#العشق_المتمرد
#جمان_فريد
#الجزء_58
ﺍﻧﺼﺪﻣﻮﺍ ﺑﻤﻨﻈﺮ ﻋﺒﺪﺍﻟﺴﻼﻡ ..
ﻛﺎﻥ ﺑﺎﻳﻦ ﻋﻠﻴﻪ ﺑﺎﻛﻲ ﻭﻭﺟﻬﻪ ﺍﺣﻤﺮ ..
ﺩﻻﻝ ﺗﺸﺒﺤﻠﻪ ﺑﺨﻮﻑ ..
ﻭﻧﻮﺭ ﻛﺎﻧﺖ ﺧﺎﻳﻔﻪ ﺍﻛﺜﺮ ﻣﻨﻬﺎ ..
ﻗﺪﻣﺘﻠﻪ ﻧﻌﻴﻤﻪ ﻭﻫﻲ ﺗﻘﻮﻝ ﺑﺨﻮﻑ : ﻋﺒﺎﻟﺴﻼﻡ !
ﺧﺒﻂ ﻉ ﺻﺪﺭﻩ ﻭﻫﻮ ﻳﻘﻮﻝ ﺑﺼﻮﺕ ﺑﺎﻛﻲ ﻣﺒﺤﻮﺡ : ﻧﻌﻴﻤﻪ ..
ﻗﺮﺑﺘﻠﻪ ﻭﺣﻄﺖ ﺍﻳﺪﻳﻬﺎ ﻉ ﺫﺭﺍﻋﺎﺗﻪ ﻭﺩﻣﻮﻋﻬﺎ ﻃﺎﺣﻮﺍ ﻭﻋﻴﻮﻧﻬﺎ ﻣﺘﻮﺳﻌﺎﺕ ﺑﺨﻮﻑ ..
ﺣﻀﻨﻬﺎ ﻋﺒﺪﺍﻟﺴﻼﻡ ﺑﻘﻮﺓ ﻭﻫﻮ ﻳﻘﻮﻝ ﺑﺼﻮﺕ ﺑﺎﻛﻲ ﻣﺒﺤﻮﺡ : ﺑﻮﻱ .. ﺑﻮﻱ ...
ﻧﻌﻴﻤﻪ ﺍﻧﺼﺪﻣﺖ ﺑﻘﻮﺓ .. ﻗﻠﺒﻬﺎ ﺍﻧﻘﺴﻢ ..
ﺷﻴﺒﺎﻧﻴﻬﺎ ﺍﻟﻠﻲ ﻛﺎﻥ ﺍﺣﻦ ﻣﻦ ﺑﻮﻫﺎ ﻋﻠﻴﻬﺎ ﻭﺍﻗﺮﺑﻠﻬﺎ ﻣﻨﻪ !!
ﻃﻮﻝ ﺧﻄﻢ ﻗﺪﺍﻣﻬﺎ ﺷﺮﻳﻂ ﺍﻟﺬﻛﺮﻳﺎﺕ ﺍﻟﻠﻲ ﺗﺠﻤﻌﻬﺎ ﺑﻴﻪ ...
ﻟﻤﺎ ﻣﺮﺓ ﻟﻘﺎﻫﺎ ﺗﺒﻜﻲ ﺑﺴﺒﺐ ﺍﺯﻋﺎﺝ ﻋﺰﻭﺯﺗﻬﺎ ﻭﺣﻤﺎﺗﻬﺎ ﻟﻴﻬﺎ ﻭﺗﻠﻘﻴﺤﻬﻢ ﻭﻫﺰﻭﺗﻬﻢ ﺍﻟﻤﺴﺘﻤﺮﺓ
》 ﺣﻤﺪ : ﻣﻌﻠﻴﻜﺶ ﻓﻴﻬﻢ ﻳﺎﺑﻨﺘﻲ .. ﻭﺍﻟﻠﻪ ﻣﺎﻙ ﻣﺮﻭﺣﻪ ﺍﻻ ﻭﺧﺎﻃﺮﻙ ﻣﺠﺒﻮﺭ ..
ﻧﻌﻴﻤﻪ ﺑﺈﺑﺘﺴﺎﻣﻪ : ﺭﺑﻲ ﻳﻄﻮﻝ ﻓﻲ ﻋﻤﺮﻙ ﻳﺎﻋﻤﻲ 《
ﻭﻓﻌﻼ ﻛﻠﻢ ﻣﺮﺗﻪ ﻭﺑﻨﺘﻪ ﺑﺤﺰﻡ ﻭﻗﺘﻬﺎ ﻭﻛﺎﻥ ﺣﺎﺩ ﻣﻌﺎﻫﻢ ﻫﻠﺒﻪ ﻓﻲ ﻛﻼﻣﻪ .. ﺭﺩ ﺍﻋﺘﺒﺎﺭﻫﺎ .. ﻭﻣﻦ ﺑﻌﺪﻫﺎ ﻛﺎﻧﻮﺍ ﻳﺘﺠﻨﺒﻮﺍ ﻳﻐﻠﻄﻮﺍ ﻣﻌﺎﻫﺎ ﺑﻜﻠﻤﻪ ...
ﻭﻣﺎﺯﺍﻟﺖ ﺗﻤﺮ ﺫﻛﺮﻳﺎﺕ ﻗﺪﺍﻡ ﻋﻴﻮﻧﻬﺖ
ﺍﻟﻤﺮﺣﻪ ﻭﺍﻟﺤﻠﻮﺓ ﻻﻳﻤﻜﻦ ﺗﻨﺴﺎﻫﺎ ..
ﺑﺎﻟﺬﺍﺕ ﻣﻊ ﺑﺮﻧﺎﻣﺞ ﻣﻦ ﺳﻴﺮﺑﺢ ﺍﻟﻤﻠﻴﻮﻥ
》 ﺣﻤﺪ : ﺍﻣﺎ ﺟﻮﺍﺏ ﻗﺎﻝ ..
ﻧﻌﻴﻤﻪ : ﺍﻟﺮﺍﺑﻊ ﻳﺎﻋﻤﻲ ..
ﺣﻤﺪ : ﺗﻮ ﺑﻴﻄﻠﻊ ﻏﻠﻂ ﻫﺎﻩ .. ﺷﻮﻓﻲ
ﻭﻓﻌﻼ ﻃﻠﻌﺖ ﺍﻹﺟﺎﺑﻪ ﻏﻠﻂ ..
ﺣﻤﺪ ﺑﻀﺤﻜﻪ ﻧﺼﺮ ﺑﺮﻏﻢ ﺍﻧﻬﺎ ﺿﺤﻜﻪ ﻛﺎﻥ ﻣﺶ ﻇﺎﻫﺮ ﻓﻴﻬﺎ ﺑﻴﺎﺽ ﺍﺳﻨﺎﻥ .. ﺑﺲ ﻛﺎﻧﺖ ﺍﺣﻠﻰ ﺿﺤﻜﻪ ﻗﺎﻝ : ﻫﺎﺍﺍﻩ ﺭﻳﺘﻲ
ﻧﻌﻴﻤﻪ : ﻫﻬﻬﻬﻬﻬﻬﻬﻪ .. ﻛﺎﻥ ﻧﻌﺮﻑ ﻛﻴﻒ ﺗﺠﻲ ﻣﻌﺎﻙ ﻫﺎﺩﻱ ..
ﺍﺷﺮ ﺑﺴﺒﺎﺑﺘﻪ ﻉ ﺭﺍﺳﻪ ﻭﻫﻮ ﻳﻀﺤﻚ ..
ﻭﻫﻲ ﻗﻌﺪﺕ ﺗﻀﺤﻚ 《
ﺷﺪﺓ ﻳﺪ ﻋﺒﺪﺍﻟﺴﻼﻡ ﻉ ﻇﻬﺮﻫﺎ ﺑﻘﻮﺓ ﻭﻗﻀﺘﻬﺎ ...
ﺭﺩﺗﻬﺎ ﻟﻠﻮﺍﻗﻊ ..
ﺷﻴﺒﺎﻧﻴﻬﺎ .. ﺍﻟﻄﻴﺐ .. ﺍﻟﺒﺸﻮﺵ .. ﺍﻟﺤﻘﺎﻧﻲ .. ﺍﻟﻠﻲ ﺣﻄﺎﺗﻪ ﻓﻲ ﻣﻜﺎﻧﺔ ﺑﻮﻫﺎ ... ﺭﺍﺡ ﺧﻼﺹ ..
ﺣﻀﻨﺖ ﻋﺒﺪﺍﻟﺴﻼﻡ ﻭﺩﻣﻮﻋﻬﺎ ﺳﻴﻞ ..
ﻭﻋﻴﻮﻥ ﺩﻻﻝ ﻋﻠﻴﻬﻢ .. ﻭﻫﻲ ﺣﺎﻃﻪ ﻳﺪﻫﺎ ﻉ ﻓﻤﻬﺎ ﻭﺗﺬﺭﻑ ﻓﻲ ﺍﻟﺪﻣﻮﻉ ﻭﻣﺎﺯﺍﻟﺖ ﻣﺼﺪﻭﻣﻪ ﻣﻦ ﺍﻟﺨﺒﺮ ..
ﺑﺲ ﻭﻗﻊ ﺍﻟﺼﺪﻣﻪ ...
ﻛﺎﻥ ﺍﻗﻮﻯ .. ﻉ ﺍﻟﺤﻔﻴﺪﻩ ﺍﻟﻠﻲ ﻛﺎﻥ ﻋﻨﺪﻫﺎ ﺟﺪﻫﺎ ﺑﺎﻟﺪﻧﻴﺎ ..
ﻣﺎﻛﺎﻧﺘﺶ ﺗﺤﺐ ﺗﻬﺪﺭﺯ ﻏﻴﺮ ﻋﻠﻴﻪ .. ﺗﺘﻠﻬﻒ ﻟﻠﻤﺸﻴﻪ ﻏﺎﺩﻱ ﻉ ﺧﺎﻃﺮﻩ ...
ﻣﺎﻛﺎﻧﺘﺶ ﺗﺴﻴﺐ ﻓﻴﻪ ﺑﻜﻞ .. ﻛﺎﻧﺖ ﺑﺈﻳﺪﻳﻬﺎ ﻧﻬﺎﺭ ﻛﻞ ﺟﻤﻌﻪ ﺗﻤﺸﻂ ﻓﻲ ﺷﻌﻴﺮﺍﺗﻪ ﺍﻟﺒﻴﺾ ...
ﻭﺗﺤﻄﻠﻪ ﻣﻦ ﺭﻳﺤﺔ ﺍﻟﺸﻴﺸﻪ ﻗﺒﻞ ﻳﻤﺸﻲ ﻟﻠﺼﻼﺓ ﺍﻟﺠﻤﻌﻪ ..
ﻭﻫﻮ ﻣﺎﻳﻘﻮﻝ ﻏﻴﺮ ".. ﻧﻮﺍﺭﺗﻲ .. ﻧﻮﺍﺭﺓ ﺟﻨﺎﻧﻲ "..
ﻭﻻ " ﻳﺎﺟﺮﻳﻨﻪ ﺟﺪﻙ "
ﺧﻼﺹ ... ﻫﺪﺍ ﻛﻠﻪ ﻗﻌﺪ ﺑﺲ .. ﻣﺠﺮﺩ ﺫﻛﺮﻳﺎﺕ ..
ﺫﻛﺮﻳﺎﺕ !!
ﻳﻌﻨﻲ ﻣﻌﺎﺵ ﺑﺘﻘﻮﻝ ﻛﻠﻤﺔ " ﺟﺪﻭ ".." ﺟﺪﻱ "
》 ﻧﻮﺭ : ﺟﺪﻭ ... ﺟﺪﻳﺪﻩ .. ﺟﺪﻳﺪﻱ ... ﺯﻋﻼﻥ !!
ﺣﻤﺪ ﺑﻤﺰﺡ : ﻣﺎﺗﻜﻠﻤﻨﻴﺶ ﺑﻜﻞ ﺑﻜﻞ .. ﻭﻳﻦ ﺍﻟﻠﻲ ﻗﺎﻟﺖ ﻳﺎﺟﺪﻱ ﺑﻨﺪﻳﺮﻟﻚ ﺳﻔﻨﺰ ﻭﻧﺠﻴﺒﻪ ..
ﻧﻮﺭ ﺑﻀﺤﻜﻪ : ﺟﺪﻭ ﻭﺍﻟﻠﻪ ﻛﺎﻥ ﻋﻨﺪﻱ ﺍﻣﺘﺤﺎﻥ .. ﺍﻻﺑﻠﻪ ﻗﺎﻟﺖ ﻋﻠﻴﻪ ﻓﺠﺄﺓ ..
ﺣﻤﺪ : ﺍﻷﺑﻠﻪ ﺍﻟﺸﻔﺸﻪ ﻫﺎﺩﻱ ﻫﺪﺍ ﻭﻳﻦ ﺧﻄﺮ ﻋﻠﻴﻬﺎ ..
ﻧﻮﺭ : ﻫﻬﻬﻬﻬﻬﻪ ﻫﻲ ﻫﻜﻲ ﺷﻦ ﺑﻨﺪﻳﺮﻟﻬﺎ ..
ﺣﻤﺪ ﺳﻜﺖ ﻭﻫﻮ ﻣﻌﻜﺮﺵ ﻭﺟﻬﻪ ..
ﻧﻮﺭ ﺑﻀﺤﻜﻪ ﺗﻐﻨﻲ : ﻏﻴﺮ ﺗﺮﺑﺢ ﻳﺎﺣﺎﺝ ﺣﻤﺪ ..
ﺣﻤﺪ : ﻗﺘﻠﻚ ﻣﺎﻳﻠﻜﻤﻨﻲ ﺣﺪ ..
ﻧﻮﺭ : ﻫﻬﻬﻬﻬﻬﻬﻬﻬﻬﻬﻪ ..
ﺿﺤﻚ ﻭﻣﺪﻟﻬﺎ ﻟﺴﺎﻧﻪ ﻭﻫﻲ ﺯﺍﺩﺕ ﺿﺤﻜﺖ 《
ﻣﺎﻗﺪﺭﺗﺶ ﺗﺴﺘﻮﻋﺐ ﺍﻟﻠﻲ ﺻﺎﺭ ﺻﻌﺐ ﻉ ﻗﻠﺐ ﺭﻫﻴﻒ ﺯﻱ ﻗﻠﺒﻬﺎ ﻣﺘﻌﻠﻖ ﺑﺎﻟﺠﺪ ﺍﻟﺤﻨﻮﻥ ﺍﻟﻠﻲ ﻛﺎﻥ ﺑﺎﻟﻨﺴﺒﻪ ﻟﻴﻬﺎ ..
ﺑﻬﺠﻪ ..
ﻣﻬﺠﺔ ﺭﻭﺡ ...
ﺣﺴﺖ ﺑﺮﻭﺣﻬﺎ ﺑﺘﻄﻠﻊ ﻣﻨﻬﺎ ﻭﺗﻠﺤﻘﻪ ..
ﻣﺶ ﻣﺘﺨﻴﻠﻪ ﺷﻜﻞ ﺣﻴﺎﺗﻬﺎ ﻛﻴﻒ ﺣﺘﻜﻮﻥ ﻣﻦ ﻏﻴﺮﻩ ..
ﻭﺍﻟﻠﻲ ﺣﻮﺍﻟﻴﻬﺎ ..
ﺑﻮﻫﺎ .. ﺍﻣﻬﺎ ... ﺍﺧﺘﻬﺎ ...
ﺍﺳﺘﺎﻗﻀﻮﺍ ﺑﻴﻬﺎ .. ﻟﻤﺎ ﺳﻤﻌﻮﺍ ﺻﻮﺕ ﻃﻴﺤﺘﻬﺎ ﻉ ﺍﻷﺭﺽ ..
🌴🌴🌴🌴🌴🌴🌴🌴🌴🌴🌴
ﻛﺎﻧﺖ ﻓﻲ ﺍﻟﻜﻮﺟﻴﻨﻪ ﺗﻮﺗﻲ ﻓﻔﻄﻮﺭﻫﺎ ﻫﻲ ﻭﺃﻣﻬﺎ ..
ﻟﻌﻨﺪ ﻣﺎ ﺧﺶ ﻋﻠﻴﻬﺎ ﺧﻮﻫﺎ ..
ﻫﺎﻧﻴﺒﺎﻝ : ﺍﺷﺶ ... ﻏﺎﻟﻴﻪ .
ﺍﻟﺘﻔﺘﺖ ﻭﻗﺎﻟﺖ : ﻧﻌﻢ ..
ﻗﺎﻝ ﺑﻀﻴﻖ : ﻋﻤﻚ ﺣﻤﺪ ﺗﻮﻓﻰ ..
ﺿﺮﺑﺖ ﺑﻴﺪﻫﺎ ﻉ ﺻﺪﺭﻫﺎ ﻭﻫﻲ ﻣﺼﺪﻭﻣﻪ ..
ﻫﺎﻧﻴﺒﺎﻝ : ﻛﻴﻒ ﺑﻨﻘﻮﻟﻮﺍ ﻷﻣﻲ ..
ﻏﺎﻟﻴﻪ ﺑﺼﺪﻣﻪ ﺑﻌﺪ ﺣﻄﺖ ﺍﻳﺪﻳﻬﺎ ﻉ ﺧﺪﻭﺩﻫﺎ : ﻣﺶ ﻋﺎﺭﻓﻪ ... ﻳﺎﺭﺑﻲ .. ﻻﺣﻮﻝ ﻭﻻﻗﻮﺓ ﺍﻻ ﺑﺎﻟﻠﻪ ..
ﺳﻜﺖ ﻫﺎﻧﻴﺒﺎﻝ ﻭﻫﻮ ﻳﻔﻜﺮ ..
ﻟﻌﻨﺪ ﻣﺎﺟﻲ ﻣﻴﻼﺩ ﺧﺶ ﻣﻦ ﻓﻢ ﺍﻟﺒﻮﺍﺑﻪ ﻭﻗﻒ ﺣﺪﺍ ﻫﺎﻧﻴﺒﺎﻝ ﻭﻗﺎﻝ : ﺳﻤﻌﺘﻮﺍ ﺑﻌﻤﻜﻢ ﺣﻤﺪ ..
ﻫﺎﻧﻴﺒﺎﻝ ﻭﻫﻮ ﻳﺸﺒﺢ ﺍﻟﻘﺪﺍﻡ ﻫﺰ ﺭﺍﺳﻪ ﺑﺈﻳﺠﺎﺏ ..
ﻣﻴﻼﺩ ﻭﻫﻮ ﻳﻮﺯﻉ ﻓﻲ ﻧﻈﺮﻩ ﻋﻠﻴﻬﻢ : ﻗﻠﺘﻮﺍ ﻷﻣﻲ؟
ﺍﻟﺰﻭﺯ ﺣﺮﻛﻮﺍ ﺭﻭﺳﻬﻢ ﺑﺎﻟﻨﻔﻲ ..
ﻣﻴﻼﺩ : ﺗﻮ ﻧﻘﻮﻟﻠﻬﺎ ..
ﻭﻃﻮﻝ ﺧﺶ ﺩﺍﺧﻞ ..
ﻟﺤﻘﻪ ﻫﺎﻧﻴﺒﺎﻝ ﻭﺑﻌﺪﻩ ﻏﺎﻟﻴﻪ
🍁🍁🍁🍁🍁🍁
ﻓﻲ ﺣﻮﺵ ﺍﻟﺤﺎﺝ ﺣﻤﺪ ..
ﻭﺻﻞ ﻋﺒﺪﺍﻟﺴﻼﻡ ﺍﻟﻠﻲ ﻣﺶ ﻋﺎﺭﻑ ﻛﻴﻒ ﻭﺻﻞ ﺑﻌﻴﻠﺘﻪ ﻟﺤﻮﺵ ﺑﻮﻩ ..
ﻧﺰﻝ ﻣﻦ ﺍﻟﺴﻴﺎﺭﺓ ﺑﺼﻌﻮﺑﻪ ..
ﻭﻧﺰﻟﺖ ﻧﻌﻴﻤﻪ ﺑﻮﻟﺪﻫﺎ ﻭﻫﻲ ﺗﺒﻜﻲ ..
ﻭﻧﺰﻟﺖ ﺩﻻﻝ ﺍﻟﻠﻲ ﺗﺒﻜﻲ ﻭﻫﻲ ﺷﺎﺩﺓ ﻧﻮﺭ ﺍﻟﻠﻲ ﻛﺎﻧﺖ ﺗﺒﻜﻲ ﺑﺎﻟﻌﺒﺮﺓ ﻭﺗﻤﺸﻲ ﺑﺎﻟﺴﻴﻒ ..
ﻛﺎﻧﻮﺍ ﻳﺴﻤﻌﻮﺍ ﻓﺎﺻﻮﺍﺕ ﺍﻟﻌﻴﺎﻁ ..
ﺧﺸﻮﺍ ﻟﻠﺤﻮﺵ ..
ﻟﻘﻮﺍ ﺧﻮﺕ ﻋﺒﺪﺍﻟﺴﻼﻡ ﻭﺟﻮﻫﻬﻢ ﺳﻮﺩ ﻭﺷﺎﺩﻳﻦ ﺩﻣﻮﻋﻬﻢ ..
ﺍﺗﻠﻘﻮﺍ ﺧﻮﻫﻢ ..
ﻧﺎﺟﻲ : ﺑﻨﺮﻓﻌﻮﻩ ﻓﻲ ﺳﻴﺎﺭﺗﻚ ..
ﻫﻮ ﺍﻧﺼﺪﻡ ﻓﻲ ﻃﻠﺒﻬﻢ .. ﺑﺲ ﻣﺎﻗﺪﺭﺵ ﻳﺮﻓﺾ ..
ﻫﺰ ﺭﺍﺳﻪ ﺑﺈﻳﺠﺎﺏ ﻭﻟﻒ ﻭﻃﻠﻊ ...
ﻭﺧﻮﺗﻪ ﺍﻟﺰﻭﺯ ﻭﻟﻮﺍ ﺧﺸﻮﺍ ﻟﻠﺤﻮﺵ ..
ﻛﺎﻧﻮﺍ ﺩﺍﺧﻞ ﻧﻌﻴﻤﻪ ﻭﻋﺰﻭﺯﺗﻬﺎ ﺣﺎﺿﻨﻴﻦ ﺑﻌﺾ ﻭﻳﺒﻜﻮﺍ ﺑﺎﻟﻌﻴﺎﻁ ..
ﻭﺩﻻﻝ ﺣﺎﺿﻨﻪ ﻭﺣﺪﻩ ﻣﻦ ﻧﺴﺎﻭﻳﻦ ﻋﻤﺎﻣﻬﺎ ﻭﻳﺒﻜﻮﺍ ﺑﺎﻟﻌﺒﺮﺓ ..
ﻭﻧﻮﺭ ﻗﻌﻤﺰﺕ ﻷﻧﻬﺎ ﻣﺶ ﻗﺎﺩﺭﺓ ﺗﻮﻗﻒ ﻭﺗﺒﻜﻲ ﻭﺗﺸﻬﻖ ..
ﻭﺧﻮﻟﻪ ﺗﻌﻴﻂ .. ﻭﺿﻢ ﻓﻲ ﺍﻟﺤﻮﺵ ..
ﺍﻳﻪ ﺿﻢ ﻓﻲ ﺍﻟﺤﻮﺵ .. ﻣﻬﻤﻪ ﻧﻈﺮﺓ ﺍﻟﻨﺎﺱ ﻋﻨﺪ ﺍﻟﺒﻌﺾ ﻟﻬﺎﻟﺪﺭﺟﻪ ..
ﺍﻣﺒﺎﺭﻛﻪ ﺑﺒﻜﻲ : ﻓﻄﺮ ... ﺍﻟﺼﺒﺢ ﻣﺎﻓﻴﻪ ﺷﻲ .. ﻣﺎﻛﺎﻥ ﻓﻴﻪ ﺷﻲ ﻳﺎﻧﺎﺱ ...
ﻧﻮﺭ ﺗﺸﻬﻖ ﻭﺗﺒﻜﻲ ﺍﻛﺜﺮ ﻭﺍﻛﺜﺮ ..
ﻭﺍﻟﻜﻞ ﺯﺍﺩﻭ ﺑﻜﻮﺍ ..
ﻓﻲ ﻧﻔﺲ ﺍﻟﻠﺤﻈﻪ ..
ﻃﻠﻌﻮﺍ ﺍﻟﻮﻻﺩ ﺑﺒﻮﻫﻢ ﻭﻫﻤﺎ ﻗﺎﻳﻤﻴﻨﻪ ..
ﺷﺎﻓﺘﻬﻢ ﻧﻌﻴﻤﻪ ﻣﺸﺖ ﺗﺠﺮﻱ ﻟﺒﻨﺘﻬﺎ ﺩﻻﻝ ﻭﺣﻀﻨﺘﻬﺎ ﻭﻫﻲ ﻣﻐﻄﻴﻪ ﻭﺟﻬﻬﺎ .. ﺑﺶ ﻣﺎﺗﺸﻮﻓﺶ ..
ﻛﻠﻬﻢ ﻋﻴﻄﻮﺍ ...
ﻧﻮﺭ ﻟﻤﺎ ﺷﺎﻓﺘﻬﻢ ﻫﺴﺘﺮﺕ ﺑﺎﻟﺒﻜﻲ ..
ﺗﻔﺮ ﻓﺮﺍﻥ ﻭﺗﺒﻜﻲ ﻭﺗﻌﻴﻂ ...
ﺟﺘﻬﺎ ﻣﺮﺗﻬﺎ ﻋﻤﻬﺎ ﺗﺠﺮﻱ ﺗﻐﻄﻲ ﻓﻌﻴﻮﻧﻬﺎ ﻭﻧﻮﺭ ﺑﺘﻤﻮﺕ ﺑﺎﻟﺒﻜﻲ ﻭﻫﻲ ﺗﻘﻮﻝ ﺑﻌﻴﺎﻁ : ﺟﺪﻭﻭﻭﻭﻭ ﺟﺪﻭﻭﻭﻭﻭ ..
ﻋﻤﺎﻣﻬﺎ ﻃﻠﻌﻮﻩ ﺑﺴﺮﻋﻪ ..
ﻧﻌﻴﻤﻪ ﻃﻠﻘﺖ ﺩﻻﻝ ﻭﻣﺸﺖ ﻟﻨﻮﺭ ﺑﺶ ﺗﻬﺪﻳﻬﺎ ..
ﺣﻀﻨﺘﻬﺎ ﺑﻘﻮﺓ ﻭﻗﻌﺪﺕ ﺗﻘﺮﺍ ﻋﻠﻴﻬﺎ ﺑﺼﻮﺕ ﻋﺎﻟﻲ ..
ﻭﻣﺮﺕ ﻋﻤﻬﺎ ﺟﺎﺑﺘﻠﻬﺎ ﻣﻴﻪ ﻭﻗﻌﺪﺕ ﺗﺒﺦ ﻓﻲ ﺍﻟﻤﻴﺔ ﻉ ﻭﺟﻬﻬﺎ ..
🍃 ﻭﺻﻒ ﺣﺎﻻﺕ ﺍﻟﻨﺎﺱ ﻓﻲ ﻣﻮﺍﺿﻊ ﺯﻱ ﻫﺎﺩﻱ ﺩﻳﻤﺎ ﺻﻌﺐ ..
ﺻﻌﺐ ﻧﻮﺻﻒ ﺷﻌﻮﺭ ﺍﻟﺤﺎﺟﻪ ﻓﺎﻃﻤﻪ ...
ﺍﻟﻠﻲ ﻃﻠﻌﻮﻫﺎ ﻭﻻﺩﻫﺎ ﻫﺎﻧﻴﺒﺎﻝ ﻭﺍﻟﻬﺎﺩﻱ ...
ﻳﺪﻳﺪﺷﻮﺍ ﻓﻴﻬﺎ ﻭﻫﻲ ﺗﺒﻜﻲ .. ﺑﺶ ﻳﻮﺻﻠﻮﻫﺎ ﻟﻠﺴﻴﺎﺭﻩ ..
ﻫﻲ ﺍﻟﻴﻮﻡ ﻓﻌﻼ ﺣﺴﺖ ﺍﻧﻬﺎ ﻓﻘﺪﺕ ﺑﻮﻫﺎ ..
ﻫﻮ ﺍﻟﻠﻲ ﺭﺑﺎﻫﺎ ﻭﻛﺒﺮﻫﺎ ﻭﺯﻭﺟﻬﺎ .. ﺑﺮﻏﻢ ﺍﻧﻪ ﻣﺎﻛﺎﻧﺶ ﻳﺤﺐ ﻳﻤﺸﻲ ﻟﻠﻤﻨﻄﻘﻪ ﺍﻟﻠﻲ ﻫﻲ ﻋﺎﻳﺸﻪ ﻓﻴﻬﺎ ﻭﻫﻮ ﺍﺻﻼ ﻣﻨﻬﺎ ...
ﻟﻜﻦ ﻫﻲ ﻛﺎﻧﺖ ﺗﻤﺸﻴﻠﻪ ﻭﻓﻲ ﻛﻞ ﻣﺮﺓ ﻣﺎﺗﻤﻠﺶ ﻣﻦ ﺍﻟﻬﺪﺭﺯﺓ ﻣﻌﺎﻩ ﻭﻻ ﻫﻮ ...
ﺍﺧﺮ ﻟﻘﺎﺀ ﺑﻴﻨﺎﺗﻬﻢ ﻛﺎﻥ ﻑ 2006 ﻛﺎﻧﺖ ﺟﺎﻳﻪ ﻟﺒﻨﺎﺗﻬﺎ ﺯﻳﺎﺭﺓ ..
ﻭﻣﺸﺖ ﻟﺤﻮﺷﻪ ﻭﺷﺪﻫﺎ ﻋﻨﺪﻩ ﻳﻮﻣﻴﻦ ...
ﻣﺎﻛﺎﻧﺘﺶ ﻋﺎﺭﻓﻪ ﺍﻥ ﻫﺎﻟﻤﺮﺓ ﻛﺎﻧﺖ ﺍﻷﺧﻴﺮﻩ 🍃
ﻃﻮﻝ ﺗﺤﺮﻙ ﻫﺎﻧﻴﺒﺎﻝ ﺑﺄﻣﻪ ... ﻭﻟﺤﻖ ﻋﻠﻴﻪ ﻣﻴﻼﺩ ﻭﻣﻌﺎﻩ ﺳﻌﻴﺪﻩ ..
ﺍﻟﻬﺎﺩﻱ ﻗﻌﺪ ﻷﻥ ﺳﻤﻴﻪ ﻣﻮﻋﺪﻫﺎ ﺍﻟﻴﻮﻣﻴﻦ ﻫﺎﺩﻭﺍ ..
ﻣﺎﻳﻘﺪﺭﺵ ﻳﻤﺸﻲ ...
🍁🍁🍁🍁
ﺳﻤﻌﻮﺍ ﺯﻳﻨﺐ ﻭﻛﻔﺎﻳﻪ ..
ﻭﺳﻤﻊ ﺣﻤﻴﺪ ..
ﻃﻮﻝ ﻣﺸﻮﺍ ﻟﺤﻮﺵ ﻋﻢ ﺍﻣﻬﻢ ﺍﻟﻠﻲ ﻛﺎﻥ ﺑﺎﻟﻨﺴﺒﻪ ﻟﻴﻬﻢ ﺟﺪﻫﻢ ﻓﻘﺪﺭﻩ ﻭﻗﻴﻤﺘﻪ ..
ﺃﻭﻝ ﻣﻦ ﺟﻲ ﺯﻳﻨﺐ ..
ﺧﺸﺖ ﺩﺍﺧﻞ ﺷﺎﻓﺘﻬﺎ ﻧﻌﻴﻤﻪ ..
ﻣﺸﺘﻠﻬﺎ ﺯﻳﻨﺐ ﻃﻮﻝ ﻭﺣﻀﻨﻮﺍ ﺑﻌﺾ ﻭﻗﻌﺪﻭﺍ ﻳﺒﻜﻮﺍ ﺑﺎﻟﻌﺒﺮﺓ ...
ﻓﻲ ﻧﻔﺲ ﺍﻟﻠﺤﻈﻪ
ﻭﺻﻠﺖ ﺍﻣﻨﺔ ﺣﻤﺎﺓ ﺯﻳﻨﺐ ..
ﺍﻟﻠﻲ ﺧﺸﺖ ﺗﺠﺮﻱ ﻭﺗﻌﻴﻂ : ﻭﺑﻴﻴﻲ .. ﻭﺑﻴﻴﻴﻴﻲ ﻭﻳﻴﻴﻴﻨﻪ ... ﻭﻳﻴﻴﻦ ﻭﺑﻴﻴﻲ ..
ﺟﺘﻬﺎ ﺍﻣﻬﺎ ﺗﺠﺮﻱ ﺣﻀﻨﺘﻬﺎ ﻭﻫﻲ ﺗﺒﻜﻲ ..
ﻭﺍﻣﻨﻪ ﺑﺘﻬﺒﻞ ...
ﺟﺘﻬﺎ ﻭﺣﺪﻩ ﻣﻦ ﻛﻨﺎﻳﻨﻬﻢ ﻭﻭﺣﺪﻩ ﻣﻦ ﺍﻟﺠﻴﺮﺍﻥ ﺑﺶ ﻳﺴﻴﻄﺮﻭﺍ ﻋﻠﻴﻬﺎ ﺑﺼﻌﻮﺑﻪ ...
ﻭﺣﺎﻟﺘﻬﺎ ﻛﺎﻧﺖ ﺑﺎﻟﻮﻳﻞ ...
ﺑﻌﺪﻫﺎ ﺧﺸﺖ ﻋﺒﻴﺮ ﺍﻟﻠﻲ ﻣﺎﻗﺎﻟﻠﻬﺎﺵ ﺭﺍﺟﻠﻬﺎ ﺍﻥ ﺑﻮﻙ ﻣﺎﺕ
ﻗﺎﻝ ﻣﺮﻳﺾ ﺑﺲ ..
ﺍﻭﻝ ﻣﺎﺧﺸﺖ ﻭﺷﺎﻓﺖ ﺍﻟﻮﺿﻊ
ﻃﻮﻝ ﻃﺎﺣﺖ ﻣﻐﻤﻰ ﻋﻠﻴﻬﺎ ..
ﻉ ﺧﺸﺔ ﻛﻔﺎﻳﻪ ﻟﻠﺤﻮﺵ ﻟﻘﺘﻬﻢ ﻳﺴﻌﻔﻮﺍ ﻓﻴﻬﺎ ..
ﻗﻌﺪﺕ ﺗﺒﻜﻲ ﺑﺎﻟﻌﺒﺮﺓ ...
🍁🍁🍁🍁🍁🍁
ﻣﺎﻧﻘﺪﺭﺵ ﻧﻘﻌﺪ ﻳﺎﺻﺪﻳﻖ ﻭﺍﻟﻠﻪ ﻣﺎﻧﻘﺪﺭ ..
ﺍﻟﺼﺪﻳﻖ ﺗﻨﻬﺪ ﻭﻗﺎﻝ : ﺣﺎﺿﺮ ﺣﺒﻴﺒﺘﻲ .. ﻭﺗﻲ ﺭﻭﺣﻚ .. ﻟﻜﻦ ﻫﺎﻩ ﺑﻨﺮﻭﺣﻮﺍ ﺍﻟﻌﺸﻴﻪ ..
ﺣﻤﻴﺪﻩ ﻫﺰﺕ ﺭﺍﺳﻬﺎ ﺑﺈﻳﺠﺎﺏ ﻭﻫﻲ ﺗﺒﻜﻲ ..
ﺑﻌﺪ ﻃﻠﻊ ..
ﻫﻲ ﻭﺗﺖ ﺭﻭﺣﻬﺎ ....
ﻭﺷﻮﻳﻪ ﻭﻃﻠﻌﺖ ... ﺭﻛﺒﺖ ﺍﻟﺴﻴﺎﺭﻩ ..
ﻭﺗﺤﺮﻙ ﺍﻟﺼﺪﻳﻖ ..
ﻣﻦ ﺭﻭﺷﻦ ﺣﻮﺵ ﺍﻫﻠﻪ ..
ﺳﺎﻟﻤﻪ ﻋﺰﻭﺯﺗﻬﺎ : ﻋﺮﻭﺱ ﻭﺗﺨﺶ ﻋﺰﺍﻭﺍﺕ ﻋﻠﻴﻚ ﻓﺎﻝ !
🍁🍁🍁🍁🍁
ﺑﻌﺪ ﺣﻮﺍﻟﻲ ﺳﺎﻋﺘﻴﻦ ..
ﻭﺻﻠﻮﺍ ﻫﺎﻧﻴﺒﺎﻝ ﻭﻣﻴﻼﺩ ..
ﻧﺰﻟﺖ ﻓﺎﻃﻤﻪ ﻭﺟﺘﻬﺎ ﺳﻌﻴﺪﻩ ﻃﻮﻝ ..
ﻭﺷﺪﺗﻬﺎ ﻭﻗﻌﺪ ﺗﻤﺸﻲ ﻫﻲ ﻭﻳﺎﻫﺎ ﻟﻴﻦ ﺧﺸﻮﺍ ﺩﺍﺧﻞ ..
ﻭﻣﻴﻼﺩ ﻭﻫﺎﻧﻴﺒﺎﻝ ﺧﺸﻮﺍ ﻟﻠﺨﻴﻤﻪ ﺍﻟﻠﻲ ﺍﻧﺼﺒﺖ ﻭﻛﺎﻧﺖ ﻣﻌﺒﻴﻪ ..
ﻛﺎﻥ ﺩﺍﺧﻞ ﺣﻤﻴﺪ .. ﻭﺧﻴﺮﻱ .. ﻭﺳﻌﺪ ﻣﻊ ﺍﻟﻤﻌﺰﻳﻦ ..
ﻫﻤﺎ ﻃﻮﻝ ﻣﺸﻮﺍ ﻟﻌﺒﺪﺍﻟﺴﻼﻡ ﻭﻋﺰﻭﻩ ..
ﺩﺍﺧﻞ ..
ﻓﺎﻃﻤﻪ ﻃﻮﻝ ﺍﻭﻝ ﻣﺎﺧﺸﺖ ﺗﻠﻘﺘﻬﺎ ﺍﻣﻨﻪ ﻭﺣﻀﻨﺘﻬﺎ ﺑﺎﻟﻘﻮﺓ ﻭﻗﻌﺪﺕ ﺗﺒﻜﻲ ﺑﺎﻟﻌﺒﺮﺓ ﻭﺗﻘﻮﻝ : ﻛﺎﻥ ﻳﻘﻮﻝ ﻓﺎﻃﻤﻪ ﻫﺎﺩﻱ ﺑﻨﺘﻲ .. ﺍﻧﺘﻲ ﻋﻨﺪﻱ 4 ﺑﻨﺎﺕ ﻣﺶ ﺗﻼﺗﻪ ..
ﻭﻓﺎﻃﻤﻪ ﺗﺘﻘﻄﻊ ﻣﻦ ﺍﻟﺒﻜﻲ ﻭﺑﻨﺎﺗﻬﺎ ﻳﺒﻜﻮﺍ ﺑﻌﺒﺮﺗﻬﻢ ..
🍁🍁🍁🍁
ﻓﻮﺣﺪﻩ ﻣﻦ ﺍﻟﺪﻳﺎﺭ
ﻛﺎﻧﺖ ﺩﻻﻝ ﻗﺎﻋﺪﻩ ﻣﻊ ﻧﻮﺭ ﺍﻟﻠﻲ ﻛﺎﻧﺖ ﺭﺍﻗﺪﺓ ..
ﻭﺣﺪﺍﻫﺎ ﺧﻮﻫﺎ ﻣﺠﺪ ﺭﺍﻗﺪ .. ﻭﻫﻲ ﺗﺸﻮﻓﻠﻪ ﻭﺩﻣﻮﻋﻬﺎ ﻳﻨﺰﻟﻮﺍ ﻭﺗﺬﻛﺮ ﻓﺠﺪﻫﺎ ﻛﻴﻒ ﻛﺎﻥ ﻓﻲ ﺣﻀﻨﻪ ﺍﻣﺲ ..
ﺍﻣﺲ ﺑﺲ ... ﻛﺎﻥ ﻳﻬﺪﺭﺯ ﻭﻳﺒﺼﺮ ﻭﻳﻀﺤﻚ ﻭﻣﺎﻓﻴﻪ ﺷﻲ ..
ﻣﺎﺣﺪ ﺟﻲ ﻓﺒﺎﻟﻪ ﺍﺑﺪﺍ ﺍﻧﻪ ﻛﺎﻥ ﻳﻮﺩﻱ ﻓﻴﻬﻢ ﻭﺩﺍﻉ ﻳﻠﻴﻖ ﺑﻴﻪ ..
ﻻﺗﻌﺒﻬﻢ ﻭﻻﺑﻬﺪﻟﻬﻢ ...
ﺳﻴﺐ ﺍﻟﺪﻧﻴﺎ .. ﺧﻔﻴﻒ .. ﻇﺮﻳﻒ .. 🍃
ﻓﺎﻗﺖ ﻣﻦ ﺳﺮﺣﺎﻧﻬﺎ ﻉ ﺻﻮﺕ ﺗﻠﻴﻔﻮﻧﻬﺎ ..
ﻟﻤﺎ ﺷﺎﻓﺖ ﺍﻟﺮﻗﻢ ﻓﺘﺤﺖ ﺍﻟﺨﻂ ﻃﻮﻝ ..
ﺩﻻﻝ ﺑﺒﻜﻲ : ﻋﻤﺎﺭ ..
ﻋﻤﺎﺭ ﺑﺨﻮﻑ ﻋﻠﻴﻬﺎ : ﺭﻭﺡ ﻋﻤﺎﺭ ... ﻋﻈﻢ ﺍﻟﻠﻪ ﺍﺟﺮﻙ .. ﺍﻟﻠﻪ ﻳﻐﻔﺮﻟﻪ ﻭﻳﺮﺣﻤﻪ ﻭﻳﺠﻌﻠﻪ ﻣﻦ ﺍﻫﻞ ﺍﻟﺠﻨﻪ ..
ﺩﻻﻝ ﺑﺒﻜﻲ : ﺁﻣﻴﻦ ..
ﻋﻤﺎﺭ : ﺣﺎﻟﻚ ﺑﺎﻫﻲ ﻳﺎﻋﻤﺮﻱ ..
ﺩﻻﻝ : ﺍﻳﻪ ﺑﺎﻫﻲ ..
ﻋﻤﺎﺭ : ﻭﺑﺎﺗﻚ ﻭﺍﻣﻚ ..
ﺩﻻﻝ : ﻳﺼﺒﺮﻭﺍ ﻓﻲ ﺭﻭﺍﺣﻬﻢ .. ﻟﻜﻦ ﻧﻮﺭ ﻗﺮﻳﺐ ﻫﺒﻠﺖ .
ﻋﻤﺎﺭ ﺑﺄﺳﻒ : ﻻﺣﻮﻝ ﻭﻻﻗﻮﺓ ﺍﻻ ﺑﺎﻟﻠﻪ ...
ﺩﻻﻝ ﻭﻫﻲ ﺗﺮﺷﻒ : ﺗﻮﺍ ﺷﻜﻠﻪ ﺣﻨﺎﻱ ﻭﺧﻮﺍﻟﻲ ﺟﻮ ..
ﻋﻤﺎﺭ : ﺗﻤﺎﻡ ﻳﺎﻋﻤﺮﻱ .. ﺣﺘﻰ ﺑﺎﺗﻲ ﻭﺍﻣﻲ ﺗﻮ ﻃﻠﻌﻮﺍ .. ﺍﻧﻲ ﻳﺎﻗﻠﺒﻲ ﺑﻌﺪ ﺳﺎﻋﻪ .. ﺳﺎﻋﻪ ﻭﻧﺺ ﻧﻜﻮﻥ ﻋﻨﺪﻛﻢ ..
ﺩﻻﻝ : ﺑﺎﻫﻲ ..
ﻋﻤﺎﺭ : ﻣﺎﺗﺒﻲ ﺷﻲ ﺩﻟﻮﻟﺘﻲ ..
ﺩﻻﻝ : ﺳﻼﻣﺘﻚ ﺭﺩ ﺑﺎﻟﻚ ﻉ ﺭﻭﺣﻚ ..
ﻋﻤﺎﺭ : ﺣﺘﻰ ﺍﻧﺘﻲ ﻳﺎﻋﻤﺮﻱ .. ﻭﺟﺪﻙ ﻳﺒﻲ ﻣﻨﻜﻢ ﺍﻟﺪﻋﺎﺀ ﻫﺪﺍ ﺍﻛﺜﺮ ﺷﻲ ﻣﺤﺘﺎﺟﻪ ..
ﺩﻻﻝ ﺑﻨﺒﺮﺓ ﺑﺎﻛﻴﻪ : ﺻﺢ .. ﺍﻟﻠﻪ ﻳﺮﺣﻤﻪ ..
ﻋﻤﺎﺭ ﺗﻨﻬﺪ ﻭﻗﺎﻝ : ﻫﻲ ﻳﺎﻋﻤﺮﻱ ﺑﺎﻟﺴﻼﻣﻪ ﺗﻮ ..
ﺩﻻﻝ : ﻣﻊ ﺍﻟﺴﻼﻣﻪ .. ﻭﺻﻜﺮﺕ ..
ﻧﺰﻟﺖ ﺗﻠﻴﻔﻮﻧﻬﺎ ﻭﺣﻄﺖ ﻳﺪﻫﺎ ﻉ ﻭﺟﻬﻬﺎ ﻭﻗﻌﺪﺕ ﺗﺒﻜﻲ ..
🍃 ﻭﻓﺎﺗﻮﺍ ﺍﻟﺴﺎﻋﺎﺕ ..
ﺟﺖ ﻓﻴﻬﻢ ﺣﻤﻴﺪﻩ ﻫﻲ ﻭﺭﺍﺟﻠﻬﺎ .. ﻭﻛﺎﻧﺖ ﺗﺒﻜﻲ ﺑﻌﺒﺮﺗﻬﺎ .. ﻣﺎﺷﺎﻓﺎﺗﺎﺵ ﻛﺎﻥ ﻣﺮﺗﻴﻦ ﻟﻤﺎ ﻛﺎﻧﺖ ﺻﻐﻴﺮﻩ .. ﺑﺲ ﺍﻟﻜﻼﻡ ﻋﻨﻪ ﺧﻼﻫﺎ ﺗﺤﺒﻪ ﻭﻏﻴﺮﻫﻜﻲ ﻫﻮ ﻋﻢ ﺍﻣﻬﺎ ..
🍃🍃
ﻣﺸﻮﺍ ﺍﻟﺮﺟﺎﻟﻪ ﻟﻠﺠﻨﺎﺯﺓ ﺍﻟﻠﻲ ﻛﺎﻧﺖ ﻣﻊ ﺻﻼﺓ ﺍﻟﻈﻬﺮ ..
ﺩﻓﻨﻮﺍ ﺍﻟﻮﻻﺩ ﺑﻮﻫﻢ ﻭﺩﻣﻮﻋﻬﻢ ﻏﺎﻟﺒﻪ ..
ﻭﺍﻟﺪﻣﻮﻉ ﻓﺮﺍﻕ ﺍﻟﻮﺍﻟﺪﻳﻦ ﺍﺣﻖ ﺑﻴﻬﺎ ..
ﻛﻞ ﺷﻲ ﻳﺘﻌﻮﺽ .. ﺍﻻ ﺑﻮﻙ ﻭﺍﻣﻚ 🍃...
ﺣﻀﺮﻭﺍ ﻣﻊ ﺍﻟﻤﻮﺟﻮﺩﻳﻦ ﺍﻟﺠﻨﺎﺯﺓ ..
ﺭﻣﻀﺎﻥ ﺍﻟﻠﻲ ﺟﺎﺑﻪ ﻋﻤﺮ .. ﺍﻟﻠﻲ ﺳﻤﻊ ﺑﻌﺪﻳﻦ ﻷﻧﻪ ﻛﺎﻥ ﻓﻲ ﺍﻟﻮﺍﺩﻱ ﻭﻗﺘﻬﺎ ..
ﻣﺶ ﺍﻭﻝ ﻣﺮﺓ ﻳﺤﻀﺮ ﺩﻓﻴﻨﻪ ﺑﺲ ﻫﺎﻟﻤﺮﺓ ... ﻗﻠﺒﻪ ﻛﺎﻥ ﻣﻘﺒﻮﺽ ﺑﻘﻮﺓ .. ﻭﺣﺎﺱ ﺑﺨﻮﻑ ﺷﺪﻳﺪ .. ﻷﻭﻝ ﻣﺮﺓ ﺗﺼﻴﺮﻟﻪ ﻫﺎﻟﺤﺎﻟﻪ ..
ﺣﻀﺮﻭﺍ ﻛﺬﻟﻚ ﻣﺨﺘﺎﺭ ﻭﻋﻤﺎﺭ ...
ﻭﻋﻤﺎﺭ ﻃﻮﻝ ﺍﻟﻮﻗﺖ ﻋﻴﻮﻧﻪ ﻉ ﻧﺴﻴﺒﻪ ﻭﺣﺴﻪ ﺍﻧﻪ ﻓﻮﻕ ﺣﺰﻧﻪ ﻓﻴﻪ ﺷﻲ ﺷﻜﻠﻪ ﻣﻦ ﺍﺧﺮ ﻣﺮﺓ ﺷﺎﻓﻪ ﻓﻴﻬﺎ ﺗﻐﻴﺮ ﻫﻠﺒﻪ ..
ﻣﺶ ﺯﻱ ﻗﺒﻞ ..
🍁🍁🍁🍁🍁
ﺑﻌﺪ ﺭﻭﺣﻮﺍ ﻣﻦ ﺍﻟﺠﻨﺎﺯﺓ ..
ﻃﻠﺐ ﻋﻤﺎﺭ ﺍﻧﻪ ﻳﺸﻮﻑ ﺩﻻﻝ ..
ﻭﻗﻒ ﻓﻲ ﺗﺮﻛﻴﻨﻪ ﻣﺴﺘﺨﻄﻴﻪ ﻓﻲ ﺍﻟﺠﻨﺎﻥ ..
ﻗﻌﺪ ﻳﺮﺍﺟﻲ ..
ﺷﻮﻳﺔ ﻭﺟﺖ ﺩﻻﻝ ﺷﺎﻓﺎﺗﻪ ﺑﺎﻟﺒﺪﻟﻪ ﺍﻟﻌﺴﻜﺮﻳﻪ ..
ﺑﺮﻏﻢ ﺍﻟﻠﻲ ﻫﻲ ﻓﻴﻪ ﻗﻠﺒﻬﺎ ﺩﻕ ﺑﺎﻟﻘﻮﺓ 💓
ﻭﺍﺑﺘﺴﻤﺖ ﺍﺑﺘﺴﺎﻣﻪ ﺧﻔﻴﻔﻪ ..
ﻫﻮ ﺷﺎﻓﻬﺎ .. ﺭﻛﺰ ﻉ ﺍﺑﺘﺴﺎﻣﺘﻬﺎ ..
ﻓﺘﺢ ﺍﻳﺪﻳﻪ ..
ﻭﺻﻠﺖ ﻓﻴﻪ ... ﻃﻮﻝ ﺧﺸﺖ ﺣﻀﻨﻪ ..
ﻭﻫﻮ ﺣﻀﻨﻬﺎ ﺑﻘﻮﺓ : ﻋﻈﻢ ﺍﻟﻠﻪ ﺍﺟﺮﻙ ... ﺑﺎﺱ ﻉ ﺭﺍﺳﻬﺎ ﻭﻛﻤﻞ ﻳﻘﻮﻝ .. ﺍﻣﺮ ﺍﻟﻠﻪ ﻭﺍﻟﻤﻮﺕ ﺍﻟﺤﻖ ..
ﺩﻻﻝ ﺩﻣﻮﻋﻬﺎ ﻧﺰﻟﻮﺍ ﻭﺷﺪﺕ ﻓﻴﻪ ﺍﻛﺜﺮ ..
ﻋﻤﺎﺭ ﻗﻌﺪ ﻳﻤﺴﺢ ﻉ ﻇﻬﺮﻫﺎ ﺑﺶ ﻳﻬﺪﻳﻬﺎ ..
ﻟﺤﻈﺎﺕ ..
ﻭﺭﻥ ﺗﻠﻴﻔﻮﻧﻪ ..
ﻗﻌﺪ ﺣﺎﺿﻨﻬﺎ ﻭﺭﺩ : ﺍﻳﻮﻩ ..
ﻫﺎﻧﻴﺒﺎﻝ : ﺑﻨﺨﺶ ﻧﺸﻮﻑ ﺩﻻﻝ ..
ﺍﺑﺘﺴﻢ ﻋﻤﺎﺭ ﻧﺺ ﺍﺑﺘﺴﺎﻣﻪ ﻭﻗﺎﻟﻪ : ﺗﻌﺎﻝ .. ﻭﺻﻜﺮ ..
ﺩﻻﻝ ﺭﺷﻔﺖ ﻭﻗﺎﻝ : ﻣﻨﻲ ..
ﻋﻤﺎﺭ : ﺧﺎﻟﻚ ..
ﻫﺰﺕ ﺭﺍﺳﻬﺎ ﺑﺈﻳﺠﺎﺏ ..
ﺣﻂ ﻳﺪﻩ ﻉ ﺧﺪﻫﺎ ﻭﻫﻮ ﻳﻤﺴﺢ ﻋﻠﻴﻪ ﺑﻠﻄﻒ : ﺭﺩﻱ ﺑﺎﻟﻚ ﻣﻦ ﺻﺤﺘﻚ ..
ﺩﻻﻝ ﻫﺰﺕ ﺭﺍﺳﻬﺎ ﺑﺄﻳﺠﺎﺏ ..
ﻫﻮ ﺑﺎﺱ ﺭﺍﺳﻬﺎ ﻭﻗﺎﻝ : ﺧﺎﻟﻚ ﺑﻴﺠﻴﻨﺎ ..
ﺍﺑﺘﺴﻤﺖ ﺍﺑﺘﺴﺎﻣﻪ ﺧﻔﻴﻔﻪ ﻭﻭﺧﺮﺕ .
ﻭﻫﻮ ﻗﺮﺻﻠﻬﺎ ﺧﺪﻫﺎ ﻗﺮﺻﺔ ﺧﻔﻴﻔﻪ ..
ﻉ ﺟﻴﺔ ﻫﺎﻧﻴﺒﺎﻝ ﺍﻟﻠﻲ ﺗﻨﺤﻨﺢ ﻟﻤﺎ ﺷﺎﻓﻬﻢ ..
ﺣﻮﻝ ﻋﻤﺎﺭ ﻳﺪﻩ ﻃﻮﻝ ..
ﻭﻫﺎﻧﻴﺒﺎﻝ ﻗﺮﺑﻠﻬﻢ ..
ﺩﻻﻝ ﻃﻮﻝ ﻣﺸﺘﻠﻪ ﻭﺣﻀﻨﺎﺗﻪ ﻭﻗﻌﺪﺕ ﺗﺒﻜﻲ ..
ﻫﺎﻧﻴﺒﺎﻝ : ﺍﺷﺶ .. ﻫﺪﻯ ﺣﺎﻝ ﺍﻟﺪﻧﻴﺎ ﺩﻟﻮﻟﻪ .. ﺍﺩﻋﻴﻠﻪ ﺑﺲ ﺗﻮﺍ ..
ﻭﻋﻤﺎﺭ ﻳﺸﻮﻓﻠﻬﻢ ﻭﻫﻮ ﺧﺎﻳﻒ ﻫﻠﺒﻪ ﻉ ﺩﻻﻝ ..
ﺧﺎﻳﻒ ﺍﻟﺮﻋﺸﺔ ﻭﺍﻟﺤﺰﻥ ﻳﺪﻳﺮﻭﻟﻬﺎ ﺷﻲ ..
🍁 ﺑﻌﺪ ﺳﺄﻟﻬﺎ ﻫﺎﻧﻴﺒﺎﻝ ﻉ ﺣﺎﻝ ﺍﻣﻬﺎ ﺍﺧﺘﻬﺎ ... ﻭﻫﺪﺭﺯ ﻋﻠﻴﻬﺎ ﺷﻮﻳﻪ ﻫﻮ ﻭﺭﺍﺟﻠﻬﺎ ..
ﺧﺸﺖ ﺩﺍﺧﻞ .
ﻭﻫﻤﺎ ﺭﺟﻌﻮﺍ ﻃﻠﻌﻮﺍ ﻟﻠﺨﻴﻤﻪ ...
ﻋﻤﺎﺭ ﻋﻴﻨﻪ ﻃﻮﻝ ﺟﺖ ﻉ ﻧﺴﻴﺒﻪ ..
ﻟﻘﺎﻩ ﻳﻐﻤﺾ ﻓﻌﻴﻮﻧﻪ ﺑﺸﺪﻩ ﻭﻭﺟﻬﻪ ﺍﺣﻤﺮ ..
ﻃﻮﻝ ﻣﺸﺎﻟﻪ ﻭﻫﺎﻧﻴﺒﺎﻝ ﻟﺤﻘﻪ ﻭﻫﻮ ﻣﺶ ﻓﺎﻫﻢ ..
ﻋﻤﺎﺭ : ﺿﻐﻄﻚ ﺭﺍﻗﻲ ..
ﻗﻌﺪ ﻋﺒﺪﺍﺍﻟﺴﻼﻡ ﻳﻬﺰ ﻓﺮﺍﺳﻪ ﺑﺈﻳﺠﺎﺏ .
ﻭ ﺩﺍﺥ ..
ﻭﺍﻟﻜﻞ ﺍﻟﺘﻤﻮﺍ ﻋﻠﻴﻪ ..
ﻋﻤﺎﺭ ﻣﺎﺧﻼ ﺣﺪ ﻳﻤﺴﻪ ﺣﺘﻰ ﺧﻮﺗﻪ ..
ﻗﻌﺪ ﻳﺪﻭﺭ ﻓﺠﻴﻮﺏ ﻋﺒﺪﺍﻟﺴﻼﻡ ﻛﺎﻥ ﻓﻲ ﺩﻭﺍ ..
ﻭﻓﻌﻼ ﻟﻘﻲ .. ﻃﻠﻌﻪ ..
ﻭﺧﺪﻱ ﺣﺒﻪ ﻭﻋﻄﺎﻫﻮﻟﻪ ...
ﻭﺳﻂ ﺻﺪﻣﺔ ﺧﻮﺗﻪ ﻭﻧﺴﺎﺑﺎﺗﻪ ﻭﻋﺪﺍﻳﻠﻪ ..
ﻛﻠﻬﻢ ﻣﺎﻛﺎﻧﻮﺵ ﻳﻌﺮﻓﻮﺍ ﺍﻥ ﻋﺒﺪﺍﻟﺴﻼﻡ ﺟﺎﻩ ﺍﻟﻀﻐﻂ ..
🍃🍃🍃🍃
ﻛﺎﻥ ﻳﻮﻡ ﺻﻌﺐ ﺟﺪﺍ ..
ﻭﻣﻌﺮﻭﻓﻪ ﺍﻳﺎﻡ ﺯﻱ ﻫﺎﺩﻱ ﻣﺎﻓﻴﺶ ﺍﺻﻌﺐ ﻣﻨﻬﺎ ..
ﻓﺎﺕ ﻫﺎﻟﻴﻮﻡ ...
ﻭﺗﺒﻌﻪ ﻳﻮﻡ ... ﻭﺑﻌﺪﻩ ﻳﻮﻡ ...
ﻧﻬﺎﺭ ﺍﻟﻔﺮﻕ ...
ﺟﻮ ﺭﺍﻧﻴﺎ ﻭﺭﺑﺎﺏ ﻣﻊ ﺍﻣﻬﻢ ﺑﺶ ﻳﻮﺍﺳﻮﺍ ﺑﻨﺎﺕ ﺧﺎﻟﺘﻬﻢ ﻓﻲ ﺣﺰﻧﻬﻢ ..
ﻭﺟﻌﻬﻢ ﺣﺎﻝ ﻧﻮﺭ ﻭﺣﺎﻟﻪ ﺍﻟﺼﺪﻣﻪ ﺍﻟﻠﻲ ﻛﺎﻧﺖ ﻓﻴﻬﺎ ..
ﺩﻣﻮﻋﻬﺎ ﻣﺎﺑﻄﻠﻮﺵ ﻧﺰﻭﻝ ﻭﻃﻮﻝ ﺍﻟﻮﻗﺖ ﺳﺎﻛﺘﻪ ..
ﻭﻟﻴﻦ ﺑﺘﺠﻲ ﺗﺮﻗﺪ .. ﺗﺮﻗﺪ ﻓﻲ ﺩﺍﺭ ﺟﺪﻫﺎ ﻭﺣﻨﺎﻫﺎ ﻣﻌﺎﻫﺎ 🍃
ﺭﺍﻧﻴﺎ : ﺭﺩﻭﺍ ﺑﺎﻟﻜﻢ ﻉ ﻧﻮﺭ ﻭﺿﻌﻬﺎ ﻣﺎﻳﻄﻤﻨﺶ ..
ﺩﻻﻝ ﻭﻫﻲ ﺗﺸﻮﻑ ﻷﺧﺘﻬﺎ : ﺣﺘﻰ ﺍﻧﻲ ﺧﺎﻳﻔﻪ ﻋﻠﻴﻬﺎ ﻫﻠﺒﻪ ..
ﺭﺑﺎﺏ : ﻣﺎﺗﺨﻠﻮﻫﺎﺵ ﺑﺮﻭﺣﻬﺎ ﺧﻠﻴﻜﻢ ﺩﻳﻤﺎ ﻣﻌﺎﻫﺎ ..
ﺩﻻﻝ ﺯﺍﺩﺕ ﺧﺎﻓﺖ ﻭﻫﺰﺕ ﺭﺍﺳﻬﺎ ﺑﺈﻳﺠﺎﺏ ..
🍁🍁🍁
ﺍﻟﻴﻮﻡ ﺍﻟﻠﻲ ﺑﻌﺪﻩ ..
ﺗﺴﻘﺪﻭﺍ ﻫﺎﻧﻴﺒﺎﻝ ﻭﻣﻴﻼﺩ ﻭﺭﻭﺣﻮﺍ ﺑﺮﻣﻀﺎﻥ ﻭﻓﺎﻃﻤﻪ ﻭﻣﻌﺎﻫﻢ ﺳﻌﻴﺪﻩ ..
ﺍﻟﻠﻲ ﺍﺑﺪﺍ ﻣﺎﺟﺘﺶ ﺟﻬﺔ ﺯﻳﻨﺐ ﻭﻻ ﻋﺰﺗﻬﺎ ..
ﻭﺯﻳﻨﺐ ﻟﻮﻻ ﺣﺎﻟﺔ ﻫﺎﻟﻮﻓﺎﻩ ﻣﺎﻗﻌﺪﺕ ﻓﻤﻜﺎﻥ ﺳﻌﻴﺪﻩ ﻓﻴﻪ ..
🍁🍁🍁🍁🍁🍁
ﻫﻲ ﺑﺴﺮﻋﻪ ﻳﺎﻏﺎﻟﻴﻪ ...
ﻟﺒﺴﺖ ﻭﺷﺎﺣﻬﺎ ﻭﻃﻠﻌﺖ ﺗﺠﺮﻱ ...
ﻣﺸﺖ ﺭﻛﺒﺖ ﺍﻟﺴﻴﺎﺭﺓ ﻣﻊ ﺍﻟﻬﺎﺩﻱ ﻭﻣﻌﺎﻫﻢ ﺳﻤﻴﻪ ﺍﻟﻠﻲ ﻛﺎﻧﺖ ﺗﺄﻥ ﻭﺗﻌﻴﻂ .. ﺧﻼﺹ ﺑﺘﺠﻴﺐ ..
🍁🍁🍁🍁🍁
ﻃﻠﻌﺖ ﻣﻦ ﺍﻟﺤﻤﺎﻡ ﻣﺸﺖ ﺑﻄﺮﻳﻘﻬﺎ ﻟﻠﺪﺍﺭ .. ﺑﺶ ﺗﺸﻮﻑ ﺍﺧﺘﻬﺎ ﺍﻟﻠﻲ ﺧﻠﺘﻬﺎ ﻣﻘﻌﻤﺰﺓ ﺗﺸﺮﺏ ﻓﻲ ﺍﻟﺤﻠﻴﺐ ﺑﺎﻟﺴﻴﻒ ..
ﻛﺎﻧﺖ ﺭﺍﻓﻀﻪ ﺗﺎﻛﻞ ﺍﻱ ﺷﻲ ..
ﻟﻜﻦ ﻟﻤﺎ ﺧﺸﺖ ﻟﻘﺖ ﺍﺧﺘﻬﺎ ﻃﺎﻳﺤﻪ ﻉ ﺍﻟﻔﺮﺍﺵ ﻭﺍﻟﺤﻠﻴﺐ ﻣﺘﺒﺰﻉ ..
ﺩﻻﻝ ﺑﻌﻴﺎﻁ : ﻣﺎﺍﺍﺍﺍﻣﺎ ...
ﻛﻠﻬﻢ ﺟﻮﺍ ﻳﺠﺮﻭﺍ ﻟﻠﺪﺍﺭ ..
ﻟﻘﻮﺍ ﺩﻻﻝ ﺣﺪﺍ ﻧﻮﺭ ﺗﺤﺎﻭﻝ ﺗﻨﻮﺿﻬﺎ ﻭﻫﻲ ﺗﺒﻜﻲ ﻭﻧﻮﺭ ﻓﺎﻗﺪﻩ ﺍﻟﻮﻋﻲ ﺗﻤﺎﻣﺎ ...
ﺧﻮﻟﻪ ﻋﻤﺘﻬﺎ ﻣﺎﻫﻤﻬﺎ ﻣﻦ ﻫﺪﺍ ﻛﻠﻪ ﺍﻻﻃﺎﺳﺔ ﺍﻟﺤﻠﻴﺐ ﺍﻟﻠﻲ ﺗﺒﺰﻋﺖ ﻉ ﺍﻟﺒﺴﺎﻁ ﻭﻗﻌﺪﺕ ﺗﺸﻮﻓﻠﻬﺎ ﺑﻐﻞ ..
🍁 ﻛﻠﻤﻮﺍ ﺑﻮﻫﺎ ..
ﻭﻃﻮﻝ ﺭﻓﻌﻮﻫﺎ ﻟﻠﻤﺴﺘﺸﻔﻰ ..
ﻃﻠﻊ ﺿﻐﻄﻬﺎ ﻫﺎﺑﻂ .. ﻭﻋﻨﺪﻫﺎ ﺳﻮﺀ ﺍﻟﺘﻐﺬﻳﻪ ..
ﺭﻛﺒﻮﻟﻬﺎ ﻛﻴﺲ ﺗﻐﺬﻳﻪ ...
ﻭﻗﺎﻟﻮﺍ ﺍﻧﻬﺎ ﻻﺯﻡ ﺗﺒﺎﺕ ﻓﻲ ﺍﻟﻤﺴﺘﺸﻔﻰ ..
🌴 ﻭﻓﻲ ﻣﺴﺘﺸﻔﻰ ﺗﺎﻧﻲ ﻓﻲ ﻣﺪﻳﻨﻪ ﺍﺧﺮﻯ ..
ﺟﺎﺑﺖ ﺳﻤﻴﻪ ﻭﻟﻴﺪ ... ﻭﺗﻌﺒﺖ ﻫﻠﺒﻪ ﻓﻲ ﺍﻟﻮﻻﺩﺓ ﺍﻟﻠﻲ ﻛﺎﻧﺖ ﻃﺒﻴﻌﻴﻪ ..
ﻓﺮﺡ ﺍﻟﻬﺎﺩﻱ ﻫﻠﺒﻪ ..... ﻣﺶ ﺻﻐﻴﺮ ﻓﻲ ﺳﻨﻪ ...
ﻋﻤﺮﻩ 36 ﺳﻨﻪ 🍃...
ﻭﻓﺮﺣﺎﻥ ﺍﻟﻠﻲ ﺩﺍﺭ ﻋﻴﻠﻪ .. ﻭﺻﻐﺎﺭ .. ﺑﻌﺪ ﺻﺒﺮ ﻭﻃﻮﻝ ﺍﻧﺘﻈﺎﺭ ..
🍁🍁🍁🍁🍁
ﻓﻲ ﺍﻟﻄﺮﻳﻖ ..
ﻳﺠﺮﻱ ﺟﺮﻱ ﺑﺎﻟﺴﻴﺎﺭﺓ ...
ﻛﻔﺎﻳﻪ : ﻣﺎﻟﻚ ﻭﻟﺪﻱ ﺑﺘﻘﺘﻠﻨﺎ ﺭﺍﻫﻮ ..
ﻭﻻﻛﺄﻧﻪ ﻳﺴﻤﻊ ﻓﻴﻬﺎ ...
ﻳﻔﻜﺮ ﻓﻴﻬﺎ ﺑﻜﻞ ﺣﻮﺍﺳﻪ ﺑﻴﻤﻮﺕ ﻣﻦ ﺧﻮﻓﻪ ﻋﻠﻴﻬﺎ ..
ﺍﻣﻪ ﻛﺎﻧﺖ ﺗﺸﺒﺤﻠﻪ ﺑﻌﺪﻳﻦ ﺿﺤﻜﺖ ﻭﻗﺎﻟﺖ؛ﻣﻨﺠﻮﻩ .. ﻗﺼﺪﻙ ﻧﻮﺭ ﺑﺘﻮﻟﻲ ﻛﻨﺘﻲ ؟ !
ﺿﺤﻚ ﻭﻫﻮ ﻳﺤﺮﻙ ﻓﺮﺍﺳﻪ ﻳﻤﻴﻦ ﻭﻳﺴﺎﺭ ..
ﻛﻔﺎﻳﻪ : ﻫﻬﻬﻬﻬﻬﻬﻬﻬﻪ .. ﻃﻠﻊ ﻋﻨﺪﻙ ﻗﻠﺐ ..
ﻣﺎﻟﻚ ﺑﻀﺤﻜﻪ؛ﻳﺎﻡ ﺧﻠﻴﻨﻲ ﻧﺴﻮﻕ ..
ﻛﻔﺎﻳﻪ ﺿﺤﻜﺖ ﻭﻫﻲ ﺗﻐﻨﻲ : ﺳﻮﺀ ﻉ ﻣﻬﻠﻚ ﺳﻮﺀ
ﺑﻜﺮﺍ ﺍﻟﺪﻧﻴﺎ ﺗﺮﻭﺀ ..
ﻭﻣﺎﻟﻚ ﻳﻀﺤﻚ ﻭﺧﻼﺹ ...
🍁🍁🍁🍁
ﻛﺎﻧﺖ ﺍﺿﻢ ﻓﻲ ﺍﻟﺤﻮﺵ ﻟﻤﺎ ﻃﻖ ﺑﺎﺏ ﺣﻮﺷﻬﺎ ..
ﺳﻴﺒﺖ ﺍﻟﻠﻲ ﻓﻴﺪﻫﺎ ﻭﻣﺸﺖ ﻓﺘﺤﺖ ﺍﻟﺒﺎﺏ ..
ﻟﻘﺖ ﻋﺰﻭﺯﺗﻬﺎ ﻗﺪﺍﻣﻬﺎ ..
ﺣﻤﻴﺪﻩ ﺑﺈﺑﺘﺴﺎﻣﻪ : ﺻﺒﺎﺡ ﺍﻟﺨﻴﺮ ﻋﻤﺘﻲ ..
ﺳﺎﻟﻤﻪ ؛ﺧﻴﺮ .. ﺷﻦ ﺍﺩﻳﺮﻱ؟
ﺣﻤﻴﺪﻩ : ﻧﻀﻢ ﻓﻲ ﺍﻟﺤﻮﺵ ...
ﺳﺎﻟﻤﻪ : ﺍﻣﻤﻤﻢ .. ﺑﺎﻫﻲ ﺳﻴﺒﻲ ﺍﻟﻠﻲ ﻓﻴﺪﻙ ﻭﺗﻌﺎﻟﻲ ﺿﻤﻲ ﺍﻟﺤﻮﺵ ﺍﻟﺪﻧﻴﺎ ﻣﻘﻠﻮﺑﻪ ﻗﻠﺐ ﻭﺍﻧﻲ ﺍﻟﻴﻮﻡ ﺗﺎﻋﺒﻪ ﻭﻇﻬﺮﻱ ﻧﺎﻳﺾ ﻋﻠﻴﺎ ..
ﺣﻤﻴﺪﻩ ﺑﺈﺑﺘﺴﺎﻣﻪ : ﻻﺑﺎﺱ ﻋﻠﻴﻚ ﻋﻤﺘﻲ .. ﺷﻮﻳﻪ ﻧﻜﻤﻞ ﻭﻧﺞ ...
ﻗﺎﻃﻌﺘﻬﺎ ﻫﻲ ﻭﺗﻘﻮﻝ ﺑﺤﺪﻩ : ﺍﻧﻲ ﻗﺘﻠﻚ ﺗﻌﺎﻟﻲ ﺿﻤﻲ ﺍﻟﺤﻮﺵ .. ﻛﻼﻣﻲ ﻣﺎﻧﺤﺒﺶ ﻧﻌﺎﻭﺩﻩ ...
ﺗﻼﺷﺖ ﺍﺑﺘﺴﺎﻣﻪ ﺣﻤﻴﺪﻩ ﻭﻗﺎﻟﺖ ﺑﻨﺒﺮﺓ ﻣﺨﻨﻮﻗﻪ : ﺣﺎﺿﺮ ..
ﺳﺎﻟﻤﻪ : ﻧﻮﺻﻞ ﺑﺎﺏ ﺍﻟﺤﻮﺵ ﻧﻠﻘﺎﻙ ﺣﺪﺍﻱ ..
ﻭﻟﻔﺖ ﻭﻣﺸﺖ ..
ﻭﺧﻠﺖ ﺣﻤﻴﺪﻩ ﻓﺤﺎﻟﻪ ..
ﻣﻦ ﺍﻟﺼﺪﻣﻪ .. ﻭﺍﻟﺨﻮﻑ ..
ﻣﻦ ﺑﻌﺪﻳﻦ ....
.... ﻳﺘﺒﻊ
