#العشق_المتمرد "اختبار"
#جمان_فريد
الجزء 115 القسم التاني
🌟..
الساعه 6:30مساءا
تفرق نور عليهم فالشاهي ومعاها رفقه تفرق فالحلويات وهما ياخدوا ويهدرزوا..
وفنبرة اصواتهم الفرح باين..
نعيمه بإبتسامه:الحمد لله كل ساعه بفرجها..
فاطمه بإبتسامة راحه:ايه الحمد لله..
كفايه شربت من الشاهي بعدين حطت الطاسه حداها وقالت؛اسمعيني يارباب واسمعوني كلكم...
كلهم ركزوا معاها وهما مستغربين..
كفايه:لمة الفرفورة بنتك من بابها لمحرابها عليا اني..
ضحكوا..
رباب:لا خالتي نهاري..
كفايه وهي تحلف بيدها:قسما بالله العظيم مامداير فيها واحد حاجه غيري..
غاليه بضحكه:خلاص ربوبه حلفت..
رباب ابتسمت بقلة حيله وقالت:ربي يهديك ياخالتي..
كفايه رفعت طاسة الشاهي وقالت وهي ترقص فحواجبها:هاديني والحمد لله..
ضحكوا عليها..
بعدين قالت غزلان بضحكه:ايه حقه رباب مازال ماسجلتوهاش..
رباب بضحكه:واخيرا استقرينا ع اسم باتها اختاره..
رانيا بضحكه:باتها اختار اسم لاقبله ولابعده..
رباب شبحتلها بنص عين وقالت:اسكتي انتي بلا براده..خل نكمل..شبحتلهم وقالت..سماها "إباء"..
فاطمه بتضييقة عيون:شنهووو؟!
كلهم:ههههههههههه..
نعيمه بضحكه:إباء يمي إباء ..
فاطمه حطت يدها ع ذقنها وقالت متسائله:وشن معناه ياكبدي..
كفايه؛معناها هكي عزة يمي وكبرياء..
غاليه بضحكه:رفعة خشم..السراته مشهورين بيها يمي..
فاطمه شدت السبحه بإيديها وقعدت تسبح وتشوفلها وهي تقول:مايطلع كان عليهم..
كلهم بأصوات متقطعه:اووووو..ايااااااه..حيييه حيييه..
كفايه:يمي *****راك ماتنسيش رانا سمانا فيا زي النار ع البنزينه..
قالتها وهي تهز فكتافها..
رفقه بغرور:سوف الجين ترابه حامي..اسمع مني خود كلامي..
كل من يمت لهديكا المدينه بصله عيطوا..
وكفايه حضنت رفقه وباستها من خدها ورفقه تضحك..
وامها تشوفلها بإبتسامه..
غاليه بضحكه:باهي انهولنا اجتماع القبايل هدى وقولولي..شن نديروا عشانا..
كفايه:وراس غويليه انسي الكوجينه شويه..
ضحكت غاليه..
نور:خلوني اني ندير العشي اليوم ورزونه تعاوني..
رزان ابتسمت..
غاليه:خلاص دونكن للكوجينه..
طق الباب..
ناضت رانيا تفتحه..
وصلت فيه وقالت :منو؟..
"ولد خالتك ياهنديه"..
ضحكت رانيا وفتحت الباب..
خش عماد وصكر الباب..
كان لابس تيشرت لونه ابيض فيه ياقه متنيه لونها اسود وازارها الفوقاني مفتوح باينه من السلسله..واللي تحته مصكر..
نص كم لون حافة الكم اسود..
فيها جيب ع ايمين الصدر..
وكان مفصل صدره من فوق بس من تحت واسع شويه...
ع سروال جينز اسود..
وطاقيه سوده لابسها بالعكس..باينه وحده من خصلات شعره نازله من تحت مقدمه الطاقيه جايه جنب نظاراته..
ولابس حديده فضه رجاليه عليها ساعه فضه فيده اليسار وخاتم..
ويده اليمين فيها الدبله🍃 وشاد فيها كيس لاحد اشهر محلات الحلويات...
حول نظاراته وقال بإبتسامه:الحمد لله ع سلامة خالتي..
رانيا بإبتسامه :الله يسلمك..خش خش..
ابتسم وخش داخل...
ورانيا وراه..
فاتوا باب السقيفه كانت الصاله مقابله طول..
وزع نظره عليهم بإبتسامه وقال:السلام عليكم..
رزان اللي كانت في الكوجينه فاتحه التلاجه بطلع منها حاجات جمدت فمكانها وقعدت ترجف بكل مافيها..💓
ونور اللي كانت واقفه ع اللاوندينو التفتت شبحتلها..
فالصاله..
فاطمه:جيت ياوجه الخير..
ضحك عماد وقال؛جيت ياحبي اني..
ابتسموا وهما يشوفوله كيف رمي سبيدروه ومشي لحناه قعمز جنبها وحاوط كتافها بدارعه وباس راسها وقال:شن جو طومتي..
فاطمه:ملييح بكل..
كلهم ضحكوا ع كلمتها..
كفايه؛طلقتوا ع حناكم..
ضحك عماد..
رباب:ايه عماد قول شن حالها امي توا..
عماد:اطمني..حالها باهي وامورها تمام التمام بس مازال مافاقتش..
كفايه:طبيعي تبيلها وقت علي ماتفيق من البنج..
عماد:ايه..المهم خلاص توا الخطر عنها زال زي ماقال الدكتور..
هما يهدرزوا وغاليه مش معاهم مع لمياء اللي طول الوقت ساكته وتسمع وخلاص..
غاليه عارفه خيرها..لاحظتها كيف تشبح لبنت رباب..كيف عيونها يوزعوا فنظراتهم بين غزلان ولطيفه اللي بطونهم بدت تبرز..
غاليه قلبها وجعها..
هي اكتر من فاهم لمياء..
الأمومه حلم غاليه من زمان بس ربي ماارادلها لاتكون زوجه ولاام
هالحرمان هدا..هو اكبر جرح فقلب غاليه الإنسانه الحنونه العطوفه المعطاءة..
بس وهي تشوف للمياء حست وضعها اصعب..
هي متزوجه..وحملت مرتين وخسرت ضنوتها في المرتين ولتوا معاش حملت مرة تانيه..واللي حواليها يحملوا ويجيبوا..
الشعور اللي تحس بيه لمياء اقسى.
كل اللي حواليك حتى لو ماتكلموش فوجهك او سمعتي همساتهم عنك...
تشوفي الكلام فعيونهم لما يشوفولك..
مش بس الاهل..والاصحاب..
زوجك..
زوجك لما يبدا سليم وعنده القدرة ع الإنجاب والمشكله بشكل او بأخر فيك انتي..نظراته ليك حتلقي فيها هلبه كلام يفقدك ثقتك بنفسك يحسسك بالنقص قدامه والخوف من ان يجيه نهار ويقولك..سامحيني بنطبق الشرع بش يجيني اللي انحرمت منه معاك..
ع قد ماغاليه كانت واجعتها لمياء هديكه اللحظه..
ع قد ماحمدت ربي مرات ومرات انه ماحرمهاش بالشكل اللي حرم بيه لمياء حاليا...
فاقت من سرحانها ع صوت عماد وهو يقول
:هاك رانيا فرقي..
ناضت رانيا وهي تقول:علاش مكلف ع روحك..
شبح لأمه وقال وهو مضيق عيونه بإزدراء:نلطها؟
كفايه وهي تحرك فيدها وكأنها بتضرب كف قالت؛لط..
ضحكت رانيا وهي تعض فلسانها..
وهما ضحكوا معاها..
جاته خدت منه الكيسه وطلعت منها باكو فيه شكلاطه فاخره.. وقعدت تفرق عليهم..
وهما ياخدوا ويهدرزوا..
هو كان يوزع فنظره عليهم..ويدور💓..
عينه جت ع سعيده اللي كانت لابسه قفطان ووشاح ورافعه حاجبها وتشبح القدام..
جتها رانيا بتعطيها..
رانيا بإبتسامه؛تفضلي عمتي..
شبحتلها سعيده وابتسمت وهي تقول:ماخاطريش حبيبتي..
رانيا فهمت عليها..
ومشت للمياء..
هو كان يشبح لسعيده بضيق..
وسعيده مابتش تشبحله نهائي..
تنهد..بعدين غير عيونه عنها..
وقعد يشبح للباقي..
شويه رن تليفونه..
طلعه من جيب السروال وشاف المتصل وجهه تغير..
قام عيونه جو فعيون لمياء..
لقاها تاكل وتشوفله وتشوف لتليفونه..
هو ناض..ومشي من حداهم بطريقه للمربوعه..
في الكوجينه..
نوراللي كانت واقفه فم الباب خشت وهي تقول:اطلعي كلميها شفته توا بعيوني مشي للمربوعه..
خدت رزان نفس ومشت طلعت بسرعه بتنشد امها ع حاجه..
وصلت فيها وطبست عليها وقعدت تكلم فيها..
وكفايه تشبحلهم..
ولمياء كذلك..
شوي..
جي عماد من المربوعه للصاله..
في الوقت اللي هي فيه وقفت ع حيلها ولفت بتولي..
جو عيونهم فبعض...
فيسع مارزان غيرت عيونها..
وقامت وشاحها حطاته ع راسها..وكملت طريقها بسرعه البرق للكوجينه وهو بعيونه معاها..
🍃الله غالب..عاد العيون وماتحب ماقدرش يمنعهم من انهم يلحقوها..💓🍃
تنهد بعدين شبح لتليفونه..استاقض وقال:حناي..
قدملها وعطاها التليفون وقال؛سناء..
فاطمه؛خطيبتك!!خدت التليفون منه وحطاته ع وذنها وقالت..آالو..
هو رجع قعمز حداه وعيونه فالكوجينه..بالك تمر ولاتبان شويه..
ولمياء تراقب فيه وهي تحرق..
وسعيده شبحتله وخاطرها تنوض تعطيه كف..
هني تصرفت رفقه..
ناضت ومشت خشت الكوجينه وصكرت الباب..
امه التفتت شبحتله..
طول غير عيونه اللي نظرتهم كانت توجع..
نزلهم وقعد يسمع فحناه كيف تكلم فسناء..
وغاليه تشوفله بضيق...
فهالوقت..
طق باب الحوش..
ناضت رانيا كذلك بش تفتح..
شويه وخشت ومعاها دلال..
دلال تتكلم وهي تاشر عليهم بمفتاح السياره:شن حالكم ياعيله..
كلهم باصوات متقطعه :الحمد لله..
قدمت طول لخالتها كفايه وقعدت تسلم عليها..
نعيمه:وين هدا كله..
دلال بعد سلمت ع خالتها قالت:روحت من الكليه 5..للحوش طول لودت عليه و ع روحي وبعدين جيت زحمة الطريق معروفه عاد..
رانيا وهي قايمه صفرة البكلاوة:علاش مكلفه ع روحك..
التفتت دلال شبحتلها وقالت:نبوكسك!!
كلهم:ههههههههههههه..
ورانيا طلعت لسانها وغمزت وهي تضحك بعدين لفت ومشت الكوجينه فتحت الباب وعماد عيونه الملهوفه عليه..
وفعلا جو عليها..
بس اللي شافه صدمه..
كانت تبكي وتمسح فدموعها ورفقه ونور واقفات عليها..
رانيا وهي عاطيه بالظهر طول صكرت الباب..
قلبه انقسم نصين..
من قوة اللي حس بيه لما شافها تبكي قعد صدره يعلى ويهبط ..يتنفس بسرعه..💓
شبح لحناه اللي قالتله:هاك عطيها امك تبي تكلمها..
قداش خاطره وقتها لو خدي التليفون وقال لسناء بري فحالك اني مانبيكش مانحبكش..انتي غلطة عمري مش هي..
هي عمري كله..وعمره قلبي مايحب غيرها..
لكن صعب جدا جدا يدير هكي..
كل اللي داره..خدي التليفون ومده لأمه اللي خداته وهي تبتسم بالسيف وكلمتها..
وعيون سعيده ولمياء عليهم..
هو شبح لسعيده اللي كانت تشوف لكفايه برفعة حاجب..
بعدين غير عيونه للمياء اللي كانت تشوفله بنظرة حاده..
غير عيونه عنها ورجع شاف لأمه..وهو مخنوق..
مخنوق ومغموم...💔
🍁🍁🍁🍁
في الدار..
مقعمزة روان ع الفراش..
وبحداها حنين واسيا ونورهان التلاته كانوا يرسموا..
ونورهان تراقب فيهم..
اكبرهم ع اساس وهي المسؤوله عليهم..
روان بعد كملت ورت رسمتها لنورهان وقالت:شوفي..
نورهان شافت الرسمه وابتسمت وهي تقول:تهببببل..
ابتسمت روان..
اسيا:باهي واني؟؟!..
شافت نورهان رسمتها وقالت:حلوة..
حنين:شوفي..
نورهان بإنبهار:حييي حنو..محلاها رسمتك..
جت اسيا حداهم وشافت رسمة حنين وقالت:احلى من متاعي..
روان:نبي نشوف..
حنين مدتها لروان..
خدتها روان وقعدت تشوفلها وقالت:حلوة هلبه..
ابتسمت حنين
نورهان:انتي لما تكبري بتولي رسامه..
حنين:لالا نبي نولي تكتورة..
روان:زي نوسه..
نورهان:من نوسه..
روان:دكتورة..صاحبتي..
🍁🍁🍁🍁
والله عيله تجنن يادكتورة ملاك يهبلوا..
ملاك بضحكه:ايه لاحظتهم..عندهم طروف اطلع طول..
ضحكت خنساء وهي تحرك فراسها ايمين ويسار..
ملاك وهي تضحك شبحت القدام وقالت:واهوا واحد منهم..
شبحت خنساء وين ماتشوف ملاك لقت حمزة واقف بعيد شوي يشرب فميه..
قعدت تشبحله..
وملاك تشوفلها وقالت:طرف صح!؟..
شبحتلها خنساء...
ملاك ضحكت وغمزتلها..
عكرشت خنساء وجهها اللي ولااحمر وقالت:فوتيني ترا..
فاتوا من حداه..
هو شبح لخنساء وقال:دكتورة..
وقفوا الزوز..
ملاك:اني؟..
حمزة:لا قصدي الدكتورة خنساء..
ارتبكت خنساء شويه..
ملاك ابتسمت وقالت:نستأذن..
مشت صاحبتها وخلتها..
هي برغم شعورها بالإرتباك الا انها اخفاته واظاهرت بالعكس..
شبحتله بجديه وقالت:تفضل..
ابتسم حمزة وقال:شكرا..
هي سألت :علي شني؟..
حمزة: ع اهتمامك بأمي واختي الفترة اللي فاتت..
خنساء:مش بجميلي..واجب..
ابتسم ع جنب وقال:نعرف ان الدكتور اللي دار العمليه عمك..وانه دكتور مايخدمش ابدا في المستشفيات العامه..ومش عارف كيف صار وجي هني ودار العمليه؟ معروف الدكتور عبدالمعز متكبر..
خنساء برفعة حواجب:تعرف عمي قصدك؟
حمزة:نخدم عنده في العياده..
خنساء:دقيقه..انت دكتور!؟..
حمزة:صيدلاني..
خنساء شبحتله شويه بعدين قالت:امم..ع العموم نرجع ونقولك واجب مش بجميلي وكونه عمي هدا مادخلاش ابدا بالعمليه اللي دارها هني..نستأذن..
ومشت بسرعه وهي مرتبكه ع الآخر..
هو قعد معاها بعيونه لين اختفت..
بعدين ضحك ومشي..
🍁🍁🍁🍁
فتحت عيونها بالشويه بالشويه..
وهو مطبس راسه ويشوفلها...
هي مازال تحاول تفيق..
ارتسمت ع وجهه ابتسامه لما شافت ابتسامة ع وجهها المتعب...
قال:تتغلي يازينب هانم..
زينب بتعب:مي..لاد..
ضحك وقال:ايه ميلاد يامخوفتنا..
زينب:قاعده..حيه!!..
سمعت صوت ضحك..
بعدين ميلاد رد بضحكه وهو يقول؛لامتي..انتي متي واني انتحرت ولحقتك..
صدحت أصوات الضحك فالغرفه..
وهي يدوب قدرت تضحك..
حميد بضحكه:خلاص معاش تناشبها..
ميلاد ضحك ووقف ع حيله..
حميد:ترا شويه..
بدلوا الاماكن هو وميلاد..
حميد طبس وقال؛زنوبيا..
زينب:حاج..متولي..
كلهم:ههههههههههه..
حميد بضحكه:الحق مش فيك..
هي بصعوبه شديده ضحكت..وكانت مازال متعبه ووجها شاحب..
الهادي بضحكه :ترا حولوا بالله..
تبادلوا هو محمد وعمر المكان مع ميلاد وحميد..
حاوط الهادي بذراعاته محمد وعمر..
والتلاته طبسوا مع بعض وقالوا:حمد لله ع سلامتك..
ابتسمت وقالت بصوت يدوب طالع؛الله..يسلمكم..
💕ماطولوش معاها هلبه شويه وطلعوا..
وخشوا بعدهم حمزة و سند..وحتى هما ماطولوش..
بعدهم خش خيري..
لما شافها بهديكا الحاله راقده ع بطنها ومتعبه ووجهها شاحب..برغم زعله منها لكن قلبه رقلها..
مشالها طول باس راسها..
نزلوا من عيونها دموع..
هو وخر وشافهم..مسحهم بلطف وقال:الحمدلله ع سلامتك..
زينب:سامح..تني؟..
هو رجع باس راسها بعدين بعد وقال:الحمد لله ع سلامة نوارة حوشي..
هي ابتسمت ودموعها مابطلوش نزول..
وهو يمسح فيهم 💖
🍃نعمة الزوج الصالح..وآه يانعمة الزوج الصالح 💔🍃
🍁🍁🍁🍁
الساعه 9:00ليلا..
ايه استاذ زين يسلم عليك وتحمد لخالتي بالسلامه..قالي حاولت نتصل بيها ماحصلتهاش.
رانيا ضربت جبهتها بيدها وقالت:حيي نسيت تليفوني من غير شحن
دلال:المهم..قالك ضروري غدوة تجي
رانيا:ايه ناويه نمشي غدوة
دلال :امتى تكملي..
رانيا:معاش قعد هلبه..ناقشه شهر 12إن شاء الله
ابتسمت دلال وقالت:موفقه.
"دلال..رانيا تعالوا تعشوا"..
دلال ورانيا مع بعض:هيا هي..هانا جايين..
ناضوا مع بعضهم وطلعوا من الدار..
🍁ليلتها بعد تعشوا..
جي عبدالسلام روح بنور ودلال وآسيا..
وسعد روح بكفايه ونورهان..
وحميد روح بعيلته
قعدوا..
نعيمه وغاليه وحميده وبنتها ورباب وسعيده ورزان ولمياء والحاجه فاطمه مع رانيا وروان
وروحوا فالليل حمزة وسند ومحمد وعمر باتوا في الحوش
اما خيري قعد حدا مرته في المستشفى ومعاه ميلاد
والهادي روح مع عماد لحوش كفايه بات فيه..
🍁🍁🍁
عمليتها غدوة بعد الظهر..
نعيمه:بتروحوا معناها؟..
غاليه:اني بس..وحميده بتقعد هنى مع امي..
نعيمه :باهي تنوض بالسلامه..ضحكت وقالت..صار طلعت حامل ببنت..
غاليه بضحكه:ايه وجاحدتها..
سعيده:كلنا جبنا البنات والولاد ليش ادرق فيها!؟..
نعيمه:متخلفه..
ورزان حداهم تغط فنوم عميق...من التعب💔
في الدار التانيه
كانوا راقدات حميده وحنين ولمياء ورباب ببنتهاو رانيا وروان..
كلهم واصلين فسابع حلم
ماعدا لمياء
اللي كان النوم مجافيها وهي تخمم..
شويه وشبحت حواليها لقتهم كلهم راقدات..
بعدين خدت تليفونها من تحت المخده..
وفتحت نت الشفره..
وخشت ع الماسنجر..
لقت اختها مسكره..
تأففت..
بعدين بدت تكتبلها فرساله..
بعتتها..
وطلعت من الماسنجر....
وحطت التليفون تحت المخده ورجعت تفكر..
《نادرة:دارتها بنت عمك..قالتلي امها..مشينا زرنا قبر سيدي عبدالسلام ودبحناله..من هديكا الزيارة مافاتش شهر الا وبنتها حامل》
هي من داخل مش مقتنعه..بس تحاول تقنع روحها مافيش وسيله غير هالوسيله بعد مالجئت للطب العادي...والطب الشعبي..وجربت كل شي بلا فايده..
قعدلها بس..هالوسيله..
🍃ماهو هدا شرك..تلجأ للشركيات هادي..وتنسى اللي فيده كل شي!!..
ماهو هي حتى لو كانت انسانه مش كويسه لكن فيها شوية حشم ولو كان باطني..
بأي وجه بتمشي تطلب من ربي يعطيها...دارت شويه!!
ربي غاضب عليها غضب شديد..اي دعاء ممكن تدعيه مش حيستجيبه..
لأنها ظالمه وقاعده تظلم وناويه ع ظلم....قلبها مش سليم..
وقلبها المعلول هدا مستحيل يتوجه لله فحالته هادي..
وطبعا ابليس الإنتهازي ماخلاش الفرصه تفوته..خلاها تزيد تغرق فالذنوب اكثر واكثر🍃
🍃🍃🍃🍃
تاني يوم..
مع الساعه11:00الصبح..
خطم الهادي ع حوش زينب..
خدي غاليه ورفعها للمستشفى وقفت ع اختها شويه..
بعدين تسقدوا من المستشفى للبلاد ع طول..
وصلوا غادي مع التلاته طول للعياده اللي بدير فيه سميه عمليه الولاده..رفعوها خوتها..
لما وصلوا غاليه والهادي كانت كيف خاشه للعمليه..
بعد اقل من ساعه..
طلعت ع الدنيا البنوته التانيه اللي انضمت مؤخرا للعيله..
وحالتها وحالة امها كويسه..
وبوها فرح بيها هلبه واختارلها من الأسماء..
"فاطمه"..
ماراجاش بكل مشي سجلها..
والخبر وصل امه اللي فرحت هلبه ان واخيرا واحد من ولادها سما عليها..💕💕
كذلك خواته فرحوا هلبه اللي تسمت واخيرا حفيده فالعيله ع اسم امهم..
لكن..
الست سميه ماعجبهاش..
كانت تبي تسميها "رتاج"..
مافتحتش موضوع الأسماء مع الهادي ماكانش خاطر فبالها نهائي انه بيسمي ع امه
🍃هو بصراحه حق تسميه الأبناء بالدرجه الاولى للأم..هي اللي حملت وتعبت وشافت الويل وهي تولد..واللي زي سميه انشق بطنها لما ولدت..يعني حق الام بس هي اللي تسمي بعدين يجي الاب..
نقولوا من الافضل يتفقوا الزوز مسبقا...
بس كذلك مافيهاش باس لو خديتي بخاطر عزوزتك وسميتي عليها فحالة الاسم يكون ماشي مع الوقت بش الولد والا البنت ماينظلموش🍃
🍃المهم
تستمر الأيام فالجري..
ايه والله تجري جري..
والعمر يجري جري حتى هو واحني مش حاسين...
خلال هالأيام..
تناوبوا خوات زينب ع حوش اختهم ..
يعاونوا فرانيا ع اهتمام بروان..
حميده بدلت هي وغاليه..
محمدمشي جاب غاليه وروح بحميده بنتها وامه..
اما في المستشفى..
فكانوا يوميا يزوروا فزينب..
وكذلك..
الدكتورة خنساء كل ماتجي للمستشفى لازم تمر عليها تشوف شن حالها وشن تبي..
وزينب حبتها هلبه فهالفترة القصيرة..
وحست ان في اعجاب بينها وبين حمزة ولدها..
في اخر يوم لزينب في المستشفى..
كانت فغرفتها..
مقعمزة ع السرير وهي لابسه فرقبتها الواقي اللي يلتبس غالبا لما تكون في اصابات للرقبه من اي نوع..
كانت حداها خنساء تهدرز عليها..
زينب بإبتسامه:يعني انتي عندك زوز خوات متزوجات..
خنساء بإبتسامه :ايه..
زينب:باهي وانتي ماعندك شي..
ابتسمت بخجل وقالت:لتوا لا..
زينب:اكيد يخطبوا فيك؟..
خنساء بخجل:ايه..لكن لتوا يعني ماجاش صاحب النصيب..
زينب بإبتسامه؛تو يجي..انتي عسل مايخلوكش..
ضحكت خنساء بخجل..
شويه طق الباب وخش حمزة..
عينه جت فعين خنساء..
هو ابتسم..
وهي نزلت عيونها لوطا من الخجل ووجهها احمر..
وامه مركزة عليهم هي مبتسمه...
حمزة خش وقال:السلام عليكم..
ردوا عليه:وعليكم السلام..
حمزة بإبتسامه وهو يشوف لأمه:هاه يما شن حالك توا..
زينب:الحمد لله كويسه..
حمزة شبح لخنساء وقال:اكيد بتكوني كويسه العناية هني فوق الممتاز..
خنساء كانت متحشمه هلبه..تنحنحت بعدين شبحت لزينب و قالت:الحمد لله ع سلامتك وان شاء الله هدا حدالسو...نستأذن..
زينب:دقيقه بنتي!..
خنساء قرنت حواجبها بإستغراب وهي تشوفلها بإبتسامه..
زينب:تعطيني رقمك..
حمزة شبح لأمه وهو متفاجئ ..
خنساء وزعت نظره عليها وعليه وهي متفاجئة كذلك..
زينب بإبتسامه:خشيتي خاطري الحق وحبيتك مانبيش نطلع مني هني وننقطعوا عن بعض..
حمزة مازال متفاجئ في أمه..
وخنساء انحرجت وتحشمت تردها ابتسمت بإرتباك..وقالت:تمام..عندك تليفون هني..
زينب ضيقت عيونها وقالت:ايييه..تليفوني قعد عند خيري..
شبحت لحمزة وقالت:هات تليفونك ترا..
خنساء رفعت حواجبها وهي تشوف لحمزة..
وحمزة بتلقائيه مد تليفونه لأمه..هي خداته ومداته لخنساء وهي تقول:هاك بنتي سجليه هني واني تو ناخده منه بعدين..
خنساء تشوف للتليفون بعيون متوسعه..
زينب بضحكه:ولدي محترم ماعنداش فالتلخبيط والله مامداير بيه حاجه..خودي هاك..
حركت عيونها لحمزة..لقاته يحك فلحيته وهو يشوف لتليفونه بإحراج..
بعدين غيرت عيونها لزينب..وبتردد مدت يدها وخدت التليفون..
ابتسمت زينب وهي تشوفلها كيف تسجل فالرقم ووجهها من لون حبات الرمان احمر💓
بعد سجلاته مداته لزينب خدت التليفون وقالت:ناخده منه وقبل نتصل بيك تو نبعتلك رساله..
هزت خنساء راسها بإيجاب وهي فقمة الخجل وقالت:تمام..هي بالسلامه..
ومشت طول بسرعه بش تطلع فاتت من حدا حمزة اللي كان مبتسم لخجلها..
وصلت في الباب فتحاته وطلعت..
حمزة شبح لأمه:شن الموقف اللي حطتيها فيه هدا..
زينب رفعت حاجبها وقالت:تلحلحتلك..
حمزة ضيق عيونه وهو يضحك قال:شن هيا!؟؟؟
زينب:اللي سمعته..
حمزة قعد يشبحلها بإستغراب وهو يضحك بعدين قال:تلح..لح..تلك..ههههههه..
زينب:زيد تسهوك زيد..
وحمزة يضحك وخلاص..
🍁🍁🍁🍁
اليوم التاني..
اللي كانت بتطلع فيه زينب من المستشفى..
كانوا امها وخواتها ونساوين خوتها والبنات جايين لحوشها..
برغم ان حوش زينب مش هداكا الوسع بس ولامرة يجوه فيها ويحسوا بالضيق...
نهارتها خواتها ماخلوا ماجابوا معاهم..
ودارو اشبه بالوليمه من فرحتهم بسلامة اختهم..
ع الغدي..
رباب توكل في امها..
وزينب تاكل وتهدرز:ايه حقه كفايه..طلع الدكتور اللي دايرلي العمليه معرفة راجلك ولدك مالك وحمزة ولدي يخدموا فعيادته..
كفايه بلعت وقالت:امم..الدكتور عبدالمعز معتوق نعرف حتى مرته وبنته ناس كويسه..لكن ولدي مالك ليه مده مسيب الخدمه غادي..
رفقه ورزان ودلال ورانيا انظارهم توجهت لنور اللي كانت تاكل وعيونهافالصونيه ووجهها احمر..
فاطمه:وين يخدم تو؟!..
كفايه:فعياده لصديق ليه واموره ماشيه تمام الحمد لله..
فاطمه:الحمد لله..
مبروكه:رباب بنيتي كولي راك ترضعي..
زينب:ايه بنتي حناك عندها حق كولي بنتي اني خلاص معاش عندي وين نحطه من لما جيت وانتوا ترصوا فيا..
ابتسمت رباب وقالت :حاضر..
زينب بصعوبه ناضت..ومشت قعمزت حدا روان...
وخواتها يشوفولها..
مرتاحين هلبه اللي طلعت من هالازمه ع خير..هي وبنتها..
🍃قدر ربي ولطف🍃
🍁🍁🍁🍁
الساعه 1:00ليلا..
حطيها هني نوارة..
حطت نور اسيا فسريرها بهدوء..
بعدين غطتها..
وكيف جايه بتلف بش تطلع قالت...
نور:تصبحي ع خير دلو..
دلال:نوارة..
وقفت نور وقالت؛امم..
دلال:سمعتي خالتي شن قالت..
نور ابتسمت بتهكم وقالت:سمعت..ومش مهم ولاعاد يعنيلي فشي هو حر فحياته..
دلال:من جدك نور!!هدا سيب ع خاطرك يانور..
هزت نور راسها بإيجاب وقالت؛باهي..سيب ع خاطري..تمام واني بعد ماسمعت انه سيب خدمته ع خاطري نتصالح اني وياه ونولوا لبعض ونرجعوا لجو حبني ونحبك وغيره...وبعد يفوتوا علينا شهرين غرام وهيام يدير عمك مالك فالطه اكبر من اللي قبلها..وين المشكله عادي وكان عرفت بنتعاركوا ونتفارقوا لكن سيورني مسامحه وموليه صح!!..
دلال:نور!يعني انتي معاش تحبيه خلاص..
قلب نور انوجع صح بس ردت بكل قوة وقالت:مش مهم يادلال..توا ولابعدين حيطلع من قلبي وحننسى حبه نهائي..المهم كرامتي يادلال كرامتي لو تنازلت عنها ع خاطره معاش نقدر نردها بكل وقت نحتاجها معاه..
اقتنعت دلال بكلام اختها وقالت بإبتسامه:تصبحي ع خير نوارتي..
نور ابتسمت وقالت:قدامك كل خير..
لفت نور ومشت طلعت من دار اختها وصكرت وراها الباب ومشت لدارها..
خشت وصكرت الباب..
طول الدموع نزلوا..
مشت لسريرها خشتله ورقدت وهي تحاول ماتفكر فشي..
فهالوقت كان تليفونها المحطوط ع وضع الصامت..
يرن ويرن..
الرقم غريب..
لكن هادي المرة 35اللي يتصل فيها من المغرب لتوا..
مش اليوم بس...
ليه شهرين ونص وهو يتصل ويبعت فالرسايل وهي ولامدورة..
بس الفرق هالمره..
برغم انها عارفه ان الرقم لمالك..لكن مافكرتش تحظره زي قبل...
وهو هكي زاد تأمل..ان في مجال للصلح..
مزال موجود الامل💓
🍁🍁🍁🍁
تاني يوم...
كلية الطب..
الساعه 12:00ظهرا..
واقفه في باحة الكليه هي والمعيد مهند ونوميديا وتاله..
نوميديا:اي مساعده تبيها كلميني بس..نعرف هلبه خرجين من الصيدله تو يفيدوك..
نور:عندي ولد خالتي متخرج منها ممكن نحصل منه شي..مشكلته مشغول طول الوقت هدا علاش دورت غيره..
تاله تسمع فيها بإهتمام..
نوميديا بإبتسامه:حتى اني عندي ناس فنفس التخصص يقربولي ماقدرتش نطلب مساعدتهم لأن الدنيا تلاهي زي مايقولوا..
نور بإبتسامه :صح..
مهند كان يتأمل فنور بنظرات اعجاب شديد وهي تتكلم..
وتاله مركزة عليه..
شويه غيرت نظرها عنه وشبحت حواليها..
فتحت عيونها ع وسعهم لما شافت حمزة ومالك جايين من بعيد..
مالك كان يدور..
وحمزة من اول ماجي عيونه جو ع نور وين واقفه ومع مني وماقدرش يتكلم..
مالك وهو يدور:متأكد عندها محاضرات اليو...
سكت لما جو عيونه عليها..
نار..
نار ولعت فيه من اسفل رجله ووصلت لأعلى راسه..
خدي نفس وطلعه..
وحمزة وهو يشوفله عرف ان اليوم مش حيمشي ع خير..
حمزة:معاها بنات..
مالك بغضب:مقتنع بيه اللي قلته توا؟؟!..
حمزة سكت..
مالك قدم مندفع..
شده حمزة وقال:مالك..
مالك نفض يد حمزة بقوة وكمل طريقه..
وتاله لما شافاته جاي شبحت لنور وقالت:نور..
نور لما شبحتلها لمحوا عيونها مالك جاي..
فنصت..
مهند ونوميديا كذلك شبحوه..
وصل فيهم وقال وهو يحاول يتمالك اعصابه:نور تعالي نبيك..
نور بحده:شن تبي؟!..
مالك غمض عيونه وفتحهم بعدين قال:نور ابعدي الشيطان وتعالي..
نور:لو سمحت مالك برا فحالك ماتسببليش مشاكل..
مهند:خلاص ياراجل مش بالسيف..
حمزة:الكلام بينها وبين ولد خالتها..
نوميديا:تعالى مهند نمشوا..
مالك:ايوه هي توكل..
نور عنادا:بنمشي معاكم..
مالك شبح لحمزة وهو يفنص وملامح الغضب تخوف باينه ع وجهه..
حمزة خاف وقال:نور تعالي..
نور:هيا تالا..
حمزة برفعة حواجب:نور!!..
مهند وهو مضيق عيونه؛مش كان بنت خالتك تتعامل معاها هكي مش من باقي املاكك هيا..تحشم ع وجهك وخليها فحالها..
نوميديا بتفنيصه:مهند!!.
نور قلبها كان يرجف من داخل لكن كانت تحاول تبان قاسيه قدامه...
حمزة شبح لنور بنظرة ازدراء ممزوجه بالغضب بعدين شد ذراع ولد خالته وقال:بالله عليك يامالك فوت وتعال معاي..
مالك شبح لنور شويه...
بعدين هز راسه بإيجاب..
ولف بيمشي..
نور من داخل بتموت حاسه ان مالك لو مشي هالمرة مستحيل مازال يولي..
قعدت تشبح لوطا وهي شاده دمعتها بالسيف ونوميديا تشبحلها..
حمزة:هيا هي..
مالك شبحله شويه بعدين وزع نظره حواليه..
ضم شواربه لداخل بقوة..
مشي خطوة..
بعدين فلمح البصر..
لف ومشي بإندفاع لمهند ..
نطحه براسه..
البنات عيطوا...
وخر مهند وهو شاد راسه..
مالك قدمله بسرعه وعطاه بوكس..
ويلحقه بالتاني ويعطيه التالت..
حمزة كان يبيها لمهند..
خلا مالك يعطيه اللي يستاهله بعدين جاه شده..
مهند وهو شاد فمه قال:تو تشوف ياكلب الكلاب..
قدم بسرعه بيعطي مالك بوكس..حاما عليه حمزة وجي فوجهه..
تاله عيطت..
ونور قعدت تبكي..
خدتهم نوميديا من ايديهم وجبدتهم الزوز هربت بيهم..
ونور تتلفت وتشوف لمالك كيف قدم ورد البوكس لمهند..
وشدوا بعض وقعدوا يضاربوا..
التموا عليهم شباب وقعدوا يحزوا...
🍁🍁🍁🍁
الساعه 5:00عصرا..
عطييني اسمه ولد ستين كلب هدا..
سعد:بالله عليك اسكت ياعماد مش ناقصاتك انت التاني..وانت تعال هني يادكتور ياعاقل يامحترم شن تصرفات الشوارعيه هادي؟؟!..
مالك اللي كان مقعمز ع كرسي مقابل بوه وحاط ايديه ع ركابه اللي كان يهز فوحده منهم بغضب قعد ساكت..
كفايه بقلق:من بكري هدا حاله مايبيش يتكلم ولايقول شن صار بالزبط..
عماد:ماهو حكي حمزة يام..
كفايه:في شي ناقص ماقالاش..
مروان اللي كان واقف في الباب:احكي ياراجل..
سعد بنفاد صبر:قسما بالمولى كان ماقلت شن صار توا ماضال الا..لازك.
كفايه بصدمه:سعد!!
نورهان واقفه تتفرج عليهم وهي خايفه .
عماد:بوي صل ع النبي..
سعد غمض عيونه وقال:عليه الصلاة والسلام...فتحهم وهويشوف لمالك قال..بتحكي توا ولاكيف..
قام مالك عيونه فبوه وكان نظرته ليه تعبر عن حجم الحريق المندلع فجوف ولده..
قال مالك بنبرة فيها تهديد واضح؛اني اللي نحلف بالله يابوي ومستحيل نحلف بالله ونحنث..كان مامشيتش اليوم معاي نعطوا كلمه فنور بنت خالتي..اقسم بالله اقسم بالله نلم قشيشي ونرحل معاش تشبحولي وجه ولا ترفعولي طريق..
انصدموا كلهم..
مالك عيونه اللي نظرتهم كلها غضب تعبوا دموع وقال؛مش تقولوا هدايهتري..وحق الله نديرها وانتم تعرفوني..
ابتسم مروان..
وعماد كذلك بس ابتسامته كانت ابتسامه الم..
كفايه اللي قلبها وجعها ع ولدها شبحت لراجلها لقاته مازال يشوف لمالك بصدمه..
🍁🍁🍁🍁
ااخ ياقلبي والله عرفتك..تموتي عليه انتي غير جو رامض اللي ديري فيه..
نور تسمع فاختها وتبكي وخلاص..
دلال:ماهو كان قعمزتوا مع بعض هدرزتوا زي الناس العاقله تفاهمتوا زي البشر راكم ماوصلتوش لهني..
نور ببكي:حي عليا يادلال خلاص مالك من بعد اليوم بيمسحني من حياته..
دلال:وشن صار فكرامتك!؟..
نور ببكي:ارزيني فيها..
غصب عنها دلال ضحكت..
ونور قعدت تشوفلها بنص عين وهي تبكي وترشف..
شوية خشت نعيمه وهي تقول:اتصل توا راجل خالتكم كفايه قال بيجي هو وخوته..
دلال ونور شبحوا لأمهم بصدمه..
نعيمه رفعت حاجبها وقالت:شن صاير قولوا..
🍁🍁🍁🍁
فحوش زينب..
غاليه طلعت من الكوجينه بعد ماكانت تتكلم بالتليفون وقالت وهي تضحك:سعد عدى هو وخوته لحوش عبالسلام راجل نعيمه..
زينب:علاش!!..
رباب وهي ترضع فبنتها:بيخطبوا نور!؟..
ع طلعة رانيا وحميده من الدار بعد سمعوا شن قالت غاليه
غاليه بضحكه قالت:ايه..عمكم مالك تم صبره خلاص..
حميده:زعم راجل نعيمه يقول باهي!؟
زينب:صح..هدا السؤال توا..
رانيا:يااارب يوافق...
🍁🍁🍁🍁
بشير "خو سعد الكبير":كان ع قرايه تقرا عنده ولد خوي دكتور ويحب العلم..واكيد حيخليها تكمل قرايتها الزوز تخصصاتهم قريبه من بعض يقريها يخي..
عبدالعاطي "خوه الوسطاني":وبعدين ولد خوي يااخ عبالسلام راجل قد المسؤوليه يخدم ع راسه راجل خلوق ومحترم وسمعته الباهيه سابقاته انشد عليه من تبي تنشد..
سعد:حني نعرفوا بعضنا كويس ياعبالسلام وصغارنا متربيين مع بعض وربايتك الصالحه نعرفها زي ماانت تعرف ربايتي..الولد طق الحوش من بابه وقال اللي يبوه عمي عبالسلام وبنته اني حاضر..
🍃عبدالسلام قبل شاك وتوا زاد تأكد..فكر وهو يسمع فيهم دام الوضع جدي لهالدرجه مالقاش في فايده من الإصرار ع الرفض..وغير هكي مالك يعرفه كويس ويعرف بوه وربايته..وزي مايقولوا اللي تعرفه خير من اللي ماتعرفاش🍃
بشير:هاه..شن قولك ياعبالسلام؟..
ابتسم عبدالسلام وهو يهز فراسه بإيجاب ويقول:إن شاء الله خير..
💓💓💓💓
تضحك من بين دموعها زي الهبله ..
واختها تشوفلها وتضحك عليها..
نعيمه وهي تشوف لنور برفعة حاجب:يعني راضيه..
نور هزت راسها بإيجاب بسرعه وهي مبتسمه بفرح..
نعيمه رفعت حواجبها وقعدت تضحك..
ودلال تضحك وخلاص..
اسيا:معناها خالتي عروسه؟!!..
ضحكت نور..
دلال بضحكه؛مازال شويه..
اسيا:باهي امتى؟!
دلال:شهر 3..
اسيا:امتى..
دلال بإنزعاج:اييييااااح..
ضحكوا امها واختها..
اسيا:باهي واني امتى نولي عروسه!؟؟
دلال صدمه:هييييييييييي..
نعيمه ونور:هههههههههه..
واسيا حطت صبعها ففمها ونتشاته وهي تضحك يخجل طفولي💖..
🍁🍁🍁🍁🍁
الساعه 8:00...
فهالساعه...
وصلوا رسائل sms فنفس الوقت لكل من..
غاليه..
دلال..
رفقه..
رزان..
مالك..
عماد..
حمزة..
سند..
توفيق...
محمد..
الهادي ..
عمر....
وزيها وحده وصلت عن طريق الماسنجر لهانيبال..
كلهم كانوا من مصدر مجهول..
محتوى الرساله
(حطوا ع قناة الراديو ******ضروري وهام جدا الساعه 9:30ليلا بتوقيت ليبيا)..
الكل استغرب الرساله..
واللي هدا حط ع القناة..
واللي مايوصلاش التردد عن طريق حساب القناة ع الفيس تكون الحلقه موجوده و يشوفها ويسمعها..
قبل الموعد بنص ساعه..
واقف فوسط داره تليفونه ع وذنه..يراجي امتى اللي اتصل بيه يفتح الخط..
انفتح الخط..بس مافيش صوت..
ابتسم وقال:بشيشتي💓..
نور ببكي:اعطيني وعد..
مالك :وعد ياعمري..وعد شرف نقطعه ع نفسي قدام ربي وقدامك حاجه اضايقك مستحيل مازال نديريها..
ابتسمت نور من بين دموعها..
مالك:اااه يانوارتي آاااه..اكثر شي نحبه فحياتي كلها بعد امي وبوي... انتي..💓
ضحكت نور...
مالك بضحكه:وينه لسانك الطويل هداكا اللي كان زي السيف ينزل ع مالك ويقطع فيه..ولا مايعرفش يقول كان الكلام الحار بس..
نور ضحكت بعدين قالت:نحبك💓..
مالك غمض عيونه بشده وقلبه يدق بقوة :اااااخ..ااااه..وخلاص ااااه..فتح عيونه وقال..خلاص توا وليتي متاعي..الكلمه وعطيناها فيك..والدبله وبإذن الله نلبسهالك قبل عرس محمد..عرس محمد تحضريه وانتي خطيبتي رسمي..
ونور تسمع فيه وهي حاطه يدها ع قلبها اللي بيفر ويطلع من صدرها وهي تسمع فكلام مالك الحلو 💓
برا..
كان عماد خاطم من حدا دار خوته..
سمع كلام مالك الأخير..قلبه انعصر عصر..
غبط خوه هلبه ع اللي هو فيه..
حاز اللي قلبه يحبها ويبيها..
ارتاح باله وتهنى خلاص..
شد دمعته بالسيف ومشي كمل طريقه لداره..💔
🍁🍁🍁🍁
غاليه:الساعه قديش..
رباب:تسعه ونص مزبوطه زبط..
غاليه حطت ع القناة وفتحت مايك تليفونها..
وقعدوا يسمعوا هي وخواتها زينب وحميده ومعاهم رانيا..
🌟🌟🌟🌟🌟
بدت شارة البرنامج..
وكانت اغنية خاصه بيه..
كان اسمه"سهارى"..
بعد تمت اغنيته...
دارو فاصل موسيقي..
شويه وتنقص صوت هالفاصل..
وعلي فمكانه صوت حد..
كل واحد من الاشخاص اللي وصلتهم الرساله واللي حواليهم لما سمعوه تفاجئوا ع الآخر..
"ليلتكم فل..ليلتكم عسل..
الليله اول مرة عليكم نطل...
في اول حلقة من برنامجكم الجديد..
سهااارى..معايا اني..مروااان الحداد.."
غاليه واللي معاها من صدمتهم ضحكوا بعياط..
💕ودلال ونور
ابتسموا بمفاجأة..
اما محمد اتصل بحمزة والزوز قعدوا يتسائلوا عن اللي سمعوه وهما مصدومين ويضحكوا..
اما خوته..
عماد بضحكه:اما انت يامروان!!..
ومالك...
مالك؛واني نقول علاش مختفي المده الأخيره!!..
💕💕💕
مرام وهي تلاعب فعمار :كييغااا...كييغا...
كان عمار يدوب يطلع فيها..
بوه سمعه وضحك ..
وفنفس الوقت الزوز كانوا يسمعوا في مروان..
هانيبال وهو يشوف لولده:الله اعلم شن مازال يطلع منك انت..
ضحكت مرام..
🌟🌟🌟🌟
برنامجنا مش بس برنامج ترفيهي ضحك واغاني واسئلة وجوايز لاالاالااالا..
برنامجنا حنحطرحوا فيه كل ليلة خميس موضوع معين نتناقشوا فيه..ونهدرزوا فيه مع بعضنا..
عن طريق...الآلو...ورسايل smsوكومنتاتكم ع بوست البرنامج فصفحة القناه...
قبل نبدوا في موضوع الحلقه..
نبي توا من حبيبي اكرم يسمعني الاغنية اللي قتله عليها بكري قبل نخشوا..اها؟؟...لا ياكرومه الاولى بكل.. تي لا مش هادي....الاولى اللي قتلك عليها لما تلاقيت اني وياك في الأصنصير.....ضحك وقال...زهايمر رسمي......ايواااه هي هادي...هيا ياغالي...
علي صوت الأغنيه..
وكانت"وعيوني سهارى"...
بعد اول مقطع منها..
نقص المخرج الصوت وخلاه ع مروان وهو يغني..
هو وسط قلبي ومايديريش مايدريش يحبه المخبي..
ونبي نبوح خايف مايلبي...خايف مااايلبي..
💓صوته الحلو الحساس..
خلا قلب رفقه يرفرف..
خلا دموعها ينزلوا وهي موجوعه ع الآخر..
استاحشاته هلبه..وهو لاعاد يبيها ولاعاد تهمه وبابه فوجهها تصكر خلاص..هي هكي تشوف..
سمعت صوت نغمة الماسنجر..
رشفت ومسحت دموعها وشافت الرساله..لقتها من ..
عدنان الطير..
(حطي ع قناة*****الأغنيه اللي توا اهداء مني ليك)..
رفقه قعدت تشبح للرساله بإمتعاض..
شوي نقص صوت الأغنيه..
ومروان قال:الأغنيه هادي عزيزة عليا هلبه.....ونهديها لكل حد كلامها لمس قليبه..
وتوا خلونا مع بعض فموضوع حلقتنا الاولى من برنامج سهارى..
مهندس الصوت حط موسيقى هاديه وحزينه..
بعدين علا صوت مروان اللي قال بنبرة هدوء ممزوجه بالحزن:
اللي هو ....
الفراق 💔...
الفراق الإجباري...
تكون انت او انتي مجبرين ع انكم تفارقوا ناس بالنسبه ليكم ولوا جزء لايتجزأ من حياتكم ومرات حياتكم كلها..
تجبركم الظروف ع الفراق جبر..
وممكن سوء فهم خلاك تاخد موقف مبالغ فيه يجبرك تفارق..
ولما ترجع لعقلك..تندم...وماتلقاش خط رجعه..
وتولي مجبر بقوة ع الفراق..وانت من داخل تتقطع من العذاب..
💔كلامه ملح وانحط ع جروح احبابه..
خوه الكبير...
خالته الغاليه..
بنات خواله..
تألموا هلبه وهما يسمعوا..
مروان:
الفراق الإجباري...اقسى انواع الفراق..
الواحد سيب حاجه يحبها لدرجة الجنون...
لدرجة انه معاش يستطعم شي فالدنيا من غيرها..
تنهد وقال...يلقى روحه يسيب فيها غصب عنه لأسباب اقوى منه...
وكمل مروان كلامه..
وتشعب في الموضوع هلبه..
تفاعلوا معاه الناس تفاعل قوي..
اللي يحكي فقصته واللي يعبر بالشعر واللي يهدي فأغنية معينه لشخص مجهول الهويه وهو عارف نفسه..
كان مروان متمكن من ادارة الحلقه ومحاورة المتصلين..
بعد فاصل غنائي..
رجع من جديد لأخر قسم من البرنامج..
مروان:قاعد نستقبل فالرسايل اللي فيها الاجوبه واغلبكم مجاوب غلط..
نعاود ونكرر السؤال..
شن عملة دولة كوبا..؟...
دولة كوبا العمله اللي يتعاملوا بيها شن هي؟..
عشرة دقايق بس ونوقفوا استقبال الرسايل..
هااااه كرومه......تمام..
وآلو ياليل..
سهران ياليل..
سهارى عيوني مع ولد الحداد..
ونستقبلوا اول مكالمه ونقولوا..
آلو آلو معاك ولد سعد مروان..
من معااااي..
"معاك نجم "..
مروان:من وين تكلم فينا يانجم..
"من وين ماانت قاعد توا"..
ضحك مروان وقال:تمام..تفضل يانجم شن عندك بتقول فموضوع حلقتنا الليله..ع فكرة انت اخر اتصال معانا الليله وختامها مسك معاك يانجم..تفضل حبيبي فضفض هات اللي عندك...
تنهد المتصل وقال
"مش عارف شن نقول ولاشن نحكي..غير اني صدفه فتحت ع القناة وسمعت البرنامج فسيارتي واني مروح..موضوع الحلقه خلاني نوقف سيارتي فتركينه ونحاول نتصل بيك بش نقول اللي فخاطري..لإنسانه وحده بس..هي تعرفني كويس حافظه صوتي واسلوبي..بنقوللها انتي اجبرتيني ع الفراق ممكن بسبب خوفك..ممكن لاني حسيت اني جادمعاك وانتي مستهتره بيا وبمشاعري..ممكن وممكن وممكن..المهم فالنهايه انتي اجبرتيني ع الفراق...
لكن لازم تعرفي حاجه وحده بس..الفراق ماقدرش يجبرني ننساك...هدا كل اللي عندي وشكرا خوي"..
مروان:مستعجل يانجم هلبه قبل نبوا ناخدوا ونعطوا معاك....تنهد وكمل يقول..نتمنى رسالتك تكون وصلت..والمعنيه بيها تكون تسمع فحلقتنا توا...
💔المعنيه سمعت..
ماقدرتش تتمالك نفسها قدام خواتها وبنات اختها وقعدت تبكي..
كلهم تفاجئوا معقوله كلامه يكون أثر فيها لهالحد؟!!..
كانت حميده حاضنتها وتهدي فيها وبنات اختها واختها اللي ماتقدرش تتحرك من مكانها الا للضرورة وبصعوبه شديده قعدت تكلم فيها من مكانها اللي هي فيه تبي تهديها..
وغاليه تبكي بحرقه..
اما صاحب الرساله..
فكان قمة فالحزن وهو يسوق فالسيارة ويسمع فباقي البرنامج..
اختار مهندس الصوت من الأغاني اغنية كاظم الساهر
"بنت السلطان"..
اكثر مقطع الم قلبه وقتها..
"ادخلني حبك سيدتي مدن الأحزان..
وانا من قبلك لم ادخل مدن الأحزان..
لم اعرف ابدا ان الدمع هو الإنسان..
وان الإنسان بلاحزن ذكرى انسان..
🍁المقطع نفسه..كان صديقه الزين يسمع فيه وهو مقعمز في فيرندا الشقه متاعه حاط السماعات فودانه ويسمع في البرنامج...جدد عليه موضوع البرنامج مواجعه لما تكلموا عن الفراق الإجباري الأبدي..
كانوا دموعه ينزلوا وهو يسمع فكلام المتصلين عن ناس حبوهم وفقدوهم للأبد من اهل واصحاب مش بس الحبيب..
وكذلك نوض عليه جرحه فحبه المعدوم منه الأمل...
اكتشف وهو يسمع فالحلقه انه اكثر انسان سيء حظ فالدنيا..
ومش صدفه ...
🍃شن مازرعت حتما حتحصد🍃
🌟🌟🌟🌟
مروان..
ونقروا توا اخر كومنت معانا ع صفحة القناه..من...
يقين جميل...ضحك بعدين قال..okيايقين..
يقين قالتلي ليلة خميس نبوا نفرحوا ونغيروا جونا معاش نبوا نكد البلاد معبيه نكد سادنا نكد تبو تقتلونا نفسيا..
هههههههههههه..تمام تمام يايقين حاضر الخميس الجاي بإذن الله نغيرولك جوك.....شني اكرم....هههههه..مرة هكي ومرة هكي..........هههههه...تمام تمام........باهي يااكرم باهي....احمم..المهم اختي يقين حاضر تحت امرك الحلقه الجايه ان شاء الله حتكون حلوة بالمرة...نخليك تموتي ضحك..نقتلك بالضحك قتل......هههههههه..
رفقه وهي تعجب:تقتلك انننننن..تخفف فدمك..واحد بارد..
مروان..
اخر رسالة sms معانا من..عدنان الطير..
مش باعت اجابه لكن باعت طلب..اغنية وائل كفوري سألوني يهديها ل....WK...ضحك مروان وقال شن يااكرم سيارته هادي ولاشني..
رفقه بغيظ:مبرررردك مبررردك...ومرزن دمك مولي ثقيل من بعد ماسيبتك..كان نعرف ع من مخلط من بعدي...
🌟🌟🌟🌟
في اخر الحلقه دارو سحب..
وفاز احد المتصلين بجائزة البرنامج..
كلموه وباركوله..
وبعد مكالمته جي وقت الختام..
مروان...
جدا استمتعت معاكم..هادي اول تجربه ليا واول مرة نخش المجال هدا...بنشكر صديقي وسام هو اكثر من شجعني لما شاف فيا الموهبه وسعي معاي بش وصلنا لهني شكرا من قلبي ياويسو منور..
وانتم مستمعينا الحلوين تفاعلكم معاي فاجئني صراحة وزاد حماسي بش نزيد نعطي اكثر واكثر..مشكورين هلبه..
بإذن الله الخميس الجاي حتكون حلقه نااار وخميسية فل معاانا...
ضحك وقال..اكرم من بكري يسقد فيا...خلاص هي..اهو بنختموا...نتلاقوا ع خير حبايبي..الخميس الجاي..
فسهارى...معاياااا انييي....مرواااان الحداااد....
تصبحوا ع خير...
ومهندس الصوت ختم من عنده بأغنية..
"وعيوني سهارى"
💕💕💕💕💕
ممكن هديكا الليله هلبه عيون مارقدتش..
اولهم عيون غاليه..
اللي قاعده تذرف فالدموع فمرقدها..
احساسها ان نجم الدين كان صادق معاها فمشاعره زاد عذبها..
فنفسها قالت"ليش ياربي طلعته فطريقي..عارف اللي فيا ياربي..من زمان واني نتوجع من حاجات واجده فحياتي ماكنتش ناقصاته..."
غمضت عيونها بشده وهي تتأفف وكملت تقول فنفسها"استغفر الله وخلاص..ماهو كان حطيتله حد من البدايه وتشجعت وغيرت شفرتي راهو ماكانش صار اللي صار لكن اني ساهمت وجبت لروحي الهم والبلي لعندي"..
وكملت ليلها وهي تبلل فوسادتها بالدموع اللي مش راضيين يوقفوا ابدا..💔
🌴🌴🌴🌴
ودموع بنت خوها كذلك..
اياااه رزونه من لما حبت وهي تبكي امتى بطلت بكي...
بالذات بعد سمعت باللي داره مالك لنور...
حست ان مالك يحب بصدق وبقوة اكثر من خوه برغم ان نور حاولت تقهره بغيره..لكن هو لاسيبها ولاسلم فيها تمسك بيها وحارب بش ياخدها..وخداها...
غبطت نور ع حب مالك ليها..
وخطر عليها اصيل واللي قاعد يدير فيه بش يتقربلها ويخليها ترضى بيه..
🍁🍁🍁
بعد يومين
فالجامعه..
الساعه 12:00قبل الظهر..
الجو كان خريفي بإمتياز..
الدنيا مسحبه..
والهوا لاهو بارد ولاهو سخون ومرة مرة تهب ريح..
وهما التلاته مقعمزات فباحة الكليه ويهدرزوا..
رزان:نقارن بينه وبين اصيل فحاجه وحده بس..كيف بعد جي لعندي وردتيه مازال قاعد يحاول معاي..وكيف هداك اللي من اول غلطه درتها غلطه سببها حبي ليه..مش بس سيبني ورفض يسامحني لا..قهرني قهرني..نزلوا دموعها مسحتهم وقالت..وكان يحبني مايديرش فيا اللي داره..عماد طلع يحب نفسه اكثر مني..واني طلعت نحبه هو اكثر حتى من نفسي..
تنهدت حدهم بألم وقالت:يعني توا ع شنو ناويه..
رزان بحزن :مش عارفه..متشتته ضايعه بين قلبي وعقلي ماني عارفه كيف ندير..
تغريد:اهم شي رزان انك ماتحاوليش تنسي حد بحد ولاديري كيف مادار هو..
رزان :هدي مستحيل نديرها..اني لو صار ووافقت ع أصيل حنوافق ع خاطري وخاطر اصيل وبس..مانبي نظلم حد معاي ولانزيد نقهر روحي..
حدهم:عين العقل..واني نقولك..اصيل راجل بكل معنى الكلمه ويعرف شن يدير وشن يبي كان عطتيه فرصه حيعوضك عن كل شي حيخليك وكأنك عمرك ماعشتي اللي عايشتيه توا..
رزان قعدت ساكته وهي تشبح القدام وعيونها معبيات دموع..
فجأة رن تليفونها..
شافاته...لقاته رقم غريب..
فتحت الخط وحطاته ع وذنها وماتكلمتش..
"الووو"..
ضيقت عيونها بأستغراب ..
وحدهم وتغريد يشبحولها..
رزان:مني معاي..
"معاك خطيبة ولد عمتك حبيبتي سناء"..
فتحت عيونها ع وسعهم بصدمه..
سناء :اسمعي حبيبتي هما كلمتين ورد غطاهم وخري عن خطيبي احسلك وجو اللي ديري بطليه..راهو هو بروحه يحكيلي ع تصرفاتك معاه وقالي بنت خالي ومش عارف شن نديرلها..قتله خليني اني حبيبي ندير..واهو كلمتك هالمرة وننصحك مش نهدد ننصح...لو مابعدتيش من عليه لما نفضح بيك فعيلتك ونخليك ماتقدريش توري وجهك..وهادي اخر مرة ندوي معاك..
وصكرت فوجهها..
رزان من صدمتها ماقدرتش ترد بكلمه..
كانت ترعش مع بعضها ..بعد صكرت سناء..
قالت بصوت فيه رجفه:الحيواان..ودموعها طاحوا..
حدهم بخوف:خيرك..من كان يكلم فيك!!؟..
تغريد:رزان..
رزان ولى وجهها اصفر زي الليمه..
ملامح وجهها المصدومه تبدلت للغضب ودموعها مازال تنزل..
بإيديها اللي يرجفوا قعدت ادور ع رقمه في سجل المكالمات..دورت هلبه ع مالقاته وحدهم وتغريد يسألوا فيها شن في وهي ماتبيش ترد..
حولت رقمه من الحظر..
وناضت من مكانها..
اتصلت بيه وحطت التليفون ع وذنها وهي وتمشي وتجي قدام البنات..
حدهم :فهمينااا شن في..
رزان بعصبيه:اصص شويه اصص..
سكتت حدهم وشبحوا هي وتغريد لبعض..
......
درس سيارته حدا الميناء..
وكيف جاي بينزل رن تليفونه..
شافه..
تفاجأ ع الآخر لما شاف الرقم اللي ا
