يبيه يبد ع كل احبابها ومايكونش بس محصور بزوج واطفال من دمها..🍃
🍁وجود سعيده كان كاتم ع انفاس لمياء..
ووجود مرام كان غام ع.قلبها هي وسلفتها..ملاحظين ان الإحترام اللي يكنوه لمرام زايد عن الحد..حتى سعيده مادارولها هكي..
والزوز فاهمين..ان هالمكانه نالتها بزواجها من هانيبال..
عكسهم كانت بلقيس اللي خاشه فجو العيله ومش ملتفته للتفاهات هادي..تضحك وتهدرز وتبصر وقاعده تبني فمكانتها فقلوبهم بعفويتها وبساطتها وطيبة قلبها💖..
🍁زينب:حسيتها عاديه معاك..
كفايه:ايه..عاديه مع الكل ماعدا سعيده..
زينب:حتى سعيده مش طايقه تشوفلها..
كفايه وهي مركزه ع سعيده قالت:ايه..
شويه علي صوت لمياء وهي تقول؛سلفاتنا الضراير وين..
كلهم شبحولها..
وسميه شبحتلها وضحكت..
غاليه بشي من الحده:بيجوا العشيه..
لمياء:اهااا..
🍁🍁🍁🍁
ربطت حزام بالطوها..
بعدين لبست شبشبها وطلعت..
حطت ايديها فجيوبها وقعدت تمشي وتشوف للسمي المغيمه..
نزلت عيونها بعدين تنهدت وهي تقول لنفسها"قريب يطلع زهر الليمون الله قديش مستاحشة ريحته"..
ابتسمت ووصلت لممر فم البوابه..
وكأن القلوب مرتبه لموعد مسبق💓💓
هو كان واصل من الجهة التانيه..
هالمرة كملت طريقها عادي بدون ماتعيرله اي اهتمام كأنه مهناش..
اما هو فكان يطول فخطواته بلعاني بش يوصل فيها..
وصل فيها ووقف قدامها..
هي مشت من الجهه التانيه..
جي قدامها..
غمضت عيونها بنفاد صبر بعدين..
لفت ومشت..
هو ضحك وخش داخل..
هي لادت ع الحوش وكانت معصبه مش من هو بس حتى من قلبها اللي يفر فران ع خاطره💓..
وصلت فباب الحوش القدامي اللي كان مصكر..
كيف جت بتحول شبشبها..
انفتح الباب..
طلع هو وصكره وراه..
هي انصدمت..
هو اشر ع رجليها وقال:معقوله تلبسي الشبشب فهالصقع؟!!تبي تحصلي رقده تانيه في المستشفى...رفع حاجبه وقال بإبتسامة غرور مصطنع..لكن مافيش مشكله اني موجود....نجرح ونداوي..
لبست شبشبها..
ولفت بتمشي..
انفتح الباب..
"رزونه"..
التفتت رزان..
كفايه فتحت ايديها وقالت:تعالي ياحبيبة عميمه انتي تعالي.
تحشمت رزان رمت شبشبها ومشت لعمتها وخشت فحضنها..
ضمتها كفايه وهي تقول؛الحمد لله اللي نجاك وحماك بنتي..
رزان:تسلمي عميمه..
عماد بضحكه:وبعتلها من يردهالكم..
رزان بعدت عن عمتها وقالت بضيق:نبي نخش عمتي..
كفايه:ماتعدليش عليه هالسفتول هدا..
هالسفتول..وقعدت تتلاحق فيه وتضرب وهي تقول..هالمعفن...هالجرو...
وهو عماد يتلقى فالضرب وهو يتحسس فذراعه ويضحك..
كفايه؛معفن..
وخدت رزان وخشت بيها وقربعت فوجهه الباب..
عماد:ههههههههههه..نجيلي امي وكنتها هالعسلات هادم..
رن تليفونه طلعه من جيب الكبوط لقي محمد يتصل ..
ضحك..بعدين مشاله وهو يغني..
ياحب حبي اللي نحبه ياحبي اني..💓
🍁🍁🍁🍁
في المربوعه..
كان عمر مقعمز حدا عبدالسلام وسعد يسمع فهدرزتهم مع خيري وميلاد ومؤنس..
ماحسش بهانيبال لما جي قعمز جنبه قرب من وذنه وهو يقول:وين كنت مختفي الفتره اللي فاتت وليش..
ببطء التفتله عمر وهو يشوفله..
وهانيبال يشبح للرجاله كيف يهدرزوا قال:خليني نعرف منك خير مانعرف بروحي...
عمرتنهد بعدين قال:عليا دين عند واحد وليه مده يطالب فيا بيه ماعنديش بيش نسده..
هانيبال ضيق عيونه وقال:كم..
عمر زفر وقال:5000دينار...
وزع هانيبال نظره عالرجاله اللي يهدرزوا قدامه ..
عمر شبحلهم كذلك وقال؛خفت يجي هنى ويدير مشكله هدا ليش معاش جيت..وانتم مابيتش نخبركم بيش ماتحيروش معاي..
حط هانيبال يده ع كتف عمر وقال:مفروض من الأول قلت..لكن مافيش مشكله تو نتصرفوا ان شاء الله..
ابتسم عمر بضيق..
وفداخله شعور رهيب بالخوف من معرفة هانيبال وباقي خوته لحقيقه اخرى مش زي اللي هو حكاها توا..
....يتبع...
