#العشق_المتمرد
#جمان_فريد
#الجزء54_القسم1
ﻣﻘﻌﻤﺰﺓ ﻉ ﻣﻨﺪﺍﺭ ﻭﻣﺎﺩﻩ ﺭﺟﻠﻴﻬﺎ ﺍﻟﻤﺤﻄﻮﻃﺎﺕ ﻓﻮﻕ ﻣﺨﺪﻩ ..
ﻭﺍﺧﺘﻬﺎ ﺍﻟﻜﺒﻴﺮﻩ ﺍﺩﻳﺮﻟﻬﺎ ﻓﻲ ﺍﻟﻠﺼﻘﻪ ﻉ ﺭﺟﻞ ..
ﻭﺑﻨﺖ ﺧﺎﻟﻬﺎ ﻉ ﺍﻟﺮﺟﻞ ﺍﻟﺘﺎﻧﻴﻪ ...
ﻛﻤﻠﻮﺍ ﺍﻟﺰﻭﺯ ... ﻭﺑﺪﻭﺍ ﻳﺤﻨﻮﺍ ..
ﻭ ﺍﻟﻠﻲ ﺣﻮﺍﻟﻴﻬﻢ ﺑﺪﻭﺍ ﺷﻮﻁ ﺍﻟﺪﺭﺑﻮﻛﻪ ﻭﺍﻷﻏﺎﻧﻲ ...
ﺣﻮﺍﻟﻴﻦ ﺣﻤﻴﺪﻩ ...
ﺯﻳﻨﺐ ﻭﺍﻣﻴﻨﻪ ﻳﺤﻨﻮﺍ ﻓﻴﻬﺎ .. ﻭﺣﺪﺍﻫﻢ ﻟﻄﻴﻔﻪ ﻭﺭﺍﻭﻳﻪ ﺑﻴﺤﻨﻮﺍ ﺍﻟﻴﺪﻳﻦ ..
ﺭﺑﺎﺏ ..
🎶 ﻣﺒﺮﻭﻙ ﺍﻟﺤﻨﻪ ﻓﻲ ﺍﻗﺪﺍﻣﻚ .. ﻭﺍﻟﺨﻴﺮ ﻭﺭﺍﻙ ﻭﻗﺪﺍﻣﻚ ..
ﻭﺍﻟﻜﻞ ﻳﺮﺩﻭﺍ ﻭﺭﺍﻫﺎ ﻭﻳﺼﻔﻘﻮﺍ ....
ﻛﺎﻧﺖ ﻣﺮﺍﻡ ﺗﺮﺍﻗﺐ ﺑﺈﺑﺘﺴﺎﻣﻪ .. ﻟﻌﻨﺪ ﺳﻤﻌﺖ ﺻﻮﺕ ﺗﻠﻴﻔﻮﻥ ﺭﻥ
ﺩﻭﺭﺕ ﺑﻌﻴﻮﻧﻬﺎ .. ﻟﻘﺖ ﻣﺠﺪﻭﻟﻴﻦ ﻧﺎﺿﺖ ﻣﻦ ﻣﻜﺎﻧﻬﺎ ﻭﻫﻲ ﻣﺒﺘﺴﻤﻪ ﻭﻣﺸﺖ ﻉ ﺗﺮﻛﻴﻨﻪ ﺑﺶ ﺗﺮﺩ ...
ﻣﺠﺪﻭﻟﻴﻦ ﺑﺈﺑﺘﺴﺎﻣﻪ : ﻫﺎ ﺣﺒﻴﺒﻲ 💕
ﻫﺎﻧﻴﺒﺎﻝ : ﻛﻠﻤﻲ ﺭﺯﺍﻥ ﻗﻮﻟﻴﻠﻬﺎ ﺍﺗﻘﻠﻚ ﻟﻠﻤﺮﺑﻮﻋﻪ ..
ﻣﺠﺪﻭﻟﻴﻦ ﺑﻀﺤﻜﻪ : ﺗﻤﺎﻡ ...💕
ﻫﺎﻧﻴﺒﺎﻝ ﺍﺑﺘﺴﻢ ﻭﻗﺎﻝ : ﺑﺎﻱ ﻳﺎﻣﻨﺪﻭﻟﻴﻦ .. ﻭﺻﻜﺮ ..
ﺿﺤﻜﺖ ﺑﻌﺪﻳﻦ ﺍﻟﺘﻔﺘﺖ ﻟﺮﺯﺍﻥ : ﺭﺯﺍﻥ ..
ﺭﺯﺍﻥ ﻗﻌﺪﺕ ﺍﺩﻭﺭ ﻣﻦ ﻳﻨﺎﺩﻱ ﻋﻠﻴﻬﺎ ﺷﺒﺤﺘﻬﺎ ..
ﺍﺷﺮﺗﻠﻬﺎ ﻣﺠﺪﻭﻟﻴﻦ ﺑﻴﺪﻫﺎ ﻭﻫﻲ ﻣﺒﺘﺴﻤﻪ ﺑﻤﻌﻨﻰ ﺗﻌﺎﻟﻲ ..
ﻧﺎﺿﺖ ﺭﺯﺍﻥ .. ﻭﻋﻴﻮﻥ ﺍﻣﻬﺎ ﻭﺧﺎﻻﺗﻬﺎ ﻣﻌﺎﻫﺎ ...
ﻭﺻﻠﺖ ﻓﻲ ﻣﺠﺪﻭﻟﻴﻦ ﻭﻗﺎﻟﺖ : ﻧﻌﻢ؟
ﻣﺠﺪﻭﻟﻴﻦ : ﺗﺮﻓﻌﻴﻨﻲ ﻟﻠﻤﺮﺑﻮﻋﻪ ﻣﺘﺎﻉ ﺍﻟﺤﻮﺵ؟
ﺍﺑﺘﺴﻤﺖ ﺭﺯﺍﻥ ﻭﻗﺎﻟﺖ : ﺑﺎﻫﻲ ..
ﺍﺑﺘﺴﻤﺖ ﻣﺠﺪﻭﻟﻴﻦ ﻭﻣﺸﺖ ﻃﻮﻝ ﺧﺪﺕ ﻋﺒﺎﻳﺘﻬﺎ ﻣﻦ ﺣﺪﺍ ﺍﻣﻬﺎ ﺍﻟﻠﻲ ﺳﺄﻟﺘﻬﺎ ﻭﻳﻦ ﺑﺘﻤﺸﻲ ﺭﺩﺕ ﻭﻫﻲ ﺗﻀﺤﻚ " ﻟﺮﺍﺟﻠﻲ "
ﺍﺑﺘﺴﻤﺖ ﺍﻣﻬﺎ ... ﻭﻣﺠﺪﻭﻟﻴﻦ ﻟﺒﺴﺖ ﺍﻟﻌﺒﺎﻳﻪ ﻭﺍﻟﻮﺷﺎﺡ .. ﻭﻣﺸﺖ ﻫﻲ ﻭﺭﺯﺍﻥ ..
ﻭﺍﻟﻌﻴﻮﻥ ﻣﻌﺎﻫﻢ ...
ﺑﺲ ﺍﻟﻌﻴﻮﻥ ﺍﻟﻮﺣﻴﺪﻩ ﺍﻟﻠﻲ ﻛﺎﻥ ﻓﻴﻬﻢ ﺣﺰﻥ ﺍﻟﻌﺎﻟﻢ ﻭﻫﻲ ﺗﺸﻮﻑ ﻓﻲ ﺳﻌﺎﺩﺓ ﻣﺠﺪﻭﻟﻴﻦ ﻛﺎﻧﺖ ... ﻋﻴﻮﻥ ﻣﺮﺍﻡ 💔
ﺍﺻﺎﻟﻪ ..
ﻳﺎﺳﻠﻢ ﺑﻮﻋﻴﻦ ﻛﺒﻴﺮﺓ ... ﺣﻨﺎﻳﺎﺗﻪ ﺗﻘﻮﻝ ﻣﺴﻴﺮﺓ ...
💕💕💕💕💕💕💕💕💕
ﻫﺪﻱ ﺍﻟﻤﺮﺑﻮﻋﻪ .. ﺷﻜﻠﻪ ﻋﻤﻮ ﺩﺍﺧﻞ ... ﻗﺎﻟﺘﻬﺎ ﻭﻫﻲ ﺗﻀﺤﻚ ..
ﺿﺤﻜﺖ ﻣﺠﺪﻭﻟﻴﻦ ﻭﻗﺎﻟﺖ : ﻣﺸﻜﻮﺭﺓ 💕
ﻣﺸﺖ ﺭﺯﺍﻥ ﻭﻫﻲ ﺗﻀﺤﻚ ..
ﻭﻣﺠﺪﻭﻟﻴﻦ ﻓﺘﺤﺖ ﺍﻟﺒﺎﺏ ﺍﻟﻠﻲ ﻛﺎﻥ ﻣﺮﺩﻭﺩ ﻭﺧﺸﺖ ..
ﻟﻘﺎﺗﻪ ﻣﻘﻌﻤﺰ ﻣﺎﺩ ﺭﺟﻞ ﻭﺗﺎﻧﻲ ﺭﺟﻞ ﻟﻔﻮﻕ ﻭﺣﺎﻁ ﻳﺪﻩ ﻋﻠﻴﻬﺎ ﻭﺳﺎﺭﺡ .. ﻛﺎﻥ ﻻﺑﺲ " ﻛﺎﻁ ﻣﻠﻒ " ﻟﻮﻧﻪ ﻋﺴﻠﻲ .. ﻃﺎﻟﻊ ﺧﻴﺎﻝ ..
ﻣﺠﺪﻭﻟﻴﻦ ﺑﺈﺑﺘﺴﺎﻣﻪ ﺣﺐ : ﻫﺎﻧﻲ 💓
ﻗﺎﻡ ﺭﺍﺳﻪ ﻭﺷﺎﻓﻬﺎ ﺍﺑﺘﺴﻢ : ﺻﻜﺮﻱ ﺍﻟﺒﺎﺏ ..
ﻗﻠﺒﻬﺎ ﺩﻕ ﺑﺎﻟﻘﻮﺓ .. ﺍﻟﺘﻔﺘﺖ ﻭﺻﻜﺮﺕ ﺍﻟﺒﺎﺏ ﻭﻛﻠﻬﺎ ﻟﻬﻔﻪ ..
ﺻﺢ ﻣﻘﺮﻳﻪ ﻓﺎﺗﺤﺘﻬﻢ ﺑﺲ ﻣﺎﺻﺎﺭﺵ ﺑﻴﻨﺎﺗﻬﻢ ﺗﻘﺎﺭﺏ ﺍﻻ ﺑﺸﻲ ﺑﺴﻴﻂ ﻛﻠﻤﺲ ﺍﻟﻴﺪ ﺍﻭ ﻗﺒﻠﻪ ﻉ ﺍﻟﺨﺪ .. ﻭﻫﻲ ﺍﻟﻠﻲ ﻛﺎﻧﺖ ﺗﺒﺎﺩﺭ ﺩﻳﻤﺎ ..
ﺑﺲ ﻫﺎﻟﻤﺮﺓ ﻻﺣﻈﺖ ﺍﻥ ﻫﺎﻧﻴﺒﺎﻝ ﻫﻮ ﺍﻟﻠﻲ ﻧﺎﻭﻱ ﺍﻟﻤﺒﺎﺩﺭﺓ 💓
ﺍﻟﺘﻔﺘﺘﻠﻪ ﻭﻫﻲ ﻣﺒﺘﺴﻤﻪ ﺑﺤﺐ ..
ﻫﺎﻧﻴﺒﺎﻝ ﻧﺎﺽ ﻭﻗﻒ : ﺗﺮﺍ ﻭﺭﻳﻨﺎ ﺷﻦ ﻻﺑﺴﻪ؟
ﻫﻲ ﺣﻮﻟﺖ ﻭﺷﺎﺣﻬﺎ ﻭﻋﺒﺎﻳﺘﻬﺎ ﻭﻫﻲ ﺗﺸﻮﻓﻠﻪ ..
ﻋﺠﺒﺎﺗﻪ ﻫﻠﺒﻪ .. ﺑﺲ ﻛﺎﻥ ﻣﺘﺮﺩﺩ ﻓﻲ ﺍﻟﻤﺒﺎﺩﺭﺓ .. ﺯﻱ ﺍﻟﺤﺸﻢ ..
ﺣﺲ ﺍﻥ ﻣﺎﺯﺍﻝ ﺑﻜﺮﻱ ... ﻭﺷﺎﻳﻒ ﺍﻥ ﺣﺎﺟﺎﺕ ﺯﻱ ﻫﺎﺩﻱ ﻣﺎﺗﺼﻴﺮﺵ ﺍﻻ ﺑﻌﺪ ﺣﻔﻠﺔ ﺍﻟﺪﺧﻮﻝ ..
ﻗﺮﺑﺖ ﻣﺠﺪﻭﻟﻴﻦ ﻭﻭﻗﻔﺖ ﻗﺪﺍﻣﻪ : ﺷﻦ ﺭﺍﻳﻚ ..
ﻫﺎﻧﻴﺒﺎﻝ ﻭﻫﻮ ﻣﺒﺘﺴﻢ : ﺣﻠﻮ ..
ﻣﺠﺪﻭﻟﻴﻦ ﺗﻨﻬﺪﺕ ﻭﻗﺎﻟﺖ : ﺣﺘﻰ ﺍﻧﺖ ﺗﺠﻨﻦ 💓
ﻫﺎﻧﻴﺒﺎﻝ ﺿﺤﻚ : ﻣﺸﻜﻮﺭﺓ 💕
ﻗﻌﺪﺕ ﺗﺸﻮﻑ ﻟﻌﻴﻮﻧﻪ ﻫﻠﺒﻪ ﺑﻨﻈﺮﺍﺕ ﻫﺎﻳﻤﻪ ..
ﻭﻫﻮ ﻳﺸﻮﻑ ﻟﻌﻴﻮﻧﻬﺎ ﻭﺩﻳﻤﺎ ﻳﺤﺲ ﺑﻮﺟﻊ ﻗﻠﺐ ﻣﻦ ﺍﻟﺤﺐ ﺍﻟﻠﻲ ﻳﺸﻮﻓﻪ ﻓﻴﻬﻢ ..
ﺟﺮﺍﺓ ﻣﺠﺪﻭﻟﻴﻦ ... ﺣﺒﻬﺎ ﺍﻟﺸﺪﻳﺪ .. ﺷﻐﻔﻬﺎ ﺑﻴﻪ .. ﻭﺷﻮﻗﻬﺎ ﻟﻴﻪ ..
ﺧﻼﻫﺎ ﺗﻘﺮﺏ ﻭﺗﺤﻂ ﻳﺪﻫﺎ ﻭﺭﺍ ﺭﻗﺒﺘﻪ ﻭﺗﻘﺮﺑﻪ ﻟﻴﻬﺎ ﻭﺗﺒﻮﺳﻪ 💓
ﻫﻮ ﺍﻧﺼﺪﻡ ... ﻣﺎﻛﺎﻧﺶ ﻳﺒﻲ .. ﺑﺲ ﻣﺎﻗﺪﺭﺵ ﻳﺒﻌﺪﻫﺎ ﻭﻳﻜﺴﺮ ﺑﺨﺎﻃﺮﻫﺎ ...
ﻛﺎﻧﺖ ﻫﺎﻳﻤﻪ ﺑﻤﺸﺎﻋﺮﻫﺎ ﻫﻠﺒﻪ ...
ﻭﻫﻮ ﻛﺮﺍﺟﻞ ﺗﺤﺮﻛﺖ ﻓﻴﻪ ﻣﺸﺎﻋﺮ ...
ﺣﺎﻭﻃﻬﺎ ﻭﺯﺍﺩ ﻗﺮﺑﻬﺎ ﻭﺍﻧﺴﺠﻢ ﻣﻌﺎﻫﺎ ....
ﺑﺲ ﺣﺎﺟﺎﺕ ﺯﻱ ﻫﺎﺩﻱ ﺑﻴﻦ ﺍﻟﻤﺘﺰﻭﺟﻴﻦ ﻟﻮ ﻣﺎﺗﻜﻮﻧﺶ ﺑﻤﺸﺎﻋﺮ ﻗﻠﺒﻴﻪ ﻣﺘﺒﺎﺩﻟﻪ .. ﺣﺘﻜﻮﻥ ﺍﺷﺒﻪ ﺑﻠﺤﻈﻪ ﻋﺎﺑﺮﻩ ... ﻣﺎﺗﻘﻌﺪﺵ ﻓﻲ ﺫﺍﻛﺮﺓ ﺍﻟﻘﻠﺐ ..
ﻣﻤﻜﻦ ﺑﺎﻟﻨﺴﺒﻪ ﻟﻤﺠﺪﻭﻟﻴﻦ ﺣﺘﻜﻮﻥ ﻓﻲ ﺫﺍﻛﺮﺓ ﻗﻠﺒﻬﺎ ﻭﻋﻘﻠﻬﺎ ﺑﺲ ﻫﻮ ﻻ ...
ﺻﻮﺕ ﺍﻟﺰﻏﺎﺭﻳﻂ .. ﻭﻗﻈﺎﺗﻪ ... ﻗﻌﺪ ﻳﺒﻌﺪ ﻓﻴﻬﺎ ﺑﺎﻟﺸﻮﻳﻪ ﻭﻫﻮ ﻳﺸﻮﻑ ﻟﻌﻴﻮﻧﻬﺎ ﺍﻟﺪﺑﻼﻧﻪ ﻭﻣﻠﻴﺎﻧﻪ ﺩﻣﻮﻉ ..
ﻣﻦ ﻗﻮﺓ ﺷﻌﻮﺭﻫﺎ ﺑﻴﻪ ....
ﻫﻮ ﻛﻞ ﻣﺎﻟﻪ ﻳﺰﻳﺪ ﻗﻠﺒﻪ ﻳﻮﺟﻌﻪ .. ﻣﻤﻜﻦ ﺍﻟﻠﺤﻈﻪ ﻫﺎﺩﻱ ﻟﻮ ﻛﺎﻧﺖ ﻣﻊ ﻏﻴﺮﻫﺎ ﺍﻟﻠﻲ ﺍﻟﻘﻠﺐ ﺗﻤﻨﺎﻫﺎ .. ﻛﺎﻥ ﺍﻟﻮﺿﻊ ﻣﺨﺘﻠﻒ ﺗﻤﺎﻣﺎ ...
ﻣﺠﺪﻭﻟﻴﻦ ﺑﻬﻴﺎﻡ : ﻧﺤﺒﻚ 💓
> " ﺑﺴﺴﺲ .. ﺷﺠﺮﺓ ﺍﻟﺪﺭ .."
ﻗﻠﺒﻬﺎ ﻓﺮ 💓 ﻭﺍﻟﺘﻔﺘﺖ ..
ﻟﻘﺎﺗﻪ ﻣﺒﺘﺴﻢ ﺍﺑﺘﺴﺎﻣﻪ ﺣﻠﻮﺓ : ﻣﺶ ﺯﻋﻼﻥ .... ﻭﻏﻤﺰﻟﻬﺎ ...
ﻋﺮﻭﺑﻪ ﺍﺑﺘﺴﻤﺖ ﻭﻗﻠﺒﻬﺎ ﻣﺠﻨﻮﻥ ﺑﺪﻗﺎﺗﻪ ﻗﺎﻟﺖ ﺑﻨﺒﺮﺓ ﻣﻠﻬﻮﻓﻪ : ﻧﺤﺒﻚ ..💓 <<
ﺣﻀﻦ ﻣﺠﺪﻭﻟﻴﻦ ﺑﻘﻮﺓ ﻭﺍﻧﻔﺎﺳﻪ ﺍﻟﻘﻮﻳﻪ ﻣﺨﻠﻴﻪ ﺻﺪﺭﻩ ﻳﻌﻼ ﻭﻳﻬﺒﻂ
> ﺣﻀﺮﺗﻚ ﻣﻦ ﻃﺮﻑ ﺍﻟﻤﺪﺍﻡ ﻣﺠﺪﻭﻟﻴﻦ ﺍﻟﻌﺮﺑﻲ .. <<
ﺯﺍﺩ ﺣﻀﻨﻬﺎ ﻭﺣﺎﺱ ﺑﺎﻟﻮﺟﻊ ﻣﺘﺎﻋﻪ ﻳﺰﻳﺪ ﻭﺻﺪﺭﻩ ﺍﻃﺒﻖ ..
ﻛﺎﻥ ﻣﻀﻴﻖ ﻋﻴﻮﻧﻪ ﺍﻟﻤﻠﻴﺎﻧﺎﺕ ﺩﻣﻮﻉ ﻭﻗﺎﺭﻥ ﺣﻮﺍﺟﺒﻪ ﻭﺍﻧﻔﺎﺳﻪ ﺯﺍﺩﺕ ﺗﻘﻮﺕ ...
ﻭﻣﺠﺪﻭﻟﻴﻦ ﻫﺎﻳﻤﻪ ﻭﻣﻐﻤﻀﻪ ﻋﻴﻮﻧﻬﺎ ﻭﻓﺮﺣﺎﻧﻪ ﻟﻴﻦ ﺧﻼﺹ 💓
🍁🍁🍁🍁🍁🍁🍁
ﺭﺍﻭﻳﻪ ..
ﺍﻟﻠﻴﻠﻪ ﻟﻴﻠﺔ ﺣﻨﺎﻳﺎﺕ .. ﻭﻏﺪﻭﺓ ﻋﻨﺪ ﺍﻟﻐﺎﻟﻲ ﺗﺒﺎﺕ ..
ﺿﺤﻜﻮﺍ .. ﻭﻫﻲ ﺿﺤﻜﺖ ﺑﺨﺠﻞ ..
ﻭﻗﻌﺪﻭﺍ ﻳﻐﻨﻮﺍ ﻓﻴﻬﺎ ﻭﻳﻌﺎﻭﺩﻭﺍ ...
ﺯﻳﻨﺐ ..
ﻳﺎﻣﺒﺮﻭﻙ ﻋﻠﻴﻚ ﺍﻟﺤﻨﻪ .. ﺩﺭﺗﻲ ﺣﻮﺵ ﺗﺠﻴﻨﺎ ﻣﻨﻪ ..
ﺷﻮﻳﻪ ﻭﺧﺸﺖ ﻣﺠﺪﻭﻟﻴﻦ ﻟﻠﺨﻴﻤﻪ ﻭﻉ ﻭﺟﻬﻬﺎ ﻣﺮﺳﻮﻣﻪ ﺍﺑﺘﺴﺎﻣﻪ ﺣﻠﻮﺓ ﺑﺎﻟﻤﺮﺓ 💕
ﻣﺮﺍﻡ ﻛﺎﻧﺖ ﺗﺼﻔﻖ ﻭﻣﺎﺗﺒﻴﺶ ﺗﻜﻤﻞ ﻣﻌﺎﻫﺎ ﺑﻌﻴﻮﻧﻬﺎ ﺧﻮﻑ ﻣﻦ ﺍﻟﺪﻣﻮﻉ ﻳﺨﻮﻧﻮﺍ 🍃..
ﻛﻔﺎﻳﻪ ﺍﻟﻠﻲ ﻛﺎﻧﺖ ﺗﺸﻮﻑ ﻟﻤﺠﺪﻭﻟﻴﻦ ﻭﺣﺎﻟﺘﻬﺎ ﻏﻨﺖ ..
ﻋﺪﻱ ﻣﺮﺑﻮﺣﻪ ﻳﺎﺣﻨﻪ .. ﻓﻲ ﻣﻜﺎﻧﻚ ﺑﻨﺠﻴﺒﻮﺍ ﻛﻨﻪ ..
ﺿﺤﻜﺖ ﻣﺠﺪﻭﻟﻴﻦ ..
ﻭﺧﻮﺍﺗﻪ ﺷﺒﺤﻮﻟﻬﺎ ﻭﺿﺤﻜﻮﺍ ﻭﻋﺎﻭﺩﻭﺍ ﻏﻨﻮﻫﺎ ﺍﻛﺜﺮ ﻣﻦ ﻣﺮﺓ ..
ﻭﻓﻲ ﻛﻞ ﻣﺮﺓ ﻛﺎﻥ ﻗﻠﺐ ﻣﺮﺍﻡ ﻳﺘﻤﺰﻕ ﺗﻤﺰﻳﻖ ..
ﻛﺎﻧﺖ ﺗﺸﺪ ﻓﺮﻭﺣﻬﺎ ﺑﻘﻮﺓ ..
ﻭﺣﺪﻩ ﻣﻦ ﺧﻮﺍﺗﻬﺎ ﺣﻄﺖ ﻳﺪﻫﺎ ﻭﺭﺍ ﻇﻬﺮﻫﺎ ﻭﺗﻤﺴﺢ ﻋﻠﻴﻪ ..
ﻫﻲ ﺷﺒﺤﺘﻠﻬﺎ ﻭﺍﺑﺘﺴﻤﺖ ﺑﺄﻟﻢ .. ﻭﺭﻓﻌﺖ ﺍﻳﺪﻳﻬﺎ ﻭﺯﺍﺩﺕ ﺻﻔﻘﺖ ﻭﻫﻲ ﺗﻐﻨﻲ ..
ﺍﻟﻠﻪ ﻳﻌﻄﻴﻚ ﻫﻨﺎ ﻭﺩﻻﻝ .. ﻉ ﺑﺪ ﻋﻴﻮﻥ ﺍﻟﻐﺮﺑﺎﻝ ..
ﺷﺒﺤﻮﻟﻬﺎ ﺧﻮﺍﺕ ﻫﺎﻧﻴﺒﺎﻝ ﻭﺍﺑﺘﺴﻤﻮﺍ ﻭﻗﻌﺪﻭﺍ ﻳﻐﻨﻮﺍ ﻣﻌﺎﻫﺎ ..
ﻛﻤﻠﻮﺍ ﺣﻨﺔ ﺭﺟﻠﻴﻬﺎ ﻭﻏﻄﻮﻫﺎ ..
ﻭﺑﺪﻭﺍ ﺑﺈﻳﺪﻳﻬﺎ ﻟﻄﻴﻔﻪ ﻭﺭﺍﻭﻳﻪ ...
ﺟﻮﺍ ﺣﺪﺍﻫﻢ ﺍﻟﻌﺰﺍﻳﺰ ﻭﺑﺪﻭﺍ ﻳﻐﻨﻮﺍ ﺑﻮﻃﻮﻳﻞ ...
ﻓﺤﻮﻯ ﺍﻏﺎﻧﻴﻬﻢ ﻋﻦ ﻭﺩﺍﻉ ﺍﻟﺒﻨﺖ ﻭﻃﻠﻌﺘﻬﺎ ﻣﻦ ﺣﻮﺵ ﺍﻫﻠﻬﺎ ..
ﻏﻄﻮﺍ ﻭﺟﻪ ﺣﻤﻴﺪﻩ ﺑﺤﺎﺟﻪ ﺷﺒﻴﻬﻪ ﺑﺎﻟﻤﺎﺭﻳﻘﻪ .. ﻟﻮﻧﻬﺎ ﻓﻀﻲ ﻟﻤﺎﻉ ..
ﻫﻤﺎ ﻳﻐﻨﻮﺍ ﻭﺣﻤﻴﺪﻩ ﺗﺒﻜﻲ ...
ﻏﺎﻟﻴﻪ ﻣﺎﺗﺤﻤﻠﺘﺶ ﻧﺎﺿﺖ ﻃﻮﻝ ﺧﺸﺖ ﻟﻠﺤﻮﺵ ..
ﻭﺑﺪﻭﺍ ﺧﻮﺍﺗﻬﺎ ﻳﺬﺭﻓﻮﺍ ﻓﻲ ﺍﻟﺪﻣﻮﻉ ﻭﺑﻨﺎﺕ ﺧﻮﺍﺗﻬﺎ ..
ﻭﻓﻲ ﻧﺎﺱ ﻣﻦ ﺍﻟﺤﻀﻮﺭ ﺗﺄﺛﺮﻭﺍ ..
ﺑﺲ ﺍﻟﻠﻲ ﺣﺼﻠﺘﻬﺎ ﺳﺒﻠﻪ ﻭﻗﺘﻬﺎ ﻣﺮﺍﻡ ﺍﻟﻠﻲ ﻃﻮﻝ ﻗﻌﺪﺕ ﺗﺒﻜﻲ ..
🍁 ﺭﺑﺎﺏ
ﺍﻟﻮﺣﻴﺪﻩ ﺍﻟﻠﻲ ﻛﺎﻧﺖ ﺗﺮﺍﻗﺐ ﻓﻲ ﺧﺎﻟﺘﻬﺎ ﻏﺎﻟﻴﻪ ﻃﻮﻝ ﺍﻟﻌﺮﺱ ﻭﺣﺎﺳﻪ ﺑﻴﻬﺎ ﻫﻠﺒﻪ .. ﻧﺎﺿﺖ ﻭﺍﻧﺴﺤﺒﺖ ﻃﻮﻝ ﺧﺸﺖ ﺩﺍﺧﻞ ..
ﺩﺍﺧﻞ ..
ﻓﻲ ﺍﻟﺪﺍﺭ ..
ﻛﺎﻧﺖ ﻏﺎﻟﻴﻪ ﻣﻘﻌﻤﺰﺓ ﺗﺒﻜﻲ ... ﻭﻫﻲ ﺗﺸﻮﻑ ﻟﺼﻐﺎﺭ ﺧﻮﺍﺗﻬﺎ ﺭﺍﻗﺪﻳﻦ .. ﻣﺠﺪ ﻭﻧﻮﺭﻫﺎﻥ ..
ﺷﻮﻳﻪ ﻭﻓﺎﻕ ﻣﺠﺪ ... ﻣﺴﺤﺖ ﺩﻣﻮﻋﻬﺎ ﻃﻮﻝ ﻭﺟﺎﺗﻪ ﺧﺪﺍﺗﻪ ﻓﻲ ﺣﻀﻨﻬﺎ ﻭﻗﻌﺪﺕ ﺗﻬﺰ ﺑﻴﻪ ... ﻫﻮ ﻃﻮﻝ ﻭﻻ ﺭﻗﺪ ..
ﻗﻌﺪﺕ ﺗﺘﺄﻣﻞ ﻓﻲ ﻣﻼﻣﺤﻪ ﺍﻟﺤﻠﻮﺓ ﺍﻟﺒﺮﻳﺌﺔ ﻭﺩﻣﻮﻋﻬﺎ ﻳﻨﺰﻟﻮﺍ ..
ﻉ ﺧﺸﺔ ﺭﺑﺎﺏ ..
ﻫﻲ ﻃﻮﻝ ﺣﻄﺖ ﻭﻟﺪ ﺍﺧﺘﻬﺎ .. ﻭﻛﺎﻧﺖ ﺗﺤﺎﻭﻝ ﺗﻬﺮﺏ ﺑﺪﻣﻮﻋﻬﺎ ﻣﻦ ﺑﻨﺖ ﺍﺧﺘﻬﺎ ...
ﺭﺑﺎﺏ ﺟﺘﻬﺎ ﻭﻗﻌﻤﺰﺕ ... ﺣﻀﻨﺘﻬﺎ ﻣﻦ ﺍﻟﺨﻠﻒ ﻭﺣﻄﺖ ﺭﺍﺳﻬﺎ ﻉ ﻇﻬﺮ ﺧﺎﻟﺘﻬﺎ ..
ﻗﻌﺪﺕ ﻏﺎﻟﻴﻪ ﺗﺒﻜﻲ ... ﻭﺭﺑﺎﺏ ﺗﺬﺭﻑ ﻓﻲ ﺍﻟﺪﻣﻮﻉ ﺑﺼﻤﺖ 🍃
🍁🍁🍁🍁🍁🍁🍁🍁
ﺭﻳﻼ : ﺧﻼﺍﺍﺹ ﺳﺎﺩ .. ﻳﺎﺳﺮ ﻣﻦ ﺍﻟﺪﻣﻮﻉ ... ﺍﻓﺘﺤﻮﻟﻲ ﺍﻟﻤﻨﻈﻮﻣﻪ ﻧﺒﻲ ﻧﺮﻗﺺ ﻣﺎﺭﻗﺼﺘﺶ ﺑﻜﻞ ..
ﺿﺤﻜﺖ ﺭﺯﺍﻥ ﻭﻣﺴﺤﺖ ﺩﻣﻮﻋﻬﺎ ﻭﻧﺎﺿﺖ ﻭﻣﺸﺖ ﻃﻮﻝ ﻓﺘﺤﺖ ﺍﻟﻤﻨﻈﻮﻣﻪ ﻉ ﺍﻏﻨﻴﻪ ﻟﻔﻮﺯﻱ ﺍﻟﻤﺰﺩﻭﺍﻱ ..
ﻭﺑﺪﺕ ﺭﻳﻼ ﺗﺮﻗﺺ .. ﻫﻴﺎ ﻣﺎﺗﻌﺮﻓﺶ ﺗﺮﻗﺺ ..
ﺭﻗﻴﺼﻬﺎ ﻫﻴﺎﺟﻪ ﺑﺲ ..
ﻭﺍﻟﻜﻞ ﻳﻀﺤﻜﻮﺍ ﻋﻠﻴﻬﺎ ﻭﻉ ﺣﺮﻛﺎﺗﻬﺎ ..
ﺣﻮﻟﺖ ﻛﻔﺎﻳﻪ ﺍﻟﻐﻄﺎﺀ ﻋﻠﻲ ﺣﻤﻴﺪﻩ .. ﻭﻗﻌﺪﺕ ﺣﻤﻴﺪﻩ ﺗﺘﻔﺮﺝ ﻭﺗﻀﺤﻚ ﻣﻦ ﺑﻴﻦ ﺩﻣﻮﻋﻬﺎ ..
ﺭﻳﻼ : ﻳﺎﺣﺘﻰ ﻛﺎﻥ ﺳﻤﻴﻨﻪ ﺷﻮﻳﻪ .. ﻛﻴﻒ ﺍﻟﺤﻮﺗﻪ ﻓﻲ ﺍﻟﺼﻮﻧﻴﻪ ..
ﺿﺤﻜﻮﺍ ..
ﻧﺎﺿﺖ ﻓﻀﻴﻠﻪ ﻭﺻﻜﺮﺕ ﺍﻟﻤﻨﻈﻮﻣﻪ ..
ﺭﻳﻼ : ﺧﻴﺮ ﺩﻋﺎﻭﻳﻚ ..
ﻓﻀﻴﻠﻪ ﺑﻀﺤﻜﻪ : ﺩﺭﺑﻮﻛﻪ ﺩﺭﺑﻮﻛﻪ ..
ﺭﻳﻼ ﺑﻀﺤﻜﻪ : ﺑﺎﻫﻲ ﺍﻧﺸﻄﻦ ..
ﻭﺑﺪﻭﺍ ﺷﻮﻁ ﺩﺭﺑﻮﻛﻪ ﻭﺭﻳﻼ ﺗﺮﻗﺺ ﻭﺗﻬﻴﺞ
🌸🌸🌸🌸
ﻛﻤﻠﻮﺍ ﺣﻨﺔ ﺣﻤﻴﺪﻩ ..
ﻭﻣﺎﺯﺍﻝ ﺍﻷﻏﺎﻧﻲ ﻭﺍﻟﻬﻴﺎﺟﻪ ﻣﺴﺘﻤﺮﺍﺕ ..
ﻟﻌﻨﺪ ﺍﻟﺴﺎﻋﻪ ﻭﺍﺣﺪ ..
ﺍﻟﻨﺎﺱ ﺑﺪﺕ ﺗﺮﻭﺡ ...
ﻭﺍﻟﺒﻨﺎﺕ ﺧﺸﻮﺍ ﻳﻐﻴﺮﻭﺍ ..
ﺭﺯﺍﻥ ﺩﺍﺧﻞ ﻣﻊ ﺭﻓﻘﻪ ..
ﺭﻓﻘﻪ : ﻧﺒﺪﻝ ﻭﻧﺠﻴﻚ ..
ﺭﺯﺍﻥ : ﻻ ﺣﺘﻰ ﺍﻧﻲ ﺑﻨﻌﺪﻱ ﻧﺒﺪﻝ ..
ﺭﻓﻘﻪ : ﺑﺎﻫﻲ ﻧﺮﺍﺟﻲ ﻓﻴﻚ ..
ﺳﻤﻌﻮﺍ ﺍﻟﺰﻭﺯ ﺻﻮﺕ ﺑﻨﺖ ﻛﻔﺎﻳﻪ ﺗﻌﻴﻂ ..
ﺭﺯﺍﻥ : ﺗﻮ ﻧﻘﻮﻟﻠﻬﺎ ... ﻣﺸﺖ ﻃﻠﻌﺖ ﻃﻮﻝ ﻟﻌﻤﺘﻬﺎ .. ﺷﺎﻓﺘﻬﺎ ﻭﻗﺎﻟﺖ .. ﻋﻤﻴﻤﻪ ﺑﻨﺘﻚ ﺗﻌﻴﻂ ..
ﻛﻔﺎﻳﻪ : ﻫﻲ ﻧﺎﻳﻀﻪ .. ﻧﺎﺿﺖ ﻭﺧﺸﺖ ..
ﻭﺭﺯﺍﻥ ﻃﻮﻝ ﺭﻭﺣﺖ ﻟﻠﺤﻮﺵ ..
ﺯﻳﻨﺐ ﻣﻄﺖ ﺷﻮﺍﺭﺑﻬﺎ ﺑﻤﻠﻞ ﺑﻌﺪﻳﻦ ﻗﺎﻟﺖ : ﻧﺨﺶ ﺗﻐﻴﺮ ﻭﻧﺠﻲ ﻧﺮﻗﺪ ﺣﺪﺍﻙ ..
ﺣﻤﻴﺪﻩ ﻫﺰﺕ ﺭﺍﺳﻬﺎ ﺑﺈﻳﺠﺎﺏ ﻭﻫﻲ ﻣﺒﺘﺴﻤﻪ ..
ﺩﺍﺧﻞ ﻛﺎﻧﻮﺍ ﻧﻌﻴﻤﻪ ﻭﺩﻻﻝ ﻣﻊ ﻣﺠﺪﻭﻟﻴﻦ ﻭﺍﻣﻬﺎ ﺑﻴﺒﺎﺗﻮ ﻣﻌﺎﻫﻢ ﻓﻲ ﻧﻔﺲ ﺍﻟﺪﺍﺭ ..
ﺧﺸﺖ ﺯﻳﻨﺐ ﻟﻘﺖ ﻛﻔﺎﻳﻪ ﺗﺮﺿﻊ ﻓﻲ ﺑﻨﺘﻬﺎ ..
ﺯﻳﻨﺐ ﺭﻓﻌﺖ ﺣﻮﺍﺟﺒﻬﺎ ﻭﻗﺎﻟﺖ : ﻫﻠﻜﺖ ..
ﻛﻔﺎﻳﻪ : ﺣﺘﻰ ﺑﻨﺮﻗﺪ ﺧﻼﺹ ..
ﻣﺸﺖ ﺻﻜﺮﺕ ﺍﻟﺒﺎﺏ ﺯﻳﻨﺐ ﻭﺑﺪﺕ ﺗﻐﻴﺮ ...
ﺷﻮﻳﻪ ﻭﻃﻠﻌﺖ ..
ﻟﻘﺖ ﺑﻨﺎﺗﻬﺎ ﻃﺎﻟﻌﺎﺕ ﻣﻦ ﺍﻟﺪﺍﺭ ﺍﻟﻠﻲ ﻣﻘﺎﺑﻠﺘﻬﺎ ﻭﻫﻤﺎ ﻣﻐﻴﺮﺍﺕ
" ﺍﻟﺤﻮﺵ ﻓﻴﻪ 4 ﺩﻳﺎﺭ "
ﺯﻳﻨﺐ : ﺑﻨﺒﺎﺗﻮﺍ ﻓﻲ ﺍﻟﺨﻴﻤﻪ ..
ﺭﺑﺎﺏ ﻭﺭﺍﻧﻴﺎ ﻫﺰﻭﺍ ﺭﻭﺳﻬﻢ ﺑﺈﻳﺠﺎﺏ ﻭﻃﻠﻌﻮﺍ ﻭﺭﺍﻫﺎ ..
ﻭﻫﻤﺎ ﻣﺎﺷﻴﺎﺕ ﺗﻘﺎﺑﻠﻮﺍ ﻫﻤﺎ ﻭﺭﺯﺍﻥ ﺷﻘﻠﺒﺖ ﻋﻴﻮﻧﻬﺎ ﻭﻓﺎﺗﺖ ﻣﻦ ﺣﺪﺍﻫﻢ .. ﺧﺸﺖ ﻭﻭﻗﻔﺖ ﺣﺪﺍﻟﺒﺎﺏ ..
ﺯﻳﻨﺐ : ﻗﻠﻴﻠﺔ ﺭﺑﺎﻳﻪ ..
ﺭﺑﺎﺏ : ﺑﻨﺖ ﺳﻌﻴﺪﻩ ..
ﺯﻳﻨﺐ ﺑﻀﺤﻜﻪ : ﻉ ﺍﺳﺎﺱ ﺍﻣﻬﺎ ﻣﺮﺑﻴﻪ ..
ﺿﺤﻜﺖ ﺭﺑﺎﺏ ..
ﻭﺭﺍﻧﻴﺎ ﻛﺎﻧﺖ ﻣﻀﺎﻳﻘﻪ ﻫﻠﺒﻪ ﻣﻦ ﻛﻼﻣﻬﻢ .. ﻣﻬﻤﺎ ﻛﺎﻥ ﺍﻡ ﺣﺒﻴﺒﻬﺎ ﻭﺍﻱ ﺷﻲ ﻳﺨﺼﻪ ﻣﺶ ﺣﺘﺮﺿﻰ ﻓﻴﻪ 💓
ﺧﺸﻮﺍ ﻟﻠﺨﻴﻤﻪ ..
ﻭﺭﺯﺍﻥ ﻗﺎﻟﺖ : ﻛﻠﺒﺎﺕ ..
ﻭﻣﺸﺖ ﻃﻮﻝ ﺧﺸﺖ ﺩﺍﺧﻞ ..
ﺷﺎﻓﺖ ﺭﻓﻘﻪ ﺣﺪﺍ ﻋﻤﺘﻬﺎ ﻛﻔﺎﻳﻪ ﻳﻬﺪﺭﺯﻭﺍ ..
ﺧﺸﺖ ﺭﺯﺍﻥ .. ﻭﻗﻌﻤﺰﺕ ﺣﺪﺍﻫﻢ ..
ﺭﻓﻘﻪ : ﻣﻼﻣﺤﻬﺎ ﺯﻱ ﻋﻤﺎﺩ ..
ﻛﻔﺎﻳﻪ : ﺍﻳﻪ ﺻﺢ ﻛﻞ ﻣﺎﺗﻜﺒﺮ ﺗﺠﻴﺒﻠﻪ ﺍﻛﺜﺮ ..
ﺭﺯﺍﻥ : ﺍﻧﻲ ﻋﻨﺪﻱ ﺗﺠﻴﺒﻠﻚ ﺍﻧﺘﻲ ﺃﻛﺜﺮ ..
ﻛﻔﺎﻳﻪ ﺑﻀﺤﻜﻪ : ﺍﻟﻤﻬﻢ ﻣﺎﺗﺸﺒﻬﺶ ﻟﻌﻤﺎﺩ ..
ﺭﺯﺍﻥ ﺿﺤﻜﺖ ﺑﺈﺣﺮﺍﺝ : ﻣﺶ ﻗﺼﺪﻱ .
ﺭﻓﻘﻪ : ﻫﻬﻬﻬﻬﻬﻪ ﻻﻻﻗﺼﺪﻙ ..
ﺭﺯﺍﻥ : ﺯﻳﺪﻱ ﺍﻧﺘﻲ ﻳﺎﺳﻮﺳﻪ ..
ﺿﺤﻜﻮﺍ ﻛﻔﺎﻳﻪ ﻭﺭﻓﻘﻪ ..
ﻛﻔﺎﻳﻪ ﻣﺮﺭﺕ ﻧﻈﺮﻫﺎ ﻋﻠﻴﻬﻢ .. ﺍﺑﺘﺴﻤﺖ ﻭﻗﺎﻟﺖ : ﺗﺮﺍ ﺭﻭﻓﻲ ﻣﺪﻳﻠﻲ ﺷﻨﻄﺘﻲ ﻣﻦ ﺍﻟﺪﻭﻻﺏ ..
ﻣﺸﺖ ﺭﻓﻘﻪ ﻟﻠﺪﻭﻻﺏ ﻃﻠﻌﺖ ﺷﻨﻄﺔ ﻋﻤﺘﻬﺎ .. ﻭﻭﻟﺘﻠﻬﺎ ..
ﺧﺪﺕ ﻣﻨﻬﺎ ﻛﻔﺎﻳﻪ ﺍﻟﺸﻨﻄﻪ ﻭﻃﻠﻌﺖ ﻣﻨﻬﺎ ﻋﺸﺮﺗﻴﻦ ﻭﻣﺪﺗﻬﺎ ﻟﻠﺒﻨﺎﺕ ..
ﺭﻓﻘﻪ : ﻋﻼﺵ ﻋﻤﺘﻲ .
ﺭﺯﺍﻥ ﺭﺩﺕ ﻳﺪﻫﺎ ..
ﻛﻔﺎﻳﻪ : ﻳﺎﺣﻤﺎﺭﺍﺕ ﻫﺎﺩﻭﺍ ﻫﺪﻳﻪ ﻟﻮ ﻋﻨﺪﻱ ﺣﺎﺟﻪ ﺗﻨﺎﺳﺒﻜﻢ ﺭﺍﻧﻲ ﻋﻄﻴﺘﻜﻢ .. ﻣﺎﻓﻴﺶ ﺗﻮﺍ ﻏﻴﺮ ﺍﻟﻔﻠﻮﺱ .. ﻫﻴﺎ ﺧﻮﺩﻭﺍ ﺍﻳﺪﻳﺎ ﻃﺎﺣﻮﺍ ..
ﺷﺒﺤﻮﺍ ﻟﺒﻌﺾ ﺑﺨﺠﻞ ﻭﺧﺪﻭﺍ ﺍﻟﻔﻠﻮﺱ ..
ﺿﺤﻜﺖ ﻛﻔﺎﻳﻪ .
ﻉ ﺧﺸﺔ ﺯﻳﻨﺐ : ﺑﺘﺮﻗﺪﻱ ﻫﻨﻲ ﻛﻴﻔﻮ ..
ﻛﻔﺎﻳﻪ : ﺍﻳﻪ ﻳﺎﺣﻨﻪ ﻉ ﺧﺎﻃﺮ ﺍﻟﺨﺎﻧﻮﻡ ..
ﺿﺤﻜﺖ ﺯﻳﻨﺐ ﻣﺸﺖ ﻟﻠﺪﻭﻻﺏ ﺑﺘﺎﺧﺪ ﻣﺨﺪﻩ ..
ﻛﻔﺎﻳﻪ ﻣﺪﺕ ﺷﻄﻨﺘﻬﺎ : ﻭﺍﻗﻔﻪ ﻭﺍﻗﻔﻪ ﺯﻧﻮﺑﻴﺎ ﺣﻄﻴﻬﺎ ﻓﻲ ﺍﻟﺪﻭﻻﺏ ..
ﺿﺤﻜﺖ ﺯﻳﻨﺐ ﻭﺟﺘﻬﺎ ﺧﺪﺕ ﺍﻟﺸﻨﻄﻪ ﺍﻟﻠﻲ ﻛﺎﻧﺖ ﻣﺶ ﻣﺼﻜﺮﺓ ﻛﻮﻳﺲ ..
ﺍﺷﺒﺢ ﻛﻴﻒ ﺷﺪﺗﻬﺎ ﺯﻳﻨﺐ ﻃﺎﺣﺖ ﻣﻨﻬﺎ ﺭﺑﻄﺔ ﻓﻠﻮﺱ ..
ﺷﺒﺤﺘﻬﺎ ﺭﺯﺍﻥ ..
ﻛﻔﺎﻳﻪ : ﺑﺘﺮﻗﺪﻱ ﺭﺳﻤﻲ ..
ﺯﻳﻨﺐ ﻭﻫﻲ ﻣﻄﺒﺴﻪ ﺗﺤﻂ ﻓﻲ ﺍﻟﻔﻠﻮﺱ ﻓﻲ ﺍﻟﺸﻨﻄﻪ : ﺧﻼﺍﺹ ..
ﻭﻗﻔﺖ ﻉ ﺣﻴﻠﻬﺎ ﻭﻣﺸﺖ ﺑﻴﻬﺎ ﻟﻠﺪﻭﻻﺏ .. ﺣﻄﺘﻬﺎ ﻭﺻﻜﺮﺍﺗﻪ ﺑﺎﻟﻤﻔﺘﺎﺡ ﻭﻃﻠﻌﺖ ﺑﻴﻪ ﻫﻮ ﻭﺍﻟﻤﺨﺪﻩ ..
ﻭﻋﻴﻮﻥ ﺭﺯﺍﻥ ﻣﻌﺎﻫﺎ ..
ﺭﻓﻘﻪ : ﻧﺨﻠﻮﻙ ﺗﺒﺪﻟﻲ ﻋﻤﻴﻤﻪ ..
ﺍﺑﺘﺴﻤﺖ ﻛﻔﺎﻳﻪ ..
ﻭﻧﺎﺿﺖ ﺭﺯﺍﻥ ... ﻭﺍﻟﺰﻭﺯ ﻃﻠﻌﻮﺍ ﻭﺻﻜﺮﻭﺍ ﻭﺭﺍﻫﻢ ﺍﻟﺪﺍﺭ ..
ﻭﺗﻮﺟﻬﻮﺍ ﻃﻮﻝ ﻓﻢ ﺍﻟﺒﻮﺍﺑﻪ ..
ﻉ ﺧﺸﺔ ﻟﻄﻴﻔﻪ ﺷﺒﺤﺖ ﻟﺒﻨﺘﻬﺎ : ﺧﻮﺗﻚ ﻭﻳﻦ ..
ﺭﻓﻘﻪ؛ﺑﻴﺮﻗﺪﻭﺍ ﺣﺪﺍ ﺑﺎﺑﺎ ..
ﻟﻄﻴﻔﻪ : ﺍﺣﺴﻦ ﺧﻞ ﻧﻄﻠﻊ ﻧﺒﺎﺕ ﻓﻲ ﺍﻟﺨﻴﻤﻪ .. ﻭﺍﻧﺘﻲ ﺭﺑﻊ ﺳﺎﻋﻪ ﻭﺗﻌﺎﻟﻲ ﺍﺭﻗﺪﻱ ...
ﺭﻓﻘﻪ : ﺣﺎﺿﺮ ..
ﺧﺸﺖ ﻟﻄﻴﻔﻪ ..
ﻭﻗﻌﻤﺰﻭﺍ ﺭﻓﻘﻪ ﻭﺭﺯﺍﻥ ﻓﻢ ﺍﻟﺒﻮﺍﺑﻪ ﻭﺑﺪﻭﺍ ﻳﻬﺪﺭﺯﻭﺍ ..
🍁 ﻣﻊ ﺍﻟﺴﺎﻋﻪ 2:00
ﻛﺎﻧﻮﺍ ﺍﻟﻜﻞ ﺭﺍﻗﺪﻳﻦ ﻣﻦ ﺍﻟﺘﻌﺐ ..
ﻣﺎﻋﺪﺍ ﺯﻭﺯ ...
ﻛﺎﻧﻮﺍ ﺣﺪﺍ ﺑﻌﻀﻬﻢ ﻳﻬﺪﺭﺯﻭﺍ ..
ﺑﻬﻤﺲ ﻗﺎﻟﺖ :
" ﺧﺎﻳﻔﻪ "
ﺍﺑﺘﺴﻤﺖ ﻭﺷﺒﺤﺘﻠﻬﺎ ﻭﺭﺩﺕ ﺑﻨﻔﺲ ﻣﺴﺘﻮﻯ ﺍﻟﺼﻮﺕ : ﻣﻦ ﺷﻨﻲ؟
ﺗﻨﻬﺪﺕ ﻭﻗﺎﻟﺖ : ﻣﻦ ﺷﻜﻞ ﺣﻴﺎﺗﻲ ﺑﻌﺪﻳﻦ ..
ﺿﺤﻜﺖ ﻭﻗﺎﻟﺖ : ﺗﻮ ﺗﺘﻌﻮﺩﻱ ﻛﻴﻒ ﻣﺎﺗﻌﻮﺩﻭﺍ ﺧﻮﺍﺗﻚ .. ﻉ ﺍﻷﻗﻞ ﺍﻧﺘﻲ ﻣﺎﺯﻟﺘﻲ ﻓﻲ ***** ﻟﻜﻦ ﻫﻦ ﻃﻮﻝ ﻋﺪﻥ ﻟﻤﺪﻳﻨﻪ ﺗﺎﻧﻴﻪ ﻭﻛﻞ ﺷﻲ ﻓﻴﻬﺎ ﻳﺨﺘﻠﻒ ﻋﻦ ﻫﻨﻰ ﻭﺑﻌﺎﺩ ﻋﻠﻴﻨﺎ ﻭﺍﺟﺪ ﻟﻜﻦ ﺍﻧﺘﻲ ﺣﺘﻰ ﻉ ﻛﺮﻋﻴﻚ ﺗﻘﺪﺭﻱ ﺗﺠﻲ ..
ﻧﺰﻟﻮﺍ ﺩﻣﻮﻋﻬﺎ ﻭﻗﺎﻟﺖ : ﻫﻦ ﻛﺎﻧﻦ ﺻﻐﻴﺮﺍﺕ ﻣﻨﻴﻦ ﻋﺪﻥ ﻣﺎﺧﺪﻧﺶ ﻭﺍﺟﺪ ﻉ ﺍﻟﺤﻴﺎﺓ ﻓﻲ ﺣﻮﺵ ﻫﻠﻬﻦ ﻛﻴﻔﻲ ﺍﻧﻲ ﻳﺎﻏﺎﻟﻴﻪ ..
ﻏﺎﻟﻴﻪ ﺑﻀﺤﻜﻪ : ﺑﻼﺵ ﻫﺒﺎﻝ ﻳﺎﻣﺘﻠﻔﻪ ﻭﺑﻌﺪﻳﻦ ﻣﺎﺗﻨﺴﻴﺶ ﺍﻧﻚ ﺑﺘﻌﺪﻱ ﻟﺤﻮﺵ ﺭﺍﺟﻞ ﻳﺤﺒﻚ ﻭﻳﺒﻴﻚ ﻭﻳﺪﻟﻞ ﻓﻴﻚ ﻏﻴﺮ ﺷﻦ ﺗﺒﻲ ﺻﺪﻗﻴﻨﻲ ﺍﺳﺒﻮﻉ ﻭﺍﺣﺪ ﻭﺗﻨﺴﻴﻨﺎ ..
ﺿﺤﻜﺖ ﺣﻤﻴﺪﻩ ﻣﻦ ﺑﻴﻦ ﺩﻣﻮﻋﻬﺎ ...
ﻏﺎﻟﻴﻪ ﺑﻀﺤﻜﻪ : ﻏﻴﺮ ﻛﺎﻥ ﺧﻠﺘﻴﻪ ﻳﻌﻄﻴﻚ ﺻﻮﺭﺗﻪ ﺑﺲ ﻣﻌﻘﻮﻟﻪ ﺗﻌﺪﻱ ﻟﺮﺍﺟﻞ ﻣﺶ ﺷﺎﻳﻔﺘﻴﻪ ..
ﺣﻤﻴﺪﻩ ﺑﻀﺤﻜﻪ : ﺣﺘﻰ ﺧﻮﺍﺗﻚ ﻫﻜﻲ ﺩﺍﺭﻥ ..
ﻏﺎﻟﻴﻪ : ﻧﻌﻴﻤﻪ ﺭﺍﺗﻪ ..
ﺣﻤﻴﺪﻩ : ﺣﻖ !! ﻛﻴﻒ؟
ﻏﺎﻟﻴﻪ : ﺍﺻﻼ ﻛﻴﻒ ﺧﻄﺒﻬﺎ ﻋﺒﺎﻟﺴﻼﻡ ﻣﻨﻴﻦ ﺭﻭﺡ ﺳﻴﺪﻱ ﻣﻦ ﺍﻟﺤﺞ .. ﺟﻲ ﻫﻮ ﻭﺍﻣﻪ ﻭﺳﻴﺪﻩ .. ﻛﺎﻧﺖ ﻧﻌﻴﻤﻪ ﻣﺮﻭﺣﻪ ﻣﻦ ﺣﻮﺵ ﻋﻤﻲ ﻭﻫﻤﺎ ﻛﻴﻒ ﺟﻮ .. ﻧﺰﻝ ﻣﻦ ﺍﻟﺴﻴﺎﺭﺓ ﺭﺍﻫﺎ ﺧﺎﺷﻪ ﻟﻠﺤﻮﺵ ﻭﻧﻌﻴﻤﻪ ﺍﻧﻌﺠﺒﺖ ﺑﻴﻪ ﻣﻨﻴﻦ ﺷﺎﻓﺎﺗﻪ ﻭﻗﻔﺖ ﺷﻮﻱ ﺗﺸﺒﺤﻠﻪ ﻭﻳﺸﺒﺤﻠﻬﺎ ﺑﻌﺪﻳﻦ ﺍﺳﺘﺎﻗﻀﺖ ﻭﺧﺸﺖ ﻟﻠﺤﻮﺵ .. ﺧﻄﺒﻬﺎ ﻃﻮﻝ ..
ﺣﻤﻴﺪﻩ : ﻫﻬﻬﻬﻬﻬﻪ ﺍﻭﻝ ﻣﺮﺓ ﻧﺴﻤﻊ ﺑﻴﻬﺎ ..
ﻏﺎﻟﻴﻪ : ﻧﻌﻴﻤﻪ ﺣﻜﺘﻬﻠﻨﺎ ﺍﻭﻝ ﻣﺎﺧﻄﺒﻬﺎ ...
ﺣﻤﻴﺪﻩ ﺗﻨﻬﺪﺕ : ﺑﺲ ﺗﻌﺮﻓﻲ ﺩﻳﻤﺎ ﻧﻘﻮﻝ ﻟﻮﻻ ﺍﻟﻨﺼﻴﺐ ﺭﺍﻫﻮ ﻋﺒﺎﻟﺴﻼﻡ ﻭﻧﻌﻴﻤﻪ ﻣﺎﻛﻤﻠﻮﺵ ﻣﻊ ﺑﻌﻀﻬﻢ ..
ﻏﺎﻟﻴﻪ : ﺗﻐﻴﺮ ﺣﺎﻟﻬﻢ ﺗﻮﺍ ﻭﺍﺟﺪ ﻫﻲ ﺷﻮﻓﻴﻬﺎ ﻛﻴﻒ ﻣﻮﻟﻴﻪ ﻻﺯﻡ ﺗﺪﻭﻱ ﻋﻠﻴﻪ ﻭﺗﺠﻴﺒﻪ ﻓﻲ ﺍﻟﻬﺪﺭﺯﺓ .. ﻭﻫﻮ ﻣﺘﻐﻴﺮ ﺣﺎﻟﻪ ﻭﺍﺟﺪ ﻣﻦ ﻗﺎﻝ ﻋﺒﺎﻟﺴﻼﻡ ﻗﺎﻋﺪ ﻫﻨﻰ ﻟﻴﻪ 3 ﺍﻳﺎﻡ ..
ﺣﻤﻴﺪﻩ ﺿﺤﻜﺖ ﻭﺳﻜﺘﺖ ...
ﺗﻨﻬﺪﺕ ﻏﺎﻟﻴﻪ ﻭﻗﺎﻟﺖ : ﺧﻼﺹ ﺍﺭﻗﺪﻱ ﻏﺪﻭﺓ ﻣﻦ ﺍﻟﻌﺸﺮﺓ ﺑﺘﻌﺪﻱ ﻟﻠﻤﺰﻳﻦ ..
ﺣﻤﻴﺪﻩ ﺷﺒﺤﺖ ﻟﻐﺎﻟﻴﻪ ... ﻭﻏﺎﻟﻴﻪ ﻗﻌﺪﺕ ﺗﺸﻮﻓﻠﻬﺎ ...
ﻋﻴﻮﻧﻬﻢ ﺍﻟﺰﻭﺯ ﺗﻌﺒﻮﺍ ﺩﻣﻮﻉ ..
ﺣﻤﻴﺪﻩ : ﻣﺎﻧﻴﺶ ﻣﺨﻠﻴﺎﺗﻚ ﺑﻜﻞ .. ﺗﺠﻴﻨﻲ ﻭﻧﺠﻴﻚ ﻭﻛﻞ ﻳﻮﻡ ﺑﻨﻜﻠﻤﻚ ﻉ ﻫﺎﺗﻒ ...
ﻏﺎﻟﻴﻪ ﺿﺤﻜﺖ ﻭﺩﻣﻮﻋﻬﺎ ﻃﺎﺣﻮﺍ : ﻭﻣﻦ ﻗﺎﻟﻚ ﺍﻧﻲ ﻧﺒﻴﻚ ﻗﺎﻟﻘﻪ ﻣﻨﻚ ﺭﺍﻧﻲ ﻭﻣﺎﺻﺪﻗﺖ ﺗﻌﺪﻱ ﺑﻴﺶ ﻧﺎﺧﺪ ﻣﻜﻴﺎﺟﻚ ﻭﺩﺑﺸﻚ ﺭﻏﻢ ﺍﻧﻚ ﺍﻃﻮﻝ ﻣﻨﻲ ﻟﻜﻦ ﻋﺎﺩﻱ ﻧﺪﻳﺮﻟﻪ ﺣﻞ ..
ﺣﻤﻴﺪﻩ ﺩﻣﻮﻋﻬﺎ ﺳﻴﻞ ..
ﻏﺎﻟﻴﻪ ﺑﻨﺒﺮﺓ ﺑﺎﻛﻴﻪ : ﺑﺎﻟﻠﻪ ﻋﻠﻴﻚ ﻳﺎﺣﻤﻴﺪﻩ ﻣﻌﺎﺵ ﺗﺒﻜﻲ ﺗﺮﺑﺤﻲ ﻉ ﺧﺎﻃﺮﻱ ..
ﺣﻤﻴﺪﻩ ﻫﺰﺕ ﺭﺍﺳﻬﺎ ﺑﺈﻳﺠﺎﺏ ﻭﻗﺎﻟﺖ : ﺑﺎﻫﻲ ﺍﻣﺴﺤﻴﻠﻲ ﺩﻣﻮﻋﻲ ..
ﺿﺤﻜﺖ ﻏﺎﻟﻴﻪ ﻭﻧﺎﺿﺖ ﻗﻌﺪﺕ ﺗﻤﺴﺤﻠﻬﺎ ﻓﻲ ﺩﻣﻮﻋﻬﺎ : ﻏﺪﻭﺓ ﻛﻴﻒ ﻫﺎﻟﻮﻗﺖ ﻓﻲ ﺣﻀﻦ ﺻﺪﻭﻗﻪ ..
ﺣﻤﻴﺪﻩ ﺑﺨﺠﻞ : ﻳﺎﺻﺎﻣﺘﻪ ...
ﻏﺎﻟﻴﻪ : ﻫﻬﻬﻬﻬﻬﻬﻪ ...
ﻭﻟﺖ ﺑﻌﺪﻫﺎ ﻏﺎﻟﻴﻪ ﻟﻔﺮﺍﺷﻬﺎ : ﻫﻲ ﺍﺭﻗﺪﻱ ..
ﺣﻤﻴﺪﻩ ﻫﺰﺕ ﺭﺍﺳﻬﺎ ﺑﺈﻳﺠﺎﺏ ﻭﻫﻲ ﻣﺒﺘﺴﻤﻪ ﻭﻏﻤﻀﺖ ﻋﻴﻮﻧﻬﺎ ..
ﻭﻏﺎﻟﻴﻪ ﺍﺑﺘﺴﻤﺖ ﺑﺄﻟﻢ ﻭﻋﻄﺘﻬﺎ ﺑﺎﻟﻈﻬﺮ ... ﻭﺩﻣﻮﻋﻬﺎ ﻃﺎﺣﻮﺍ ..
ﻭﺣﻤﻴﺪﻩ ﻭﻫﻲ ﻣﻐﻤﻀﻪ ﻋﻴﻮﻧﻬﺎ ﺩﻣﻮﻋﻬﺎ ﻧﺰﻟﻮﺍ ...
ﻭﺷﻮﻳﻪ ...
ﻭﺭﻗﺪﻭﺍ ﻫﻤﺎ ﺍﻟﺰﻭﺯ 🍃
🍁🍁🍁🍁🍁🍁
ﺗﺎﻧﻲ ﻳﻮﻡ ..
ﻣﻊ ﺍﻟﺴﺎﻋﻪ 10:00
ﻛﺎﻧﺖ ﺣﻤﻴﺪﻩ ﻭﺍﺗﻴﻪ ﺑﺘﻤﺸﻲ ﻟﻠﻤﺰﻳﻦ ...
ﻃﻠﻌﻮﻫﺎﺑﺎﻟﺪﺭﺑﻮﻛﻪ ﻭﺍﻟﻐﻨﻲ ﻭﺍﻟﺰﻏﺎﺭﻳﻂ ...
ﺭﻓﻌﻬﺎ ﻫﺎﻧﻴﺒﺎﻝ ﻭ ﻣﺸﺖ ﻣﻌﺎﻫﺎ ﻟﻄﻴﻔﻪ ...
ﻭﻓﻲ ﺣﺎﺟﻪ ﻏﺮﻳﺒﻪ ﺻﺎﺭﺕ ﻣﺎﻛﺎﻧﺘﺶ ﺗﻨﺪﺭﻱ ﻋﻠﻴﻬﺎ ﺣﻤﻴﺪﻩ ...
ﺧﻠﻴﻔﻪ !!!
ﻛﻔﺎﻳﻪ : ﺍﻳﻪ ﺍﺟﺮ ﺳﻴﺎﺭﺓ ﻣﺶ ﻋﺎﺩﻳﻪ ﺟﺪﻳﺪﻩ ﺻﻔﺎﺭ .. ﻭﻗﺎﻝ ﺑﻴﺮﻓﻌﻬﺎ ﻫﻮ .. ﻭﺟﺎﺏ ﺻﻨﺎﺩﻳﻖ ﻛﻴﻜﻪ ﺑﺶ ﻧﻮﺯﻋﻮﻫﻢ ﻉ ﺍﻟﻨﺎﺱ ﺍﻟﻠﻴﻠﻪ ﻓﻲ ﺍﻟﺤﻔﻠﻪ ..
ﻧﻌﻴﻤﻪ ﺑﺼﺪﻣﻪ : ﺷﻦ ﺧﻄﺮ ﻋﻠﻴﻪ؟ﻭﺑﻌﺪﻳﻦ ﺧﻮﺗﻚ ﻣﺎﺍﺳﺘﻐﺮﺑﻮﺵ؟
ﻛﻔﺎﻳﻪ : ﻻ ﻣﺎﺍﺳﺘﻐﺮﺑﻮﺵ ﻻﻥ ﻗﺒﻠﻬﺎ ﺧﻴﻤﺔ ﺍﻟﺮﺟﺎﻟﻪ ﺩﺍﺭﻫﺎ ﺣﺴﻦ ..
ﺯﻳﻨﺐ : ﻫﻬﻬﻬﻬﻬﻬﻬﻬﻪ ..
ﻧﻌﻴﻤﻪ ﻭﻛﻔﺎﻳﻪ ﻭﺷﺒﺤﻮﺍ ﻟﺒﻌﺾ ﺑﻌﺪﻳﻦ ﻗﻌﺪﻭﺍ ﻳﻀﺤﻜﻮﺍ ..
ﺯﻳﻨﺐ ﺑﻀﺤﻜﻪ : ﻏﻴﺮ ﻫﻴﺎ ﻫﻴﺎ ﺗﺤﺮﻛﻮﺍ ﻭﺭﺍﻧﺎ ﺣﻮﺳﻪ ﻫﻜﻲ ﻛﺒﺮﻫﺎ ..
ﺿﺤﻜﻮﺍ ﻭﻛﻞ ﻭﺣﺪﻩ ﻣﺸﺖ ﻟﺘﺮﻛﻴﻨﻪ ..
ﻓﻲ ﻧﻔﺲ ﺍﻟﻮﻗﺖ ..
ﻣﺮﻭﺍﻥ ﻛﺎﻥ ﺟﺎﻱ ﻣﻦ ﺍﻟﺤﻤﺎﻡ ﺍﻟﺨﺎﺭﺟﻲ .. ﻃﻮﻝ ﻣﺸﻲ ﻟﻠﻤﺮﺑﻮﻋﻪ ﺍﻟﺪﺍﺧﻠﻴﻪ ..
ﺻﻠﻰ .. ﻭﺑﻌﺪﻫﺎ ﻃﻠﻊ .. ﻭﻗﻌﻤﺰ ﻉ ﺍﻟﺮﻛﺎﺑﻪ ﻓﻢ ﺍﻟﺒﺎﺏ ..
ﺩﺍﺧﻞ ..
ﻓﻲ ﺍﻟﻜﻮﺟﻴﻨﻪ ..
ﺍﻟﺒﻨﺎﺕ ﻳﻐﺴﻠﻮﺍ ﻓﻲ ﺍﻟﻤﺎﻋﻴﻦ ﻭﻳﻀﻤﻮﺍ ﻓﻲ ﺍﻟﻜﻮﺟﻴﻨﻪ ..
ﺧﺸﺖ ﻋﻠﻴﻬﻢ ﻛﻔﺎﻳﻪ : ﺭﻭﻓﻲ ﺣﺒﻴﺒﺘﻲ ﺍﻃﻠﻌﻲ ﺍﻛﻨﺴﻲ ﺍﻟﺼﺎﻟﻪ ﺑﺎﻟﻤﻜﻨﺴﻪ ﺍﻟﻌﺎﺩﻳﻪ ﺣﻨﺎﻙ ﻣﺎﺗﺒﻴﺶ ﺩﻭﺷﺔ ﺍﻟﻜﻬﺮﺑﺎﺋﻴﻪ ..
ﺭﻓﻘﻪ : ﺣﺎﺿﺮ ..
ﻛﻔﺎﻳﻪ ﺍﺑﺘﺴﻤﺖ ﻭﻗﺎﻟﺖ : ﺧﻮﺩﻱ ﺍﻟﺤﺮﺷﻪ .. ﺑﻌﺪﻳﻦ ﻟﻔﺖ ﻭﻃﻠﻌﺖ ..
ﺧﺪﺕ ﺭﻓﻘﻪ ﺍﻟﻤﻜﻨﺴﻪ ﺍﻟﺤﺮﺷﻪ ﻭﻃﻠﻌﺖ ﻟﻠﺼﺎﻟﻪ ..
ﻭﻗﻌﺪﺕ ﺗﺸﻮﻓﻠﻬﺎ ﻭﻗﺎﻟﺖ : ﺻﻌﺒﻪ 😥
ﺗﻨﻬﺪﺕ ﻭﺑﻌﺪﻳﻦ ﺑﺪﺕ ..
ﺍﻭﻝ ﻣﺎﺑﺪﺕ ﺗﻜﻨﺲ ﺍﻧﻔﻜﺖ ﺍﻟﻤﻜﻨﺴﻪ ﺗﺄﻓﻔﺖ ﻭﺭﻛﺒﺘﻬﺎ ..
ﻭﻭﻟﺖ ﺗﻜﻨﺲ ﺻﺎﺭ ﻧﻔﺲ ﺍﻟﺸﻲ ...
ﺗﺄﻓﻔﺖ ﻣﻦ ﺟﺪﻳﺪ ﻭﺭﻛﺒﺘﻬﺎ ... ﻭﻫﻲ ﻃﺎﻳﺮﺗﻠﻬﺎ ...
ﻛﻨﺴﺖ ﺷﻮﻳﻪ ﺑﻴﻬﺎ .. ﺑﻌﺪﻳﻦ ﺍﻧﻔﻜﺖ ..
ﺭﻓﻘﻪ : ﻋﻠﻴﻚ ﻫﻢ .. ﻭﺭﺟﻌﺖ ﺭﻛﺒﺘﻬﺎ ..
ﻭﻭﻟﺖ ﺗﻜﻨﺲ ﺑﺲ ﺑﻌﺼﺒﻴﻪ ﻭﺑﻘﻮﺓ ..
ﺍﻟﻤﺮﺓ ﺍﻫﻴﺎ ﺍﻧﻔﻜﺖ ﺍﻟﻤﻜﻨﺴﻪ ﻭﻃﺎﺭﺕ ﺑﺮﺍ ﻭﺗﺠﻲ ﻣﺒﺎﺷﺮﺓ ﻉ ﺭﺍﺱ ﻣﺮﻭﺍﻥ ..
ﺭﻓﻘﻪ ﺍﻧﺼﺪﻣﺖ .. ﻣﺎﺭﻛﺰﺗﺶ ﻋﻠﻴﻪ ﻭﻻﺷﺎﻓﺎﺗﻪ ..
ﻫﻮ ﺷﺪ ﺭﺍﺳﻪ ﻭﺍﻟﺘﻔﺖ ﻭﺷﺎﻑ ﻟﻠﻤﻜﻨﺴﻪ ﻃﺎﻳﺤﻪ ﻭﺭﺍ ﻇﻬﺮﻩ .. ﺑﻌﺪﻳﻦ ﺷﺒﺤﺖ ﻟﺪﺍﺧﻞ ﺍﻟﺤﻮﺵ ..
ﻟﻘﻲ ﺭﻓﻘﻪ ﺷﺎﺩﻩ ﺍﻟﻌﺼﺎ ﻭﺣﺎﻃﻪ ﻳﺪﻫﺎ ﻉ ﻓﻤﻬﺎ ..
ﻟﻤﺎ ﺷﺒﺤﻠﻬﺎ ﻃﻠﻘﺖ ﺍﻟﻌﺼﺎ ﻭﺟﺎﺗﻪ ﺗﺠﺮﻱ : ﺍﺳﻔﻪ ﺍﺳﻔﻪ ﺍﺳﻔﻪ .. ﻭﺍﻟﻠﻪ ﻣﺎﺷﻔﺘﻚ ... ﻃﺒﺴﺖ ﻗﺎﻣﺖ ﺍﻟﻤﻜﻨﺴﻪ ﻭﻗﺎﻟﺖ .. ﻣﻜﻨﺴﺔ ﺍﻟﻌﺎﺯﺓ ﻭﺍﻟﻘﻬﺮﺓ ﻣﺎﺗﺒﻴﺶ ﺗﻘﻌﺪ ﺑﻜﻞ ﻃﻴﺮﺗﻬﺎﻟﻲ .. ﻭﺟﺖ ﻓﻴﻚ ﺍﺳﻔﻪ ﺍﺳﻔﻪ ﻳﺎ ... ﺍﻧﺖ ...
ﻣﺮﻭﺍﻥ ﺑﻀﺤﻜﻪ : ﺍﻟﻀﻌﻴﻒ ﺍﻟﻠﻲ ﻣﻦ ﻏﻴﺮ ﻟﺤﻴﻪ .
ﺭﻓﻘﻪ ﺿﺤﻜﺖ ﺑﺈﺣﺮﺍﺝ ﻭﻗﺎﻟﺖ : ﻣﺮﻭﺍﻥ .. ﺍﺳﻔﻪ ..
ﻣﺮﻭﺍﻥ ﺍﺑﺘﺴﻢ ﻭﻗﺎﻝ : ﻭﻻﻳﻬﻤﻚ ..
ﺷﺒﺤﺘﻠﻪ ﻭﺍﺑﺘﺴﻤﺖ ﻭﻗﺎﻟﺖ : ﺷﻜﺮﺍ ..
ﻣﺮﻭﺍﻥ ﺑﻀﺤﻜﻪ : ﻋﻔﻮﺍ ..
ﻟﻔﺖ ﻭﺧﺸﺖ ﻃﻮﻝ ﺩﺍﺧﻞ ﻭﻫﻮ ﻣﻌﺎﻫﺎ ﺑﻌﻴﻮﻧﻪ ﻗﻌﺪ ﻳﺘﺄﻣﻞ ﻓﻴﻬﺎ ﻛﻴﻒ ﻭﻟﺖ ﺗﺤﺎﻭﻝ ﺗﺮﻛﺐ ﺍﻟﻤﻜﻨﺴﻪ ﻭﺑﻌﺪﻳﻦ ﺗﺄﻓﻔﺖ ﻭﻗﻌﺪﺕ ﺗﺴﺐ ﻓﻴﻬﺎ ﻭﻣﺸﺖ ﻟﻠﻜﻮﺟﻴﻨﻪ ..
ﻫﻮ ﺣﺲ ﺑﺸﻌﻮﺭ ﺣﻠﻮ ﻫﻠﺒﻪ ﻭﻫﻮ ﻳﺸﻮﻓﻠﻬﺎ .. ﻭﻟﻤﺎ ﺧﺸﺖ ﺍﻟﻜﻮﺟﻴﻨﻪ ﺗﻤﻨﻰ ﻟﻮ ﻳﻨﻮﺽ ﻭﻳﻠﺤﻘﻬﺎ ..
ﺿﺤﻚ ﻉ ﺷﻌﻮﺭﻩ ﻫﺪﺍ ﺑﻌﺪﻳﻦ ﻃﻮﻝ ﺗﻠﻔﺖ ﺍﻟﻘﺪﺍﻡ ...
ﺗﻼﺷﺖ ﺿﺤﻜﺘﻪ ﻭﻗﺖ ﺍﺫﻛﺮ ﻧﻮﺭ ﻭﻗﺎﻝ : ﻻﺯﻡ ﻧﺸﻌﻒ ﺑﻌﺪ ﺍﻟﻠﻲ ﻋﺮﻓﺘﻪ ..
ﻧﺎﺽ ﻣﻦ ﻣﻜﺎﻧﻪ ﻭﻣﺸﻲ ﻟﺨﻴﻤﺔ ﺍﻟﺮﺟﺎﻟﺔ ..
🍁🍁🍁🍁
ﺑﺎﻗﻲ ﺍﻟﻨﻬﺎﺭ ﻛﺎﻧﺖ ﺩﻻﻝ ﺍﻏﻠﺐ ﻭﻗﺘﻬﺎ ﻣﻊ ﻣﺠﺪﻭﻟﻴﻦ ﻭﻓﺎﻃﻤﻪ ﻣﻌﺎﻫﻢ .. ﻭﻛﻔﺎﻳﻪ ﺟﺘﻬﻢ ﺑﻌﺪﻳﻦ ﺑﺶ ﺗﺴﺎﻳﺮﻫﻢ ..
ﻓﻲ ﻧﻔﺲ ﺍﻟﻮﻗﺖ ﻛﻔﺎﻳﻪ ﻻﺣﻈﺖ ﻉ ﻣﺠﺪﻭﻟﻴﻦ ﺍﻹﻧﺰﻋﺎﺝ ﻭﺯﻱ ﺍﻟﻠﻲ ﻣﺶ ﻋﺎﺟﺒﻬﺎ ﺍﻟﺠﻮ ..
ﺍﻟﺴﺎﻋﻪ 4:00 ﻗﺒﻞ ﺍﻟﻌﺼﺮ ..
ﻓﻲ ﺍﻟﺤﻮﺵ ﺍﻟﻘﺪﻳﻢ
ﻃﻔﺖ ﻧﻌﻴﻤﻪ ﻉ ﺑﺼﻠﺔ ﺍﻟﻤﻜﺮﻭﻧﻪ ﺍﻟﻤﺒﻮﺧﻪ ﺍﻟﻠﻲ ﺑﻴﺪﻳﺮﻭﻫﺎ ﻋﺸﻲ
ﻭﻛﻔﺎﻳﻪ ﻭﺯﻳﻨﺐ ﺑﺤﺪﺍﻫﺎ ..
ﺯﻳﻨﺐ : ﻫﺪﺍ ﺍﻟﻠﻲ ﻛﻨﺖ ﺧﺎﻳﻔﻪ ﻣﻨﻪ ..
ﻧﻌﻴﻤﻪ ﺗﻨﻬﺪﺕ ﻭﺷﺒﺤﺘﻠﻬﻢ ﻭﻗﺎﻟﺖ : ﺗﻌﺮﻓﻮﺍ ﺣﻤﺎﺗﻲ ﻋﺒﻴﺮ ﺣﻮﺵ ﺷﻴﺎﺑﻴﻨﻬﺎ ﻃﻠﻌﻮﺍ ﺟﻴﺮﺍﻥ ﻣﺠﺪﻭﻟﻴﻦ ..
ﺯﻳﻨﺐ ﻭﻛﻔﺎﻳﻪ : ﺍﻳﻪ !
ﻧﻌﻴﻤﻪ : ﻋﺒﻴﺮ ﻗﺎﻟﺘﻠﻲ ﻧﻌﺮﻓﻮﻫﻢ ﻧﺎﺱ ﻣﻨﻔﺘﺤﻴﻦ ﻫﻠﺒﻪ ﻭﻣﺠﺪﻭﻟﻴﻦ ﺑﺎﻟﺬﺍﺕ ﻣﺪﻟﻌﻪ ﻣﻦ ﺍﻫﻠﻬﺎ ﻟﻴﻦ ﺧﻼﺹ ﻭﻋﺎﻳﺸﻪ ﺣﻴﺎﻩ ﻣﺮﻓﻬﻪ .. ﺣﺘﻰ ﺣﻮﺍﻳﺠﻬﺎ ﺗﺠﻴﺐ ﻓﻴﻬﻢ ﻣﻦ ﺑﺮﺍ ﺍﻟﻠﻲ ﻣﻦ ﻟﺒﻨﺎﻥ ﻭﺍﻟﻠﻲ ﻣﻦ ﺗﺮﻛﻴﺎ ﻭﻭﺍﺧﺪﻩ ﻉ ﺍﻟﺴﻔﺮ ﻭﺍﻟﻄﻠﻮﻉ .. ﻛﻴﻒ ﺑﺘﻌﻴﺶ ﻓﻲ ***** ؟ !!
ﺯﻳﻨﺐ : ﺷﺒﺤﺘﻲ ﻓﻴﻪ ﺷﺒﺤﻪ ﺑﻴﺼﻴﺮﻟﻪ ﺯﻱ ﺣﻤﻴﺪ ﺧﻮﻙ ﻭﺣﻤﻴﺪﺍ ﻭﻟﺪ ﻋﻤﻚ ..
ﻛﻔﺎﻳﻪ ﺑﻀﻴﻖ : ﻻﻋﺎﺩ ﺇﻻ ﻫﺎﻧﻴﺒﺎﻝ ﻳﺎﻛﺒﺪﻱ ﻫﻮ ﻣﻦ ﻳﺪﻭﺭ ﻓﻴﻨﺎ ﻏﻴﺮﻩ ﺣﻲ ﻛﺎﻥ ﻫﺎﻧﻴﺒﺎﻝ ﺗﻐﻴﺮ ﻋﻠﻴﻨﺎ ﺣﺘﻰ ﻫﻮ ..
ﻧﻌﻴﻤﻪ : ﺗﻌﻮﺩﻱ ﻣﻦ ﺗﻮﺍ ﺣﻨﻲ ﻣﻌﺮﻭﻑ ﺣﻈﻨﺎ ..
ﺯﻳﻨﺐ ﺍﺑﺘﺴﻤﺖ ﺑﺘﻬﻜﻢ ﻭﻗﺎﻟﺖ : ﺻﺪﻗﺘﻲ ﻳﺎﻧﻌﻮﻣﻪ ..
ﺗﻨﻬﺪﺕ ﻧﻌﻴﻤﻪ ﻭﻗﺎﻟﺖ : ﻫﻴﺎ ﺧﻼﺹ ﺧﻞ ﻧﻤﺸﻮﺍ ﻧﻮﺗﻮﺍ ﺍﺭﻭﺍﺣﻨﺎ ﻣﻌﺎﺵ ﻓﻲ ﻭﻗﺖ ..
🍁🍁🍁🍁
ﻓﻲ ﺍﻟﺤﻮﺵ ..
ﻓﻲ ﻭﺣﺪﻩ ﻣﻦ ﺍﻟﺪﻳﺎﺭ ..
ﻛﺎﻧﻮﺍ ﺍﻟﺒﻨﺎﺕ ﻳﻤﻜﻴﺠﻮﺍ ﻭﻳﻬﺪﺭﺯﻭﺍ ..
ﺩﻻﻝ : ﺻﺪﻗﻴﻨﻲ ﺗﻮ ﺗﺎﺧﺪﻩ ﻟﻄﺮﺍﺑﻠﺲ ﺣﺘﻰ ﻫﻮ ..
ﺭﺑﺎﺏ : ﺍﻟﺤﻖ ﺍﻟﺤﻖ ﺭﻏﻢ ﺍﻧﻬﺎ ﻓﻴﻬﺎ ﺣﺎﺟﺎﺕ ﻛﻮﻳﺴﻪ ﻟﻜﻦ ﻣﺎﻫﻀﻤﺘﻬﺎﺵ ..
ﺭﺍﻧﻴﺎ : ﺧﺎﻳﻔﻪ ﻣﻦ ﻛﻼﻣﻜﻢ ... ﺣﻲ ﻛﺎﻥ ﻣﺎﻳﺘﻐﻴﺮ ﺧﺎﻟﻲ ﻋﻠﻴﻨﺎ ..
ﺗﻨﻬﺪﻭﺍ ﻭﺳﻜﺘﻮﺍ ..
ﻧﻮﺭ : ﺳﻤﻌﺘﻮﺍ ﺑﻘﺼﺔ ﺣﺒﻪ ﺍﻟﻘﺪﻳﻤﻪ ..
ﺭﺍﻧﻴﺎ ﻭﺭﺑﺎﺏ ﺍﺑﺘﺴﻤﻮﺍ ﺑﺄﻟﻢ ..
ﻧﻮﺭ : ﻟﻤﺎ ﺳﻤﻌﺘﻬﺎ ﻣﻦ ﻣﺎﻣﺎ ﻟﻴﻦ ﺑﻜﻴﺖ ..
ﺩﻻﻝ ﻧﺰﻟﺖ ﺍﻟﻔﺮﺷﻪ ﻣﺘﺎﻉ ﺍﻟﻈﻞ ﻭﻗﺎﻟﺖ : ﺍﻣﺎ ﻗﺼﺔ ..
ﻭﺑﺪﻭﺍ ﺍﻟﺒﻨﺎﺕ ﻳﺤﻜﻮﺍ ﻋﻠﻴﻬﺎ ..
ﻓﻲ ﺍﻟﺪﺍﺭ ﺍﻟﻠﻲ ﻓﺠﻨﺒﻬﻢ ...
ﺍﻡ ﻣﺠﺪﻭﻟﻴﻦ : ﻭﻛﺎﻥ ﻣﺶ ﻋﺎﺟﺒﻚ ﻟﻴﺶ ﻣﻦ ﺍﻟﺒﺪﺍﻳﻪ ﻗﻠﺘﻲ ﺑﺎﻫﻲ ..
ﻣﺠﺪﻭﻟﻴﻦ : ﻋﻨﺪﻱ ﺍﻣﻞ ﻧﻐﻴﺮ ﻓﻜﺮﺗﻪ ﻭﻧﺨﻠﻴﻪ ﻳﺠﻲ ﻟﻄﺮﺍﺑﻠﺲ ..
ﺍﻡ ﻣﺠﺪﻭﻟﻴﻦ : ﻭﻛﺎﻥ ﻣﺎﺗﻐﻴﺮﺗﺶ؟
ﻣﺠﺪﻭﻟﻴﻦ : ﻣﺎﻣﺎ ﺑﺎﻟﻠﻪ ﻋﻠﻴﻚ ﻣﺎﺗﺴﻜﺮﻳﻬﺎﺵ ﻓﻲ ﻭﺟﻬﻲ ..
ﺳﻜﺘﺖ ﺍﻣﻬﺎ ﻭﻫﻲ ﺗﺸﻮﻑ ﻟﻠﻤﺮﺍﻳﻪ ﻭﺗﻤﻜﻴﺞ ..
ﻣﺠﺪﻭﻟﻴﻦ : ﺧﻞ ﻧﻤﺸﻲ ﻧﺴﺄﻟﻬﻢ ﻛﺎﻥ ﻋﻨﺪﻫﻢ ﺑﻮﺩﺭﻩ ﻟﻤﺎﻋﻪ ﻣﺘﺎﻋﻲ ﻧﺴﻴﺘﻬﺎ ..
ﺍﻣﻬﺎ : ﻫﺎﻙ ﺧﺪﻳﺘﻲ ﻉ ﺍﻟﻮﺿﻊ ﻭﺑﺪﻳﺘﻲ ﺗﺘﺤﺮﻛﻲ ﻓﻲ ﺍﻟﺤﻮﺵ ﻭﺗﺎﺧﺪﻱ ﻣﻦ ﻏﻴﺮﻙ ﺣﺎﺟﻪ ﺗﺒﻴﻬﺎ ..
ﺿﺤﻜﺖ ﻣﺠﺪﻭﻟﻴﻦ ﺑﺈﺳﺘﻐﺮﺍﺏ .. ﻭﻣﺸﺖ ﻃﻠﻌﺖ ﻣﻦ ﺍﻟﺪﺍﺭ ﻭﺍﻣﻬﺎ ﺗﻀﺤﻚ ﻋﻠﻴﻬﺎ ..
ﻛﻴﻒ ﻭﺻﻠﺖ ﻟﻠﺪﺍﺭ ﺍﻟﺘﺎﻧﻴﻪ ..
" ﻗﺼﺪﻙ ﺍﻟﺤﺮﻕ ﺍﻟﻠﻲ ﻓﺮﻗﺒﺖ ﺧﺎﻟﻲ ﻫﺎﻧﻲ ﺳﺒﺒﻪ ﺑﻨﺖ؟ "!
ﻭﻗﻔﺖ ﻟﻤﺎ ﺳﻤﻌﺖ ﻫﺎﻟﺠﻤﻠﻪ ..
ﺭﺑﺎﺏ : ﺍﻳﻪ .. ﻗﺎﻟﺖ ﺍﻣﻲ ﺑﻌﺪﻫﺎ ﺧﺎﻟﻲ ﺗﻐﻴﺮ ﻭﻻ ﻣﻨﻄﻮﻱ ﻭﺩﻳﻤﺎ ﺑﺮﻭﺣﻪ ﻭﻟﻤﺎ ﺳﻤﻊ ﺑﻴﻬﺎ ﺳﺎﻓﺮﺕ ﺯﺍﺩﺕ ﺗﺄﺯﻣﺖ ﺣﺎﻟﺘﻪ ..
ﺩﻻﻝ ﻋﻴﻮﻧﻬﺎ ﻣﻌﺒﻴﺎﺕ ﺩﻣﻮﻉ : ﻳﺎﻧﺎﺭﻱ ﻉ ﺧﺎﻟﻲ .. ﻋﻄﻴﻬﻢ ﻣﺎﻳﺤﺮﻗﻬﻢ ﻳﺎﺭﺑﻲ ..
ﺭﺍﻧﻴﺎ : ﺣﺘﻰ ﺍﻟﺒﻨﺖ ﺍﻟﻠﻲ ﻛﺎﻥ ﻳﺤﺒﻬﺎ ﺳﺨﻔﺘﻨﻲ ..
ﺭﺑﺎﺏ : ﺣﺘﻰ ﺍﻧﻲ ...
ﻧﻮﺭ ﺗﻤﺴﺢ ﻓﻲ ﺩﻣﻮﻋﻬﺎ ..
ﺳﻜﺘﻮﺍ ﺍﻷﺭﺑﻌﻪ .. ﺭﺟﻌﺖ ﺩﻻﻝ ﺗﻤﻜﻴﺞ ﻭﻫﻲ ﻣﻀﺎﻳﻘﻪ ..
ﻭﺭﺑﺎﺏ ﺗﺴﺘﺸﻮﺭ .. ﻭﺭﺍﻧﻴﺎ ﺍﺩﻳﺮ ﻓﻲ ﺍﻟﻔﻠﻮ ﻟﺸﻌﺮ ﻧﻮﺭ ..
ﻃﻖ ﺍﻟﺒﺎﺏ ...
ﻭﺍﻧﻔﺘﺢ ..
ﺗﻔﺎﺟﺌﻮﺍ ﻟﻤﺎ ﺷﺎﻓﻮﺍ ﻣﺠﺪﻭﻟﻴﻦ ..
ﻃﻔﺖ ﺭﺑﺎﺏ ﺍﻹﺳﺘﺸﻮﺍﺭ ..
ﻣﺠﺪﻭﻟﻴﻦ ﺑﺈﺑﺘﺴﺎﻣﻪ ﻭﻋﻴﻮﻥ ﻣﻠﻴﺎﻧﺎﺕ ﺩﻣﻮﻉ : ﺍﺣﻤﻢ .. ﻣﻌﻠﻴﺸﻲ ﻋﻨﺪﻛﻢ ﺑﻮﺩﺭﺓ ﺟﺴﻢ ﻟﻤﺎﻋﻪ ..
ﺩﻻﻝ ﺑﺈﺑﺘﺴﺎﻣﻪ : ﺍﻳﻪ ﻋﻨﺪﻱ .. ﻧﺎﺿﺖ ﻭﺧﺪﺗﻬﺎ ﻣﻦ ﻉ ﺍﻟﻄﺎﻭﻟﻪ .. ﻭﻣﺸﺘﻠﻬﺎ ﻭﻣﺪﺗﻬﺎﻟﻬﺎ .. ﺗﻔﻀﻠﻲ .
ﺧﺪﺗﻬﺎ ﻣﺠﺪﻭﻟﻴﻦ ﻭﻗﺎﻟﺖ : ﺷﻜﺮﺍ ..
ﺩﻻﻝ : ﺍﻟﻌﻔﻮ ..
ﻣﺸﺖ ﻣﺠﺪﻭﻟﻴﻦ ﺧﺸﺖ ﺍﻟﺪﺍﺭ ﺍﻟﺘﺎﻧﻴﻪ ..
ﻉ ﺧﺸﺔ ﺯﻳﻨﺐ ﻭﻧﻌﻴﻤﻪ ﻭﻛﻔﺎﻳﻪ ﻟﻠﺤﻮﺵ ﻟﻘﻮﺍ ﻏﺎﻟﻴﻪ ﻣﺎﺯﺍﻟﺖ ﻓﻲ ﺍﻟﻜﻮﺟﻴﻨﻪ ..
ﻛﻔﺎﻳﻪ : ﻭﺗﻲ ﺭﻭﺣﻚ ﻏﺎﻟﻴﻪ ﺷﻦ ﺗﺮﺍﺟﻲ ..
ﻏﺎﻟﻴﻪ : ﻣﺶ ﻭﻗﺘﻪ ﻳﺎﻛﻔﺎﻳﻪ .. ﻭﻗﻌﺪﺕ ﺗﺴﺘﻒ ﻓﻲ ﺍﻟﻜﻴﺴﺎﻥ ..
ﻛﻔﺎﻳﻪ ﺷﺒﺤﺖ ﻟﺨﻮﺍﺗﻬﺎ ﺑﻀﻴﻖ .. ﻭﻫﻤﺎ ﺭﺩﻭﻟﻬﺎ ﻧﻔﺲ ﺍﻟﻨﻈﺮﻩ ..
ﺑﻌﺪﻳﻦ ﺧﺸﻮﺍ ﺩﺍﺧﻞ ..
ﻣﺸﻮﺍ ﻟﻮﺣﺪﻩ ﻣﻦ ﺍﻟﺪﻳﺎﺭ ...
ﻟﻘﻮﺍ ﺑﻨﺎﺕ ﺧﺎﻟﻬﻢ ﻳﻮﺗﻮﺍ ﻓﻲ ﺭﻭﺍﺣﻬﻢ ..
ﻛﻔﺎﻳﻪ : ﺗﻤﻜﻴﺠﻴﻨﻲ ﺍﺻﻮﻟﻪ ..
ﺍﺻﺎﻟﻪ ﺑﻀﺤﻜﻪ : ﺣﺎﺿﺮ ..
" ﻳﺎﺯﻳﻴﻨﺐ ﺟﻴﺒﻴﻠﻲ ﺍﻟﺤﻮﻟﻲ ﻣﺘﺎﻋﻲ ﻣﻦ ﺍﻟﺪﻭﻻﺏ "
ﺿﺤﻜﺖ ﺯﻳﻨﺐ ﻭﺧﺸﺖ ﺗﺠﻴﺐ ﺣﻮﻟﻲ ﺍﻣﻬﺎ ﻣﻦ ﺍﻟﺪﻭﻻﺏ ..
🍁🍁🍁🍁
ﺍﺩﻳﺮ ﻷﻣﻬﺎ ﻓﻲ ﺍﻟﻠﻮﺍﻳﺎﺕ ﻉ ﺷﻌﺮﻫﺎ ..
ﺭﺯﺍﻥ : ﻧﺠﻤﺔ ﺍﻟﺤﻔﻠﻪ ﺍﻧﺘﻲ ﻳﺎﺳﻌﻮﺩﺗﻲ ..
ﺿﺤﻜﺖ ﺳﻌﻴﺪﻩ : ﺳﻠﻢ ﺑﻨﺘﻲ ﻭﺍﻳﺪﻳﺎﺗﻬﺎ ..
ﺿﺤﻜﺖ ﺭﺯﺍﻥ .. ﺑﻌﺪﻳﻦ ﻗﺎﻟﺖ
ﺭﺯﺍﻥ : ﻣﺎﻣﺎ ..
ﺳﻌﻴﺪﻩ : ﺍﻣﻤﻢ ..
ﺭﺯﺍﻥ : ﻋﻤﺘﻲ ﻛﻔﺎﻳﻪ ﻛﻴﻒ ﻣﺎﻳﻘﻮﻟﻮﺍ ﻏﻨﻴﻪ؟
ﺳﻌﻴﺪﻩ : ﺍﻳﻪ ﻳﺎﺣﻨﻪ ﻓﻠﻮﺱ ﻳﺎﻓﻠﻮﺱ ﺗﻤﺸﻲ ﻋﻠﻴﻬﻢ ﻛﻔﺎﻳﻪ ﺭﻳﺘﻲ ﺣﻮﺷﻬﺎ ﺍﻧﺘﻲ ..
ﺭﺯﺍﻥ : ﺍﻳﻪ ﺣﺘﻰ ﺍﻣﺲ ﺭﻳﺖ ﺭﺑﻄﺔ ﻓﻠﻮﺱ ﻋﻨﺪﻫﺎ ﻓﻲ ﺍﻟﺸﻨﻄﻪ ..
ﺳﻌﻴﺪﻩ ﺑﺈﺳﺘﻐﺮﺍﺏ : ﻛﻴﻒ ﺭﻳﺘﻴﻬﻦ ..
ﺭﺯﺍﻥ : ﻋﻄﺘﻨﺎ ﻓﻠﻮﺱ ﺍﻣﺲ ﺍﻧﻲ ﻭﺭﻓﻘﻪ ﻉ ﺧﺸﺔ ﺍﻟﻌﻘﺮﺏ ﺯﻳﻨﺐ ﻗﺎﺗﻠﻬﺎ ﺭﺩﻱ ﺍﻟﺸﻨﻄﻪ ﻣﻨﻴﻦ ﺧﺪﺗﻬﺎ ﺍﻧﻘﻠﺒﺖ ﻣﻨﻬﺎ ﺍﻟﺸﻨﻄﻪ ﻭﻃﺎﺣﻦ ﺍﻟﻔﻠﻮﺱ ﺑﻌﺪﻳﻦ ﺭﺩﺗﻬﻦ ﻟﻠﺸﻨﻄﻪ ﻭﺣﻄﺘﻬﺎ ﻓﻲ ﺍﻟﺪﻭﻻﺏ ..
ﺳﻌﻴﺪﻩ : ﺍﻫﺎ .. ﺑﺎﻫﻲ ﻗﻮﻟﻴﻠﻲ ﻣﺎﺳﻤﻌﺘﻲ ﺷﻲ ﺍﻣﺲ ﻣﺎﻗﺎﻟﻦ ﺷﻲ ..
ﺭﺯﺍﻥ ﻣﺎﺑﺘﺶ ﺗﻘﻮﻝ ﻷﻣﻬﺎ ﻉ ﺍﻟﻠﻲ ﺳﻤﻌﺎﺗﻪ ﺗﺒﻲ ﺍﻟﺤﻔﻠﻪ ﺗﻤﺸﻲ ﻉ ﺧﻴﺮ ﻭﺑﻌﺪ ﻳﺘﻢ ﺍﻟﻌﺮﺱ ﺗﻘﻮﻟﻠﻬﺎ : ﻻﻻﺭﻗﺪﻥ ﻛﻠﻬﻦ ﻃﻮﻝ ..
ﺳﻌﻴﺪﻩ ﻫﺰﺕ ﺭﺍﺳﻬﺎ ﺑﺈﻳﺠﺎﺏ ..
ﺭﺯﺍﻥ : ﺧﻼﺹ ﺗﻤﻴﺖ ..
" ﺳﻌﻴﺪﻩ "
ﺳﻌﻴﺪﻩ : ﺧﺎﻻﺗﻚ ﺟﻦ ... ﺗﻌﺎﻟﻦ ﺗﻌﺎﺍﺍﻟﻦ ..
💕💕💕💕💕💕💕💕💕💕💕💕💕💕
ﺍﻟﺴﺎﻋﻪ 6:30 ﻣﺴﺎﺀﺍ ..
ﻫﺎﻧﻴﺒﺎﻝ : ﻫﻴﺎ ﻳﺎﻛﻔﺎﻳﻪ ..
ﻃﻠﻌﺖ ﻛﻔﺎﻳﻪ ﺑﺴﺮﻋﻪ ﺑﺶ ﺑﺘﻤﺸﻲ ﻣﻌﺎﻩ ﻟﻠﻤﺰﻳﻦ ﺑﻴﺠﻴﺒﻮﺍ ﺣﻤﻴﺪﻩ ﻭﻟﻄﻴﻔﻪ ..
ﻓﻲ ﻧﻔﺲ ﺍﻟﻮﻗﺖ ﻓﻲ ﺍﻟﺨﻴﻤﻪ ..
ﻛﺎﻧﺖ ﻏﺎﻟﻴﻪ ﺗﺸﻮﻑ ﻟﻠﻄﺎﻭﻻﺕ ﻭﺍﻟﻜﺮﺍﺳﻲ ﻛﻴﻒ ﺣﻄﻮﻫﻢ ﺍﻟﻮﻻﺩ ﺑﻌﺪﻳﻦ ﺍﻟﺘﻔﺘﺖ ﻉ ﺍﻟﻜﻮﺷﻪ ..
ﻏﺎﻟﻴﻪ : ﺗﻤﺎﻡ .. ﻛﻮﻳﺲ .. ﺧﻠﻴﻜﻦ ﻫﻨﻰ ﺍﻟﻨﺎﺱ ﻗﺮﻳﺐ ﻳﺠﻮﺍ ﺍﺳﺘﻘﺒﻠﻮﻫﻢ ..
ﺩﻻﻝ ﻭﺭﺑﺎﺏ ﻭﺭﺍﻧﻴﺎ : ﺑﺎﻫﻲ ..
ﺩﻻﻝ ﻛﺎﻧﺖ ﻻﺑﺴﻪ ﻗﻔﻄﺎﻧﻬﺎ ﺍﻟﻤﻐﺮﺑﻲ ﺍﻷﺑﻴﺾ ﺍﻟﻠﻲ ﻟﺒﺴﺎﺗﻪ ﻗﺒﻞ ﻓﻲ ﻣﻨﺎﺳﺒﺔ ﺗﺮﻗﻴﺔ ﺭﺍﺟﻠﻬﺎ ..
ﻭﺭﺑﺎﺏ ﻟﺒﺴﺖ ﻗﻔﻄﺎﻥ ﻣﺸﻤﺎﺷﻲ ﻗﺼﻴﺮ ﻟﻠﺮﻛﺒﻪ ﺑﺪﻭﻥ ﺍﻛﻤﺎﻡ ﻧﺎﻋﻢ ﻭﺣﻠﻮ .. ﻭﺭﺍﻧﻴﺎ ﻗﻔﻄﺎﻥ ﺍﺧﻀﺮ ﻗﺼﻴﺮ ﺑﺴﻴﺮ ﻭﺍﺣﺪ ..
ﻭﻛﻠﻬﻢ ﻛﺎﻧﻮﺍ ﺣﻠﻮﺍﺕ ﺑﺎﻟﻤﺮﺓ ...
ﺍﻟﺤﻔﻠﻪ ﻣﺶ ﺣﺘﺴﺘﻤﺮ ﻫﻠﺒﻪ ﺳﺎﻋﺘﻴﻦ ﺑﺎﻟﻜﺜﻴﺮ ﻟﻬﺎﻟﺴﺒﺐ ﻳﻌﺘﺒﺮ ﻳﻮﻡ ﺍﻹﺭﺑﻌﺎﺀ ﺍﻫﻢ ﻳﻮﻡ ..
💕💕💕💕💕💕💕💕
ﻃﺒﻌﺎ ﺍﻟﻮﻻﺩ ﺍﻟﻠﻲ ﻫﺪﺍ ﺭﻛﺐ ﺳﻴﺎﺭﺗﻪ ﻭﻟﺤﻘﻮﻫﻢ ...
ﻭﺻﻞ ﻫﺎﻧﻴﺒﺎﻝ ﻟﻠﻤﺰﻳﻦ ..
ﻧﺰﻟﺖ ﻛﻔﺎﻳﻪ ﻭﺧﺸﺖ ﺩﺍﺧﻞ ..
ﺧﻼﻝ 5 ﺩﻗﺎﻳﻖ ..
ﻃﻠﻌﻮﺍ ﻫﻲ ﻭﻟﻄﻴﻔﻪ ﺑﺤﻤﻴﺪﻩ ..
ﻟﻤﺎ ﺷﺎﻓﻬﺎ ﻫﺎﻧﻴﺒﺎﻝ ﻛﻴﻒ ﻣﺘﻐﻄﻴﻪ ﺑﺎﻟﻜﺎﺏ ﺍﻷﺑﻴﺾ ﻭﻻﺑﺴﻪ ﺍﻷﺑﻴﺾ ﺍﺑﺘﺴﻢ ﻣﻦ ﻗﻠﺒﻪ ..
ﻧﺰﻝ ﻣﻦ ﺍﻟﺴﻴﺎﺭﺓ ﻭﻃﻮﻝ ﺟﺎﻫﺎ ﻭﺳﺎﻋﺪﻫﻢ ﺑﺶ ﻳﺮﻛﺒﻮﻫﺎ ..
ﺭﻛﺐ ﻣﻦ ﺍﻟﺨﻠﻒ ﻭﻫﻮ ﻃﺒﺲ ﺩﺧﻠﻠﻬﺎ ﻃﺮﻑ ﺍﻟﻜﺎﺏ ﺩﺍﺧﻞ .. ﻭﺳﻜﺮ ﺍﻟﺒﺎﺏ ..
ﺭﻛﺒﺖ ﺣﺪﺍﻫﺎ ﻣﻦ ﺍﻟﺠﻬﺔ ﺍﻟﺘﺎﻧﻴﻪ ﻟﻄﻴﻔﻪ ...
ﺭﺟﻊ ﻫﻮ ﺭﻛﺐ ﻭﺭﻛﺒﺖ ﺟﻨﺒﻪ ﻛﻔﺎﻳﻪ ..
ﻭﺗﺤﺮﻙ ﻃﻮﻝ ..
ﻭﻗﻒ ﺑﻴﻬﻢ ﻉ ﺍﻟﻤﺼﻮﺭ ...
ﻧﺰﻟﻮﺍ ﻛﻠﻬﻢ ...
ﺍﺑﺘﺴﻤﺖ ﺣﻤﻴﺪﻩ ﺑﻔﺮﺡ ﻟﻤﺎ ﻋﺮﻓﺖ ﺍﻧﻪ ﻳﺒﻴﻬﺎ ﺗﺼﻮﺭ ..
ﺧﺸﻮﺍ ﻛﻠﻬﻢ ...
ﻭﺻﻮﺭﺕ ﺑﺮﻭﺣﻬﺎ ﺍﻛﺜﺮ ﻣﻦ ﻟﻘﻄﻪ ... ﺑﻌﺪﻳﻦ ﺻﻮﺭﺕ ﻣﻊ ﺍﺧﺘﻬﺎ ﻭﻟﻄﻴﻔﻪ ...
ﻃﻠﻌﺖ ﻛﻔﺎﻳﻪ ﻟﺨﻮﻫﺎ ﻭﻗﺎﻟﺖ ﺑﺈﺑﺘﺴﺎﻣﻪ : ﺗﺨﺶ ﺗﺼﻮﺭ ﻣﻌﺎﻫﺎ .
ﺍﺑﺘﺴﻢ ﻫﺎﻧﻴﺒﺎﻝ ﻭﻫﺰ ﺭﺍﺳﻪ ﺑﺈﻳﺠﺎﺏ ..
ﻛﻔﺎﻳﻪ ﺑﻀﺤﻜﻪ : ﺭﺍﺟﻲ ﺷﻮﻳﻪ ..
ﺧﺸﺖ ﻟﺒﺴﺘﻬﺎ ﺍﻟﻜﺎﺏ ﻉ ﻛﺘﺎﻓﻬﺎ ..
ﺣﻤﻴﺪﻩ : ﺑﻴﺼﻮﺭ ﻣﻌﺎﻱ ..
ﻛﻔﺎﻳﻪ ﺍﺑﺘﺴﻤﺖ ﻭﻫﺰﺕ ﺭﺍﺳﻬﺎ ﺑﺈﻳﺠﺎﺏ ..
ﺍﺑﺘﺴﻤﺖ ﺣﻤﻴﺪﻩ ﺑﻔﺮﺡ ..
ﻛﻔﺎﻳﻪ : ﺧﺶ ﻫﻨﻴﻮﻩ ..
ﺧﺶ ﻭﻃﻠﻖ ﺍﻟﺴﻼﻡ ..
ﺍﺑﺘﺴﻤﺖ ﺍﻟﻤﺼﻮﺭﺓ ﻟﻤﺎﺷﺎﻓﺘﻪ ..
ﻭﻗﻒ ﺟﻨﺐ ﺣﻤﻴﺪﻩ ﺷﺒﺤﻠﻬﺎ ﻭﺍﺑﺘﺴﻢ ﻭﻗﺎﻝ : ﻃﻠﻌﺘﻲ ﺳﻤﺤﻪ ﻳﺎﺻﺒﺎﺡ ..
ﺿﺤﻜﺖ ﺣﻤﻴﺪﻩ ..
ﻭﺷﻮﻳﻪ ﺑﺪﺕ ﺍﻟﻤﺼﻮﺭﺓ ﺗﺼﻮﺭ ﻓﻴﻬﻢ ..
ﺣﺎﻭﻝ ﻳﺤﺎﻓﻆ ﻉ ﺍﺑﺘﺴﺎﻣﺘﻪ ﻉ ﻗﺪ ﻣﺎﻳﻘﺪﺭ ﻟﻤﺎ ﺷﺎﻑ ﺍﻟﻤﺼﻮﺭﺓ ﻭﺧﻄﺮﺕ ﻋﻠﻴﻪ ﺷﺠﺮﺓ ﺍﻟﺪﺭ ..💓🍃
🍁🍁🍁🍁🍁🍁
ﻓﻲ ﺍﻟﺨﻴﻤﻪ ..
ﺍﻟﻨﺎﺱ ﺑﺪﻭﺍ ﻳﺠﻮﺍ ﻭﺑﺪﺕ ﺗﺘﻌﺒﺎ ﺍﻟﺨﻴﻤﻪ ...
ﺯﻳﻨﺐ ﻛﺎﻧﺖ ﻭﺍﻗﻔﻪ ﻭﺗﺸﺮﻑ ﻋﻠﻴﻬﻢ ..
ﻛﺎﻧﺖ ﻻﺑﺴﻪ ﻗﻔﻄﺎﻥ ﻟﻮﻧﻪ ﻳﺎﺟﻮﺭﻱ ﺣﻠﻮ ﻫﻠﺒﻪ ﻭﺳﻴﻮﺭﺓ ﺳﻼﺳﻞ ..
ﻧﻌﻴﻤﻪ ﻻﺑﺴﻪ ﺯﻱ ﺍﻟﺒﺪﻟﻪ ﺍﻟﻬﻨﺪﻳﻪ ﻟﻮﻧﻬﺎ ﺣﻤﺮﺍ ..
ﻭﺍﻟﺰﻭﺯ ﻃﺎﻟﻌﺎﺕ ﻻﻗﻮﺓ ﺍﻻﺑﺎﻟﻠﻪ ..
ﻉ ﺧﺸﺔ ﺳﻌﻴﺪﻩ ﻭﺧﻮﺍﺗﻬﺎ ...
ﻛﺎﻧﺖ ﻗﻨﺒﻠﺔ ﺍﻟﺤﻔﻠﻪ ..
ﻻﺑﺴﻪ ﺑﺪﻟﻪ ﻗﻮﻧﻪ ﻗﺼﻴﺮﺓ ﻭﺍﻟﺸﻌﺮ ﻗﺼﻴﺮ ﻣﺼﺒﻮﻍ ﺑﺎﻷﺻﻔﺮ ﻭﻣﺎﺩﺍﻳﺮﺍﺗﻪ ﻟﻮﻳﺎﺕ ﻭﺍﻟﻤﻜﻴﺎﺝ ﺟﺮﻱﺀ ﻛﺎﻧﺖ ﻭﺍﺍﺍﺍﺍﻭ ..
ﺯﻳﻨﺐ ﻏﺎﺭﺕ ﻣﻨﻬﺎ ..
ﻭﻧﻌﻴﻤﻪ ﺍﻧﺪﻫﺸﺖ ﻓﻴﻬﺎ ﺍﻭﻝ ﻣﺮﺓ ﺗﻄﻠﻊ ﻫﻜﻲ ...
ﻭﺣﺘﻰ ﺍﻟﻨﺎﺱ ﻋﺠﺒﺘﻬﻢ ..
ﺩﻻﻝ : ﺣﻴﻴﻲ ﺳﻌﻴﺪﻩ ﻭﻟﺖ ﺍﺣﻠﻰ ﻣﻨﻲ .
ﺿﺤﻜﺖ ﺭﺍﻧﻴﺎ ..
ﺭﺑﺎﺏ ﺑﺼﺪﻣﻪ : ﻋﻄﻴﻬﺎ ﻣﺮﺽ ..
ﻧﻮﺭ : ﺍﻟﺤﻖ ﻳﺎﺭﺑﻲ ﺣﻠﻮﺓ ﻭﻣﺘﻐﻴﺮﻩ ..
ﺭﻓﻘﻪ : ﺟﻤﻴﻠﻪ ﺑﺠﺪ ..
ﺭﺯﺍﻥ ﺗﺸﻮﻑ ﻷﻣﻬﺎ ﻭﻣﺒﺘﺴﻤﻪ ﺑﺮﻓﻌﺔ ﺣﺎﺟﺐ ﺑﻌﺪﻳﻦ ﺷﺎﻓﺖ ﻟﻌﻤﺎﺗﻬﺎ ﻛﻴﻒ ﻣﺼﺪﻭﻣﺎﺕ ﺿﺤﻜﺖ ..
ﺳﻤﻌﻮﺍ ﺻﻮﺕ ﺍﻟﻜﻼﻛﺴﺎﺕ ..
ﻃﻮﻝ ﻣﺸﻮﺍ ﺧﺸﻮﺍ ﺩﺍﺧﻞ ..
ﻓﻲ ﺍﻟﻜﻮﺟﻴﻨﻪ ..
🍁 ﻏﺎﻟﻴﻪ
ﺗﺼﺐ ﻓﻲ ﺍﻟﻌﺼﻴﺮ ﻭﻗﻠﺒﻬﺎ ﺍﻧﻘﺒﺾ ﻭﺍﻟﺪﻣﻌﻪ ﻃﺎﺣﺖ ﻃﻮﻝ ..
💕💕💕
ﺍﻟﻜﻼﻛﺴﺎﺕ ﻗﻠﺒﻮﺍ ﺍﻟﺪﻧﻴﺎ ﻓﻲ ﺍﻟﻘﻄﻌﻪ ..
ﻧﺰﻟﻮﺍ ﺣﻤﻴﺪﻩ ﻭﺩﺧﻠﻮﻫﺎ ﺩﺍﺧﻞ ﻭﻫﻤﺎ ﻳﺪﻳﺪﺷﻮﺍ ﻓﻴﻬﺎ ..
ﺧﺸﺖ ﻟﻠﺼﺎﻟﻪ ..
ﺧﻮﺍﺗﻬﺎ ﻗﺎﻣﻮﺍ ﻛﺎﺑﻬﺎ ﻭﺍﻧﺬﻫﻠﻮﺍ ﺑﻴﻬﺎ ﻭﻋﻴﻮﻧﻬﻢ ﺗﻌﺒﻮﺍ ﺩﻣﻮﻉ ..
ﺩﻻﻝ : ﺧﻮﻳﻠﻪ 💓..
ﻧﻮﺭ : ﻣﻴﺪﺍ ﺗﻬﺒﺒﺒﺒﻠﻲ 💕
ﺭﺑﺎﺏ : ﻋﺴﺴﺴﻞ ﻳﺎﻗﻠﺒﻲ ﻋﺴﺴﺴﻞ 💕
ﺭﺍﻧﻴﺎ : ﻣﺎﺷﺎﺀ ﺍﻟﻠﻪ 💕
ﺭﻓﻘﻪ : ﻭﺍﺍﺍﺍﻭ ﻭﺍﺍﺍﺍﻭ ..
ﺿﺤﻜﺖ ﺣﻤﻴﺪﻩ ﻋﻠﻴﻬﻢ ﻭﺷﺒﺤﺖ ﻟﺮﺯﺍﻥ ﻟﻘﺖ ﻋﻴﻮﻧﻬﺎ ﻣﻌﺒﻴﺎﺕ ﺩﻣﻮﻉ ..
ﺣﻤﻴﺪﻩ : ﻭﺍﻧﺘﻲ ﻳﺎﺷﻨﻌﺐ ..
ﺭﺯﺍﻥ : ﺣﻠﻮﺓ ﺗﻬﺒﻠﻲ .. ﻭﺿﺤﻜﺖ ..
ﺟﺖ ﺯﻳﻨﺐ ﺗﺠﺮﻱ ﺑﺎﻟﺒﺨﺎﺭﻩ ﻭﻗﻌﺪﺕ ﺗﺒﺨﺮ ﻓﻴﻬﺎ ..
ﺑﻌﺪﻳﻦ ﻣﺸﻮﻫﺎ ﻭﻗﻔﺖ ﻗﺒﺎﻟﺔ ﺍﻟﻤﻜﻴﻒ ..
" ﻋﻮﻳﻠﻪ ﺑﻨﺨﺸﻮﺍ ﺭﻩ "
ﺍﻟﺒﻨﺎﺕ ﻫﺮﺑﻮﺍ ﻟﻠﺪﺍﺭ ﻭﺧﺸﻮﺍ ﺻﻜﺮﻭﺍ ﻉ ﺍﺭﻭﺍﺣﻬﻢ ..
ﻭﻗﻌﺪﻭﺍ ﻧﻌﻴﻤﻪ ﻭﻟﻄﻴﻔﻪ ﻭﻛﻔﺎﻳﻪ ﻭﺍﻟﺒﻨﺎﺕ ﺍﻟﺼﻐﺎﺭ ..
ﻭﺯﻳﻨﺐ ﺣﻄﺖ ﺣﺎﺟﻪ ﻉ ﻛﺘﺎﻓﻬﺎ ﻭﺟﺘﻬﻢ ..
ﺧﺸﻮﺍ ﺍﻟﻮﻻﺩ ..
ﻋﻤﺎﺩ ﻭﺣﻤﺰﺓ ﻭﺭﻣﺰﻱ ﻭﻣﺎﻟﻚ ﻭﻣﺮﻭﺍﻥ ﻭﺳﻨﺪ ﻭﺍﻭﻳﺲ ﻭﻗﻴﺲ ..
ﺍﻟﺸﺒﺎﺏ ﻛﻠﻬﻢ ﻟﺒﺴﻮﺍ ﺍﻓﺮﻧﺠﻲ ﻭﺍﺗﻔﻘﻮﺍ ﻉ ﻟﻮﻥ ﻭﺍﺣﺪ ..
ﺳﻮﺭﻳﻪ ﻗﻬﻮﻳﻪ ﻏﺎﻣﻘﻪ ﻭﺳﺮﻭﺍﻝ ﺍﺳﻮﺩ ..
ﺑﺮﻏﻢ ﺍﺧﺘﻼﻑ ﺍﻟﺘﻔﺼﻴﻼﺕ ﻓﻲ ﺍﻟﺴﻮﺍﺭﻱ ﺑﺲ ﻛﺎﻧﻮﺍ ﻳﻬﺒﻠﻮﺍ ﻣﻊ ﺑﻌﺾ ..
ﻋﻤﺎﺩ ﺗﻤﻴﺰ ﻋﻠﻴﻬﻢ ﺍﻧﻪ ﺧﺪﻱ ﺑﺪﻟﻪ ﺳﻮﺩﺍ ﺷﺎﻣﻮﺍ ﻭﺳﻮﺭﻳﻪ ﻗﻬﻮﻳﻪ ..
ﻭﺟﺎﻛﺔ ﺍﻟﺒﺪﻟﻪ ﻓﻴﻬﺎ ﻟﻘﻄﻪ ﻣﻤﻴﺰﺓ ﻉ ﻛﺘﺎﻓﻬﺎ ﺯﻱ ﺍﻟﺮﺗﺒﻪ ﻣﺘﺎﻉ ﺍﻟﺒﺪﻟﻪ ﺍﻟﻌﺴﻜﺮﻳﻪ .. ﻭﻓﻴﻬﺎ ﺯﻱ ﺍﻟﺒﺮﻭﺵ ﻉ ﺷﻜﻞ ﻭﺟﻪ ﺍﺳﺪ ﻟﻮﻧﻪ ﺫﻫﺒﻲ ..
ﻛﺎﻥ ﺧﻴﺎﺍﺍﺍﺍﺍﺍﺍﺍﺍﺍﺍﺍﻝ ...
ﻓﻴﺪﻩ ﻛﺎﻣﻴﺮﺍ ..
ﺯﻳﻨﺐ : ﺍﻟﻠﻬﻢ ﺻﻞ ﻉ ﺍﻟﻨﺒﻲ ..
ﻧﻌﻴﻤﻪ : ﺭﺑﻲ ﻳﺤﻔﻈﻜﻢ ﻳﺎﺭﺏ ..
ﺣﻤﻴﺪﻩ ﺑﻀﺤﻜﻪ : ﺳﻠﻢ ﻓﺮﺳﺎﻧﻲ 💕..
ﺿﺤﻜﻮﺍ ﺑﺈﺣﺮﺍﺝ
ﻋﻤﺎﺩ ﺑﻀﺤﻜﻪ ﻭﻫﻮ ﻳﺤﻚ ﻓﻲ ﻣﻘﺪﻣﺔ ﺍﻧﻔﻪ : ﻣﺮﺕ ﺧﺎﻟﻲ ﻗﺎﻟﻮﺍ ﺗﻌﺮﻓﻲ ﺗﺼﻮﺭﻱ ..
ﻟﻄﻴﻔﻪ ﺑﻀﺤﻜﻪ : ﺍﻟﻠﻲ ﻗﺎﻟﻚ ﻣﺎﻛﺬﺑﺶ ..
ﻗﺮﺑﺖ ﻣﻨﻪ ﺧﺪﺕ ﺍﻟﻜﺎﻣﻴﺮﺍ ..
ﺟﻮ ﻭﻗﻔﻮﺍ ﺣﺪﺍﻫﺎ ﺯﻳﻨﺐ ﻭﻛﻔﺎﻳﻪ ﻭﻧﻌﻴﻤﻪ ..
ﻭﺍﻟﺸﺒﺎﺏ ﺟﻮ ﺣﺪﺍ ﺣﻤﻴﺪﻩ ﻣﻦ ﺍﻟﺠﻴﻬﺘﻴﻦ ..
ﻭﺍﻟﺼﻐﺎﺭ ﺟﻮ ﻗﺪﺍﻣﻬﺎ ..
ﻛﻴﻒ ﺟﺎﻳﻪ ﺑﺘﺼﻮﺭ ..
" ﺗﻲ ﻭﺳﻌﻮ ﻭﺳﻌﻮﺍ .."
ﻗﺪﻡ ﻃﻮﻝ ﻭﺩﻑ ﻋﻤﺎﺩ ﻭﻭﻗﻒ ﺟﻨﺐ ﺣﻤﻴﺪﻩ ﻭﺣﻂ ﻳﺪﻩ ﻉ ﻛﺘﻔﻪ ..
ﻋﻤﺮ : ﻫﻲ ﺻﻮﺭﻱ ﻳﺎﻟﻄﻴﻔﻪ ..
ﺿﺤﻜﻮﺍ ﻛﻠﻬﻢ ..
ﺣﻤﻴﺪﻩ ﺑﻀﺤﻜﻪ : ﻣﺘﻠﻒ ..
ﻋﻤﺮ ﺷﺒﺤﻠﻬﺎ ﺑﺮﺑﻊ ﻋﻴﻦ : ﻭﻟﻴﺘﻲ ﻭﺻﺎﺭ ﻣﻨﻚ ﻭﻃﻠﻌﺘﻲ ﺳﻤﺤﻪ ..
ﺣﻤﻴﺪﻩ ﺑﻀﺤﻜﻪ : ﺣﻴﻮﺍﻥ ..
ﻫﻮ ﺿﺤﻚ ﻭﺷﺒﺢ ﺍﻟﻘﺪﺍﻡ : ﻫﻲ ﻳﺎﻟﻄﻴﻔﻪ ﻫﻲ ﻣﻌﺎﺵ ﻓﻲ ﻭﻗﺖ ..
ﺿﺤﻜﻮﺍ ..
ﺑﻌﺪﻳﻦ ﺳﺎﻭﻭﺍ ﻭﻗﻔﺘﻬﻢ ..
ﻭﺑﺪﺕ ﺗﺼﻮﺭ ﻟﻄﻴﻔﻪ ..
ﺭﻓﻘﻪ ﻛﺎﻧﺖ ﺗﺸﻮﻑ ﻟﻤﺮﻭﺍﻥ ﺧﻄﺮ ﻋﻠﻴﻬﺎ ﻣﻮﻗﻒ ﺍﻟﻤﻜﻨﺴﻪ ﺿﺤﻜﺖ ..
ﻭﺭﺯﺍﻥ ﺗﺸﺒﺢ ﻟﻌﻤﺎﺩ ﻣﻦ ﻃﺮﻑ ﻋﻴﻨﻬﺎ ..
ﺻﻮﺭﺗﻬﻢ ﻟﻄﻴﻔﻪ ..
ﻋﻤﺎﺩ ﺍﺷﺮ ﺑﻴﺪﻩ : agein agein
ﺿﺤﻜﺖ ﻟﻄﻴﻔﻪ ﻭﺻﻮﺭﺗﻬﻢ ﻣﻦ ﺟﺪﻳﺪﻩ ..
ﺑﻌﺪ ﻛﻤﻠﺖ ﺑﻌﺪﻭﺍ ﺍﻟﻮﻻﺩ ..
ﻭﺟﻲ ﻋﻤﺎﺩ ﻟﻠﻄﻴﻔﻪ : ﺻﺤﻴﺘﻲ ﻣﺮﺕ ﺧﺎﻟﻲ ﺑﻌﺪﻳﻦ ﻭﺯﻉ ﻧﻈﺮﻩ ﻋﻠﻴﻬﻢ ﻭﻗﺎﻝ ... ﻫﻴﺎ ﺑﺮﻭﺍ ﺣﺪﺍﻫﺎ ..
ﻣﺸﻮﺍ ﺧﺎﻻﺗﻪ ﻭﺍﻣﻪ ﻭﻣﺮﺕ ﺧﺎﻟﻪ ﻭﻗﻔﻮﺍ ﺣﺪﺍﻫﺎ ..
ﺷﺒﺢ ﻟﺮﺯﺍﻥ ﻭﺭﻓﻘﻪ : ﺣﺘﻰ ﺍﻧﺘﻢ ﻳﺎﺳﻨﺎﻓﺮ ..
ﺭﻓﻘﻪ ﺍﺑﺘﺴﻤﺖ ﺭﺯﺍﻥ ﻣﺎﺑﺘﺶ ﺗﻌﺒﺮﻩ ..
ﻣﺸﻮﺍ ﻫﻲ ﻭﺭﻓﻘﻪ ﻭﻗﻔﻮﺍ ﺣﺪﺍ ﻋﻤﺘﻬﻢ ..
ﻣﺮﻭﺍﻥ ﺷﺒﺢ ﻟﺮﻓﻘﻪ ... ﻻﺇﺭﺍﺩﻳﺎ ﺍﺑﺘﺴﻢ ..
ﻋﻤﺎﺩ ﻛﻴﻒ ﺑﻴﺒﺪﺍ ﻳﺼﻮﺭ : ﺍﺿﺤﻜﻲ ﻳﺎﻟﻔﻌﻪ ..
ﻓﻨﺼﺖ ﺭﺯﺍﻥ ﻭﻛﻠﻬﻢ ﺿﺤﻜﻮﺍ ﺑﺎﻟﺬﺍﺕ ﺯﻳﻨﺐ ..
ﺭﺯﺍﻥ ﻃﺎﺭﺗﻠﻬﺎ : ﻣﻌﺎﺵ ﻧﺒﻲ .. ﻭﻛﻴﻒ ﺟﺎﻳﻪ ﺑﺘﻤﺸﻲ ﺷﺪﺗﻬﺎ ﻛﻔﺎﻳﻪ ..
ﻛﻔﺎﻳﻪ : ﺗﻌﺪﻟﻲ ﻋﻠﻴﻪ ﺍﻧﺘﻲ ..
ﺭﺯﺍﻥ ﺩﻣﻮﻋﻬﺎ ﻧﺰﻟﻮﺍ ..
ﻛﻔﺎﻳﻪ ﺷﺒﺤﺘﻠﻪ : ﻣﺒﺮﺩﻙ ..
ﻫﻮ ﺿﺤﻚ ﺑﺮﻓﻌﺔ ﺣﻮﺍﺟﺐ ﻭﺣﻚ ﻟﺤﻴﺘﻪ ..
ﻣﺎﻟﻚ : ﻣﺎﺩﻭﺭﻳﺸﻲ ﻳﺎﺭﺯﺍﻥ ﺩﻳﻤﺎ ﻫﻜﻲ ﻫﻮ ..
ﻋﻤﺮ : ﻓﺮﺧﻪ ﺭﺯﻭﻧﻪ ﺗﺒﻴﻨﻲ ﻧﻀﺮﺑﻪ .
ﺍﻟﺘﻔﺘﺖ ﻟﻌﻤﻬﺎ ﻭﻗﺎﻟﺖ ﺑﺤﺪﻩ؛ﺍﻳﻪ ..
ﻣﺸﺎﻟﻪ ﻋﻤﺮ ﺣﺎﻭﻃﻪ ﻣﻦ ﺭﻗﺒﺘﻪ ﻭﺷﺪ ﻋﻠﻴﻬﺎ .
ﻭﻋﻤﺎﺩ ﻣﻴﺖ ﺑﺎﻟﻀﺤﻚ ..
ﻋﻤﺮ : ﻧﺰﻳﺪ
ﺭﺯﺍﻥ ﺑﻐﻞ : ﺍﻳﻪ ..
ﺣﻤﻴﺪﻩ ﺑﻀﺤﻜﻪ : ﺣﺼﻠﺘﻬﺎ ﻓﻴﻪ ﻓﺮﺻﻪ ..
ﺿﺤﻜﻮﺍ ..
ﺩﺍﺧﻞ ﻓﻲ ﺍﻟﺪﺍﺭ ..
ﺭﺑﺎﺏ : ﻛﺎﻥ ﻧﺸﺪﻫﺎ ﻧﻌﺠﻨﻬﺎ ..
ﺩﻻﻝ ﻭﻫﻲ ﺗﻤﺮﻭﺡ ﻉ ﺭﻭﺣﻬﺎ : ﺳﺨﻨﺖ ..
ﻣﺸﺖ ﺭﺍﻧﻴﺎ ﻟﻠﻤﻜﻴﻒ ﻓﺘﺤﺎﺗﻪ ..
ﺑﺮﺍ ..
ﻃﻠﻖ ﻋﻤﺮ ﻋﻤﺎﺩ ..
ﻭﺭﺟﻌﺖ ﺭﺯﺍﻥ ﻭﻗﻔﺖ ﻓﻲ ﻣﻜﺎﻧﻬﺎ ..
ﻭﻋﻤﺎﺩ ﻗﻌﺪ ﻳﻤﺴﺪ ﻓﺮﻗﺒﺘﻪ ﻭﻫﻮ ﻳﻀﺤﻚ .. ﺷﺒﺤﻠﻬﺎ ..
ﺷﻘﻠﺒﺖ ﻋﻴﻮﻧﻬﺎ ..
ﺯﺍﺩ ﺿﺤﻚ ..
ﺑﻌﺪﻳﻦ ﺑﺪﻱ ﻳﺼﻮﺭ ﻓﻴﻬﻢ ...
ﺧﺪﺍﻟﻬﻢ ﻟﻘﻄﺘﻴﻦ ..
ﺯﻳﻨﺐ ؛ﻫﻲ ﺧﻼﺹ ﻃﻠﻌﻮﻫﺎ .. ﻭﺍﻧﺘﻢ ﺍﺳﺘﻔﺮﺗﺤﻮﺍ ..
ﺿﺤﻜﻮﺍ ﺍﻟﻮﻻﺩ ﻭﻃﻠﻌﻮﺍ ﻛﻠﻬﻢ ...
ﻛﻔﺎﻳﻪ : ﺍﻓﺮﺍﺝ ..
ﻃﻠﻌﻮﺍ ﺍﻟﺒﻨﺎﺕ ﻣﻦ ﺍﻟﺪﺍﺭ ﻭﻫﻤﺎ ﻳﻀﺤﻜﻮﺍ ..
ﺧﺪﻭﺍﺭﺍﻧﻴﺎ ﺩﺭﺑﻮﻛﻪ .. ﻭﻧﻮﺭ ﺩﺭﺑﻮﻛﻪ
ﻭﺟﻮﺍ ﻗﺪﺍﻡ ﺧﺎﻟﺘﻬﻢ ..
ﺣﻮﻟﻮﺍ ﺧﻮﺍﺗﻬﺎ ﺍﻟﻜﺎﺏ ﻣﻦ ﻋﻠﻴﻬﺎ ..
ﻭﺑﺪﻭﺍ ﻳﺰﻓﻮﺍ ﻓﻴﻬﺎ ﻭﺭﺍﻧﻴﺎ ﺩﺭﺑﻚ ﻓﻲ ﺩﺭﺑﻮﻛﺔ ﺍﻟﺰﻓﻪ ..
ﻭﻣﻌﺎﻫﺎ ﻧﻮﺭ ﺑﺎﻟﺪﺭﺑﻮﻛﻪ ﺗﺎﻧﻴﻪ ..
ﻃﻠﻌﺖ ﻣﻦ ﻓﻢ ﺍﻟﺒﻮﺍﺑﻪ ...
ﻭﻛﻤﻠﻮﺍ ﺑﻴﻬﺎ ﻟﻠﺨﻴﻤﻪ ...
" ﻃﺒﻌﺎ ﻣﻤﺮ ﻓﻢ ﺍﻟﺒﻮﺍﺑﻪ ﺟﻲ ﻻﺻﻖ ﻓﻲ ﺣﻮﺵ ﻣﻴﻼﺩ ﻟﻬﺪﺍ ﻳﻌﺘﺒﺮﻭﺍ ﻣﺪﺭﻗﻴﻦ ﻉ ﺣﻮﺵ ﻋﻤﻬﻢ ..
ﺍﻣﺎ ﺍﺧﺮ ﻣﻤﺮ ﻓﻢ ﺍﻟﺒﻮﺍﺑﻪ ﻣﺘﻐﻄﻲ ﺑﻘﻴﻄﻮﻥ "..
ﺍﻟﻤﻬﻢ ..
ﻭﺻﻠﻮﺍ ﺑﻴﻬﺎ ﺍﻟﺪﺍﺧﻞ ..
ﻭﺑﺪﺕ ﺍﻟﺰﻏﺎﺭﻳﻂ ..
ﻛﻠﻬﻢ ﺍﻧﺒﻬﺮﻭﺍ ﺑﻴﻬﺎ ﻣﺘﻐﻴﺮﻩ ﻫﻠﺒﻪ ...
ﻗﻌﻤﺰﻭﺍ ﻉ ﺍﻟﻜﻮﺷﻪ ﻭﻗﻌﺪﻭﺍ ﻳﺪﺭﺑﻜﻮﺍ ﻭﻳﻐﻨﻮﺍ ﻋﻠﻴﻬﺎ ..
🍁 ﻗﺪﺍﻡ ﻓﻢ ﺍﻟﺒﻮﺍﺑﻪ ..
ﻛﺎﻧﺖ ﻏﺎﻟﻴﻪ ﻭﺍﻗﻔﻪ ﺗﺒﻜﻲ ﺣﺎﻃﻪ ﻃﺮﻑ ﻣﺤﺮﻣﺘﻬﺎ ﻓﻲ ﻓﻤﻬﺎ ﺑﺶ ﻣﺎﻳﻄﻠﻌﺶ ﺻﻮﺕ ﻋﺒﺮﺗﻬﺎ ﻭﺗﺒﻜﻲ ﺑﺤﺮﻗﻪ ﺷﺪﻳﺪﻩ ﻭﻫﻲ ﺗﺸﻮﻑ ﻓﻴﻬﺎ ... ﺑﻌﺪﻳﻦ ﻃﻮﻝ ﺧﺸﺖ ﻟﻠﻜﻮﺟﻴﻨﻪ ..
ﻗﻌﺪﺕ ﺗﻤﺴﺢ ﻓﺪﻣﻮﻋﻬﺎ ﻭﺗﻘﻮﻝ : ﻣﻌﺎﺵ ﻓﻲ ﻭﻗﺖ ﻣﻌﺎﺵ ﻓﻲ ﻭﻗﺖ ﺧﻞ ﻧﻮﺗﻮﺍ ﺍﻟﻌﺸﻲ .. ﻭﻣﺸﺖ ﻣﻦ ﺍﻟﺠﻬﺔ ﺍﻟﺘﺎﻧﻴﻪ ﻟﻠﺤﻮﺵ ﺍﻟﻘﺪﻳﻢ .. 🍃
🍁🍁🍁🍁🍁
ﺑﻌﺪ ﺷﻮﻳﻪ ..
ﻣﺸﻮﺍ ﻟﺨﻮﺍﺕ ﻟﻠﺤﻮﺵ ﺍﻟﻘﺪﻳﻢ ﻭﻣﻌﺎﻫﻢ ﺭﺍﻭﻳﻪ ﻭﺭﻳﻼ ﻳﻮﺗﻮﺍ ﻓﻲ ﺍﻟﻌﺸﻲ ... ﺑﺈﺷﺮﺍﻑ ﻧﻌﻴﻤﻪ ..
ﻭﻭﺗﻮﺍ ﻛﻞ ﺷﻲ
ﻭﺑﺪﻭﺍ ﺍﻟﺠﺎﺭﺍﺕ ﺑﻌﺒﺎﻳﺎﺗﻬﻢ ﻳﻄﻠﻌﻮﺍ ﻓﻲ ﺍﻟﺼﻔﺮ ﻭﻳﻮﺻﻠﻮﺍ ﻓﻴﻬﻢ . ﻟﻠﺨﻴﻤﻪ ﻭﻣﻦ ﺿﻤﻨﻬﻢ ﻣﺮﺍﻡ ﺍﻟﻠﻲ ﺗﺨﺪﻡ ﺑﻘﻠﺐ ﻭﺭﺏ ﻫﻲ ﻫﻜﻲ ﻓﻲ ﻛﻞ ﻣﻨﺎﺳﺒﺎﺕ ﺍﻟﻘﺒﻴﻠﻪ ﻣﻌﺮﻭﻓﻪ ﺧﺪﻭﻣﻪ ﻭﻧﺎﺷﻄﻪ ﻭﺻﺎﺣﺒﺔ ﻭﺍﺟﺐ ..
🍁 ﺗﻌﺸﻮﺍ ﺍﻟﻨﺎﺱ ...
ﻭﺧﻼﺹ ﺟﻲ ﺍﻟﻮﻗﺖ ﺍﻟﻠﻲ ﺑﺘﺮﻭﺡ ﻓﻴﻪ ﺍﻟﻌﺮﻭﺱ ﻟﺤﻮﺵ ﺭﺍﺟﻠﻬﺎ ..
ﺟﻮ ﺍﻫﻞ ﺍﻟﻌﺮﻳﺲ .. ﺯﻭﺯ ﻣﻦ ﺧﻮﺍﺗﻪ ﺑﺲ ... ﻭﺍﻟﺮﺟﺎﻟﻪ ﺑﺮﺍ .. ﺑﺲ ﺍﻟﻌﺮﻳﺲ ﻣﺎﺟﺎﺵ ..
ﻣﻦ ﻋﺎﺩﺍﺕ ﻫﺪﻳﻜﺎ ﺍﻟﻤﺪﻳﻨﻪ ﺍﻟﻠﻲ ﺟﺪﺕ ﻋﻠﻴﻬﻢ ..
ﺍﻥ ﺧﻮﻫﺎ ﻫﻮ ﺍﻟﻠﻲ ﻳﺮﻭﺡ ﺑﻴﻬﺎ ﺍﻭ ﺣﺪ ﻣﻦ ﻋﻴﻠﺘﻬﺎ ..
ﻭﻃﺒﻌﺎ ﺍﻟﺴﻴﺎﺭﺓ ﺍﻟﻠﻲ ﺑﺘﺮﻭﺡ ﺑﻴﻬﺎ ...
ﺣﻴﺴﻮﻗﻬﺎ ﺧﻠﻴﻔﻪ .. ﻭﺣﻴﻜﻮﻥ ﻣﻌﺎﻩ ﺣﻤﻴﺪ ..
💕 ﺯﻳﻨﺐ : ﺍﻟﺒﺴﻮﺍ ﺧﻮﻫﺎ ﺑﻴﺨﺶ ...
ﻟﺒﺴﻮﺍ ﺍﻟﻨﺴﺎﻭﻳﻦ ...
ﻃﻠﻌﺖ ﺯﻳﻨﺐ : ﻫﻴﺎ ﺣﻤﻴﺪ ..
ﺧﺶ ﺣﻤﻴﺪ ﻭﻛﺎﻥ ﻻﺑﺲ ﻋﺮﺑﻲ ﻭﻋﻠﻴﻪ ﺟﺮﺩ ..
ﻭﻛﺎﻧﻮﺍ ﻣﻮﻗﻔﻴﻦ ﺣﻤﻴﺪﻩ ﻭﻗﺘﻬﺎ ﻭﻫﻲ ﻻﺑﺴﻪ ﺍﻟﻜﺎﺏ ..
ﻭﺻﻞ ﻓﻴﻬﺎ : ﻣﺒﺎﺭﻙ ﻭﺍﻥ ﺷﺎﺀ ﺍﻟﻠﻪ ﺗﺘﻬﻨﻲ ..
ﺍﺑﺘﺴﻤﺖ ﺣﻤﻴﺪﻩ ﺑﺨﺠﻞ : ﺍﻟﻠﻪ ﻳﺒﺎﺭﻙ ﻓﻴﻚ .. ﺗﺴﻠﻢ ..
ﺟﺎﺗﻪ ﺯﻳﻨﺐ ﻋﻄﺎﺗﻪ ﺍﻟﻤﻘﺺ ..
ﺧﺪﺍﻩ ﺣﻤﻴﺪ ..
ﻭﻭﻟﺖ ﺯﻳﻨﺐ ﺣﺪﺍ ﺧﻮﺍﺗﻬﺎ ..
ﻟﻒ ﺣﻤﻴﺪ ﺍﻟﺠﺮﺩ ﻉ ﺣﻤﻴﺪﻩ ﻏﻄﺎﻫﺎ ﺑﻴﻪ ..
ﻭﺟﺒﺪ ﺷﻮﻳﻪ ﻣﻦ ﻗﺼﺘﻬﺎ ... ﻭﻗﺺ ﻣﻨﻬﺎ ...
ﻭﻫﺎﺩﻱ ﻭﺣﺪﻩ ﻣﻦ ﻋﺎﺩﺍﺕ ﻫﺪﻳﻜﺎ ﺍﻟﻤﺪﻳﻨﻪ ...
ﻧﻌﻴﻤﻪ ﺑﻀﺤﻜﻪ : ﻣﻴﻼﺩ ﺟﺪﻋﻨﻲ ..
ﻛﻔﺎﻳﻪ : ﻫﻬﻬﻬﻬﻪ ﻣﻴﻼﺩ ﺗﺨﺼﺼﻪ ﺗﺠﺪﻳﻊ .. ﻛﻠﻨﺎ ﺟﺪﻋﻨﺎ ..
ﺯﻳﻨﺐ ﻛﺎﻧﺖ ﺗﺴﻤﻊ ﻓﻴﻬﻢ ﻭﺍﻟﺪﻣﻮﻉ ﻋﺒﻮﺍ ﻋﻴﻮﻧﻬﺎ
⚡ ﻓﻼﺵ ﺑﺎﻙ ..
ﺳﻨﻪ ..1986
ﻏﻄﺎﻫﺎ ﺑﻄﺮﻑ ﺍﻟﺠﺮﺩ ..
ﻛﺎﻧﺖ ﻻﺑﺴﻪ ﺍﻟﺒﺪﻟﻪ ﺍﻟﻜﺒﻴﺮﺓ ..
ﺧﺪﻱ ﻃﺮﻑ ﻗﺼﺘﻬﺎ ﻭﻗﺎﻝ : ﺑﻨﺠﻴﻚ ﺩﻳﻤﺎ ﻏﺎﺩﻱ ﺭﺍﻧﻲ ﻭﺑﺪﻳﺮﻟﻲ ﺍﻟﻤﺤﺸﻲ ﺑﺮﺍﻙ ﻳﺎﺯﻳﻨﺐ ﺑﺮﺍﻙ ..
ﺿﺤﻜﺖ ﻭﺩﻣﻮﻋﻬﺎ ﻣﻌﺒﻴﺎﺕ ﻋﻴﻮﻧﻬﺎ ..
ﻣﻴﻼﺩ : ﺭﺍﻙ ﺗﻨﺴﻲ ﺧﻮﻙ ﻣﻴﻼﺩ ﻓﻲ ﻇﻬﺮﻙ ﺩﻳﻤﺎ ..
ﺷﺒﺤﺘﻠﻪ ﻟﻘﺖ ﻋﻴﻮﻧﻪ ﻣﻌﺒﻴﺎﺕ ﺩﻣﻮﻉ ﻭﻗﺺ ﺍﻟﻘﺼﻪ ..
⚡ ﺍﻟﻮﻗﺖ ﺍﻟﺤﺎﺿﺮ ..
ﻋﻴﻮﻧﻬﺎ ﺗﺤﺮﻛﻮﺍ ﻃﻮﻝ ﺟﻬﺔ ﺍﻟﻤﺮﺍﺓ ﺍﻟﻠﻲ ﻓﺮﻗﺖ ﺑﻴﻨﻬﺎ ﻭﺑﻴﻦ ﺧﻮﻫﺎ ﺍﻟﻠﻲ ﻛﺎﻥ ﺑﺎﻟﻨﺴﺒﻪ ﻟﻴﻬﺎ ﺍﻛﺜﺮ ﻣﻦ ﺍﺥ .. ﻧﻈﺮﺗﻬﺎ ﻛﺎﻧﺖ ﻣﻠﻴﺎﻧﻪ ﺩﻣﻮﻉ ﻭﺣﻘﺪ ..
ﺯﻳﻨﺐ ﺑﻬﻤﺲ : ﺣﺴﺒﻲ ﺍﻟﻠﻪ ﻭﻧﻌﻢ ﺍﻟﻮﻛﻴﻞ ..
ﻭﺳﻌﻴﺪﻩ ﻛﺎﻧﺖ ﺗﻬﺪﺭﺯ ﻣﻊ ﺧﻮﺍﺗﻬﺎ ﻭﺗﻀﺤﻚ ..
🌸 ﻣﺠﺪﻭﻟﻴﻦ : ﺗﻬﺒﻞ ﻋﺎﺩﺍﺗﻬﻢ ..
ﺍﻣﻬﺎ : ﻣﻌﺎﺵ ﻋﺮﻓﻨﺎﻟﻚ ..
ﻣﺠﺪﻭﻟﻴﻦ ﺑﻀﺤﻜﻪ : ﻣﺎﺍﻣﺎﺍ ..
🍁 ﺧﻠﻴﻔﻪ ﻣﺪ ﺍﻟﻤﻘﺺ ﻟﺮﺑﺎﺏ ﺑﻌﺪ ﻧﺎﺩﺍﻫﺎ ..
ﻭﻃﻠﻊ ﺑﺤﻤﻴﺪﻩ ﻭﻫﻮ ﻣﻐﻄﻴﻬﺎ ﺑﺠﺮﺩﻩ ﻭﻫﻮ ﻳﺪﻳﺪﺵ ﻓﻴﻬﺎ ..
ﺑﺪﻭﺍ ﻳﺪﺭﺑﻜﻮﺍ ﻭﻳﻐﻨﻮﺍ ..
ﺑﺮﻱ ﻣﺮﺑﻮﺣﻪ ﻳﺎﻭﺧﻴﻪ .. ﺍﻟﻌﺎﻡ ﺍﻟﺠﺎﻱ ﺗﺠﻲ ﺑﺒﻨﻴﻪ ..
ﻋﺎﻭﺩﻭﻫﺎ ﻣﺮﺗﻴﻦ ..
ﺯﻳﻨﺐ
ﺣﻮﺵ ﺍﻟﻌﺰ ﻃﻠﻌﺘﻲ ﻣﻨﻪ .. ﺍﺩﻳﺮﻱ ﻛﻴﻔﻪ ﻭﺍﺣﺴﻦ ﻣﻨﻪ ..
ﺭﺩﻭﺍ ﻭﺭﺍﻫﺎ ...
ﻛﻔﺎﻳﻪ ..
ﺑﺮﻱ ﻣﺮﺑﻮﺣﻪ ﻳﺎﺯﻳﻨﻪ .. ﻳﻠﻲ ﻋﻤﺮﻙ ﻣﺎﻭﺟﻌﺘﻴﻨﺎ ...
ﻭﻃﻠﻊ ﺑﻴﻬﺎ ﺣﻤﻴﺪ ﺑﺮﺍ ﺍﻟﺨﻴﻤﻪ .. ﻭﻃﻠﻌﺖ ﻣﻌﺎﻫﺎ ﻧﻌﻴﻤﻪ .
ﻭﺟﺖ ﻗﺪﺍﻣﻪ ﺳﻴﺎﺭﺓ ﺧﻠﻴﻔﻪ ..
ﻓﺘﺤﻠﻬﻢ ﺧﻠﻴﻔﻪ ﺍﻟﺒﺎﺏ ﺍﻟﺨﻠﻔﻲ ..
ﺧﻠﻴﻔﻪ ﺑﺄﻟﻢ : ﻣﺒﺮﻭﻙ ﻳﺎﺑﻨﺖ ﻋﻤﻲ ..
ﻫﻲ ﺍﺑﺘﺴﻤﺖ ﺑﺘﻬﻜﻢ ﻭﻗﺎﻟﺖ : ﺍﻟﻠﻪ ﻳﺒﺎﺭﻙ ﻓﻴﻚ ..
ﺭﻛﺒﻬﺎ ﺣﻤﻴﺪ ﻭﺩﺧﻞ ﻗﻔﻄﺎﻧﻬﺎ ﺑﻤﺴﺎﻋﺪﻩ ﻧﻌﻴﻤﻪ ..
ﺑﻌﺪﻳﻦ ﺭﻛﺒﺖ ﻧﻌﻴﻤﻪ ﺟﻨﺒﻬﺎ ﻣﻦ ﺍﻟﺠﻬﺔ ﺍﻟﺘﺎﻧﻴﻪ ..
ﻭﺭﻛﺒﻮﺍ ﺣﻤﻴﺪ ﻭﺧﻠﻴﻔﻪ ..
ﻭﺗﺤﺮﻙ ﺧﻠﻴﻔﻪ ..
ﺷﺎﻓﻬﺎ ﻣﻦ ﺍﻟﻤﺮﺍﻳﻪ ﻭﻫﻮ ﻣﺨﻨﻮﻕ .. ﻳﺘﻘﻄﻊ ﺗﻘﻄﻴﻊ ...
ﺳﻨﻴﻦ ﻣﺎﻗﺪﺭﺵ ﻳﻨﺴﺎﻫﺎ ﻟﺤﻈﻪ ...
ﺑﺲ ﻫﻲ ﺍﻟﻠﻲ ﺩﺍﺭﻩ ﻓﻴﻬﺎ ﻧﺴﺎﻫﺎ ﺣﺘﻰ ﺍﻧﻪ ﻭﻟﺪ ﻋﻤﻬﺎ ...
ﺗﺤﺮﻛﻮﺍ ﻭﺭﺍﻫﺎ ﺧﻮﺗﻬﺎ ﻭﻭﻻﺩ ﺍﻟﻌﻴﻠﻪ ﺑﺴﻴﺎﺭﺍﺗﻬﻢ ..
ﻭﺍﻟﻜﻼﻛﺴﺎﺕ ﻗﺎﻟﺒﻪ ﺍﻟﺪﻧﻴﺎ .
🍁🍁🍁🍁🍁
ﺍﻟﻨﺎﺱ ﺑﺪﺕ ﺗﺮﻭﺡ ...
ﻭﺍﻟﺨﻮﺍﺕ ﻭﺑﻨﺎﺕ ﺧﺎﻟﻬﻢ ﺧﺸﻮﺍ ﺩﺍﺧﻞ ﻭﻣﻌﺎﻫﻢ ﺍﻟﻜﻨﺎﻳﻦ ...
ﻭﺍﻟﻌﺰﺍﻳﺰ ﻗﻌﺪﻭﺍ ﺑﺮﺍ ﻣﻊ ﺍﻟﻨﺎﺱ ﻟﻴﻦ ﻳﺮﻭﺣﻮﺍ ﻛﻠﻬﻢ ..
ﻛﺎﻧﺖ ﺍﻟﻜﻮﺟﻴﻨﻪ ﻣﺼﻜﺮﺓ ..
ﺩﺍﺧﻠﻬﺎ
ﻛﺎﻧﺖ ﺩﻻﻝ ﺣﺎﺿﻨﻪ ﻏﺎﻟﻴﻪ ﺑﻘﻮﺓ ..
ﻭﺣﺪﺍﻫﺎ ﺭﺑﺎﺏ ﻭﺭﺍﻧﻴﺎ ﻭﻧﻮﺭ ﻭﺭﺯﺍﻥ ﻭﺭﻓﻘﻪ ﻭﻛﻠﻬﻢ ﻳﺒﻜﻮﺍ ﺑﺎﻟﻌﺒﺮﺓ ..
ﺣﺘﻰ ﺭﻓﻘﻪ ﻭﺭﺯﺍﻥ ﻓﺎﻫﻤﻴﻦ ﺷﻌﻮﺭ ﻋﻤﺘﻬﻢ ...
ﺍﺳﺎﺳﺎ ﻏﺎﻟﻴﻪ ﻏﻴﺮ ﺍﻟﻐﻴﺮ ﻋﻨﺪﻫﻢ ﻛﻠﻬﻢ ..💓
ﻭﺣﺎﺳﻴﻦ ﺑﻴﻬﺎ ﺯﻱ ﻣﺎﻫﻲ ﺗﺤﺲ ﺑﻴﻬﻢ ﻓﻲ ﻛﻞ ﻭﻗﺖ 🍃
🍁🍁🍁🍁🍁🍁
ﺑﻌﺪ ﺩﺍﺭﻭﺍ ﺑﻴﻬﺎ ﺍﻏﻠﺐ ﻣﻨﺎﻃﻖ ﺍﻟﻘﺒﻴﻠﻪ ...
ﺧﺸﻮﺍ ﺑﻴﻬﺎ ﻟﻘﻄﻌﺔ ﺍﻫﻞ ﺍﻟﺼﺪﻳﻖ ...
ﻛﺎﻥ ﺣﻮﺷﻪ ﺟﻨﺐ ﺣﻮﺵ ﺍﻫﻠﻪ ..
ﻟﻤﺎ ﻧﺰﻟﺖ ﺣﻤﻴﺪﻩ ﺟﺎﻫﺎ ﺣﻤﻴﺪ ﻏﻄﺎﻫﺎ ﺑﺠﺮﺩﻩ .. ﻭﺧﺶ ﺑﻴﻬﺎ ﺩﺍﺧﻞ ..
ﺍﻟﻠﻲ ﻋﺮﻓﺘﻪ ﺑﺶ ﻳﻘﻮﻟﻮﺍ ﻃﻠﻌﺖ ﻣﻦ ﺗﺤﺖ ﻃﺮﻑ ﺧﻮﻫﺎ ...
ﻭﻣﺶ ﻓﺎﻫﻤﻪ ﺍﻟﺤﻖ ﺍﻟﻤﻌﻨﻰ ﻟﻬﺎﻟﺠﻤﻠﻪ ..
ﺧﺸﺸﻬﺎ ﺩﺍﺧﻞ ...
ﺣﻮﻝ ﺟﺮﺩﻩ ...
ﻭﻃﻠﻊ ﻃﻮﻝ ..
ﻭﻫﻲ ﺩﺧﻠﺘﻬﺎ ﻧﻌﻴﻤﻪ ﻭﻣﻌﺎﻫﺎ ﺣﻤﻮﺍﺗﻬﺎ ..
ﺣﻮﻟﻮﺍ ﻛﺎﺑﻬﺎ ...
ﻭﺩﺧﻠﻮﻫﺎ ﻟﻠﺨﻴﻤﻪ ..
ﻭﻭﺻﻠﻮﻫﺎ ﻟﻠﻜﻮﺷﻪ ...
ﻭﻗﻌﻤﺰﻭﻫﺎ ﻋﻠﻴﻬﺎ ..
ﻭﺑﺪﻭﺍ ﻳﺪﺭﺑﻜﻮﺍ ﻋﻠﻴﻬﺎ ...
ﻭﺍﻟﻜﻞ ﻋﺠﺒﺘﻬﻢ ﻟﻴﻦ ﺧﻼﺹ ...
ﺑﻌﺪ ﺣﻮﺍﻟﻲ ﺭﺑﻊ ﺳﺎﻋﻪ ..
ﺧﺪﻭﻫﺎ ﻭﺭﻓﻌﻮﻫﺎ ﺣﻤﻮﺍﺗﻬﺎ ﻟﺤﻮﺷﻬﺎ ...
ﺑﺮﺍ ...
ﻛﺎﻥ ﺍﺻﺤﺎﺏ ﻭﺧﻮﺕ ﺍﻟﺼﺪﻳﻖ ﻭﻧﺴﺎﺑﺎﺗﻪ ..
ﺩﺍﻳﺮﻳﻦ ﻓﻮﻗﻪ ﺯﻱ ﺍﻟﺠﺮﺩ ﻣﺮﻓﻮﻉ ...
ﻭﻗﻌﺪﻭﺍ ﻳﺸﺘﻮﺍ ﻭﻭﻳﻜﺸﻜﻮﺍ ﻭﻳﻤﺠﺮﺩﻭﺍ ... ﻭﻓﻲ ﻭﺍﺣﺪ ﻳﺼﻮﺭ ﻓﻴﺪﻳﻮ ..
ﻭﻫﻮ ﻣﺒﺘﺴﻢ ... ﻭﻗﻌﺪﻭﺍ ﻳﻤﺸﻮﺍ ﺑﻴﻪ ﻟﻴﻦ ﻭﺻﻠﻮﻩ ﻟﺒﺎﺏ ﺣﻮﺷﻪ ..
ﻧﺎﺷﺒﻮﻩ ﺷﻮﻳﻪ 😁 ﻭﻫﻮ ﻳﻀﺤﻚ ...
ﻭﺑﻌﺪﻳﻦ ﺧﺶ ... ﻭﺻﻜﺮ ﺍﻟﺒﺎﺏ
💕💕💕💕💕
ﻃﻮﻝ ﻣﺸﻲ ﻟﺪﺍﺭ ﺍﻟﻨﻮﻡ ..
ﻟﻘﺎﻫﺎ ﻭﺍﻗﻔﻪ ﻭﻋﺎﻃﻴﻪ ﺑﺎﻟﻈﻬﺮ ﻭﺗﺸﺒﺢ ﻟﺼﻮﺭﺗﻬﺎ ﺍﻟﻤﻌﻠﻘﻪ ﻉ ﺍﻟﺤﻴﻂ ..
" ﺣﺒﻴﺒﺘﻲ .."
ﻗﻠﺒﻬﺎ ﺩﻕ ﺑﻘﻮﺓ ﻭﺍﻟﺘﻔﺘﺖ ...
ﺍﺑﺘﺴﻤﺖ ﺑﺪﻫﺸﻪ ﻟﻤﺎ ﺷﺎﻓﺎﺗﻪ ..
ﻛﺎﻥ ﺍﺷﻘﺮ ﻭﻭﺳﻴﻢ ... ﻭﻃﻮﻝ ﺑﻌﺮﺽ ..
ﺿﺤﻜﺖ ﺑﺘﻠﻘﺎﺋﻴﻪ ﻭﻗﻠﺒﻬﺎ ﻳﺪﻕ ﺑﺎﻟﻘﻮﺓ 💓..
ﻭﻫﻮ ﺿﺤﻚ ﻋﻠﻴﻬﺎ 💓💓💓
🍁🍁🍁🍁🍁🍁🍁🍁
ﺑﻌﺪ ﻧﺺ ﺳﺎﻋﻪ ...
ﻓﻲ ﺍﻟﺤﻮﺵ ..
ﻟﻄﻴﻔﻪ ﺟﺘﻬﻢ ﺗﺠﺮﻱ ﻣﻦ ﺍﻟﺪﺍﺭ : ﺣﻤﻴﺪﻩ ﺗﻬﻨﺖ ..
ﺯﻏﺮﻃﻮﺍ ﻛﻠﻬﻢ ﺑﺼﻮﺕ ﻭﺍﺣﺪ ..
ﻭﺧﺪﺕ ﺭﺍﻧﻴﺎ ﺍﻟﺪﺭﺑﻮﻛﻪ ﻭﺑﺪﺕ ﺍﺩﺭﺑﻚ ﻭﻫﻤﺎ ﻳﻐﻨﻮﺍ ..
ﻳﺎﻣﺒﺮﻭﻙ ﻉ ﺍﻟﻮﺩﺍﺩﻩ .. ﺍﻥ ﺷﺎﺀ ﺍﻟﻠﻪ ﺗﻌﻴﺶ ﺳﻌﺎﺩﻩ ..
ﻭﻏﺎﻟﻴﻪ ﺍﺗﻜﺖ ﻉ ﻗﻔﺺ ﺍﻟﺒﺎﺏ ﻣﺘﺎﻉ ﺍﻟﺪﺍﺭ ﻭﻫﻲ ﻣﺒﺘﺴﻤﻪ ﺑﻔﺮﺡ ...
.... ﻳﺘﺒﻊ
