#العشق_المتمرد
#جمان_فريد
#باقي_الجزء64
🍁🍁🍁
ﺍﻟﺘﻌﺐ ﺍﻟﻨﻔﺴﻲ ..
ﻫﻮ ﺍﻟﻠﻲ ﻋﺎﻳﺸﻴﻨﻪ ﻋﺮﻭﺑﻪ ﻭﻫﺎﻧﻴﺒﺎﻝ ...
ﻫﻲ ﺗﻜﺎﺑﺮ ... ﻭﻫﻮ ﻳﻜﺎﺑﺮ ﻷﻧﻬﺎ ﺗﻜﺎﺑﺮ ..
ﻭﺑﺪﻭﺍ ﺍﻟﺰﻭﺯ ﻟﻤﺎ ﻳﻜﻠﻤﻮﺍ ﺑﻌﺾ ﻳﻘﻮﻟﻮﺍ ﻟﺒﻌﺾ ..
" ﻳﺎﺻﺪﻳﻘﻲ .." ﻭﻳﺎ " ﺻﺪﻳﻘﺘﻲ .."
🍃 ﺍﻟﻤﻜﺎﺑﺮﺓ .. ﺍﻛﺒﺮ ﻋﺪﻭ ﻟﻠﺤﺐ 🍃
🍁 ﺑﺲ ﻋﺎﺩ ﻋﻤﺮ ﻣﺎﻳﻌﺮﻓﻬﺎﺵ ..
ﺍﻋﺘﺮﻑ ﻟﻠﻤﻴﺎﺀ ﺑﻤﺸﺎﻋﺮﻩ .. ﻭﻫﻲ ﻃﺎﺍﺍﺍﺍﺭﺕ ﻣﻦ ﺍﻟﻔﺮﺣﻪ ...
ﻭﺑﺪﻭﺍ ﻋﺼﺎﻓﻴﺮ ﺍﻟﺤﺐ ﻋﺎﻳﺸﻴﻦ ﺣﺒﻬﻢ ...
ﻭﻟﻤﻴﺎﺀ ﺑﻜﻴﺪﻫﺎ ﻭﺧﺒﺜﻬﺎ ﺍﻷﻧﺜﻮﻱ .. ﻗﺪﺭﺕ ﺗﺨﻠﻲ ﻋﻤﺮ ﻣﺎ ﻳﺸﻮﻑ ﻣﻌﺎﻫﺎ ﺣﺪ ..
ﻟﺘﺘﺤﻘﻖ ﻓﻴﻬﺎ ﻛﻠﻤﺎﺕ ﺍﻏﻨﻴﺔ ﺟﻨﺎﺕ ..
" ﺣﺒﻴﺒﻲ ﻉ ﻧﻴﺎﺗﻮ ... ﻛﻞ ﺍﻟﺒﻨﺎﺕ ﺍﺧﻮﺍﺗﻮ ..
ﺩﺍ ﻣﺎﻛﺎﻧﺶ ﻛﺪﺍ ﺑﺲ ﺍﻧﺎ ﻏﻴﺮﺕ ﻛﻞ ﺣﻴﺎﺗﻮ .."
ﺑﺲ ﻉ ﺣﺴﺎﺏ ﺳﻌﺎﺩﺓ ﻏﻴﺮﻙ ﺑﻨﻴﺘﻲ ﺳﻌﺎﺩﺗﻚ ﻳﺎﻟﻤﻴﺎﺀ ..
🍁 ﻟﻴﻠﻰ ..
ﺑﻌﺪ ﺳﻴﺒﻬﺎ ﻋﻤﺮ ...
ﻗﻌﺪﺕ ﻓﺘﺮﺓ ﻃﻮﻳﻠﻪ ﻉ ﻣﺎﻧﺴﺎﺗﻪ ...
ﺍﻭ ﻧﻘﻮﻟﻮﺍ ﺗﻨﺎﺳﺎﺗﻪ ...
ﺑﺮﻏﻢ ﺍﺳﺘﻐﺮﺍﺑﻬﺎ ﻹﻧﺴﺤﺎﺏ ﻟﻤﻴﺎﺀ ﻣﻦ ﺣﻴﺎﺗﻬﺎ ﺑﺲ ﻣﺎﺃﻫﺘﻤﺘﺶ ﻫﻠﺒﻪ ....
ﺑﻌﺪ ﺳﻴﺒﻬﺎ ﻋﻤﺮ ... ﻣﻌﺎﺵ ﺍﻫﺘﻤﺖ ﻟﺸﻲ ...
🍃🍃🍃🍃
ﻭﻉ ﺍﻟﺴﻜﺖ ..
ﺯﻱ ﻣﺎﻳﻘﻮﻟﻮﺍ ﺍﻟﻠﺒﻨﺎﻧﻴﻪ ..
ﻣﺎﻟﻚ ﻭﻧﻮﺭ ... ﻳﺤﺒﻮﺍ ﺑﻌﺾ ..
ﺑﺲ ﻣﺎﺻﺎﺭ ﺑﻴﻨﺎﺗﻬﻢ ﺍﻱ ﺷﻲ ﺍﺧﻄﺎ ﻧﻈﺮﺍﺕ ﺍﻟﻌﻴﻮﻥ ..
ﺍﻟﻤﻠﻴﺎﻧﻪ ﺣﺐ ﻭﺍﻟﺠﺮﻳﺌﺔ ﻣﻦ ﻣﺎﻟﻚ ..
ﻭﺍﻟﻤﻠﻴﺎﻧﻪ ﺣﺐ ﻭﺍﻟﺨﺠﻮﻟﻪ ﻣﻦ ﻧﻮﺭ ...
ﻛﺎﻥ ﻳﺘﺒﻊ ﻓﻲ ﺍﺧﺒﺎﺭﻫﺎ ﺑﺪﻭﻥ ﻣﺎﺗﺤﺲ ..
ﻭﻫﻲ ﻣﻊ ﻗﺮﺍﻳﺘﻪ ﺷﻐﻠﻪ ﺍﻟﺸﺎﻏﻞ 💓
ﻭﻣﺮﻭﺍﻥ ﺍﻟﻠﻲ ﻓﻴﻮﻡ ﻣﻦ ﺍﻷﻳﺎﻡ ﻛﺎﻧﺖ ﻧﻮﺭ ﺷﻐﻠﻪ ﺍﻟﺸﺎﻏﻞ ..
ﺳﺒﺤﺎﻥ ﻣﻦ ﻧﺴﺎﻩ ﻓﻴﻬﺎ ...
ﻭﺧﻼﻩ ﻳﻨﺸﻐﻞ ﺑﻐﻴﺮﻫﺎ ...
ﺭﻓﻘﻪ ..💕
ﺍﻟﻠﻲ ﻛﺒﺮﺕ ... ﻭﺧﺸﺖ ﺍﻟﻤﺮﺣﻠﺔ ﺍﻟﺜﺎﻧﻮﻳﻪ ...
ﺍﻳﻪ ... ﺍﻟﺜﺎﻧﻮﻱ ..
ﻫﻲ ﻭﺭﺯﺍﻥ ...
ﺣﻨﻲ ﺣﺎﻟﻴﺎ ...
ﻓﻲ ﺳﻨﻪ ...2010
ﺷﻬﺮ ﺍﻟﻨﻮﺍﺭ "... ﻓﺒﺮﺍﻳﺮ .."
ﺍﻟﺴﺎﻋﻪ 1:00 ﻇﻬﺮﺍ ...
ﺩﺭﺳﺖ ﺳﻴﺎﺭﺗﻪ ﻓﻲ ﺍﻟﻘﻄﻌﻪ ...
ﻓﺘﺢ ﺍﻟﺒﺎﺏ ﻭﻧﺰﻝ ..
ﻛﺎﻥ ﻻﺑﺲ ﺟﻴﺒﻮﻃﻲ ﺟﻠﺪ ﺍﺳﻮﺩ ﻣﺎﺭﻛﻪ ..
ﺗﺤﺘﻪ ﻓﺎﻧﻴﻠﻴﻪ ﺭﻗﺒﺘﻬﺎ ﺳﺒﻌﻪ ﻟﻮﻧﻬﺎ ﺭﺻﺎﺻﻲ ﻏﺎﻣﻖ ..
ﻭﺳﺮﻭﺍﻝ ﺟﻴﻨﺰ ﺍﺳﻮﺩ .
ﻓﻲ ﺍﻟﻴﺪ ﺍﻟﻴﻤﻴﻦ ﺧﺎﺗﻢ ﺍﺳﻮﺩ ﻭﺣﺪﻳﺪﻩ ﺟﻠﺪ ..
ﻭﻓﻲ ﺍﻟﺮﻗﺒﻪ ﺳﻠﺴﻠﻪ ﺭﻗﻴﻘﻪ ..
ﻭﺷﻌﺮﻩ ﻃﻮﻝ ..
ﻭﻟﺤﻴﺘﻪ ﻣﺰﻳﻨﻪ ﻭﺟﻬﻪ ..
ﺭﻓﻊ ﻧﻈﺎﺭﺍﺗﻪ ﻉ ﺭﺍﺳﻪ ﻭﻫﻮﻳﻘﻮﻝ : ﻣﺴﺤﺒﻪ .. ﺍﺑﺘﺴﻢ ..
ﺻﻜﺮ ﺑﺎﺏ ﺍﻟﺴﻴﺎﺭﺓ ..
ﻭﻣﺸﻲ ﻓﺘﺢ ﺍﻟﺨﻠﻔﻲ .. ﻭﻃﻠﻊ ﻣﻨﻪ ﺷﻜﺎﻳﺮ ﺷﻜﺎﻳﺮ ..
ﺳﻜﺮ ﺍﻟﺒﺎﺏ ﺑﺮﺟﻠﻪ ..
ﺍﻟﺠﻮ ﻛﺎﻥ ﻫﺎﺩﻱ ..
ﻫﻮ ﺿﺤﻚ ﻭﻗﺎﻝ : ﻭﺍﺿﺢ ﻣﺎﻫﻨﺎﻙ ﺣﺪ ..
ﻛﻤﻞ ﻃﺮﻳﻘﻪ ﻟﻤﻤﺮ ﻓﻢ ﺍﻟﺒﻮﺍﺑﻪ ..
ﻓﻲ ﺍﻟﻜﻮﺟﻴﻨﻪ ...
ﻏﺎﻟﻴﻪ ﺗﺘﻜﻠﻢ ﺑﺎﻟﺘﻠﻴﻔﻮﻥ : ﺍﻟﺨﺪﻣﻪ ﻓﻲ ﺍﻟﻌﻴﺎﺩﺓ ﺍﺭﻳﺢ ﺑﻮﺍﺟﺪ .. ﻫﻬﻬﻬﻬﻬﻬﻬﻪ ﻭﺍﻟﻠﻪ ......... ﺧﺰﻱ ﻳﺎﻛﻠﺒﻪ ﺍﻟﻜﻠﺒﺎﺕ ..
ﺣﺴﺖ ﺍﻥ ﺍﻟﻜﻮﺟﻴﻨﻪ ﻇﻠﻤﺖ ﻓﺠﺄﺓ ﺍﻟﺘﻔﺘﺖ ...
ﻏﺎﻟﻴﻪ ﺑﺼﺪﻣﻪ : ﻫﻴﻴﻴﻴﻴﻴﻴﻴﻴﻴﻴﻴﻲ ﻋﻤﺎﺍﺍﺍﺍﺍﺩ ..
ﺣﻤﻴﺪﻩ ﻣﻦ ﺍﻟﺘﻠﻴﻔﻮﻥ؛ﺧﻴﺮﻩ ...
ﻏﺎﻟﻴﻪ ﺑﻀﺤﻜﺔ ﻓﺮﺡ : ﺟﻲ ﻳﺎﻣﻴﺪﺍ ﺟﻴﻲ ..
ﺣﻤﻴﺪﻩ ﺑﻨﺒﺮﺓ ﺑﺎﻛﻴﻪ : ﺍﻟﻤﻌﻔﻦ ﺍﻟﺤﻴﻮﺍﻥ ..
ﻋﻤﺎﺩ ﺑﻀﺤﻜﻪ : ﻣﻴﺪﺍ ﺗﺴﺐ ﻋﺎﺭﻓﻬﺎ ...
ﻭﻛﻤﻞ ﻃﻮﻝ ﺩﺍﺧﻞ ...
ﺧﺶ ﺍﻟﻜﻮﺟﻴﻨﻪ ..
ﻏﺎﻟﻴﻪ ﻃﻮﻝ ﺟﺎﺗﻪ ﺣﻀﻨﺎﺗﻪ ﺑﻘﻮﺓ ﻭﻫﻲ ﺗﻀﺮﺏ ﻓﻴﻪ ﻉ ﻇﻬﺮﻩ : ﻫﻜﻲ ﻳﺎﻣﻌﻔﻦ ﻫﻜﻲ ﺗﻘﻄﻌﻨﺎ ﻣﺮﺓ ﻭﺣﺪﻩ .. ﺧﺪﺍﺗﻚ ﺍﻟﺪﻧﻴﺎ ﻳﺎﻣﻌﻔﻦ ..
ﻫﻮ ﻳﺴﻤﻊ ﻭﻳﻀﺤﻚ ..
🍃 ﻋﻤﺎﺩ ﻣﻌﺎﺵ ﺟﺎﻫﻢ ﺑﻜﻞ ﻣﻦ ﺍﺧﺮ ﻋﻴﺪ ﺻﻐﻴﺮﻩ ﻓﻲ ..2008
ﻏﺎﺹ ﻓﻲ ﻋﺎﻟﻢ ﺍﻟﺘﺠﺎﺭﻩ ﻭﺗﺸﺎﺭﻙ ﻣﻊ ﺳﻴﻔﺎﻭ ...
ﻭﺗﻮﺳﻊ ﻫﻠﺒﻪ ﻭﺧﺶ ﻉ ﺻﺎﻻﺕ ﺍﻟﻤﻼﺑﺲ ..
ﻭﻭﻻ ﺷﺒﻪ ﻣﺴﺘﻘﻞ ﻋﻦ ﺑﻮﻩ ..
ﻛﺎﻥ ﺣﺎﺩﻕ ﻭﻓﻄﻴﻦ ... ﻭﺩﻣﺎﻏﻪ ﻣﻠﻴﺢ ..
ﺻﺢ ﻋﻤﺮﻩ 22 ﺳﻨﻪ ﻟﻜﻦ ﻛﺎﻥ ﻓﺎﻟﺢ ..
ﻭﺍﻏﻠﺐ ﻭﻗﺘﻪ ﻣﺎﺷﻲ ﻓﻲ ﺍﻟﺴﻔﺮ ..
ﺑﻴﻦ ﺗﺮﻛﻴﺎ ﻭﺍﻟﻤﺎﻧﻴﺎ ﻭﺍﻳﻄﺎﻟﻴﺎ ...
ﻭﺳﻴﻔﺎﻭ ﻭﻗﻒ ﻣﻌﺎﻩ ﺑﻘﻮﺓ ﻭﺯﺍﺩ ﻛﺒﺮ ﻭﻛﺒﺮﻩ ﻣﻌﺎﻩ ...
ﺍﻷﻋﻴﺎﺩ ﺍﻟﻠﻲ ﻓﺎﺗﻮﺍ ﻣﺮﻭﺍ ﻛﻠﻬﻢ ﻭﻋﻤﺎﺩ ﻭﻳﻦ ﻣﺴﺎﻓﺮ ﻋﻤﺎﺩ ﻭﻳﻦ ..
ﻓﻲ ﻣﺼﺮﺍﺗﻪ ... ﻭﻛﻠﻪ ﺧﺪﻣﻪ ﻓﺨﺪﻣﻪ ..
ﺑﺲ ﻫﺎﻟﻤﺮﺓ ﺍﻟﻠﻮﻡ ﻭﺍﻟﺸﻮﻕ ﻫﻤﺎ ﺍﻟﻠﻲ ﺧﻠﻮﻩ ﻳﺎﺧﺪ ﻣﻦ ﻭﻗﺘﻪ ﻳﻮﻣﻴﻦ ﻳﺸﻮﻑ ﻓﻴﻬﻢ ﺍﻟﻨﺎﺱ ﺍﻟﻐﺎﻟﻴﻪ ﻋﻠﻴﻪ ...
ﻭﺍﺣﺐ ﻣﺪﻳﻨﻪ ﻉ ﻗﻠﺒﻪ ﻓﻲ ﻟﻴﺒﻴﺎ ﻛﻠﻬﺎ 🍃...
🍁🍁🍁🍁
ﺳﺮﺗﺖ ﺍﻟﻤﺎﻟﻴﻪ ﺍﻟﺼﻮﻑ ﺍﻟﻠﻲ ﻻﺑﺴﺘﻬﺎ ..
ﻭﺣﻄﺖ ﺍﻟﺒﺮﻧﻮﺱ ﻉ ﺭﺍﺳﻬﺎ ..
ﺧﻄﻤﺖ ﺣﺪﺍ ﺍﻟﻜﻮﺟﻴﻨﻪ ﺷﺒﺤﺖ ﻷﻣﻬﺎ ﻭﻗﺎﻟﺖ : ﻣﺎﺷﻴﻪ ﻟﺤﻮﺵ ﺳﻴﺪﻱ ﺭﻣﻀﺎﻥ ..
ﺳﻌﻴﺪﻩ ﻭﻫﻲ ﺗﻮﻛﻞ ﻓﻲ ﻗﺼﻲ : ﺷﻦ ﻋﻨﺪﻙ ﻏﺎﺩﻱ ..
ﺭﺯﺍﻥ : ﻋﻨﺪﻱ ﻣﺎﻧﺪﻳﺮ ...
ﻭﻣﺸﺖ ﻃﻮﻝ ..
ﺍﻣﻬﺎ ﻣﻄﺖ ﺷﻮﺍﺭﺑﻬﺎ ﺑﻤﻠﻞ : ﻫﻴﺎ ﻣﺎﻣﺎ ﻗﻮﺻﻲ
ﻫﻴﺎ ﻫﻜﻲ ﺍﺩﻟﻊ ﻓﻴﻪ 😂
🍁🍁🍁🍁
ﺑﻌﺪ ﻃﻠﻌﺖ ﻣﻦ ﺍﻟﺤﻮﺵ ..
ﻗﻌﺪﺕ ﺗﻤﺸﻲ ﺑﺨﻄﻮﺍﺕ ﻋﺎﺩﻳﻪ .. ﻻﺳﺮﻳﻌﻪ ﻻﺑﻄﻴﺌﺔ ..
ﺗﺘﻤﺸﻰ ..
ﻭﺻﻠﺖ ﺑﺪﺍﻳﺔ ﺍﻟﻤﻤﺮ ﻭﻗﻔﺖ ﻓﻲ ﻣﻜﺎﻧﻬﺎ ..
ﻋﻤﺎﺩ ﻭﻫﻮ ﻳﺘﻜﻠﻢ ﺑﺎﻟﺘﻠﻴﻔﻮﻥ ﻭﻋﺎﻃﻲ ﺑﺎﻟﻈﻬﺮ : ﺍﻋﺘﻘﻮﻧﻲ ﺑﺎﻟﻠﻪ ﻫﺎﻟﻨﻬﺎﺭﻳﻦ ..
ﺭﺯﺍﻥ ﺑﻬﻤﺲ : ﻭﻭﻭﻭﻭﻙ ﻳﺎﺭﺑﻲ ﺷﻦ ﺟﺎﺑﻪ ﻫﺪﻯ ... ﻧﻮﻟﻲ ﻭﻻ ﻧﻜﻤﻞ ...
ﺷﺒﺤﺘﻠﻪ ﺑﺤﺪﻩ ﻭﻗﺎﻟﺖ .. ﻧﻜﻤﻞ ﻭﻃﺰ ﻓﻴﻪ ..
ﻗﻌﺪﺕ ﺗﻤﺸﻲ ﺑﺨﻔﻪ ﺑﺶ ﻣﺎﻳﺤﺴﺶ ﺑﻴﻬﺎ ..
ﻗﻌﺪﺕ ﺗﻤﺸﻲ ..
ﻭﻫﻮ ﻣﺎﺯﺍﻝ ﺑﻨﻔﺲ ﻭﺿﻌﻴﺘﻪ ..
ﺗﻤﺸﻲ .. ﻭﺧﻼﺹ ﻗﺮﺑﺖ ﻣﻦ ﺍﻟﺒﺎﺏ ..
ﻫﻮ ﺗﻠﻔﺖ ...
ﺍﻧﻔﺰﻋﺖ .. ﻭﻗﻌﺪﺕ ﺗﺸﺒﺤﻠﻪ ﺑﺘﻔﻨﻴﺼﻪ ..
ﺍﻣﺎ ﻫﻮ ...
ﺍﺭﺗﻔﻌﻮﺍ ﺣﻮﺍﺟﺒﻪ ﺷﻮﻳﻪ ..
ﻭﻋﻴﻮﻧﻪ ﺷﺒﻪ ﺩﺑﻠﻮﺍ ﺑﻨﻈﺮﺍﺗﻬﻢ ..
ﻭﻫﻮ ﻳﺸﻮﻑ ﻗﺪﺍﻣﻪ ﻓﺼﺒﻴﻪ ..
ﻣﺎﺗﻌﺮﻓﺶ ﺍﻻ ﻛﻞ ﻣﺎﺗﻜﺒﺮ ﺗﺰﻳﺪ ﻓﻲ ﺍﻟﺠﻤﺎﻝ ..
ﺑﺎﻟﺬﺍﺕ ﻋﻴﻮﻧﻬﺎ ﺍﻟﺤﻮﺭ ﺍﻟﻤﻜﺤﻼﺕ ﻭﻧﻈﺮﺗﻬﻢ ﺍﻟﺤﺎﺩﻩ ..
ﺑﺲ ﻓﻲ ﺯﻳﺎﺩﻩ ﺑﺴﻴﻄﻪ ﻓﻲ ﺍﻟﻄﻮﻝ ..
ﺭﻭﺍﺩ ﻣﻦ ﺍﻟﺘﻠﻴﻔﻮﻥ : ﻋﻤﻤﺪﻩ .. ﻋﻤﺎﺍﺍﺍﺩ ..
ﻋﻤﺎﺩ : ﻫﺎﻩ ..
ﻫﻲ ﻧﺰﻟﺖ ﻋﻴﻮﻧﻬﺎ ﻭﻃﻮﻝ ﺧﺸﺖ ﻟﻠﺤﻮﺵ .. ﻭﻫﻮ ﻣﺘﺒﻌﻬﺎ ﺑﻌﻴﻮﻧﻪ ﺍﻟﻤﺴﺤﻮﺭﺓ ...
ﺧﺸﺖ ﻉ ﻏﺎﻟﻴﻪ ...
ﺭﺯﺍﻥ ﻭﻭﺟﻬﻬﺎ ﺍﺣﻤﺮ : ﻏﻠﻮﺷﻪ ..
ﻏﺎﻟﻴﻪ ﻭﻫﻲ ﺍﺩﻳﺮ ﻓﺤﺎﺟﻪ ﻟﻌﻤﺎﺩ ﻳﺎﻛﻠﻬﺎ : ﻫﻤﻤﻤﻢ ..
ﺭﺯﺍﻥ : ﻧﺒﻲ ﻣﻨﻚ ﺣﺎﺟﻪ ... ﺍﻋﻄﻴﻨﻲ ﻛﺘﺎﺑﻚ ﻫﺪﺍﻙ ﻣﺘﺎﻉ ﺍﻟﻄﺒﺦ ..
" ﻗﺼﺪﻙ ﻛﺒﺮﺗﻲ ﻭﺻﺎﺭ ﻣﻨﻚ ﻭﻭﻟﻴﺘﻲ ﺳﺖ ﺑﻴﺖ "
ﺷﻘﻠﺒﺖ ﻋﻴﻮﻧﻬﺎ ﺑﻀﺠﺮ
ﻏﺎﻟﻴﻪ ﺷﺪﺕ ﺿﺤﻜﺘﻬﺎ ..
ﻋﻤﺎﺩ ﺑﻀﺤﻜﻪ : ﻛﺎﻥ ﻫﻜﻲ ... ﻣﻌﻨﺎﻫﺎ ﺩﻳﺮﻟﻲ ﻗﻬﻮﺓ ..
ﺍﻟﺘﻔﺘﺖ ﻭﻗﺎﻟﺖ : ﻧﺪﻳﺮﻟﻚ ﻋﻴﻨﻚ ..
ﻏﺎﻟﻴﻪ : ﺭﺯﺍﺍﺍﻥ ..
ﺭﺯﺍﻥ : ﻣﺎﺗﺴﻤﻌﻴﺶ ﻓﻴﻪ ﺷﻦ ﻳﻘﻮﻝ ..
ﻏﺎﻟﻴﻪ : ﻭﺷﻦ ﻗﺎﻟﻚ ﻗﺎﻝ ﺩﻳﺮﻱ ﻗﻬﻮﻩ ﻭﻳﻦ ﺍﻟﻤﺸﻜﻠﻪ ..
ﺭﺯﺍﻥ : ﺍﺩﻳﺮﻫﻠﻪ ﻧﻮﺭﻫﺎﻥ ﻣﺶ ﺍﻧﻲ ..
ﻋﻤﺎﺩ : ﻣﺎﻻ ﺍﻗﺴﻢ ﺑﺎﻟﻠﻪ ﺍﻟﻌﻈﻴﻢ .. ﻣﺎﺣﺎﻁ ﻓﻔﻤﻲ ﺣﺎﺟﻪ ﻗﺒﻞ ﻟﻨﺸﺮﺏ ﻗﻬﻮﺗﻚ ..
ﺭﺯﺍﻥ ﻓﻨﺼﺖ ..
ﻫﻮ ﺭﻓﻊ ﺣﺎﺟﺒﻪ ..
ﻏﺎﻟﻴﻪ : ﺭﺯﺍﻥ ﺧﻼﺹ ﻋﺎﺩ ..
ﺭﺯﺍﻥ ﺑﺮﻓﻌﺔ ﺣﺎﺟﺐ : ﺑﺎﻫﻲ ..
ﻋﻤﺎﺩ : ﺗﻌﺮﻓﻲ ﺍﺩﻳﺮﻳﻬﺎ ﻣﻠﺨﺒﻄﻪ ﻭﻻﺍﺩﻳﺮﻱ ﻓﻴﻬﺎ ﺷﻲ ... ﻭﺭﺟﻠﻴﻚ ﻓﻮﻕ ﺭﺍﺳﻚ ﺗﻌﺎﻭﺩﻱ ﺍﺩﻳﺮﻳﻬﺎ ﻣﺮﺓ ﺗﺎﻧﻴﻪ .. ﻧﺴﺘﻨﻰ ﻓﻲ ﺍﻟﺼﺎﻟﻪ ..
ﺭﺯﺍﻥ ﺑﺼﺪﻣﻪ : ﺷﻦ ﺍﻟﻮﻗﺎﺣﻪ ﻫﺪﻱ ..
ﻏﺎﻟﻴﻪ : ﺗﻲ ﻫﻴﺎ ﺗﺤﺮﻛﻲ ﻭﺩﻳﺮﻳﻬﺎ ..
ﺷﺒﺤﺖ ﻟﻐﺎﻟﻴﻪ ﺑﺤﺪﻩ ﺑﻌﺪﻳﻦ .. ﻗﻌﺪﺕ ﺍﺩﻳﺮ ﻓﻴﻬﺎ ﻭﻫﻲ ﺗﺪﻋﻲ ﻓﺪﺍﺧﻠﻬﺎ ﻉ ﻋﻤﺎﺩ ..
ﺑﺮﻏﻢ ﺫﻟﻚ .. ﺩﺍﺭﺗﻬﺎ ﻗﻬﻮﺓ ﻣﺶ ﻋﺎﺩﻳﻪ ..
ﻭﺑﻮﺟﻪ ﻭﻣﺸﺖ ﺭﻓﻌﺘﻬﺎﻟﻪ ..
ﻫﻮ ﻛﺎﻥ ﻣﻘﻌﻤﺰ ﺣﺪﺍ ﺣﻨﺎﻩ ﻓﺎﻃﻤﻪ ﻭﻳﻬﺪﺭﺯ ...
ﻫﻲ ﺍﻧﻐﺎﺿﺖ ﻛﺎﻥ ﻗﺒﻞ ﺧﺎﻃﺮﻫﺎ ﺗﻌﻄﻴﻪ ﻉ ﺩﻣﺎﻏﻪ ﻟﻜﻦ ﺗﺤﺸﻤﺖ ﻣﻦ ﺣﻨﺎﻫﺎ ..
ﺣﻄﺘﻬﺎ ﻭﻣﺸﺖ ..
ﻋﻤﺎﺩ : ﺣﻨﺎﻱ .. ﺍﻟﺴﻴﺪﺓ ﻣﻠﻌﻘﻪ ﻛﺎﻥ ﺧﻄﺒﻨﺎﻫﺎ ﻳﻌﻄﻮﻧﺎ ..
ﻗﻠﺒﻬﺎ ﺭﻋﺶ ﻟﻤﺎ ﺳﻤﻌﺖ ﻛﻠﻤﺘﻪ ..
ﻃﻮﻝ ﻫﺮﺑﺖ ﻟﻠﻜﻮﺟﻴﻨﻪ ..
ﻓﺎﻃﻤﻪ ﺑﻀﺤﻜﻪ : ﻣﺎﻟﻘﻴﺖ ﻛﺎﻥ ﻫﺪﻱ ﻳﺎﻛﺒﺪﻱ ..
ﻋﻤﺎﺩ ﺭﺷﻒ ﻣﻦ ﺍﻟﻘﻬﻮﺓ ﺑﻌﺪﻳﻦ ﺿﺤﻚ ﻭﻗﺎﻝ : ﺧﻴﺮﻫﺎ ﺣﺘﻰ ﻗﻬﻮﺗﻬﺎ ﻣﻠﻴﺤﻪ ..
ﻓﺎﻃﻤﻪ : ﻗﻬﻮﺗﻬﺎ ﻣﻠﻴﺤﻪ .. ﻟﻜﻦ ﻃﺒﺎﻳﻌﻬﺎ ﻗﺒﻴﺤﻪ ..
ﻋﻤﺎﺩ : ﻋﺎﺩﻱ .. ﺍﻟﻘﺒﻴﺢ ﻧﺨﻠﻮﻩ ﻣﻠﻴﺢ ﻳﺎﺣﻨﺎﻱ .. ﻭﺭﺟﻊ ﺷﺮﺏ ﻣﻦ ﺍﻟﻘﻬﻮﺓ ..
ﻓﺎﻃﻤﻪ ﺑﻀﺤﻜﻪ : ﺭﺑﻲ ﻳﻌﻄﻴﻚ ﻉ ﻗﻴﺲ ﻧﻴﺘﻚ ..
ﻋﻤﺎﺩ ﺑﻀﺤﻜﻪ : ﻗﺼﺪﻙ ﺍﻥ ﺷﺎﺀ ﺍﻟﻠﻪ ﻣﺎﺗﺎﺧﺪﻫﺎ ..
ﻓﺎﻃﻤﻪ ﺿﺤﻜﺖ ﻭﺿﺮﺑﺎﺗﻪ ﺑﺎﻟﺴﺒﺤﻪ ..
ﺷﻮﻳﻪ ﺗﺎﻧﻴﻪ ..
ﻭﺟﻲ ﻣﺤﻤﺪ ﻣﻦ ﺍﻟﺨﺪﻣﻪ ... ﻭﺳﻠﻤﻮﺍ ﺳﻼﻡ ﺣﺎﺭ ﻫﻮ ﻭﻋﻤﺎﺩ ﺑﻌﺪﻳﻦ ﺧﺪﺍﻩ ﻭﺭﻛﺒﻮﺍ ﻓﻮﻕ ...
ﺍﻣﺎ ﺭﺯﺍﻥ ﻗﺎﻋﺪﻩ ﻣﻊ ﻋﻤﺘﻬﺎ ﻓﻲ ﺍﻟﻜﻮﺟﻴﻨﻪ ﻭﻳﻬﺪﺭﺯﻭﺍ ..
ﺭﺯﺍﻥ : ﺳﻤﺤﻪ ﻉ ﺍﻵﺧﺮ ..
ﻏﺎﻟﻴﻪ : ﻭﺍﻣﺘﻰ ﺍﻟﻌﺮﺱ ..
ﺭﺯﺍﻥ : ﻗﺎﺕ ﺍﻣﻲ ﺧﺎﻟﻲ ﺳﻠﻴﻤﺎﻥ ﻳﺒﻴﻪ ﺍﻟﺼﻴﻒ ﻫﺪﻯ ﻻ ﺍﻟﻠﻲ ﺑﻌﺪﻩ ..
ﻏﺎﻟﻴﻪ : ﺍﻫﺎ .. ﺑﺎﻫﻲ ﻗﻮﻟﻲ .. ﺷﻦ ﺻﺎﺭ ﻓﻲ ﺭﺍﻭﻳﻪ ..
ﺭﺯﺍﻥ : ﺧﻼﺹ ﺑﺘﻄﻠﻖ ..
ﻏﺎﻟﻴﻪ : ﻻﺣﻮﻝ ﻭﻻﻗﻮﺓ ﺍﻻ ﺑﺎﻟﻠﻪ ..
ﺭﺯﺍﻥ : ﺗﺴﺘﺎﻫﻞ ﺍﻟﻌﺰﻭﺯ ﺍﻟﺸﻤﻄﺎﺀ ﻫﺪﻱ ..
ﻏﺎﻟﻴﻪ ﺷﺒﺤﺘﻠﻬﺎ ﺑﺮﺑﻊ ﻋﻴﻦ ...
ﺭﺯﺍﻥ : ﺍﻳﻪ ﻭﻣﺮﺕ ﺧﺎﻟﻲ ﺧﻠﻴﻔﻪ ﻃﻠﻌﺖ ﺣﺎﻣﻞ ﺑﺘﻮﺃﻡ .. ﻭﺧﺎﻟﺘﻲ ﺍﻣﺎﻝ ﺣﺎﻣﻞ ..
ﻏﺎﻟﻴﻪ ﺑﺮﻓﻌﺔ ﺣﻮﺍﺟﺐ : ﻣﺎﺷﺎﺀ ﺍﻟﻠﻪ ..
ﺭﺯﺍﻥ ﺑﻤﻜﺮ : ﻭﻧﺴﻴﺖ ﻧﻘﻮﻟﻚ ﺭﻣﺰﻱ ﺍﻣﻲ ﺧﻄﺒﺘﻠﻪ ﺑﻨﺖ ﺣﻤﺎﺓ ﺧﺎﻟﺘﻲ ﺍﻣﺎﻝ ..
ﻏﺎﻟﻴﻪ : ﺑﻼﺵ ﻛﺬﺏ ﻭﻛﻼﻡ ﻓﺎﺿﻲ ..
ﺭﺯﺍﻥ : ﻣﺎﻫﻮﺵ ﻛﺬﺏ ﻭﻋﺪﻱ ﺍﻧﺸﺪﻱ ﺍﻣﻲ ﺍﻫﻲ ﻗﺪﺍﻣﻚ ..
ﻏﺎﻟﻴﻪ : ﺭﺯﺍﻥ ... ﻋﻴﺐ ﺭﺍﻫﻮ ﺍﻟﻠﻲ ﺩﻳﺮﻱ ﻓﻴﻪ ﻟﺨﻮﻙ ﻫﺪﻯ ..
ﺭﺯﺍﻥ : ﻭﺍﻧﻲ ﺷﻦ ﺩﺭﺗﻠﻪ ﻣﺎﺩﺭﺗﻠﻪ ﺷﻲ ..
ﻏﺎﻟﻴﻪ : ﻻ ﺩﺭﺗﻴﻠﻪ ﻭﺍﺟﺪ .. ﺗﺒﻲ ﺗﻨﻜﺪﻱ ﻋﻠﻴﻪ ﺑﺄﻱ ﺷﻜﻞ ..
ﺭﺯﺍﻥ : ﻫﺪﻯ ﺧﻮﻱ ﺭﺍﻫﻮ .. ﻭﺍﻧﻲ ﺍﺩﺭﻯ ﺑﻤﺼﻠﺤﺘﻪ .. ﻭﺣﻜﺎﻳﺘﻪ ﻣﻊ ﺍﻟﻔﺮﺧﻪ ﺭﺍﻧﻴﺎ ﺭﺍﻫﻲ .. ﻣﺸﺮﻭﻭﻉ ﻓﺎﺍﺍﺍﺍﺷﻞ .. ﻭﺻﻠﻴﻬﻠﻬﺎ ..
ﻏﺎﻟﻴﻪ : ﻛﻼ ﺭﻣﺰﻱ ﻳﺎﺑﻨﺘﻲ ﻣﺎﻭﺍﺧﺪ ﻏﻴﺮﻫﺎ ..
ﺭﺯﺍﻥ ﺑﺮﻓﻌﺔ : ﻏﻴﺮ ﻛﺎﻥ ﺍﻧﺘﻲ ﻣﻌﺎﺵ ﺗﺸﺠﻌﻴﻪ ﻋﻠﻴﻬﺎ ﻭﺗﺨﻠﻴﻪ ﻳﺠﺮﻱ ﻭﺭﺍ ﺳﺮﺍﺏ ..
ﻏﺎﻟﻴﻪ : ﺭﻣﺰﻱ ﻭﺍﻧﺘﻲ ﺗﻌﺮﻓﻴﻪ ﻛﻮﻳﺲ ﻣﺎﻓﻴﺶ ﻣﺮﺍﺓ ﺗﻤﺸﻴﻪ ..
ﺭﺯﺍﻥ ﻭﻫﻲ ﺗﺄﺷﺮ ﻋﻠﻴﻬﺎ ﺑﺴﺒﺎﺑﺘﻬﺎ : ﻻﻓﻲ ﻭﻓﻲ ﺍﻧﺘﻲ ﻭﻫﺪﻳﻚ ﺍﻟﻌﻘﺮﺏ .. ﺗﺒﻦ ﺗﻔﺮﻗﻦ ﺑﻴﻦ ﺭﻣﺰﻱ ﻭﺍﻣﻲ ..
ﻏﺎﻟﻴﻪ ﺑﺼﺪﻣﻪ : ﺍﻧﻲ ﻳﺎﺭﺯﺍﻥ ...
ﺭﺯﺍﻥ : ﺍﻳﻪ ﺍﻧﺘﻲ ﻗﺎﻋﺪﻩ ﺣﺎﻗﺪﻩ ﻉ ﺍﻣﻲ ﻣﻦ ﺯﻣﺎﻥ ﻋﻠﻴﺸﺎﻥ ﻣﺎﺧﻠﺘﺶ ﺧﺎﻟﻲ ﻳﺎﺧﺪﻙ ﻭﻻ ..
ﻏﺎﻟﻴﻪ ﻗﻌﺪﺕ ﺗﺮﻋﺶ ﻣﻊ ﺑﻌﻀﻬﺎ ..
ﺭﺯﺍﻥ : ﺧﻠﻲ ﺧﻮﻱ ﻓﺤﺎﻟﻪ ﻭﻗﻮﻟﻲ ﻟﻬﺪﻳﻚ ﺗﺨﻠﻴﻪ ﺍﺣﺴﻦ ﻣﺎﻧﺤﻄﻬﺎ ﻓﺮﺍﺳﻲ ..
ﻭﻧﺎﺿﺖ ﻭﻓﻴﺪﻫﺎ ﺍﻟﻜﺘﺎﺏ ﻭﻃﻠﻌﺖ ﻣﻦ ﺍﻟﻜﻮﺟﻴﻨﻪ ﻭﻣﻦ ﺍﻟﺤﻮﺵ ..
ﻭﺧﻠﺖ ﻏﺎﻟﻴﻪ ﺗﺒﻜﻲ ﺑﺼﺪﻣﻪ ..
ﻉ ﺟﻴﺔ ﺭﻣﺰﻱ ..
ﺧﺶ ﻟﻠﺤﻮﺵ ﻛﺎﻥ ﺟﺎﻳﺐ ﻣﻌﺎﻩ ﺣﺎﺟﺎﺕ ﻃﻠﺒﺘﻬﻢ ﻣﻨﻪ ﻏﺎﻟﻴﻪ ..
ﺭﻣﺰﻱ : ﺍﻟﺴﻼﻡ ﻋﻠﻴﻜﻢ .. ﺗﻮﺍ ﺗﻼﻗﻴﺖ ﻣﻊ ﻋﻤﺎﺩ ﻣﺤﺪﺭ ﻫﻮ ﻭﻣﺤﻤﺪ ﻟﻠﻮﺍﺩﻱ ... ﺍﻟﻜﻠﺐ ﻫﺪﻯ ﻭﺍﺧﻴﺮﺍ ﺭﻳﻨﺎ ﻓﺴﺨﺘﻪ ..
ﺣﻂ ﺍﻟﺸﻜﺎﻳﺮ ﻭﺷﺒﺤﻠﻬﺎ ﻟﻘﺎﻫﺎ ﻗﺎﻋﺪﻩ ﻋﺎﻃﻴﻪ ﺑﺎﻟﻈﻬﺮ : ﻏﺎﻟﻴﻪ ... ﻋﻤﺘﻲ ..
ﺗﻠﻔﺘﺖ ﺑﺒﻄﺊ ﻭﺷﺒﺤﺘﻠﻪ ﻭﺩﻣﻮﻋﻬﺎ ﻳﻨﺰﻟﻮﺍ ..
ﺭﻣﺰﻱ ﺑﺘﻀﻴﻴﻘﺔ ﻋﻴﻮﻥ : ﻏﺎﻟﻴﻪ ..!!
🍁🍁🍁🍁
ﻓﺘﺢ ﺑﺎﺏ ﺍﻟﺤﻮﺵ ﺑﻘﻮﺓ ...
ﺳﻤﻊ ﺻﻮﺕ ﺍﻟﺘﻠﻔﺰﻳﻮﻥ ﻣﻔﺘﻮﺡ ﻉ ﺍﻷﻏﺎﻧﻲ ﻓﻲ ﺍﻟﺼﺎﻟﻪ ...
ﻓﻚ ﺍﻟﺴﺒﺘﻪ ﻣﺘﺎﻉ ﺳﺮﻭﺍﻟﻪ ﻭﻫﻮ ﻳﻤﺸﻲ ..
ﻭﺻﻞ ﻓﻲ ﺍﻟﺼﺎﻟﻪ ..
ﻟﻘﺎﻫﺎ ﺗﻐﻨﻲ ﻭﻣﻨﺴﺠﻤﻪ ﻭﻫﻲ ﺗﻘﺮﺍ ﻓﻲ ﻛﺘﺎﺏ ﺍﻟﻄﺒﺦ ..
ﻗﺪﻣﻠﻬﺎ ﺑﻐﻀﺐ ..
ﺟﺒﺪﻫﺎ ﻣﻦ ﻓﺎﻧﻴﻠﻴﺘﻬﺎ ...
ﺭﺯﺍﻥ ﻳﺨﻮﻑ : ﺧﻴﺮﻙ ..
ﺧﻴﺮﻙ ...
ﻭﻻ ﻛﻠﻤﻪ ﻭﺻﻞ ﻓﻲ ﺩﺍﺭﻫﺎ ...
ﻟﻮﺣﻬﺎ ﺩﺍﺧﻞ ...
ﻃﺎﺣﺖ ﻭﻫﻲ ﻣﺘﻜﺮﻣﺸﻪ ﻓﻲ ﺑﻌﻀﻬﺎ ...
ﻭﻫﻮ ﻃﺎﺡ ﺟﻠﺪ ﻓﻴﻬﺎ ﺑﺎﻟﺴﺒﺘﻪ ...
ﻭﻫﻲ ﺗﻌﻴﻂ ...
ﻣﻬﻨﺎﻙ ﺣﺪ ﻓﻲ ﺍﻟﺤﻮﺵ ..
ﺍﻣﻬﺎ ﺧﺪﺕ ﺧﻮﻫﺎ ﻭﻣﺸﺖ ﻟﺤﻮﺵ ﺍﻫﻠﻬﺎ ..
ﺑﻌﺪ ﻓﺶ ﻓﻴﻬﺎ ﻏﻠﻪ ﻗﺎﻝ : ﻏﺎﻟﻴﻪ .. ﺗﻌﻠﻲ ﺻﻮﺗﻚ ﻋﻠﻴﻬﺎ ﻣﺮﺓ ﺗﺎﻧﻴﻪ .
ﺗﻌﻠﻴﻪ ﺑﺲ .. ﻧﻘﺘﻠﻚ ﻗﺘﻞ .. ﻣﺶ ﺑﺲ ﻃﺮﻳﺤﻪ ﻳﺎﺣﻴﻮﺍﻧﻪ ..
ﻭﻣﺸﻲ ﻃﻠﻊ ﻣﻦ ﺣﺪﺍﻫﺎ ..
ﻫﻲ ﻣﺘﻜﻤﺸﻪ ﻓﻲ ﺑﻌﻀﻬﺎ ﺗﺒﻜﻲ ﻭﺗﻘﻮﻝ ﺑﺘﻮﻋﺪ : ﺗﻮ ﺗﺸﻮﻑ ... ﺗﻮﺗﺸﻮﻑ ﻋﻠﻴﻬﺎ ﻳﺎﺭﻣﺰﻱ ...
... ﻳﺘﺒﻊ ....
" ﻧﺨﻠﻮﺍ ﺍﻟﺒﺎﻗﻲ ﻟﻠﺠﺰﺀ ﺍﻟﺠﺎﻱ ... ﺑﻤﺸﻴﺌﺔ ﺍﻟﻠﻪ
