#العشق_المتمرد "اختبار"
#جمان_فريد
الجزء 115 القسم الأخير
🌟..
🍃🍃🍃🍃🍃🍃
هاك رزان هاك..
خدت التليفون من عمها اللي مدهولها وطلع من حداها..
حطاته ع وذنها بلهفه وقالت:آلو..
"ياآالووو"..
حطت يدها ع فمها وقعدت تبكي..
"ايااااه علينا عاااد"..
ضحكت من بين دموعها وقالت:استاحشتك..
رد عليها وهو يقلد فصوتها قال..
"استاحجتيني"..
رزان بضحكه وهي تسمح فدموعها:مبردك..
"ههههههه..فزغولتي انتي..شن دايرة"..
رزان بإبتسامه ودموعها ينزلوا:نبرز..
ضحك وقال:وغريمي..
رزان:بادي يتشيطن..يتحرك قصدي..
"اوووووو ههههههه"
فجأة انسمع صوت رصاص..
قلبها قريب وقف..عيطت وهي تقول بهلع:عماااد..الووو عماااااد...عماااد...
"الو"..
حطت يدها ع قلبها وقالت بنبرة باكيه وهي تعارك:اني الظالمه اني اللي خليتك تعدي اني الظاالمه..
عماد بضحكه:تسكتي يازرياكه خلاص..صوت ضرب رصاص في الهوا عادي مافي شي..
رزان:ايه ايه مشيه ع غيري!!..
عماد:هههههههههههههههه.
رزان رفعت حواجبها:تو شن يضحك فيك يابارد قول..
عماد بضحكه:نقولك شن خطر عليا وانتي تكلمي فيا هكي!؟.
رزان وهي مبتسمه برفعة حاجب :شن خطر عليك..
قال وهو يقلد فصوتها...
" كرهتك...وعفتك.. وصفحتك مزقتها من حياااتي خلاااص...
...اني عمري ماكنت لواحد كيييفك ولاواحد كيييفك ممكن يكون ليا..."..
عماد:كان ماكنتيش ليا ماتكونيش لغيري يابطه..انتي لعمدة قلبك بس..
رزان بضحكه:عليك ذكريات سمحه تذكر فيها!!
ضحك عماد وهي ضحكت..
وفي عز هالضحكات اللي كانت طالعه من القلب ..
صوت انفجار قوي اخترق مسامعها..
انقطع بعدها ع طول الإتصال..
توسعوا عيونها وهي تقول بصوت مخنوق :
"عماد"..
🍃🍃🍃🍃🍃🍃🍃🍃🍃🍃🍃🍃🍃🍃🍃🍃🍃
اكتوبر 2015..
مقعمزة وفيدها حكة عصير عنب"راوخ" شربت منها..
وجهها مازال اصفر..
لكن بكي ماكانتش تبكي..
تشبح فالفراغ بس..
رن تليفون حدهم شافت المتصل وقالت:بابا جي رزونه هيا..
هزت راسها بإيجاب وناضت..
حطت حكة العصير ع تركينه..
مدتلها تغريد شنطتها..
خدتها..
حدهم لتغريد:نتلاقوا..سلام..
تغريد:سلام..
رزان مشت من غير ماتتكلم..
وحدهم وراها..
قعدوا يمشوا الزوز ..
حدهم تشوفلها بقلق..
وهي ماشيه وخلاص..مش حاسه بولا حاجه..
تبي توصل للسيارة وتروح..
تبي دارها وسريرها..
تبي ترقد..
تبي تهرب 🍃
وصلت لسيارة خالها..
ركبت بنته من القدام..
وهي من الخلف..
حسن:شن جو..
حدهم:تمام بابا..
حسن :تمااام..
تحرك طول..
ورزان مازال فحالة اشبه بالكآبه...
🍁🍁🍁
خالتي...تليفووونك..
غاليه من الكوجينه:هيا هي..
مشت طلعت من الكوجينه بطريقها للدار..
وصلت فيها وخشتلها وهي مازال تسمع فيه يرن..
وقفت ع طاولة القراية متاع رانيا..
خداته شافت المتصل فتحت الخط وردت تقول
ايوه عماد
عماد بتوتر ممزوج بالعصبيه:خالتي..كلمي رزان ترا
غاليه ضيقت عيونها وقالت:نكلم منووو؟باك قصدك سناء!!
عماد غمض عيونه وفتحهم بنفاد صبر وهو يقول:رزان ياخالتي رزان
قبل شويه اتصلت بيا......
وحكي عماد لخالته تفاصيل المكالمه وعاود اللي قالاته رزان وكأنه حفظه عن ظهر قلب..
عماد:مش فاهم شن صار..
غاليه بقلق:باهي صكر انت توا..
عماد؛تمام..بعد تكلميها كلميني طول..
غاليه:باهي باهي..
صكرت غاليه من عماد..
وقعدت ادور ع رقم رزان..لقاته واتصلت طول..
🌴🌴🌴🌴
هداكا الوقت رزان كانت كيف خاشه لدارها..
صكرت الباب..
رن تليفونها..
فتحت الشنطه وطلعاته منها وهي فقمة التعب والضيق..
لقت عمتها تتصل..
طول ردت..
رزان:هلا عمتي..
غاليه؛رزان..وينك تو.
رزان لوحت الشنطه ع السرير وقعمزت عليه وهي تقول:كيف روحت من الجامعه..
غاليه وهي قارنه حواجبها:حق اتصلتي بعماد؟!
رزان بغضب مكتوم:معاش نبي نسمع اسمه..
غاليه بإستغراب:صارت حاجه..
رزان بنبرة باكيه:الحقيرة خطيبته اتصلت بيا وماخلت ماقالتلي..
انصدمت غاليه:لييش!!؟..
رزان:وين نندري ع بلاها الاسود..قاتلي بعدي عن خطيبي..وهو يشكي منك ومن حركاتك..وقات كان مابعدتيش نفضحك..وكلام كيف الزفت..اني والله ياعمتي والله من هداكا النهار اللي كلمته فيه ماعاد كلمته ولادورته معاد عندي ماندير بيه اصلا...خلاص..وقعدت تبكي..
غاليه هزت راسها بإيجاب وبشي من العصبيه قالت:باهي باهي..ترا صكري تو...
رزان ببكي:مصدقتيني؟
غاليه:مصدقاتك بنتي مصدقاتك..غير صكري تو..
رزان:باهي..
بعد صكرت رزان..
غاليه طول اتصلت بعماد..
🍁🍁🍁🍁
انتي حمارة..
حمااارة كبيرة..
قالت الكلام هدا وهي تضرب فيها ع كتفها..
سناء ببكي :خليني ترا..خليني..
لمياء بغضب:نخليك لخيبتك ياغبيه..حي عليك توا كان وصل اللي درتيه لعماد انسي..
سناء بعصبيه ودموعها ينزلوا :ماعنداش حق يحاسبني..لما نبعتله رساله الصبح ويرد عليا ويقولي..تمام رزان..شن تبيني نفهمها كيف نفكر فيها قولي!!؟..
لمياء:حاسبي روحك ياحمارة اللي ماعرفتيش تنسيه فيها..
حطت سناء ايديها ع وجهها وانهارت بالبكي..
ولمياء ارتخوا ملامح وجهها جتها حضنتها وهي تقول:وراسك ياسنسن ماضاله الا واخدتيه وقولي اختي قالت..
سناء ببكي:خايفه يسيبني..
لمياء رفعت حاجبها وقالت:مايسيبكش..تغدي بيه..قبل ليتعشى بيك..
......
غاليه بحده:كلم خطيبتك وتأكد منها بروحك..
عماد يسمع فخالته وهو فحالة من الصدمه والغضب..
غاليه بحزم:اسمعني عماد..رزان اخطاها..اخطاها..اخطوها انت وخطيبتك سادها ماجاها واللي راته منك..خلاص توا كيف ماأنت عديت لقسمك..هي قسمها جاها..اخطاها سلم ولدي والهى باللي عندك..
وصكرت عليه...
هو بعد صكرت..
مجموعه من المشاعر تجمعت داخله فلحظه..
غيرة..ألم..ندم..غضب..حسرة..
هالمشاعر المختلطه
خلاته دار ردة فعل ظاهريه عليه..
عيونه قعدوا يرمشوا بسرعه..
عض ع شاربه التحتاني بقوة..
وصدره من سرعة النفس قعد يعلى ويهبط..
من قلبه اللي ثار بنبضه ..هاج ماتحملش اللي سمعه..
قسم شنو اللي جاها...
كيف يعني..من جدها بنتي غيري بياخدها مني وهي راضيه!؟
باهي وخيرك انت!؟
مش مني اني من هو..هو...
وااه من الندم...لما يبدا يحاسب فينا ع حاجات درناها من ورا قلوبنا..
بسبب الغضب..
🍃الغضب الغضب..ياكم مرة خلانا نديروا حاجات نندموا عليها احيانا عمر كامل🍃..
خدي نفس وطلعه بقوة..وكأنه يبي يطلع كل هالمشاعر اللي تجمعت ع صدره وغماته..
نزل التليفون من ع وذنه وشبحله..
قرن حواجبه..وزادت ملامح الغضب بانت ع وجهه..
اتصل بيها وهو ناوي يحط كل غضبه فيها..
.....
هي كانت مقعمزة ع كرسي فدارها تحاول تهدي بكي..
واختها تمسح ع شعرها وتقول:خلاص سنسن..خلاص حبيبتي..
رن التليفون..
فنصت سناء وشبحت لأختها..
لمياء برفعة حاجب :ماتخافيش ماتخافيش..كان طلع هو وعيط وكشخ عليك حتى انتي كشخي وعيطي بصوت أعلى..حسسيه ان هو الغالط وهو اللي ظلمك وانتي المظلومه..عماد قلبه طيب هلبه ياسناء..تقدري عليه..صدقيني تقدري..
خدت التليفون من ع الطاوله شاف المتصل رفعت حواجبها بعدين شبحتلها وهي تمدلها فيه قالت:هو..ديري زي ماقتلك...
هزت سناء راسها بإيجاب وخدت التليفون من اختها ..
فتحت الخط وهي ترعش..
وحطاته ع وذنها وقالت:الو..
عماد بغضب:شن دايره انتي..شن ملبزة..تكلمييي..
هي رفعت عيونها فأختها اللي كانت واقفه قدامها ومربعه ايديها..
لمياء صكرت عيونها وفتحتهم وحاجبها مازال مرفوع..
وكأنها تقوللها"زي ماقتلك ديري"..
وسناء دارت زي ماقالت اختها بإنفعال وبكي ردت عليه وهي تقول:قولها لروحك...شوف الرساله اللي بعتتهالي الصبح..تضحكوا عليا تلعبوا عليا!!تلعب بمشاعري ياعماد قول لهالدرجه اني مانسواش عندك..
عماد بتساؤل قاله بنبرة عصبيه:رساله شن؟؟!!..
سناء ببكي :شوف الرسايل عندك شوف..وبعدين قولي كاني غالطه ولا عندي حق في اللي درته..
عماد بحده:لحظه..
حول التليفون من ع وذنه.
مشي خش ع الرسايل..
وشاف اخر رساله كان هو باعتها ردا ع رساله طلبت منه فيها يبعتلها صور المطبخ متاع الحوش..
رد هو..
(تمام رزان)..
خبط جبهته بيده وهو مغمض عيونه بشده..
بعدين فتحهم وهو يشوف للرساله ويقول فنفسه..
"شن درت فروحي بس..اني حتى اسمها بديت لاإردايا نكتب فيه من كثر مانفكر فيها !!"
نزل يده مع ع جبهته ومراية عيونه البنيه غرقت بالدموع..
رد التليفون ع وذنه وقال:باهي شن دخلها هي تتصلي بيها؟
سناء:حط روحك فمكاني فشن تفكر...شن يجي فبالك ترا!؟
حس بتأنيب الضمير..
هي فنظره ماليهاش ذنب..الذنب ذنبه هو..
ماقدرش وقتها يرد عليها بعد سكت عنه غضبه الا بكلمه وحده
"آسف"
سناء فرحت لانها نجحت فاللي قالتلها اختها ديره..
قالت بنبرة ألم:عماد..انت جرحتني وجعتني منك هلبه..
لمياء ابتسمت بمكر..
عماد غمض عيونه بأسف وقال:عندك حق..عندك حق..فتح عيونه وهو يقول..سناء..نجيك للحوش العشيه نهدرزو؟..
سناء شبحت للمياء وقالت:باهي..
تنهد عماد وقال:تمام 5:30موعدنا..
سناء:تمام..
عماد:اسف مرة تانيه..تشاو..
سناء:باي..
صكرت سناء وشبحت لأختها وابتسمت ابتسامه خفيفه وهي تقول:بيجيني العشيه يعتذر..
لمياء بضحكه:والله اعلم شن بيجيبلك معاه.
ضحكت سناء بعدين تلاشت ضحكتها وقالت:لكن مازال يحبها يالمياء..
لمياء:تو تخليه ينساها..ماتنفريشي منك بس ومعاش تجيبي سيرتها قدامه..صار وتكرر نفس الموقف تغاضي واعرفي ديما كيف تخلي كل شي يجي لصالحك..اشرت عليها بسبابتها..وديما اقلبي الطاوله ع اللي قدامك فمواقف زي هادي..فهمتي..
هزت سناء راسها بإيجاب..
🍃زي مايدير الطالب قدام استاذه بعد مايشرح الدرس ويسأل..مفهوم؟!..🍃
🍁🍁🍁🍁
جامعة طرابلس
كلية الهندسه
في باحة الكليه..
زين:هكي تمام استوعبتي
رانيا شاده ضحكتها.
زين بضحكه:شن يضحك فيك
رانيا:ههههههههه..نظاراتك...بلييييز حولهم
رفع حواجبه وقال:معناها كنت نخرف في الفاضي بكري..نشرح وانت مركزة فنظاراتي..
رانيا بضحكه:شتتوني الحق..
حولهم وحطهم ع تركينه وقال :نعاودوا مرة تانيه يابش مهندسه وركزي فقرايتك احسلك..
رانيا بضحكه:حاضر..
زين :احممم..المهم توا..شبحلها لقاها شاده ضحكتها قال..ايااااح
رانيا:هههههههههههههه
ضحك نص ضحكه وقال بتفنيصه:رااانيا..
ورجع لبسهم..
هي هدت ضحك وهزت راسها بإيجاب وقالت:خلاص خلاص..
كان قاصد يلبس نظارات الوانها فاقعه زي الموف اللي لابسها توا..بش يتأمل ملامحها براحه بدون
ماتحس عليه..
يتملا منها في اخر لقاءات ليهم مع بعض..
تحدد موعد مناقشة مشروعها..
يوم 9\12\2015..
وهو حيكون بعد 5ايام من هاليوم برا البلاد..
مسافر لغير رجعه..
مهاجر..
يبي يرفع معاه وجهها اللي ملامحه تشبه فيه بلاده..
سمرا..زي صحاريها..
عيونها خضرا..زي لون سهولها ووديانها ففصل الربيع..
بسمتها ضحكتها غضبها حزنها صوتها
زي بحرها الهادي والهايج والواسع والغريق...
قوتها..ثباتها...
زي قوة وثبات ارضها..
رغم كل اللي مر عليها وعاشاته..
تمرض تتعب..لكن تقاوم..وماتنتهيش..
هي هكي....❤
🍁قعد يشرحلها وهما يشوفوا للهاتف ع بعض الامور اللي تخص المشروع..
شويه..
"استاذ زين"..
التفت زين وشاف واحد من الطلبه واقف بعيد شويه..
زين:لحظه..شبح لرانيا ومدلها التليفون وقال..خودي..شوفي الصور وركزي ع اللي قتلك عليه..
رانيا خدت التليفون وقالت:تمام..
ناض زين ومشي للطالب..
وهي قعدت تشوف في الصور بتركيز..
وتقلب..
صورة ورا التانيه لعند مابالغلط حطت ع صورة لفرح واقفه حدا طاوله عليها قالب "كيكه روسيه"..
عيون رانيا تعبوا دموع وفاضوا..
وهي تذكر فهداكا اليوم الأسود..
مسحتهم بسرعه وحطت صبعها ع الشاشه بش ترجع للصور اللي تخص مشروعها..
وبدل ماتسحب الشاشه لليسار غلطت مرة تانيه وسحبتها لليمين..
جت قدامها صورة تانيه..
ضحكتها هالمرة ضحكتها هلبه..
اول مرة تشوفه فوضعيه زي هادي...
الصورة كانت ليه وهو يرقص..
قعدت تضحك وماقدرتش تغيرها...
لعندما جاها لقاها شاده تليفونه وتضحك..
زين:ترا شن تشوفي..
هي تضحك بدموعها وراته شن تشوف..
وجهه راح الوان وقال بإحراج بعد خدي منها التليفون:هادو الرسومات اللي قتلك شوفيهم؟؟!!
رانيا:ههههههههههه..جت فوجهي بروحها..
رفع حاجبه وقال :بروحها صار!!
قعدت تضحك بعدين قالت:بالله عليك بالله..قولي شن قصتها.
حك لحيته بإحراج وقال:فعرس واحد صاحب متراهن اني وياه ع حاجه..احمم..المهم هو ربح الرهان وهدا كان شرطه..
رانيا بضحكه:تبان ماصدقت..
ابتسم بدون مايشوفلها وقال :نوبه..صعبه شوي الواحد يكبت حماسه..
رانيا:هههههههههه..
هو قعد يضحك....بعدين هدا ضحك وقال:خلاص رانيا خلينا فالجد توا..هدا اخر موعد لينا مع بعض يخص المشروع..
ابتسمت وقالت:تمام..
ابتسم بعدين رد الصور اللي تخص المشروع وقعدوا يتناقشوا عليهم...
🍁🍁🍁🍁
الساعه 3:30بعد الظهر..
بعد الغدي..
كلمته وقالي باهي..
غاليه بضحكه:باهي ياحنه..معناها بنعدوا اني وانتي وحميده ودلال بس..
حميده:رانيا بتقعد مع الصغار..
رباب:ايه..
غاليه:نطلعوا بعد تعدي زينب للمراجعه..
حميده قالت:باهي..
ورباب هزت راسها بآيجاب..
بعدين شبحت حميده لغاليه وقالت:من كلمك بكري..
تنهدت غاليه وقالت:عماد..
🍁🍁🍁🍁
في المربوعه..
زينب تتكلم بهاتف حمزة:الو....خنساء...معاك خالتك زينب.....اذكرتيني......ههههههه..تسلمي حبيبتي الحمد لله انتي شن حالك شن دايرة؟........باهي باهي الحمد لله......ايه...اني اليوم عندي مراجعه اي اي......باهي....خلاص نتلاقوا غادي....باهي.. هي مالا مانعطلش عليك بالسلامه تو...بالسلامه بالسلامه....
صكرت وشبحت لحمزة ومدتله التليفون..
خداه وهو يضحك ويقول:خيرك ماكلمتيهاش من تليفونك؟..
رفعت امه حاجبها وهي تشوفله..
حمزة ضحك بغمزة عين:تلحلحيلي!.
ضحكت زينب وقال:ترا بالله ساعدني انوض خل نطلع من هني قبل ننجلط .
حمزة:ههههههههههه
🍁🍁🍁🍁
حيييييي!!
حميده بغضب:يدورن فيها الكلبات..شبحات لمياء ليها يخوفن عرفتها اني ناويه ع شي..
رباب:باهي شن عندهم معاها البنت فحالهاوهو فحاله..
غاليه:لاهو مش فحاله فرباب نراقب فيه ونشوف فتصرفاته..
قرنت حواجبها رباب وقالت:مش خطب ودار بيان هكي كبره شن مازال يبي فيها..قولوله يفوتها خلاص البنت حتى هي قريب تمشي فحالها..قوليله لو صار نصيب بينها وبين اصيل لو فكر يقرب منها يتش فيه النار..
حميده:حمقتي ع خاطر سلفك!..
رباب:حمقت ع خاطر رزان البنت راحت فحاله بعد اللي داره فيها..
غاليه:عندها الحق ياحميده ماصدقنا الفتت لروحها وقالت نفكر وماسكرتش الموضوع من الأول..
حميده:باهي ماقلنا شي..لكن راهو عماد يموت فرزان ومادار اللي داره الا من قهرته راهو..
رباب:دوة فاضيه ياخالتي..توا خلاص هو خاطب غيرها واللي خاطبها اخت مرت خاله..يعني يحط عقله فراسه ومايجيبش لروحه ولغيره المشاكل..
غاليه :معاها فكل كلمه..
تنهدت حميده بضيق وقعدت ساكته..
🍁🍁🍁🍁
الساعه 5:45مساءا..
وراس بنتي ماتغفليش عن اختك..
رانيا:حاضر امي خلاص عاد..
زينب تنهدت وهي مازال قلقه..
حمزة:هيا يام..
زينب :باهي..
مشت هي وياه..وطلعوا من الباب..
ووراهم غاليه وحميده ورباب..
رانيا:جت دلال..
رباب التفتت وقالت:ايه..بالله رنوشه عيونك ع إباء..إباء يارانيا..
رانيا بضحكه:باهي يانهاري..شبحت لحميده..وحتى انتي خالتي ماتخمميش ع حنين غير اطلعوا دلال ماتحبش تراجي..
ضحكوا التلاته وطلعوا مع بعض..
ورانيا وراهم شافتهم وهما راكبين السيارة..
تحركت دلال..
ورانيا صكرت الباب..
ولفت خشت ..
شافت روان وحنين الزوز يتفرجوا ع الرسوم المتحركه فالتلفزيون..
فاتت من حداهم بطريقها لدار النوم..
خشتلها..
شافت إباء راقده فسريرها ابتسمت..
بعدين لفت ومشت طلعت وصكرت الباب..
وهي ماشيه لدارها قعدت تفكر فصورة فرح اللي شافتها وعلقت فذهنها اكثر صورة الكيكه..
طلعت تليفونها من جيب سروال التوته..
قعدت تبربش فيه..
خشت ع الفيس..
وطول لحساب زين...
مشت للصور...وقعدت ادور لين جت قدامها صورة الكيكه..
شافت الكلام المكتوب بالإنجليزي واذكرت الترجمه متاعه اللي قالتلها عليها بنت عمتها..
دموعها طاحوا طول...
وجعها هلبه..هلبه...
وع قد ماوجعها ع قد ماتمنت لو تقدر اديرله اي شي تفرحه بيه زي ماهو فرحها..
ارتسمت ع وجهها ابتسامه لما خطر عليها شي..
مسحت دموعها...
وطلعت من الفيس..
خشت ع سجل المكالمات..
وحطت ع رقم زين واتصلت بيه..
نادى مرة اتنين..
بعدين انفتح الخط..
"ايوه"..
رانيا :اهلا استاد كيف حالك توا..
زين وهو يشرب فالقهوة فصالة شقته وقدامه اللاب رد عليها وقال:تمام..خير رانيا في حاجه؟..
رانيا:ان شاء الله غير كلمتك فوقت مناسب..
زين:مناسب مناسب..غير قولي شن في..
ضحكت وقالت:تمام..احمم..استاذ نذكر مرة فرمضان تقريبا..كنت منزل صورة للكيكه الروسيه اظني..وفوقها كلام..هكي استشفيت من المنشور انك..خاطرك فيها صح؟!..
ابتسم وقال:اممم..اتصلت بيا ع خاطر استشفيتي ان خاطري فالكيكه الروسيه اللي شفتي صورتها فمنشور منزله فرمضان!!
رانيا شدت ضحكتها وهي محرجه عرفاته زبطها انها رت الصورة اللي فتليفونه..
زين سكت شويه بعدين قال بإبتسامه:صح..
رانيا بضحكه:خلاص كان هكي..غدوة هو اخر يوم نجي فيه للكليه قبل اسبوع المناقشه..فنبي نجي ونجيبها معاي..
زين :عمرك درتيها..
رانيا بضحكه:نكذب عليك لو نقولك ايه...
زين:اني من حبي ليها حافظ حتى طريقتها نقدر نعطيهالك لكن..عارف مش حتجيبها صح..وتعبي روحك ع الفاضي..
رانيا بتحدي:لا حنجيبها ونجيبها..
طلعت من الدار ..
دارت طله ع البنات بعدين مشت وقفت فم باب دار النوم تسمع..
الوضع تمام..
مشت للكوجينه وقالت:استاذ..
زين بإبتسامه:معاك..
خشت للكوجينه..
فتحت المايك..
وحطت التليفون وهي متكياته ع الدولاب وقالت...
رانيا بضحكه:اهو فتحت المايك هي ياسيد زين عطيني الطريقه وتوتشوف شن يطلع مني..
زين :تس ..ماتقديرهاش..
رانيا بتحدي:نقدرها ونقدرها..هي قولي..
ابتسم وقال :هدا كله بش ماتقعدش فخاطري؟
ابتسمت رانيا وقالت:ايه..
ضحك وقال:مشكورة..
صكري توا وراجي مني رساله..
ابتسمت وقالت:باهي..
صكرت..
بعدين مشت طلعت من الكوجينه لدار النوم..
فتحت الباب...وخشت..
دارت طله ع بنت اختها..
مازال راقده..
رانيا:نجيها فرفورتي..
ضحكت بعدين مشت طلعت..
صكرت الباب وشافت روان وحنين كيف منسجمات مع التلفزيون..
ضحكت..
شويه رن تليفونها بنغمة رساله..
ابتسمت بحماس.
فتحتها..لقت فيها الطريقه كامله..
وكملت طول للكوجينه..
🍁🍁🍁🍁
في وحده من اشهر مطاعم العاصمه..
غاليه:نحس فيه غالي..
دلال:الغالي يرخصلكم..
ابتسموا التلاته..
حميده:بجديات دلال غالي..
دلال:ويكون غالي وين المشكله تي هي مرة كل كم سنه..
ضحكوا..
دلال بضحكه:قولوا شن تبوا تطلبوا..
قعدت كل وحده فيهم تقول ع حاجه فخاطرها بعد قرتلهم دلال القائمه متاع المطعم..
غاليه وهي تشوف لحميده كيف تكسر فراس دلال بالأسئله عن كل نوع وشن فيه ودلال تجاوب وهي تضحك..
ضحكت..
بعدين وزعت نظرها ع المكان..
قعدت تشوف للناس اللي فيه..
تشوف فديكوره..والنادلين اللي يخدموا فيه ولبسهم وهيئتهم..
كله كان مرتب وحلو..
فعز انسجامها مع جولتها الإستكشافيه..
عينها تجي ع شي..
صدمها بقوة..
من بعيد شوي..
نجمي..
مقعمز مع وحده ع طاوله من طاولات المطعم..
اللي مقعمزة معاه كانت صغيره فعمر حدهم تقريبا..
مدايرة كبه كبيره ع راسها مغطيتها بالوشاح ونص شعرها برا..
اللبسه اللي لابستها تبان ضيقه..
هدا غير المكياج وزمالطو...
شبحتها ..
كيف قامت يدها وحطتها ع يده وقعدت تمشي عليها..
وهو يبان مبتسم..
تلقائيا ملامح الإزدراء ارتسمت ع وجهها..
ومن داخلها كان قلبها يوجع فيها من اللي راته..
مش فاهمه شي..
يعني توا هدا منظر واحد مجبر؟!..
غيرت عيونها عنه..
وحاولت تلهى مع اللي معاها..
خشت معاهم ف الهدرزة ولو ببضع كلمات تقولهم..
كانت مضايقه ع الآخر ..وتتمنى لو تقدر تطلع من للمكان اللي هما فيه..
نجم:رواسي..شن قلت ع الحجاب والمكياج..
رواسي:بيبي معاك انت..
نجم:معاي اني؟؟سته وستين واحد يشوف فيك بالهيئة هادي معاي..
رواسي:وراسي نوجي ماتعقدهاش..خلينا جونا حلو بيبي بليز..
حطت يدها ع يده..
هو شبح ليده وسحبها ببطئ وهو يقول:هادي اخر مرة رواسي تطلعي معاي بالمنظر هدا..
رواسي قرنت حواجبها وهي تحرك فخصلاتها بسبابتها قالت بضيق:باهي..وتوا اطلبلي حاجه..
نجم؛شن تبي..
رواسي:امممم..بان كيك بالشوكلاطه..
نجم هز راسه بإيجاب..
بعدين وزع نظره حواليه يدور ع نادل..
شبح واحد..اشرله يجيه..
بعدين حرك عيونه عنه..ويجوا فعيون غاليه..
انصعق...
قعد يشبحلها..
وهي كذلك..
بس نظرة عيونها كانت نظرة استنكار..
غيرتهم عنه وشبحت لحميده ورباب اللي مقعمزين قبالتها..
هو قعد يشبحلها وخلاص..
من كثر ماكان مركز عليها..
مالاحظش النادل اللي جي وعطاته رواسي طلبها..
ومشي..
هي شبحتله...قرنت حواجبها بإستغراب..
التفتت شبحت وين مايشبح..
شافت البنات..
عقلها قاللها ان نظراته كانت لدلال..لانها تبان اصغر وحده فيهم..
التفتت شبحتله وقالت:وين عيونك..
حرك عيونه جيهتها وقال:فمن تكلمي انتي؟!..
رواسي:انت..
رفع حواجبه وقال:تعاوديها مرة تانيه وتكلميني بأسلوب زي هدا ماتلومي الا نفسك..
سكتت رواسي وهي مضايقه قريب تنفجر..
وهو يشوفلها بحده..
دلال وفيدها تليفونها تقول:عسسل ياناس عسسل...بالله شوفوا عماري..
لفتلهم التليفون..
خداته حميده وقعدت تشوف:تعرفن بيجي لأمه..
رباب تشوف معاها وقالت:صح فملامحه لمرام..لكن عويناته ملونات..
دلال:ايه..هو حتى فيه من خاله ضو..
شبحتلها حميده وقالت:تعرفيه ضو..
دلال بشي من الإحراج؛اي من الجامعه نشوف فيه..مرة مرة..
رباب:قنين ضو..
غاليه؛ايه اسمح من خوه صابر..هديك المده سمعت من وحده تخدم معاي تعرفهم..قات واخد وحده برا من ايام عدا يحضر الماجستير..
انصدموا التلاته..
حميده بصدمه:اول مرة تقوليها..
غاليه:سمعت بيها نهار صار حادث روان نسيت القصة بالمرة بعد صار اللي صار..
رباب:زعمه هدا علاش مايبيش يتزوج..
غاليه:مظنه..
دلال:كيف يدرق حاجه زي هادي لو انكشفت حديرله مشاكل..وبعدين اللي سمعتي منها المعلومه هادي منين عرفت ..
غاليه:قاتلي ولد عمي كان معاه فبريطانيا هديكا الفترة..
حميده:عليك نكبه..
رباب بضحكه:تو يصيرلهم زي المسلسلات اطب ع حوش ماليه يوم من الايام وفيدها عيل عمره سبع سنين..وتقوللهم انا ميرات دو..وهزا ابنو مايكل..
غاليه وحميده:ههههههههههه..
دلال وهي تضحك بتفنيصه:درتوا العار..
رباب بضحكه:نتخايل فردة فعل عمي عبودة..اللاااااه اكبررررر..
غاليه وحميده كتموا ضحكهم ودموعهم تنزل..
دلال بضحكه:فرخه رباب صكري فمك..
ورباب تضحك وخلاص..
نجم كان يشوفلهم..
وعيونه ع غاليه تحديدا..
وحاس روحه منقهر ع الآخر...
التفتت رواسي وشبحت وين مايشبح..
فهاللحظه..
عيون دلال جو ع نجمي بنظرة عابرة..
رواسي بإنفعال:تعالي غمسي..
نجمي انصدم..
دلال شبحت لرواسي وقالت؛عليا الكلام!!..
رواسي:مالا عليا اني..بلاطروح انتيات..
غاليه شبحت لنجمي بإزدراء وقالت لدلال:فوتيها..
حميده:ماتعبريهاش..
رباب وهي تشوف لرواسي بإزدراء:عليك منظر..
نجمي بغضب من تحت سنونه قال:رواسي..
شبحتله وقالت:وحده حقيره..
نجم:رواسي!!..
شويه..
وجتهم دلال..
وقفت ع الطاوله وقالت:خير شن مشكلتك ماما؟..
رواسي:بري اقلبي وجهك..
نجمي:اسف يااختي سامحيني..هي فاهمه غلط..
دلال شبحتله بحده وقالت:غير جيت نخاف ربي كان هدا بعتلها من يأدبها..
شبحت لرواسي شبحة خوفتها..
بعدين مشت ولت للطاوله..
غاليه:ليش درتي هكي بس..
دلال:ماتبي الا هكي حقيرة زي هادي..خلت الناس تتفرج علينا..
شبحولهم..
لقوهم ناضوا..
خدت رواسي شنطتها بعصبيه..
ونجمي وراها..
فاتوا من حداهم..
رواسي اشرت ع غاليه وقالت:ربي بنتك..
انصدموا في كلمتها..
اللي خشت فودن غاليه زي السيف..
وصمتت نجمي..
دلال التفتت ووجهت كلامها لنجمي:ربي بنتك ياخوي ...
وقف..
والتفت شبحلهم..
دلال التفتت القدام..
اما غاليه فكانت تشوفله وهي ملتفته نص التفاته..
شبحلها شويه..
بعدين لف ومشي..
غاليه شبحت القدام بعدين تنهدت بضيق وقالت:بالله خلينا انصبوا نطلعوا..درهت كبدي..
شبحولها التلاته بضيق ..
بعدين قالت دلال:حاضر..
شويه..
وناضوا..
ومشوا
بيطلعوا..وهما مضايقات..
والناس الموجوده في المطعم تهمس عليهم..
🍁مجبر...
افف..من الإجبار..اجبار الظروف..اجبار نظرة الناس..
واجبار نتيجة غلطة ارتكبناها فلحظة غضب..
هدا اللي قاعد يعيشه عماد حاليا وهو مقعمز فجنان حوش اهل لمياء مع خطيبته سناء..
يحاول يتفاهم معاها بهدوء ويعتذر منها..
يشوف فيها مظلومه معاه..يشوف فيها ضحيه لغضبه..
ومادام غلط وعرف ان اللي داره غلط ومش أي غلط..فهو مجبر انه يتحمل نتيجته..
وزي مايقولوا..
🍃الفاس طاحت فالراس🍃
بس في ناس ترفض تعيشه بعد ماانحطت تحته..
بعصبيه يقول:تي والله العظيم لو تطبق السمي ع الوطا ماعاد مازال تنحسب عليا فرخة زي هادي قليلة ربايه..تي ربايه ماخطمتش من تالاها بكل..
امه:تو مش انت اللي اخترتها!؟
نجمي:اخترتها بش نرضيكم انتم..
اخته:ترضينا حني؟!!..
نجمي هز راسه بإيجاب وهو منفعل وقال:ايه ايه ايه...ديما وين تجو تفتحوا معاي موضوع الزواج..اللي تجيبولي فيهم فرخات..تي حتى مرة عمتي دلتكم ع وحده مواليد 90قلتوا لاااا كبيرة عليه..رغم الفرق اللي بيني وبينها 4سنوات..
اخته: حتى 94كويسه وتناسبك هكي كنا نبولك..لكن انت مشيت نقزت لوحده مواليد 98يانجمي!!..
نجم ابتسم بسخريه وقال وهو يأشر ع امه واخته:ايه وفرحتوا بيها طرتوا من الفرحه..روحتوا تشكروا وتحطوا فجمالها وفحالة عيلتها الماديه المرتاحه...وامي مافي ع لسانها كان رواسي ورواسي..واهي رواسي اللي حتى توا لما كلمتيها بش ترضيها عطاتك ع راسك وصكرت فوجهك..
امه بحده:ركز ع اسلوبك يانجم!!..
ملامح اللامبالاة ارتسمت ع وجهه وهو يقول:اني خلاص معاش بنركز الا ع نفسي توا واني شن نبي وشن يريحني وبس..واللي عجبه باهي واللي ماعجباش لاجعنه عجبه..
ولف ومشي لداره بغضب..
ولما وصل فيها خش صكر بقوة..
امه:هدا شكله عنده وحده..
اخته:يام كان عنده علاش ماقالش من الأول!!..
شبحت امه جهة داره وقالت بضيق:مانعرفش...مانيش عارفه..
🍁🍁🍁🍁
الساعه 9:00ليلا..
هدرزوا شويه برواحهم..
حميده بضحكه:شكلها عجباتك واجد..
زينب:فوق ماتتصوري ياحميده فالحه وناشطه ورزينه واسلوبها راقي..وقنينه قنينه..
رانيا بضحكه:المهم تعجب هداكا المعقد..
زينب ضحكت وقالت:عجباته عجباته..ولدي ونعرفه..
شبحوا حميده ورانيا لبعض وضحكوا..
في الكوجينه..
قصدك هو نفسه..
غاليه هزت راسها بإيجاب وهي تمسح فدموعها..
رباب قعدت تشوفلها وهي مصدومه وموجوعه عليها فنفس الوقت..
غاليه بضيق:اني اللي حطيت روحي فهالموقف اني..اني قللت عقلي ووصلت روحي لهنى..
حطت رباب يدها ع ذراع خالتها وقعدت تمسح عليه ومش عارفه شن تقوللها ولا كيف تخفف عنها..
"رباااب بنتك ناضت"..
رباب بصوت عالي:شديها شويه يارانيا..
غاليه:عدي شوفي بنتك عدي..
رباب بحزن:خويله..
ابتسمت غاليه وحطت يدها ع يد رباب:عدي شوفي بنتك ربوبه مافيا شي..عدي..
والتفت للرخامه وقعدت تقرض في المعدنوس..
تنهدت رباب بضيق بعدين مشت طلعت من الكوجينه..
وغاليه تقرض...
ودموعها ينزلوا وهي تقرض وحاسه قلبها قاعد يتقطع لأجزاء صغيره زي اللي قاعده تفرم فيه توا..
ومع هدا مازال مش فاهمه..
هل هي زعلانه ع نفسها ..
ولامجروحه فحبها..
مش عارفه اصلا اذا كانت حبت نجم من الاساس..
مش فاهمه نفسها نهائي ..
كل اللي تعرفه توا انها حزينه ومضايقه ع الآخر..هدا بس اللي تعرفه..💔
🍁🍁🍁🍁
تاني يوم..
مع 11الصبح..
جو عمر هو ولمياء لحوش زينب..
فطروا.
وبعدين تسقدوا هما وحميده وغاليه مروحين للبلاد..
اما رباب فكان مؤنس ناوي يروح بيها بعد الغدي...
بسبب رانيا اللي كان هداكا اليوم اخر يوم تمشي فيه للكليه قبل يوم المناقشه..
يراجوها لين تروح بش تقعد مع امها واختها وتروح رباب..
🍁يومها رانيا كانت ماشيه بش تعطي لزين الكيكه اللي دارتهاله..اللي اول ماشافها في الحافظه ضحك..
رانيا بضحكه:مش مهم الشكل ذوقها بعدين احكم..
رفع عيونه فيها بعدين ابتسم وقال:شكرا..
رانيا بإبتسامه:الشكر ليك انت ع كل شي درته معاي لتوا...
ابتسم وهز راسه بإيجاب ..
رانيا :توا بنروح خلاص..نتلاقوا يوم المناقشه..
زين:بإذن الله..
ابتسمت رانيا وقالت :السلام عليكم..
رد عليها وهو يشوفلها كيف ماشيه وطالعه من المكتب:وعليكم السلام..
نزل عيونه للحافظه المحطوطه ع الطاوله..
عيونه دمعوا لكن فيسع مسح الدموع.
ابتسم وخدي الحافظه فتحها وبدي ياكل...
بكل حب 💕
🍃🍃🍃🍃
وتمر الأيام...
والكل عايش حالته...ماطرأ عليه شي جديد يغيرها كل شي زي ماهو..
🌟🌟🌟🌟🌟
النصيب..
الليله موضوع حلقتنا عن النصيب..
هكي خاطري نسمع قصص عن النصيب واقعيه منكم انتم مستمعينا..وع فكرة مش شرط تكون نهايتها ورديه عرس وحفله وزغاريط..نبي قصص بنهايات متنوعه..
المهم يكون عنوانها النصيب...
علي صوت اغنية جورج وسوف..
ارضى بالنصيب ارتاح للحبيب ارضى..
شاركه الغناء من العاصمه الماليزيه..
كوالامبور..
هانيبال...
اللي كان حاضن مرام وهما الزوز يسمعوا في البرنامج..
ومرام تسمع فالأغنيه من هانيبال مش من جورج
هانيبال..
ارتاح للحبيب..
حرك عيونه لمرام وشد عليها وهو يغني ويشدد ع الكلمات..
ليه..بتخبي..حببببك..هو الحب عييييب..
مرام:هههههههههه..💕
🍁انا قدرك ونصيبك..
ونصيبك حيصيبك...
المقطع هدا..
كان بصوت حلو فيه البحه...
يغني فيه وهو يسمع فبرنامج خوه..
يغني مش طارب ولافرحان..
لا..
مجروح ومهموم..
مهموم..
فعلا اللي هو عايشه..هم بكل معنى الكلمه..
🌴🌴🌴🌴
سمعت جورج وسوف شن قال..ليه بتخبي حبك هو الحب العيب..
شد ضحكته وقال :بلا قطاف فارغ هيا وقوليلي..احمم..شن رايك فدار النوم..
بلقيس بإبتسامه خجل:سمحه..
محمد:باهي..
بلقيس ضحكت..
محمد بضحكه وجهه احمر:هي عدي اقلبي وجهك..
بلقيس:راهو العرس يبدا بعد عشره ايام باهي..فاسبوع العرس ماتحلمش اني نكلمك بكل..
محمد :جت منك ياجامع..
بلقيس فنصت وقالت:باهي يامحمد باااااهي..
وصكرت فوجهه..
قعد يضحك عليها..
بعدين نزل التليفون من ع وذنه وكتبلها رساله..
(هو كله اسبوع..بعد هالاسبوع بنقعد نسمع فيك عمروانتي تقطفي مش سادك)..
بعتها..
وقعد يراجي فالرد..
شويه وجاه..
(والله لما ننفخلك راسك لين نفجره وتو تشوف..)..
محمد؛هههههههههه..
"محمد..يااامحمد"..
محمد:جااااي جاااي..
وناض طلع من المربوعه..
وخش للحوش بش ياخد سفرة عشاه...
🍃🍃🍃🍃🍃
مازال ع العرس عشره ايام...
وقبل العرس..
بيديروا لمة إباء بنت رباب ومؤنس اللي تولت كل مصاريفها كفايه..
ماكانتش لمه عاديه..
لمه كبيرة ناويين يديروها...
خدوا ع خاطرها الشقة التحتانيه ودارو فيها كلها كراسي وطاولات...
عرب سرت بيجوا كلهم..
حتى اقاربهم خوات كامله وخوات وخوت مختار..
ومن القبيله اللي ينتمولها المرحوم رمضان وخوه عبدالله عزموا ناس..
حتى مبروكه بتجي هي وبنتها نجيه وحفيدتها مريم..
🍁🍁🍁🍁
قبل يومين..
احفاد المختار..
كانوا موجودين في البلاد..
بس كلهم فحوشهم..
ماعدا اصيل..
اللي كان فحوش خوه مؤنس..
واقفين فسقيفه هو وخوه ومرت خوه..
اصيل بإبتسامه فرح؛هي قالت تفكر؟..
مؤنس:حتى بعد سمعت من بنت عمتها مش مصدق!؟..
رباب بضحكه:ايه قالت نبي نفكر..
ضحك اصيل تدريجيا وهو مش مصدق..
ورباب ومؤنس يشبحوله ويضحكوا..
لوطا..
بنحطك في الصاله تختاري اللي تبيه ونعدوا اني والراجل نديروا مشوارنا بعدين نولولك..
رزان:مش تعطلوا!
توفيق:تس مش اكثر من ربع ساعه..
هزت رزان راسها بإيجاب..
سعيده طلعت من الكوجينه وهي تقول:باهي امتى سيارتك بيصير منها؟..
توفيق:لالا خلاص..بنصلحها وبنعبيها وناخد غيرها..
سعيده:هكي احسن..
رن تليفون توفيق..
فتح الخط ورد طول:ايوه.........تمام.....هي تو طالعين.......
باهي..صكر توفيق وقال لاخته..هيا..
مشي وهي مشت وراه متوجهين للباب الخلفي..
وسعيده معاهم بعيونها بعدين شبحت لرزان لقتها طارحه وطالعه تهبل..
ابتسمت وقالت:ربي يقدم اللي فيه الخير..
🍁فنفس الوقت..
كان عماد كيف خاش للقطعه..
بعد درس سيارته..
نزل وهو يشوف لسيارة عاليه لونها زيتي..
استغرب فيها..
قعد يمشي ويشوفلها..
بعدين مط شواربه لاسفل..
وكمل طريقه للمستراح..
فجأة وقف فمكانه..
لما شاف اكثر بني آدم مستفز بالنسبه ليه..
جاي من بعيد وهو يمشي بثقه وكبر..
وهو لابس..
بالطوا طوله لعند نص الفخد لونه اسود..
ع سوريه كريميه وسروال جنيز ازرق غامق..
ولابس نظارات سود..
ومبتسم ابتسامه جانبيه رفعتله ضغطه..
وزاد ضغطه ارتفع لما سمعه يقول..
"ولد العمه...شن جو"..
ابتسم بالسيف ومد يده ..
صافحه اصيل وهو شاد ع يده وقال: شن الامور..
عماد:تمام..امتى جيت..
اصيل طلق يده وفاته وهو يقول:توا توا...
شبح ايساره وابتسم..
ابتسامه خلت قلب عماد ينقبض..
قدم خطوه وشبح وين مايشبح..
عيونه توسعوا..
لما شافهم هي وخوها جايين مع بعض..
توفيق اشر من بعيد لاصيل يحي فيه..
ردها اصيل وعيونه من ورا النظارة ع رزان..
رزان اللي عيونها جت عليهم الزوز..
وعيونها وقتها معاش شافوا شي..
غير اللي كان واقف..
لابس كبوط جلد قهوي..
ع تيشرت اسود..
وسروال جينز اسود..
وطاقيه صوف لونها اسود مغطي بيها راسه..
وعيونه مغطيات بالنظارات العسليه...
ركزت حتى ع بوته القهوي اللي لابسه اللي كان محشي فيه السروال بطريقه عبثيه وخيوطه مربوطات بإحكام..
لكن فيسع مارجعت لوعيها..
شبحت القدام بنظره حاده ممزوجه بالغرور..
وقعدت تمشي ورا خوها..
وهو بعيونه معاها..
فجأه وبدون سابق اندار..
جي قدام عيونه صاحب الابتسامه المستفزة..
بس ماكانش مبتسم..
حاجبه كان مرفوع والباين من ملامح وجهه غير عيونه المغطيات بالنظارات.. الغضب..
قعد يشبحله وهو شبه ضايع..
مش مستوعب..
هدا كأنه غار ع حبيبتي مني!!؟..
قعد معاه بعيونه وهو يشوفله كيف لف بيمشي لسيارته..
عيونه غيروا وجهتهم ليها هي..
اللي كانت مقعمزة فسيارته من الخلف..
راكبه فسيارته!!!...
زادو توسعوا عيونه وهو يشوفلها..
وشويه شويه بدي مرش السيارة المظلم يعلى..
واخفاها عن انظاره بالمرة..
وتحركت السياره طول..
وهو مازال واقف يشوفلها وهو فحالة صدمه..
حريق..
ألم..
عصرة قلب..
غضب..
غيره..
نار...نار...
وصدق من قال..
لاتلعب بالنار تحرق صابيعك..
وحني نقولوا..
يلعب بالنار حرق روحه..
تحمل...
🍁من قوة غضبه..وناره..
ماحسش بروحه وهو يضغط بقبضة يده ع مفتاح سيارته بقوة..ماحسش بالجرح اللي فتحه في راحة يده لدرجة انه قعد ينزف..
لأنه الجرح اللي انفتح فقلبه كان ألمه اقوى واقسى وامر...
...يتبع...
