#العشق_المتمرد "اختبار"
الجزء115 القسم الأول
#جمان_فريد
🌟..
شوفي ماما..
دلال خدت الكراسه من آسيا وقعدت تشوف في الحروف اللي عطوهالها واجب فالجامع ابتسمت بإندهاش وقالت:ماشاااء الله..
ابتسمت آسيا بفرح..
بعدين قالت:شوفي هادي ماما..خدت الكراسه من يد امها حطتها ع الأرض وقعدت تكتب وأمها تشوفلها..
شويه وكملت وورت لأمها وهي تقول:شوفي..
خدت دلال الكراسه وشافتها ضحكت بدهشه وقالت:ماشااااء الله ع بنتي الحلوة الذكيه..تعلمت تكتب اسمها واسم بوها..من علمك قنوشتي..
آسيا:جوادي..
ضحكت دلال وحضنتها وقالت:سلمها وسلم جوادها..
ع جية معمر:امي..
دلال:نعم..
معمر:لما تبدا المدرسه..نقدر نقرا فجامع؟..
دلال:لاحبيبي..وقت المدرسه مدرسه وفالعطله الجامع..
معمر قرن حواجبه وقال:وخيره جواد!؟..
دلال:عمورة ماما انت غير ابدا مدرسه قبل وبعدين نشوفوا شن نديروا..
معمر قعد يشوفلها بضيق..
وهي شبحتله بإمتعاض لما شافت نظرته ليها..
وآسيا تشوفلهم..
شويه رن تليفون دلال..
طلعاته من جيب التوته..ابتسمت لما شافت المتصل..
فتحت الخط وردت..
دلال:هلا رنوشه......تبدلت ابتسامة دلال لملامح الفجعه....خيرها روان!!؟....................لاإله الإالله....طلقت بنتها وناضت تجري.... وصغارها اللي خافوا قعدوايجروا وراها..
دلال وهي تجري وادور في امها وقفت فجأة وقالت:حتى خالتي!!!!.............باهي باهي......باهي رانيا..
صكرت ومشت تجري..
لمحتها نور اللي كانت مقعمزة فدارها وفاتحه الباب..
طلعت بسرعه وهي تقول:شن في دلال..
دلال التفتت شبحتلها لما وصلت لباب دارنوم بوها وامها بعدين شبحت للباب وقعدت اطق وتقول:ماما..
من داخل..
"خشي"..
فتحت الباب ..
لقت امها اضم فدولابها..
وبوها مقعمز فيده وراق يخدم عليهم..
شبحولها الزوز..
دلال بربكه وخوف:امي..توا كلمتني رانيا..روان مسكينه وخرت عليها سيارة..
انصدم عبدالسلام..
ونعيمه بعيطه قالت: شنوووو!!؟..
نور خبطت فمها بيدها بقوة من الصدمه..
دلال:بالزبط وخرت ع رجلها مسكينه ..وخالتي حتى هي..
نعيمه بخوف شديد:خيرها خالتك تكلمي!!
دلال:قالت رانيا طاحت لما جت تجري لبنتها وطلعت..شبحت لبوها..ونزلت عيونها بخجل...رمت...
نعيمه دموعها طاحوا وهي تتنفس بسرعه قلبها قريب يوقف من هول اللي تسمع فيه..
عبدالسلام وهو يشوفلها سيب اللي فيده وجاها حط يده ع ذراعها وقعد يمسح عليه ويقول:فاما مستشفى ماقالتش؟..
دلال:في********..
عبدالسلام :باهي..هي نعيمه جهزي نفسك..
نعيمه هزت راسها بإيجاب وهي تبكي..
ودلال بصغارها ونور طلعوا من الدار وصكرت الباب..
نور بدموع:وووه عليك فاجعه..زعمه شن صار لرجل روان..
جواد ومجد اللي كانوا يتفرجوا ع التلفزيون فالصاله ركزوا عليهم وسمعوهم الزوز ناضوا وجوهم..
دلال:قالت رانيا رجلها قريب انقطعت..
خبطت نور خدها بيدها بقوة..
مجد وهو مخلوع:خيرها روان!!؟..
شبحوله الزوز..
هما جواد ومجد الزوز مخلوعين..
بس مجد بزايد..
دلال:شي حبيبي طاحت ع رجلها بس..
مجد:انتي قلتي قريب انقطعت..
شبحت دلال لنور..
نوربركبه؛لا حبيبي مش هكي قصدها..قصدها الطيحه قويه..
اسيا ؛ياناااري..
قالتها بألم ...
الم طفله صغيره ع طفله زيها يعتبروا الزوز الصاحبات...انوجعت عليها من قلبها..
ومن منوجعش ع حالة روان...
🍁في المشتشفى..
رانيا وحمزة وخيري في حاله يرثى لها...
مش هما بس..
حتى الراجل اللي تسبب فالحادث..
والمراة اللي كانت شاهده موجوده معاهم...
كانت واقفه حدا رانيا تهدي فيها..
المراة:ماتعرفوش انها كانت حامل..
رانيا وهي تبكي حركت راسها ايمين ويسار بالنفي..
مسحت المراة ع ظهر رانيا وهي تهز فراسها بإيجاب..
حمزة كان مربع ايديه وهو واقف حدا بوه ويشوف للراجل اللي دهس رجل روان بحقد..يبي يعطيه طريحه يحط وجعه ع اخته كله فيه..
بينما خيري مسكين كان مقعمز ع كرسي وهو حاط راسه بين ايديه وراكبه الهم..
شويه وجت تجري دكتورة صغيره فالسن..ومعها دكتور كبير شويه..
الدكتور:شن حالة رجلها بالزبط ياخنساء..
الدكتورة خنساء:قال الدكتور مطيع ان العظم سليم..بس صارلها تمزق فالاوتار والأربطه...
حمزة وخيري جوهم..ورانيا والمراة والراجل يشوفولهم..
خيري بخوف:شن صار في البنت وامها فهمونا ياسبحان الله..
الدكتور:تو خاش نشوف حالة البنت..
خش الدكتور..
وخنساء شبحتلهم وقالت:زوجتك حنديرولها صور اشعاعيه ع العمود الفقري في حاجه لازم نتاكدوا منها..
حمزة:حاجه شني!؟؟..
خنساء:نديروا الصور وبعدين نعرفوا ونقوللكم وإن شاء الله خير..
ومشت بسرعه من حداهم..
حمزة:ماقالت شي يطمن..
خيري بيموت من خوفه ع بنته ومرته قاعد يحاول يتماسك ع قد مايقدر ع خاطرهم...
شويه جي سند يجري :وين امي وروان..
حمزة:روان هني..
سند وهو يوزع فنظره عليهم :شن صارلهم بالزبط..
حمزة قعد يشرح لسند اللي حكتوهله المراة اللي كانت شاهده ع الحادثه كامله..
سند بغضب:وينه اللي وخر عليها وينه..
الراجل :اني ياخوي..
التفت سند وشبحله بنظرة عيون تخوف..
وبوه وخوته يشوفوله..
والمراة تشبحلهم الزوز...
فجأة..
سمعوا صوت صراخ روان وعياطها وهي تبكي..
رانيا حطت ايديها ع ودانها..
وبوها وحمزة ملامح وجوههم بدي عليها الألم وكانهم هما في مكانها...
سند لما سمع صريخ اخته..عقله ماحملاش..
اندفع للراجل وغضب الدنيا كلها فيه وضربه بوكس ع وجهه..
البنات عيطوا..
وخوه بوه جوه طول جبدوه..
سند بغل وغضب:اعمى اعمى ياحيوان ماشفتهااااش..
الراجل :اقسم بالله..نترزى فصغاري كان ريتها..
المراة:ايه يا وخيي البنت كانت في الخلف من السيارة ماراهاش..
سند قعد يشبحله شويه..
سمعوا صوت عياطها من جديد..
حاول يقدمله مرة تانيه..
غير بوه وخوه شدوه..
خيري:خلاص..خلاص..مش ناقصاتك انت التاني..
ودفه بعيد بقوة جهده لين دهش..
حمزة شبح لبوه وخاف عليه:بوي تعال قعمز..
غمض خيري عيونه بشده بعدين فتحهم..
ولف ومش للكرسي ومعاه حمزة..
سند وهو يشوفله مشي وقف بعيد..
اما رانيا فكانت تتفرج عليهم وهي تبكي ماعندهاش حيل للكلام من اصله..
شوي..
جو كفايه وسعد يجروا...
ووراهم نعيمه وعبدالسلام..
نعيمه وكفايه كانوا يبكوا..
لما رتهم رانيا مشتلهم تجري وحضنتهم الزوز وقعدت تبكي..وهما يهدوا فيها..
وعبدالسلام وسعد مشوا لخيري ووقفوا عليه يواسوه ويفهموا منه وضعهم..
🌴🌴🌴🌴
وهدا كله وللآن اهل القطعه مايندروا ع شي..
غاليه في الكوجينه كانت اطيب في العشي طاجين حوت وجوها عادي..
"غاليه"..
قامت عيونها وشبحت للروشن شافت ميلاد..
ميلاد:مرة درتيلي شاهي اعشاب يهدي الأعصاب تذكريه..
غاليه:علاش خيرك شن صاير معاك..
ميلاد:مش عارف حاس هكي كيف اللي نفسيتي تاعبه..
غاليه قعدت تشبحله..
ميلاد:ياودي ماهناك شي..هكي وخلاص مش فاهم ليش..
غاليه:باهي تو نديرهلك..
ميلاد:مقعمز هنى نراجي..
غاليه:باهي..
وخر من ع الروشن ومشي قعمز..
وغاليه خدت الطاجين حطاته فالكوشه ..
بعدين مشت للشباك متاع الماعين خدت منه براد..
ابتسمت لما سماعته يقرا في القرآن بصوت هادي..
كيف بتصب ميه من الشيشه اللي ع الرخامه رن تليفونها..
برا..
ميلاد يتلى في القرآن..
"والذين ءامنوا وتطمئن قلوبهم لذكر الله¤الابذكر الله تطمئن القلوب"..
شنووووو!!
شبح للروشن وهو مخلوع..
ناض وقف عليه..
شبح غاليه تتكلم بالتليفون ودموعها ينزلوا؛ياناري عليك يازينب ياغبيني..
ميلاد شد حديده الروشن وقال بخوف:خيرها زينب!!؟..
غاليه قعدت تشوفله بنظرة عيون كلها حزن وآسى..
وهو قلبه التعبان زاد في النبض من الخوف لدرجة انه تألم..
في نفس الوقت..
درس محمد سيارته ونزل يجري منها وصل فم البوابه خش وميلاد كان يشوفله وزاد خوفه.
خش ع غاليه..
محمد بخلعه:سمعتي بزينب وبنتها..
غاليه ببكي:نور توا قالتلي..
ميلاد ملامح الألم ع وجهه من وجع قلبه قال بشي من العصبيه:شنو في تكلمووووا..
شبحله محمد وبدي يحكيله اللي سمعه من حمزة..
وغاليه مازال تكلم فنور وتحاول تفهم منها..
محمد:اني بنعدي غادي تو..
ميلاد:بنعدي معاك..
غاليه نهت مكالمتها وهي تسمع فيهم قالت:وين بتعدوا فهالليل الطريق تخوف موليه ماتسمعوش شن يقولوا عليها..
محمد:نعرف طريق تانيه..ومشي طلع بسرعه..
ميلاد:راجيني..
محمد وهو ماشي :باااهي..
طول ميلاد مشي لحوشه..
وغاليه في الكوجينه تبكي وهي بتموت من الخوف وتحاول تتصل بحد من صغار زينب..
ع طلعة حميده من الحمام كانت ادوش..
وجية فاطمه من فم الحوش وحنين معاها كانوا في الجردينه..
مشت طول حميده للكوجينه وقالت بخوف:شن دوشة اللي سمعتها هدي شن صاير..
خشت امها وقالت:خيره محمد خوك !؟..
غاليه ببكي:روان بنت زينب وخرت سيارة ع رجلها قريب قطعتها..
شهقت حميده بصدمه..
والحاجه فاطمه غمضت عيونها بشده وقالت:ياسيدي ربي!!..
وحنين تسمع فيهم وهي خايفه روان صاحبتها حتى هي خافت عليها هلبه وهي تسمع فيهم يقول رجلها قريب انقطعت نزلت عيونها لرجلها وهي تتخيل في اللي تسمع فيه..
🍁🍁🍁🍁
المستشفى..
كانوا فيها خوت خيري..وعدايله..
وولد اخته اسامه اللي كانوا عيونه ع رانيا طول الوقت..
الدكتور اللي كان عند روان..
اثبت كلام الدكتور اللي شاف حالتها قبله..وقال ان العظم سليم وان اللي صار لرجل روان هو تمزق للاربطه والأوتار..
يعني الرجل مش مفصوله زي ماشافتها امها من الخوف..
بس منظرها من بعيد كان يوحي بهكي..
حاولوا يقنعوا زينب لكن مابتش تصدقهم..
زينب وهي راقده ع السرير وتبكي بتعب وتقول:بعيوني... ريتها...بعيوني..
نعيمه بدموع:والله العظيم مانكدبوا عليك يازينب..
كفايه ببكي:اني ريتها والله..
الدكتور خنساء:تمام اني تو نصورهالك بتليفوني وتشوفي بعيونك وتتأكدي..
زينب بتعب:باالله..عليك بسرعه..
خنساء هزت راسها بإيجاب ولفت ومشت فتحت الباب وطلعت..
سكراته وراها ومشت بسرعه..
لاقت قدامها حمزه جاي
حمزة:لو سمحتي دكتورة
وقفت خنساء وقالت:تفضل
حمزة؛شن وضع امي بالزبط وشن هو اللي تبوا تتاكدوا منه..
خنساء :تو نقولك..المدام ع الغالب عندها مشكله فغضروف رقبها لأنها كانت تتوجع طول الوقت وتقول رقبتي وركزت عليها كيف حطت يدها ورا رقبتها...حطت خنساء يدها ورا رقبتها بعدين نزلتها..شكيت وقلت للدكتور ع شكي وقرر يديرلها تصوير اشعاعي..
هي تحكي وحمزة مركز عليها وع حركتها وهي
تتكلم ..حس بشعور مش مفهوم..
خنساء :ع العموم ان شاء الله خير..سامحني توا لازم نمشي ناخد لأختك صورة بش امك تتأكد من حالتها وتطمن..
ومشت بسرعه فاتت من حداه..
هو تبعها بعيونه وفي ابتسامه خفيفه مرسومه ع وجهه..
🍁🍁🍁
روني حبي..
روان تشوف لرانيا بوجه متعب وحزين..
سند وعيونه معبيات دموعه:ارونتي عسولتي..
حركت عيونها جهته وقعدت تشبحله..
سند قلبه يتقطع تقطيع عليها بس ابتسم وقال؛ترا اضحكي ياشفشه..
روان يدوب ابتسمت ..
ابتسموا رانيا وسند..
بعدين قالت بصوت يدوب طالع:رجلي..
غمض سند عيونه بقوة..
ورانيا قالت:مافيها شي حبيبتي الدكتور عاينها خلاص تو تبرا..
روان:وماما..
سند بصوت مخنوق:ماما كويسه..تو تجيك..
طق الباب وانفتح..
خنساء بملامح وجه بشوشه:هاه العسوله شن جوها توا..
ابتسمت رانيا بألم..
قدمت خنساء وهي تشوفلها:محلاك روان ومحلا اسمك احلا بنيه نشوفها لتوا انتي..
ابتسمت روان..
وسند ورانيا ابتسموا لما شافوا ابتسامتها..
خنساء :نقدر ناخدلك صورة..
ضيق سند عيونه..
ورانيا بإستغراب شبحتلها..
خنساء وهي مبتسمه:بش نوروها لماما..
روان:وينها ماما..
خنساء :تو تجيك ماما لكن قبل لازم نصوروك صورة حلوة ونبعتها لماما تشوفها بش تجيك بسرعه..
رفعت خنساء التليفون مقابل وجهها وقعدت تحاول تجيب اللقطه ع روان كامله..
جت رانيا جنبها وقالت:علاش..
خنساء وهي مبتسمه بصوت هامس:امها تبي تطمن..
ارتخت ملامح وجه رانيا..شبحت لخوها سند وهزت راسها بإيجاب بش طمنه من ناحية خنساء..
صورت خنساء روان بعدين قعدت تشوف للصورة وهي تقول:وخيييتي سلمها قنانات..البنيات..الحلوات...
ابتسمت رانيا..وسند ضحك..
روان:ترا نشوف..
ابتسمت خنساء وقربت لروان ورتها الصورة..
شافتها روان...
خنساء:تهبل صورتك..
ابتسمت روان..
وخرت خنساء وقالت:نستأذنكم توا ..لاباس عليها عسولتكم..
ابتسم سند وهز راسه بإيجاب..
ورانيا قالت بإبتسامه:لايوريك باس..
دارت حركه بخشمها لروان وهي تضحك بعدين لفت ومشت فتحت الباب وطلعت..
🍁🍁🍁🍁
وصلوا محمد وميلاد ع الساعه العاشرة ليلا..
وطول الطريق وغاليه تتصل بش تطمن عليهم..
طول لما خشوا طرابلس..
مشوا للمستشفى..
وينه اللي ضربها اللي ضربها وينه؟..
ميلاد:محمد!..
محمد بعصبيه:لا محمد لاحسن..وين عقله وين عيونه ؟!!
خيري بضيق:في شهود يامحمد اثبتوا ان الراجل مالاش ذنب..وفوق هكي مسكين عرض عليا يتكفل بأي شي يخص مصاريف علاجها قالي نسفرها حتى السفر..
سكت محمد وهو مازال معصب ع الآخر..
ميلاد:باهي كيف بيصير تو؟..
خيري:غدوة إن شاء الله الدكتور يبلغنا باللي ناويين يديروه..
سعد وعبدالسلام يشوفوله..يبي يساعدوه بس عارفين خيري مايقبلش نهائي..
قدامهم واحد من خوته قاله يسفرها ع حسابه..ورد خيري الحاد عليه خلاهم يتراجعوا...
وخيري توا بس يفكر فزينب شن فيها؟
🌴🌴🌴🌴
لاحول ولاقوة الا بالله!..
غاليه بدموع:الله غالب وخلاص..
فاطمه:لازم تقلوني غدوة..
الهادي :تو نقلك غدوة وانتي غاليه تعدي معاها..
غاليه شبحت لحميده وقالت:باهي..
الهادي رفع حواجبه وقال:لاحول ولاقوة الابالله..ولف ومشي ومازال يردد في الحوقله..
وفاطمه ناضت ومشت لدارها
حميده راجتها لين طلعت قالت؛زعم كانت تعلم بروحها حامل؟
غاليه لما سمعت سؤال حميده جابتلها ذاكرتها موقف صار في العيد
🍃كانت خاطمه من حدا الحوش القديم وهي ماشيه للفرن سمعت صوت حد يرجع ..
وقفت وقعدت تسمع وقف الصوت..لما معاش سمعاته كانت تحساب روحها تتخيل..كملت طريقها بعدين عادي..🍃
غاليه وهي شبه سارحه قالت:شكلها كانت تعلم..
🍁🍁🍁🍁
سعيده:ركزت عليها ماكانتش مزبوطه بكل..
رزان:مش عارفه حسيتها عاديه..
سعيده:تس..وجهها اصفر ولما حطوا الغدي كانت تنقش تنقيش وكيف اللي كبدها زاهقه..شكيت والله شكيت بس سكتت..
تنهدت رزان وقالت:مالهاش فيه قسم..المهم تو بنيتها مسكينه مايصير شي لكراعها..
سعيده:إن شاء الله...ايه حدهم بتروح غدوة...
رزان ابتسمت وقالت:كلمتني..بنعدوا اني وياها بعد غدوة إن شاء الله للجامعه بش تبدا تنزل..
سعيده:سمح تخصصها..
رزان بضحكه:رياضيات سمح !!..
سعيده:ويهبل..ايام القرايه امك كانت شاطره فالرياضيات راهو..مال توفيق لمن طلع؟
ضحكت رزان وقالت:معلومه جديده عليا..
سعيده برفعة حاجب:ماجتش مناسبه نقولك عليها..
رزان قعدت تضحك..
سعيده ضربت ع فخدها :معاش تضحكي..
رزان:ههههههه..
وسعيده قعدت تضحك معاها وهي ماطه شواربها للأسفل..
🍁🍁🍁🍁
غدوة الصبح نمشوا غادي ونرفعوا معانا حميده..
هزت لمياء راسها بإيجاب وناضت بش توتي حوايجها..
وعمر معاها بعيونه مركز عليها مش مزبوطه ليها وقت ساكته ومالهاش حس عارف شن فيها هدا علاش ماسألهاش..
لأن الموضوع يوجع فيه حتى هو...
🍃الصغار🍃
🍁🍁🍁🍁
عدت هديكا الليله..
اللي كانت طويله هلبه ع خيري..
موجوع قلبه ع بنته ومشغول باله ع مرته..
طول الليل مارقدش غمضه..
مش هو بس..
حتى نسيبه مؤنس..
خيري حلفه مايقول شي لرباب خاف عليها...قاله بس انه يجيبها غدوة ع اساس عنده مايدير فطرابلس ويحطها فحوش اهلها..
نبه حتى ع رانيا تحرص ع خالاتها مايوصلوا شي لرباب..
البنت حامل بالبكر..خاف عليها بوها من الخلعه..
بالذات وانها بعيده يعني مرات من الخوف علي امها واختها يصيرلها شي وهما جايين فالطريق..
طلع الصبح ع مؤنس وهو يخمم..
بعد صلى الفجر نوض رباب بش تصلي وتوتي روحها..
وقتها رباب كانت فرحانه هلبه بالمشيه لأنها استاحشت امها..
زينب في العيد الكبيرة ماجتش للبلاد..
لهدا رفعها مؤنس تالت يوم العيد الصبح وروح هو وياها بعد الغدي..مانع عليها البيتان برا حوشها الا للضرورة..
لهالسبب تلهفت للمشيه..
ومؤنس يشوف فلهفتها بحزن وخوف..
🍁🍁🍁
خوف..
هدا كان شعور زينب توا وهي مقعمزة ع سريرها..
وحواليها راجلها وصغارها..
والدكتورة خنساء
خنساء:ضروري جدا تجاوبيني ع الأ٠سئلة هادي مدام زينب..
زينب :اسئلة شنو..
راجلها وصغارها حسوا بالخوف..
خنساء:مدام..انتي الفترة اللي فاتت لما تشتغلي فحوشك اضمي اطيبي وغيره..تعاني من صعوبه في مسك الاشياء بيدك..يعني متلا لما تجي تقشري بطاطا تقدري تشديها عادي ولا اطيح من يدك..
زينب وجهها تغير..
صغارها يشوفولها ويراجو فالرد..
وخيري قعد يشبحلها وهو قارن حواجبه بخوف..
واذكر موقف عابر صار الذاكرة احتفظت بيه..
⚡فلاش باك..
كان مقعمز ع المندار يحسب..
تعب من الحساب..
رفع راسه فوق وقعد يمرن فرقبته..
جت عينه ع زينب كل ماتقيم شيشة الشامبو تتسلحب منها..
خيري:خيرك؟..
زينب التفتت وابتسمت بربكه:مش درت حمام زيت لشعري !شوره ايديا قاعد فيهم...التفتت للزيانه وطبت الشيشه طبان ومشت بيها وهي طابه حوايجها وتقول:بالله خيري قول لرانيا تبدا في العشي وتقرض البطاطا..
خيري وهو يشوفلها بشك:باهي..
مشت طلعت..وخيري بعد طلعت رجع لهي بحساباته..
⚡الوقت الحاضر..
خيري:ايه..شفتها قبل..
هي انصدمت وقعدت تشوفله وصغارها كذلك..
وهوشبحلها بحده..
غيرت عيونها عنه..
وشبحت لخنساء وقالت :مش ديما مرة مرة..
خنساء رفعت حواجبها وقالت:متأكده!!
زينب بربكه:متأكده..
شد خيري يدها بقوة وقال:لا ديمه يادكتورة..
رانيا:صح..وحتى ليها مده تشكي منها..
شبح خيري لرانيا وخوتها شبحولها..
زينب نزلت عيونها وملامح الالم ع وجهها..
وخيري شبحلها وهو مضايق منها ع الآخر..
حمزة بتضييقة عيون:علاش الأسئله هادي..امي شن عندها يادكتوره؟
خنساء وزعت نظرها عليهم وقالت:الوالدة عندها غضروف فالرقبه ضاغط ع العصب وهو اللي مسببلها فالحاله هادي وضعها يستدعي تدخل جراحي فاسرع وقت..شبحتلها وقالت..احمدي ربي اللي صار معاك ماكانش فيه اصابه مباشره لمكان الغضروف لأن لاقدر الله لو صار هكي فعلا.. راهو الضغط هدا وصل للحبل الشوكي..وكنتي تعرضتي للشلل..
كلهم انصدموا بقوة..
وزينب اكثر من انصدم قامت عيونها فالدكتورة وهي تشوفلها وتتخيل لو اللي قالاته صار حق...
🍃ولعل فبعض المصائب اللي تنزل علينا دفع لبلاء اعظم🍃
شويه وطلعت الدكتورة..
بعدين الصغار وراها...
وقعد خيري مع مرته..
هي عيونها مش قادره تقيمهم فيه..
اما هو فكان مربع ايديه ويشوفلها...شويه قال:يااني مهمل..ياانتي مش حاسبتني رب الأسرة ومش مدايرتيلي قيمة واحترام..
رفعت عيونها وقالت ودموعها ينزلوا:لا والله ماهكي بكل..خيري اني كنت نشوفلك..خيري..كنت خايفه عليك..
ضيق عيونه وقال :من شنو؟..
زينب بصوت مخنوق:من الهم ياخيري من الهم..لاقدر الله لاقدر الله تصير فيك حاجه..شن ندير اني بعدين قولي؟!!..
اشر عليها بيده وقال:وكان صارت فيك انتي..اشر ع نفسه وقال..حني شن يصير فينا؟!!..
نزلت عيونها وقعدت ساكته ..
خيري:وفوقها تطلعي حامل من اربعه شهور واني اخر من يعلم؟!..
رفعت عيونها وقالت:اقسم بالله مافي بنادم كان يعرف..
خيري:باهي ولعند امتى كنتي ناويه ادسي؟؟!قولي....
غيرت عيونها اللي كانوا يذرفوا فالدموع عنه وقعدت ساكته..
هز راسه بإيجاب وهو معصب بعدين قال:مش توا نحاسبك بعدين..بعد نطلعوا من اللي حني فيه..
شبحلها شويه بعدين مشي للباب وفتحه وطلع وعيونه لاخر لحظه عليها..
بعد طلع..زينب قعدت تبكي...
شويه وانفتح الباب وخشت رباب تجري..
رباب ببكي:امي...
زينب غمضت عيونها بشده وحضنتها ورباب حضنت امها بقوة وهي تبكي..
🌴🌴🌴🌴
قالت المراة نزفت فسيارة الإسعاف لما كانت راكبه مع روان وبدت تتألم..بعدين الممرضه اللي كانت فالسيارة زبطتها حالة اجهاض..
غاليه:ياغبيني..باهي وبعدين..
كفايه:دراولها عملية تنظيف بسرعه مجرد وصلت المستشفى وروني بنيتي وقفولها النزيف حتى هي..كان تشوفيهم هي وامها تقول مجبودات من قبر..
فاطمه بدموع:بعيد وبر ياكبدي بعيد وبر..
حميده:وواك يازينب معقوله حامل وادس الفترة هدي كلها!!..
فاطمه:شورها منين جت فالعيد كانت حامل..
غاليه:ايه..
شويه رن تليفون كفايه..
طول ردت:هاه نعيمه..........ايه..........خيرها!!!؟؟؟
غاليه وحميده وفاطمه قلوبهم قريب وقفت من الخوف..
كفايه دموعها طاحوا وهي تقول:توا ماشيين غادي توا....صكرت وهي تقول..زينب اغمى عليها قدام رباب..قالت نعيمه جاها الوجع من الخلعه..
فاطمه حطت ايديها ع فخادها وهي ترعش.
وغاليه وحميده دموعهم نزلت طول..
كفايه بدموع:يمي خيرك..
فاطمه بصوت يرجف:قلوني لبنتي تو..تو تقلوني..
غاليه ناضتلها وقعمزت قدامها ع روس صباعها وشدت يدها وهي تقول:باهي يمي باهي..
كفايه طول اتصلت بعماد يجي يرفعهم..
وهو طول جاهم..
ورفعهم كلهم...
🍁🍁🍁🍁
ماشيه جايه في الممر وهي تتكلم بالتليفون..
عمي اول مرة نطلبك عاد!!..........ظروفهم صعبه.........مش بس وجعوني لكن لو تشوفهم كيف يحبوا بعض وخايفين ع بعض تفهمني.......لالا هادوا بزايد.......عمييي.......ابتسمت بفرح وقالت...يطول فعمرك يارب ويبارك فيك ياعمي....تسلم ياااارب...ضحكت وقالت...باهي....سلام....بالسلامه..
وصكرت...
وكيف لفت بتمشي..
جي قدامها واحد وقال:من كنت تكلمي..
خنساء :حول من قدام وجهي..
:بكل انتي ماتخافيش؟..
خنساء ببرود مصطنع:ماعندي ليش نخاف..وفاتت من حداه بسرعه..
وهو واقف يشبحلها بإبتسامه اعجاب جانبيه...
🍃واحد من افراد "أمن" المستشفى عجباته وليه مده يجري وراها وهي مش معبراته بكل..🍃
🍁🍁🍁🍁
توتر ساد ع كل من يمت بصله لزينب ورباب في المستشفى..
حالة الولادة
وحالة زينب الصحيه المدهورة..
مؤنس مسكين بيموت من الخوف ع مرته..كان يمشي ويجي يراجي الخبر اللي يريح قلبه ويفرحه فنفس الوقت..
وفعلا هالخبر جاه...
وولدت رباب بنوته حلوة سليمه معافاه...
طلعت للدنيا قبل موعدها باربعه ايام بس..
واحتياطا حطوها فالحضانه
جدة البنت
حالة الأغماء اللي صارتلها كان سببها هبوط
علقولها تغذيه وحالها مستقر مافيه شي يخوف
🍁ولادة رباب فهداكا الوقت
كان حدت مناسب جدا وقته..خفف عنهم شوي وبرد ع قلوبهم اللي انحرقت خوف ع زينب وروان...
هالاحداث هادي كلها
هانيبال ماعنداش ادنى علم بيها..
ولأنه حلف محمد قبل ليسافر انه يخبره عن كل شي يصير اول بأول...
محمد ماقدرش يسكت ويدرق زي قبل..
طول اتصل بهانيبال وخبره..
هانيبال بشي من العصبيه:وهدى وين تقول؟..
محمد:الوضع امس كان ملخبط لخبطه الله لايوريك والله حتى تليفوني مادورته..
هانيبال :باهي توا شن صار فيهم..
محمد:روان بيديرولها عمليه اللي فهمته بياخدوا من فخدها ويرقعوا بيه اللي تمزق فكراعها...وزينب حتى هي بدير عمليه ع الغضروف اللي فرقبتها..
هانيبال بلع ريقه وقال:وين بيدروهن..
محمد:هنى..بيدروهن دكاترة كبار...
هانيبال :من في حداك..
محمد:اهو خيري قدامي...
هانيبال :عطيهلي بسرعه..
محمد مشي لخيري وهو يقول:اهو معاك اهو...
خدي التليفون خيري من محمد وقعد يكلم فهانيبال..
بعد سأله هانيبال عن اللي صار واللي بيصير وعرض عليه المساعده..
ومعروف خيري حيرفض..
عصب هانيبال عليه شوي..
لكن خيري امتص غضبه وعرف كيف يخليه يحترم رفضه لاي مساعده...
مرام..
كانت تشوف لهانيبال كيف وهويتكلم يشد ع قبضة يده بقوة ويرخي
تأثرت هلبه..وجعها قلبها لين خلاص..
بعد كمل المكالمه..
شبحلها وقال؛كنتي تعلمي..
مرام بدموع:لو نعرف مستحيل ندرق عليك..
تنهد هانيبال بضيق..
هي قدمتله..
وقفت قدامه وقالت:حبيبي..
قعد مغير عيونها عنها وهو مضايق ع الآخر..
حطت يدها ع ذراعه..
هو غمض عيونه بعدين فتحهم وشبحلها..
هي طول خداته فحضنها..
وهو حضنها بقوة من حزنه الشديد...
اول مرة تشوفه بحالة الضعف هادي..
وبرغم هكي زادت ماتت فيه اكثر واكثر💕💕💕..
🍃🍃🍃🍃🍃
ومروا تلاته ايام..
طلعت فيهم رباب من المستشفى مع بنتها لحوش اهلها وخالاتها غاليه وحميده مشوا لحوش زينب بش يعانوا رباب وبنيتها..
رانيا ماتقدرش بروحها..
اما زينب قعدت ع خاطر بعض الكشوفات المطلوب انها اديرها قبل تخش العمليه..
وروان...
فدارولها عمليتها..
وان صح التعبير رممولها الأجزاء المقطوعه من لحم رجلها..
وتحديدا الاوتار والأربطه عن طريق جزء خدوه من فخدها..
وبفضل الله عمليتها نجحت...
بس..
للأسف..
حتى بعد رجلها تبرا وترجع لوضعها الطبيعي...حيقعد منظرها مشوه...وهالشي اكيد حياثر ع روان مستقبلا...
🍃هانيبال كان معاهم اول بأول ويعرف كل شي صاير معاهم..
حتى انه كلمهم فيديو وكلم روان وارتاح باله شوي..
قعد هم عملية زينب اللي الكل خايفين منه..
بسبب عملية الإجهاض جسمها تعب شويه..
فأجلوا موعد العمليه ليوم 7من شهر اكتوبر...
طلعت من المستشفى بعد ماحرصوا عليها انها خلال هالمده مادير شي نهائي وماتطلعش...
وهالحرص كان بزايد من عيلتها...
اللي كانوا حواليها طول الوقت..وماخلوها ادير شي..
دابها داب حفيدتها اللي فرحانه بيها قريب اطير...
💕جو من اهل مؤنس..
امه وحناه وجده بس ..وكانت خشتهم لطرابلس هادي الأولى..
وفرحتهم بالحفيده الاولى لبنتهم كانت كبيرة..الظروف اللي صايرة مانغصتهاش..
امينه:عادي ياوخيتي يازينب نديرولها احلى لمه غير تنوضي انت سالمه ومافيك شي كله ملحوق عليه..
كامله:ياما بنديرولها هالفريفيرة اللي خلت بنتي جده وزادت كبرتني..
ضحكوا كلهم ع كلام كامله..
وزينب كانت تضحك وهي تشوف لرباب اللي فرحانه بجية متاعينها...
تنهدت براحه...بعدين غيرت عيونها عنها جو فعيون كفايه ابتسمت كفايه وهي ردتهالها..
🍁🍁🍁🍁
في دار النوم..
🍁قبل كان من عيوننا يعرف شن فينا..غير يشوفنا بس ينشدنا عن حالنا قريب مية مرة..هانيبال ياكفايه حتى وحني برجالتنا وصغارنا فطوله كان ديما يحس انه مسؤول علينا ومش مخلينا بكل..بس توا...حسيت انه مش زي قبل..
كفايه:كيف مش زي قبل يازينب..هانيبال حنى وهو فقطع الدنيا يتصل وينشد ويخمم فهدا وهداك..ريتي فرحته بينا منين رانا لما روح عيونه بروحهم يضحكوا
زينب بدموع:لكن اهتمامه بينا مش زي قبل..مرام خدت الحصه الكبيره..
كفايه بضحكه:ياوالله عليك زينب وخلاص..يابنتي هادي مرته طبيعي جدا بتاخد الحصه الكبيرة..شنو نسيتي حمواتك شن كانوا يديرولك لأنهم يشوفوا فخوهم كيف مدللك ويزازي بيك...انتي كنتي قاصده تاخديه منهم!!
نزلت زينب عيونها وقعدت ساكته..
كفايه؛هما هكي عقلهم قاللهم هادي خدت خونا منا..زي ماقالك عقلك علي مرام مسكينه..
تنهدت زينب وقالت:خفت يدير زي ميلاد..
كفايه:ميلاد انتي اللي زدتي نفرتيه منك يازينب راهو كنتي تقدري اديري عكس هكي لكن طبعك ماساعدكش..
قعدت زينب بنفس وضعيتها وهي ساكته..
كفايه:وبعدين زي هانيبال زي باقي خوتي يازينب قولي الحق؟!!..
ابتسمت زينب ورفعت عيونها فكفايه وحركت راسها ايمين ويسار..
ضحكت كفايه..
شوي رن تليفونها..
كفايه :هههههههه من بكري نراجي..
مدت التليفون لزينب وقالت...هاك ردي..
تعبوا عيون زينب دموع خدت التليفون وفتحت الخط وحطاته ع ودنها ويدها ترجف..
هانيبال:ياعزوز ياحقودة..
زينب:مصحح وجهك يابوكرش بدال ماتسأل عن حالي وشن صار فيا!!..
هانيبال:نهزبك قبل بعدين ننشد عنك..
زينب بضحكه؛مبردك..
هانيبال بإبتسامه؛شنو حال روان؟..
زينب بإبتسامه:الحمد لله..اهي مقعمزة وخلاص..
هانيبال:معليشي تاخد وقتها وبعدين تولي تلعب وتجري كيف قبل..
زينب:يااارب
هانيبال:زينب..والله نافسك عمري كله كان تستحقي شي وماتقوليش..راجلك مادوريه راك اختي قبل تولي مرته..
نزلوادموعها وهي مبتسمه قالت:والله ماني مستحقه حاجه الحمد لله حتى عمليتي اللي بنديرها هني الدكتور اللي بيديرهالي دكتور كبير..والمستشفى نظيفه ومتوفر فيها كل شي..ماتخممش
هانيبال:اكيد
زينب:اكيد ياغالي..ربي يخليك لينا يارب ويفرحك بوليدك..
هانيبال بإبتسامه:تسلمي..اهي مرام معاك
زينب تعكرت ابتسامتها وقالت:باهي.........اهلا مرام....الله يسلمك..لايوريك باس
كفايه وهي تشوف لزينب كيف تكلم فمرام بالسيف..ضحكت وهي تحرك فراسها ايمين ويسار
🍃النغرة لو ولت طبع مستحيل يتغير🍃..
🍃🍃🍃🍃
وجي يوم ..
7\10...
يوم العمليه..
يومها حتى سعيده ورزان جو لحوش زينب..
والكل ع نار يراجي فساعة العمليه..
في المستشفى..
خوتها كلهم كانوا موجودين..
ميلاد حميد الهادي عمر ومحمد وهانيبال معاهم ع الهاتف كل شويه يتصل ويسأل..
حميد بهمس:مش كان دارتها فتونس خير!!
ميلاد بنفس الصوت:ماعندهمش بيش
حميد:ماهو خيري محملها هلبه..كان خلاني راني طلعتها هي وبنتها..
ميلاد:ماخلا خوته يعاونوه بيخليك انت؟..
سكت حميد وهو متضايق..
وميلاد بعد كان يشبحله قعد يشبح لنسيبه خيري اللي كان باين عليه انه فقمة التوتر..
شويه وجت خنساء اللي كانت من ضمن طاقم العمليه..
وقفت قدامهم وقالت:اطمنوا العمليه حيديرها دكتور معروف جدا برا وداخل البلاد..مافيش عليها خوف بإذن الله..
خيري:ان شاء الله يابنتي..
ابتسمت خنساء لخيري..
وكيف جايه بتمشي عيونها جو فعيون حمزة..
قعدوا يشبحوا لبعض..
هي فيسع غيرت عيونها..
وهو قعد معاها بعيونه لين خشت وع وجهه ابتسامه خفيفه..
سند شد ضحكته لما شافها..
🍁🍁🍁🍁
لحظات وبدت العمليه..
اكثر قلوب كانت فحالة يرثى لها هداكا الوقت..
قلوب..
امها...وصغارها...وراجلها..
رانيا ورباب..
دموعهم ماجفتش..
اول مرة امهم تتعب هكي..
اول مرة تخش العمليات...
اول مرة يعيشوا حالة من الخوف زي هادي ..
حالة الخوف ع الأم..
🍃ديما يكون اكبر خوفنا ع امهاتنا ابسط شي يصيبهم يخلي خوفنا عليهم..يوصل لحالة الخوف من الفقدان..الام بالذات🍃
حتى لو تزوجنا ودرنا عيله واستقلينا تقعد الأم واخده اكبر حيز فحياتنا...
في اللي تتصل بأمها يوميا تهدرز عليها..
في اللي فاليوم تكلمها 3 ولا4مرات..
حتى فتربيتنا لصغارنا ورعايتهم نلجئوا لأمهاتنا..
في من احفاد جداتهم هما اللي يربوهم..
تلقوا الحفيد كيف مانقولوا..مربي كبيده ع جداه اكثر من امه..
الأم..
مهما قلنا ومهما عدنا وزدنا فوصفها نقعدوا مقصرين...
🍃رحم الله منهن من رحلت...واطال الله فعمر من بقيت🍃
🍁🍁🍁🍁
الساعه 3:00بعد الظهر..
صوت تليفون يرن..
كان تليفون كفايه..
طول ردت..
كفايه:ها ولدي عماد..
رزان نزلت عيونها وقعد تشوف لأيديها اللي يلعبوا بطرف الوشاح من التوتر💓
ارتسمت ع وجه كفايه ابتسامه فرح وقالت:الحمد لله الحمد لله ياربي الحمدلله..وزعت نظرها عليهم وقالت..عمليتها نجحت وحالها باهي...
تعالت اصواتهم وهي تهتف بالحمد والشكر لله..
اللي دفع عن زينب بلاء كبير..كاد ان يصيبها..
بلطفه وعنايته حماها منه...
ودخل الفرحه والراحه لقلوب كل احبابها..
بالذات بناتها التلاته اللي كانوا حاضنين بعض بفرح..
وابتسامه روان البريئة ع وجهها..
وضحكة خواتها اللي من بين دموعهم مسموعه لكل الموجودين...وخلتهم يزيدوا يفرحوا لفرحتهم..💓
💕💕💕💕💕
الدكتور:لازم تقعد من اسبوع لعشرة ايام راقده هني العمليه ماكانتش بسيطه..
خيري هز راسه بإيجاب وقال:باهي....المهم يادكتور توا خلاص حالها باهي!!؟بعد العمليه هادي مافيش عليها اي خطر..
ابتسم الدكتور وقال:اطمن زال الخطر..
كلهم تنفسوا براحه..
وخيري قال من وسط قلبه:الحمد لله..
الدكتور:لاباس عليها..
خيري:لايوريك باس..
لف الدكتور بيمشي وهو يقول:تعالي خنساء..
وبنت خوه اللي كانت واقفه معاه ابتسملتهم ولفت ومشت ورا عمها وهي تهدرز عليه..
وحمزة معاها بعيونه..
"شده شده شده"..
شبح ايساره بخلعه وقال:شن هو؟؟!..
ابتسم سند ابتسامه عريضه وقال:قلبك..
حمزة ضم شواربه لداخل بغضب..
رفع يده بيضرب سند عنفقه..
لكن اذكر انهم فمستشفى خط يده علي رقبة خوه وشدها وهو مبتسم قدام الموجودين قال:غير حدانا ناس..
سند ضيق عيونه وقال:اها؟؟ حدانا خنننناااس!!؟؟..
شد حمزة ع رقبته بقوة
وسند ميت بالضحك..
...يتبع...
