#العشق_المتمرد
#جمان_فريد
الجزء 82
نبي نقولكم حاجه..
محلاااااااكم 💓💓💓💓
ونحببببكم 💓💓💓💓
💖💖💖💖💖💖💖💖💖💖💖💖💖💖💖💖
🌟...
مقعمزة ع السرير..
تلعب بشعرها..
وسرحانه بإبتسامه حلوة...
تذكر في تفاصيل اللي صار..
تذكر وتعاود..
كل حرف..
كل نظره..
كل ضحكه..
كل كلمه انقالت منه ليها...
ردة فعله ع كل كلمه قالتهاله..
بصارته..
عصبيته...
ارتخاء ملامحه الجاده لما هي تشد معاه..
حطت ايديها ع وجهها :ياربي مش قادره نصدق..ياربي..
مسحت وجهها بإيديها وحولتهم..ودموعها طول نزلوا..
رفعت عيونها فوق وقالت..
مش عارفه شن نقولك ولاقادرة نصف كلام يليق بيك..
من فرحتي ياربي...ماعندي شي نقدر نقوله غير كلمه وحده..
نحبك ياربي...
غمضت عيونها وقالت بهمس:الحمد لله..
انفتح باب الدار..
فتحت عيونها..
خديجه فايزة هاجر إيمان..
الاربعه يضحكوا بفرح..
صكرت فايزة الباب ..
والأربعه قعدوا يشتوا..
هنيوة وين قالوله سمي قال مرومه جت ففمي..
ويعاودوا ويقولوا فيها..
وهي تضحك..
والدمعه تنزل..
مشاعر مختلطه بس كلها حلوة..
كلها فرح..
وقفوا..
خديجه:قلتي املي مات..وربك حياه.. ريتي..
فايزة:اسكتي انتي اصلا ماحد قتل هالأمل غيرك..
ضحكوا كلهم..
بعدين شبحولها..
هي قعدت تشوفلهم وهي مبتسمه والدموع ينزلوا..
جوها الأربعه يجروا..
وحضنوها..
وهي تضحك وتقول:قتلتوني..
🍁🍁🍁🍁🍁🍁🍁
المهم يمي نبيك تعدي غدوه انتي وغاليه وحميده..
غاليه:مش لازم نعدي اني حتى حميده ساده..
شبحلها :والله ماواحد قاصها خطوة كان ماعديتي انتي الأولى.
ابتسمت وقالت: باهي..
رجع شبح لأمه:شن مايقولوا يمي قولي باهي..
فاطمه وهي مبتسمه :باهي..
وغاليه كانت مركزة عليه..
هالمرة متحمس وملهوف..
عكس حكاية مجدولين كلم خواته يوصلوا الخبر لأمه..
وفي عروبه كان يبان برغم لهفته مش متريح..
اماهالمرة غير...
غاليه"ربي يهنيكم يارب"..
🍁🍁🍁🍁🍁
الحمد لله ياربي..
رباب ورانيا شبحوا لأمهم اللي كانت واقفه حدا الروشن وتهدرز بالتليفون على خالتهم..
زينب:باهي امتى؟...........هههههههه..مس.....مستعجل عمك هنيوة......ايه والعرس امتى إن شاء الله.....كويس بش كل شي يكون بالراحه.
رباب:شكله خالي تم اموره مع مرام..
رانيا ابتسمت..
🍁🍁🍁🍁
باهي باهي مبارك..وربي يتممله ع خير...ايه.....ربي يكملها عليه بالخير وخيي..
كانت دلال تسمع في امها وهي تكلم في خالتها كفايه..
دلال مدت الكاشيك لفم بنتها:هيا ماما..مااامم..اممممم..وطلعاته..
التفتت جنبها لما جاها معمر وقعديشح فكمها:ماما..زيعان..
دلال :توا كنت تاكل..
معمر:نبي زيبادي..
دلال:لااا..وقعدت توكل في اسيا..
هو انغاض..
ضرب اسيا وهرب يجري واسيا تعيط..
دلال بصوت عالي:برااا معااش تكلمني معاااش ولدي بكل بكل..
نعيمه بضحكه:هادي دلال وصغارها..
كفايه بضحكه:اكيد معمر..
نعيمه:هههههه..ايه بسلامته ناغر من اخته..
كفايه:ههههههه حي عليها...
🌴🌴🌴🌴🌴🌴🌴🌴🌴🌴🌴
ردت سليمان وقات باهي ع هانيبال!
رزان؛اصلا من قبل نشوف فيها تطلع علي عمي هاني اكثر..
سعيده بتفنيصه:وخيره خالك شن ناقصه..
رزان؛ماما خالي خلاص خطب وخطيبه احلا من مرام بوين وحتي هي جامعيه ليش حارقه دمك..
سعيده:كلامك صح بس اني نبي نعرف ليش ردت خالك وقات ع عمك باهي!
ضحكت رزان..
ع خشة ميلاد:السلام عليكم..
ردوا عليه السلام..
قعمز وقال:كنت نكلم في عماد..
وطبعا في هناك قلب لازم يرجف وين يسمع هالإسم..
سعيده بلهفه:وشنو قالك..
ميلاد تنهد وقال:رمزي من ضمن مجموعه ماشملهمش العفو..
سعيده بصدمه:ليش
ميلاد:قالوا في الحرب ضارب واحد سببله في إعاقه والراجل راه بعينه منين صوب عليه وضربه وقال ماهوش متنازل عن حقه ولازم رمزي يتحاسب..
رزان وسعيده خبطوا وجوههم بإيديهم..
ميلاد:لكن طمني وقال فحدود 4سنين ويطلع..
سعيده خبطت بإيديها ع فخادها:4سنين؟؟!!!
ميلاد:قولي الحمد لله اللي ماقتلوه يابنت الناس..
رزان:باهي عماد قال مافيش امل يطلع قبلها..
ميلاد:قال بيحاول جهده مع اللي يعرفهم..
سعيده دموعها نزلوا:ياغبييني..
ناض ميلاد وطلع من حداهم..
وسعيده ورزان قعدوا يبكوا....
🍁وكذلك غاليه وفاطمه اللي وصلتهم هالأخبار...
ورانيا اللي تبلغت بيه حتى هي...
🍃بس يقعد الأمل عاطيهم طاقة صبر🍃
🍁🍁🍁🍁
ويجي اليوم اللي بعده...
ومع العشيات..
مشوا فاطمه وبناتها ومعاهم سميه يخطبوا مرام..
حميده طول الوقت مبتسمه بالسيف..
وسميه ماغير تشبح لمرام فشبحات تشع غيره وحسد..
اهل مرام شرطوا الماير متاع هديكا البلاد..
وفاطمه تقوللهم ولدي قال اللي تبوه اني فيه..
وهما ماطلبوش اكثر من الماير..
نظرات فاطمه وغاليه لمرام هما اللي خلوها تتجاهل نظرات حميده وسميه..
🍁🍁🍁🍁
تو نقولوا كنتهم بتبدا بجو السلفات..لكن حميده خيرها؟
مرام:مرات في شي مضايقها ولاصايرة معاها حاجه.
خديجه:مرات..المهم توا عزوزك ياحنه غيرها مش مهم..
حضنتها وضحكت وكملت تقول...واخيرا رحتي كنة الحاجه فاطمه..
ضحكت مرام بخجل...
🍁🍁🍁🍁
اني نبي نفهم..نبي سبب مقنع ليش مش عاجباتك مرام..
حميده:ماتمشيش مع خوك ولاتنحط حداه والله
وين نذكر مجدولين الله يرحمها ونذكر عروبه ونشوف لمرام مانقبلهاش بكل..حتى الناس تو بيعلقوا..
غاليه:كلام فاضي..وبعدين مرام سمحه حتى هي..
حميده:مش كيفهن ولاكيف موده الترهونيه خسارتها وخلاص..
غاليه:مش عارفه كيف موليه تفكري ياحميده..
حميده:نفكر القدام..
رن تليفون غاليه بنغمة رساله..
حميده بضحكه تهكميه:مازال هدى مامل..
غاليه:واحد فاضي..
حميده:باهي قولي للولاد يغيرولك الشفره..
غاليه:وكان قتلهم غيروها وسألوني ليش شن نرد..
حميده :قوليلهم الحق..
غاليه:مانقدر..
حميده بتهكم :شكلك عاجبك الجو..
غاليه انصدمت:شن قصدك!!
رن تليفون حميده..شافاته وقالت:قصدي ردي بالك تخلي عقلك يخف بعد هالعمر..
ولفت ومشت طلعت من الدار وفحضنها بنتها راقده وطلعت لراجلها...
وخلت وراها اختها من الصدمه لين مش قادرة تنطق..
حدها دموعها نزلوا...
حطت يدها اللي ترعش ع فمها بش ماتشهقش بصوت عالي..
رن تليفونها بنغمه رساله..
شبحتله بحده..
بعدين خداته وهي معصبه وترعش..
اتصلت بيه..
يدوب بدي ينادي انفتح الخط..
وانفجرت فيه غاليه وهي تبكي :انت شنو..هاه ..شنو..مريض..متخلف...فاضي...تحشم ع وجهك...اخطاني...اخطاني..
وصكرت عليه..
ولوحت التليفون حداها وقعدت تبكي..
🍁🍁🍁🍁
هو قعد يشوف للتليفون وحس انه انوجع هلبه..
مش من كلامها الجارح لا..
من صوت بكاها..
نجم الدين:استغفر الله وخلاص..مشكلتي مش قادر نفوتها وتوا بعد سمعتها تبكي زدت..
مسح بيده ع لحيته وناض ..طلع من داره..
🍁🍁🍁🍁🍁
واقفات يغسلوا في الماعين في الكوجينه..
احلام:الراجل متزوج؟
اميرة: وكان متزوج الشرع حلل اربعه..
احلام:لا وخيتي حرام شن ذنبها المراة الاولى..
اميرة بضحكه:ذنبها ان راجلها عجب حليمه..
ضحكت احلام بعدين قالت:لا لا حرام مانرضهاش لروحي يااميرة..
حطت اميرة الصونيه:باهي راضيه ع روحك عيشة المرمده اللي عايشينها هدي؟؟
احلام: لا..لكن مانرضاش نخرب حوش مراة تانيه يولي عليا يااميرة...
ولت اميرة شدت الصونيه وكملت تمصمص فيها:خير ماينخربكن حياشنا..وبعدين بينا ولابلانا حليمه خلاص حطت الراجل في راسها وتمت..
تنهدت احلام ومشت للغاز تكد فيه:باهي وشن ناويه ديري..
اميرة وهي تضحك:بنساعدها بيش توصله..
"اميرة"..
التفتوا الزوز للباب..
حليمه برفعة حاجب:تعالي نبيك..ومشت..
ابتسمت اميرة وهي تشوف لاحلام..مصمصت ايديها وتوجهت للباب وهي تمسح إيديها في القفطان..
وطلعت من الكوجينه..
احلام بانت ع وجهها ملامح الضيق..
وولت كملت شغلها..
🍁🍁🍁🍁🍁
خش عليها لقاها تتفرج ع التلفزيون ودموعها ينزلوا..
لما خش قعدت تمسح فيهم..
الصديق بملل:شن في تاني..
حميده شبحتله:شي ..تبي عشي..
الصديق:تس..
ولف بيطلع..
حميده:غدوة عندي موعد.
الصديق:باهي..
ومشي..
وهي رجعت تبكي..
🍃نادمه بتموت ع الكلمه اللي قالتها لأختها وجعتها هلبه مش عارفه كيف قالتها اصلا..
هي مضغوطه هلبه..حياتها موليه جحيم بكل معنى الكلمه كلها هواجس وخوف..ووصلت علاقتهم هي وراجلها لمرحله من البرود ولوا فيها الزوز اشبه بألواح الجليد مع بعض..🍃
🍃🍃🍃🍃🍃
وتمر الأيام..
وتتبعها الأيام...
ويفوت شهر 3...
يلحقه 4...
بعده 5...
حاليا فشهر6من سنة 2012..
مانبوش نخوضوا في الوضع السياسي لأني لااحبذ تذكر تلك المرحله..فيها كانت علامات تلوح في الأفق ع اقبال السنين العجاف..
وياليتنا كنا نعلم..
مايهم...
🍁 رانيا بعد ولت لقرايتها بدت مركزة عليها تركيز تام وشاده بإيديها ورجليها وكانت تصفي بمعدل...
بس في فحياتها زوز يحاولوا يقتحموا حصونها بأي شكل..
ولد عمتها اسامه اللي لامل ولاكل وهو يبعتلها ويمشيلها الكليه وهي ترد فيه وترفض..
والتاني أستاذ في الكليه اسمه زين الدين ...
واسمه ع مسمى ...زين بكل معنى الكلمه..بس مغرور وشايف رويحته..ورانيا جذباته ليها بشطارتها الي جانب حبها للوحده والعزله وين يشوفها بروحها تبدا عنده رغبه يمشي يكلمها بس يخاف ترده وينجرح كبريائه..
بس رانيا..
ماحولتش الخاتم من صبعها بتاتا..
ولاحولت صاحبه من بالها..
رانيا غياب رمزي عنها خلاها تزيد تتعلق بيه اكثر واكثر واكثر وتدعي في كل اوقاتها ..ربي اجعله من نصيبي واجعلني من نصيبه...
دنيا وآخره..
🍁اجعله من نصيبي في الآخره كيف ماخليته نصيبي فالدنيا..
هادي دعوة دلال..
عمار حواليها وين تمشي...
ريحته صوره..
وزمالته المعلقه في الدار...
مات عمار..
بس في قلبها يقعد من المخلدين...
وبدت بتنفيد وصيته..
عبدالسلام:يعني بتكملي بابا؟
دلال:ايه..
عبدالسلام:تمام غدوة بعون الله نمشي نحط ملفك في الكليه..
دلال بإبتسامه :ربي يحفظك يارب.
ابتسم وقرصها من خدها وهي ضحكت..
شويه..
وخش عليهم معمر...
جي يدب لأمه وهو يقول:ماما حبيبي..
دلال تصنعت الغضب رفعت حاجبها ومدت شواربها القدام شويه..
بوها ضحك..
وصل فيها معمر وحضن وجهها وهو يقول:لوحي..عملي..
دلال:برا عليا غادي..
وبوها يضحك..
باسها معمر:نحبك ماما..
دلال:علاش ضربت اختك..
معمر:هي خييي..
وعبدالسلام يضحك وخلاص..
دلال :اختك هادي ماما حبيبتك حلوه مش خيي.
هو قرن حواجبه بطفوليه اعتراضا ع كلام امه..
عبدالسلام:حبيب جدو انت ولا..
شبحله وهز راسه بإيجاب..
عبدالسلام:خلاص..معناها تحب اختك وتلعب معاها ..
معمر قعد ساكت..
دلال:مش عاجبه المعفن..خداته وحضناته بقوة وقالت فسرها "زي بوك نغار وعنايدي"..
ركز عبدالسلام ع الدموع فعيونها قلبه انعصر..
ع خشة نعيمه :ولدك مجد اني معاش نقدر عليه.
دلال ضحكت..
عبدالسلام:شن دار تاني..
نعيمه:ضارب ولد جارنا الغرياني طريحه قريب قتله..
دلال بضحكه:هداكا اكبر من مجد ..
ناض عبدالسلام وهو يقول:وخوك المشراني في حد قادر عليه..
وطلع من حداهم..
نعيمه بضحكه:سلامته باهي اللي جواد ماخداش منه طبايعه..
دلال:جواد لسان بس..لكن الحرافه هنايا..
قام معمر عيونه فيها..
نعيمه:هههههههههه فهمناها علينا..
ضحكت دلال وباساته من خده..وهو يشبحلهم وخلاص..
🍁🍁🍁🍁
هي خلاص بري طيري..
طلعت نورهان من حدا امها وهي فرحانه بعد مكيجتها..
كفايه:عليك جيل مقربع..
حطت الروج فمكانه..
وطلعت من الدار..
شبحت لبنتها كيف مقعمزة في الصاله وتلعب بألعابها..
بعدين شبحت للدروج شافت عماد راكب..
كفايه:روحت..
عماد بضحكه:مازلت في الطيارة..
كفايه:ها ها ها ها..
هو ضحك وقدملها باسها ع راسها..
بعدين مشي شفشف شعر اخته وقال؛مشفشفه..
هي تكنطت:علاش يابااارد..
خطرت عليه رزان ضحك وقلبه رفرف..
كفايه:رمضان هني إن شاء الله ولا...سادك سفر...
عماد:ايه بإذن الله هني..
ع جية بوه..
سعد:عومد..
ضحك ..قدمله وسلموا ع بعض بطقان الإيدين..
كفايه:بكري اليوم..
سعد:تعرفي اني خلاص شكلي بندفها لعماد..
كفايه:من غير شي متملح هو قداش بيشد حاجه..
عماد:عيب ياكيفو راك جايبه صقر قدها وقدود..
ضحك سعد وحط يده ع كتفه:عندي نية نمشوا للعمرة العام هدا كيفو شن رايك..
كفايه بفرح:ياريت..قداش ليا عليها..
سعد:خلاص تم..
عماد بإبتسامه:ماشي نتريح يام ماتنوضنيش ع العشي..
كفايه:براحتك..
مشي عماد..
سعد:ترا تعالي نبيك.. خداها من يدها ومشوا وكفايه تضحك بخجل..
عماد تلفت شافهم:كانوا يراعوا شعور العزابيه فهالحوش..
ضحك وخش داره وصكرها عليه..
لوح الشنطه لوطا..
ومشي انطرح ع السرير..
طلع تليفونه من جيب السروال...
ابتسم...
بربشه..حط ع رقم معين واتصل..
🍁🍁🍁🍁🍁
الفلفل نيبسه قبل بعدين نحطه في الكوشه..
غاليه :ايه وديري فحمه في الاخير بيش ادخن..
كيف جايه بتسال رن تليفونها ..
طلعاته من جيب االتوته..
شافت الرقم....تبدلت ملامح وجهها للإمتعاض صكرت عليه ودارته صامت ورداته فجيبها..
غاليه بضحكه:اكيد عماد.
رزان ووجهها احمر:ومن غيره اللصقه..
غاليه:حرام عليك يارزان راهو والله يبيك بجديات..
رزان :واني مانبيشي..
غاليه:كذابه..
رزان بتفنيصه:عمتييي!!
ضحكت..
"غلوشه"..
رزان:اففففف..
غاليه فنصت بضحكه..
خشت حدهم:شن رايك..
غاليه وهي متفاجئه: قصتيه بروحك؟!
حدهم وهي تحرك فراسها بش توري شعرها:لالا شن بروحي كنت فحوش خالتي نجاة هي قصاته..
رزان تشبحلها بربع عين..
غاليه:صح نجاة فالحه في الحاجات هدي..طالع عليك حاجه تانيه..
حدهم بضحكه:جديات؟!
غاليه :هههه..والله..
قعدت تنخ بشعرها وغاليه تضحك عليها..
ورزان كان تلقى تشحه من جذوره..
🍁🍁🍁🍁🍁
تمشي بحذر وبطنها بارزة خشت شهرها السادس..
حنين ببكي: ماااماا
حميده بتذمر: شويه ياماما شويه..
فتحت باب الكوجينه البراني وبنتها فجرتها..
طلعت..
وحطت شكارة الكناسه في مكانها وكيف جايه بتمشي..
طلعتلها لفعه..
نقزت من الخلعه..
وبدون ماتحسب حساب لأي شي..
مشت تجري لبنتها قامتها..
وخشت داخل وصكرت الباب
نزلت بنتها..
ومشت خدت شرشاف من ع الطاوله غطت بيه فتحة الباب من تحت وهي ترعش وترجف..
بعدين التفتت لبنتها قامتها وطلعت بيها من الكوجينه للدار..
قعمزوا في الدار وحميده تشوف حواليها بخوف..
🍃حميده حامل بولد🍃
🍁🍁🍁🍁🍁🍁
عبارة عن دراه كبد يمشي ع رجلين..
رباب:هههههههههههه..
رانيا :والله حتى بنقرا المادة متاعه وماخاطريش ..
رباب:كان زي ماحكيتي عنه معناها عندك حق تنفري من القرايه..
ع خشة روان فيدها حبة كاكاويه مشت بيها طول لرباب وحطتها ففمها..
ورباب كلتها وهي تضحك وباست يد اختها..
رانياتصنعت الزعل:واني روني..
شبحتلها شويه بعدين طلعت تجري..
ضحكوا بعدين قالت رباب..
رباب:مش كإنها عطلت في الكلام حتى ماما وبابا ماتقولش فيهم؟!
رانيا:عادي هلبه صغار هكي وبعدين تفهم وذكيه هي..
خشت روان تجري وحطت حبة الكاكاويه ففم رانيا..
كلتها رانيا وهي تضحك وحضنت اختها..
من الكوجينه...
سمعوا صوت امهم تقول..
"معاش تقولولها نبي كاكاويه"..
ضحكوا البنات..
🌴🌴🌴🌴🌴🌴🌴🌴🌴🌴🌴
مقعمزات يهدرزوا...
حدهم:الحمد لله ضامنه النجاح..
غاليه:كويس..وانتي رزونه..
رزان:ماتبيش سؤال..
غاليه:حتى بلقيس بنت نجاة..
رزان:طبعا حبيبتي مش تقرا معاي ومصاحبتني..
حدهم شقلبت عيونها..
رزان :خيرك حدود؟
غاليه شبحت لحدهم..
حدهم برفعة حواجب:خيرني!!
رزان:كيف اللي مش عاجبك كلامي..
حدهم :تو اني دويت..قلت حاجه ياناس!!
غاليه:هيييه..انتي وياها اسكتن ترا..
سكتوا الزوز وهما يشبحوا لبعض بحقد..
غاليه غيرت الجو:شوفن المسلسل اهو بدي..
شبحوا للتلفزيون ومن داخل اللي هادي تسحن ع التانيه..
بعد حوالي تلت ساعه..
رزان روحت الأولى...
وبعدها ب 10دقايق ..
روحت حدهم..
وهي ماشيه بطريقها لحوش جدها..
خطمت حدا حوش عمتها..
"انتي"..
حدهم تجاهلت وكملت مشي..
بس وقفت بين حوش ميلاد وحوش جدها اللي كان فاصل بيناتهم سور مش كامل..
لما شدتها رزان من ذراعها..
التفتت حدهم ونفضت يدها:شن تبي؟
رزان:حركاتك هدين يمشن ع الكل الا اني طروحك طروح امك بالزبط...
حدهم بحده:سيرة امي ماتجيبهاش ع لسانك يا أفعى..
رزان:انتي اللفعة..لو كان في امك خير خالي ماطلقهاش..
حدهم معاش تشوف في شي..
عطت رزان كف لايقرا ولايكتب..
رزان رداته بأحرف منه..
صوابعها علموا ع خد حدهم..
قعدوا يشوفوا لبعض بغل..
سمعوا صوت سيارة..
كان سليمان..
رفعت حدهم حاجبها..
طاحت مقعمزةوقعدت تبكي بصوت عالي
ورزان تشوفلها بصدمه..
سليمان لما درس سمع صوت بكي بنت خوه..
نزل طول وتبعه يجري..
لين وصل فيهم..
رزان لفت بتهرب..
سليمان لحق عليها وشدها من رقبتها من الخلف:شن درتي ياشيطانه..
حدهم ببكي :مش عارفه وين نمشي ولاشن ندير ياعمي ..
شبحلها شن دارتلك العقرب..
رزان ترعش ..
حدهم:لحقت عليا واني مروحه ضربتني كف وقالت كلام زي السم ع امي ياعمي..
شبح سليمان لرزان..
رفع يده..
رزان عيونها رمشوا من الخوف..
"سليمااان"..
وقف وشبح القدام ويده نزلها..
قدم هانيبال لبنت خوه جبدها منه:شنو في..
سليمان:ياراجل البنت مايبنش يعتقنها لاحقتها ووصلت في امها وضربتها..
حدهم ببكي:والله ياعمي هانيبال مادرتلها حاجه..
وجعاته حدهم..
قدم ومدلها يده..
شدتها ونهضها..
وشبح لرزان:هدي بنت خالك فاهمه..لاانتي ولاهي ليكن دخل بمشاكل الكبار وقطافهم..وتوا عدي روحي..
شبحت رزان لحدهم بغل..
بعدين لفت ومشت لحوشهم..
هانيبال:ربي يهدي..
مشي حتى هو من الجهة التانيه لسيارته..
وسليمان خدي حدهم من يدها ومشي بيها للحوش..
🍁🍁🍁🍁🍁
عليك غبيه ليه شهرين عاطيك الرقم ولعند توا ماكلمتيه..
مرام:تبيه يقول عليا ماصدقت؟!
فايزة بضحكه:ايه باهي اسبوع اسبوعين مش شهرين؟
مرام ضحكت بعدين قالت :باهي نكلمه توا زعم؟
فايزة بحماس:شن تراجي؟
شبحت لاختها شويه وهي تضحك..
بعدين خدت نفس..
وقعدت ادور فتليفونها ع رقم..
كان مسجل من غير اسم..
🍃بعته مع رزان🍃
سمت باالله واتصلت..
فايزة بضحكه:تقول بتفكي لغم..
مرام والتليفون فوذنها فنصت فاختها ..
فايزة ضحكت...
....
في السيارة..
وهو يسوق..
رن تليفونه ..
خداه من المكان اللي حاطه فيه حداه في السيارة..
عين فالتليفون وعين فالطريق..
ضيق عيونه بإستغراب لما شاف الرقم..
فتح الخط ورد..
.....
"ايواا"..
قلبها ياناري ع قلبها لاعرف يوقف ولاينبض زين..
"الووو"..
بلعت ريقها وتماسكت:السلام عليكم..
هو ابتسم ع جنب طول..
ماقال شي لين وقف السيارة ع تركينه..
بعدين تكلم..
هانيبال:باهي والله لذكرتينا وجينا ع بالك..
ابتسمت بخجل.
فايزة ناضت وانسحبت طول..
مرام:شنو حالك..
هانيبال:حالي..حال المشغول باله يراجي بدقيقة والساعه..
امتى تتصلي ويطلع رقمك فنقاله..
ضحكت..
هانيبال:هانا رحنا شعراء فجرتك ياابله مرام وانتي ماتبيش تعبرينا..
مرام كتمت تنهيده فداخلها..
ومن داخل قلبها يرقص من الفرح..
هانيبال:الووو..رقدتي..
مرام:هههههههههه..
ابتسم وقال:نقولك..اني تو تو مشغول..نفضى بعدين نكلمك وردي علينا يا أبله مش تستكردينا..
ابتسمت وقالت:باهي..
هانيبال:ماتبي شي..
مرام:سلامتك..
هانيبال بإبتسامه:تمام..سلام...
مرام صكرت وحضنت التليفون وهي تضحك بفرح شديد.
اماهو فكان حاس بشعور حلو هلبه..
شغل السيارة وتحرك وشعور سعاده مميز غامره...
🍁🍁🍁🍁🍁🍁
الساعه 8:00مساءا.
روح للحوش..
خش داخل ..
مشي للدار لقاها راقده وبنتها راقده حداها..
عرف ان حتى اليوم مافيش مايتغدا ولايتعشى..
تنهد بضيق..
ومشي لدار النوم..
🍁🍁🍁🍁
واقفه اطيب في العشي..
وامها مقعمزة حداها ويهدرزوا..
سعيده:خالك سليمان بعد العيد الصغير يعرس
رزان :كويس..
فجأة..
طق باب الحوش بقوة..
سعيده بتفنيصه:اللطف..
ناضت طول وطلعت تجري من الكوجينه ورزان وراها..
وصلت في الباب..
فتحاته..
خش حسن وهو فقمة الغضب:تعرفي ياسعيده ريتي عتبة حوش هلك هديكا بنتك شطانة الرجيم مازالت تعفسها ماظال الا مكسر كرعيها..
رزان تشبحله بحقد.
سعيده بصدمه :ليش شن دارت..
حسن:انشديها يافالحه....
سعيده شبحت لرزان.
حسن:اهو اني قلت ياسعيده.
ولف ومشي..
سعيده التفتت لرزان:شن درتي؟
رزان:ضربت الحيوانه بنته كف..
سعيده بإبتسامه:صحه بنت امك
رزان:لكن هي اللي بدت الاولى هي اللي ضربت ياماما..
سعيده: كسرة ان شاء الله..
🍁🍁🍁🍁
خلاص سلم بنتي خلاص..
حدود وهي راقده ع رجل حناها:اني مانبيش مشاكل ياحناي نبي نعيش مرتاحه...
مسحت حناها ع شعرها..
حدود:لاقدرت نعيش مع امي وحتى بوي مانقدرش نعيش معاه!؟
الجده:لا بنيتي ماتقولي هالكلام بنيتنا انتي وتعيشي معانا ماتنقصك حاجه..
شدت يد حناها وباستها بعدين غمضت عيونها..
وحناها ابتسمت...
🍃ماأعز من الولد إلا ولد الولد..وحدهم استغلت هالنقطه خير استغلال🍃
بس عاد مش كل الجدات زي حدهم..
ولا زي سلفتها الحاجه فاطمه..
في جدات حالهم يحط العقل بالكف ..
كيف جده وتكره احفادها لأنها تكره امهم..
كيف جده دير زي اللي داراته سالمه..
وتحط لفعه في جنان حوش حميده..
شن تبي فراسها عزوز ادير هالعمل...
🍃يجيرنا الله..🍃
اللي داراته مخلي حميده وهي راقده تأن وتتوجع..
وبنتها حداها تضرب ع خدها بش تنوضها..
يدوب فتحت عيونها ..
ناضت بالسيف قعمزت وهي شاده حزامها ..
رفعت قفطانها بتشوف كان في نزيف ..
مافي شي..
بس حاسه بألم..
حنين:ماما شيشه"مرضعه"..
حميده بالسيف ناضت..وهي حاسه رجليها ثقال هلبه..
تمشي بالسيف وهي شاده في الحيط..
خشت للكوجينه..
وقعدت تتفحص وتشوف..
وبنتها مكبشه فيها..
وقفت حداها حكة حليب البنيه والطرمس والرضاعه..
قعدت بالسيف ادير فيها..
بعد كملت..
خضت المرضعه..
والتفتت لبنتها بتعطيهالها..
شهقت بخلعه..
الصديق:خيرك!
حميده :خلعتني..
طبست وعطت المرضعه لبنتها..
الصديق :خيرك حميده وجهك اصفر..
شبحتلها وقالت:بكري واني ماشيه نطلع الكناسه طلعت عليا لفعه..
الصديق بصدمه:لفعه!؟
حميده:ايه...
الصديق:باهي عدي انتي وبنتك اني تو نطلع نشوف..
خدت حميده بنتها ومشت طلعت..
وهو طلع دور في الجنان بحذر ...
لعند مالقاها فعلا...
كانت متمدده فتركينه..
خدي الباله وبكل هدوء قرب وخبطها ع راسها خبطه قويه قتلها...
بعد كمل شغله معاها..
ولا للحوش وخش داخل وهو يفكر منين جت ...
ليهم سنين طويله ماروش افاعي هادي من وين طلعت..
عقله قعد يودي ويجيب ويطرد منه فكرة ان امه تكون ورا هالعمله..
🍁🍁🍁🍁
الساعه 11:00ليلا..
خشت لدارها بترقد..
فتحت عيونها متفاجئة لما شافت تليفونها يرن..
مرام:حيييي...ياربي كيف نسيته..كله منك ياصابر وقتك ووقت حوايجك..
صكرت الباب..
ومشت للتليفون..
خداته وفتحت الخط..
مرام : آلو..
هانيبال:قاصده ديري هكي؟
مرام :لا والله لا وليش بنقصد..غير كنت مشغوله..
هانيبال بإبتسامه:10مرات ...10مرات ورا بعضهن نتصل..عمري مادرتها..ركزي..
مرام رفعت حاجبها :ع شن بنركز مافهمتش
هانيبال:احمم..يعني ان هانيبال قاعد يدير معاك فحاجات عمره مادارهن..
مرام:وشن يعني؟
ابتسم وهو رافع حاجبه الإيسار:غير انزلي لمستوانا ياابله شويه حتى كلامك فيه غرور..
مرام بضحكه:لا غرور ولا شي بس اني مافهمتش ونبيك تفهمني..اعتبر فهمي بطيء شويه .
هانيبال :انتي فهمك بطيء؟!!اني اللي فهمي بطيء..ياودي مانفهمش بكل كان انتي فهمك بطيء..
مرام:هههههههههه..
هانيبال ضحك وقال:شن جو..
مرام بإبتسامه:الحمد لله..وانت شن جوك..
هانيبال:ماشيه الحمد لله.
مرام بتضييقة عيون:ادخن ولا؟
شبح للدخان فيده وقال:ايه..
مرام: باهي شن رايك لما تكلمني ماادخنش؟.
هانيبال :تبيني نسيبه..
مرام بأبتسامه:هو ايه اكيد مادابيا بس مش كل شي يجي بسرعه..في اللي يبي مراحل..
هانيبال :باهي نبطله لما نكلمك لكن بشرط تردي اول مانتصل بيك..
تنهدت مرام وقالت:ماهو اني مش فاضيه كل الوقت..ماتنساس اني مدرسه ورا تحضير دروس تصحيح كراسات وغيره..وفنفس الوقت طالبه ونقرا..وفوقهم اني البنت الوحيده اللي قعدت لأمي في الحوش يعني بيكون في وراي واجبات حتى في فالحوش..
قعد ساكت وماباش يتكلم..
مرام:ماعجبكش الكلام!
حدف الدخان لوطا وعفس عليه وقال:شن درتي اليوم فالمدرسه..
ابتسمت وقالت :هانيبال..
ابتسم..
مرام:لازم نتفقوا من توا..لما يضايقك مني شي او يضايقني منك شي نواجهوا بعض بيه ماندسوه..بس مايصيرش تراكمات بعدين وتصير مشاكل ببسبهن..
هانيبال ابتسم وقال:اني نحب الإهتمام..
مرام:ومن مايحبش الإهتمام..بس انت ولااني عندنا اولويات تانيه يعني بكري لما كلمتك قتلي توا مشغول بعد نفضى نكلمك اني ماضايقنيش كلامك لأني عارفه ان عندك اولويات ..
سكت وهو مبتسم ويوزع فنظره ع المكان بعدين قال:نبي نعرفك اكثر..
مرام ابتسمت وهي تشوف ليدها اللي تسمح بيها ع فخدها:اسأل واني نجاوبك..
هانيبال بضحكه:تمام...كم عمرك..
مرام بضحكه:تحسابني بنتحشم منه مثلا ..ياسيدي اني مواليد 17\7\1986..
هانيبال:ههههههههه...
هي ضحكت..
💖وكملوا هدرزتهم وهما يتعارفوا ع بعض..
هانيبال كان يسمع اكثر مايتكلم..
كان يكتشف فيها اكثر واكثر...
كان حاس بإنجذاب غير عادي..
وحاس بإعجاب كبير...
كل ماتسكت يسألها ..وكان في من أسئله مافيش ليها داعي بس يبي يعرف اسلوبها..
حاول يستفزها..هي كانت تستفز صح بس تاخد في الموضوع بضحكه..
وقعدوا هكي...لين جت الساعه 3:00...
مرام:اين موقف؟
هانيبال:موقف الكلب حاشاك..
مرام برفعة حاجب:حشاك من السو..بس ماقدرتش نذكر..
هانيبال:كنتي وقتها تقري في الأبتدائي ولابسه قرمبيول سماوي...كان يجري وراك وانتي تعيطي..وحالتك حاله ..لبدتي وراي وقتها..
مرام بضحكه:مش عارفه مش قادره نذكر..هو اني جرو وراي كلاب واجد واني صغيره بس الموقف هدى مش مذكراته كويس..
هانيبال:ذاكرتك ضعيفه معناها...يستفز فيها..
مرام:ممكن..وممكن الموقف عادي مش محتاج يرسخ في الذاكره..
حول التليفون من ع وذنه وعض ع شاربه وهو مبتسم..
بعدين رده وقال: ممكن..
هي ابتسمت بعدين قالت:باهي توا اني لازم نصكر وراي مدرسه غدوة من الصبح كان سخر الله..
هو هز راسه بإيجاب وقال:تمام...ماتبي شي..
مرام بإبتسامه:سلامتك..تصبح ع خير..
هانيبال:قدامك كل خير..
صكرت ...غمضت عيونها بشده وهي تضحك...
بعدين فتحت عيونها..تنهدت وقالت:كل تفصيل يخصك عمري مانسيته..
ولايمكن ننساه..💖
اماهو حط التليفون ع ذقنه وقال:شايفه روحها شوي..لكن معليشي تو اطيحي يابنت عبودة💖
🍃مسكين هانيبال هههههههه🍃
🍁🍁🍁🍁🍁
خلاص ماما خلاص ارقدي حبيبتي..
نعيمه:غير اعطيهالي ياماما اني تو نرقدها..
دلال:لا ماما انتي بري ارتاحي..
نعيمه :براحتك..كان تبيني مازلت نايضه..نادي بس..
ابتسمت دلال:باهي..
طلعت نعيمه وصكرت الباب ودلال تحاول ترقد اسيا..
عمرها حاليا تقريبا عشرة اشهر..لكن كل ليله هدا حالها لازم تبكي هكي ..
دلال:نفتحلها قرآن وخلاص..خدت التليفون وقعدت ادور ...
رصت فجاة ع التسجيلات..
شافت في المقدمه..
"عمار...سورة طه"..
اذكرت لما مرة سجلها ع اكثر من مقطع بش هي تسمعها وقت سفره في الليل وترقد..
بصبعها اللي يرجف ضغطت عليه وبدت تسمع..
(اعوذ بالله من الشيطان الرجيم..
طه...ماانزلنا عليك القرآن لتشقى)
ودموعها انهمروا..
في عز الهدوء متاع الليل صوته عبا المكان كله..
صوته وهو يتلى في اعظم الكلام..
صوته..مع القرآن..
خلاها تحس بإنها فدنيا غير الدنيا..
تسمع في الآيات..
العين تبكي..
والقلب ينزف..
بس الروح صابرة..
وهي تذكر...
كيف كان كل ليله يقعد فيها معاهم ياخد ركن في الصاله ويقعد يقرا ويقرا من المصحف..
وهي فسريرها تسمع وتحس براحه عجيبه...
استاقضت لما وقف التسجيل الأول..
شبحت لبنتها لقتها راقده براحه حتى هي..
ناضت ودموعها مابطلوش نزول..
حطتها ع السرير بهدوء..
بعدين مشت وين مامعلقه زمالته...
خدتها..
شمتها...
باستها بعمق..
وحضنتها...
وولت بيها للسرير..
تمددت جنب بنتها..
وفتحت التسجيل وخلاته يمشي ورا بعض تلقائي...
حطت التليفون عند راسها..
وحضنت الزماله وغمضت عيونها ودموعها ينزلوا....
🍁🍁🍁🍁
مش بس هي..
حتى رانيا...
كانت تشوف للخاتم ودموعها ينزلوا..
وفي وذنها ترن كلمة..
"خليني ديما فبالك.."..
كل مايخطر عليها اخر لقاء ليهم تتقطع بالبكي فصمت ..
🍃ويامطولك ياليل العاشق اللي مفارق غواليه🍃
🍁🍁🍁🍁
تاني يوم..
الساعه 10:00صباحا..
كلية الهندسه..
خشت تجري للكليه قبل ليفوتها موعد الأمتحان..
رانيا وهي تجري:شن بيخلصني من لسانه الزفت هدا..
وصلت في القاعه..
هدت وقعدت تمشي عادي..
وقفت في الباب..
شافت الطلبه كلهم داخل..
وهو واقف ومعاه استاذ تاني..
رانيا:صباح الخير..
شبحلها بإمتعاض وقال: اني شن قايل قبل..
رانيا:احمم..زحمه..
شبح للطلبه :وخيرهم جو بكري..شبحلها الزحمه فيها انتي بس؟
ضحكوا..
رانيا تتمالك فنفسها:اسفه...
شبح للأستاذ واشرلها بصبعه تخش..
وكمل كلامه مع الاستاذ ..
خشت رانيا وهي تسحن وتسحسح عليه في الدعي..
قعمزت في مكانها ..
رانيا "ربي يفوت هاليوم ع خير"..
🌴🌴🌴🌴🌴🌴🌴🌴
الساعه 10:30صباحا...
قدام المدرسه..
قصدك تراجي فيها تطلع وتمشي فوسط هالمهرجان؟
هانيبال بضحكه:مهرجان شنو اولياء امور يستنوا فصغارهم..
عماد:اولياء امور اولياء دم ..رجاله في النهايه..
فتح الباب ونزل..
صكر الباب وتوجه للمدرسه..
هانيبال برفعة حواجب: شن هالعيله هدي !!
في المدرسه..
رزان:كله جاوبته الحمد لله..
بلقيس :قعدلي سؤال واحد بس خسارة..
رزان:اما هو..
بلقيس وهي توزع فنظرها ع المكان:هدى اللي...فنصت..حي ولد عمتك..
رزان عيونها توسعوا...
التفتت ..
شافاته واقف..
لابس تشرت ابيض..
وسروال جينز ارزق..
ونظارات..
حاط ايديه فجيوبه ويشوفلها..
شبحت ايمين لقت البنات يشبحوله..
شبحت ايسار لقتهم يشوفوله ويأشروا عليه..
مميز هلبه فكل شي الي جانب وسامته حيكون ملفت للإنتباه...
رزان ولت كتله من اللهب..
مشت بسرعه جيهته..
وبلقيس تضحك وماشيه وراها..
وصلت فيه..
شدت يده اليمين اللي كانت محطوطه فجيبه..
وقعدت تمشي..
وهو معاها زي المسبوه...
وبلقيس تضحك ع الهزاز..
وعمتك رزان ماوقفتش لين وصلوا فسيارة عمها..
هانيبال:كيف صار!!؟
هي استاقضت ع روحها ..
قريب ماتت...
طلقت يده ومشت طول للباب الخلفي ..
فتحاته وركبت..
هانيبال شبحلها بعدين شبح لعماد..
حرك راسه ايمين ويسار..
دار كلاكس..
استاقض عماد..
مسح بيده ع لحيته..
ولف ع السياره من القدام..
وركب..
شبحله هانيبال برفعة حواجب..
هو غير عيونه عن خاله بإحراج...
شبح من مرايه السيارة لبنت خوه..
لقاها حاشيه وجهها المحمر في التليفون..
هز راسه بإيجاب وهو ماط شواربه.."وكأنه يقول ماشاءالله ماشاء الله"..
شبح لبلقيس...اشرلها تجي..
جاته طول..
هانيبال:اركبي كان مافي من مروح بيك..
بلقيس بإبتسامه :باهي..
ومشت جري ركبت من الجهه التانيه وهي تضحك بكتمان ع رزان اللي قريب تتبخر من الموقف اللي دارته..
اما عماد فكان فقمة السعاده...
لكن محرج من خاله..
شويه ودرست سيارة صابر..
ركز عليها..
شويه وطلعت مرام..
ابتسم ع جنب ..
ركبت مع خوها..
لف صابر..
وخطم حداهم..
كلكسله هانيبال..
هو ردها ..
مرام يدوب شبحتله..
وهوكذلك..
وفاتت سيارة صابر..
ووراهم هانيبال تحرك طول...
🍁🍁🍁🍁🍁
خش للحوش بيجيب كتيب العائله..
يسمع فعياط بنته..
استغرب..
البنت تعيط بقوة...
مشي يجري للدار..
لقي حميده طايحه ع الأرض...
---------------------------------
طلع الدكتور ووجهه اصفر...
الصديق بخوف:شن يادكتور..
الدكتور:للأسف الحبل السري التف ع رقبة الجنين وهو توا ميت فبطنها ..لازم من عمليه جراحيه بش نطلعوه..
الصديق بصدمه شديده:لاإله الا الله...
...يتبع....
