#العشق_المتمرد "اختبار"
الجزء 107القسم الأخير
#جمان_فريد
❣..
جبده من كبوطه وهو يقول:ع شنو تضحك يامسخ!؟
الصديق بإستفزاز:عليك...
بدون وعي طاح فيه الهادي ضرب والصديق ماباش يحرك ساكن قصدا بش الناس تحط الحق ع الهادي بروحه..
بعد حزو الهادي بصعوبه عنه..
الصديق وهو يمسح فخشمه من الدم قال:اختك هي اللي قات تعال ارفعني...ماجبرتها ع شي..طلعت قدامكم كلكم بروحها بروحها...
الهادي مش قادر يتحكم في اعصابه..
قام رشاده من الوطا وحدفه بيها.. جت ع صدره..
الصديق شد صدره وهو يشوف للهادي بإزدراء..
والرجاله الموجودين حواليهم يلوموا في الهادي ع اللي داره..
لعند ماصدفه شافهم سالم راجل امال اللي كان موجود فالسوق...جاه طول جبده.
سالم:تعال معاي ياهادي ..
الهادي شبح جهة الصديق شويه.. دفل عليه..بعدين مشي مع سالم اللي كان يكر فيه كران..
🍁🍁🍁🍁
ماشيات مع بعضهم في الممر وهما يهدرزوا..
دلال:الحمد لله كله جاوبته..
رانيا بإبتسامه:كويس..
دلال:قعد توا موال الإمتحانات النهائيه مازال تلاته اسابيع..
رانيا تنهدت وقالت:اني نخمم فالمشروع اكثر منهم..
دلال شبحتلها وقالت:امتى بتنزليه تاني؟مفروض السمستر الجاي خلاص انتي فحكم كملتي قرايه..
رانيا شبحت القدام وهي تفكر فشي فبالها تتمناه يتحقق..
لفوا يمين للممر اللي يرفع لمكاتب اعضاء هيئة التدريس..
عيونها جو طول ع مكتب زين برغم بعد المسافه..
دلال:رانيا وين رحتي؟!
كيف جايه رانيا بترد..
ضيقت عيونها بإستغراب لما شافت رئيس القسم ومعاه تلاته من اعضاء هيئة التدريس خاشين يجروا لمكتب الأستاذ زين..
دلال اللي كانت تشبحلهم قالت بشي من الخوف:إن شاء الله خير!!
رانيا وقفت فمكانها..
حطت يدها ع صدرها وقالت بخوف:دلال!..
دلال وقفت وشدت ذراعها وقالت:خيرك رانيا!؟
رانيا بدموع:كان مايكون..حتى هو..!
دلال شبحت للمكتب بصدمه..
ع طلعة رئيس القسم وهو يقول لأستاذه جايه تشوف شن في:ضغطه هابط...
الدكتورة ساسيه:ياناري..لاحول ولاقوة الا بالله..
شويه..
وطلع استاذ وهو مسند زين وماشي بيه ومعاه استاذ تاني فيده شنطة لاب زين وتليفونه..
رانيا قعدت معاه بعيونها اللي دموعهم ينزلوا...
دلال بحزن:الميت يرتاح بالموت والحي يعاني من موته..
وقعدوا دموعها ينزلوا حتى هي..
🌴🌴🌴🌴🌴
ركب للشقه يجري بأقصى سرعه..
ووراه مرته وهي تسأل بصوت عالي وعصبيه:وين ماشي وين وين راقي نكلم فيك!!
وصل في باب الشقه..
طلع المفتاح وفتحه وهويرجف من العصبيه..
انفتح..
خش زي الغول..
ومرته وراه..
وصل فالدار ..
لقي حميده حاضنه حنين وشبه راقدات والقرآن مفتوح...
سورة البقرة...
هو وقف فمكانه..قعد يشوف للتلفزيون..
وحليمه تشوفله وعيونها جاحظات وترعش مع بعضها..
قعد يتنفس بسرعه...
ومشي طول للتليفزيون جبد سبينته انطفي..
حميده ناضت مخلوعه:شن في !!؟
التفتلها وشبحلها بنظره تخوف..
وخطف..
جاها طول جبدها من شعرها..
ونهضها وبدي يعطي فيها فكفوف ع وجهها زي المجنون..
وحليمه تشوفلها وع وجهها ارتسمت ملامح السعاده وهي رافعه حاجبها تشوفلها بتشفي كيف ينهال عليها بالضرب المبرح..
ضرب عنيف...
وبنته تبكي وتعيط..وحاطه صوابعها ففمها وتنتش فيهم..
حميده ماكانش عندها جهد ولاقدره ع المقاومه كانت تتلقى فالضرب ..
وكأنها ورقه شجره طير فيها ريح الخريف وين ماتبي..
الراجل مش بوعيه..
لو استمر ع اللي يدير فيه حتما حيقتلها..
شويه وخشوا عليه خوته اللي كانوا يسمعوا فالعياط..
لقوا حميده طايحه والصديق يضرب فيها كالشوات ع جنبها..
جبدوه عنها بكل قوتهم وبالسيف قدروه..
بالسيف طلعوه..
وهما مستغربين فقوته الهائله..
صكروا باب الشقه..
وخلوا فيها حميده طايحه مغمى عليها وانفها وفمها ينزفوا فالدم..
وبنتها حداها تبكي وتقول "ماما.."
الطفله اللي قاعده تشهد ع الفضائع...
الطفله اللي من خوفها وهي تشوف لأمها كيف تنضرب لاإراديا تبولت ع نفسها من الخوف...
🍁اما بوها..
وهو جاي نازل من فوق..
حس بشي غريب..
حس بتداخل غريب صارله وكأنه شخصين فشخص واحد..
هالشعور..
خلاه وهو كيف نزل من اخر درجه..
طاح مغمى عليه....
خوته بصوت واحد:صدييق!!
اما حليمه فكانت تشوفله بصدمه وانتابها شعور شديد بالخوف..
🍁🍁🍁🍁
مقعمزات برا حدا الكافتيريا..
رانيا تبكي ودلال تحاول تهديها..
دلال:رنوشه انتي بروحك تقولي هادي ساعتهم..تحملي فنفسك الذنب علاش!؟
رانيا ببكي:مش عارفه مش عارفه..كل اللي نعرفه انه واجعني هلبه هلبه ومقطعلي قلبي...حاسه روحي ظلمته لين خلاص ظلمته هلبه...
دلال:كيف ظلمتيه !!قصدك رفضك ليه تسمي فيه ظلم!؟
رانيا رشفت وقالت:مش هدا قصدي..بس كان مفروض نتعامل معاه بطريقه احسن من هكي نحاول نفهمه ان اني فحد فحياتي..حتى لو بانلي انه يعرف..لو حق هو انسان مش كويس تراهو من زمان دار لرمزي حاجه..
دلال:برضو انتي ماغلطتيش ولاظلمتيه..
رانيا حطت راسها بين ايديها وهي تبكي وتقول:والله مانعرف يادلال..مش عارفه..
تنهدت دلال وقعدت توزع فنظرها ع المكان ..
جت عينها ع ضو واقف ع واحد ويهدرزوا..
وجهها تلقائيا ولا احمر..
كل ماتذكر اللي حكهولها عن اللي داره معاها لما اغمى عليها..ينتابها شعور بالخجل الشديد..
هو غير عيونه ليها..
غيرت عيونها طول عنه وهي متحشمه ع الآخر..
وهو ابتسم ابتسامه خفيفه ورجع ركز ع الشخص اللي معاه..
شويه..
ومسحت رانيا دموعها وهي تقول:هي نوضي نخشوا..
دلال:خل ناخدلك عصير قبل..
رانيا:تس مش لازم..
دلال ناضت وهي تقول :لا..لازم..وجهك اصفر..تو ادوخي ونحصل فيك..
رانيا لمحت ضو بعدين شبحت لدلال وقالت بضحكه من بين دموعها:زعمه نحصلوا من يتلقانا زي بعض الناس!؟
دلال فهمت ع رانيا وجهها تغير ومشت طول للكافتيريا.
رانيا وهي معاها بعيونها قالت:شكلي لبزت..
🍁ضايق دلال هلبه تلميح رانيا..
حست بشعور مش حلو لما سمعاته..
خشت للكافتيريا..
وقفت ع الكاصه وطلبت راوخ عنب..
تنهدت وهي تفكر فكلام رانيا ومن غير سبب ادفقت الدموع فالعيون..
"السلام عليكم"..
شبحت جنبها بنظرة حاده وقالت:وعليكم السلام..
بعدين مشت للتلاجه بش تاخد حكة العصير..
هو استغرب تعاملها معاه..
ولت خدت كيسه من صاحب المحل حطت فيها الحكه وطول مشت طلعت وهو وراها..
ضو بإستغراب:دلال..دلال لوسمحتي شويه..
هي بالغصب وقفت..
وصل فيها وقال:احمم..اني كنت نبي نسأل ع حالك ونطمن لااكثر..
دلال بشي من العصبيه:شن فيه حالي !!ماتشبحش فيا واقفه ع رجليا ونمشي ونجي ونسوق ونقرا واموري تمام!!
ضو وهو يشوفلها بقرنة حواجب وبنظرة كلها استغراب:لهالدرجه ضايقتك!؟
دلال بحده:ايه ضايقتني وهلبه...
هو رخي حواجبه ووزع نظره حواليه وقال:اسف جدا ..
ولف ومشي طول..
هي قعدت تشوفله وهو يمشي لحظات..
وارتحت ملامح وجهها الحاده وتبدلت للحزن..
وقلبها وجعها ع الآخر..
ع جية رانيا سألتها طول:شن صار!؟
دلال بدموع:قداش اني وحده حقيره..بدال مانشكره هزبته..
رانيا بصدمه:هزبتيه!؟
مدت دلال العصير لرانيا ..
رانيا خداته..
ودلال مشت طول بتخش للمبني..
🍃امتى يوصل الإنسان لمراحل متقدمه من العشق يبدا يحس بالغيره ع نفسه لمعشوقه حي كان او ميت..بس مع هذا تصرفها كان غلط وتعاملها مع شخص مارتش منه كان كل خير واحترام وتقدير بهالطريقه المهينه..يتسمى جحود وقلة ادب وهي مش هكي ولا هو يستحق منها هالمعامله🍃
🌴🌴🌴🌴
تو انتي شن دخلك يمي...يمي تعالي..
مابتش تعبرها نهائي وهي راكبه الدروج..
وصلت في الباب..
لقاته مردود..
فتحاته وخشت...
وصلت في الدار..
لقت البنت راقده ع صدر امها..
والام حاطه يدها عليها وهي تغني بصوت يدوب طالع:هو..ها..هو..ها...
نزلوا دموع شعله وهي تقول؛الله لايسامح اللي كان السبب..
قدمت لحميده قعمزت ع روس صباعها وهي تقول:حميده..ياحميده..
حميده بتعب:امممم...
شعله بألم تشوفلها وتشوف لحنين اللي مازال مكبشه فأمها.
التفتت شبحت بنظرة قسمت حليمه نصين..
حليمه طول انسحبت وطلعت من الشقه وهي فقمة الغضب..
🍁🍁🍁🍁
ولوا بيه فالطريق لما فاق وكان عادي جدا..
خوه اللي يسوق كان يشوفله من المرايا بنظرات كلها ريبه وحاس ان خوه مش مزبوط بكل..
بينما هو كان متكي ع الكرسي ويشبح للروشن..
حاس بتعب شديد بس...
هو مذكر شن صار..وشن دار..
والصراع اللي فداخله بدي من جديد..
ليش دار هكي وكيف دار هكي..!؟؟؟
ومازال الصديق عايش حالة اشبه بالإنفصام....🍃
🍁🍁🍁🍁
الساعه 1:30ظهرا..
كانت مقعمزة برا بروحها..
بنت خالتها كان عندها محاضرة..
وهي ماحبتش تترافق مع حد تاني وقت فراغها..
مزاجها كان معكر..
وجوها مش حلو...
تفكر في ألف حاجه وحاجه...
وكلهم يزيدوا فيها ضيق ع ضيق..
قطع عليها هالتفكير..
سيارة واحد من الأساتذة درست مقابلها..
شويه ونزل منها زين ع كتفه شنطة اللاب متاعه ومعاه الأستاذ...
مشوا هما الزوز مع بعض بيخشوا داخل..
هي تلقائيا ناضت ومشتلهم..
وصلت عندهم..
رانيا برجاء:..استاذ زين لو سمحت شويه..
شبحله الأستاذ..
هو قال :مشكور استاذ علي بارك الله فيك..
الأستاذ:وفيك بارك الله وان شاء الله لاباس..
زين بإبتسامه مجامله:لايوريك باس..
مشي الأستاذ..
وزين التفت لرانيا وهو يشوفلها بحده..
بلعت ريقها وقالت:استاذ ارجوك هالمرة بس اسمعني..
قاطعها زين وقال بنفاد صبر:انتي شنو بالزبط ماتفهميش بالكلام ولاشنو..حمااارة..غبيه!!
رانيا بكل هدوء قالت:قول اللي بتقوله مش حنزعل منك وحنقعد معاك مهما قلت ومهما درت
نظرات عيونها...كلامها اللي قالاته..
اصرارها الشديد انها تكون معاه..
مخلي قلبه يدق بقوة شديده ولهفه برغم كل جروحه..
قال بصوت مخنوق:شن تبي؟!
رانيا قعدت تشوفله وعيونها معبيات دموع..
الشخص اللي قدامها اللي تقاسيم وجهه كانت كلها قوة وكبر وغرور..
تشبح فيها كلها توا...تعيسه..وكلها حزن..
لاإردايا نزلوا دموعها...
بعدين انهارت بالبكي..
زين حط يده ع جبهته وقال:والله ماناقص الله..
هي حاولت تهدي نفسها ..مسحت دموعها وقالت:شن حالك...
ارتسمت ع وجهه ابتسامة تهكم ممزوجه بالألم...
رانيا؛مش سؤال غبي راهو...نسأل فيك لأني نبي نعرف حالك شن هو؟!
زين وزع نظره ع المكان بعدين تنهد وقال:باهي...شبحلها..تعالي..
ابتسمت من بين دموعها..
هو ابتسم ومشي قدامها وهي وراه...
وحاسه براحه رهيبه..
اما هو كان يبي يرتاح...
🌴🌴🌴🌴
بعد تأكدت انه رقد..
طلعت من الدار وصكرت الباب..
لقت الكنه فوجهها..
اميرة:شن صار!؟
حليمه شدتها من ذراعها وقالت:دبريلي..
اميرة بإبتسامة مكر:جبتلك اللي ينفعك اكثر من الأول..
حليمه بإندهاش:قصدك عدتيلها؟!
اميره هزت راسها بإيجاب وهي تضحك..
حليمه بضحكه وهي رافعه حاجبها:ياشطانه..
ع خشة ام حليمه...
كانت تشوفلهم بكره بعدين قالت:هيا انتي..
حليمه:مازال بكري..
شعله؛لا هداك هو هيا انتي..
اميرة هزت راسها بإيجاب ومشت بتجيب عبايتها..
وحليمه لحقتها...
شعله وهي ماشيه للكوجينه:البلي اللي وراك ياأميرة كان نعلم بيه بس!..
خشت للكوجينه ومشت لسله الخضرة خدت كيسه من المعلقات فوق السله..
وبدت تلم في البصل والبطاطا والتومه..
بعدين مشت للتلاجه..حطت خيار وطماطم..
وباكوين حليب وباكو عصير..
ومشت طلعت من الكوجينه..
ومن الحوش مرة وحده...
مشت للدروج ركبت..
وصلت شقة حميده خشت داخل وطول للكوجينه..
حطت اللي جاباته كله في اماكنه المخصصه..
بعدين طلعت ومشت للدار..
لقت حميده راقده وبنتها حداها..
🍃هي اللي طببت حميده وغيرتلها حوايجها وغيرت للبنيه حتى هي ورقدتهم..ومش هكي وبس حتى الغدي اللي طيباته لبنتها رفعت منه لحميده.. فوق شفقتها ع حميده..المراة خايفه من ربي هلبه وعارفه بنتها كويس ومن باب الأمومه ع بالها ان اللي دير فيه ممكن يدفع عقاب الله عن حليمه...
بس وين كل واحد يحمل وزره بروحه ياخالة شعله🍃
🍁🍁🍁🍁
اني قاعد ندفع فديون عليا لاأكثر...
هي تشوفله بحزن وتسمع فيه..
زين:اني راهو..ياما درت وربي قاعد توا يردلي فيه كله..ابتسم بإحراج وهو يقول..ماتسأليش شن درت رجاءا..ضم شواربه لداخل بأسف والدموع عبو عيونه بعدين قال...ماحد عليه ذنب ولا راكبه ذنب هني غيري..شبحلها..اصلا حتى انتي كنت ناوي نظلمك كنت نبي نفرض نفسي عليك بالغصب..كنت ناوي لو ماجيتيش بالطيب نجيبك بالقوة..لكن ربي فوق كل شي..كل شي...وهالحاجه هادي اني واللي زيي ديما ننسوا فيها..
رانيا بدموع:باهي..كويس مادام هكي تفكر..معناها اللي صار معاك..صار بش يغيرك ..بش يفتح عيونك..بش يخليك تعيش ايامك الجايه حياة احسن من اللي كنت عايشها..
شبحلها بنظرة ألم...وكأن يقوللها اما حياة اللي حتطيبلي بعد فقدت فيها اغلى مانملك.."عيلتي"..!
هي فهمت عليه وقالت:ايه صح..انت فقدت اختك وامك..بس لازم تحط فبالك ان هادوا اكثر اتنين يبوا ديما سعيد وحياتك ديما حلوه...فرح الله يرحمها كان هدا ماتبي وتتمنى انك انت تكون سعيد..كانت تقول خوي فيه شي حلو مش قادر يطلعه..
نزلوا دموعه ودموعها..
بضحكه كملت تقول:ايه هو اني بصراحه وقتها قلت فنفسي مستحيل واحد زي هدا تكون فيه حاجه حلوه ..
ضحك من بين دموعه اللي كان يمسح فيهم..
رانيا ابتسمت لضحكته وقالت:بس كان عندها الحق..
شبحلها..
رانيا غيرت عيونها وقالت:لأنك لو كنت انسان سيء ماكانش اللي صار معاك اثر فيك تاثير ايجابي..لو كنت مش كويس...شبحتله وهي تقول..كنت من لما عرفت ان فحد فحياتي..راك أذيته طول..
الجمله الأخيره فتحت جرح جديد من جروحه..
ايه هو عارف ان في حد فحياتها وزاد تأكد فكونه ولد خالها بعد اللي سمعه حاليا..
تنهد وشبح القدام وقعد ساكت..
رانيا:نبي نطلب منك طلب..
بدون مايشبحلها قال:شنو؟..
رانيا:ممكن تكون انت المشرف ع مشروع تخرجي؟
شبحلها وهو يضحك قال؛لهالدرجه مصخفك؟!
رانيا مسحت دموعها اللي نزلوا وقالت:مش هكي نهائي..بس اني نعرفك كويس كأستاذ وكمشرف ممتاز برغم احمم..يعني طباعك....ابتسمت بإحراج وسكتت..
هو ضحك وقال:نفكر..
ناض..
ناضت معاه..
شبحلها وابتسم ع جنب وهو يقول:شكرا..
هي ابتسمت وقالت:العفو...
مشي من حداها وماكانش وده يمشي..قداش تريح لما كلمها وكلماته لماسمعاته وسمعها..
فرح..
ايه فرح هلبه...بالشعور الحلو اللي حس بيه فهالنص ساعه اللي قعمز فيها معاها..
كانت اجمل 30دقيقه يمروا عليه بعد الالاف من دقايق حزن وتعاسه ووحده قاتله..
وهو خاش..
دلال كانت طالعه لمحت ابتسامته استغربت..
وين وصلت برا لقت رانيا واقفه تشبح للطريق وهي مربعه ايديها ومبتسمه..
قدمتلها..
وصلت فيها وقالت:شن صار من وراي!؟
شبحتلها رانيا وهي متفاجئة ضحكت بعدين قالت:قعمزي نحكيلك...❣
🌴🌴🌴🌴
الساعه 2:30بعد الظهر..
حطت صفرة الغدي ...
فاطمه بضيق:مانيتيش كولن انتن..
غاليه:مطيبه اني يمي راهو..
شبحتلها لمياء ..
غاليه بربكه:قصدي ماهوش حار..
نزلت عيونها لمياء للصونيه ومن داخلها نازله فغاليه..
فاطمه:مانيتيش قتلك..ماخاطري فشي..
غاليه:يمي كانك على الهادي..اني راني عديت لحوشه وقات سميه داير عركه بسيطه يمي مع واحد فالسوق..عركه عاديه يعني..ومافيه شي بكل..
فاطمه ناضت وهي تقول:يارب..وقفت بعد قالت..ماخاطري اني ماعندي ليه نيه يابنت افهمي..
ومشت من حداهم..
غاليه قعدت معاها بعيونها وهي تقول:والله حتى اني نيتي مصكرة..حاسه بصدري مطبق..
لمياء:بالك حكاية المشكله متاع البقره مخوفتكم ..
غاليه:مانعلم..ممكن...تنهدت بعدين ناضت وهي تقول ..تغدي لميا تغدي راك حامل...
ومشت توجهت للكوجينه..
راجتها لمياء لين ادرقت بعدين قالت:خليتوها فالرقبه ياعيله نكد..
شبحت للصونيه شويه وقالت:والله لما ناكل وطز..نموت ع خاطرهم يعني!؟..
وخدت كاشيك وطاحت فصونية الغدي بإيديها الزوز...
🍁🍁🍁🍁
كيف واصله للحوش..
خشت دارها بتبدل..
صكرت الباب..حطت شناطيها وادواتها فمكانهم..
بعدين حولت شاربتها ...لوحتها ع السرير..
وبدت تفك في البالطو..وهي تشوف لصورته...
《لينا سنين نحسابوه استشهد في القصف ع رتل العز...وقعدت تبكي..
صاحبتها بدموع:طلع حي..كلمهم من يومين وقال انه قاعد في الجزاير..》
تنهدت بعمق..
بعدين مشت للدولاب وفتحاته بش اطلع حوايجها..
《 وصل فيها وقال:احمم..اني كنت نبي نسأل ع حالك ونطمن لااكثر..
دلال بشي من العصبيه:شن فيه حالي !!ماتشبحش فيا واقفه ع رجليا ونمشي ونجي ونسوق ونقرا واموري تمام!!
ضو وهو يشوفلها بقرنة حواجب وبنظرة كلها استغراب:لهالدرجه ضايقتك!؟
دلال بحده:ايه ضايقتني وهلبه...
هو رخي حواجبه ووزع نظره حواليه وقال:اسف جدا ..》
غمضت عيونها وتأففت بعدين قالت:محقرني..محقرررني..
🍁🍁🍁🍁
في الطريق..
يسوق وهو مضايق ع الآخر من الموقف اللي صار..
وحمل نفسه المسؤوليه..
ضو"تجاوزت حدي عندها الحق..تصرفاتي هدي كلها غلط..تصرفات مراهقين..طبيعي جدا تكون هدي ردة فعلها عليها...مش مهم تبادلني نفس الشعور..المهم الإحترام بيني وبينها يقعد موجود.."..
زاد السرعه شوي...
يبي يوصل للبلاد بسرعه...الأجواء غادي تهون عليه شوي العذاب اللي عايشه واللي يزيد اضعاف لما يكون بروحه..
🍁🍁🍁🍁
واه من هالعذاب..
مايعرفه الا اللي مجربه..
عذاب ياكل الروح من داخل..مش بس القلب..
يقعد صدرك ديما مصهود..
تقول فيه جمرة والعه حرام ماتبي تنطفى..
الكلام ع العمده وبنت قلبه..
بس كان في فرق فتعاطيهم مع هالعذاب..
يعني هي مثلا قاعده تعاني بروحها معاش تبي تشارك اي حد وجع قلبها وألم الفراق والشوق اللي مش باينلهم نهايه..
لاعادت تشكي ولاتبكي لحد لأنها عارفه انها مش حتلقى حد يخفف عنها ممكن يزيدوها على مابيها..
مكمله أيامها مع ذكرياتهم وصوره اللي تتمعن فيهم كل مازاد شوقها ليه..وحسابه ع الفيس اللي تخش مرة مرة تشوفه..
ولاحظت الفترة الأخيره ان في حساب جديد يعلقله وعماد يرد عليه وكان حساب بنت...
واااه ع اللي يصير فيها وين تشوف تعليقاته وردوده ..اكيد حطيتوا نفسكم مكانها..وطول حسيتوا بهداكا الشعور المؤلم..ألم فضيع 💔
🍁اما هو فكان يهرب..
لغيرها...علاقته بسناء فتطور سريع وغريب للي يشوفه..
من محادثات ع الفيس..لمكالمات هاتفيه..لمواعيد مترتبه مسبقا..
ووحده من هالمواعيد..
بنت من بنات العيله شهدت عليه..
لامش رفقه....
بل...
دلال...🍃
🍁فيوم كانت ماشيه بسيارتها لكلية اختها..
لما وصلت..
درست سيارتها ونزلت..
خشت طول بسرعه لانها كانت مستعجله..
وهي ماشيه بطريقها لكلية الصيدليه لمحت عماد..
رجعت ركزت اكثر..فعلا..
كان عماد واقف ع بنت ويهدرزوا ويضحكوا..
وخرت كم خطوة بش تشوف البنت لأنها حست روحها تعرفها لما شافتها من جنب..
وتطلع تعرفها حق..
سناء اخت مرت خالها..
طول جي قدامها اللقطه اللي صارت فعرس رباب..
واذكرت كلام عماد لسناء..
ابتسمت بتهكم..
بعدين مشت كملت طريقها...
🌴🌴🌴🌴
الساعه 5:30عصرا..
ايه تمام...غدوة إن شاء الله جايين......باهي....بوسيلي سهى وسلميلي ع الوليدات...بالسلامه تو....بالسلامه..
صكرت من هني..وفتحت النت من هني..
طول جوها رسايل فايبر..
لقتهم من القروب..
فتحتهم..
كانوا من دلال ورباب..
دلال
(صبايا)
رباب
(هلا دلوله)
دلال
(شجو ربوبه)
رباب
(تمام..شجوك انتي)
دلال
(تمام الحمد لله...وين الباقي نبيكم فحاجه مهمه)
رباب
(شن هي؟!)
دلال
(خل يفتحوا كلهم وتو نقول)..
رباب
(تو نكلم رانيا وغاليه..استني)
وفعلا غاليه خش عليها اتصال تاني لما كلمت غزلان وكانت رباب..
خشت غاليه ع المحادثه
(مرحبا)
رباب
(وينك)
دلال
(هلا)
رانيا
(هيا قولي شن في)
نور
(والله حتى اني مابت تقولي لتوا)
غاليه
(شنو في دلوله)
دلال
(قولي عماد ولد اختك بمن بدل رزان ياخالتي)
غاليه ساوت تقعميزيتها وهي تشوف للتليفون بإنتباه..
(كيف!!)
نور
(حيي منو)
رباب
(ماتقوليهاش)
رانيا ماشاركتش..
دلال
(سناء اخت لمياء..اليوم شفتهم مع بعض فكلية التمريض)
غاليه بضيق
(ايه هي تقرا فالتمريض)
نور
(اها..اذكرتوا لقطة الصفرة فعرس رباب)
رانيا
(حتى اني خطرت عليا توا من وقتها حسيت في شي)
رباب
(لقطة شنو)
حكوا البنات ع اللقطه بالتفصيل..
وغاليه تقرا وقلبها مقبوض..
من غير شي رزان شاكه وحاسه ان في شي بيناتهم..
غاليه تفكر ان عماد مستحيل يحط خاله فموقف بايخ قدام نساباته..لهدا تفكيرها قادها لشي واحد بس ان عماد فعلا ناوي الرسمي مع سناء..
غاليه بخوف:حي عليا والله البنت تموت!؟
رجعت ركزت ع المحادثه وبدت تكتب بعدين بعتت..
(اسمعن ردن بالكن رزان تسمع وردن بالكن تقولن لرفقه حاجه..خلينا نتأكدوا قبل تربحن)
دلال
(اني في كل الحالات مستحيل نوصل لرزان اللي عرفته)
رباب
(ولااني نقدر)
نور
(اطمني من ناحيتي خالتي)
رانيا
(مايهمنيش موضوعها هلبه الصراحه)
غاليه
(باهي ..المهم مايطلع منكن شي..واني بروحي تو نتأكد)
🍁🍁🍁🍁
تاني يوم...
مع الظهر..
كانت غاليه واصله لحوش خوها حميد التاني رفعها سند..
وصلت الطلبيه لغزلان اللي حترفعها لمحلها العشيه..
بعد تغدوا وتريحوا شويه..
اذن العصر..
صلوا وتسقدوا بعدها لمحل غزلان..
حطوا الطلبيه في المحل..
بعدين دار بيهم سند دورة...
غاليه:سنوده..ترفعنا لمحلات عماد متاع الدبش..
سند بإبتسامه:حاضر..
ابتسمت غاليه..
غزلان:ماشيتله قبل بضاعته روعه..بس غالي..
سند:محل ماركه يامرت خالي الملابس اللي فيه كلهم بضاعه اصليه..اوروبي وتركي حاجه صح..
غاليه بضحكه:يقولوا الغالي سعره فيه..
غزلان بضحكه:صح..
وكملوا طريقهم بالهدرزه لعند ماوصلوا لمحلات عماد..
درس سند..
سند:ماشي مشوار ومولي..
غاليه:ماطولش..
سند:لالا خت فت بنسلم ع واحد نعرفه هني ونجيكم..
غاليه:باهي..
نزلوا غزلان وغاليه من السيارة..
وسند مشي..
مشوا خشوا للمحل وغاليه تشوفله بإعجاب..
كان يفتح النفس للشري..
ومليان زباين..
وكله ماشي بالنظام..
غزلان كانت تشوف في الحوايج..
لكن غاليه كانت ادور على عماد..
لعند مالقاته..
وياريتها مالقاته..
كان واقف ع سناء ويهدرزوا...
وهو منسجم معاها وهي كذلك والزوز تقول ليهم سنين يعرفوا بعض...
نظرتها لعماد كانت نظرة خيبة امل..
غاليه"عندها حق رزان تخاف منك وماتحطش فيك الثقه..كان تحبها حق مانسيتها بهالسهوله ودرت غيرها بسرعه هكي"..
عماد:هههههههه...جو عليك انتي..
سناء :ههههههه..
:عماد..
التفت للولد اللي يخدم عنده وقال:نعم..
:شوف الزبونه..
عماد شبح للمراة وقال:تفضلي اختي..
وبدت المراة تسأل فيه وهو يرد عليها..
وهو يتكلم كان يدور بعيونه فالمحل..
واطيح عينه ع خالته..
شبحتله شبحه سم..
بعدين لفت ومشت..
عماد انصدم....
سيبهم كلهم ومشي فجرة خالته بسرعه.
غاليه وهي ماشيه بعصبيه:هيا غزلان..
غزلان بإستغراب:خيرك..
غاليه:نبي نطلع..
غزلان هزت راسها بإيجاب..
ع جية عماد..
وقف قدام خالته وقال ؛خيركم ماقلتوا بتجوا؟
غاليه بتهكم:ليش بش تاخد احتياطك!؟
غزلان زادت استغربت..
هو شبح لخالته بحده وقال:خالتي عيب كلامك هدا..
غاليه برفعة حواجب:ايه عندك حق عيب..نزلت حواجبها وقالت..عدي عدي شوف شغلك ماتعطلش زباينك..
ومشت فاتت من حداه وغزلان وراه..
هو قعد معاها بعيونه لين طلعت هي ومرت خاله..
بعصبيه خبط كفوفه الزوز ببعض بقوة..
اللي فالمحل انخلعوا..
هو مرر نظره عليهم..
بعدين غمض عيونه وحط يده ع صدره وقال:اسف..اسف..
فتح عيونه بعدين مشي وولا من وين ماجي..
🍁🍁🍁🍁
ليلتها غاليه باتت فحوش خوها حميد الأول..
عند لطيفه..
وهي رفقه شبه مارقدوش..
رفقه:ليا وقت ملاحظه..وحتى ضايفها ع الفيس والباين بيناتهم هدرزة وديما تعلق ع بوستاته وهو يرد عليها وجوهم مليح..
غاليه وهي متفاجئة:رزان ماتعلمش!؟
رفقه حركت راسها ايمين ويسار بالنفي بعدين قالت:تعلمت من اللي فات..
غاليه تنهدت بعدين بشي من الكره قالت:التريس كلهم كيف بعضهم ماعندهم فالحب كان الدوة بس..
ضحكت رفقه تهكما وقالت:صدقتي..
🍁🍁🍁🍁
مافي شي بيني وبينها الزفت مافي شي..
قال هالكلام وهو مقعمز يشوف لصورة رزان اللي شادها فيده..
شبح فوق وهو مغمض عيونه زفر بقوة..
بعدين نزل راسه..
خدي تليفونه واتصل بخالته..
يبي يبرر..
لكن ع قد مااتصل غاليه مابتش ترد بكل..
لوح التليفون ع السرير..
وبعدين شد راسه وهو يحس بوجع شديد..
رجع قام.الصورة وشافلها وقال:وحق الله المهزب اللي داخل "يقصد قلبه" مافيه كان انتي ياعقرب..والله مافي..
تنهد من اعماقه..
بعدين مشي تمدد ع سريره..
حط صورتها ع صدره..ويده عليها..
وحط ذراع يده التانيه ع عيونه...
وهو يقول:وتقولي بش تاخد احتياطك...ضحك بعدين قال..اما خالتي غاليه هادي جو عليها....
سكت بعدين قال...
"آاااااه وخلاص 💓"
🍁🍁🍁🍁
الساعه 2:30ليلا..
🌠
في عالم المنام..
كانت تشوف فأختها تمشي فصحرا وهي قايمه ع ظهرها شوال تبن..
كانت تبان منهكه ع الآخر..
شويه وحطت الشوال جنبها..وقعمزت جنبه بروحها..
شعرها كان مبهدل وكانت لابس قفطان مرقع ...
من بعيد شويه..
كان راجلها مقعمز وحداه زوز شوالات..
ناضت لما شافاته قامت الشوال ع ظهرها ومشت بتحطه مع خوته..
لما وصلت وحطاته..
هو ناض..
خدي شوالاته الزوز قامهم ومشي بيهم..
وهي قعدت تشوفله..
بعدين خدت شوالها..
قاماته ومشت بيه واختفت...
هو بعدين ولى...
مالقي شي...
يبان وكأنه يدور..
بعدين..
قعمز فنفس المكان يستنى...وهو ينادي..
يابنت رمضان...بنت رمضااان..تعالي انتي وشوالك تعالي راني محتاج وماعندي...
وقعد يكرر فندائه لكن للأسف ماجاه حد..
⚡فاقت..
وهي تتنفس بصعوبه..
بعدين ناضت قعمزت..
مررت نظرها ع احفادها اللي راقدين حداهم فالدار..
شويه ..
وناضت بهدوء..
ومشت طلعت من الدار للحمام...
خشتله..
دقايق وطلعت وهي متوضيه..
مشت ولت للدار نشفت بالفوطه..
وخدت مصليتها وطلعت ..
توجهت للصاله..
لبستها.وقفت قدام القبله...
كبرت وبدت تصلي...
بعد كملت صلاة ركعتين..
استغفرت..
ومن ثم رفعت ايديها لله وهي تدعي..
نعيمه:
"يارب حميده اختي ماليها حد غيرك..كون معاها يارب..."
🍃🍃🍃🍃
بعد يومين...
بعد العصر...
شويه ماما خل نعسلها قبل...
عسلت لبنتها الخبزة المقليه حطتها فصونيه وعطتهالها..
البنيه خدت الصونيه وقالت بنبرة طفوليه:نبي شكلاطه خالي الهاتي..
حميده عيونها تعبوا دموع..
مسحت ع راس بنتها وقالت:كولي ماما..
حنين كلت منها شويه وقالت:نبي خوالي ماما..نبي محمت..نبي عمر..نبي الهاتي.. نبي خالي الهاتي يلعب معايا ماما..اني وفؤات ورمتان...
نزلوا دموع حميده بعدين مسحتهم وقالت:هيا ماما كولي بيش نديرلك في الليل بطاطا مقليه..
حنين بحزن:باهي..
طلعت هي وياها ومشوا للدار..
ع طقة الباب..
حميده خافت..
شبحت لبنتها وقالت:بري الدار ماما جايتك..
حنين حست بالخوف حتى هي...سمعت كلام امها ومشت للدار..
وحميده بلعت ريقها ومشت للباب..
حطت يدها ع المقبض وفتحاته...
وهي تشوف بترقب وخوف...
توسعوا عيونها من الخوف الشديد لما لقاته هو اللي واقف ع الباب..
من خوفها..
مشت تجري وخشت للدار وصكرت بابها عليها..
شبحت لبنتها اللي كانت تاكل وتشوفلها..
تصنعت ابتسامه ..وقلبها يكاد يوقف من الخوف..
برا..
هو خش بشكاير فيده..
جايب معاه كل شي ناقصهم..
طبعا دار هالشي بعد حصل هزايب من خوه..ومش غير هكي هو كانت عنده رغبه انه يشوفهم..
وكان يبي يعتذر ع اللي صار..
بعد حط الحاجات في الكوجينه..
مشي للدار..
وقف قدامها وطق الباب..
هي فزت مخلوعه..
"حميده"
البنت ناضت وقفت وقعدت ترعش مع بعضها..
مشت لأمها تجري وشدت من رجلها..
حميده وهي ترجف :ماتخافيش..ماما..مافي شي..
انفتح الباب..
البنيه شدت رجل امها بقوة وهي ترعش تقصف قصف من الخوف..
هو خش وقال:حميده...
البنت لاإراديا ..تبولت ع نفسها من الخوف..
هو ضيق عيونه وهو يشوفلها..
اما حميده قعمزت ع روس صباعها وهي تبكي شدت وجه بنتها بإيديها وهي تقول:مافي..شي ماما..مافي شي..
وهو يشوفلهم..
وفداخله متحرك نفس الصراع..
هو مذكر ان ضربها..وفي نفس الوقت مستنكر فعلته..
ويبرر فيها..ومش راضي عنها..وشايف انها تستاهلها..
صراع رهيب..تناقض عجيب..
لوطا..
حليمه فتحت باب الحوش..
لقت السيارة مدرسه..
لكن الراجل مهناش..
شبحت يالا باب دار الدروج..
لقاته مفتوح...
فنصت عيونها..
بعدين طول خشت داخل...
خدت البخاره..
ومشت خشت لدار الدروج تجري..
ركبت وهي تبخر واتمتم..
بعدين حطت البخاره فتركينه..
ومشت خشت للحوش..
قعدت ادور زي المجنونه..
وصلت في الدار..
قربعت الباب بيدها بقوة وقالت بصوت عالي:شن عندك هنى!!
هو انخلع لما راها..
التفت ..
انتابه شعور شديد بالخوف..
حليمه بصوت عالي:اطلع ..هيا اطلع..
هو طول طلع..
وهي شبحت لحميده بنظرة تخوف بعدين مشت طلعت وراه..
حنين ببكي:خايفه ماما اني خايفه..
حميده ناضت وقفت وهي تمسح فدموعها وهي تقول:تعالي ماما نعدوا للحمام ندوشلك هي..
خدتها من يدها والبنيه مازال تبكي بالعبرة..
وامها تذرف فدموعها بصمت..
لوطا...
راجاته لين خش للحمام..
خدت تليفونها وضربت ع رقم مرت خوها..
طول انفتح الخط..
حليمه:سقديني بسرعه وجيبي الحاجه من هديك المراة ماتخليش جنوني يطلعن عليك..........بسرعه في اقرب وقت نبيها.......صكرت عليها..وهي تتنفس بسرعه من الغضب والخوف في آن واحد..
🍁🍁🍁🍁🍁
خش بسيارته للقطعه..
كانت المطر كيف باديه تصب..
درس سيارته..
فتح الباب ونزل..
وهو يجري توجه لفم البوابه..
وصل فيها لقي الباب مردود..
طق وفتحه..
وقال:غاليه..
طلعت فوجهه لمياء..
لمياء بإبتسامه:عماد!!
هو ابتسم مجامله وقال:مرت خالي..
وخش..
لمياء:عاش من شافك..
عماد:تعيشي..شن امورك..
لمياء:تمام الحمد لله شن اخبارك انت..
عماد:ماشيه الحمد لله..
لمياء:باهي جيت وربي جابك..نبي نقولك ع حاجه مهمه..
عماد:ان شاء الله خير..
لمياء بضحكه :خير..غير في حاجه تخص سناء وصتني عليها تبيها منك تحشمت تطلبها قالت زودتها معاه..
عماد ابتسم من جديد بمجامله وقال:علاش تتحشم عيله وحده حني..
ضحكت لمياء وقالت :صدقت..
🍁🍁🍁🍁
حيلف يلف ويرجعلي ويجي قدامي ويدمعلي
عشان اسامحوا وانسى واعديها..
طق الباب..
ماسمعتاش لانها حاطه السماعات فودانها وتسمع فالأغنيه..
انفتح الباب وكانت غاليه..
هي حست بشي..
شبحت جهة الباب..
نحت السماعات وقالت:عمتي..
غاليه:خيرك لابسه هكي!؟
رزان:وشن تبيني نلبس..وبعدين لبستي هدي كويسه..
غاليه:راه الناس جايين يخطبوا...
رزان:والله هما اصروا يجوا واني مازلت مافكيت الجبس..منظري بالجبس لو شن مانلبس خيي..
غاليه شبحتلها شويه بعدين قالت:رزونه زيدي فكري فالموضوع..
رزان غمضت عيونها بنفاد صبر وقالت:اففففف..فتحت عيونها وجت بترد السماعات لودانها..
شدت غاليه يدها وقالت:رزونه..عماد معاد تراجي منه شي..
رزان عيونها تعبوا دموع وفاضوا قالت لعمتها بنبرة مرتعشه:لا مازال بنراجيه..حتى لو قعد السنين بعيد..حتى لو عرف..وحده تانيه..عادي مش مهم
وقت ويضيع فيه ومصيره موليلي ياعمتي..عمتي صدقيني عماد مستحيل يعيش مع غير رزان..مع غيري اني والله ماهو مكمل..
نفضت ايد عمتها وردت السماعات لودانها..وهي قالبه وجهها عنها ودموعها ينزلوا..
غاليه تنهدت بألم..
بعدين مشت طلعت من حداها..
وصلت في الكوجينه..
لقت سعيده..
سعيده:شن صار معاك؟
غاليه حركت راسها ايمين ويسار بالنفي..
سعيده بضيق:باهي..وراس غاليه حطي الحلاوات هدين فالمتارد متاعكم الفضيات..
غاليه:باهي..
خدت صفرة البكلاوة..
ومشت طلعت بيها من الكوجينه ومنها برا حوش خوها..
توجهت لحوشهم..
وصلت فم البوابه لقاته مفتوح..
خشت داخل وهي تقول:بكل العام ماهناك مطر يدوب بشبشت شويه
"إن شاء الله خير"..
غاليه بإستغراب:هدى صوت عماد!!
حطت صفرة البكلاوة ع الرخامه..
وولت طلعت..
وقفت فباب المروحه بان عليها قدام الحوش..
لقت عماد واقف ع لمياء يهدرزوا...
وعمر واقف بعيد شوي عنهم يتكلم بالتليفون..
غاليه برفعة حاجب:لميا..
التفتوا الزوز..
لمياء:نعم؟
غاليه:عدي لحوش عمي عاوني فتطييب عشي عرب الصاله..
لمياء بإبتسامه:باهي..شبحت لعماد وقالت..بالسلامه توا..
ومشت من القدام..
وغاليه مشت ولت للكوجينه دون ماتعبر عماد..
هو تنهد بضيق..
بعدين مشالها..
وقف فباب الكوجينه..
لقاها تستف في الحلويات فالمتارد..
هو ركز بنظره ع المتارد صغار مش كبار..
والليله في عزومه فالصاله للمصالحه بين عيت خريف وعيت عبداالله بعد خش فيها راجل خالة لمياء واتفقوا ان حسن يدفع حق البقرة ويادار مادخلك شر..
المهم..
المتارد هادم مش متاع عزومه زي هادي..
انتابه الفضول...
خش داخل...بش يشبع فضوله..
خدي طرف كوفيتي وقعد ياكل فيه وهو يقول:امم ..شن المناسبه؟
غاليه:مناسبه؟!!
عماد بلع وقال:قصدي الحلويات والبكلاوات والجو هدا كله..
غاليه برفعة حاجب:حاجه مالكش دخل بيها..
قلبه انقبض وقعد ساكت..
غاليه:ايه قولي فشن كانت تبيك لميا؟
عماد:احمم..توصي فيا ع حاجات اختها تبيهم..
غاليه:امممممممم...
يوزع فنظره ع الحلويات...بيموت ويسأل تاني بس الكرامه والكبرياء...!
ع خشة الحاجه فاطمه.:هي سقدي قلي الحاجات لحوش خوك..
وطلعت من حداهم...
عماد غمض عيونه وقال:شن في؟
غاليه:مادخلكش..
فتح عيونه:نسأل هكي وخلاص فضول..
خدت صفرة البكلاوة وطلعت وهي تقول:عرب جايين يخطبوا...
ومشت ...
هو رقيت حرارته للألف 🔥...
غمض عيونه بشده من الغضب وهو رافع قبضة يده...بعدين خبطها ع الرخامه قريب جابها لوطا..
وفتح عيونه ومشي طلع...
شبح قدام الحوش لقي خاله قاعد..
مشاله طول..
عماد:خال..
عمر رفع عيونه عن تليفونه وقال:نعم..
عماد وهو يوزع فنظره حواليه :ااا..بنسألك..ضيق عيونه وقال..حوش خالي ميلاد شن عندهم..
رفع عمر حواجبه..
بعدين رد عيونه للتليفون وقال:عرب جايين من طرابلس يخطبوا رزان..
ناره زادت استعرت..
مسح بيده ع لحيته..
بعدين شد فمه وهو يشوف لخاله اللي كان لاهي بتليفونه..
نزل يده..
ومشي طول ولا لسيارته..
وعمر يشبحله لين ركبها..
شغلها وتحرك بيها...
لف ع القطعه من الجهه التانيه..
لعند ماوصل قدام حوش خاله درس بعيد شويه وقعد في السيارة يراجي...
🍁🍁🍁🍁
"رزان"..
سمعت رزان صوت امها وهي تنادي..
فتحت باب دارها وطلعت..
مشت للصالون..
طق الباب وخشت..
ام مقداد وخواتها وامها ابتسموا لما شافوها..
هي ابتسمت مجامله..
سلمت عليهم ..بعدين مشت قعمزت قريبه ع امها..
ام مقداد؛عوينه وطارت بنيتي..
ابتسمت ابتسامه خفيفه وهزت راسها بإيجاب..
سعيده بإبتسامه؛ايه والله عوينه وطارت...
سكتوا شويه وهما يشوفوا لرزان..
بعدين كيف جت جدة مقداد تتكلم..
تكلمت رزان..
رزان:احمم..معليشي سامحوني ع اللي بنقوله تو..
فنصوا فيها امها وحناها فاطمه وغاليه..
وعيلة العريس شبحولها بإستغراب..
رزان:اني مانبيش نتزوج..وحتى كان فكرت فطرابلس مانبيش وبصراحه اكثر وضع خدمه ولدكم مايساعدني..واني وضحت الصورة لأمي وهي بدورها قالت البنت ماتبي وانتم اصريتوا واضطريتوني نتصرف بهالطريقه..
سامحوني مرة تانيه
وناضت من بحداهم وطلعت
وامها وعمتها وحناها مصدومين بقوة..
اما عيله العريس انحرجوا واضايقوا ع الآخر
برا
كان متكي بمرفقه ع الروشن وهو يشوف لحوش خاله..
نزل يده لما شاف سيارة تانيه جايه
درست فم الحوش بالزبط
ع طلعة النساوين من الحوش ووراهم غاليه وسعيده بقيلتها تنزل وراهم تتعذرلهم
ركبوا النساوين للسيارة وتحركت طول..
وغاليه وسعيده يشوفوا للسيارة بضيق شديد..
بعدين لفت سعيده وركبت بصعوبه وهي معصبه
وكيف جايه غاليه بتلحقها
شافت سيارة عماد
عماد شبح القدام وحط يده ع وجهه يدرق فيه
المشكله ان مرش الروشن مسكر ومظلم زياده
حركت غاليه راسها ايمين ويسار ولفت ركبت
خشت للحوش وهي تسمع في تكشيخ سعيده..
مشت تجري للدار..
وصلت وخشت..
لقت سعيده شاده ذراع رزان وتهز فيها وهي تعارك..
جت بتفكها منها فاطمه وقفتها لما شدت يدها..
شبحت غاليه لأمها لقت ملامح العصبيه ع وجهها..
سعيده:لاتقولي هادوم عرب خالتي بنحطها معاهم في موقف كيف وجهك ياحقيرة..لاتقولي عيب
ندير هكي حداحناي وعمتي وامي ونحشمهم قدام الناس!!
ياكلبه...
رزان نفضت يد امها بقوة وقالت بعصبيه:قتلك قبل قلت مانبيش مانبيش انتي ماعدلتي عليا وعديتي وقتيلهم تعالوا كله منك..
شهقت غاليه بصوت عالي لما شافت سعيده وهي تضرب فبنتها كف من قوته رزان جت طايحه ع سريرها..
سعيده بغضب:عارفه ليش اديري هكي عارفه..طيح سعدك وخلاص كان تحسابيه مازال بيدورك ياحماره..خلاص راحت عليك ياغبيه...
فاطمه:خلها تو غدوة ولابعد غدوة تسمع بيه خطب وتندم ..لكن بعدين الندم ماهو نافعها..
ولفت ومشت طلعت من حداهم..
وسعيده بعد شبحت لبنتها بغل من فوق للوطا..طلعت حتى هي..
اما غاليه..تنهدت بضيق وقالت؛ربي يهديك يارزان..
ومشت حتى هي طلعت وسكرت وراها الباب..
هي دموعها قعدوا ينزلوا سيل وهي تقول بغضب:والله لغيره ماكم عاطييني...
🍁🍁🍁🍁
في الليل..
تعشوا الرجاله من العيلتين اللي صاير بيناتهم الخلاف..
والاجواء كانت اريحيه..
ولهني نقولوا انحلت المشكله...🍃
بعد العشي..كل حد روح ع حاله..
🍁عماد
هديكا الليله ماقدرش يرقد قبل يسأل ويعرف شن صار فموضوع رزان..
في الكوجينه..
عماد:لالا خلاص الحكايه تمت..ماتخافوا من شي..
غاليه وع وجهها ملامح النعاس قالت:عماد من الأخير شنو تبي تعرف؟!
هو وجهه ولااحمر وقال بشي من الربكه:شن نبي ؟مانبي شي..نبي نهدرز عليك وخلاص..
غاليه:الساعه تلاته في الليل!؟
شبحلها شويه..بعدين تنهد..
ونزل عيونه لإيديه اللي كان يفرك فيهم ببعض..
غاليه:ردوهم..
قام عيونه فخالته..
غاليه:قات مانبيش نتزوج..تريحت!؟
هو قلبه كان يرقص من الفرحه..
سيطر ع نفسه بالغصب بش ماتبانش عليه فرحته...
مكابرة قال:واني..شن دخلي؟!..تتزوج ولاتقعد شن علاقتي بيها؟!
غاليه مطت شواربها بملل وقالت:باهي تصبح ع خير..
ومشت من حداه وطلعت من الكوجينه..
هو بعد طلعت ارتسمت ع وجهه ابتسامه حلوة..
تنهدت من اعماق قلبه..
بعدين مشي طلع وهو فقمة االسعاده
🍃🍃🍃🍃🍃🍃🍃🍃
وتعدي الأيام متسارعه
وهي تحمل فطياتها احداث ...
زي عرس خوله حماة نعيمه..
دارت عرس كبير..وهيجت فيه وفرحتها مش عارفه وين تحطها..
فالحقيقه عيلتها فرحانين اكثر منها..
بالذات كناين العيله..
لدرجة يوم الحفله لما جي راجلها روح بيها..
بعد طلعت من الصاله..
قعدوا ينقزوا ويهتفوا..
"افتكينا...افتكينا"..
ونعيمه ونور بدموعهم يضحكوا وقتها..
وطبعا دلال ماحضرتش..
🍁دلال اللي بدت ادور ورا حكايه مصير افراد "رتل العز" المفقودين منهم..
وتبي تعرف هل عمار من المفقودين..او الذين قضوا نحبهم..
في نفس الوقت..
كانت تحاول تركز فقرايتها لأمتحاناتها النهائيه..
اللي بدوا في أول شهر من سنه 2015...
🍁اواخر شهر يناير 2015..
وصلوا لقاعة الإمتحان..
دلال:اللهم لاسهل الا ماجعلته سهلا..
رانيا:وانت تجعل الحزن ان شئت سهلا..
زفروا الزوز..
وخشوا..
كان زين من ضمن المراقبين..
فاتت من حداه رانيا..
رانيا بإبتسامه:صباح الخير استاذ.
ابتسم زين ورد:صباح النور...
🍁🍁🍁🍁
ومن حال استاذ تغير لون الدنيا الأسود فعيونه وولا فيه الوان فاتحه جديده حلوة مبهجه..
لحال الأستاذ اللي ليه فوق الشهر وهو ملخبط..
اجبر نفسه اجبار ع عدم ملاحقتها..ولاعاد بدي يشوف فيها ويتحاشى فأي طريق ترفعه جهة كلية الهندسه...
وهدا كله عذاب...وتعب...وانهاك للقلب..
🍃واه من الحب من طرف واحد آه💔🍃
🍁🍁🍁
بس في حب من طرف واحد..
الطرف التاني يعلم بيه..
والطرف الاول يحاول يخفيه ويظاهر بعكسه المهم يقعد متواصل مع اللي يحبه..
15\2\2015..
الساعه 12:00قبل الظهر..
تزين في الطورطه وهي تتكلم بالتليفون..
غاليه:ياولدي مش هكي..الحاجات هدين اعراف تقاليد مانطلعوا عنهن..
نجمي:اولا معاش تقوليلي ياولدي بطلي تتعاملي معاي بالأسلوب هدا..
ضحكت غاليه..
نجمي بإبتسامه؛تانيا الاعراف والتقاليد مش قرآن منزل..فشرع الله نفسه مافيش امر يقول ان الأرمله لازم يردها سلفها..هادي جنايه ع المراة والراجل الزوز مع بعض..
غاليه بإبتسامه:صدقت..بالذات الراجل اللي فالقصه اللي حكيتلك عنها..اصغر من ارملة خوه ب 15سنه ظلم ليه وليها..
سكت شويه وهو مبتسم ومغمض عيونه..
وهي ضحكت ضحكه خفيفه غير مسموعه..
شويه وسمعت صوت حد جاي..
قالت:خلاص توا لازم نصكر..سلام...وصكرت عليه..
ع خشة محمد للكوجينه..
ابتسم بعيون يلمعوا لما شاف الطورطه وقال:آه بس لو ديريلنا وحده حتى حني..
غاليه بضحكه:هدي لينا..بس لغدوة إن شاء الله لما خواتك يجن..
محمد بضحكه:واخيرا نحقوا ونطقوا..
غاليه:ههههههههه..
رن تليفون محمد بنغمة رساله...
شافله..بعدين طلع بيه برا..
ابتسمت غاليه ورجعت لهت بالطورطه..
برا..
فتح الرساله...
وقراها..
(كل عيد حب وانت معايا واني معاك يامتغطرس)
ضحك محمد وقال:لكن امس مش اليوم عيد مش عارف شن اللي تحكي عنه..
جاته رساله تانيه..
فتحها ...
(ايه امس مش اليوم غير امس انت كنت لاهي خفت نبعتهلك تنفصل عليا يافصلان)..
حط يده ع وجهه وهو يضحك بعدين قال:ااه منها المتلفه هدي 💓
💕💕💕💕💕
فتح الدولاب بيطلع منه كشابيه شتويه بش بيلبسها ويولي بيها للقهوة...
اتفاجأ بقلب احمر..
مكتوب عليه DaDy...
ضحك وهو قارن حواجبه وقال:هدى شنو!؟
"مش ذوقي والله وصيت عليه حدهم وهدا اللي طلع معاها"..
التفت وهو يشوفلها بإبتسامه جانبيه وحاجبه الإيسار مرفوع ..
رباب بضحكه:حبيبي مالاش علاقه بعيد الحب والقطاف الفارغ مش لينا عيد الكفار هدا..
ضحك..
رباب :المهم..الكلمه اللي فنص..
مؤنس بضحكه:زابطك من الأول غير نراجي تفاجئيني..
رباب ضحكت بإندهاش وقالت:كيف عرفت!؟
مؤنس ابتسم بعدين قال:من لما اغمى عليك فحوش جدك وقلك سند للمستشفى لإني ماكنتش قاعد..انتي قلتي هبوط لكن اني بروحي فهمت انك حامل وتبي تفاجئيني بالخبر..
وقعدت نراجي..
هي ضحكت وقربتله ..
شداته من دجاكته بإيديها الزوز وهي تشوف لعيونه قالت:يعني مفاجأة فاشله..
مؤنس وهو يوزع فنظره ع ملامح وجهها قال:بالعكس..سمحه واجد..كيف صاحبتها..
قعدوا يقربوا لبعض..
لعند ما...
طق باب الشقه..
ضحكوا..
مؤنس باس راسها وقال:مستعجل توا ياشقيقة القلب..بعدين نتلاقوا ونحكوا واجد لين نشبعوا من الكلام..
ابتسمت...باساته من خده بعدين قالت:فأمان الله..
تنهد..بعدين خدي كشابيته ومشي..
وهي تشوفله بنظرات كلها عشق 💓
💕💕💕💕
هو هاليوم الشتوي كان مميز هلبه..
وفي من كان يراجي فيه..ع امل تصير حاجات اشبه بالمعجزة تصلح اللي انكسر..
وتبري الجروح..
وترجع للوجه الضحكه اللي من القلب..
وهي هكي كانت تراجي فكليتها..
كان اخر امتحان عندها فهالفصل..
كانت تراجي وتستنى ومتأمله هلبه..
تغريد:صقع سم اليوم..
رزان ابتسمت وقالت:ايه..
تغريد ابتسمت وهي تشوف لرزان:طالعه سمحه واجد اليوم..البالطو الحني عاكس علي بشرتك..ومع الصقع خدودك انحمروا وخشمك حتى هو منظرك تحفه...هههههه..
ضحكت رزان وقالت:يعني طالعه سمحه..
تغريد بضحكه :واااجد..
بعدين تلاشت ضحكة تغريد وهي تشوف خلف رزان..
تغريد :رزان شوفي وراك..
💕💕💕💕
كان خاش للكليه وهو فقمة السعاده..اللي قرر واخيرا يلوح خلافهم كله وراه...
رافع شعار..
لا للكبرياء في الحب..
مافيش كرامه فالحب..
الحب اقوى من كل الأزمات..
كان شاد فيده بوكس هديه حجمه صغير.
وماشي وهو يدور فيها وابتسامته ع وجهه..
وجهه يشع عشق وفرح وشوق💓..
وقلبه من لهفته سابق خطواته بوين..
بعد بحث دام لدقائق لقاها...
لكن...
ماكانتش بروحها..
لامش صاحبتها معاها...
حد تاني خالص..
حد مش متوقعه بتاتا انه حتوصل بيه الجرأة لهالمواصيل...
🍁ولاهي كانت متوقعه..
اصيل بإبتسامه:فاجئتك عارف.....
رزان:واجد!!
اصيل بضحكه:عارف..بس اني هكي راني اللي ماتتوقعيه مني ندير..راني بنادم جريء..ومن الأخير..صحيح وجه..
رزان غلبتها الضحكه..
وهو ضحك معاها..
وتغريد من بعيد شويه تشوفلهم وهي مبتسمه..
اما هو..
فكانت ملامح وجهه بروحها تعبر عن مدى قوة التحطم اللي صار لقلبه..
وصدمته هادي كانت بردع كل الصدمات اللي تلقاهم منها..
طول الفتره اللي فاتت وهو يصارع فكبريائه اللي هزمه ع خاطرها..بش ترجع لقليبه بنيته اللي مش قادر يرتاح من غيرها...
بنيته اللي يشوف فيها توا وصل بيها العقوق لدرجة انها بدلت بوها القلب المذلول فحبها...بغيره...
...يتبع...
