#العشق_المتمرد
الجزء 102
#جمان_فريد
🌟..
كيف نعيش وانت مش نصيبي..
كيف نعيش وانت مش نصيبي..
موتي خير بعدك ياحبيبي..
🍁مقعمز قدام البحر ..
حاط السماعات في وذانه ويسمع فأغنيه وليد التلاوي..
متكي ع ظهر الكرسي ورافع راسه فوق..
مغمض عيونه..
والدموع رغما عنه تنزل..
العشق وناره وعذاب الفراق...مايفرقوا بين دموع راجل ومراة..
ياكم قرينا ابيات من الشعر الفصيح الجاهلي ومابعده كان العاشق وهو يوصف فيهم حالته ع حسب وضعه فراق..شوق..
لابد يجيب سيرة الدموع..
والراجل بالذات..
دموعه ماتنزل الا ع حاجه واعره...
واللي فيه عماد توا واعر..
هو ولى مدمن ..مش متحمل حياته من غيرها...
من غير مايكلمها يناشبها ينرفزها يتعارك هو وياها..
يسمعها تقوله يا"بااارد" بصوتها المميز..
يسمعها تقول"عدي فحالك"لما تطول مدة المكالمه وهي تبي تسكر وهو مايبيش..
يشوفها...تلاقيه...يلاقيها....ياكل من ايديها كل حاجه يطلبها منها يجي خاطره فيها..
يحسبها فحاجه وين يجي..تزهى فعيونه لبسه ولا خاتم ولاسلسله ويتخليهم عليها وطول ياخدهم بدون تردد مافي شي خسارة فيها..لأنها بنية قلبه..💖
ويقعد اكثر شي يعشقه فيها...احمرار وجهها وهروب عيونها عنه لما يغازلها💖..
هدا كله كان عايشه بتفاصيله ليه تلاته سنين ...
تدرجت فيه مشاعره ليها لين وصلت لمرحلة العشق..والإدمان..
ولا كان حاسب للفراق حساب...كان هارب منه..مايبيشي ع قد مادارت فيه..لكن مع الأسف..
جاه جاه...
🍁نزل راسه..
مسح دموعه بيد..والتانيه فيها تليفونه..
خش ع الفيس..يبي يشوف ولأول مرة حسابها وشن تنزل وشن مدايره اي شي اي شي يهون ع قلبه اللي معذبه فراقها..
باهي كيف بيشوفه؟؟
بيحول الحظر؟؟!!!
لا...
بيشوفه بحسابه التاني..
ايه عنده حساب تاني قديم من قبل مايبدا علاقته بيها..
كان مرة مرة يخش ع الخاص متاعها..يناشبها ويجرب فيها ..ووحده من الحاجات اللي حبباته فيه رزانتها وثقلها ومحافظتها ع نفسها من لما كانت صغيرة فسن حرج ممكن تغرها الحاجات هادي وتقع في المحظور..
خش وشاف حسابها...
في الوقت نفسه..
كانت في وحده من بنات هديكا البلاد اللي هو فيها تشوفله من اول ما قعمز..
عجبها هلبه..
قعدت تقرب منه لعند ماجت وقعمزت جنبه..
هو ماكانش مركز الا فتليفونه..
وكان معصب ع الآخر..
لما شاف رزان منزله فأخر منشور..
ومدايرة نشاط...اشعر بالإسترخاء..
صوره لطاسه فيها جيلاطي ويبان منزلي الصنع...
عماد"انت هني بتموت بلاها وهي تسترخي وتاكل فجيلاطي ياحمار"..
استاقض لما سمع كلمة تحيه باللغه الإيطاليه بصوت انثوي ناعم..
قام راسه وشبح للبنت اللي كانت تشوفله بإعجاب شديد ورغبه...
ايه هو راجل في النهايه وممكن شيطانه يغلبه وينجر للحرام بالذات وهو منغاظ هلبه من الإنسانه اللي يحبها اللي يشوف فيها كذبت عليه ولعبت بقلبه وشعوره...
لكن نظرة عيونه للبنت كانت نظرة زاهده..
ناض ومشي من حداها وخلاها تشوفله بصدمه كيف فاتها ولا رد عليها..
هو زهد فكل نساوين الدنيا لأنه معبي برزان..
والراجل لما يتعبا بمراة لايمكن يخونها ...
كلامي هدا مش اسطورة قديمه...هادي حقيقه وقفت عليها بعيني..صح نادرة...لكن موجوده...
🍁🍁🍁🍁🍁
علقت قفطانها في الدولاب وهي مازال سارحه تفكر..
فالكلام اللي سمعاته ..مش ساهل بكل..
هي مش عارفه كيف تتصرف...
صكرت الدولاب..
ومشت لكندرتها خدتها حطتها في دولاب الكنادر..
وهي مازال تفكر...
بعد صكرت الدولاب وصلت لنتيجه..
ع خشة راجلها للدار..
سعد:كيف كانت الأجواء..
التفتت وهي مبتسمه تقول:حلوة هلبه والباين طاحوا في ناس زيهم كويسين..
قعمز سعد ع السرير وهو يقول:ربي يتتملهم ع خير..
كفايه :آمين..تنهدت بعدين قالت:ماكلمكش عماد؟
سعد:كلمني بكري العشيه جوه مليح واموره تمام..قبل بيكلمك لكن اني قتله امك مش فاضيه .
كفايه بعد قعمزت قبالته قالت:علاش ياسعد؟!
سعد بضحكه:قالي غدوة نكلمها إن شاء الله..
تنهدت وقالت:قلبي واجعني عليه لين خلاص..
سعد ابتسم وقال:تو يعديه كله ويولي زي قبل ويقتنع انه نصيب..
كفايه:تي غير شن تقول ياسعد بس؟!الولد يحبها من قلبه مش ساهل عليه يعديها وينسى..هدا اذا مش كان مستحيل..
رفع حواجبه وقال؛لهالدرجه!؟
كفايه:عماد بالذات دون خوته عندي من شبحة عيونه نعرفه..
تنهد وقال:يستر الله وخلاص..
هزت راسها بإيجاب وملامح الحزن ع وجهها..بعدين شبحتله وقالت:ايه بنقولك..خوي عمر هني جايب مرته لماليها..فكرت هكي غدوة نعزمه ع الغدي..شن قولك؟
سعد:مرحبتين بيهم..
ابتسمت كفايه وهي تشوفله..ومن داخلها كانت متوترة من اللي ناويه عليه غدوة..
🌴🌴🌴🌴🌴
واقفين فم الحوش يهدرزوا..
غاليه:ربي يهديها وخلاص..
الهادي:حاولي تكلميها تناقشيها باك تسمع منك..
شبحتله شويه وقالت:تتحسس ياعبدالهادي ..
الهادي بتضييقة عيون:ليش تتحسس؟
غاليه:تو تقول يعاود لخواته اللي يصير فحوشه ويدخل فيهم فمشاكلنا الشخصيه ومن هالكلام..
هو وزع نظره ع المكان بعدين قال:باهي شن الحل؟
غاليه بإبتسامه:حاول معاها مرة تانيه بهدوء وعقل ..
شبحلها وقال:كلمناها بالهدوء والعقل مانفع..
غاليه:حاول مرة تانيهبطريقة جديده..متلا جيب هديه بسيطه ورد حاجات سمحه كيف هدي تفتحلك باب..
الهادي بضحكه:المسلسلات التركيه مأثرات فيكن واجد..
غاليه بضحكه:والله فيهن حاجات صح كيف هدين مثلا لأن فعلا تأثر واجد فنفسيه المراة..
تنهد وقال:باهي تو نحاول...خلاص تو بنعدي نرقد..تصبحي ع خير..
غاليه بإبتسامه:قدامك كل خير..
راجاته لين مشي...
بعدين خشت وصكرت الباب..
بعد صكراته لفت بتمشي لباب البوابه تصكره خش منه محمد..
قدمت..وهو قدم لين وقف في الكوجينه..
وصلت فيه ووقفت..
غاليه:خيرك..
محمد:خوك امتى يروح؟
غاليه خافت:ليش شن في؟..
محمد:مافي شي..غير نبيك من توا ديري حل لحكاية التطييب ايواه..نهارين عليك ونهار عليها..
غاليه:ههههههههه..
محمد:نحكي جد مش عيشة هدي..قسما بالله بطني عدت فيها من ايكال القهاوي وغير هكي فساد النعمه شن راقدين ع بنك بيش نقعدوا نكركرولها وهي تلبز!؟
غاليه بضحكه:باهي تو نتفاهم معاها..
محمد:كويس..توا عطيني صونية المحشي اللي خليتها من الغدي..
ضحكت وقالت:باهي...
🍁خشت للكوجينه وطلعت صونية المحشي اللي مفضلها محمد من الكوشه..حطتها فصفرة ومعاها كاشيك وخبزة..
وهو خداهم وطلع وهي صكرت وراه البوابه..
بعدين خشت داخل..
مشت للدار..
خشتلها شافت لحميده اللي كانت راقده وهي غامه عيونها بالوشاح..وحنين جنبها..
تنهدت بألم..
بعدين مشت خشت فراشها..
وخدت تليفونها من فوق فراش المسند فتحت النت وخشت ع الفيس..
قعدت تقلب فيه بملل مافيه شي ملفت..
حتى بنات وولاد العيله مافي حد فيهم منزل شي جديد..
لعند ماقابلها منشور لليمامه الزرقاء..
كانت منزله صوره..
واخده لقطه فيها لهانيبال وهو مقعمز وعاطي بالظهر وقت الغروب اللقطه حلوة هلبه هلبه..وكاتبه فوقها...
(وراء كل امرأة سعيده..رجل عظيم💖)
ابتسمت غاليه..
وخشت ع التعليقات....
ماعرفتش الا بنات العيله اللي يدعولهم ربي يخليهم لبعض..
ماعدا دلال اللي علقت تقول
(الرجل العظيم هدا ورا سعادة كل من يعرفه..ربي يحفظهولك ويحفظهولنا كلنا)
ضحكت غاليه وقالت:دلال غارت...لكن تعليقها سمح..
لقت مرام رادة عليها تقول
(فعلا💖...اللهم آمين)
ابتسمت..بعدين طلعت من المنشور..
جت بتصكر بس شافت اشعار الرساله..
فتحتها..
(كيف حال السلطانه )
غاليه بإمتعاض:ماني عارفه ليش ماحضرته لعند تو؟
جتها رساله تانيه..
(أحبيني بلا عقد
وضيعي فخطوط يدي..
احبيني ..
لأيام..
لأسبوع لساعات...
أحبيني)
رفعت حاجبها وعاودت تقرا فيها من جديد..
ايه صح اغنيه لكاظم..
بس الأبيات لنزار قباني...
نزار قباني!!
توسعوا عيونها بإندهاش..
جتها رساله اخرى..
(اعتقد سايرتك بما فيه الكفايه...يااا..غلوشه..)
حطت يدها اللي ترعش ع فمها ...
رساله تبعت رساله
(مش تقولي دورت وراك بش عرفت الإسم..الإسم شفته فوحده من التعليقات ع منشوراتك...هدا اولا)
هي تتنفس بسرعه من الخوف والصدمه..
(تانيا..من البدايه عارفك... انتي نسمه...او غاليه)
بلعت ريقها وهي مازال تشوف للرسائل اللي يجو ورا بعض.
(الشغوفه بكل شي ليه علاقه بالمطبخ..والحلو تحديدا..
اللي تحب المسلسلات التركيه واكثر المسلسلات المفضله عندها دموع الورد وحريم السلطان ومراد علمدار)
قعدت تخبط فيدها ع خدها وتقول بهمس:غبارتي..غبارة!!
(اللي صغار خوتها وخواتها يحبوها هلبه...من تعليقاتهم حسيت انك اقرب ليهم من امهاتهم..ماخابتش نظرة قلبي فيك...حسك..حنونه وقلبك كبير...من اللي عرفتك للهالحظه واني مانبي شي منك اخطا حاجه وحده ولت عندي امنيه)
هي تشوف بعيونها الجاحظات للرسايل ومش قادرة ترد ولادير اي ردة فعل...
جتها رساله..
(اني نشوفك بس..حتى لو من بعيد)
هي طول دارتله حظر...
وطلعت من الفيس..وحطت تليفونها ع صدرها..وهي مفنصه وميته من الخوف...
انفجعت..لما رن تليفونها..
من الربكه لما قاماته تشوف فلت من يدهاو طاح ع وجهها...
حميده وبنتها صوت التليفون ازعجهم..
ناضوا..
حنين بخوف:ماما..ماما..
حضنتها امها وهي تقول:خلاص ماما..خلاص..شبحت لأختها وقالت بإنزعاج..ارقدي ياغاليه ياسرك..
غاليه وهي تشوفلها وتتحسس فخشمها:باهي باهي..
حميده:افففففف..زادت حضنت بنتها وغمضت عيونها وقعدت اطبطب عليها..
وغاليه صكرت هاتفها بالمرة وهي تقول فنفسها"يرزيني فيك"
حطاته تحت مخدتها..
وحطت راسها ع المخده غمضت عيونها بشده وهي مازال ترجف من الخوف..
🍁🍁🍁
تاني يوم
الساعه12:00قبل الظهر.
في الطريق..
لمياء بإبتسامه:خل ناخدوا حاجه نخشوا بيها أول مرة هادي راهو..
عمر بإبتسامه:من غير ماتقولي..
لمياء:ننزل معاك..
شبحلها وضحك وهو يقول:اكيييد..
ضحكت...
وشدت يده وهو شد يدها بقوة..
وقعدوا الزوز يشبحوا للطريق وهما مبتسمين..
هكي لعند وقفوا ع محل..
نزلوا الزوز..
وقعدوا يشوفوا
عمر عينه طول جت ع صنف بكلاوة بالفستق والعسل الحقاني:ناخدوا منهن ومن اللي باللوز..
هي وجهها تغير..قالتله:هو مش خسارة فأختك..لكن خسارة لينا حني حبيبي..
ضيق عيونه وهو يشوفلها..
لمياء:تعرفي الصفرة اللي بتاخدها قداش حقها..فوق 100 وبتزيد عليها صندوق عصير ولامشروب بهداكا
الحساب...وحني حبيبي القرش مستحقينه ولانسيت اللي نلموا فيه للشقة واثاثها؟!!
عمر:هو النهار يالمياء..
لمياء:ايه..لكن اكيد خواتك التانيات بيسمعوا وبيعزمونا زيهم لو مش توا بعدين..كل وحده فيهم تبي زي هالصفرة وشوف قداش بتحط..
هو قعد يفكر فكلامها وحسه منطقي ...واقتنع..بالذات انهم فعلا يدسوا في الفلوس بش يكملوا شقتهم...
شبحلها تاني وقال:باهي شن ناخدوا..
ابتسمت وقالت :اني تو نختار...
🌴🌴🌴🌴🌴
الساعه 1:30ظهرا...
بعد حطت طنجرة طبيخة البازين ع النار..
وقفت حدا امها اللي كانت مقعمزة فم الحوش ع الركابه يسمعوا فخطبة الجمعه اللي يلقي فيها ميلاد عن صلة الرحم..
الجامع كان قريب والصوت واضح جدا..
الحاجه فاطمه تسمع وهي تسبح وفخورة هلبه بولدها وفرحانه بيه..
وغاليه منسجمه مع موضوع الخطبه..
فنص الخطبه ميلاد تكلم ع الأب...ماقدرش يتمالك نفسه نبرة صوته الباكيه كانت واضحه..
سكت فجأة..
غاليه اللي كانت تشبح للجردينه وهي تسمع قعدت تبكي..
والحاجه فاطمه تمسح فدموعها بطرف رداها وتقول:الله يرحمه ويسامحه..الله يرحمه ويسامحه..
كمل بعدها ميلاد الخطبه..
فجأة
"نفاق"..
التفتت غاليه..
والحاجه فاطمه ضيقت عيونها..
حميده بتهكم:كيف المنافقين ايام الرسول يصلوا وراه في الجامع وهما اكبر كذابين وكفار..من وين لوين ميلاد يعرف صلة الرحم هو بيش يحكي عليها!!؟اللي قاطع هله سنين بش يرضي مرته..واللي حتى امه وسيده وين يشوفهم صدفه يدوب يحرك شواربه يسلم وهما بين سمعوها وماسمعوهاش؟!
فاطمه:شن لزومه الكلام هدى تو؟
غاليه:مش عارفه خيرك مصرة تردي السنين اللي فاتت بأي طريقه..
حميده:لان السنين هدينا يكملن السنين اللي فاتن ياغاليه..وبعدين تعالن هنى؟!غركن ميلاد كيف تغير توا؟؟راهو كان العقرب متاعه مارضت علينا تراهو كيف قبل واحرف..حني اصلا من كان يعدل علينا فيهم غير رمزي الله يفك اسره؟!!
زفرت غاليه بغضب وخشت داخل..
التفتت حميده وهي تشوفلها قالت:كان مش من سعيده وحقدها راك بعيلتك وصغارك..تراك لقيتي ع من تتكي فكبرتك مش تقعدي بروحك بطولك لامعاك والي ولاتالي..
غاليه الكلام صمتها..
التفتت ببطئ لحميده وقعدت تشوفلها برفعه حواجب وعيونها معبيات دموع..
حميده:هدى الحق..ماقلت غير الحق..
فاطمه:صكري فمك وخشي داخل..
حميده بتهكم:تو نصكره..حاضر...
ومشت طول خشت داخل...
وغاليه معاها بعيونها المصدومات والدموع ينزلوا..
ناضت فاطمه ومشت لغاليه..
شدتها من ذراعها ومشت بيها للكوجينه وهي تبكي وتقول بصوت شبه مبحوح:سمعتي يمي !!
فاطمه:سمعت يابنية روحي سمعت..
وخشت بيها للكوجينه..
🍁🍁🍁🍁🍁
في نفس الوقت..
استقبلت كفايه وعيلتها..خوها ومرته..
شويه ومشوا الرجاله لصلاة الجمعه..
وقعدوا لمياء وكفايه بروحهم..
في الكوجينه..
كفايه غطت الكسكاس وقالت:ترا لمياء سيبي اللي فيدك شويه..
طلقت لمياء الموس والخيارة وهي مستغربه ..
شبحتلها كفايه وقالت:في البيان البارح سمعت حاجه الحق مارقدتنيش الليل..حاجه يالمياء صدمتني لين خلاص..
لمياء وجهها ولا اسود قالت محاولة تصنع الثقه:عليا اني ؟
كفايه هزت راسها بإيجاب وهي تشوفلها بحده..
لمياء:باهي شن هي؟!!
كفايه تنهدت وقالت:اني بنقولك اللي سمعته مانتهم فيك بشي..نبي نتأكد منك بس...
لمياء:قولي ياكفايه!
كفايه بحزم:حق انتي خنتي ليلى بنت خال بوك وخديتي خوي عمر منها؟!!
🌴🌴🌴🌴🌴
كلامها كلام فارغ ماتوقفي عنده ولايوجعك..عارفه اللي هي فيه راهو مش ساهل..حطي روحك مطراحها..
ريتي اللي هي راته...تزوجتي..وطحتي فعزوز كيف عزوزها اللي ماتخافي ربي..تعطلي ماتجيبي وتسمعي كلام كيف السم يكرهك فروحك..حتى بعد ربك يرزق وتجيبي مايريحوك وهما فقولت جابت بنت...
وتحملي من جديد وعيلك يموت فبطنك وهو كبير..واللي مشمت فيك اكثر من اللي واجعه حالك..وبعدها يقولولك معاد تقدري تجيبي ..وراجلك ياخد عليك ومايحسبك حتى كلبه وهو ملوحك فحوش هلك وماشي يبرطع هنى وغادي..
لا ويقول عليك قدام خوتك كلام زفت كيف اللي قاله هداك الكلب..
حتى بعد ترضي بالهم الهم مايرضى بيك..
قوليلي تو ياغاليه...لو كنتي مكانها شن كان صار فيك؟؟!
غاليه تخايلت روحها فعلا مكان حميده..للحظه حست قلبها بيوقف صعب صعب هلبه اللي مرت بيه اختها..
فاطمه:وبعدين اين خير؟حالك ولاحالها؟
غاليه سكتت وماقدرتش ترد..
الإجابه معروفه..
فاطمه:حطيلها عذر وادعي فهاليوم المبارك ربي يديرلها طريق..
غاليه بألم:يااارب..
"عرب الحوش"..
غاليه مسحت دموعها بسرعه..
فاطمه:خشي ياسعيده خشي..
خشت سعيده من فم البوابه للكوجينه وفيدها صونيه مسلفره..
سعيده بإبتسامه:كيف حالكم اليوم..
الزوز ردوا :الحمد لله..
سعيده خشت بضحكه تقول:هدي حصتكم من العصبان نضتله من الصبح..
ابتسموا فاطمه وغاليه وهما يشوفولها كيف حطاته الرخامه
"مانبوا منك شي خودي بلاك واقلبي وجهك"
كلهم بصدمه شبحوا جهة الباب اللي كانت واقفه قدامه حميده وهي تشوف بعيونها اللي نظرتهم كلها حقد والدموع ينزلوا منهم...
🍁🍁🍁🍁
حطت يدها ع صدرها وشهقت بصوت عالي بعدين قالت:
حسبي الله ونعم الوكيل فيك ياليلى!!
غمضت عيونها بشده ودموعها نزلوا..
وكفايه تشوفلها بقرنة حواجب..
فتحت عيونها وقالت ببكي:شن تبي مني مش عارفه شن تبي؟؟!!علاش الحقد هدا كله الله ينتقم منها ومن ماليها ياربي..قعدت تمسح ع شعرها وتمثل في الصدمه و توزع فنظرها حواليهاوتقول ..ياااربي شن هدا..شن هدا!!!..شبحت لكفايه...بلعت ريقها وقالت بعد رشفت..عمر كان حاط عليا العين واني ملاحظه ولانها تبيه مابيتش نقوللها بش ماتفهمنيش غلط..احمم..المهم قعدت فتره وين نجيها ونلقاه عندك..رشفت..نشوف فنظراته ليا ومابيتش نقول..لعند مرة بعتلها مع اختها الصغيرة وقال نبي نشوفك فسوق **** وجيبي معاك صاحبتك..ترجتني نمشي معاها بش مشيت..ولما مشينا..عمر كلمها بروحها..وبعدين مشي..البنت جتني ووجهها متغير انقلبت عليا مرة وحده ومعاملتها ليا كانت خيي..مسحت دموعها وكملت تقول..لين روحت..وبعدين بدت معاش تبيني نجيها..مشيت مرتين يخلوا فيا بروحي هي وخواتها..بعدهامعاش مشيت وقطعتني بالمرة...المهم ..احمم..بعدها بفترة قاعد شادها فجرتي رقم غريب من كثر ماضايقني رديت..طلع خوك..
كفايه رفعت حواجبها..
كملت لمياء وهي تقول:قال علاش ردتيني..اني استغربت قتله رديتك؟!قالي ايه لما بعتتلك مع ليلى..
كفايه مطت شواربها لداخل بأسف..
لمياء بلعت ريقها وقالت:قتله ايه لأني مانبيش..مابيتش نفضحها قدامه...وقصيت لعمر وصكرت عليه..ومن بعدها واني نفسيتي زي الزفت من اللي صار اخر شي كنت نتوقعه ان اختي اللي كنت حاسبتها اختي هكي دير فيا.!!
كفايه:لاحول ولاقوة الا بالله...
عصرت عيونها بش نزلت منها دمعه بعدين قالت:هدا اللي صار..اما عمر ماملش بكل وهو يحاول معاي..والقلب مش بإيدينا حبينا بعض ...وهي لما سمعت افترت عليا قدام العيله كلها الإفتراء اللي انتي سمعتيه بش تشوهني قدامهم..واني بش نثبت للكل اني مادرتش غلط تمسكت بعمر اكثر وقعدت نمشي ونجي ع العيله كلها بش يتأكدوا اني مادرت شي غلط نتحشم منه..
غيرت نظرة عيونها الحزينه للغضب وقالت..لكن لهني وياسر ساد خلاص..
ومشت بتطلع من الكوجينه وهي تقول:نخلي جمعتهم سودا اني اليوم...
كفايه وهي طالعه فجرتها :لمياء..لمياااء تعالي هني!
🌴🌴🌴🌴
مصح وجهك وخلاص..جايه تضحكي وجايبه العصبان وهدي حصتكم وحسبتكم!!طول عمرك ماتحسبي فينا كان فالمصايب..وحصتنا منك الشر كله..قعدت تحرك فصبعها ماشي جاي عليها وع اختها وهي تقول..وهادي نتيجة افعالك..اللي اليوم جايه تشوفيها وتفرحي بإنجازاتك..
سعيده تشوفلها ..ومش قادره ترد ماعندها شي تقوله..شعورها بالذنب بروحه مش مخليها من مده وهو لاحقها..يابال توا وهي فمواجهة مباشرة مع احد ضحاياها يوم من الأيام..
فاطمه بضيق شديد ممزوج بالتعجب :يابنت خيرك انتي اليوم خير بلاك؟؟
حميده بعياط:تسألي فيااا يمي خيرنييي..خيييرني...تشوفي فيه الخيير وييين قووولي؟؟...
غاليه:حميده!!
حميده في حاله اشبه بالهيستريا:حمييده..حميييده من اليوم معاااد تساااامح حد..معاااد تفوت لحدد...معاااد تسكت لحد...شبحت لسعيده بحقد..بعدين غمضت عيونها بشده وقالت....الله ياسعيده...ياالله ياسعيده..ياالله ياسعيده..اللي درتيها فينا تشوفيه فرزان ياااااربي..
فاطمه غمضت عيونها بشده..
وغاليه اندفعت طول لحميده..
حطت يد ع فمها واليد التانيه وراه راسها وقعدت تجر فيها ...
غ خشة سميه جايه تجري..
غاليه شافتها قالت بصوت عالي:امييي ياسميه..
وقعدت تجبد فأختها لين دفتها داخل الدار..
وخشت وراها سكرت الباب ومازال حميده تعيط وتدعي ع رزان..
وسميه فاقت من صدمتها...
مشت تجري للكوجينه..
خشت لقت عزوزتها مقعمزة ع الطاوله وشاده راسها حداها سعيده توكل فيها فحبوب الكصبر..
كلتهم فاطمه وهي تقول:ياربي فرج عليا ياربي..ياربي فرج عليا..
سميه ووجهها اصفر:شن صار؟؟
ناضت سعيده اللي كانوا دموعها ينزلوا قالت لسميه:ردي بالك عليها..
حطت طرف رداها ع راسها وطلعت بسرعه..
وسميه شبحت شوي لعزوزتها بعدين قربتلها وقالت:تعالي معاي عمتي..
ناضت فاطمه مع سميه وهي مسندتها...ومشت هي وياها وطلعوا من الكوجينه..
قعدوا يسمعوا فعياط حميده..
فاطمه:البنت بتهبل !!
سميه قعدت ساكته وهي خايفه هلبه..
في الدار...
حميده بعياط:وريني فيهاااا يوووم بنت حدهم وريييني فيهاااا يووووم..
غاليه :خلاص ضمي فمك خلاص اسكتتييي..
حميده:جعنهاا تلقاااه فرزان...راس بنيه..جعنها تشوف اللي دارته فيها..
غاليه معاش تحملت خلاص..
رفعت يدها نزلت ع خد حميده بكف من قوته لين حميده قريب داخت..
غاليه ببكي ممزوج بالغضب:حتى انتي عندك بنت راهو..
"ماما"..
التفتت حميده لبنتها..
لقوها ترعش وتبكي..ودايرتها تحتها من الخوف..
غاليه خبطت بيدها ع وجهها:ياغبيني..
اما حميده مشتلها طول طبست وحضنتها وهي تقول:خلاص ماما خلاص..خلاص مافي شي..خلاص..اني كويسه ياماما كويسه..
🍁🍁🍁🍁
شدتها بقوة وهي تقول:خليك خير منها يالمياء..
لمياء ببكي:فوتت هلبه وسكتت شوفي لوين وصلت بيهم..
كفايه:طز فيهم معاش دوري..اللي يدير حاجه يلقاها إن شاء الله..
