#العشق_المتمرد "اختبار"
#جمان_فريد
الجزء117 القسم الأخير
🌟..
هم هدوم كراسي...رجالا ماهمش تهزي..
مولعين النار في بتيه كبيرة "برميل حديد اسطواني الشكل وكبير"
وواقفين حواليها البنات وبعض الاقارب والجيران..
وفي ناس قعدت داخل المربوعه لكن واقفين ويصفقوا ويشتوا حتى هما..
والمطر تصب..
امال..
الطير الحر وين لفي..حوم الزيتون وجي..
ردوا وراها..
مبروكه عمتهم..
لباسين جديد الطرزة...بين الناس يديروا فرزة..
زغرطوا...
وردوا وراها
رباب..
ماهم كيف الناس خوالي...شخصيات خشوم عوالي..
صيحوا بعد سمعوا بيتها..
وامها وخالاتها زغرطوا..
وردوا وراها بيتها بكل حماس..
دلال..
هم هدوم خوالي يمي..وين نجيهم يضحك فمي..
عجبهم بيتها ..
ردوا وراها بصوت عالي..
وزغرطوا كذلك..
تحركت غيرة رزان...
وغنت حتى هي..
عمامي ماهم كيف الناس...شهاده ينحطوا ع الراس..
صيحوا بعد سمعوا بيتها..
وغاليه باستها من خدها وضمتها..ورزان مبتسمه..
بعدين ولو للشتاوات..
كفايه..
يانجيلي خوتي جمله..وحميده هو راس العمله..
💕💕💕💕💕
🍁🍁🍁🍁🍁
بعد كملوا القنديل..الناس بدت تروح...
والمطر مازال تصب..بعد روحوا الناس..هما روحوا..
🍁🍁🍁🍁
عند الرجاله..
موجودين بس الأقارب مع رجالة العيله..
وكان حديثهم الباين حيشتعل..
مؤنس :حني شن خلانا نبيعوا كل شي غادي!ماهو منين عدينا نا وايمن رينا حاجات غريبه واجد..
ايمن:كان في شكلات عمري ماريتهم في المنطقه اللي كنا ساكنين فيها..
مختار بأسف:عمري مافكرت فيوم ان الحال يوصل بسرت للي نشوفوا فيه تو..
علامات الحسرة والقهره باديه ع وجه مختار..
اصيل بغضب:الله لا يسامح من وصلنا لهالحال..كل حد كان مع النكبة السودا هدي حيلعنه التاريخ لولد ولده..
كل من عناهم كلامه شبحوله..
مختار الحفيد:بلاد ادمرت من الحروب هنى وغادي..الناس حالتها بالويل..القتل ولى حاجه عاديه..الخطف الخنبه..اهو لينا 7ساعات نسمعوا فاصوات المولدات...الطوابير فكل مكان..وحاجات تانيه ماتنقال..وكله من منو من يتحمل مسؤوليته!!..
ايمن:حتى كرامتنا وعزتنا بين العالم راحت ..
عبدالرزاق: صدقت..نحمد ربي اللي عطانا من فضله وحفظلنا رزقنا كان هدى انظر شن صاير فينا..
مختار الجد:الحمد لله..
اصيل بتهكم:مازال الخير الجاي..ياما يصير ياما..يخلي كل من خان بلاده وحارب تحت الناتو ورفع علم العار يدفن روحه وهو حي..
مالك:وعلاش ماتشوفش ان اللي صاير فينا توا واحني فيه هو توابع 40سنه فاتوا..
اصيل:علقوا ع شماعة 40سنه علقوا..
مالك:40 سنه طالعه من فمك ساهله..وهي عمر بنادم..ترا قولي قداش جيل طلع وتربى فالاربعين عام..قولي شن الإنجازات والتطور اللي اندار ف40عام وضاعوا ف ها5 سنين؟!..
شبحوا لأصيل يراجو فالرد..
اصيل:فالخمسه سنين بلاد بطوبتها راحت..
مالك:وانت شايف ان كان في عندنا بلاد بش تريح من اصله..نبي نعرف الليبين كانوا محصلين حقوقهم كامله فهالبلاد هادي..حقوقهم مالحقوش عليها...
الفرق بين قبل توا...
كان في شوية نظام..
وتوا مافيش بكل..
مختار الجد:حني ياولدي مانبوا نخشوا فجدالات عقيمه..
سعد:هدا الأفضل يتغير الموضوع خير..
اصيل بجرأة: شويه ياجدي بعد اذنك..شبح لسعد وقال..سامحني ياعم سعد.. نعرفك راجل حقاني..راضي ع اللي صاير توا..
كلهم شبحوله..
وولاده نظراتهم ليه كان فيها لهفه للرد المفحم..
اما عماد فكان مشبك ايديه فبعض ويشبحلهم وهو يسمع ..
سعد:مافي حد راضي عليه ياولدي..
اصيل :اممم..باهي راضي ع كون واحد من ضراريك يوم من الايام حارب مع الناتو وخان بلاده.؟!
صدم الكل السؤال هدا..مش بس سعد..
مختار الجد:اصيل..انهي..
عماد قام عيونه فأصيل وقال:نسألك اني بعدين نجاوب ع سؤالك..
شبحوا لعماد وبدي التوتر يسود المكان من تصاعد حده النقاش وخايفين من عماد يتهور..لأن قلبه مليان ع اصيل..
اصيل ابتسم وقال:اسأل..
عماد:بصدق وبصراحه..فك ايديه عن بعض وحرك ايمينه ع جنب وقال...حول كل شي ع تركينه حكم ضميرك بس.. كنت راضي ع وضع البلاد زمان؟!صح وقتها كنت صغير لكن اكيد واعي وفاهم..جاوبني..
اصيل حس الأنظار كلها توجهت عليه واجابته ع سؤال عماد منتظرة من قبل الكل..
اصيل مكابرة:راضي اكيد...
عماد ابتسم وقال:كنت زيك راضي وعاجبني ومش شايف شي غلط..عايش مرتاح ماديا ونفسيا نلبس احسن لبس نركب احسن سيارات نسافر ونهيج وخدمتي ماشيه تمام التمام ماني مستحق شي..قبل الثورة بكم يوم كنت مقعمز مع واحد صاحب عايش نفس العيشه اللي اني عايشها لكن ماكانش راضي ع وضع البلاد..سالته قتله شن ناقصك انت قالي ناقصني بلاد..بلاد زي البلدان اللي سافرتلها انت واني والناس اللي عاشت زي عيشتنا واحسن وروا دول برا ماتملكش ربع ماتملك ليبيا من ثروات نتحشموا نقارنوا ليبيا بيهم..قالي..انت عايش فبرج عاجي..ماتشوفش فوضع الناس وشن صاير فيهم....زيك توا يااصيل..
كلام عماد اللي كان يقول فيه بنبرة هاديه خلت الكل يسمعله ويأثر فيه..
اصيل مظهره الثابت كان عكس داخله تماما..
عماد اشر عليه وقال؛انت كنت تزيد علينا بحاجه النفوذ والسلطه..نزل يده وقال..صكرت وداني ع كلام صاحبي ودرتله ظهري وطلعت من حوشه ليلتها وانا واخد منه موقف..قلت هدا يبي البلاد تتلخبط والخدمه فيها توقف..واللي كنت نحلم بيه كله يتبخر فالهواء..كنت نفكر فنفسي بس عكسه هو اللي كان همه كله بلاده وناسها..رغم انه راجل متزوج وعنده صغار..مافكر فشي غير بلاده وبس..طلع مظاهرات واستشهد من اول يوم طلعوا فيه ناس طرابلس..عيون عماد تعبوا دموع وهو يقول..موته وقظني لهلبه حاجات..واول حاجه علمهالي الوطنيه..اللي ماكناش نعرفوا حتى اسمها زمان..طلعت مظاهرات ومشيت حاربت..كنت نبي نكمل اللي هو بداه وناخد بتاره..ويشهد ربي ماكانت عندي نية نخدم مصلحتي ولانبي من وراها شي..ومعاي ناس حاربت كانت نيتها صافيه زي نيتي...اول ماتمت الحرب سلموا سلاحهم وولوا لحياتهم العاديه...ومن يومها ولا مرة فكرت نشد سلاح بش نحارب ع خاطر فلان ولاعلان ولا منطقتي ولا توجه ولاغيره..ولو جي يوم ورجعت نشد سلاح..رفع صبعه وقال..فحالة وحده بس..ع خاطر البلاد ..يعني نهار ينادوا ويقولوا تعالوا بنمشوا شور سرت اللي فالثورة راعيت احبابي وناسي ومابيتش نحارب فيها...نفزعلها تو ونمشي ع خاطر البلاد واحبابي وناسي..
توسعوا عيون بوه وهو يشوفله..
عماد:واهوا اللي هني كلهم عليا شهود..
قعدوا يشوفوله بإندهاش..
بينما مختار الجد ومؤنس اعجبوا جدا باللي قاله ماقالاش بش يستعرض لأنه مش من هالنوع قال كلام طالع من قلبه لهدا كل كلمه انقالت بلسانه حسوا بيها ووصلت قلوبهم..
ومن قبل دار معاهم معروف كبير..لاعمره من بيه ولاانتهز الفرصة توا وقال درتلكم ودرتلكم...
محمد يبي ينهي النقاش قال:توا مانقولوا كان ربي يهدي العباد ويفرج ع البلاد بس..
عبدالله:امين...هدى الكلام اللي ينقال تو بس..
مختار الجد وهو يشبح لأصيل اللي كان يشبح لساعته وملامح الغضب باينه ع وجهه:صدقت ياعبدالله..هدى بس اللي ينفعنا تو الدعاء بس..
مالك حط يده ع كتف خوه..
وعماد كان يشوف لأصيل وفعيونه نظرة نصر..
🍃عادة نقاشات زي هادي ماتمش ع خير..في اللي توصل بيهم للسب والشتم والطعن فالشرف والأخلاق..وفي اللي توصل بيناتهم للضرب..بل توصل حتى للقتل..وفكل الحالات تنتهي بقطيعه غالبا لارجعة فيها🍃
🍁🍁🍁🍁
اللي فالمربوعه كلهم سكتوا..يسمعوله بس..
ابتسمت كفايه بفخر..
محمد:كلا اصيل طلع واحد تافه..
عمر:من هداك اليوم قلتلكم اني حركاته تكسر الرقبه..
كفايه رفعت حاجبها..
غاليه:اهم شي عدت ع خير وماصارتش مشكله ..
محمد:لا الحمد لله عدت ع خير..
كفايه؛وينه ولدي؟..
محمد:خليته ماشي لسيارته.
كفايه هزت راسها بإيجاب..
محمد:خلاص اني بنعدي نرقد ماتبن شي..
كفايه بإبتسامه:العريس مانبو منه شي غير يفرح وبس..
ضحكوا غاليه وعمر ..
وهو ابتسم بإحراج ومشي طلع من الحوش بدون مايقول حتى تصبحوا ع خير..
عمر بضحكه :يللا حتى اني بنعدي نرقد تصبحوا ع خير..
كفايه وغاليه:قدامك كل خير..
مشي طلع من الحوش وصكر وراه الباب..
غاليه :واخيرا غدوة اخر يوم..يارب يارب..يارب يارب عديه ع خير..
كفايه ضحكت بعدين قالت:هي خشي نرقدوا..
غاليه بإبتسامه :هي..
خشوا للدار وصكروا الباب...
في الدار اللي فجنبهم..
البنات ولمياء وحميده رايحين فالنوم..
ماعدا رزان اللي سمعت كلام عمامها كله..وقلبها يرفرف 💓
من حبه اللي قاعد يزيد..مثقال ذرة مانقص..
بعد كانت راقده ع جنبها رقدت ع ظهرها وهي تشبح فوق..
خطر عليها الموقف اللي صار فالنهار..
قامت يدها وقعدت تشوفلها خطر عليها دفي يده اللي حضنتها..قلبها ذاب..وعيونها دمعوا..حطتها ع قلبها وغمضت عيونها وهي تذرف فالدموع
مش عارفه كيف بتقدر تعيش وهو مش ليها..كيف بتتحمل فكرة انه لغيرها..تنحرق حرق كل ماتذكر هالشي..
فتحت عيونها لما سمعت صوت المطر..
لفت وجهها للروشن اللي كان مصكر بإحكام..
ناضت قعمزت..مسحت دموعها بعدين وقفت على حيلها..
مشت للشماعه المعلقه ع الباب خدت ماليتها ووشاحها..
بعدين فتحت الباب بالشوي وطلعت وصكراته وراها بهدوء..
لبست ماليتها ووشاحها..
بعدين مشت لباب الحوش..
فتحاته ..شافت برا..
منظر المطر كان حلو ويسهف تطلع ع خاطره..
ابتسمت وطلعت..ردت الباب..
ومشت وقفت قدام الركابه..وهي مربعه ايديها من برودة الجو..تتفرج ع المطر وتشم فريحتها وهي حاسه بشعور حلو بالمرة..
هو💓..
كان نازل من سيارته..شبح جهة الحوش..لمحها وهي واقفه..
ابتسم...صكر باب السيارة بهدوء وهو يشوفلها بش ماتسمعاش..
بعدين مشي جيهتها بخطوات خفيفه وبحذر..
هي مازالت تتأمل في المطر..ومرات تسرح بتفكيرها...
استاقضت من سرحانها لما شمت ريحة عطر تميزها كويس..
تحساب روحها زي كل مرة لما تفكر فيه تشم حتى ريحة عطره بدون وجوده لاهو ولاعطره..
🍃العشق هدا العشق💓🍃
"شن مطلعك فهالساعه"..
قرنت حواجبها بغضب..
رغم ان قلبها طاير💓..
من سكات لفت بتخش..
وكعادته جي قدامها..
هي كانت ترجف بزياده..
رزان:الدنيا ليل ماتخلنيش نعيط..
ضحك برفعة حاجب وقال:ترا عيطي!..
قامت عيونها فيه وهي تشوفله بغضب..
ابتسم بعشق وقال:نحبهم نموت فيهم عويناتك شن ماتكون نظرتهم ليا
رزان ضيقت عيونها وقالت:انت مريض..
عماد:مريض بيك انتي..وان شاء الله مانبرا 💓
رزان قريب تبكي لكن حاولت تتماسك بكل قوة...قالتله:حول..احسلك حول..
تبدلت ملامح وجهه للحزن وعيونه نظراتهم العاشقه تعبر عن مدى عذابه قاللها:ارحمي حالي ارجوك..
قلبها بيطلع من مكانه...لكن مازالت مظاهرة بالقوة تأففت وقالت وهي تشقلب فعيونها:بيش يفهم هدى!!؟استغفر الله ياربي!!
ضحك وقال:ياعمري اني ع تشقليبة عيونك شن طيحني فيك غيرها اني..
رزان فنصت فيه ووجهها مولي احمر:مصح وجهك ياتافه..غيرت عيونها عنه وجت بتفوت من الجهة التانيه بش تخش..
شدها..
رزان فنصت فيه وهي ترعش..
عماد بلهفة عاشق:انتي تحبيني مازلتي تموتي فيا..واني نعشق تراب رجليك..رزان بالله عليك ارحمي حالي وحالك سادنا اللي حني فيه..اني بعد العرس بنفسخ وننهي القصه نعرف كيف نتصرف ..وكانك ع اهلك تو نتصرف معاهم مادوريش..كله ساهل قلبي كله يهون ياعمري المهم تكوني ليا بس..
نفضت ايديه بقوة وبعدت وبحده قالت:تفسخ تتزوج مش مشكلتي هدى شي يخصك بروحك مايخصنيش..بالنسبه ليا انت خلاص طلعت من حياتي ومعاد مازال ندخلك فيها لو طير..
تبدلت ملامح وجهه للحده وقال:يعني بتقوليله باهي؟
رزان رفعت حاجبها وقالت بعصبيه مكتومه:هدى شي يخصني يخصني اني وبس انت مادخلكش بيا مادخلكش...
ومشت بسرعه خشت للحوش وصكرت الباب...
هو هز راسه بإيجاب وعيونه ع المطر اللي تصب قال:باهي يارزان..تو تشوفي العناد اللي انتي فيه كيف نكسر امه..
ومشي للمربوعه متاع الحوش ماكان فيها حد..فتح الباب وخش وصكره وراه بقوة..
💓وجيب شن يرقدها..
اللي قعد من الليل كله قعدت سرحانه فيه وهي تذكر فكلامه فضحكته فنظراته..
ايدها ع قلبها وهي مبتسمه بفرح والدموع ينزلوا..
🍃مابعد عيونك يارزونه🍃
اما هو فكانت ليلته حرفه..نار غيرة ونارشوق ونار عشق..وهو ماغير ينحرق بيهم وخلاص...
💓هدا العشق..
ع قد ماهو واعر...ع قد ماهو حلو..
اول مايخش القلب وهو مازال فأول مراحله..
يخلي الإنسان يحس وكأنه فيه شي تبدل وولا احلى من قبل..
كأنه كان مش عايش وتوا بس دبت فيه الروح..
كلامي مش عن عماد...
كلامي..عن من يكبر عمادب 23سنه..
يعني عمره توا 50عام...
حسن..
🍁الساعه 9:00صباحا..
كان الجو صافي..ولاكأنه قبل كم ساعه كان معبي بالغيوم المثقله اللي سقت الأرض لمرحلة الإرتواء..
هو كان حاط ايديه فجيوب كبوطه ويمشي فمستراح الحوش
ويدور بعيونه فيه ع الأماكن اللي فيهم اميه..
جت عينه ع الباله...
《 انت اللي طالقه ايوه.. يستاهل مايجيه》
ضحك..
وقدم للباله المتكيه ع الحيط..
خداها وقعد يتأمل فيها وهو يذكر فنظرة عيونها السود الحادات اللي رمشهم مغطيهم..وشعرها المفرود ع طوله وواصل للفخد..
ولاقفطانها الموف اللي بينله جمال جسمها وتناسقه..
البارقه من الجميلات اللي بختهم بالهون فهالدنيا..
والله اعلم كان حسن يكون من بختها العطيب ع قولة الشراقه..
ولاضحكة الحظ المنتظرة...
فهالوقت..
طلعت حدهم من الحوش..ع جية عمها خليفه من برا خش من الباب متاع السور الفاصل بين المربوعه الخارجيه والحوش..
شافوه الزوز كيف يتأمل فالباله وهو مبتسم..
خليفه بريبه"الوضع مايطمنش"..
حدهم بحزن"ياناري بابا بيهبل ع خاطر كلبه شكله"
هو تنهد بعدين رد الباله لوضعيتها ع الحيط وهو يضحك ..
والتفت..
شافهم كيف يشبحوله..
تلاشت ابتسامته وقالت بإستغراب:خيركم!؟
الزوز ابتسموا بإرتباك وقالوا:صباح الخير..
رفع حواجبه وهو يوزع فنظره عليهم قال:صباح النور..
🍁🍁🍁🍁
الساعه 12:00قبل الظهر
يامبروك على الوداده ..إن شاء الله تعيش ايام سعاده..
يغنوا ع بلقيس وهي طالعه لسيارة خوها مراد اللي بيرفعها للمزين..
ركبت السيارة..وصكرت الباب..
ومراد تحرك..
زغرطوا كلهم..
لعند ماطلعت السيارة من الباب بعدين صكره خوها الصغير..
نجاه غطت وجهها بإيديها وانهارت بالبكي..
مني:نجاة!!
جميله اختها:نجوته خيرك راهي عروس..
حولت ايديها من ع وجهها وقالت ببكي:تو تتزوج اريج وتحسيها بعدين..
وحده من حمواتها:بيناتكم خطيوات..انتي غير اركبي فوق السطح ونقزي تلقي روحك فقطعة عيت امحمد..
كلهم ضحكوا..
وهي ضحكت معاهم من بين دموعها..
🍁🍁🍁🍁
اني ومريم ودلال بنمشوا نلبسوا فحوش رباب..
رفقه؛واني فحوش عمي ميلاد..
غاليه:معناها بتقعد نور هنى معانا بس..
نور:ايه..
غاليه:باهي..
المهم هيا توا سقدن خل نعدوا انضموا المربوعه ..
مشت وهما وراها..
رانيا ومريم ورفقه ونور...طلعوا من فم البوابه متوجهين لحوش عبدالله..
فالطريق تلاقوا مع حميده اللي قالت لنور:حنين مع من قعدت..
نور:مع دلال تلعب هي والبنات..
حميده:باهي..
ومشوا مع بعضهم للمربوعه..
وين وصلوا فيها تلاقوا هما وخليفه طالع من باب السور..
عيونه جو ع حميده وهي متجاهلاته تماما..
حده طلق السلام وهما ردوا عليه مشي فحاله..
وهما خشوا للمربوعه لقوا فيها عزيزة وامال يراجو فيهم..
سلموا ع بعض..
وبدوا ضمان...
🍁🍁🍁🍁
بعد صلاة الظهر..
مشي محمد هو والشباب كلهم لشقة حسن فاحدى المناطق فتلك المدينه..بش بيوتي روحه
الليلة عند الرجاله ليلة شعريه وكلهم بيلبسوا عربي..
يعني..محمد مش حيكون عريس تقليدي ينزف بالبدله الإفرنجيه..
بل عريس مميز ..ينزف بالزي الليبي الأصيل..🌟
💕💕💕💕
وعدا باقي النهار..
كله جري فجري..
ولايخلو الأمر من الغني..الرقيص..الضحك..
اجواء عرس..
محمد كرهوه فاللحظه اللي قال فيها يبي يتزوج ع قد ماناشبوه..
ولما جي عمر بيعطيه نصايح شده من رقبته وقال
"تطلع منك كلمه نقلبه غزي"..
ضحكوا عليه...ومابطلوش مناشبه وهو يكشخ ويسب..
💖الساعه 7:30مساءا..
لف طرف الزماله البيضا لكتفه وحطه عليه وهو يشوف لروحه فالمرايه..
كان لابس زبون لونه حني وفيه زخرفه ذهبيه..
ع كتافه كشابيه من نفس اللون ومزخرفه بالذهبي..
حط يده ع لحيته اللي خففوهاله وقعد يمسح عليها وهو يشوف لروحه فالمرايه بإعجاب..
شوي خش عليه عماد اللي كان لابس كاط اسود وع راسه
زماله بيضا لاف طرفها لكتفه حتى هو ويصور بالكاميرا..
نادى خاله وقال:محمد..
التفتله وهو مبتسم ..
عماد:سلطااان ياحمادي سلطان..
خش عليهم عمر اللي كان لابس زبون ذهبي وعمامه بيج لما شاف محمد قال بضحكه:ذكرني باسعد بفضة لما دار دور القرمانلي غير كان لبس فمكان الزماله طربوش..
ضحك عماد.
محمد وهو يشبحله ع جنب قال:حسد..
💕💕💕💕
بعد ماناشبوه لين قالوا بس..
طلعوا مع بعض من شقة حسن..
وركبوا السيارات..
ودارو دورة ع القبيله كلها وهما قالبينها كلاكسات..
وفاتحين اغنيه مشهورة تتغنى بمدينتهم..وهما يغنوا معاها..
وعماد مقعمز فالدبل قابينه متاع الهادي من الخلف ويصور بكاميرا الفيديو...
بعد كملوا دورتهم تسقدوا للقطعه..
وصلوا غادي..
رفض محمد رفض تام يمشي لخواته عارفهم مش حيهنوا ارواحهم..
وقعد فالمربوعه..
🍁🍁🍁🍁
حط لاب توبه فالنص بعدين وخر وقعمز بحداهم وهو يقول..
حمزة:عندهم 1فالليل توا..
محمد:ماتقولهاش!!معناها راقد!!
حمزة:مرات..
شوي انفتح اتصال السكايب..
طلعتلهم صورته وهو مقعمز وولده حداه فالقعماز...
هما ضحكوا...وهو ابتسم لما شافهم..
بعدين قال:اشتيوي..
ضحك محمد وقال:شنو حالك..
هانيبال :انت اللي شنو حالك مش اني ..
ضحك بإحراج وهما ضحكوا عليه..
وهانيبال مبتسم ع جنب..
حمزة:شن جوه الصقر اللي حداك..
هانيبال:كيف سيده راجل مصنع منع من وهو هكي..ريتوه كيف مقعمز...
ضحكوا..
واستمرت هدرزتهم هما وهانيبال لمده عشر دقايق لحقوا عليهم خوته الكبار والنسابات يدوب سلموا عليه وانقطع الإتصال...حاولوا كذا مرة بلافايده..
برغم ان محمد اضايق..بس قلبه ارتاح شويه المهم خوه شافه عريس حتى لو من بعيد...🍃
🍁🍁🍁🍁
مع الساعه 9:30..
تعبت المربوعه بالناس..
طبعا كانوا مدايرين فيها طاولات وكراسي..
والمنظومه شغاله..
خوات العريس الكبار هالمرة اتفقوا ع لبس البدالي زينب وكفايه بدلة قونه ونعيمه سروال ..بدالي نازكات وحلوات..
سعيده قفطان مناسبه قنين كم ووشاح ع راسها..
لطيفه وغزلان..
لطيفه لبسه سروال متاع حوامل حلوة بالمرة وللمناسبات..
وغزلان قفطان..حلو حلو..
سميه طرحت هالمرة قفطان حاجه صح ومشت للمزين قصت شعرها ودارت تسريحه مميزة..
غاليه لبسة سروال حلوة..
وحميده قفطان ..وكان ملفت هلبه وطلعت حلوة بمكياجها وشعرها طلقاته..
رباب.. لابسه قفطان كبير ومكياجها وشعرها حاجه روعه..
رانيا قفطان قصير بكم طويل وشعرها مطلوق..
رفقه كذلك قفطان قصير بس شعرها مدايراته ع جنب..
رزان قفطان قصير بس كتافه نازلات وشعرها مرفوع شويه منه والباقي مفرود..
حدهم لبستها لبسة قونه قصيرة حلوة بالمرة..وشعرها داراته مموج..
ونور قفطان كم طوله للركبه وشعرها مدايراته "فلو" وطالقاته..
اما دلال فاجئت حتى امها واختها..
لبست قفطان طويل فيه اثار بهجه مخصر ع جسمها كمه طويل..ووشاح ع راسها ومميكجه..
طلعت حلوة بالمرة..
امها وين شافتها هكي قريب طارت من الفرحه..
بس المفاجأة القويه..
دائما عند الست لمياء..
شن لابسه؟
قفطان مغربي ابيض..وفيه زخرفه فضيه..
وكانت رافعه شعرها فوق ومدايرة عليه مايشبه التاج..
معاها امها لابسه بدله..
واختها سناء جمبسوت لونه احمر..
انصدموا لما شافوا هيئة لمياء..قصدها واضح جدا..
حميده وهي تهمس فوذن غاليه:جاياتنا ايام سمحه..
غاليه قعدت تشوف للمياء بنظرات حاده ممزوجه بالقلق..
🍁🍁🍁🍁
الساعه 12:30ليلا..
وخش الموكب اللي جايب بلقيس للقطعه..
اللي واخيرا تحققت امنيتها وولت من اهلها..
مشوا جابوها حمواتها كفايه وغاليه ومعاهم عمتهم مبروكه..
اللي جو معاها من اهلها زوز من خالاتها وعمه ومرت عم..
وفي من الجيران كذلك..ابرزهم فضيله وريلا والبارقه اللي كانوا حاضرين حفلتها..
فم باب المربوعه وقفولها صاحباتها بالدرابيك..
ومعاهم باقي نساوين العيله يراجوا فخشتها..
تحت المظله تحديدا...
طلعت بلقيس من تحت جرد خوها الكبير..وطول مشي بعدين..
وجوها حمواتها دخلوها..
انفتح باب المربوعه بفراديه الزوز..
ودخلوا بلقيس اللي مازالت لابسه كابها..
وتعالت اصوات الزغاريط فالمكان...
بعد دخلوها صكروا الباب...
وكفايه قعدت تفكلها فكابها بالشويه..
وحولاته مرة وحده..
بانت بلقيس ع الناس..
كان قمه فالجمال..طلعت طلعة مش عاديه ومتغيرة هلبه..
قدملوها البنات..
وبدوا يغنوا مع النساوين..
مرحبا يالافيه..مرحبا يالافيه
مرحبا يالافيه..قدومك خير وعافيه..
سناء برفعة حواجب:مادارولكش هكي لما جيتي!؟
سميه:ياحنه مادارو هكي كان لمرام وهدي تو..
لمياء قعدت تشوفلهم بغل..
مرحبا بمرت خوي..مرحبا بمرت خوي
مرحبا بمرت خوي..يامعمره حوش بوي..
ومرحبا يالافيه مرحبا يالافيه..
كانت بلقيس شاده باقتها بإيديها الزوز وهي توزع فنظرها عليهم وهي مبتسمه بفرح...
مرحبا يالافيه..قدومك خير وعافيه..
وبدوا البنات يدربكوا..
ونساوين يمشوا في بلقيس للكوشه..
حميده..
هادي أخر كنه لينا..وان شاء الله بالخير علينا..
وردوها وراها..
نعيمه..
هو صقر وهي ريمه..ان شاء الله بعشرة عمره ديما..
ردوها وراها..
وبلقيس قريب توصل للكوشه..
وعيون لمياء معاها..قريب تنفجر من الغيظ والحسد باينه فرحتهم بيها وباينه مكانتها من توا عندهم..
وصلت للكوشه..
وساعدوها تقعمز..
قعمزت ..
وقعدوا يغنوا عليها..
وهي توزع فنظرها عليهم وهي مبتسمه .
جو عيونها ع حدهم ورزان ورفقه واقفات مع بعضهم..
وزعت عليهم بوسات طايرة وهما ضحكوا والتلاته ردوهالها فوقت واحد..
هي ضحكت..
وحده من خالاتها..
أسأل سابع جار عليها..حرة وين تحط ايديها..
ردوها وراها وفي منهم زغرطوا..
كفايه..
جملنا نسقوا فيه حليب..يوازي فالزينه ويجيب..
ردوها وراها...
رزان..
لاتبكي لاتقولي بابا..حصلتيه غزال صحابه..
ضحكت بلقيس..
وهما ردوها وراها..
عمة بلقيس..
حوش العز اللي رباك..بقدرك للزينين عطاك..
وزغزطوا خالاتها..
وردوا معاهم البيت..
حدهم..
مبروك ع مرت الغالي.. بدر منور فوق العالي..
زغرطوا وهما والبنات يردوا وراها بصوت عالي..
ويزيدوا يوقدوا فنار حسد لمياء اللي قاعده تاكل فيها ماكله..
💖بعد شوط الدربوكه..
قعمزوا النساوين اللي جو مع بلقيس ع طاولتهم ..
وخشوا يوتولهم فالضيافه..
وهي جوها صاحباتها..
حدهم :وااااو يافرخه طالعه خيال..
بلقيس بضحكه:قولي ماشاء الله..وبعدين شن فرخه هدي يافرخه انتي!!
ضحكوا عليها..
رزان بإبتسامه:عمي اليوم ياما بيصير فيه..
بلقيس بإبتسامه فرح:اسكتي يافرخه نتحشم..
ضحكوا..
رفقه:مالا هي كان تشوفه شن يصير فيها..
بلقيس بلهفه:قوللي شن لابس..
رزان بضحكه:عربي..
بلقيس :ياوخيييتي سلمه ونجيه..
البنات:ههههههه..
ضحكت بعدين قالت:بنات بنطلب منكن طلب..
شبحولها التلاته بإستغراب..
حدهم:قولي شن تبي..
💕💕💕💕💕
فالكوجينه..
اني والله ماخطر عليا كان البارح ..
غاليه بضحكه:لالا ماظني..
حميده بضحكه؛هي ممكن تصير حاجات تانيه تسبب فحرب غير قتلة الكلب..
البارقه بخوف:كيف شنو!!؟
حميده:كيف الحب من اول نظرة..
شبحتلها بارقه بإمتعاض..
فضيله سيبت صفرة العصير وجتهم وهي تضحك قالت:تو انتن ركزتن علي نظراته..
حميده:اني اللي نفهم فيها الحاجات هدي وبعدين هدي اول مرة نشوف حسن يصبي كيف تمتال قدام مراة ومش قادر يقوللها كلمه..
غاليه:والله حتى اني خفت يقوللها شي لسانه سم ماهو.. شوي ماقدر يدوي من اللي راه..
حميده:وتبيه ينطق وهو يشوف فهالزين قدامه..باهي اللي خلاها تعدي..
البارقه وزعت نظرها عليهم وهي ماطه شواربها بملل ..
خدت سبات الكلينكس وقالت:سقدن ارواحكن سقدن بلاقطاف زايد..
ضحكوا عليها..
💕💕💕💕💕
بعد فرقوا الضيافه ع النساوين..
مشت وحده من البنات للمنظومه..
وقعدت ادور فأغنيه معينه وفرحت هلبه لما لقتها..
التفتت للباقي واشرتلهم بعيونها..
هما ابتسموا وشبحوا لبلقيس ونوضوها..
شغلت الأغنيه..
وكانت..
"ابن الجيران"..
نزلت بلقيس..
من الكوشه..
وبدت ترقص والبنات يرقصوا معاها..
تفاجئوا بيها..مفروض العروس ماترقصش..
لكن بلقيس كسرت المحظور..
شويه وبدوا يصفقوا..
وهي ترقص وتغني مع الأغنيه..
وصاحباتها معاها..
بلقيس..
مانا عارفه انوا شاريني شاريني..
ونا قلبي شاري شاري..
قربت للبنات وقالت:الاغنيه تمشي معاه هو مش معاي اني..
ضحكوا بصوت عالي..
وهي تضحك معاهم..
من بعيد شوي..
فاطمه:والله ماهو باهي رقيص العروس..
مبروكه:خليك من الدوة الزايده يافاطمه بناتي وبناتهم رقصوا فعراسهم وماصارت فيهم حاجه..
حدهم:حتى عزيزة بنتي منين عدت لطرابلس رقصت غادي راهي..كله دوة فاضيه يافاطمه..
كامله:في عادات واجده قاعدين شادين فيهاوهي كلها غلط فغلط...خليها تفرح وترقص هي كلها ليلة وحده فالعمر..
هزت فاطمه راسها بإيجاب وهي تشوف فيها..
....
نادرة:مش ساهله البنت هادي يالميا ردي بالك..
لمياء وهي تشوفلها بنظرات حاقده:لاهي ولاعشرة من امتالها يقدروا عليا..
💕💕💕💕
بعد تمت الأغنيه وقفت المنظومه..
قعدوا البنات يغنوا بصوت واحد..
يابيسو ياسمح..يارشوا عليه الملح..
يابيسو ياسمح ...يارشوا عليه الملح..
غاليه تتأمل فيهم وهي تضحك بفرح...
زينب بضحكه:صاحبات عاد..
لطيفه:رفقه ديما هي وياها اتصالات..
نعيمه:بلقيس تخش الخاطر طول..
.....
دلال:الله يبارك عليهم..
رباب:هي تهبل تهبل..
نور:اكثر زوز فرحت بخشتهم للعيله هي ومرام..
رانيا:حتى اني..
مريم:قداش خاطري نتعرف عليها مرام..
رباب:الأيام جاية ان شاء الله تشوفيها وتتعرفي عليها.
ابتسمت مريم ورجعت تشوف لبلقيس..
💕💕💕💕
شويه..
وروحوا النساوين اللي جوا معاهم بشوط دربوكه..
بعدين كفايه وغاليه خدوا بلقيس بعد لبسوها كابها..
طلعوها من المربوعه..لسيارة مالك اللي كانت تسوق فيها نور..
وصلتهم لممر فم البوابه..
نزلوا ونزلوها..
وهما قايمين الفيلوا بالكاب..
دخلوها من فم البوابه ومنها طلعوا من الجهة التانيه وركبوها لشقتها..
💕💕💕💕
بعد تمت ليلتهم الشعريه اللي ماشعر فيها حد.غير الشعراء اللي جايين..
جي وقت الزفه..
طلعوا برا..
وداروا صفوف..
يتقدمهم العريس اللي ع يمينه ويسارته خوته وولاد عمه..ووراهم النسابات والاولاد..
ووراهم الاقارب والجيران والصحاب.
شادين الطرف الكبير فوقهم..
وعماد يصور..
ومنهم اللي يكشك ويغني..
محمد من داخله كان متوتر هلبه..
بس ظاهره كان ثابت جدا..
داروا بيه ع القطعه..
لعند ماوصلوه للمستراح..
ضرب عمر ع ظهر محمد..
ابتسم...
وشد طرف كشابيته ومشي للدروج...
ركب..
فوق..
كانت بلقيس ادور فالشقه وتشوف فيها عجبها كل شي فيها
داره هو ع ذوقه كله..
سمعت باب الشقه انفتح..
التفتت..
فتحت عيونها ع وسعهم وهي تشوفله بإعجاب شديد..
هو بعد صكر الباب..
قام عيونه وشافها..
جمد فمكانه..
وقعد يمرر فنظره عليها من فوق للوطا..
وهي نفس الشي..
الزوز هاموا فبعض ..
بلقيس فهاللحظه حست روحها تحلم ومش مصدقه الراجل هدا ولى راجلها هي..وحتعيش معاه عمرها كله..
اما هو فكان مش مصدق لهفة قلبه عليها..
ماتوقعش يجيه يوم ويحب طبيعة شخصياة كانت تشوف للامور هادي بسخريه ديما ونظرة فيها شي من الإزدراء..
في اللي زي محمد صح شويه..لكن موجودين صعبين جدا..
والنوعيه هادي لما الحب يقتحم قلوبهم مايكونش ساهل بكل..
💓قعد يشوفلها كيف قامت الفيلو وقعدت تمشيله..
لما وصلت فيه قالت:الله وحد عليك..
هو رفع حواجبه ومازال رايح فيها..
بلقيس :فيك هيبة عمري ماريتها فراجل..قديش تهبل يامحمد..
هو قريب حضنها.حضن قوي كسر ضلوعها...لكن يقعد محمد...
محمد:احمم..باهي..صحيتي..
بلقيس:ههههههههه..سلمك تبي حاجه تانيه.
شد ضحكته وقعد يشوفلها بنظرة فيها شي من الكبر قال:عجباتك الشقه..
بلقيس بإبتسامه؛تجنن ماشاء الله..
محمد :كويس..
قعدت تشوفله..
وهو لما يشوف نظراتها تصير فيه حاله..
ومع هدا يقعد متماسك..قال:هي خشي..
ابتسمت بخجل وقالت:حاضر..
لفت ومشت..
وهو وراها يكتم فالتنهيدات اللي طالعه من القلب💓..
💕💕💕💕
هي تصبحن ع خير..
غاليه:قدامكن كل خير..
طلعوا فضيله والبارقه لسيارة خو فضيله..
وهما طالعين..
طاح وشاح البارقه..
قاماته بسرعه وقعدت تشوف حواليها كان في حد راها..
جت عينها ع حسن واقف فم باب الحوش ع بنته..شافها.
هي تلخبطت غيرت عيونها وطول للسياره..
ركبت الخلف..
وصكرت الباب..
حسن رفع يده.لخو فضيله يحي فيه..
وخو فضيله ردهاله..
بعدين تحرك طول..
وحسن بعيونه مع السيارة..
حدهم من الباب:باااابااا..
شبحلها برفعة حواجب..
حدهم.بضحكه خبيثه:شكلك تبي تنتقم صح لكلبك..
حسن :تحشمي..
حدهم بخبث:علاش اني شن قلت..
حسن:خشي داخل خيرلك..
ولف ومشي وخلاها ..
وهي ضحكت وقالت:هدا علاش كان يتأمل فالباله الصبح..
💕💕💕💕💕
صلوا العرسان ركعتين...
بعدين محمد لعروسته وحط يده ع جبهتها ودعي الدعاء..
وهي تشوفله بهيام💓
بعد كمل وحول يده شاف نظراتها تنحنح وقال:عدي حطيلنا ماناكلوا..
هي ضحكت وقالت:حاضر..
هو لف للدولاب بيحط فيه حاجه..
حطها وصكره والتفت..
شافها كيف حولت الملاية ..
وشن كان مدرق تحت الملايه..
شي طيرله عقله من راسها..
كانت فاتنه فروب الدخول مع شعرها الأسود المطلوق..
حطت الملايه ع الشماعه..
ساوت شعرها..
وحطاته كله ع جنب وهي تمشي عليه وماشيه بتطلع من الدار ..
ماحستش بروحها الا وهي فحضنه..
قامت عيونها وشافت لعيونه..
قاللها بلهفه ممزوجه بالعصبيه:معاش تشبحيلي هكي..
وقرب منها وباسها..
والزوز راحو فعالم غير هالعالم..عالم كله مشاعر حلوة تتحس وماتتقلش..زي ماغنت مرة نانسي عجرم...💕💕💕💕💕
🍁🍁🍁🍁🍁
وعدت هالليله الحلوة..
وجي اليوم اللي بعده..
مع الصبح تسقد خيري بأمه وبنت اخته..
وكذلك عبدالسلام اضطر يروح عنده امور ضروريه جدا تخص الخدمه لازم يتمها قبل يوم السبت ومعاه دلال بصغارها ونور ع خاطر القرايه..
وكذلك حميد روح بعيلته كلها ورفقه معاهم ...
🍁🍁🍁🍁
مروا ساعتين هاديات جدا...
خفتوا!!..
اممم..
المهم..
نزل محمد من شقته وهو ناوي يفطرهم كلهم عصيده من ايدين مرته..
مشالهم للمربوعه وبلغهم..
وين جي طالع شدوه الأولاد وهما يناشبوا فيه..
من جهة تانيه..
كان اصيل طالع من العمارة اللي ساكن فيها خوه..
وهو ماشي لسيارته..
شاف رزان طالعه من حوش جدها بطريقها لحوشهم..
اصيل اللي جاه جاه لما شافها مستعجل مش قادر يصبر لأخر العام بش يعرف ردها..
مشالها طول بدون مايحسب حساب لأي شي..
اصيل:رزان..رزان..
هي انصدمت..
التفتت وشبحتله...
وهو وقف عليها وهو مبتسم قال:صباح الخير..
هي تشوفله بتفنيصه..
هو ضحك وقال:شويه بس..
لفت وجت بتركب شدها من يدها..
نفضتها بقوة وهي مصدومه..
هو تنهد بعدين قال..
اصيل بإبتسامه:ممكن تقولي شن هالجرأة ولا صحة الوجه بس بصراحه مافي غير هالحل مواضيع كيف هدي مفروض نحكي فيها..فيس ..اشر ع وجهه..تو فيس..اشر ع وجهها وضحك..
وهي واقفه مصدومه..
من بعيد شوي..
عمر:هدى شنو..
التفتوا محمد وحمزة وعماد ..
محمد:شن يدير هدى!!
عماد بركان وانفجر:معاش فيها سكات..ومشي..
محمد حمزة عمر بأصوات متقطعه:عماد..تعالى هنى..ياعمااد اسمع...
وعماد ماشي مندفع لايسمع ولايشوف فشي وهما لحقوه..
اصيل:اللي نا فيه يستاهل نخاطر ع خاطره ..
زادو توسعوا عيون رزان..
لما شافت اصيل موخر للخلف ..
وعماد يقدمله ويدف فيه وهو يقول بعصبيه؛شنو انت شنو..لاتتحشم لاتتستحي..مش داير قدر لحد!!
اصيل يوخر وهو مبتسم بإستفزاز مايبيش يمد يده بش ينحط الحق ع عماد..
لحقوا حمزة ومحمد شدوه..
اصيل:مانردش ع واحد كيفك..تبيلك واجد.بش واحد كيفي يرد عليك..
شبحوله الولاد بحده..
عماد نفضهم وقدمله بأندفاع وضربه بوكس واصيل يضحك..
ع طلعة ولاد محمود..
جو يجروا يحاموا ع ولد عمتهم..
مختار دف عماد وهو يقول:هيييي انت..
عماد بسخريه:حول من قدامي حول..
دفه..
وجي بيقدم لأصيل..
شدوه الهادي وعمر
وطلعوا باقي الرجاله لما سمعوا الدوشه..
في حوش عيت رمضان..
كفايه بخوف:حيي عليا حيي والله توقعتها ..
غاليه:ياربي سترك ياربي..
فاطمه:لازم نرعش اني لازم ينكدوا عليا..
ونعيمه تشوف لامها بقلق..
اما الباقي فكانوا يتفرجوا من روشن الدار التانيه ع عركه..
ولمياء تسحن ع عماد سحن ماصارش..
برا..
ميلاد :شنو في!!..
سعد:عماد..
عماد بإنفعال:التافه هدا ياخالي موقف بنتك ويكلم فيها قدام حوشك لادارلك ولادار لخوها ولا دار لحد قدر..
عمر:حركته ماتنقبل بكل..
ميلاد شبح لأصيل بحده..
ع طلعة مؤنس سمع الدوة وقال بصوت عالي:اصيل اركب سيارتك وانتلف..
اصيل بعصبيه؛لا..شبح لميلاد..ياخال..بنكلمك واهو قدام الكل..
عماد عارفه شن بيقول من خوفه قدم لاصيل نطحه براسه وطيحه..
كلهم انصدموا..
مؤنس:لا لاعند هنى والزم حدك..
ناض اصيل بيردهاله..
شدوه ولاد خاله..
محمد:عماد تعال..
ميلاد يشوفلهم وحس بنخصه فقلبه..
بس تماسك وقال
"اني ماعندي بنت نعطيها لقريب وحق الله بنتي ماعاطيها كان للبراني"..
انصدموا كلهم..
وميلاد لف ومشي لحوشه..
اصيل شبح لعماد وقال:جرذ..مسخ..
سكرله خوه فمه ومشي بيه للسيارة بالقوة..
ركبه فيها وهو يهزب فيه والولاد ركبوا معاه..
"عماد"..
التفتوا كلهم لسعد..
سعد بحده:توا تركب سيارتك وتروح توا..ولما نروح نتفاهموا..
عماد بلع ريقه وقال:ياب....
سعد بصوت عالي :دير اللي قتله علييه..
مسح عماد ع لحيته وهو قريب يموت ...
مشي طول لسيارته وهو فقمة الغضب والضيق..
وسعد مشي ولا للمربوعه ومعاه عبدالسلام والهادي يحاولوا يهدوه..
تحركت سيارة اصيل ومشي بسرعه..
اما مؤنس توجه لحوشه طول..
محمد:استغفر الله العظيم عليك صبح..
عمر:خلاص عدي لشقتك عدي اكيد عيالك سمعوا وخافوا..
هز راسه بإيجاب بعدين مشي..
مالك بغضب:لولا بوي بس..
مروان:لكن يستاهل ماجاه من خالي قطعله مرة وحده..
حمزة:هادي اكثر حاجه عجبتني في اللي صار..
.....
يجيك قريب ويكلمك عنها قوليلهم سيدها معاش يبي يعطيها لحد قريب..
سعيده بخوف:باهي حاضر اللي تبيه يصير غير خود دواك بس..
في الدار اللي جنب دار النوم بمسافه..
كانت رزان تبكي بكتمان قريب تموت من البكي..
بعد حلفة بوها توا خلاص...
انقطع الأمل من حكايتهم هي و عماد مرة وحده...
...يتبع...
