#العشق_المتمرد
#جمان_فريد
#الجزء_14
لحسن الحظ..
الناس اللي جايه اطير في السو روحت بكري...
وماحضروش اللي بيصير توا...
🍁مقعمزات في الصاله يهدرزوا....
خشت رباب تجري وتبكي بالصوت طول مشت لأمها اللي كانت مخلوعه...
وخالاتها وجداتها وعمتها حتى هما انخلعوا معاها..
زينب وهي حاضنتها: خيرك ياماما خيرك..
رباب بالعبرة : خالي..ميلاد..ضربني..
فنصت زينب..
والكل انصدموا..
في هاللحظه خش ميلاد ووراه سعيده ولطيفه..
ميلاد : ايه ضربتها بنت قليله ادب يازينب ..معقول تسب مراة اكبر منها وتدفل عليها!!!
زينب شبحت لسعيده اللي تسحسح فدميعاتها...
لطيفه: حتى اني حاضرة الموقف ..سامحيني زينب بنتك صدمتني بتصرفها ..
نجيه : قليلة ادب رباب ونقول فيها من قبل ماحد سمعني..
خواتها نزل عليهم سهم الله معاش عرفوا شن يقولوا..
واصلا زي ماقلت قبل ...مايعرفوش يدافعوا عن انفسهم او عن بعضهم..
امها كانت تشوف لزينب..
مبروكه :جاك كلامي يافاطمه..
ميلاد:قلة ربايه هدي يازينب راهي....
وسعيده تشوفلها ودايره روحها بتموت بالبكي...
زينب وصلت حدها عندها بس تصرفها هالمرة كان غير متوقع من هي....
شبحت لأمها ولاحظت الخوف باين في وجهها..
ناضت وشدت رباب وبدت تضرب فيها زي المجنونه وتعيط: هااااا..وهااااااا..هاااااااا..هااااااااا
كفوف ..ع عزق ع الظهر ع كالشوات..تضرب في بنتها وتبكي..
ناضوا خواتها..
نعيمه وكفايه شحوها..
وغاليه خدت رباب قامتها وخشت بيها الدار القبليه لحقتها حميده برانيا ودلال اللي انخلعوا من اللي صار وقعدوا يعيطوا..
خواتها دخلوها الدار التانيه وهي تبكي بالعبرة...
وعزوتها وحماتها مصدومات..
وامها دموعها نزلوا...
ميلاد بإزدراء: هدي هبلت رسمي...شبح لمرته هي تعالي...
مشت سعيده وفيدها ولدها وهي حاسه بالنصر ...
ولطيفه لحقتهم"شيطانه سعيده ديما المواقف تجي لصالحها "..
🍁🍁🍁🍁
نعيمه وهي حاضنه زينب: خلاص وراس وخيتي خلاص..
كفايه تمسح ع ظهرها: زنوبه خلاص حبيبتي..
وزينب تبكي بعبرتها وخلاص..
....
لحسن الحظ كذلك ان خيري ماكانش موجود كان هدا كبرت المشكله اكثر واكثر...
لكن طبعا هناك من حيوصلها توا ولا بعدين😏...
فاطمه سكوتها ماكانش من ضعف..بل من خوف...
لاهي عارفه ترضي بناتها ولا ولادها اللي من لما تزوجوا بدت المشاكل...
🍁فاتت باقي الليله نكد...
زينب حطت ع عيونها محرمه ورقدت...
والبنات غاليه غيرتلهم جوهم..
برغم ان رباب مازالت مسكينه متأثرة من اللي صار...
مش بس هي...
برا..
ولاد الخاله يلعبوا مع بعض ويهدرزوا...
ورمزي يبي يمشيلهم لكن متحشم من حمزة...
شافه محمد: رمممزيييي..
شبحله..
محمد: تعال..
مشالهم وهو متحشم شويه من اللي صار...وقعمز حداهم...
حمزة: تعال العب ...
ابتسم رمزي ولعب معاهم .."بطش"
🍁🍁🍁🍁
الساعه9:30ليلا...
في الكوجينه..
عروبه بفرح: استاحشته واجد..
امانه بضحكه:قال بنقعد اسبوع...
عودة بضحكه: استاحشت هديل ونعمان..
عروبه : قالك الخميس هدى..
امانه: ايه الخميس هدى..
عودة : اسمعي يمي ماتقولي لحد من عمامي خلينا معاهم برواحنا نهارين...
عروبه: ايه يمي بالدات عمي صبري..
امانه شبحتلها ع جنب وضحكت...
🍁🍁🍁
الكلبه قليلة الربايه...
سعيده :تشحن فصغارها ريتيها.
حدهم :ايه كلام كبار البنت تنقل فيه..
امال :الحقيرات هدينا..
سعيده ابتسمت بمكر: لكن جت ع روسهن بالذات العقرب الكبيرة..
حدهم: زيدها منه..
🍁🍁🍁🍁🍁
الساعه 10:30ليلا..
روحوا الولاد...
وروح قبلهم حميد وخيري اللي كانوا ماشيين لواحد يعرفوه عندهم معاه مصلحه...
في الكوجينه..
تس..تس...تس..
نعيمه : من بكري لتوا راقده..
هانيبال: اففف..مشكله انتن النسوان ومشاكلكن..
نعيمه تنهدت...
كفايه : خيري من بكري ينشد عليها قوله شفتها حالها باهي وراقدة .
هانيبال: باهي هاتي الميه..
عطاته كفايه صفرة الميه...
طلع بيها برا الحوش...
🍁🍁🍁
نجيه وامها في الدار يتوشوشوا..
نجيه : غدوة من الصبح مروحين..
مبروكه: ايه قلت لمفتاح..قال باهي..
نجيه : ياريتني ماجيت..
🍁🍁🍁🍁🍁🍁
عودة...
عودة ضحكت والتفتت : هممممم..
عروبه ضحكت: ياباردة..تنهدت..زعم حتى غدوة يغيب..
عودة:حتى كان غاب تو تشوفيه زي ماشفتيه اليوم..
عروبه ضحكت بخجل وجبدت الشرشاف المتغطيه بيه لفمها وعضاته وهي تضحك بخجل وتذكر في اللي صار..
عودة بضحكه: بنرقد تنوضيني مرة اخرا نقتلك.. وعطتها بظهرها..
عروبه حولت الشرشاف من فمها وقعدت تفكر في حبيبها المتكبر...
🍁🍁🍁
كيف ماقتلك مادام فقلبك شي ماتحبساش..
هانيبال تنهد:بس الحاجات هدينا يذهبن الشيرة ياعمار..
عمار : تعريف الحب هو ذهاب الشيرة ..
هانيبال ضحك: ماتبيش تجربه..
عمار بضحكه: كندرة ولادبش هو !؟ مايعطيكش فرصة بش تجرب..طول تلقى روحك غارق..
هانيبال: صدق اللى قالي مرة الشاعر يتفنن في وصف مشاعر عمره ماحس بيهن..
ضحك عمار...
*****
زينب واعرة وعصابها يركبن فيسع..
لطيفه:ولسانها حار..
حميد: المهم انتي مادخلك بشي.
لطيفه :لالالا مالي ومال..اسمع لازم نروحوا غدوة ..
حميد :بعد غدوة العشيه وبتروح معانا نعيمه..
لطيفه برفعة حاجب: علاش راجلها وينه؟؟
حميد: عنده مهمه مايقدرش يخليها..
مطت شواربها بنرفزة..وعطاته بظهرها: تصبح ع خير..
حميد حط ذراعه ع عيونه : قدامك الخير....
🍃🍃🍃
وفاتت ليلة هداكا اليوم ..🌌
وطلع صبحها...🌄
مع الساعه 10..
بيتسقدوا مختار وولاده...ومفتاح وامه واخته..
عمار: هانيبال ..ترا جيبلي دلال شويه..
ضحك هانيبال ومشي للحوش..
...
مختار : عينك من روحك ياحاج ساعد روحك ومعاش تيبس راسك..
رمضان ضحك: ياودي باهي باهي..
....
طلع هانيبال بدلال فغمره..
عمار ابتسم: هي تعالي...جاته طول ..قامها وشبحلها: قولي لامك ديما تضفرلك شعرك باهي؟
دلال هزت راسها بإيجاب وهي مبتسمه:باهي..
ابتسم ونزلها وشدها من يدها..وبيده التانيه يطلع فحاجه من جيبه.
هانيبال:ماتصمتهاش ياراجل..
عمار : اسكت شوي ..
طلع باكوا صغير فتحه وطلع منه خاتم ذهب...
هانيبال بصدمه؛عمار!..
ماعبراش...
خدي يد دلال ولبسهولها وهي تشبح للخاتم بفرح طفولي..
بعد كمل باس يدها وشبحلها : هدي من خالو عمار..
وقف ..وهي قالت: شكلا..
ضحكوا الزوز..
ومشت تجري خشت للحوش بش بتوريه لأمها..
هانيبال : البنت هدى تاخد القلب.
ابتسم عمار :صدقت ربي يحميها ويبارك فيها..
هانيبال بإبتسامه :آمين...
ومشوا مع بعضهم جهة السيارة..
داخل..
نعيمه وهي تشوف ليد بنتها: نهاري...
كفايه بضحكه:اااه ياريتني جبت بنيه راهي طيحت سوق بنتك وحصلنا من وراها هدايا..
ضحكت غاليه: خزززي...
نعيمه :هاتيه ماما خليه يقعد عندي..
دلال: ثويه بث.
نعيمه : باهي اقعدي بيه حداي..جبدتها وقعمزتها..
كفايه :نور تعيط..
نعيمه :افففف...ناضت ..بالله عيونكم عليها..
غاليه :باهي..
كفايه : افتكينا من زومة عمتك وفرختها..
غاليه :كانوا زي الهم ع قلبي...
داخل..
خشت نعيمه ع اختها..لقتها حاضنه رباب بيد..
وتوكل فرانيا بالتانيه..
ووجهها منفخ من النوم والبكي..
شافت لحميدة اللي لاهيه تتفرج ع التلفزيون..
وخدت بنتها وبدت ترضع فيها....
🍁🍁🍁🍁🍁
في المدرسه...
كانت واقفه تهدرز مع صاحباتها..
لعند ماسمعت صوت ينادي فيها..
"عروبه"..
التفت وصاحباتها معاها..
امال: ممكن شوي ..
شبحولها بإستغراب..
عروبه : باهي...ومشتلها....
سالمه :شن تبي هدي..
غزاله: حاجه ليها علاقه بهانيبال..
....
امال : شن جو القرايه..
عروبه من فوق نفسها:كويسه...
امال: بصراحه بنسألك..في بينك وبين ولد عمي شي..
شبحتلها برفعة حاجب:شي زي شنو؟
امال: مانعلم عليكم..المدرسه بدت تحكي عن هانيبال وعروبه واني نبي نتأكد كانه بس كلام..ولاحق..
عروبه بتهكم: وليش ماسألتيه وهو ولد عمك..
امال ابتسمت ؛ نتحشموا حني مانقدروش نتكلموا فحاجات كيف هدين..
عروبه فهمت تلقحيها : مافي شي بيني وبينه اللي سمعتيه مجرد قطاف تريحي..
ابتسمت بتهكم؛ كويس..اساسا وفي النهايه اني متسميه عليه يعني مهما عرف بعدي مرجوعه ليا
عروبه تغلي غلي من داخلها لكن اظاهرت بالعكس ابتسمت وقالت:عندك حاجه اخرى بتسألي عنها..
امال برفعة حاجب : لااا..صحيتي ولفت ومشت بغرور كداب..
وعروبه اضاااايقت من كلامها....وولت لصاحباتها وهي فقمة الغضب🔥💓
******
الساعه 12:30 قبل الظهر..
طلع من الدار القبليه ..
بعد ماالقى اخر نظرة ع نفسه في المرايه متاعها اللي لاصقه في الحيط..
توجه للكوجينه لقي خواته فيها..
وزينب كانت واقفة ووجهها متجهم ادير لبنتها فنص بش تاكله..
صب طاسه اميه وقعد يشرب..
حميده : طالع..
حول الطاسه : امممم..
حطها ع الدولاب..
وقدم لزينب...
هانيبال:زييينب...زنوووبه...زنوبياااا..
هي قاعدة بنفس الملامح..
وصل فيها..ولف ذراعه ع راسها..
زينب بضحكه :ايييي..حول..والله ماعندي ليك جو..
هانيبال زاد شد عليها..
زينب. :ااااه..قتلتني..حووول...
هانيبال : وعد كان طلقتك تضحكي..
زينب : خليني فهمي ترا..
زاد شد عليها..
زينب : ااااههههههه...خلاهههص..باهيي..
خشوا كفايه ونعيمه ع ضحكهم..
طلق هانيبال اخته وهويشبحلها ..
ضحكت وهي شادة راسها وتتألم..
هانيبال ::ايوواه خليك هكي...مايهمك حد ولادوري حد يا زعيييمه..
شبحتله وضحكت...وخواتها ضحكوا..
حط ايديه ع راسها وقعد يشفشفلها فشعرها وهي تضحك وخواتها يضحكوا ...
طلقها وشعرها تقول متعارك فيه دجاج😂..
هانيبال:هي اني ماشي ماتبوا شي..
كفايه برفعة حواجب؛ وين وين ع الاناقة والستايل والروايح اللي تهفهف..
وجهه ولا احمر: عدي ...ومشي طلع من حداهم..
وهما يضحكوا...
🍁🍁🍁🍁
الساعه1ظهرا..
طلعوا من المدرسه...
سالمه بضحكه: يراجي من بكري شكله..
عروبه كانت مضايقه بس لما شافاته مقدرتش تخفي فرحتها..
هو كان يشوفلها ومبتسم بحب وشيء من الكبر..
عمر وسليمان طالعين من المدرسه شافوه ضحكوا...
وكملوا طريقهم..
هانيبال"عمار قال مادسش فقلبك":احممم...
قدملهم...
غزاله : جاي هنى...
قعد يمشي وهي تشوفله وقلبها يدق بعنف شديد💓💓💓
وقف حداهم بس بعيد شويه..
هي توزع فنظرها حواليها وماتشبحش جيهته...
عودة كانت تشبحله ..
هو اشر لعودة تكلم اختها..
عودة ابتسمت وهي تشوفله ونخصت عروبه..
عروبه شافتلها وجهها احمر: خيرك💓..
عودة اشرتلها عليه..
هي شبحتله بعيون نظرتهم ممزوجه بين الحب والخوف والغضب...
هانيبال:نبيك فكلمه..
عروبه شبحت لصاحباتها..
عودة غمزت لسالمه وغزاله....
انسحبوا التلاته..
هي تلخبطتت ع الأخر...
هو ابتسم وقربلها.
وهي بدون ماتشبحله كانت حاسه بقربه... وقلبها بيفر 💓...
حطت ايديها فجيوب الماليه اللي لابستها ع بدلتها..
شمت ريحة عطره قريبه ..هني هيا صقعت مع بعضها...
وبدت ترجف لما سمعاته قال..
" طالعه عليك المحرمه💓"..
قعدت بالشويه تحرك فراسها بش تشوفله ..وين جو عيونها عليه..هدا وين ركزت ع فرق الطول...
هي واصله فنص ذراعه...
هو كان يشبح القدام وايديه فجيوبه...
اساسا هو احرف منها .. سخن...ومع هدا يرجف من داخل..
وحاس دماغه شبه واقف..مش عارف شن بيقوللها ولاكيف يتكلم 💓💓💓💓...
شويه..
شبحلها....
وهي تشبحله...
قعد يشوفلها بنظرته المتكبرة..اللي كان يبان فيها هلبه حاجات حلوة💖..
وهي تشوفله بنظره عين كلها حب واعجاب مخلطه بدموع
دموع قوة الشعور اللي تحس بيه وهي جنبه..
هانيبال : عيونك حلوات واجد💖..
هي قريب داخت من كلمته💞...
هانيبال: مانعرفش نقول كلام سمح..لكن ...انتي...درت حاجه هنى..اشر ع قلبه بصوابعه السبابه والإبهام والوسطى اللي كان ضامهم لبعض..
عروبه لسانها انعقد تشبحله وتسمع...
وحاسه ان في هالدنيا كلها مافيش غيرهم...
في عز هاللحظه الحلوة...
اللي كانت طاقة المشاعر فيها عاليه..
جت عودة تجري...جبدت عروبه ومشوا.
وعروبه تمشي وتتلفت وتشبحله💓..
هو ابتسم...💓
سمع صوت السيارة متاع عمها...
فاتت من جنبه وقربتلهم...
مشولها وركبوا..
وعروبه كانت تشبح جيهته لين ركبت..
تنهدت بكتمان..ومازالت ترجف..وترجف...وقلبها💓...
اما هو كمل طريقه ماشي وهومبتسم..
كان يحس فروحه بكل معنى الكلمه طاير ..طاير بمشاعره..
نعاود ونقول مافيش احلا من مشاعر هديكا المرحله💖..
🍁🍁🍁🍁
راقدة ع رجل امها..
فاطمه: ياما شفت وياما عانيت يابنتي وياما صار فيا..
تقزنت وامي وسيدي حيين...وعشت من صغري عند عمي حمد وياما ريت وياما شفت لأني بنت مراة مطلقه مابي حد يطق بابي..لعند ربك جابلي بوك..نحساب روحي نرتاح..لقيت شقاي زاد..تعلمت نسكت ..لاني لو تكلمت نخسر واجد..
واهوا الحمد لله كملت عمري وعايشه والحمد لله...
وقتكن غير وقتنا...احمدن ربكن ع اللي انتن فيه..ياريت كنت فربع وحده فيكن...
زينب ودموعها ينزلوا: يمي اللي يسكت ويفوت هو اللي ياكلها يمي...
فاطمه: انتي عليك فراجلك ..راجلك كويس..دامه هكي اللي تضايقه بعدي عليها..وكانك ع نسوان خوتك اسفهيهن ماتعدليش عليهن..اخرتك بتروحي انتي ...حتى دوروا معاك المشاكل اسفهيهن هنى يطلعن بالسيه وانتي بالباهيه..
برغم عدم اقتناعها بكلام امها لكن سكتت وسايرتها..
🍁🍁🍁🍁🍁
مانيش رايدة ..مانيش رايدة مانيش رايدة الا هو مانيش رايده💕💕💕💕💕
عودة: هههههههههههه خلاص انتي هبلتي..
انطرحت ببدلتها العسكريه ع السرير: ايه هبلت فيه ياعودة هبلت فيه..فعيونه اللي يهلبن..فكلامه اللي يهبل..فأسلوبه في الكلام ...صح كيف اللي يهزب..بس يجنن ..يجننن..يجننن...يمي يجننن...غمضت عيونها بشده وهي حاطه ايديها ع قلبها..💓
عودة تبدل وتضحك عليها.
وهي مازال مغمضه عيونها وتتخيل اللي صار...💗
قطع عليها انسجامها..
طقة امها ع باب الدار..
مش طقة امها...لا اللي قالاته امها بعد طقت..
امانه : عروبه...هايل جي يبي يكلمك...
ناضت قعمزت وملامح وجهها تبدلت للخوف..
عودة شبحتلها بإستغراب..
وقفت عروبه ومشت فتحت الباب: شن يبيي..
امانه: شن صاير!!؟
عروبه بربكه : ماصاير شي..
امانه برفعة حاجب:باهي اطلعي بسرعه قال مستعجل بيعدي..
هي تأففت...
ومشت مع امها..
عروبه"غير امتى نفتك من وجهك ..يارب خوده وريحني"..
وصلت برا...
هايل لما شافها ابتسم..
نزل يده من ع الحيط وقدملها..
هايل: شنو حالك يابنت عمي.
عروبه من فوق نفسها:باهيه.
امانه وهي توزع فنظرها عليهم: نجيبلك حاجه تشربها..
هايل بضحكه: ياريت..
خشت مرت عمه اللي كانت مش طايقاته وهي تدعي عليه فخاطرها..
هايل : المحرمه طالعه عليك سمحه..
هي بحده: شن تبي.
هايل بإبتسامه وهو يطلع من جيبه فحاجه جاي بياخد يدها هي بعدتها...
هو ابتسم وهز راسه بإيجاب ومدلها الحديده:تفضلي ياغاليه مايغلا عليك شي..
عروبه برفعة حاجب؛ شن مناسبتها؟
هايل برفعة حواجب.:عيد ميلاك..غريبه ناستيه؟!!
عروبه : ماعنديش وقت نذكر فيه الحاجات هدينا..وتو بنخش..
شدها من يدها بقوة وحط فيها الحديده وهو يشبحلها ومبتسم بطريقه مستفزة..
حول يده وقال:اني طالع...قولي لمرات عمك ..العصير نشربوه فالفرح ...واشر ع روحه..وعليها ...
بعتلها بوسه طايرة ..و فتح الباب وطلع...
وهي تشوف ليدها بخوف...
وتفكر....شن يطلع بيد هايل يديره ...
هل ممكن لو عرف بهانيبال ...
يقتله....؟!!
🍃اجابة هالسؤال حتنعرف يوما ما.....
....يتبع...
