#العشق_المتمرد "اختبار"
الجزء114 القسم الاخير
#جمان_فريد
🌟..
بعد المشكله اللي صارت..اللي هدا لهي فحاجه وحاولوا ع قد مايقدروا يغيروا الجو بالذات للحاجه فاطمه ومرام مسكينه اللي حاسة بالذنب..هي مش عارفه شن دارت قعدت تراجع فكل تصرفاتها من اول ماجت من حوش اهلها بالك دارت تصرف مش مزبوط ومش مقصود تسبب في هالمشكله..
قعدت تراجي ع نار امتى يروح راجلها بش تفهم منه ..
بالزبط الساعه 6:30 العشيه روح..
بعتلها مع نورهان بش تحطله غداه..
مرام:وينه خالك حبيبتي؟..
نورهان:في المربوعه..
مرام:اللي فالحوش..
نورهان :ايه ..
مرام :باهي حبيبتي شكرا..
نورهان:عفوا..
مشت نورهان طلعت من حداها..
ومرام ناضت بصعوبه ومشت طلعت من الدار بطريقها للكوجينه..
وهي خاطمه من الصاله اللي مقعمزات فيها النساوين والبنات..
غاليه:ارتاحي مرام تو نعدي اني نحطه..
مرام :لا والله ماصايرة ياغاليه ارتاحي..
وفاتت من حدا باب المروحه..
غاليه شبحت لخواتها..
وسميه اللي مقعمزة معاهم كانت تراقب فنظراتهم وحاسه ان في شي صار بالذات من مرواحة زينب فجأة..
تنهدت كفايه وقالت؛كان اديرولنا قهيوه..
غاليه:بندير غير نراجي فلميا تجي..
مطت كفايه شواربها بملل وسميه لاحظتها..
في المربوعه..
هانيبال سخن وهو في المربوعه ناض بيولع المكيف..
مشي قبلها بيسكر الروشن..
وين وصل فيه وجاي بيصكره شبح برا قابلوه في الجردينه دلال وعماد واقفين مع بعض ويهدرزوا..
استغرب..وقعد واقف يشوفلهم..
فالجردينه..
عماد وهو متفاجئ:بجديات..مش عارف شن نقولك!..
دلال:ايه فاهمه وعارفه انت فشن تفكر توا..بس بجديات عماد والله هلبه طلعوا حيين في قصص اني سمعتها من اصحابها بوداني ياعماد..
حك عماد حاجبه وقال:ع حسب علمي ان خبر موته اكيد يادلال..
دلال؛لامافي شي اكيد ياعماد مادام ماريناش بعيونا مافي شي اكيد..
شبك عماد ايديه فبعض وهو يوزع فنظره ع الجردينه ويفكر..
دلال برجاء:انت غير حاول بالله عليك..هي محاوله بس..
شبحلها...نظرة عيونها اللي كلها امل وتوسل..وجعاته ع الآخر..
غير عيونه عنها بعدين مسح ع لحيته وقال:باهي..تو نحاول..
ابتسمت دلال بفرح وعيونها معبيات دموع قالت:ربي يجبر بخاطرك يارب..
شبحلها وهو مبتسم بألم قال:خلاص..اني خاطري معاش ينجبر يادلال..
تلاشت ابتسامتها ومسحت دموعها وقالت:عماد..خيرك؟..
تنهد وقال بحسرة:ماعاد فيها خير يادلال..ولد خالتك ياوخيتي مادارش فروحه خير ولاعاد مازال يشبح خير..
دلال:ماتقولش هكي عماد..بعدين الخيره في مااختاره الله..
عماد حرك راسه ايمين ويسار بالنفي وقال وهو مبتسم بألم:هدا اختياري اني يادلال..اني اللي اخترت لروحي نعيش مقهور لأخر يوم فعمري..
دلال انوجعت ع خاطره..قالتله:عماد..في النهايه ياوخيي..نصيب..الله غالب صار اللي صار..حاول تشوف للي انت فيه بنظرة مختلفه..قرب من خطيبتك اكثر..حاول تحبها..ماتعرفش مرات تنسى وتعيش حياتك سعيد ومرتاح..
عماد ابتسم بتهكم وقال:كلامك هدا يزيد يأكدلي ان احتمال عمار يطلع حي ممكن يصير ولا ترجعلي..غمض عيونه بشده وسكت وهو يبلع فريقه بمراره..فتحهم بعدين قال..خلاص..خلاص..زي ماقلتي اللي صار صار..ع العموم اني حنسعالك في الموضوع ع قد مانقدر..ويارب نعرف شي يفرحك..
دلال بإبتسامه رجاء:يااارب..
في هالوقت..
درست سيارة عمر حدا السروله..
نزلت لمياء..
وعمر تحرك..ومشي..
ركبت لمياء الدرجتين وقعد تمشي في المستراح وهي توزع فنظرها حواليها..
جو عيونها ع الجردينه لمحت عماد ودلال فيها..واقفين ع بعض بعدين..
تفارقوا...
عماد مشي وهو يضحك..
ودلال مشت وهي مبتسمه..
طول غيرت عيونها وشبحت القدام وكملت طريقها وهي رافعه حاجبها وتفكر في اللي راته..
ركبت الركابه..
وصلت فم الباب..
وقفت لما سمعت صوت دلال ينادي:مرت خالي..
التفتت بعد تصنعت ابتسامه وقالت:دلوله شن جو..
دلال:تمام الحمد لله..توا جيتي؟..
لمياء:امم..توا..
ع طلعة مرام بالصفره متاع الغدي:هلا لميا شنو حالك..
لمياء شبحتلها وقالت:تمام..انتي شن حالك..
مرام:الحمد لله..ومشت للمربوعه..
دلال:هي تعالي نخشوا..
لمياء:هي..
وخشوا الزوز من الباب وطول للصاله..
لمياء بإبتسامه:السلام عليكم..
كلهم ردوا بأصوات متقطعه:وعليكم السلام..
مشت طول لكفايه تسلم عليها..
غاليه:دلال وين كنتي من بكري ندور فيك..
لمياء وهي تسلم ركزت ع سؤال غاليه..
دلال بشي من الربكه:كنت ندهور في الجردينه..
غاليه:اها..
ومشت دلال قعمزت حدا امها...
اللي جتها لمياء تسلم عليها وهي تسرق فالنظر لدلال بطرف العين..
بعد سلمت ع الكل قعمزت حدا سلفتها وهي تشوف لدلال قالت فنفسها"شكلك نويتي ترمي العده وعيونك مامتدوا غير لحاجة غيرك..ايه ماهولما خطب برانيه نزلت فيه الحليوة!!لو يطلع اللي فبالي صح ياويلها "..
🍃عقل وحده زي لمياء شن بيجيبلها يعني!!..وفالنهايه مقيوله..كل حد يشوف الناس بعين طبعه🍃
🍁🍁🍁🍁
كان خاطرك كولي..
ضحكت وقالت:ماخاطريش..كول انت صحتين..
قعد ياكل وهو ساكت وملامح وجهه عاديه..
هي بش ماتعقداش..
فتحت تليفونها ولهت بيه لبين مايكمل ماكله..
هانيبال بلع وقال:عدي خشي داخل مرات يجي حد
يجي توا يخش هنى..
هي شبحتله شويه بعدين قالت:باهي بعدين نبيك تتمشى معاي في الجردينه باهي؟..
هانيبال هز راسه بإيجاب وهو ياكل وعيونه فالصونيه..
هي تنهدت وناضت بصعوبه وقفت وهو يشوفلها بطرف العين..
قعد معاها لين وصلت للباب وفتحاته وطلعت..
لما جت بتصكر الباب شبحتله نزل عيونه طول للصونيه..
صكرت الباب وهي مضايقه شبه تأكدت ان اللي صار بسببها..
مشت خشت للحوش..
وقعمزت معاهم فالصاله وعيون سميه ولمياء معاها..
🍁🍁🍁🍁
واقف ع المرايه..
يبخ فعطره..
بعد بخ منه حطه ع الزيانه..
ووخر طرف زمالته وخلاها ع كتفه..
ومشي طلع من الدار..
وهو ماشي سمع صوت التلفزيون..
ضيق عيونه بإستغراب بعدين مشي للصاله..
وقف ففمها لقاها مقعمزة تتفرج وشكل وجهها يوحي بأنها معصبه..
مؤنس:رباب ..مش قلتي بتعدي لحوش جدك؟..
رباب:ماصارش..
مؤنس:ليش!؟..مريضه..تحسي فحاجه؟..
رباب:لالا غير معاش خاطري نمشي وخلاص..
شبحلها شويه بعدين قال؛باهي براحتك..بس بعد نروح نهدرزوا..
هي اللي كانت ترد عليه بدون ماتشبحله هزت راسها بإيجاب..
هو قرن حواجبه وهو يشوفلها بعدين مشي..
🍁🍁🍁🍁
في الكوجينه..
ريتي رباب قبل بتجي العشيه وماجتش..
دلال؛كلمتيها؟..
غاليه:ايه ومابتش ترد..
دلال :قصدك عرفت باللي صار وخدت موقف؟..
غاليه:وهو في غير هكي..
تنهدت دلال وقالت:لاحول ولاقوة الا بالله وخلاص..
🍁🍁🍁
الساعه 8:00مساءا..
في وحده من الديار..
لااالاااا؟!..
سميه:زي مانحكيلك.
لمياء:حتى اني لاحظت زينب موطيه عينها ع مرام بس مش عارفه علاش..
سميه:حتى اني مانعلم..لكن اظن ع خاطر هانيبال متغير..
لمياء رفعت حاجبها وقالت؛متغير؟..
سميه :ايه..لأن هانيبال كان مهتم بخواته وصغارهم واجد عكس توا..ماعنده كان ..مرووومه..قالتها بسخريه..
ضحكت لمياء وقالت؛مررومه هادي حيه من تحت تبن..تتمسكن بش تتمكن..دير فطروح العقاله بش توصل للي تبيه..
سميه:صحه ليك وحتى اني هكي نشوف فيها..
ع خشة نعيمه..
نعيمه:لميا عمر يبيك فم البوابه..
ناضت لمياء ومشت طلعت بسرعه...
وقعدت سميه في الدار تشوف لنعيمه كيف اطبق في دبشهم المغسول اللي مدخلاته..
نعيمه:بنية ولا وليد ياسميه..
سميه بضحكه:والله لعند توا ماشفت..
نعيمه رفعت حواجبها وقالت؛معقوله؟!خاشة سادس توا ومش عارفه بشن حامل؟!..
سميه :والله مانعرف..
ضحكت نعيمه وقالت؛تبيها مفاجأة..
سميه ضحكت مجامله وقالت:ايه..
🍁لامفاجأة ولاغيره..جنس الجنين بنت وهي ماتبيش تقول لانها كانت تبيه ولد تزيد تنفش ريشها بيه قدام سلفاتها..
لكن سيورها بتجيبها..وسيورهم يعرفوا..
🍁🍁🍁🍁
في الجردينه...
خيرك شن تبي؟..
مرام:هانيبال اللي صار الصبح بسببي؟..
هانيبال حرك راسه يمين ويسار نافيا وهو يشبح لشجرة الليمون ويقول:تس..تس..
مرام؛اكيد!!..
شبحلها وقال؛مانعرفكش عش ..
ضحكت وقالت:مش هكي هانيبال...تبدلت ملامحها للضيق وقالت..نبي بالي يرتاح بس..
ابتسم ع جنب وقال؛والله ماليك دخل بيني وبين اختي عركه عاديه..
مرام؛باهي نقدر ندخل ونحلها..
هانيبال؛نعرف نحل مشاكلي بروحي ماتعبي روحك..توا بس فكري فالحوش وجيابك..وبس..بس..
مرام ابتسمت وقالت:حاضر..
هانيبال ابتسم بعدين اشر بعيونه ع شجرة الليم وقال:نقطفلك منه..
مرام التفتت وشبحتلها وقالت؛علاش؟..
هانيبال؛بيش تعصريه وتشربيه ويخف التوتر..
شبحتله وهي تضحك وتحرك فراسها ايمين ويسار..
وهو يضحك معاها ويشبح لشجرة الليمون..
🍁وصاحبة الشجره..
كانت مقعمزة فوق سطوح حوشهم اللي كان سياجه عالي مانع لرؤية اي حد يركب فوق..
بس لكل قانون ثغره..
ولهالسياج كان فيه ثغره..باينه منها عينها الخضراء وهي تشوف لحببيها اللي كان يسلم ع الولاد قبل يروح..
بعد سلم عليهم راته جاي لسيارته ..
لما وصل فسيارته شبح لحوشهم شويه..
بعدين نزل راسه..
وركب سيارته..صكر بابها..
وشغلها..
وشويه وتحرك..
وهالعيون الخضراء الحور..
ذرفوا دموعهم...بألم...
🍃اه مصعبه من شعور يحسه البني آدم لما يقعد يتفرج ع اللي يعشقه من بعيد لبعيد..ممنوع الإقتراب..ممنوع اللقاء حتى العابر..ومرات ممنوع حتى النظر يقعد بالسرقه ياخد فيه🍃
🍁🍁🍁🍁
وجي تاني يوم..
واللي كانوا قاعدين روحوا كلهم..
وجوهم كلهم معكر من المشكله اللي صارت..
وقعدوا حميده وغاليه بروحهم مع همومهم من جديد..
غاليه لما جوا خواتها تناست بهم وجعها..
ومجرد ماروحوا..
حست بألمه مرة تانيه وماقدرتش تتجاهله..
كان في صابون مكدس من لما طلعوا ولعت عليه..
وفي نفس الوقت قلبت الحوش كله ومعاها حميده والزوز كانوا يبوا يلهوا بأي شي..
وقعدوا من حاجه لحاجه..
من حاجه لحاجه..
وفي حاجات هما اختلقوها اختلاق بش يلهوا بيها..
قعدوا هكي لين جي وقت المغرب..
كانت غاليه تحمي فالخبزة
وحميده لاهيه بالعشي..
والزوز يذرفوا في الدموع
وامهم اللي كانت مقعمزة فم البوابه برا تسبح وتراجي في المغرب وهي واكله همهم هلبه
لعند مايأذن المغرب وتصلي في المستراح فالبرودة..
آذن المغرب..
غاليه وهي قايمه صونيه الخبزة وماشيه للحوش قعدت تردد ورا الآذان خطمت حدا حوش خوها..
ع جية سعيده من وراها مروحه من حوش اهلها..
سعيده:غاليه..
وقفت غاليه والتفتت..
سعيده:كيف حالك تو..
غاليه:الحمد لله وانتي..
سعيده:الحمد لله..بالله غاليه بننشدك ع مرام قاعده؟..
غاليه:لامرام اليوم من الصبح طالعه يشروا هي وهانيبال فأثات حوشهم وبيروح بيها طول لحوش هلها بتبات غادي الليله..
سعيده بأسف:امم..باهي...مانعطلكش تو..هي بالسلامه..
غاليه:بالسلامه..
خشت سعيده لحوشها..
وغاليه كملت طريقها لممر فم البوابه وهي تفكر فالسبب اللي تبي سعيده مرام ع خاطره..
اقناع رزان بأصيل.
خشت للحوش..
طول للكوجينه..
لقت حميده واقفه وسرحانه..
حطت صونيه الخبزة وقالت؛حميده وين حنين؟..
حميده استاقضت وشبحتلها وقالت:تتفرج ع التلفزيون..
حميده لما تكلم فغاليه لاحظت عيونها كيف موليات حمر من البكي..
وغاليه مشت طول تشوف فطنجرة الغدي...
خلتها ع راحتها..باقي اليوم..
لين جي نص الليل...
رقدت بنتها..
وناضت من مكانها..
ومشت طلعت من الدار..
طول لفم البوابه..
واللي توقعاته شافاته..
غاليه مقعمزة غادي تبكي..
لما رتها مسحت دموعها طول..
طلعت حميده وهي تقول؛ليش تمسحي فيهن ياغاليه وعيونك اللي رايحات حمر منهن فاضحينك..
قعمزت حميده جنبها..
غاليه نزلت عيونها لوطا وقعدت تلعب ببطم قفطانها من التوتر..
حميده؛غاليه...سيبتوا..
شبحتلها طول بنظرة ألم ودموعها نزلوا..
حميده بحزن:هو نفسه؟..
غاليه بألم:ماكان في بيني وبينه شي..صداقه..بس..
شبحت القدام وقالت..هو حاول..بلعت ريقها..قصدي كان يعبر عن مشاعره ويقولي..فكلام حب وهكي..ضيقت عيونها بألم وقالت..لكن اني عارفه انه مستحيل مايجيش والله مايجي..صديته واجد..وهو استسلم وقال..انه يبي يقعد صديق بس..لعند ماجت ليلة العيد..عرفت انه خطب..بلعت ريقها تاني وقالت..بعتتله رساله باركتله..تعرفي شن رد عليا..
حميده بدموع:شنو؟..
غاليه بصوت مخنوق:معاش تتواصلي معاي مرة تانيه عارفه وضعي توا...سلام..
سمحت حميده دموعها وقالت:باهي انتي شن كنتي متوقعه!؟مش قلتي صدتيه!..
غاليه بنبرة باكيه:يعني حميده لو ماصدتيه كان حيصير منا اني وياه؟!!
شبحت القدام حميده ودموعها رجعوا نزلوا..
غاليه شبحت القدام حتى هي وقالت:بيني وبينه 16عام مستوعبه!..تي مستحيييل مستحييل..
حميده:حبتيه..
قلب غاليه انعصر..
حكت عينها بكف يدها وهي تبكي قالت بصوت يدوب طلع:مانعلمش..والله ماندري..
حميده انوجعت ع الآخر..
تلفتت وقامت عيونها لروشن حوش خوها وقالت:ليوم الدين سعيده والله مامسامحتها..ليوم الدين..
غاليه رشفت وقالت:نصيب ياحميده كله نصيب مقدر من ربي لامنها ولامن غيرها...
حميده حطت ايدها ع وجهها وقعدت تبكي بقوة وبكتمان..
وغاليه اتكت براسها ع الحيط وهي تشوفلها ودموعها ينزلوا..
حطت يدها ع ظهر اختها وقعدت تمسح عليه..
🍃تواسي فيها وهي تبي من يواسيها🍃
وسعيده..
اللي قعدت ترقد فدار رمزي من لما روح بوه من آخر زيارة وخبرها عن حاله..
كانت تسمع فيهم وتبكي بصمت..
كان اقصى امنيات سعيده وقتها..
لو الزمان يرجع بس..
اه لو يرجع لمرة وحده بس..
لكن مستحيل...مستحيل...
🍃ياريت لو كلنا نفكروا فايام الندم اللي حنعيشوها قبل مانرتكبوا ظلم فحق خلق الله...ياريت🍃
🍃🍃🍃🍃
ويعدي اسبوع من هداكا اليوم...
اثث فيهم هانيبال نص حوشه..
قعدوا دارين بس فاضيات..
وسكنوا هو ومرته...
🍁واخيرا استقروا..استقرار تام...
وارتاحوا..
وقعد شغل هانيبال الشاغل ولادة مرام ومايتبعها..
بس اللي مايتبعها اصرت مرام اصرار قوي انه مايدخلش فيه مصاريف لمة العيل كلها عليها هي..
وهو وافق ع مضض...
مامشاش حد شاف حوشه اخطا غاليه وامه..ويدوب شربوا طاسه عصير وروحوا..
ع قد ماشدوا فيهم رفضوا يقعدوا امه ماتبيش تكلف عليه عارفاته حط اللي هناك في الأثات وتوا القرش هو وعويلته اولى بيه..
🍁جلسة الصاله تبارك الله كبيرة وسمحه واجد..
حميده:شن لونها؟..
غاليه:لونها كيف الموف الغامق واجد..
حميده:والفرشات؟..
غاليه:البساط نفس لون الجلسه اما الفرشه كريمي فالغامق لان مخاد الجلسه كريمي فالغامق..
حميده:امم..باهي والكوجينه؟..
غاليه؛دائريه...وكامله كل شي فيها..وحتى الحمامات السيراميكا متاعهن سمحه..وفي واحد منهم جاكوزي..
حميده بضحكه:اضربي يابنت عبوده..
غاليه بضحكه:حتى هو هانيبال مايديرش اي شي..خل نكملك الباقي..
وقعدت غاليه تحكي عن باقي تفاصيل الحوش لحميده اللي تسمع بفضول..
عكس زينب..
اللي رافضه تسمع اي شي عن هانيبال..
زينب بعصبيه:معاش تجيبيلي سيرته ياكفايه بالله عليك ماتخلنيش نديرها معاك حتى انتي..
كفايه بضيق:باهي خلاص..نغيروا الموضوع..ايه قوليلي شن دايرة فيك رقبتك..
زفرت زينب وقالت:متعبتني ياكفايه..
كفايه:عايني باهي..
زينب؛خايفه يطلعولي فيها قصه ووالله مانا فبابها بكل..
كفايه:زينب..نعاينك اني..
زينب بتفنيصه:تبي خيري يطلقني؟!!لالا وخيتي..وجع وياخد ايام ويمشي ع حاله...
كفايه تنهدت وقالت:ع راحتك..باهي رانيا تعاون فيك؟..
زينب:ايه لما تفضى تعاون..حتى هي المشروع مبهدلها ديما تخدم عليه..المجسم متاعه شردها تشريد..واستاذها الباين عليه واعر..
كفايه:ربي يعاونها وينجحها..
زينب:آمين..
🍁🍁🍁🍁
عدلي فيه اللي قتلك عليه رانيا وجيبيه يوم الخميس..
هزت راسها بإيجاب ودموعها قريب ينزلوا ..
زين مركز عليها من لما جت وهي مش مزبوطه..
صكر اللاب وقال؛رانيا اشبحيلي..
قامت عيونها اللي كانوا معبيات دموع بس نظرتهم قويه..
زين؛صايرة معاك حاجه؟..
تنهدت بألم ونزلت عيونها طول دموعها طاحوا ومسحتهم بسرعه..
زين قرن حواجبه بخوف وقال:رانيا شن في خيرك؟..
رانيا من قوة وجع قلبها ع رمزي..
لقت روحها تحكي وتقول فكل شي عن حالته لزين..
تحكي وتحكي..
وزين ينوجع منها وعليها..
عرف اكثر..حجم حبها لرمزي..
ايه صح...هي ماقالتش نحبه..
ولما تتكلم عنه تقول ولد خالي..
بس اللي فيه حاليا يكفي ليعبر عن مدى حبها ليه..
وكيف يبان حب شديد جدا..
لما سكتت..
مدلها كليكنس من ع الطاوله وهو يشوف لعيونها..
هي خداته وقعدت تمسح بيه فوجهها وتتنفس بسرعه..
هو تنهد بألم وقال؛مفروض امتى يطلع..
رانيا بصوت باكي قالت:19\6\2016..
زين:حوالي عام ..
رانيا نزلوا دموعها من جديد..
زين:عام ويفوت ان شاء الله وتفرحوا بوجوده بيناتكم..
رانيا حاولت تهدي نفسها وهي مغمضه عيونها بعدين فتحتهم وقالت:آمين...احمم..اسفه استاد..
هز راسه بإيجاب بعدين قال؛تقدري تروحي توا..
رانيا:تمام..
ناضت وقفت..خدت شنطتها وحاجاتها وهي تقول؛سلام..
مشت وصلت في الباب..
ناض زين بسرعه..ومشي للباب فتحه..
هي ابتسمت وقالت:شكرا..
زين :العفو..
طلعت رانيا..
وهو قعد واقف في الباب يشوفلها لين اختفت..
بعدين رفع حواجبه فوق ونزلهم..
ولف خش لمكتبه وسكر الباب..
🍁🍁🍁🍁
الو...
ايوه عمادي..
عماد:واتيه..
سناء :ايه..بتجيني في ***** ولا..
عماد:ايه..
سناء:تمام نقول لاختي دنيا تحطني وهي مروحه.."بسيارتها"
عماد:تقعد معاك لين نجي سناء..
سناء بإبتسامه؛تمام..تشاو توا ياقلبي..
عماد:باي..
صكر..
وحط التليفون ع التابلو متاع السيارة..
شغلها وتحرك بش بيمشي للمكان اللي تواعد مع سناء يشوفها فيه..
🍃قاعد يتعايش..قاعد يستسلم ويسلم للأمر الواقع اللي حط روحه فيه خلاص..ليه ايام منشغل بسناء ومهتم بيها يحاول يخليها شغله الشاغل..يبيها تملكه..يبي قلبه يتقبلها..
بس اني عمري ماسمعت عن حد عاقل تبرى من ابنائه دم عروقه بش يتبنى غيرهم!!..
القلب فحالة رفض مستمر..وتمرد دائم ع الوضع الحالي..وصاحبه بدي يهرب منه حتى هو🍃
🍃🍃🍃🍃
وامشي ياأيام..
عدي..
بحلوك ومرك بخيرك وشرك..
زي مافيك اللي بكانا..
اكيد فيك اللي حيفرحنا..
واخيرا..
جي..عمار هانيبال رمضان...
اليوم هداكا عيد..
عيد لبوه وامه..
عيد لعمته غاليه..
عيد لحناه فاطمه..
وعيد لبنت عمته دلال...
دلال اللي اتصلت تبارك لخالها ومرت خالها وهي ادمع من الفرح تقول قالولها عمار حي..
زغرطت..ايه زغرطت..
حست ان هادي علامه..
الفرحه بعمار الصغير..منحتها شعور حلو وغريب..
شعور كله امل ان عمار الصغير..حيجيب الكبير..
هي هكي حست..
بعد كملت المكالمه...
مشت لدولابها وفتحاته..
كان معبي هدايا لعمار الصغير..ومازال ناويه تزيد عليهم...
🍁🍁🍁
من سماه..
مرام؛سيده..
ضو ابتسم بالسيف:اممم..باهي..اني مروح اخر اسبوع هدى تو نجي ونشوفه ولد هداك المتعجرف..
ضحكت مرام..
ع خشة هانيبال للدار..
اشرلها بعيونه متسائل فمن تكلم..
مرام :ضو..
قدم وخدي التليفون وشبح للشاشه وقال بهمس:سقد روحك شن تراجي..
مرام قعدت تضحك..
ضو بضحكه:عشت وشفتك بهالحاله يامتعجرف..
هانيبال؛عقبالك ياكشخه..
ومد التليفون لمرام وهو يضحك..
خداته وقعدت تشوف لهانيبال وهو ماشي لسرير البيبي يدير عليه طله..
ضحكت..
ضو بأبتسامه؛هي مال بنصكر تو..نشوفكم..
مرام بإبتسامه؛في أمان الله..
ضو؛بالسلامه..
صكر..
وهي نزلت التليفون وقالت:هانيبال خليه بتنوضه راك..
هانيبال :نبيه ينوض نبي نشوف لون عيونه..
مرام برفعة حواجب وهي تضحك؛عمره تلاته ايام.بس!!..
هانيبال:وكان عمره تلاته ايام.. يبانن من تو..ان شاء الله يطلعن ملونات كيف عيون سيده السمح..
مرام:ههههههه...💕
🍁🍁🍁🍁
خبطت بيدها ع خدها بخفه وهي تقول:ياوخييتي سلمه..ماشاء الله..
نزلت يدها وبدت تكتب..
(عسل ياخالو عسل..يتربي فعزكم)
هانيبال
(تسلمي ياطرشوله)..
ضحكت..
هانيبال
(شنو حال امك الحقودة)..
ابتسمت وقالت
(الحمدلله..كويسه)
هانيبال
(ماقالتش خاطري نشوف ولد هانيبال..مانشدتش بكل ماعدلتش!!؟)
رانيا تلاشت ابتسامتها واضايقت هلبه..مش عارفه شن ترد ع خالها..
امها معاش جابت سيرته بكل..سمعت بمرته جابت لكن مابتش تهدرز عليه هي وياها حتى الهدرزة..
امها هالمرة مقسيه قلبها هلبه..
هانيبال
(اخيي ع الدنيا ..من قال اني يجيني عيل زينب ماتكونش اول من يباركلي عليه..عمري ماتوقعتها...امك خلت فرحتي ناقصه..غاص بيها راني..قوليهلها..هي بالسلامه تو)..
دموع رانيا سيل..
قلبها انفطر من الكلام اللي قراته..اول مرة تحس ان خالها هانيبال موجوع هلبه لدرجه انه عبر عن وجعه هكي..
مسحت دموعها وناضت بتليفونها ومشت طلعت
من الدار..للصاله..
لقت امها تحاول اطبس بش تاخد فوطه محطوطه ع المندار ومش قادرة..
ضيقت عيونها وقالت:امي خيرك؟..
وقفت زينب ع حيلها وملامح وجهها معركشة من الألم:مديلي الفوطه..
قدمت رانيا وهي تشوف لأمها وتقول؛خيرك يام شن يوجع فيك..
زينب؛رقبتي يارانيا..
رانيا خدت الفوطه وهي تقول؛امي خيرك ماتقوليش لحمزة ع الاقل..
زينب خدت منها الفوطه وقالت؛ايه بش يحط فلوسه كلهم عليا!..
ومشت للكوجينه..
بنتها لحقتها وهي تقول بإنفعال:امي هدا اهمال واستهتار..ليك مده وانتي تشكي منها وكل مرة نقولك عايني تقولي لاملصه عادي وتمشي..وقعدنا ع هالحال لتوا عام وانتي تقولي ملصه لين وليتي معاش قادره طبسي بيها..بنقول لبوي خلاص..
التفتت وشبحتلها بنظرة حاده؛تعرفي يارانيا تقولي حاجه لحد لساني معاش يخاطب لسانك..بوك قريب يقطع من لحمه ويبيعه بش يصرف علينا ويكمل الحوش اللي فوادي الربيع..تبيني نوحله فحاجه تافهه زي هادي!!..
رانيا بنفاد صبر:امييي..مازال تقولي تافهه!!..
قدمتلها وصكرت فم بنتها بيدها وقالت وهي تفنص فيها:فمك هدا ضميه ضميه..وبري تحركي لدارك..
رخت رانيا عيونها..
بعدين حولت يد امها..
ولفت ومشت طلعت من الكوجينه..
التفتت زينب للرخامه وملامح الألم مرسومه ع وجهها شدت دموعها بالسيف..
خدت نفس..بعدين قعدت تمسح في الرخامه...
🍁🍁🍁🍁
الساعه 2:00ليلا..
فاقت ع صوت انين تسمع فيه..
ناضت شبحت ايمينها لقت اختها تأن وملامح وجهها يبان عليها الخوف..
حميده؛غاليه..غاليه ..غاليه..
تلاحقت راس اختها بيدها لأن بيناتهم راقده حنين..
هزت راسها وقالت:غاليه!..
فاقت غاليه وعيونها انفتحوا ع وسعهم من الخوف قعدت تشبح لحميده وهي ساكته..
حميده:كنتي تحلمي..
غاليه حركت عيونها وقعدت توزع فيهم ع المكان..
بعدين ناضت قعمزت وهي تحاول تسترجع وعيها..
خدت نفس وقالت بصوت مبحوح:عليك حلم هو!..
حميده؛إن شاء الله خير..
شبحتلها وقالت:احمم..حطت يدها ع صدرها وكملت تقول وهي مضيقة عيونها..
نحزي فروحي وكإني في الجردينه نقطف فالرمان..لكن كنت مضايقه..قعدت نقطف فيه وحده ورا وحده...بعدين كيف اللي ريت سيدي الله يرحمه تحت النخله..وهو صغير يبان لابس عربي وجرده ابييييض..وحداه زينب وميلاد ومحمد..
وكلهم يبانوا صغار..محمد كان يبان عمره كيف فؤاد هكي..
محاوطين سيدي ويهدرزوا عليهم..
بعدين سيدي حطهم تحت جرده التلاته وقال..هي عدوا معاي..
اني منين قالها طيحت الرمان اللي فيدي كله راح كيف الدم تحتي وقعدت نعيط ..ونعيط..انفاسها بدت تتسارع..
وحميده خافت هلبه..
غاليه؛نعيط ونقوله حتى اني نبي نعدي معاكم نسيتوني..
حميده بخوف:عدا بيهم..
غاليه شبحتلها وقالت:مانعرف..انتي نوضتيني..
حميده :احسن..
غاليه:ايه احسن..
قعدوا يشبحوا لبعض شويه بعدين قالت حميده..
زعم شن تفسيره؟..
غاليه:مانبيش نعرف..
حميده:احسن..
غاليه:ايه احسن..
شبحوا لبعض تاني شويه وقالت غاليه..
زعم زينب تجي للمه..
حميده:ماظني..
غاليه:نكلمها..
حميده:لا..الباين مازالت واخده موقف قوي..كان فتحتي معاها الموضوع تخافي تفصل..خليها ماشيه هكي احسن..
غاليه بتفكير:ايه احسن.
حميده:خيرك علقتي في ايه احسن..
غاليه:انتي اللي علقتي في احسن..
حميده:وكان اني علقت انتي تعلقي..
غاليه :وين نعلم عليك فوتيني ترا..
حميده:احسن..
غاليه:ايه..احسن..
حميده رفعت حواجبها وبدت تضحك..
وغاليه غمضت عيونها وقعدت تضحك معاها..
🍁🍁🍁🍁
الساعه 6:00مساءا..
منور ياصاحبي..تسلم بارك الله فيك..اكيد اكيد......تمام...في امان الله..مع السلامه.....
حول التليفون من ع وذنه وابتسم براحه..
بعدين خدي صفرة كان فيها فنجان قهوة..
ومشي طلع من الكوجينه اللي كانت نظام بار..
للصاله اللي مقعمز فيها ضيفه..
مشاله طول وضيفه:تفضل..
خدي فنجان وقال:شن صار..
قعمز زين بعد ماحط الصفرة ع الطاوله اللي قدامه..
وقال:كله مشي تمام..منور يانجمي
نجم الدين رشف من القهوة بعدين قال:توقعته كله يمشي..بس نبي نعرف..فضول..من يكون هدا اللي توسطتله واسطه هكي كبرها..
ضحك زين وقال:معرفه..من طرف حد نعرفه قصدي..
نجم:اممم..فهمت..
زين :المهم توا..خلينا فيك شن الاخبار الحلوة اللي سمعتها عنك..قالوا خطبت
نجم ابتسم بتهكم وهو يشوف لفنجان القهوة وقال:امم..
زين ضيق عيونه وقال:منظرك مش منظر واحد خاطب..
نجم شبحله وقال؛منظر واحد محكوم عليه بالإعدام صح؟..
زين قعد يشوفله وهو مركز ع الحزن اللي فعيونه
نجم بحزن:مش عارف..مش عارف علاش حني هكي!!علاش عيونا ماتزهى فيهم كان الحاجه اللي مش لينا ولانقدروا نطولوها
كلام نجمي اصاب زين في مقتل
نوض عليه جروحه كلهم
برغم ذلك ابتسم زين ألما وهو يشوف لتليفونه اللي كان يقلب فيه بين ايديه وقال:غاويين عذاب..
ضحك نجمي وقال:صدقت.. بعدين تلاشت ضحكة نجمي وشبحله
زين قام عيونه فيه وضحك وهو يقول:مش مهم..هي دنيا بنعيشوها بكل شي فيها
نجمي تنهد وقال :خاطري نستقيل
زين بإستغراب:من شني؟!!..
نجمي:منها..
ابتسم زين وشبح للفيراندا..وقعد ساكت..
نجم وهو يشوفله:شن ناوي ادير..
