#العشق_المتمرد "اختبار"
#جمان_فريد
الجزء 116القسم الأخير..
🌟..
《 انت وليت تتعاطى؟؟
ايه..نتعاطى فيك انتي..》
ابتسمت من بين دموعها وقلبها يرفرف بين ضلوعها من الشعور الحلو اللي تحس بيه..
كانت راقده ع السرير وعاطيه بالظهر..
وبنت خالها وبنت عمها راقدات لوطا..
الزوز مش جايهم نوم زيها..
حدهم لما حكولها اللي صار اتأثرت هلبه..
اما رفقه فكانت في حاجه عالقه فذهنها تفكر فيها..
شاركتهم فيها..
"اسمعوا"..
الزوز :امممم..
ناضت قعمزت وهي تشوف القدام بعيون ضيقه قالت:عماد لما كلمني قالي حاجه ماركزتش عليها هلبه وقتها بس علقت فراسي وتوا نفكر فيها..
شبحتلها حدهم..
اما رزان ناضت قعمزت وهي تشوفلها بإستغراب:شن قال.
رفقه:قالي..وهو يلوم فيك وقت اللي جاك ووراك المحادثه وسألك بتسيبيني انتي قتيله ايه..قالي...لما وصلتني صورة المحادثه وقريتها ماصدقتش..
رزان:مافهمتش..
قعمزت حدهم وهي فاتحه عيونها ع وسعهم قالت:وصلاته صورة!!
رفقه هزت راسها بإيجاب..
الزوز شبحوا لرزان..
ورزان وهي مضيقه عيونها قالت:قصدك يعني..هو ماهكرش حسابي وخش شافهم بروحه...
رفقه:لا..قال..وصلتني صورة..
حدهم بتفكير:في حد..اما انه اخترق حساب وحده منكم وصور المحادثه وبعتها او انه واخد تليفون وحده منكم وخش ع الرسايل وصور وبعت..
فتحت رزان عيونها ع وسعهم لما تفكرت حاجه وهي تسمع فكلام حدهم..
《 :بالله تعطيني تليفونك نشوف فيديوات الكسوة نبي نشوف شن اللي نقدر ناخده بش نبعته لخوي ابراهيم ضحكت وقالت..قال كله نبي نشوفه مانبي شي يفوتني
...
《 كان فيهاكيف تجيبيلي صونيه من الحلويات متاع العرس..اللي عندي عمر كملهم》
...
《 لمياء:ريت عمك محمد خاطم هربت..
ضحكت بعدين مدتلها الصونيه :تفضلي.
ابتسمت وخدتها منها وهي تقول :صحيتي نردهولك فعرسك انتي وعماد..》
...
《 لمياء:كل حد يشوف مقسومه يارزونه..ويرضى باللي عنده ومايمشيش ورا اوهام وحاجات مستحيل تصير..
وقفت رزان تقريض وشبحتلها بحده وقالت:شن قصدك؟؟..
لمياء شبحتلها وقالت:اللي فهمتيه..
طفت الشيشمه وشبحت لرزان من فوق للوطا ولفت بتطلع وهي تقول بنبرة تهديد:لو حرشتي مش فصالحك..لاني اول حاجه حنقولها وقتها..رقم عماد شن مازال يدير معاها وعلاش مازال تكلم فيه..وتخش بعضها بعدين...》
🍁رزان :
"لميا"..
فنصوا الزوز وهما يشوفلها بعد قالت اسم لمياء..
حدهم ناضت وقفت وقالت:خيرها لميا!!؟..
رفقه كذلك اسعفتها ذاكرتها وجابتلها مشاهد من اللي صار يومها..
وقفت حتى هي وقالت وهي تاشر ع رزان بإندهاش:نهار اللي خدت منك تليفونك..لما قالت بتاخد صور ولامش عارفه شني!!..
شبحتلها رزان وهي مصدومه وهزت راسها بإيجاب..
حدهم وهي رافعه حواجبها قالت:امتى صار!!..
رفقه:في اول اسبوع ليها هني..
حدهم بصدمه:نهار احرش..
رفقه:حاطين عليه قداش ليهم..مذكرة لما قتلك ع ماما وين مشت لمحل عماد ولقتهم غادي..
رزان مصدومه لين خلاص..
حدهم وهي تشوف لرزان:حقيرة..حقيرة...شبحت لرفقه بعدين وقالت:الصورة وصلت مروان حتى هو ولا عماد بعتهاله!!..
رزان شبحت لرفقه..
ورفقه شبحتلها بصدمه..
رزان قعدت تفكر بعدين قالت؛انتي قتيلي ع امك منين رتهم ع الخاص مش اتصال..وقتها نزلتي فيهم..هدي شكلها قرت المحادثه هديك كلها..
حدهم:ودارتها حتى فرفقه..
رفقه غمضت عيونها من صدمتها وحطت ايديها ع وجهها..
رزان :ياااربي!!مش مصدقه..
حدهم:والله والله هالمخلوقه ماحبيتها من اول ماشفتها..
فجأة رن تليفون رزان ..
شبحوا لبعض..
شويه مشت حدهم وخداته من ع الزيانه..
لقت المتصل بلقيس..
ومكالمه فيديو..
حدهم:بلقيس..
رزان:خيرها!؟..
نزلت رفقه ايديها من ع وجهها وشبحت لحدهم..
فتحت حدهم الخط..
ومشت قعمزت ع السرير..
"حدهم!!؟"..
وجهت حدهم التليفون عليها وع رزان ..
ورفقه مشت قعمزت وراهم..
بلقيس بضحكه:اجتماع الامم المتحده!!..
التلاته قعدوا يشبحولها ووجوههم ماتتفسرش..
بلقيس تلاشت ضحكتها وقالت:خيركن!!
🍁🍁🍁🍁
فكت رباطها؟..
غاليه:بقولي ليها 10ايام..
زينب:مازال صغيرة مسكينه..
غاليه:ماليهاش عام متزوجه..
كفايه؛هدا اللي يخش الوجيج..والميليشيات والمشاكل..
نعيمه:جارتنا نفس الشي صارلها..فالأول قالوا راجلها مات برصاصه طايشه..وبعدين طلعوا مصفيينه جماعته..تعرفوا هادي كانت اكبر معارضه للقذافي تسب وتلعن فيه وين ماتمشي وادير فعرايك مع النساوين المؤيدات..بعد مات راجلها انقلبت مرة وحده..ولت مؤيده اكثر من المؤيدات نفسهم وعرايكها ولوا مع جماعة فبراير..
حميده بتهكم:عليك حاله..
غاليه:والله ماكاسب فيها واحد توا اللي قاعد يبي ايام القذافي ولا اللي عكسهم..كل يوم البلاد ماشيه اللتالي وهما مازالوا يتعاركوا ع قطاف فارغ
كفايه؛تصدقي ياغاليه قبل نجي هني مشيت للمة وحده صاحبتي عندها قريبتها خضرا للنخاع المهم قعدوا يتكلموا ع حال البلاد وشن صاير فيها تعرفي شن قعدت تقول..ان شاء الله ديما لتالي ان شاء الله تخلا..ان شاء الله نية معمر تبان فهالبلاد الغبرة..
غاليه:هدي وحده مريضه..
زينب:ايه اني مؤيده ونحب معمر صح..بس كلمة الحق وبنقولها اغلب المؤيدين هكي شماته فالبلاد واللي يصير فيها بشكل مش طبيعي..تقول مش بلادهم الزفت..
نعيمه؛هادوا مايعرفوش شن معنى الوطن والوطنيه ناس ليبيا عندهم القذافي بس..بعده مستحيل يصير منها..وين تصير مشكله فالضي..ياغيبتك يامعمر..وين تصير حرب..يايوم من ايام معمر..وغيره وغيره..يقعدوا يندبوا وخلاص..والله البلاد ماصاير منها دام اللي زيهم فيها..
حميده؛الناس تقول هكي من قهرتها يانعيمه..
نعيمه؛باهي كان معمر مات تموت البلاد بعده ولاكيف..ماهو سيوره منتهي...
كفايه:نقولك حاجه..من الاخير هكي..اللييبين عارفين رواحهم مش قد يبنوا بلاد ويقيموها..ماتعودوش اصلا يتحملوا مسؤوليه زي هادي زي باقي شعوب العالم..عشنا سنين وحني تحت الشلاكه ونمشوا بالعصا لاعندنا كلمه ولاراي ولاعندنا ارادة..شعب زي شعبنا خدي ع الذل حيعيش باقي عمره مذلول..هدا علاش البلاد هادي مش حتستقر الا بمعمر واللي زيه..
نعيمه بألم:صدقتي..
سكتوا التلاته وهما يفكروا فكلام كفايه واللي صاير فالبلاد..
شويه تكلمت حميده..
حميده:ريتوا الدواعش فسرت..
زينب:سرت انكب مدينه فليبيا كلها..بعدين كانت اعز مدينه فيها..
كفايه؛اني نبي نفهم بس منين جو..وعلاش فسرت بالذات....
علاش مش فالجنوب ترا..هو اكتر مكان هاملينه سهل ع الدواعش يسيطروا عليه..كيف خشوا لسرت وسيطروا عليها وهي جايه في الوسط بين هدوكا وهدوما!!..
زينب بضحكه:كفايه تتفرجي ع برامج السياسيه هلبه شكلك..
كفايه بضحكه:ايه..والله فتحتلي دماغي..قعدت كل شي نفكر فيه ونحلل فيه..
حميده:كلامك عن سرت توا هو نفس الشي اللي اني نفكر فيه..
نعيمه تنهدت وقالت:دلال وين تشوف الاخبار عنها ادير عزي..
تنهدوا الأربعه بألم..
غاليه:افف..خلاص بالله صكروا هالسيرة ورانا فرح راهو خليتوني نتنكد..
زينب بضحكه:من كلامنا ع بنت برقه اللي ترملت شوفوا وين وصلنا..
ضحكوا..
غاليه بضحكه:هي خلاص ارقدن..نبي نرقد..
ضحكوا تاني..
وبعد اللي هادي غمضت عيونها وتحاول ترقد..
🍁🍁🍁🍁
في نفس الوقت..
عطها دي ماليه دوا..
عطها مايكرهها فجلدها تقعد تنتش وتريش..
عطها كيه وضربه ع الريه..
عطها بليه ولفعه ملويه...
عطها جدري حويل بدري..
عطها رصاصه فنص راسها..
هالباير العافنه الطنه المخمجه ناقة خوالي..
البنات يسمعوا ويضحكوا بصدمه..
بلقيس بغضب:ماتضحكنش كبدي عليها دم الشيطانه هدي.
حركاتها وتصرفاتها معاي بينتلي انها وحده واطيه..وتوا زدت تأكدت..
هدوا ضحك..
ورزان تنهدت..
بلقيس:باهي كيف بديري تو...
رزان:شن بندير..ماعندي ماندير ..اللي صار صار..
بلقيس:وتسلمي فحبيبك هكي بالساهل!!؟
رزان بدموع:هو اللي سلم روحه ليهم بالساهل..يتهنى بيهم ويتهنوا بيه...
رفقه:مايندريش عماد ع حقارتهم هادي يارزان..
رزان:رفقه..امتى عماد خطب سناء تراقوليلي !!..
رفقه غيرت عيونها عنها..
رزان:هو دار اللي داره بش يقهرني وبس..مش لأن لمياء ولااختها لعبن عليه..
حدهم:لكن اليوم جاك وقالك انه نادم وانه مستعد يفسخ..
بلقيس؛حققق!!!..
رزان بضيق:عماد ماغلطش فيا بروحي راهو خربها حتى مع امي وسيدي وخوتي..والله معاد مازال يقبلوه..وبعدين اني خلاص بعد اللي داره فيا..في حاجه فيا من داخل تصكرت ناحيته..نحبه صح..لكن في حاجه انكسرت بيني وبينها معاد تتصلح..
سكتوا وهما يشوفولها بحزن..
اما هي مسحت دموعها وقالت؛ليش اتصلتي بلقيس..
بلقيس بضيق:قبل بنقصقصكن ع الأجواء غادي وع عمكن فرحان ومتحمس ولا عادي كيف الحطبه زي عادته ..
ضحكوا البنات..ورزان من بين دموعها ضحكت..
رفقه بضحكه:فرحان ومتحمس هلبه..ديما ملاحظاته لما يشوف عماتي يديروا في حاجه للعرس ولايطلعوا ياخدوا شي..عيونه فيهم الفرحه باينه..
ابتسمت بلقيس بفرح..
رزان بضحكه:عليك حمارة يامصديه..يحبك راهو واجد غير مايعرفش يعبر..
بلقيس قعدت ترمش فعيونها وهي تلعب بشعرها قالت بدلع:عااااارفه..
حدهم:ردي بالك اديريله الحركات هادي يلوحك من فوق بعدين..
ضحكوا رفقه ورزان..
بلقيس:تو انتي بتعلميني يابيبي..عدي عدي..
حدهم:بيبي طياح سعدك..
بلقيس:ليش طيحيلي فسعدي ياوجه السفنزة..
حدهم:هيييي..كان اني وجهي زي وجه السفنزة انتي وجهك ياقلوب الدلاع..
وقعدوا بلقيس وحدهم...طاف عطيه..
ورزان ورفقه يضحكوا عليهم..
🍃بس مصعب الضحكه اللي طالعه من ورا قلب مجروح ويتعذب🍃
🍁🍁🍁🍁
واه منه المجروح جارح القلوب..
راجا لين صبح الصبح وركب سيارته وهرب..
عارف روحه بعد اللي صار بينه وبين رزان اخر مرة مش حيقدر يشد فرينواته زي مانقولوا..
حيقعد يجري فجرتها وممكن يرتكب افعال مجنونه هو مش حاسبلها حساب..
بالذات كان قعد السرتاوي المستفز قدام وجهه ليل نهار..
🍁وياسراته يامستفزين..
محلاكم..
حتى الإستفزاز اللي يجي منكم يهبل..
نحكي ع مختار اللي حرك شعور الغيرة عند سند..
مش الغيرة الحبيب..
لا غيرةاب ع بنته..
ديما يقول لآسيا بنيتي ديما يحس انه بوها..
مافي حد يخلي طلباتها تتنفذ غيره..
مافي يحقق فأمنياتها الطفوليه البريئة زيه هو..
مافي شي يغلى عليها هو بس اللي يحسبها فكل شي ..
🍁وهو يشوفلها اليوم كيف توريله فالحاجات اللي شراهم مختار حس بضيق شديد بالذات وهو يسمع فيها كيف تحكي بحب عنه..
اسيا:وحكالي حكايات حلوة..متاعة الارنوبات..
سند ابتسم بضيق وقال:اممم..شكلك وليتي تحبيه اكثر مني..
اسيا:هييي..لالا..من قالك..
سند:باهي من احسن سنودي ولاموخا..
اسيا:سوا سوا..
ضحك عليها كيف قالتها بعدين قال:باهي اني نحبك انتي اكثر من الكل..
اسيا بفرح :اكثر من روني اختك!...
سند بضحكه:انتي ورونا سوا سوا..
اسيا:حتى انت وموخا سواسوا خلاص..
ضحك بعدين قال :باهي..خل نوض نجيبلك حاجه خديتهالك لما كنت مسافر..
ابتسمت بفرح وقالت:باهي..
ناض من مكانه..حط يده ع راسها وشفشف شعرها وهو يضحك وطلع...
زينب اللي كانت مقعمزة تتفرج عليهم قالت لآسيا:سنودي احلى واحد ولا..
اسيا شبحت لزينب وهزت راسها بإيجاب وهي مبتسمه..
ع جية حناها بصفرة الفطور حطتها قدام زينب وهي تنادي:ياكفايه..ياحميده..
جت غاليه قعمزت..
وبعدين طلعوا حميده وكفايه من الدار مشوا وين مافي الصفره وقعمزوا..
من جهه تانيه جت دلال بالصفرة ووراها رانيا..
حطتها وقعمزوا..
دلال:نووور تعالي...اسو هي ماما..حنين نورهان..
اسيا جت لأمها بسرعه..
في الدار..
نور ناضت وقالت:هيا نورهان وحنين..
نورهان:باهي..
ناضت ..
نور:حنين هيا.
حنين:شوية بس..
مشت نور طلعت هي ونورهان...
حنين:نجيبلك فطور..
روان:فطرت..
حنين قعدت تشبحلها ماتبيش تخليها بروحها تخاف تقعد تبكي..
لأن روان الفترة الأخيرة بدت تتحسس من وضعها بالذات لما تشوف البنات يمشوا ويجوا ويلعبوا وهي مش قادرة..
ناضت حنين وقالت:شويه بس..
مشت طلعت تجري من الدار..
حميده:بري افطري ماما..
حنين:باهي..
مشت وقفت ع صفرة البنات وقالت:نور تيريلي نص..
نور:باهي.شن تبي..
حنين:تيري زوز بالشاميه..
نور:زوز علاش؟..
حنين:اني وروني نفطر معاها..
اسيا شبحت لحنين بعدين شبحت لامها وقالت:ديريلي ماما نفطر معاهم..
نورهان :حتى اني..حرام روني ديما بروحها..
نزلوا دموع رانيا..قعدت تمسح فيهم وهي ترشف..
دلال شبحتلها بضيق..
نور:باهي..
دارت للبنات كلهم نفاص..
بعدين ناضت مشت للكوجينه جابت صفرة صغيرة حطت فيها النفاص وقالت:هي تعالوا..
مشت نور وهما وراها..
والنساوين معاهم بعيونهم..
زينب شبحت لرانيا لقتها تمسح فدموعها ودلال تكلم فيها فهمت الحكايه..
تنهدت بألم..
ودموعها طاحوا حتى هي..
نعيمه شافتها وقالت:ازمه وتمر..
غاليه:تو تصح كراعها وتولي تجري وتلعب معاهم..
كفايه قعدت تمسح ع ظهرها..
حميده:امسحي دموعك خلاص وكملي فطورك..
مسحت زينب دموعها وقعدت تاكل..
اما داخل...فالبنات قعدوا يفطروا مع روان وهما يتفرجوا ع التلفزيون ..
وروان برغم انها فطرت لكن اللي داروه البنات فرح قلبها البريئ وفتح نفسها ع الماكله..
"اسووو"..
اسيا:سنودي.
حطت النص فالصفرة وطلعتله تجري..
🍁🍁🍁🍁
الساعه 12:00قبل الظهر..
ساوت وشاحها ع المرايه..
بعدين التفتت للسرير خدت شنطتها متاع الحوايج..
و شنطة اليد..
وطلعت طول بيهم من الدار..
لقت راجلها مقعمز فالصاله يتفرج ع التلفزيون..
لمياء:هيا اني واتيه..
شبحلها بعدين رفع حواجبه وقال :هي..
ناض..
مشي للتلفزيون صكره..
وحول خيوطه من الضي...
وجاها خدي الشنطه منها..
لمياء:خل ندور ع الحوش انت انزل واني تو نلحقك..
عمر:تمام..
مشي للباب فتحه وطلع..
وهي دارت ع الحوش تشوف الغاز والسخانات واي حاجه ليها علاقة بالضي والميه..
تأكدت ان الامور كلها تمام..
توجهت للباب..
وطلعت وصكراته بالمفتاح...
بعدين حولت المفتاح..
وصكرت باب الحديد..
ومشت نزلت..
🍁🍁🍁🍁
خلال ربع ساعه..
كانوا في القطعه..
نزلت لمياء وعمر معاها بالشنطه..
وصلها لفم البوابه..
خشت داخل...
وهو مشي بسرعه بش يلحق ع خوته ويمشوا للجامع مع بعض..
هي بعد خشت وسلمت ع الكل...
قعمزت تهدرز مع زينب..
اما الباقي اللي هادي وراها حاجه ناضت اديرها..
زينب:بيسافر هو وياها لتونس اسبوع..
رفعت لمياء حواجبها وقالت:ماشاء الله..
زينب:السفرة هديه من كفايه كلا هو ياناري اللي هناك حطه فالعرس والشقه..
لمياء :والله الكسوة مالازم منها الدنيا غاليه نار...
زينب:حتى بلقيس عييت وهي تحلف وتقول مانبيها..
لمياء:بيني وبينك..طروح قدامكم وخلاص..هلبه يديروا فيه الجو هدا..قدام ماليه دير روحها ماتبي شي..ومن وراهم تقعد تسحن فالراجل..
زينب؛ياودي بلقيس مش متاع الجو هدا..البنت عينها معبيه وبنية اصول ماديرهمش الحركات هادم..
لمياء مطت شواربها للأسفل وقالت:بالك
زينب قعدت تشوف للتلفزيون..
ولمياء كذلك بس كانت تقول فنفسها"مش راضيين فيها كلمه..طبعا منهم من قبليتهم..هي وسعيده ومرام مايوصل فيهم حد!!"
🍁🍁🍁🍁
الساعه 3:30بعد الظهر..
في المستراح..
حمزة:قال بيجي يوم الآثنين..
زينب؛وباهي انت امتى تولي..
حمزة:الثلات ان شاء الله..
زينب:باهي ولدي ربي يفتح عليك وييسر امرك..ايه حقه قولي..شن جو الدكتورة خنساء ..
ضحك حمزة وقال:تسلم عليك..
زينب:وليت تكلم فيها!
حمزة بضحكه:ماك تلحلتيلي..
زينب:هههههههه..
داخل ..
فوحده من الديار..
نور:ياناري ع تالا مسكينه..
رانيا:معجبه بيه هلبه!
قولي تحبه شن معجبه بيه هادي..
دلال وهي راقدة ع بطنها ومتكيه براسها ع يدها:البنت امازيغيه والامازيغ مايعطوش عرب مشروع فاشل..
رانيا :صح..
"شيتكم خالاتي المحفنات"...
ضحكوا..
رباب بضحكه:شنجو..
كلهم ردوا بأصوات متقطعه:تمام..
رانيا:جيبهالي فرفورة خالتها..
مشت رباب لرانيا قعمزت حداها ومدتلها إباء خدتها وبدت تلعب فيها..
رباب:لمياء من امتى هني..
دلال :من قبل الظهر..
نور:جايه بشنطة هكي كبرها..
حركت رباب شورابها وهما مضمومات يمين ويسار..
دلال:بتباتي هني الليله ولا..
رباب:بعد جهد جهيد اقنعته ع خاطر الحنه..
رانيا:بتحني انتي وخالتي كفايه وخالتي نعيمه وحناي والبنات الصغار
دلال؛حتى سميه بتجي تحني هني.
رباب:مش بتمشي لمخوياتها..
دلال:اشبح شن عندهم قالت مايقدروش يحنوها..
رانيا:باهي اللي هديكا حامل رانا حصلنا فيها حتى هي..
🍁🍁🍁🍁
في حوش ميلاد..
بتمشي قصدك!
رزان :مالا شنو..نعدي ونحط عيني فعينها الشيطانه هدي..
حدهم:نبيها تنفضح اني..
رزان:حتى اني..لكن مافيش دليل عليها..
رفقه:صح اكيدة ماسحه كل شي قداش ليها..
حدهم؛حقيرة..نفدت بجلدها..
رزان بضيق:ربي ياخد الحق ..
حدهم ورفقه:آمين..
🍁🍁🍁🍁
وعدا باقي النهار عادي..
وجي الليل..
تحديدا الساعه 10:00 ليلا..
مجموعة لصقات حنه محطوطات ع المندار..
واللي بيحنوا..
قعدوا يفرزوا فيهم عن بعض..
رانيا..نور ..رزان ..دلال..حميده..
دلال هي اللي اطوعت بروحها تحني امها وهالشي فرح نعيمه هلبه حست ان بنتها بدت تطلع من حزنها بالشويه بالشويه..
رانيا بتحني سميه..
وكفايه بتحنيها كنتها..
وحميده بتحني رباب وتعاود ع التلصيق
بينما غاليه بتحني امها..
ورزان حصتها البنات الصغار..اتفقوا معاهم يحنوا ايديهم بس ومايقولوش انهم يبوا يحنوا رجليهم بش روان ماتتحسسش..
البنات مدايرات دايره ع رزان وهي تلصق لروان الأولى..
ولمياء مرة مرة تشبحلها فشبحات كره ورفقه مركزةعليها وشاده روحها بالسيف..
غيرت لمياء عيونها جو فعيون رفقه..
رفقه غيرتهم عنها وقعدت تشبح لرانيا وسميه..
لمياء رفعت حاجبها وقالت:ماتعرفيش تحني رفقه..
رفقه بدون ماتشبحلها:تس..
لمياء:ماتحبيهاش بكل..
شبحتلها بحده وقالت:نكرهها..
قامت عيونها رانيا فرفقه وسميه شبحتلها معاها الزوز بس اللي انتبهوا ع رد رفقه ع لمياء كيف كان حاد..
لمياء:زي امك شكلك قالولي البنات ماتحبهاش..
ابتسمت رفقه ابتسامه صفرا..بعدين ولت تشبح لرانيا وسميه..
لمياء دارت روحها عاديه ومن داخل ماتخلي ماتقول عليها..
حميده:مساويه ولا..
شبحت نعيمه للصقه وقالت:ايه..
حميده:حني دلال..
دلال قربت صونيه الحنه وبدت تحني فرجل امها..
وحميده مشت لرباب بش تلصقلها..
عيون غاليه وهي تحني فرجل امها كانوا مع حميده..
لو كان توفقت مع راجلها راهي مقعمزة ويلصقولها حتى هي لكن ربي ماارادش تعيش لحظه زي هادي الا فعرس هانيبال بس..
تنهدت بضيق وولت ركزت ع رجل امها اللي تحني فيها..
والحاجه فاطمه تسبح..
🍁🍁🍁🍁
برا..
يلعن بو التكبيد اللي يدير فالراجل هكي..
مالك:قصدك انت مش مكبد توا..
محمد وجهه ولااحمر وقال:تحشم ياكلب..
مالك بضحكه:عادي ياخال شن فيها كلنا كبدنا ومعترفين..
محمد:هدوكا انتم اللي ماتحشموا..
ضحك مالك..
ع خشة توفيق للمربوعه:السلام عليكم..
ردوا عليه وقالوا :وعليكم السلام..
توفيق:وين الباقي..
مالك :مروان طلع يتكلم بالهاتف..
وسند هوينا راقد غادي..
توفيق:حمزة..
محمد:روح من قبل العصر عنده خدمه..
توفيق:تمام..
محمد:شن جو اول خدمه فهالقهوة جديده..
توفيق بإبتسامه:الامور تمام الحمد لله..
محمد؛ربي يفتح عليك..
توفيق:آمين..
🍁🍁🍁🍁
رفقه بالله جيبي طاسه فيها ميه عاديه من الشيشمه..
رفقه:حاضر..
ناضت ومشت طلعت من الدار..
وهي ماشيه عترت فحافه البساط قريب طاحت..
"ياساتر"..
فنصت عيونها وشبحت لفم الحوش لقت مروان خاش وماشي بطريقه للكوجينه بدون مايشبحلها..
هي ضمت شورابها لداخل بعصبيه بعدين مشت للكوجينه..
وخشت ..
لقاته فاتح التلاجه ويربش فيها..
وهي خدت طاسه وعبت فيها ميه..
عبتها..ولفت بتمشي تطلع..
يصكر مروان التلاجه..ويلف للرخامه..
يضرب مرفقها الميه تتبزع عليها...
رفقه:هييي..
هو ببرود:اسف..
وفات من حداها ومشي للرخامه وفيده شيشة شراب زبادي..
فتحها وقعد يشرب عادي جدا..
هي قريب انفجرت..
ولت للاونيدينو..
وفتحت الشيشمه وصبت من جديدوهي معصبه..
وكيف جت بتمشي..
هو لف بيمشي لسطل الكناسه..
يخبطها تتبزع عليها مرة تانيه..
مروان ببرود:اسف..
ومشي للكناسه حط الشيشه ..
بعدين مشي طلع..
هي قريب انفجرت من الغيظ
"رففقااااا"..
رفقه بغيظ عيطت عيطه مكتومه..
بعدين ولت صبت الميه فالطاسه..
ولما جت بتطلع شدتها بإيديها الزوز ومشت طلعت بيها من الكوجينه ووصلت للدار..
خشت عطتها لدلال..
كفابه:خيره حوايجك مبلولات هكي..
رفقه بنرفزة: كله من ولدك البارد ياعمتي...
ولفت ومشت طلعت.
غاليه بضحكه:قصدها مروان ريته منين خش..
ضحكت كفايه وهما ضحكوا..
ولمياء دايرة روحها لاهيه بتليفونها..
🍁🍁🍁🍁
مقعمزين فدارهم
يهدرزوا..
ميلاد:وليش ماحنيتي؟..
سعيده:بعد يطلع رموزة إن شاء الله...
ميلاد رفع حاجبه وقالت:اني خاطري فيها..
سعيده:ههههههه..يطلع رمزي بإذن الله..
نحنيها من هنى لهنى..ومن هنى لهنى..
اشرت في المرة الأولى ع يدها لذراعها..
والمرة التانيه من رجلها لأعلى الساق..
ضحك ميلاد..
سعيده تنهدت وقالت:نبي هالشهرين يعدن كيف الريح..
ميلاد:ومن سمعك..مش قادر نصبر حتى اني ع هالشهرين..كان نلقى نرقد فيهم وتنوضيني وانتي تقولي صبي روح برمزي..
ضحكت سعيده..
تنهد ميلاد وشبح القدام وقال:من شوقي لهداك اليوم خايف مانلحقش عليه..
تلاشت ضحكتها وهي تشبحله بخوف..
ميلاد؛حلمت بسيدي يقولي اني قاعد بروحي ياميلاد مافي حد عندي نهدرز عليه تعال اقعد معاي..
سعيده والدموع فعيونها:ياراجل خيرك انت..اني نبي نفرح مش ننغم..
ضحك ميلاد وشبحلها وهو يقول:خايفه عليا قصدك..
ضرباته ع ذراعه وقالت بنبرة مخنوقه؛عليك تافه..
ميلاد:ههههههههههههه..
سعيده بدموع:اضحك اضحك رعش عظامي واضحك..
وميلاد يضحك عليها وخلاص..
🍁🍁🍁🍁
مشي جو الحنه بالهدرزة والضحك..
ومرة مرة وحده تغني وهما يردوا هكي..
وقعدوا هكي لين كملوا..
رقدوا البنيات الصغار..
وباتت معاهم رزان ليلتها
ورانيا كذلك باتت حدا رباب بش تعاني إباء..
وغاليه تعاني فاطمه الصغيرة..
اما حميده..
مشت رقدت مع باقي البنات ولمياء فالدار التانيه..
🍃🍃🍃
عدا يوم السبت..
عادي..ع نفس الروتين..
استعدادات للعرس وخلاص...
🍁🍁🍁🍁
جي يوم الاحد..
اللي يعتبر اول يوم فالعرس..
🍁خشت غاليه من فم البوابه وهي تشوف لتليفونها بإبتسامه..
فاتت من باب المروحه وقالت:اليوم بس مطر..باقي الاسبوع مافي لنهار الجمعه بإذن الله..
زينب:مليح هلبه..معناها يركبوا الخيم غدوة إن شاء الله..
غاليه وهي تشوفلها بإبتسامه :إن شاء الله..
ع طلعة كفايه وفيدها سورية مروان اللي قاللها حدديهالي..
قعدت تحرك فيها وتغني..
يالله كملها علينا.. يالله بالفرح بدينا..
ردوا وراها غاليه وزينب وهما يضحكوا..
يالله كملها علينا يالله بالفرح..
طلعت دلال من الدار وهي شاده آسيا وتغني..
هدا عرس حميده الباشا..من المطار يبان فلاشه..
خالاتها لما غنت..زغرطوا..حتى من زينب..
وفاطمه طلعت من دارها وهي تمشي وتصفق بإبتسامه..
صفقوا معاها..وقعدوا يغنوا فمقطع دلال..
طلعت نور من الدار بالدربوكه ووراها رانيا ورفقه..
نور:وسعوا وسعوا..
وقفت حداهم وبدت ادربك..
كفايه:..
يامولاي علينا كمل ..ماهي بإيد اللي يتجمل..
وهما يرددوا معاها ويصفقوا ويزغرطوا..
والبنيات الصغيرات يرقصوا..
ع طلعة حميده من الحمام..
كانت ادوش
خشت فيهم طول وقعدت تغني..
رفاع بناتي فغمره..ان شاء الله عرسه بطولة عمره..
كلهم زغرطوا ...
وكفايه شاشت..
حزمت بسورية مروان وقعدت ترقص فنصهم..
وهي تغني..
هدا عرس صغير خواه...صونه ياربي وارعاه..
وهما يرددوا وراها بحماس..
ويصفقوا ويزغرطوا..
برا..
مالك بضحكه:جو..يسهفوك ادير عرسك..
مروان ضحك..
محمد ابتسم ومشي بيطلع من الجردينه متوجه للحوش والولاد وراه..
داخل..
جت كفايه لأمها وشدتها من يدها وقعدت ترقص فيها وتغني..
ياسلم ماجاب حزامك..وقفوا رجاله قدامك..
من فم البوابه خشوا لمياء ونعيمه اللي كانوا يرفعوا فحاجات للمخزن..
كانوا مبتسمات ويصفقوا وهما يشوفوا لكفايه كيف ترقص في امها..
ضحكوا..
لما خشت الحاجه فاطمه وقعدت ترقص هي وبنتها..
نعيمه..
حوشنا تريا ع تريا....مادام اميمتنا حيه..
زغرطوا وبعدين رددوا معاها..
حميده..
ياإميمة العريس تعالي..فرحانه وعطاك العالي..
وفاطمه كانت فرحانه من قلبها..
عرس اخر العنقود ديما غير..
والحاجه فاطمه اقرب اولادها لقلبها..
ميلاد..ومحمد..
الكبير والصغير..
فرحتها بعراسهم ماكانتش تشبه فرحتها بعراس باقي خوتهم وخواتهم💖
وقفوا الولاد قدام الباب وهما يشوفولهم...
محمد حتى من عيونه يضحكوا..
فرحان فرحان..
وزادت فرحته لما شاف فرحة خواته وصغارهم وصغار صغارهم..
وامه..
امه اللي اول مرة يشوفها هكي فرحانه بكل معنى الكلمه لفرحته هو..
هما مالاحظوش الشباب وهما واقفين..
بس عين رانيا طاحت ع خالها محمد وهو واقف يشوفلهم وابتسامته شاقه وجهه..
حبت تمازحه..
غنت بصوت عالي وهي تقول..
يامبروك عليه الشيخه..وافتكينا من تكشيخه..
التفتوا وشافوا وين ماهي تشبح..
ضحكوا وقعدوا يرددوا فيها بصوت عالي..
ومروان ومالك يضحكوا..
ومحمد يضحك وهو يحرك فراسه ايمين ويسار..
كفايه..
ربي مايغيبلي صوته..الغالي لصغير فخوته..
ومحمد يضحك..
وهما يغنوا ويزغرطوا..
في عز هالجو الحلو..
وفعز تأمل مروان لأمه وفرحتها وحركاتها وهي ترقص بإيديها ..
عيونها جو ع حاجه..
خلاته يفنص بيهم تفنيصه قريب طلعهم وقال:يماااا..
انخلعوا وشبحوله..
ونور بطلت ادربيك..
كفايه:خير دعوتك!!..
مروان وهز رافع حواجبه بصدمه:السورياااا !!..
شبحولها كلهم..
عيونهم جت ع المحزمه بيه كفايه..
هي نزلت عيونها وشافتها بعدين شبحتله وهي تضحك بربكه وتفك فيه وتقول:حاااضر تو نحددهالك توا توا
ولفت ومشت بسرعه للدار وهما يضحكوا..
رفقه كانت تضحك ع مروان..
هو شبحلها..
هي شدت ضحكتها وحاولت ادير روحها عاديه..
غير عيونه عنها وقال بنرفزة:المشكله هادي اغلى واحسن سوريه عندي الهم..
محمد بضحكه:ماتغلاش ع امك..
مالك:خليهالها تكمل بيها العرس..
كلهم:ههههههههههههههه..
مروان :هيهيهيهي..معاش تعاودها..
ولف وومشي..
ومالك ومحمد لحقوه بش يلبسوه..
اما اللي داخل رجعوا كملوا شوطهم..
🍁🍁🍁🍁
في ناس..
لما تغلط..وتعترف بالخطأ وتندم عليه..تحاول تصلحه بكل الوسائل..
بس في اللي يغلط..ويعترف بالخطأ ويزيد يلبز ويلبز ويخربها..
ايه عماد..
بعد اللي صار اخر مرة..
اخر شي توقعت تشوفه رزان منه..
وهي نازله من سيارة خالها ومعاها بنت خالها..
تشوف سيارته درست..
ونزلوا منها..
نادرة..
وسناء..
وهو نزل..
صكر الباب وجي لنادرة وسناء جنبها ومشوا مع بعض لفم البوابه وهما يهدرزوا..
ورزان..
مصموووته..
مصدومه..
ع قولت إليسا..
بجد..ومش بنطق...
حدهم:رزان!..
رزان:وتقولولي مسكين ويسخف وياناري عليه!!
حدهم:فوتيه هدا اثبت انه واحد تافه..
رزان هزت راسها بإيجاب والدموع عالقات فمحجر العين..
بعدين مشت تركب جري..
ووراها حدهم..
🍁🍁🍁
🍃صحة الوجه..
عنوان لعيلة لمياء..
تمام هما عزموهم ع العرس..
بس عاد مش لدرجه يجوا من اول يوم ..
ومن النهار!!..
لا ومش هكي بس..
خطيب بنتهم هو اللي يجيبهم!!..
طبعا!!تخطيط لمياء من غير سؤال..
تبي توصل رساله كبيرة الحروف وبخط واضح...
لكل من تسول له نفسه خطف حاجتهم منهم..
هما يخطفوا عادي..
اما ينخطف منهم..لاابدا مستحيل..ولم ولن تسمح ممثلة آل مصباح صحاح الوجوه.."لمياء"..
🍁🍁🍁
في الكوجينه..
كفايه بهمس:لاقالت لاخبرت..
غاليه بهمس:بتقول معزومين ع العرس..
كفايه:قصدي اني مش فاهمه كيف؟!شافت عيت عبودة داروه..ولا عيت الصيد"اهل سميه"..تي هما عيت عمي عمي خو سيدي الله يرحمه ماجوش!!..
غاليه تنهدت وقالت:خلاص هدا اللي صار توا الله غالب..
خدت غاليه صفرة الضيافه وطلعت بيها..
وكفايه قعدت في الكوجينه بروحها وهي قريب تنفجر من الغضب..
🍁🍁🍁🍁
الساعه 5:00عصرا..
صكرت غاليه من رزان وقالت لرفقه:جايات هي وحدهم..افتحن المنظومه واقلبنها ع روسكن باهي..
رفقه بضحكه:وكانك مغلوله..
غاليه قرنت حواجبها وهي تضحك وشدت خشم رفقه وهي تقول:اني غاليه مش مغلوله..
طلقتها ومشت طلعت من حداها
ورفقه ضحكت والتفتت للمنظومه وهي تشوف للدسكات اللي جو معاها..
🍁🍁🍁🍁
واقف يستنى فخطيبته..
انفتح باب حوش خاله..
طول شبحله..
كانت حدهم طالعه منه...
وبعدها طلعت هي...
حدهم تمشي للخلف وتقول:مش مصدقه امتى يبدا العرس يافرحة بلقيس..ههههه هي اللي بتقيم عرسها..
ضحكت رزان..
بعدين تلاشت ضحكتها لما جت عينها عليه ولقاته يشبحلها..
لاحظتها حدهم والتفتت شبحتله بنظره حقد بعدين شبحت لرزان:ولا تعبريه ولاتقيميه من ارضه..
ابتسمت رزان بألم:خلينا توا في عرس عمي محمد.. ضحكت وقالت..عمتي غاليه ناويه ع نيه...
ضحكت حدهم..
"عماد"..
تلاشت ضحكتها وشبحت كيف سناء جاته ووقفت عليه..
الموت جتها..
حدهم شدتها من يدها وقالت:هي تعالي..خدتها ومشوا طول لفم البوابه...
ورزان كانت مخنوقه بدمعتها بتموت...
حاولت تتماسك وتتمالك نفسها..
لازم تبان قويه..
لامباليه..
وباردة جدا..اتجاه اي حد يحاول يحرقها..
خشوا داخل..
لما وصلوا الصاله..
كانت فاضيه ماكان فيها حد غير رفقه..
حدهم:روفي..
التفتت شافتهم وضحكت..
جوها الزوز..
حدهم:منظومه!!
رفقه بضحكه:شويه تانيه ونقلبوها ع روسنا ع قولت عمتي غاليه..
حدهم ضحكت حماس وقالت:جووو..
ضحكت رفقه وشبحت لرزان..
لقتها مبتسمه ابتسامه باهته وهي تشوف لباب الحوش..
رفقه:روزي..
شبحتلهم وقالت:زعمه شن يديروا..
رفقه:من هما؟..
تنهدت حدهم وقالت:عماد واخت ناقة خوالي..
رفقه:وينهم..
رزان بحزن:برا..عيونها تعبوا دموع وقالت..نبي نشوف..
شبحولها الزوز بضيق..
بعدين قالت رفقه:باهي تعالي للمربوعه فاضيه..
رفقه مشت..
وهما وراها..
ورزان قلبها موجوع ع الآخر..
🍃هناك اللي يحب يعذب روحه🍃
خشوا للمربوعه..
ومشوا وقفوا ورا البرسيانه ورزان فالنص..
بتموت..بتموت..
مش بس كلمه وصفيه..
لاشعور حقيقي بالموت كانت تحس بيه وهي تشوف فيه مع غيرها..
حدهم:ماتتجعون الكلبه..
رفقه:عليك منظر..
حدهم:تبي تشد يده..
رزان غمضت عيونها وقعدت تدعي:ياربي تنشل يارب يارب تنكسر ياربي..
رفقه:حي..
فتحت عيونها وقالت:اقطعها ياربي اقطعها من وين نبتت..
برا..
سناء بفرح؛شكرا شكرا عمادي..
ابتسم مجامله وسحب يده وقاللها:استني هني نجيبهم ونجي..
سناء بضحكه:ok
مشي عماد لسيارته..
فتحها طلع منها كيستين كبار مكتوب عليهم اسم ماركة عالميه..
صكر باب السيارة وجاها:خودي..
خدتهم منه وهي تقول:تعيش وتجيبلي قلبي..
ابتسم من فوق نفسه..
سناء:سلام توا حبيبي..
عماد؛راجي شوي بنسألك..
سناء:اسأل حبي..
عماد:بتروحوا لحوش خالتك في الليل ولا..
سناء :اكيييد..
عماد:تمام..
سناء ابتسمت وقالت:تشاو توا عمري..
ولفت ومشت بسرعه..
وهو قعد واقف فمكانه...
شبح جهة حوش خاله ميلاد...
رزان:يشبح لحوشنا ولا؟؟..
رفقه:عنده انفصام فالشخصيه..
حدهم:رسمي..
هي تنهدت ..
ولفت ومشت..
وهما شبحوا لبعض بضيق بعدين لفوا ومشوا وراها..
اما هو..
مشي لسيارته..
قعمز فيها وصكرها عليه..
وفتح اغنيه التلاوي..
"كيف نعيش وانت مش نصيبي"..
وقعد يسمع هو وقلبه 💔 فالسؤال اللي مش لاقينله اجابه..
🍁🍁🍁🍁
ربع ساعه تانيه..
وصوت المنظومه ولا مسموع في القطعه كلها..
الي جانب صوت المطر..ماكانتش قويه هلبه..
بس حلوة..💖
وكانت الاغنيه المفتوحه لتامر حسني..
لولا الهوى..
والبنات يرقصوا ويهيجوا عليها..
ورزان معاهم..
....
الاغنيه كان يسمع فيها البرنس السرتاوي..
وهو فسيارته..
كان يموت فيها..وبالذات لما حس انها تعبر عن حالته..
صكر عليه السيارة برواشنها..
وقعد يسمع فيها وهو يغني معاها ويرقص..
منسجم اخر انسجام..
اصيل.
انا حبيت وادبيت وبقيت بعدك مش قادر اعيش..
وان مرة حاولت اخبي مشاعري مشاعري ماتخبيش..
داخل..
البنات..
وانا نفسي اكتبلك الف غنوة بس انا مابيديش..
لاانا عبدالحي سلامه ولاانا سيد درويش..
برا..
اصيل..
ولا سايبك انا لو فات مية سنه وبقينا احنا الأتنين..
احنا الاتنين عواجيز ياعيني...
💓💓💓💓
انفتح باب العمارة..
طلع مؤنس شاف السيارة وتفاجأ..
مشالها طول ..
جي للباب بيفتحه لقاه مصكر..
استغرب..
شويه سمع بصوت خوه..
لولا الهوى بهديكي عمري حبي وهوا وبردو يبقا يبقا شيء
رمزي..
قعد يطق مؤنس ع الروشن..
واصيل يسمع لكن ماباش يقطع انسجامه..
مؤنس التفت شاف لحوش عيت رمضان..
بعدين رجع شاف للسيارة طق وقال:افتح يامتلف..
التفت تاني لما سمع صوت الولاد يجروا للمربوعه..
شافله محمد وقال بصوت عالي:تعاااال يامؤنس..
مؤنس ابتسم مجامله وقال:جاااي جاااي..
هز محمد راسه بإيجاب وخش بعد الولاد..
مؤنس التفت للسيارة وهو يقول:كان مافتحت توا ماضال الا خارطها بموس..
نزل مرش السيارة..
اصيل..
دانا اللي دايب رسمي فهمي نظمي وفوزي وشوقي لو تحبي..
مؤنس وهو شاد ضحكته:انزل يامتلف..
اصيل..
دنا حبيت وادبيت وبقيت بعدك مش قادر اعيش.
وان مرة حاولت اخبي مشاعري مشاعري ماتخبيش..
مؤنس بضحكه:تعرف كان مانزلت تو من شعرك نزلك..
اصيل:كله الا شعري يابرادر..زيد غادي شوي..
وخر مؤنس وهو يضحك..
فتح اصيل الباب ونزل..
وصكره وهو يقول:شن هالبلاد اللي الواحد فيها حتى فكرهبته مش واخد راحته!..
مؤنس :شكلك كنت عند جدي..
اصيل:يس..هي تعال نعدوا للمربوعه..
مؤنس:نعدوا..لكن هاه خرط فالدوة مانبي نسمع ارزن خيرلك..
اصيل بضحكه:ياودي اطمن..نا بروحي معاش نبي تحط نفسي فمواقف بايخه..نبي نكسبهم مش العكس..
مؤنس بإبتسامه؛كويس..هي تحرك قدامي..
مشي اصيل وهو يلعب بمفاتيح سيارته ويقول؛توقعت تكون المطر تكون اقوى من هك واطول..
مؤنس:ع الغالب في الليل اطول..
كيف قربوا من المربوعه..
عماد كان جاي من جهة السروله..
شافهم ملامح وجهه تغيرت..
مؤنس:عماد..
عماد قدم لمؤنس ومد يده :شن جو..
مؤنس:تمام..
طلق مؤنس ومدها لاصيل..
اصيل صافحه بدون مايكلمه وهو اللي طلق يده وكمل لباب المربوعه..
فتح الباب وخش..
مؤنس انحرج من حركة خوه...
عماد وهو قارن حواجبه قال:تقضل خوي مؤنس..
مؤنس:يزيد فضلك..
خش مؤنس..
وعماد وراه..
لقي اصيل قالب الدنيا بالضحك والبصاره من اول ماخش.
رقيت حرارة عماد..
بس كان فسره يتعوذ من الشيطان..
🍁🍁🍁🍁
في الحوش ..
البنات مازال يرقصوا ع المنظومه..
والصاله تعبت باهل الحوش..
وكناينهم..
وحوش عمهم..
واهل لمياء..
لمياء:نوضي قعمزيهم..
ابتسمت سناء وناضت..
وبدت ترقص ع الأغنية العراقيه المفتوحه
قعدوا يشبحولها..
شويه وانسحبوا كلهم وخلوها بروحها.
حدهم بغيظ:اني والله ماقعمزت الا لاني خايفه نتهور ونشحها من شعرها ونطيح فيها ضرب..
ضحكت رفقه..
ورزان تشوف لسناء كيف ترقص..
🍁واقفات فم الكوجينه ويشوفولها..
كفايه بضيق:بالله شوفي الفرق بينها وبين رزان...اااه ياكبدي اني وخلاص..ولدي هدا يبي الكوي فراسه..
غاليه بضحكه:يستاهلها...
كفايه:هو ياناري من حرقة قلبه دار هكي..
غاليه:ينوض يبدل رزان بالبوبلال هدي!!
كفايه:غباء حاشاك..لا واللي زايد قاهره ولد امينه غير منين طلع بس...
غاليه بضحكه:هداك طرف مطرف ع قولتهم...
كفايه:حيي عليا كان تقول عليه باهي حي عليها حي علينا كلنا جمليه..
غاليه بتفنيصه:هههههههه ..غبارة ليش شن ناوي يدير..قوليله يهني روحه ويريح جماله...هو بروحه جايب خطيبته وامها..صدقيني ياكيفو ماهو داير حاجه..
تنهدت كفايه وسكتت وهي تشوف لسناء..
شويه..
وتمت الأغنيه ومشت سناء قعمزت حدا اختها..
لمياء:عفارم..
ضحكت سناء..
نادرة:لميا قولي..وينهم سلفاتك الضراير .
لمياء:غدوة بيجوا..
نادرة:اممم..باهي قوليلي..هدوكا خوات سعيده..
لمياء:ايه امال..وعزيزة اللي واخدينها عيت*****..
نادرة:بخوت وحظوظ..
لمياء:حتى هو شين شين راجلها..
نادرة:عينك ياغبيه غزال مصور بفليساته..
سناء:خطيب بنتك مال وزين ماشاء الله.
نادرة بضحكه:صدقتي..
ضحكوا لمياء وسناء..
🍁فرقوا عليهم
الشاهي والحلويات..
بعدين..
اللي روح روح بش يوتي روحه لسهرية الليله فحوش ميلاد..
واللي قعد بيوتي روحه فحوش العيله..
🍁🍁🍁🍁
الساعه 8:30مساءا
طالعه من فم البوابه بعبايه ووشاح محطوط حط وتتكلم بالتليفون..
رفقه:ايه ماما قفطاني الاسود هداكا اللي خديته فعرس ابتهال بنت خالتي........لالا هو بس......ايه توا طالعه بنمشي غادي......تمام..باهي...تصبحي ع خير...سلام..
صكرت..
ومشت
وهي ماشيه..
يجي من بداية الممر مروان ..
هي تكرهبت..
لكن خلت روحها ماشيه ع نفس النظام...
التجاهل..
كيف قربت منه جي قدامها..
هي انخلعت شبحتله..
هو بدون مايشبحلها قال:اسف..تفضلي..
زاح شويه بش يخليها تمشي..
هي دارت روحها عاديه بتكمل طريقها..
جي قدامها مرة تانيه..
هي قعدت ترمش فعيونها بسرعه تحاول تتمالك اعصابها..
مروان:اسف نحسابك بتفوتي من الجهة التانيه..تفضلي..
هي هالمرة زاحت ووقفت ع الحيط وحركت يدها ايسارها
"بمعنى امشي"..
هو شد ابتسامته ومشي وهو يشوفلها بطرف عينه..
هي مابتش تشبحله لين فات..
بعدين لفت ومشت كملت طريقها وهي تقول فنفسها"مبرد دمه مولي ثقيل دم وحركاته صامته"..
وصلت فباب حوش عمها..وخشت..
🍁🍁🍁🍁
صالة حوش ميلاد تعبت بالناس من جيران واقارب..
واكيد كامله وبناتها وهندا حتى هما جو..
لحظات وبدت السهريه بالدربوكه والأغاني والزغاريط..
هيا رزونه..
طلعت رزان من الدار:هيا هي..شن رايك..
حدهم:عسل تهبلي..
ابتسمت رزان ومشو مع بعض للصاله..
لما وصلوا غادي..
مع الأسف ماكانش في تركينه فاضيه غير اللي حدا لمياء واختها...
حدهم؛تعالي..
رزان:ايه طز..
ومشوا الزوز قعمزوا حداهم..
لمياء واختها دارو رواحهم عاديات يصفقوا ويردوا ورا الأغاني..
وحتى رزان وحدهم كانوا هكي..
جنب سناء كانت سميه مقعمزة..
سميه شبحت لقفطان سناء عجبها هلبه نشدتها وقالت:قفطانك سمح..مش من هنى صح؟..
سناء بضحكه:صح..
لمياء علت صوتها شويه ع اساس مش مسموع من دوشه:واخدهولها خطيبها..
سميه؛اها..
سناء :مايستخسر فيا شي وين مايسافر يحسبني..
رزان ملامح وجهها تغيرت..
ركزت عليها حدهم زي هبت حتى ايديها يصفقوا بالسيف..
طارتلها لين خلاص..
قعدت طول الوقت ع اعصابها من تصرفات سناء ولمياء وكلامهم ..كانوا متقصدين يحرقوا دم رزان..
اللي حابسه دمعتها بالزور..وحتى لو جت تغني يطلع معاها الكلام بصوت مخنوق..
بعد ساعه..
اشرتلهم غاليه من بعيد يجوا..
ناضوا هما الزوز ومشوا..
وعيون سناء ولمياء معاهم وهما مبتسمات بنصر..
🍁وصلوا البنات للكوجينه مع غاليه..
قالت لرزان اطلع العبمبر..
ونور ورفقه وحدهم صفر عصير اللوز"الروزاطه"..
طلعوا ورا بعض..
وقعدوا يفرقوا من بداية الصاله..
حدهم وهي ماشيه التفتت جهة سناء واختها..
لقتهم بروحهم حتى سميه ناضت من حداهم..
رفعت حاجبها لما لمعت فراسها فكرة..
ونوت تنفدها مهما كلف الثمن..
مشت جيهتهم ع اساس بتفرق عليهم..
وين وصلت فيهم..
دارت روحها مدروخه قريب ادوخ..
هما شبحولها بريبه..
هي ابتسمت بتعب مصطنع وقالت :تفضلوا..
طبست..
وكفت عليهم صفرة العصير المصقع...
لمياء واختها من الخلعه شهقوا بصوت عالي..
اللي فالصاله كلهم شبحولهم..
واانصدموا..
لما شافوا حدهم طايحه مغمى عليها..
حدهم فنفسها"فشكي بيه قفطانك توا ياجروة"
...يتبع...
