#العشق_المتمرد
#جمان_فريد
#الجزء_27_القسم_1
نحنا جينا..جينا جينا..
جينا جينا..
نحمي القايد...
نحمي الثورة..
نحمي الفاتح...
الفاتح أبدا......
كان من ضمن الضباط اللي يدربوا ...ومن باب الحماس كانوا يغنوا في الأغنية..المعروفه وقتها انها اغنية قوات الشعب المسلح...
شعور عمار كان شعور بالوطنيه عميق...
ايه وطنيه..هو هكي شايف..انه خش "للجيش" لأجل بلاده يبي يكون جندي من جنودها بش يدرأ عنها اي عدوان ممكن يصيبها يوم من الأيام...
بغض النظر ع كونه يحب القذافي ومعتبره رمز...
بس فعلا في ناس يحبوه...لكنهم وطنيين...
هو اني ممكن ماقابلت منهم حد ..بس نقول من باب الإنصاف..اكيد في...
🍁🍁🍁🍁
يومها كان واخد اجازة لمدة اسبوعين....بش يحضر عرس
الهادي....
💗💗💗💗💗💗💗
شن رايك؟
سمر بضحكه: تهبلي...
هندا : يعني نعجبه..
سمر:كان ماعجبتيه مايفهم..
ضحكت هندا...
بعدين مشت خدت البخارة وقعدت تلف ع حوش كله وتبخروهي مبتسمه..
سمر: اني بنعدي لحوش عمي..
هندا وهي تبخر: عدي..
ضحكت سمر ..وتوجهت للباب وطلعت...
🍁سمر تزوجت ابوبكر وعايشه هي وياه احلى عيشه وعندها منه زوز بنات وولد وهي وعمار نسوا اللي صار قبل..
او نقولوا عمار تناسى....
وتوا واقفه مع هندا وتساعد فيها بش تكسب قلب عمار..
عمار اللي مع مرور السنين خلا هندا اطيح فحبه...
لما عرفاته عن قرب..قوة شخصيته ورجوليته..واخلاقه العاليه وثقافته..خلتها تشوفه غييير عن خوه...حباته بكل تفاصيله..واكثر تفصيل حباته فيه هو كونه فارس...
وين يركب ع الحصان..تريح فعالم غير العالم...
أما هو فكان يتعامل معاها زي قبل ماتغير شي في حدود بيناتهم..مهما تحاول تقرب ماقدرتش تتخطى هالحدود...
لكن مايأستش ومازال قاعده تحاول...
🍁🍁🍁🍁🍁
عطه كسره ياربي عطه مايزرفه..
امينه تبكي بالعبرة..
كامله : الحق علينا حني اللي سكتنا عنه وماقلناش لباتك وخوك..وصل بيه انه يمد يده عليك هالكلب هدى..
امينه ببكي : قدام ولاده ضربني يمي..الولاد قريب ضربوه..
كامله : كلب كيفه يستاهل ...
انفتح الباب وخش طول وهو في قمة الغضب وولاد اخته وراه..
كامله بفرحه:عمار.
عمار ووجه يقطر غضب: الكلب هدى من امتي يضرب فيك..
امينه شبحت لولادها..
مؤنس "ولدها": قولي يمي تكلمي ..قولي انه يضرب فيك..وواخد عليك..
انصدمت كامله
عمار معاش يشبح فشي قدامه...لف وطلع من الحوش وهو قاصد مكان محدد...
كان جاي بالبدله العسكريه...
ع جية سمر شافاته وهو طالع استغربت لما ركب سيارته وتحرك طول ولحقوه ولاد اخته...
سمر:إن شاء الله خير...
🌴🌴🌴🌴🌴🌴🌴🌴🌴
الساعه 5:30مساءا...
طالعه تحط في شكارة الكناسه ..
حطتها وولت بتخش...
ع طلعة اختها:حميده ماريتيش الغربال وين..
حميده : في الحوش القديم..قربت منها وهي مبتسمه..تهبلي الصبغه بانت فشعرك اكثر ..
غاليه بضحكه: تعرفي حسيت بشعور مانحكيلك لما قصيته وصبغته..
حميده بضحكه: ماهو قتلك..
"ضمييييي فممممك".
رفعت غاليه حواجبها وحميدة ضحكت بتهكم...
الصوت اللي سمعوه كان جاي من حوش عمهم...وشبه تعودوا عليه من فترة للتانيه..
.....
تعرفي ياسعيده تخطي وجهي احسلك
سعيده.:وشن بديري كان ماخطيتاش
راويه "مرت حسن": سعيييييده...فوتيني ياسعيده خيرلك..
امال طلعت وقعدت تجبد في سعيده:خشي ياسعيده خشي غير يجي حسن بس وتو نقولوله يبرم ع اللي عنده ويلمها..
راويه بضحكه:تي غير يلموك انتي يامتاع سالم..
سعيده وامال فنصوا..
روايه: بايرات مصننات..ولفت ع صغارها جبدتهم من ايديهم ودخلتهم للحوش...
سعيده:باااااهي ياخامرة كان ماخليت حسن اليوم يقول ياشر اشتر مانبداش اني سعيده...
خشت لحوش اماليها وامال لحقتها..
من فوق...
صبريه مرت خليفه: عليك عيله طحت فيها مادخليش لازم يدبر وين نحولوا زي ماداروا نرجس وحميدا...
🍁روايه...صبريه...نرجس...
كناين عيت عبدالله..
روايه حرفه وواعرة وماتنقربش ..طرابلسيه...
ديما هي وسعيده مشاكل ...وحسن كان ديما واقف مع اخته وراويه ياما كلت منه طرايح لكن مادورتش مازال مستمرة😁
اما صبريه من تحت لتحت وعندها فجو الفتنه...كانوا يتجنبوا فيها...برغم انها ديما اطحطحلهم ...
اما نرجس فكانت مدلعه وحالتها بله...ماتحملتش سنه معاهم..وخلت حميدا يردها لطرابلس ويعيشوا غادي..
وحميدا عاد خاتم فصبعها....
🍁ميلاد بني حوش ع حاله...وسكن فيه من تلاته السنين..
والحاج رمضان وعيلته حولوا للحوش اللي كان فيه ميلاد...
حوش ميلاد فالوسط...بين حوش اهله وحوش عمه...
🍁🍁🍁🍁
واقفات في الكوجينه يهدرزوا..
غاليه : والله وين نقعد نفكر في سريب هالعرس النوم مايجيني..
حميده:يعدي يعدي ..ماتفكريش فيه واجد...هاكي..
عطتها فنجان القهوة وقعدوا يشربوا..
كان خاش عليهم ضي الشمس من الروشن...فجأة ادرق..
"سلام..ياقوم"..
غاليه بضحكه: وينك اليوم مختفي..
رمزي بأبتسامه:خدمه ليه ليه..
حميده :تشرب قهوة ..
رمزي : اللي يدير الخير ياميدا مايشاور...
ضحكت .. وطلعت من الدولاب فنجان ..مشت للشيشمه تمصمص فيه..
غاليه :طلعت نتيجتكم..
رمزي :غدوة إن شاء الله..
حميدة وهي ماشيه للبكرج بش تصب القهوة:نبوا
الزردة وحق الله مادخلي بيك..
رمزي :ههههههه..ياودي باهي غير جيبي القهوة...
قدمت ومدتله الفنجان من الروشن..
خداه وقال:صحيييتي...
حميده :سلمك..وولت لمكانها..
قعد يشرب ويشبحلهم..
غاليه ترشف من فنجانها وتشبحله بنص عين..
حميده بضحكه: غير قول قول شن عندك من سؤال..
بعد الفنجان وقعد يضحك لين كح ووجه ولا احمر..
غاليه بضحكه :خود اشرب..مدتله طاسة الميه...
هو خداها وشرب شويه شبح لعمته حميده:اما انتي ياميدا ..لازم من الإحراج...
ضحكت حميده..
غاليه بضحكه:باهي انت عندك ماتسأل حق..
رمزي مط شواربه لداخل وهو شاد ابتسامته وشبح ع جنب شاف من بعيد جده جاي:احممم..شبح لغاليه ...امتى بيجوا..
حميده: غدوة ياسيدي..
رمزي ضحك بإحراج..
غاليه التفتت لحميده:خلي الولد فحاله...شبحتله...غدوة إن شاء الله جايين..
هو غير عيونه وابتسم هز راسه بإيجاب بعدين شبحلهم:باهي..ماتبوا شي بنعدي..
حميده:ايه ايه...عدي للدكان جيبلنا كروت..
شبحلها :مشوار وحق الله..
حميده :ليش تسأل باهي!؟
ضحك:باهي باهي..وجاي بيمشي..
غاليه :اصبر خل نعطيك فلوس..
رمزي :تي عدي والنبي..ومشي...
حميده بضحكه:تلقي الفرخه رانيا تعد في الساعات
ضحكت غاليه...
💕💕💕💕💕💕💕
مقعمزة تشوف لحديده جلد شرتهاله منقوش عليها حرف R
حرفهم الزوز 💓
مبتسمه وهي تتأمل فيها : ياربي امتى يجي اليوم التاني مش قادرة نصبر..شهور ماشفته..تنهدت..ياه ياأصفر قداش استاحشتك...
"رااانيا"..
انخلعت ودست الحديده فجيبها..
خشت رباب للدار: اسمعي حطي للاسترا راك تنسيها..
رانيا بربكه:حطيت كل شي..
رباب خشت قعمزت: اطلعي عسيلي..
رانيا:انتي مش حترتاحي لين يطبك حمزة..
رباب بتضييقة عيون:اطلعي بلاتفتفيت زايد..
ناضت رانيا وهي تتأفف وطلعت من الدار...
رباب رن تليفونها البيلا اللي كان ع الهزاز..ضحكت وردت: الو..خلودي..
🍁🍁🍁🍁🍁🍁🍁
شن رايك نور ...
نور : ايه حلوات مع بعض..
دلال :نفكر نرفع القفطان هدا وقفطاني الأسود القصير..
نور: وقفطانك الفيروزي..يطلع فيك طلعه مش عاديه..
دلال:اوفر حسيته..يبي مناسبه فصاله..
نور: براحتك..
دلال تنهدت : تعرفي بعد عركة امس بين بوك وامك خفت هلبه..
نور بحزن:حتى اني..تخيلي يحطها ويقوللها حوش بوك ووصلتيله...
دلال: هدا اللي خايفه منه..لكن مرات نقول ان بابا دوة بس مايقدرش يخلي ماما...
نور:صح ع قد ماصار بيناتهم لكن مازالوا مع بعض...
دلال تنهدت وهي تفكر قالت:مازال عندهم فبعض نصيب..
سمعت نغمه رساله..تلفيونها نوعه "البطه كان تذكروه😅"
ناضت خداته من ع الطاوله وشافت الرساله...
دلال بإزدراء:مرزن دمه..
نور: انس؟
دلال :ايه ..كان نعرف من هي الحيوانه اللي عطاته رقمي بس..
نور: لكن سموح الوليد دلوله..
دلال :وفرخ..وبارد ويدررره الكبد ...ماناقصني غير المفرخ..
نور: انتي اللي هدا مش عاجبك ماشايفه روحك ياأختاه..
دلال بإبتسامة ثقه: مش شايفه روحي..بس اني عارفه قيمة نفسي مانطيحش الا ع الغالي...
ضحكت نور..
ع جية امهم: وتيتوا كل شي..ره من 7بنطلعوا غدوة..
دلال : ايه ماما كله واتي...
🍁🍁🍁🍁🍁🍁
الساعه 10ليلا...
احسن مادرتله..
عمار: وراهو بيطلقها اختي ماتقعدش مع واحد كيف الكلب هدى..
مختار: اني لونعلم بحالها معاه من الأول كنت طلقتها منه من زمان ولا نرضى لبنتي تعيش مذلوله..
عمار هز راسه بأيجاب..
ع جية امه بصفرة عصير فواكه طبيعي..
عمار ناض وخدي منها الصفرة..
هي قعمزت ..
وهو مد لبوه..
مختار::لالامانبي شي توا بنعدي نرقد خلاص..وقف..تصبحوا ع خير..
عمار وهو يمد لأمه :قدامك كل خير..
كامله :قدامك كل خير..
قعمز عمار بعد خدي طاسته شرب منها وقال: شنو حال اصاله وسليمه..
كامله: الحمدلله الزوز فخيار الخير..انت اشقى بروحك بس..
عمار ضحك بإستغراب: نشقى بروحي؟!!
كامله:ايه..امتى تستقر امتى دير ع حالك عويله..
عمار: مازال يمي في مواويل فراسي واجد نتمهن ونشقى بروحي...
كامله:غير ان شاء الله تمهن بكري مش بعد يفوتك القطار.
عمار : ههههههههههه..شرق وقعد يضحك ويكح..
وامه ناضت بسرعه بش تجيبله ميه وهي تضحك...
🍁🍁🍁🍁
مكالمه هاتفيه..
هندا ودموعها ينزلوا:ماعبرنيش ياسمر...حدها قالي شنو حالك وخلاص قعمز مع الاولاد شويه وعدا...
سمر:راهو انظر شنو صاير معاه..لإني منين طلعت من عندك ومشيتلهم..لقيته طالع من حوش هله وهو راقيتله..
هندا مسحت دموعها: اكيد ع شان اخته امينه..
سمر: توجع عليك بخت بختها..
هندا: بيني وبينك تستاهل هي من البدايه سكتت وخلاته يتمادى ع فعايله..لو قالت لباتها ولاخوها تراهم ادبوه وربوه
وعرف قيمتها..
سمر: ماتبيش اطيحه من عيونهم..تبيهم يقعدوا مقدرينه عشان ضراريها ..
هندا:وشن نفع اللي داراته اهو بدي يعطي فيها طرايح وخدي عليها
سمر بصدمه:خدي عليها..
هندا بإبتسامه متهكمه؛ايه...
🍁🍁🍁🍁🍁🍁
مقعمزين فوق السطح ويهدرزوا.
عمر :الله غالب هدى الباب المفتوح قدامنا..
محمد: الله لايربحه..ماعندهاش خير البلاد بش يديرلنا قروض ربي..
رمزي:اني تفائلت منين سمعت خطاب سيف السنه اللي فاتت قلت اهو بتتصلح ويصيرمنها..والباين كلامه كان اوهام فأوهام..
محمد: ماعندهم كان الأوهام..
عمر: لكن سمعت الشيخ الشويرف افتى بان القرض حلال..
محمد بضحكه: تلقاهم شادين عليه مسدس خلاه يفتي ويقول..يقلد فيه...القرووضض..حلااااال حلاااااال..
قعدوا يضحكوا عمر ورمزي...
سمعوا خطوات حد راكب الدروج...شبحوا جهته...بان عليهم..
هانيبال: مازلتوا مارقدتوا..
عمر: مازالت11راهي.
هانيبال بتضييقة عيون: شنو صارفيك..
عمر: قدمت وان شاء الله خير..
هانيبال هز راسه بإيجاب وتوجه للدار...
عمر قعد معاه بعيونه لين خش: قداش ليه حاط ملفه ماحصل حاجه.
محمد :هدى اللي نحكي عنه اهو بشهادته وماحصل شي..
رمزي :مادخلكش بيه انت اقرا وكمل تلقاها شهادتك يوم من الايام...ماديرش كيف بعض الناس..
عمر:اني عارف روحي مش متاع قرايه خديتها من قصيرها وسيبت..
"خدي الشهاده الإعداديه وبطل" ..
رن تلفيونه:ليلتكم سعيده..ناض من حداهم..
محمد:فيش فالح..
رمزي بضحكه: اني خايف يطلعله القرض يصرفه ع البنات..
محمد: ههههههههه خطرت عليا الفرخ عماد يخدم بش يصرف عليهن حتى هو ..
رمزي بضحكه:وشن عماد وشن عمر..وجهين لعمله واحده كيف مايقولوا.
محمد بضحكه:صدقت...
وكملوا العم وولد خوه هدرزتهم ع كل شي..فهالليله الصيفيه الهاديه...
اللي بعدنصها قطع الهدوء صوت عياط راويه اللي حسن كان يضرب فيها..
🍁🍁🍁🍁
عليك عار..القبيله كلها قعدت تدوي بيهم.
حميده:زيدهم منه...
غاليه:الشماته كيه ياحميده راهي..
حميده :ع اللي كيفهم ماهيش كيه..عطتها بالظهر ورقدت..
بينما غاليه رجعت تفكر فسريب العرس..
🍃ماسكه مسؤولية الحوش كامل..وكل شي يصير فيه...وامها معتمده عليها اعتماد كلي....
🍁🍁🍁🍁
راقده ع رجل امها وتفكر بعدين قالت: ماما نعدي غدوة لحوش جدي بعد يجن عماتي..
سعيده:عدي كيف قبل..حوش جدك هدى..
رزان:وانتي..
سعيده:مانعديش لمكان فيه العقرب عمتك زينب..
رزان: حتى اني نكرهها هي وبناتها..
سعيده؛لفع كيف بعضهن..
ع جية توفيق:يمي سوريتي اللي قلتلك عليها غسلتيها..
رزان:اني غسلتها تلقاها منشورة فوق..
هز راسه بإيجاب ومشي بش بيجيبها..
سعيده تمسح ع شعر رزان :سلم بنتي الحرة اللي طالعه لأمها.
ابتسمت رزان...
🍁🍁🍁🍁🍁🍁
تاني يوم....
الساعه11:00صباحا...
خشت السيارة تكلكس...
في الكوجينه..
غاليه بضحكه:زينب ...
حميده ضحكت وطلعت من فم البوابه...
🌸نزلوا من السيارة...
زينب تساوي في فراشيتها...
وضحكت لما شافت حميده من بعيد شوية وامها جايه ناحيتهم..وهي فرحانه بجيتهم..
نزل محمد من فوق وجاهم..
محمد: حاميييييزة..
حمزة بضحكه:اوووو..حمادي..وحضنوا بعض..
وخيري يضحك..
وقفوا البنات حدا امهم يراجوا بش يسلموا ع حناهم..
انفتح باب حوش ميلاد..
طلع رمزي وكان قمه في الأناقه..
صح لابس شرط تلات ارباع وبدي..لكن طالع خيال..
رانيا تسرقله في النظر وشادة ابتسامتها..
وهو ماشبحلهاش لين فات من حداههم..
كيف كملت زينب سلامها ع امها..وقف عليها رمزي..
رمزي :شنو حالك ياعمتي.
زينب:اهلا حبيبي..وسلمت عليه بالخد...كل مايسلم ع خد يشبح لرانيا..ورانيا تشوفله بالسرقه...
خايفه من حمزة😁..
بعد ما سلم ع عمته.. مشي لراجل عمته وسلم عليه..
ورانيا مرة مرة تشوفله وقلبها بيفررررر💓💓💓💓
سلمت ع حناها..
بعدين مشت لخالها محمد وقعدت تراجي فرباب اللي كانت عندها طقوس خاصه فالسلام ع محمد..
لازم يضاربوا باليدين قبل ويشد راسها يهزه بالقوة وهي تتلاحق شعره وتريشه...بش يحول..
حمزة: ههههههه...عاهات قسما بالله...
بعدوا عن بعض ورباب ومحمد يضحكوا..
محمد شبح لرانيا:رنروووووونه...جبدها ولف ذراعه ع راسها ..شنوحالك..هاااه...شنو حااالك قولي..
ورانيا تعيط وتضحك ...ورمزي يشوفلها وقلبه فحاله💓
بعد عنها بعدين سلم عليها بالخد.
"مازال ماريتوا طقوس سلام هانيبال ع بنات اخته خيااال 😂".
هي شبحت لرمزي:كيف حالك..
رمزي بدون مايشوفلها:الحمد لله...
لفت ومشت وهي قريب ادوخ..💓
وهو شاد ابتسامته💓
شويه وسمعوا كلاكس سيارة تانيه...
خلت قلب حمزة قريب طلع من صدره💓💓💓
...يتبع....
"في قسم تاني الليله بإذن الله...لعيونكم نزلت هدا توا وكتبته واني صايمه 😥...احبكم💓💓💓"
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
