#العشق_المتمرد "اختبار"
#جمان_فريد
الجزء 119القسم الثالث..
🌟..
الدعاء..
مصطلح معروف ديني..
فكل دين موجود..
حتى الأديان الوثنيه..
وكلها مع بعضها ادل..ع ان الإنسان محتاج ديما لحد اغنى واعلى وصاحب قوة ماتفوقهاش قوة يلجلئله فوقت المحن والحاجه..
الدعاء...
هو مخ العباده..فكل عباده يكون حاضر..
الصلاة...
اللي نبدوا فيها بقرايه سورة الفاتحه السورة هادي كلها دعاء..
وفي هلبه مواضع فالصلاة لازم يكون الدعاء موجود..
الصيام..
الصايم لما يحل صيامه..لازم يدعي..
وهدا غيض من فيض عن علاقه الدعاء بالصيام..
الحج..
الحج كله دعاء...
الزكاه..
لابد ولازم وين تعطي من مالك صدقه وزكاة تدعي ربي يتقبل..
☄الدعاء...
طوق نجاة...
وسلاح...
الأمل الحقيقي..
🍃لو بنعد لحظات اليأس والضعف والعجز والإنهيار اللي عشتهم مايسدونيش الالاف السطور...
اليأس..اللي يوصل للتفكير في حاجات الشيطان تواق انها تتنفد..
وين نوصل للتفكير بيها..
نلقى يبرة البوصله متاع القلب توجهت للأعلى..ويقعد القلب يقول...تمسكي بطوق النجاح..واليد اللي انمدتلك...
طول نحط يدي فهاليد الخفيه..ونشد بالحبل...
وندعي...
مش بكلام مستف وواتي وجاهز..لا..
كلام مبعثر..اغلبه لعثمه وبكي ودموع ودوة مش مفهومه..
ريتوا حضن الام اللي نرتموا فيه فوقت احزاننا ونبكوا ونشكوا..
ولله المثل الأعلى..
محراب الصلاة هو هداكا الحضن..اللي نبكي ونشكي فيه..وربي يسمع..ويشوف..
برغم التشتت برغم الكلام الملخبط برغم السكوت وقت يتم الكلام وينتهي..
هو فاهم وسامع وعارف كويس شن نبي نقول..
وقسما بيه...ولا مرة قصدته وردني...
مش لأني صالحه..ولا لأنه يحبني..ولالأني نستحق يستجيبلي..لا..
بل لانه يستحي..
لأنه زي ماقال الرسول...
حيي كريم...يستحي يرد عبده صفر اليدين..يعني يردهم فاضيات..
مستوعبين؟!
ربي يتحشم يردنا..
يتحشم...
مركزين؟!!
ربي..الله..بعظمته وجلاله..بملكه وقوته الله مالك الملك..
ربي..
يتحشم يرد حد طق بابه!!
آاااه..وياآسفي علينا..
تلقانا ننذلوا لفلان وعلان وفي منهم مايسوا قشرة بصله..ع خاطر الحاجه..
وتلقاه يعطينا حاجتنا بذل ومن وإهانه....
ولو جربت ادق بابه مرة تانيه..يلزك..او يوزعك زي مانقولوا..
قداش البني آدم جهول وظلوم...
يسيب الله اللي بيده كل شي ...ويتحشم يرده لو جاه..
ويلجأ لعبد مازاد عليه بشي غير بشوية قوة ربي نفسه اللي عطاها!!
🌟فغزوة الأحزاب.."الخندق"..
كانوا المسلمين فاصعب حالاتهم..
تلاقوا عليهم رؤوس الكفر والشر كلهم..
كانوا الصحابه خايفين ومتوترين وفي منهم حس انها النهايه..
الرسول كان في موقف صعب جدا جدا...
فعز هالموقف الصعب..
مشي فتركينه بروحه..
وقف فمكان مختلي بنفسه..
رفع ايديه لاعلى مستوى..
وقعد يدعي..ويدعي
والصحابه من بعيد يشوفوله وهما فحالة يرثى لها من القلق..
مركزين ع حاجه!؟..
هدا رسول...
يعني بينه وبين الله علاقه مباشره..
وعبد مخلص مصطفى اعلى الخلق مرتبه..
ربي قادر ع انه يخسف بالكفار الارض وقتها او يبعتلهم قارعه تنهيهم..ويتم كل شي..ع خاطره بدون مايدعيله
لكن
بش يعلم عباده وقتها اهميه الدعاء..وقدرته ع احداث المعجزات وانه سبب قوي لازم ياخد بيه العبد
نصر الرسول واللي معاه بعد هديك اللحظات اللي تضرع فيهم الرسول بالدعاء
🌟تعرفوا علاش مهم الدعاء لهالدرجه
لأن هو مقياس الإيمان الحقيقي..
مايلجئش حد بالدعاء لله فوقت المحن..الا البني آدم المؤمن ايمان تام بقدرة الله ع تحقيق مطلبه..
هلبه منا ياما يصير فيهم من مصايب ويطيحوا فمحن اخر باب يمشوله باب الله..
واخر شي يديروه الدعاء..
وفي منهم مايديرش ولا حاجه من هادوا..
لأن درجه الإيمان عندهم تحت الصفر...
🍁رمزي..
لما كان مضايق فحبسه..
طول توجه لرب النور اللي طالع من فتحة الروشن الصغيره اعلى حيط السجن..
لأنه طول فتره محنته فهداكا المكان المسكر...كان يشوف لهديكا الفتحه اللي دخل فالنور..
وهو متفائل انه حينجى...بالأمل اللي عنده بالله...صاحب هداكا النور...
هداكا الأمل 💓...
وربي يعرفه...والملايكه الموجوده فالسماوات...تعرف صوته وتميزه لأنه مابطلش دعاء...
وكأنها تقول لربي...صاحب الصوت هدا ولى مألوف...ديما فهالوقت نسمعوا فيه..
وربي عارف صاحب هالصوت وزي مااستجابله قبل ونجاه وحماه وحطله فطريقه ناس تساعده...
استجابله توا...دعاءه لأهله فظهر الغيب..
🍃وراهو ربي يستجيب الدعاء..
اما حياءا من انه يرد مخلوق ضعيف لجئله..
واما لأنه يحب العبد اللي دعاله..
واما رحمة منه..
زي مااستجاب للكفار اللي كادت تغرق بيهم السفينه فعرض البحر..
كما هو مذكور في القرآن في وحده من الآيات بما معناه..
(دعوا الله مخلصين له الدين لئن انجيتنا من هذه لنكونن من الشاكرين)
استجابلهم رحمة منه بيهم...
ونجاهم...
وبعد نجوا رجعوا لكفرهم وغيهم وظلالهم...
🍁🍁🍁🍁
فاااقت!!!..
عمر وهو ياخد فحوايجه من الدولاب بإستعجال؛ايه..الحمد لله..
ومشي جري بحوايجه للحمام بش يدوش..
وخلاها هي مصدومه وخايفه..
شوي واستاقضت..
والتفتت للزيانه وخدت التليفون وطلعت من الدار بسرعه..
وصلت للصالون..
واتصلت بأختها..
حطاته ع ودنها..
وهي شاده وسطها..
وقعدت تمشي وتجي وهي تراجي فاختها امتى ترد..
لمياء بغيظ:تي نوضي ياخايبه نوضي..
انفتح الخط..
هي وقفت وقال بتهكم؛صح النوم ياحلوة!!
ردت عليها اختها بصوت ناعس:خيرك متصله توا شن تبي؟
لمياء بضحكه ساخره:متصله بيك نبي نبشرك..رزان فاقت ياحنه..
سناء؛باهي كويس..هدا اللي نبيه..
لمياء بغيظ:برودك يجلط..
سناء؛وانتي هرمونات الحمل مخليينك دراه كبد..صكري صكري..بنرقد..
صكرت سناء ع اختها..
ولمياء غمضت عيونها بنفاد صبر بعدين قالت؛مرقد جدي اللي رقد معاد ناض..
"لمياااا"..
فتحت عيونها بخلعه وقالت:جااايه جاايه..
تأففت ومشت طلعت من الصالون..
🍁🍁🍁🍁
حالك باهي توا عمو..
رزان بتعب:الحمد لله...شن صار عمو..
حميد ابتسم وقال:امم..عمو انتي كنتي فغيبوبه ليك توا 15يوم..
رزان بصدمه:شنو؟؟!!
حميد ضحك وقال:لكن الحمد لله ربي بعتلك من ينوضك منها..
رزان قعدت توزع فنظرها ع الدار وهي مضيقه عيونها..
عمها قال:حني فوحده من العيادات فتونس..
شبحتله طول..
حميد؛هدا علاش بكري سمعتي الممرضات يتكلموا تونسي..لاحظتك استغربتي..وابتسم..
هي يدوب ابتسمت بعدين تلاشت ابتسامتها وفتحت عيونها ع وسعهم وقالت:بابا!!
كيف جاي حميد بيتكلم..
انفتح الباب..
وخشوا ميلاد وسعيده...
لما شافتهم رزان عيونها تعبوا دموع..
وصل فيها بوها..
طول طبس ع راسها وباس جبينها..
نزلوا من عيونها دموع سخان..
بعد ميلاد ودموعه فعيونه وهو يقول:بنتي..حالك باهي بابا؟..
رزان هزت راسها بإيجاب وهي تشوف لعيونه..
ميلاد:تكلمي بابا سمعيني صوتك..
رزان؛باهيه..
ابتسم بفرح ورجع باس راسها..
وسعيده تشوفلهم وتبكي بصمت..
وخر ميلاد بعدين شاف لسعيده..
هي شبحت لأمها وقالت:ماما..ومدتلها يدها..
شدت امها يدها وباستها بلهفه..بعدين طبست عليها وباست راسها وخدودها وقالت:ربي مايحرمني منك ياعيون ماما انتي..
ابتسمت رزان بتعب...
وحميد يتفرج عليهم وهو يمسح فعيون والإبتسامه ع وجهه برا..
🍁لوطا
يانهاري كيف بس فهمني!؟..
عماد وهو شاد تليفونها ويشرح عليه؛غلوشتي ركزي معاي كويس..بتغيري اسمي وتكتبي فمكانه حميده اوكي..اني نتصل فيديو..مش حنوجه الكاميرا عليا..نبي منك بس تخليها تدوي..نبي نسمع صوتها بس بس..تمام؟
تنهدت غاليه وخدت تليفونها بعدين قالت:باهي ياحصله ..خليني نعديلها تو..ماريتهاش بكل..
عماد:آااه يابختك...بعدين قال..شن رايك نبدلوا تعطيني عبايتك والوشاح وندير روحي غاليه ونخشلها..
غاليه :ههههههههههه..ايه مش حيزبطوك بكل كان درتها حتعدي عليهم..
ضحك عماد وهويسمح بيده ع ذقنه بعدين قال:باهي هي سموحتي تحركي بسرعه..
غاليه بضحكه :حاضر..
ولفت ومشت وهي تحرك فراسها ايمين وايسار وتضحك..
عماد بصوت عالي شوي:غيري الإسم..
هزت راسها بإيجاب وقعدت تبربش فتليفونها بش تغير الإسم..
تنهد..
بعدين شبح ايساره..لقي وحده تشبحله وتبتسم..
عطاها شبحه من فوق للوطا..
بعدين التفت ومشي وهو يقول:ناقص شكالات مقلبه..غمض عيونه بعدين تأفف وقال..غير كيف بنفتك من الغمه هديكا بس..
🍁🍁🍁🍁
وصلت غاليه فالحجره..
فتحت الباب وخشت..
رزان كانت فحضن امها لما شافت غاليه بعدت عنها وقالت:عمتي!!..
ابتسمت غاليه بفرحه ودموعها نزلوا ومشت لرزان طول وحضنتها..
رزان حضنتها بقوة..تقول غاليه اللي كانت فغيبويه مش هي..
ميلاد وحميد ركزوا..
بينما سعيده كانت تشوفلهم بإبتسامه حزن...
وخرت غاليه وهي مازال شاده رزان قالت:هكي اديري فينا يامشفشفه!؟..
ضحكت رزان من بين دموعها..
باستها غاليه من خدودها بعدين حضنتها تاني..
شويه رن تليفونها..
انخلعت..
وخرت عن رزان.وشافاته ابتسمت بربكه وقالت:عمتك حميده متصله فيديو..
ابتسمت رزان..
قعمزت غاليه جنبها وهي تشوف لسعيده وميلاد بإبتسامة خوف..
وجهت الشاشه لرزان وفتحت..
غاليه وهي تشوف لميلاد:الو حميده...شبحت لرزان وقالت..كلميها كلميها..
رزان بإبتسامه:ميدا..وينك مانشوفش فيك...؟
غاليه:حميده..وجهي الكاميرا عليك ياحميده..
سعيده؛ماتردش..شكلها ماتسمعش فينا..
رزان:الو..عمتي..
💓هو كان موجه الشاشه فوق..
يسمع فصوتها وقلبه قريب يطلع من مكانه...
قعد يقول فنفسه"اااخ ياقلبي..اروح فدوة "ضحك..
غاليه:الو ياحميده تسمعي فينا..
فجأة..
رن تليفون حميد شافله..
غاليه شبحتله..
هو رفع عيونه فيها طول...
هي غيرت عيونها وهي فقمة الإرتباك وشبحت للشاشه..
فهاللحظه عماد تشاقى...
وطبعا لأن الشاشه موجهه بس لرزان وغاليه..
بان عليهم وعطي بوسه لرزان...
رزان فنصت..وقلبها قريب وقف..
اما غاليه تقول صكها الضي..
طول صكرت عليه وهي ترعش قالت؛التغطيه زي الزفت..
ورزان مازال مصموته...💓
سعيده شبحت لبنتها وقالت:خيرك ماما!؟..
غاليه شبحتلها وخافت..
ميلاد بخوف:رزان بابا!!..
هي استاقضت لما سمعت صوت بوها شبحتله وقالت:نعم بابا..
ميلاد:تحسي فحاجه بابا..
رزان ابتسمت وقالت:لالا مانحس فشي..ولاشي..
🍃انكرت ثورة نبضات قلبها...زعلان منه صح..لكن يعشقه شن يدير💓🍃
🌼🌼🌼🌼
وطبعا..
الخبر السعيد انتشر فالعيله كلها...
وكلهم عمت الفرحه قلوبهم
بهالخبر تنفسوا الصعداء..
بالذات كفايه...
كفايه بفرحه:الحمد لله ياربي..ليك الحمد والشكر ياربي..
سعد قعد يشوفلها بإبتسامه وقال:الحمد لله..
مالك ضحك وقال:هي مالا اني خل بنتسقد لخدمتي..
وكيف جاي بيمشي امه وقفاته:مالك..
التفت وشبحلها ..
كفايه:كان تفكرنا واتصل هداكا رد بالك تخبره ايوه..
مالك:ههههههههههههه..
كفايه؛ماتضحكش مانبيه يعرف شي..
مالك بضحكه:تي هو يعرف قبلي وقبلك ان رزان فاقت..
فنصت بصدمه..
وسعد شبحله بإستغراب وقال:كيف!؟..
مالك ابتسم وقال:عماد فتونس من امس..مال كيف فاقت رزان!؟
عطي لبوه نظره ليها معنى..
بعدين قال:عطلت لازم نمشي..سلام..
ولف ومشي طلع من الكوجينه..
كفايه شافت لسعد وقالت :وتبيه يتزوج هديكا ؟!
سعد تنهد بضيق..بعدين حرك راسه ايمين ويسار...
🌴🌴🌴🌴
وينك من بكري نتصل بيك انتي مشغول ميلاد وسعيده يخبط مايرد حد؟!
غاليه بإرتباك وهي توزع فنظرها عليهم قالت؛ايه قلناها التغطيه حاله..
حميده؛شنو؟!!
غاليه:اهي حداي رزان تبي تكلميها..
حميده:مال شني عطيهلي..
غاليه :هيا هي..حطت التليفون ع وذن رزان..
رزان:عمتي..
حميده بإبتسامه فرح والدموع عبت العيون:رزونه..الحمد لله ع سلامتك..
❤كلمت رزان عمتها حميده وحناها فاطمه ومرت عمها بلقيس..
بعد سكرت منهم..
اتصلوا بيها عماتها بالوحده...وكلموها البنات..
دلال ونور ورباب وحدهم ورفقه..
بعدين كلموها خالاتها..وحناها حدهم..وجدها عبدالله..
وعمامها..وخوالها..
💓الحلو فالمحن اللي زي هادي..
انها تزيد تبين مدى حب الأهل والأحباب..تعرفنا بمكانتنا الحقيقيه فقلوبهم..
ورزان فهاليوم عرفت مكانتها الحقيقيه فقلوب العيله..
ممكن لو قعدت رزان الأولى..مالقت حد يهتم لأمرها غير امها وبوها....والراجل اللي حبها بكل حالاتها..واللي كان سبب فالسعاده اللي هي فيها توا لما تشوف فحجم حب اهلها ليها..
🍃عماد حتى وان ارتكب اخطاء ماتغتفرش بسهوله لكن فأصله يقعد عماد الراجل صاحب القلب الطيب الكبير..
هو بس العشق اللي خلاه يطلع عن طوره ويغلط🍃
🍃🍃🍃🍃
ومروا تلاته ايام..
قعدت فيهم رزان في العياده لين تستعيد صحتها كامله..
بعد هالتلاته ايام
جو توفيق وخالها سليمان...
وميلاد روح لليبيا هو وحميد..
صادف يوم مرواحتهم مرواحة هانيبال بعيلته اللي جابهم هالمرة من المطار نسيبه ضو..
وكان يوم خميس..
🍁غير انزل ياراجل من غير جو انزل..
مرام بضحكه؛خلاص ضو عاد تقول اول مرة تجي هنى..
ابتسم وقال:ياودي باهي هاني نازل..
هانيبال:لين نتجدوك ياكشخه..
ضحكت مرام..
وضو ضحك وهو يحرك فراسه ايمين ويسار..
نزلوا من السياره..
مشي هانيبال بضو للمربوعه الخارجيه..
ومرام هي وطبوشها الصغير لممر فم البوابه..
مرام:وهدى حوش جدك رمضان..هدي تاني مرة تجيه مرمورة..
عمار نغا بصوته..
امه ضحكت وقالت:ايه كنت صغير وااااجد وقتها..
وصلت للممر وخشتله..
بعدين وصلت لفم البوابه..
طقت الباب وقالت؛ياعيله..
جت حنين تجري شافتهم..
ضحكت مرام:حنونه..
حنين:مراااام جت..
مرام:ههههههههه..
رمت مرام كندرتها وخشت سلمت ع حنين..
وحنين قرصت عمار قرصه خفيفه من خدوده وهي مبتسمه ومرام تضحك..
حميده وبلقيس والحاجه فاطمه جوهم وع وجوههم ابتسامه فرح..
الحاجه فاطمه وهي تشوف لعمار:مرحبتين مرحبتين بنور العين..
وصلت فيهم..
سلمت عليها مرام وكبت ع راسها..وعطتها عمار..
خداته فاطمه وهي تسمي عليه..
بعدين سلمت مرام ع حماتها..
وبعدها سلفتها..
مرام:عريسه مبارك عليك الزواج والحمل..وضحكت..
بلقيس وهي تحضن فيها قالت بضحكه:الله يبارك فيك يادكتورتنا..
ضحكت مرام..
حميده؛هانيبال وين..
مرام:في المربوعه اللي برا مع خوي ضو..
حميده :حيي خوك هنى..ومشت طول جري للكوجينه وبلقيس معاها..
مرام؛غير راجو نقعمزوا نهدرزوا شوي بس..
حميده:خشوا انتم شوي وجايينكم..
فاطمه:هي خشي تريحي بنتي خشي..
مرام بإبتسامه :حاضر..
ومشوا فاطمه بعمار ومرام وحنين خشوا مع بعض وحميده وبلقيس قعدوا فالكوجينه يحوسوا ع الضيافه..
🍁فحوش الهادي..
كان كيف طالع من حوشه ماشي للمربوعه..
وسميه واقفه ع الروشن تشوفله وهو ماشي وهي رافعه حاجبها وتقول بسخريه:شرفت مرووومه..
نزلت عيونها لتليفونها ودارت اتصال..وحطاته ع وذنها ..
شويه وقالت؛شرفت سلفتك الدكتورة..
"بالله!...جت مرووومه صااار"..
سميه بضحكه:ايه جت ياحنه..
🍁🍁🍁🍁
بنزيدوا تلاته ايام تانيات دهواري ع خاطرك يامشفشفه..
ضحكت رزان وقالت:مش خسارة فيا..
توفيق :غيبوبه..جلطه...اللي هو مافي حاجه تقص طشه من لسانك..
سعيده:اعوذ بالله من كلامك اللي كيف وجهك..
غاليه بضحكه: ع هكي معناها كلامه حلو..
توفيق :ماننحرم منك ياغلاي انتي لولاك ماكنت سمعت كلام حلو فحياتي..
سعيده وهي تشبحله بنص عين:اممم..ماسمعت كلام حلو بكل كان من غاليه بس!؟..
شدوا رزان وغاليه ضحكتهم..
وهو وجهه ولى احمر وطول غير الموضوع:زعم سيدي وعمي وصلوا..
غاليه بضحكه:تو يتصلوا كان وصلوا..
شوي رن تليفون غاليه..
كلهم شبحوله..
هي لما شافت المتصل وجهها ولا الوان الوان..
ناضت وهي تقول:حميده..
ومشت طول طلعت من حداهم..
وهما يشوفولها..
توفيق:وكان حميده ليش ماتكلمها قدامنا؟..
سعيده برفعة حاجب:اتصل بسيدك شوفه..
شبحلها بعدين قال :حاضر..طلع تليفونه من جيبه ولهي بيه..
وسعيده شبحت لبنتها..
وبنتها تشبح لصوابع ايديها اللي كانت تلعب بيهم من التوتر..
برا..
غاليه:روح ياعماد خلاص..
عماد:وخيرك تلزي انتي؟..
غاليه:نحكي جد ياعماد توفيق هنى وسعيده راهي مش متحمله قعدتك فمكان هي وبنتها فيه..
عماد قرن حواجبه وقال:لا تتحمل وتتعود..
غاليه بتذمر:افففف..اللهم طولك ياروح..ياعماد باش تفهم ياولدي....حول البنت من راسك والهى فروحك..
عماد بعصبيه:ماحد يقولي شن ندير وشن مانديرش..اني ياغاليه بنفسخ تمام ..وبناخد رزان وماليها حيعطوهالي بالطيب بالغصب ماضال الا واخدها..وصكر علي غاليه..
بعدين قعد يمشي فالطريق وهو فقمه الغضب ويقول:والله وعمري ماحلفت بالله وحنثت ماضال الا واخدها وماني واخد غيرها ولايحلموا يعطوها لغيري..
🌴🌴🌴🌴
الساعه 3:00بعد الظهر..
فالكوجينه..
الحمد لله فرجها ربي..
بلقيس:قالت غاليه بعد عماد خش عليها بكم ساعه فاقت..
ابتسمت مرام ..
بلقيس تنهدت وقالت:ااخ بس لو تصير معجزة وهالزوز ياخدوا بعضهم..
تلاشت ابتسامه مرام وقالت:الوضع صعب ومعقد..
بلقيس :واجد..
سكتوا الزوز وهما يغسلوا فالماعين..
بلقيس"نقوللها ولا لا..تس بس هدى سر...باهي مرات كان قلتلها تشور علينا بشور ينفعنا...تس ياربي!!"..
مرام:بلقيس..
بلقيس بإنتباه:نعم..
مرام شبحتلها وقالت:اني خبرت عماد..
طلقت بلقيس الصونيه طاحت فالغساله وقالت بضحكة اندهاش:صحه ليك..وخيتي سلمها سلفتي اللي تفهم..حضنتها وباستها..ومرام تضحك..
بعدين قالت:سر هدى بلقيس..
بلقيس:في بير غرييييق..
ابتسمت وقالت:واني عارفه انه فبير غريق هدى ليش قلت..
ابتسمت بلقيس بعدين خدت الصونيه وقعدت تكد فيها بحماس..
ومرام تضحك..
فالدار...
نجيه نجيه ياربي..عمار..ياعمار الدار...
حنين:حلو واجد..
حميده بضحكه:ايه ماشاء الله..
وعمار يشوفلهم ويضحكلهم..
حنين :يضحك ماما...
حميده بضحكه:عليه الله وحد من عيني وعين كل حد..
"السلام عليكم"..
قامت حميده عيونها فالباب..
حنين:خالي..
هانيبال:تعالي ياجحشه..
جاته حنين تجري طبس حضنها وقامها وهو يقول:سمنتي يافرخه..
حنين ضحكت..
باسها من خدها بعدين قال:مرام وين..
حنين:فالكوجينه..معاها بيسو..
ضيق هانيبال عيونه وقال:بيسو!!
ومشي بيها للكوجينه بدون مايعبر حميده..
حميده دموعها نزلوا..مسحتهم بعدين شبحت لعمار لقاته يشبحلها..ابتسمت..❤
فالكوجينه..
وصل هانيبال وقال:اااه بيسو قصدك بلقيس كنتنا الجديده..
بلقيس ضحكت وهي متحشمه ومرام ضحكت معاها..
مسحت بلقيس ايديها فالمرقه ومشت لهانيبال مدت يدها وقالت:حمد لله ع سلامتكم..
صافحها هانيبال وقال:الله يسلمك..
طلقوا ايدين بعض..
بعدين هانيبال نزل حنين وقال:شن دايره مع محمد..
ابتسمت بخجل وقالت:الحمد لله..
هانيبال:اسمعي يضايقك بشي يزعلك تعاليلي طول واني نوريك فيه..
ابتسمت بلقيس وقالت:ربي يحفظك ويخليك لهلك..
ابتسم بعدين شبح لمرام وقال:ديرولنا شاهي..
مرام :ع النار..
هانيبال:ايه ضو روح..مستعجل ع طرابلس..
ضحكت مرام..
هانيبال؛ترا خشي لبسي عمار كويس وجيبهلي بنطلعه لعمامه..
مرام مصمصت ايديها وقالت:باهي..
هانيبال شبح لحنين وشد يدها وهو يقول:تعالي هدرزيلي شن درتي واني مهناش..
ومشوا مع بعض..
ومرام طلعت وراه..
اما بلقيس ولت للماعين...
🍁🍁🍁🍁
قالي وصلوا ع الساعه 12..ضو روح بيهم..
نور:اما ضو هدا فضيع..اخر مرة ريته فمناقشة رانيا عليك شخصيه..
دلال برفعة حاجب قالت:تتغزلي راك..
نور بضحكه؛لا نفتحلك فعيونك..
ضيقت عيونها وقالت :ع شني؟؟!
نور حست روحها رفست قالت بإرتباك:معجب بيك..
دلال ارتبكت لما سمعت اللي قالاته اختها..
نور :لاحظت شبحاته ليك قريب ياكلك بعيونه..
دلال قلبها وجعها هلبه قالت بضيق:فكينا منها المواضيع هادي نور باهي..!
نور بضيق:باهي زي ماتبي..
ع خشة اسيا جت لأمها وقالت:ماما ديريلي ضفرة
دلال خنقتها العبره..
نور لاحظت وجهه اختها كيف ولى احمر ودموعها فعيونها قالت:تعالي اسو نديرلك سبوله..
اسيا بإبتسامه:ايه احلا..
ومشت لخالتها..
اما دلال فحاولت تتماسك..قعدت تشوف للتلفزيون ومن داخلها كان قلبها موجوع بالمره..
شويه وخشوا الولاد..
جواد:امي...
شبحتله..
جواد:بتجي غدوة ولا؟..
ابتسمت وقالت:عطيتك وعد اني..
ابتسم..
معمر؛واني بتخلوني نتعلم زيهم نركب ع حصان..
ضحكوا امه وخالته .
اسيا:تو يطيحك..
معمر:والله!!وعلاش ماطيحش جواد..
اسيا:جوادي يعرف انت ماتعرفش..
ضحكوا..
ومعمر تكنطا..
خطف..جاها ريشها من شعرها وبعدين طلع يجري زي الصاروخ..
اسيا زركت ع طول رقبتها...
نور:اسووو..
اسيا بغضب:تو يشوف نهاره من يومه تو يشوف..
ضحكوا ع كلمة نهاره من يومه...
وهي قاعده ترحي ع معمر..
مجد:هي تعالى وقت البلاستيشن..
دلال؛ساعتين فقط لاغير..
جبد مجد جواد وهو يقول؛باهي..
وطلعوا يجروا...
ودلال تنهدت بإبتسامه وولت تتفرج ع التلفزيون...
🍁🍁🍁🍁
العشيه..
طلعت رزان من العياده طول للشقه اللي ماجرها عمها حميد..
وعماد وراهم وين ماهما...
قضوا باقي يومهم فيها..
وهو قضى باهي يومه تحت العماره فسيارته💓
🌴🌴🌴🌴
تاني يوم..
مشت حميده لحوش خوها ميلاد هي وبنتها بحجة انها تبي تقلبه واضمه..بينما في الحقيقه هي كانت هاربه..لأن امها عزمت ولادها يتغدوا فالحوش..
والهادي مش حيخش للحوش فوجودها..
لهدا خدتها من قصيرة ومشت لحوش ميلاد..
مرام كانت بايته فحوش العيله..
من الساعه 12:00 جو سلفاتها الزوز...
وكل وحده حامله ومحمله بالحقد والحسد..
بس الوجه يضحك...واللسان يعسل ..
لمياء بإبتسامه:ماشاء الله وزنه زايد..
فنصت بلقيس وقالت: قولي الله يبارك..
شبحتلها لمياء وقالت:الله يبارك..
مرام ابتسمت وقالت؛مع اتابعي فحملك..
لمياء:مع دكتوره اسمها شاديه الجدك..
مرام :اها..نعرفها تابعوا معاها خواتي هاجر وايمان كويسه كويسه..
لمياء بإبتسامه مصطنعه:اممم..
مرام؛ماشاء الله بلقيس الباين وحمك مش واعر..
سميه؛مازال بكري..راهي كيف قالت بسم الله..
مرام شبحت لسميه وقالت بضحكه؛ايه..في اللي مايبانش عليهم من الأول..
بلقيس:لا نتوحم لكن ع خفيف وان شاء الله ديما هكي..
مرام بإبتسامه:إن شاء الله..
سميه ولمياء الزوز يشوفولهم وهما مبتسمات من فوق نفسهم..
شويه جت عزوزتهم وقالت:صبن لغداكن..
ناضت بلقيس وقالت:هاني نايضه..
فاطمه:مش كان تقعمزي وتريحي روحك راك حامل..
بلقيس بضحكه:وكان حامل مانتحركش ياعمتي!! كان حالي باهي ماعندي ليش مقعمزة..ومشت طول طلعت..
فاطمه بضحكه:ماشاء الله عليها كيف الطقاشه..
مرام بإبتسامه:معروفه بلقيس ناشطه..عمتي تقعدي حدا عمار خل نعدي نعاونها..
فاطمه:ايه نقعد نقعد..
ناضت مرام ومشت طلعت...
اما فاطمه مشت قعمزت حدا حفيدها..
لمياء:اني ياعمتي لولا وضعي وانتي تعرفيه كان هدا نضت معاهم..
سميه:واني فطومه بسلامتها ماتسكت كان عندي..
فاطمه وهي تشوف فعمار:ماحد لايم عليكن تريحن..
شبحوا لبعض..بعدين شبحوا القدام وهما رافعات حواجبهم..
🍁🍁🍁🍁
دارت بلقيس الغدي بازين بالوطني..
وجي مش عادي..
بطبيخه وتكركيبة العيش..وتنسيق الصفر اللي انحط فيهم..كان حاجه صح..
الرجاله تغدوا فالمربوعه الداخليه..
ميلاد وهانيبال ومحمد وعمر والهادي..
والنساوين مع بعض فالصاله ورفعوا صونيه لحميده وبنتها..
محمد طبعا ماكانش يعرف ان بلقيس هي اللي داراته ع باله مرام...
🍁بعد الغدي..
قعدت بلقيس بروحها تغسل فالماعين..
مرام لهت بولدها فالدار..
والتانيات قعدوا مقعمزات زي الصدارات فالصاله ويطقوا فالحنك..
خش محمد طلق السلام وهما ردوا بعدين كمل طول للكوجينه..
وصل لقاها تغسل في الماعين وتغني بصوت يدوب طالع .
ابتسم..بعدين مشالها..
وقف فجنبها دفها وقال:حولي بنغسل ايديا..
هي دفاته وقالت؛هنى يغسلوا فالماعين..
دفها تاني وقال؛اني حر نغسل ايديا وين يعجبني..
ضحكت وقالت؛باهي ياحر قولي شن رايك فبازيني..
محمد بإندهاش:قصدك درتيه انتي..
بلقيس وهي ترقص فحواجبها:ايه..قولي شن رايك كيف العسل ولا..
محمد رفع حاجبه وقال:ماشي حاله..
بلقيس برفعة حواجب :والله!..نزلت حواجبها وقعدت ادف فيه وتقول..باهي حول حول خل نغسل ماعيني..
هو ضحك وقال:لا..
بلقيس:قتلك حول نبي نكمل فيسع ونوتي الشاهي!!
محمد:باهي نحول لكن بشرط..
بلقيس:شن هو..
محمد برفعة حاجب:تعطيني بوسه..
هي ضحكت ومدت خدها..
وهو قرب وباسها بقوة..بعدين عضها..
ع خشة امه للكوجينه بلقيس عيطت بصوت منخفض بعض الشي..
فاطمه:شن ادير هنى ..
تلفتوا الزوز لفاطمه وهو مصدومين..
محمد طول مشي طلع بسرعه البرق وهو متمني الارض تنشق وتبلعه..
اما بلقيس حشت وجهها فالماعين وقعدت تكد بتوتر..
فاطمه بإمتعاض:سقدي بالشاهي..
بلقيس بربكه:حاضر..
ومشت فاطمه طلعت من الكوجينه...
وبلقيس التفتت باالشويه لقتها طلعت..ضحكت بخجل..
🍁🍁🍁🍁
فتونس الخضراء..
كانت رزان تدهور هي وامها وعمتها وخوها..
تغدوا برا...
وبعدين قعدوا يدهوروا..
وعماد وراهم ...
مان لابس طاقيه سودا ونظارات سود..وبالطوا اسود..
ع تشيرت ابيض رقبته لفوق..ع سروال اسود..
ع اساس متخفي..
لكن هي كانت تشوف فيه بدون مايلاحظ..
غاليه كذلك ملاحظاته..بس سعيده وتوفيق لا..
🍁كانوا طالعين من محل بعد ماخشوله شروا منه..
رزان وهي طالعه شاده فيدها حاجات طاح منها تليفونها..
جاها واحد يجري قعد يلملها فطروفه..
عماد:التوانسه يبوني نديرها معاهم..
وبلا مايحسب لشي حساب قدملهم...
فاللحظه اللي طلع فيها توفيق..
هو وقف فمكانه....
توفيق خدي تليفونه من يد الراجل..وشكره..
مشي الراجل ع حاله..
شويه وطلعوا غاليه سعيده...
ومشوا..
رزان وهي ماشيه التفتت فجأة..
عماد اللي كان ماشي وقف..
شبحتله بنظره قاسيه..
هو رفع حواجبه وقلبه انعصر عصر..
التفتت القدام وملامح الكبر مرسومه ع وجهها..
اما هو كمل طريقه وراهم وكان حاس بقلبه واجعه هلبه وقابضه بقوة..
🌴🌴🌴🌴🌴
بعد دارتلهم هداكا البازين ****غدي وغسلت الماعين دارت صفرة شاهي اخضر وطلعت بيها..
في الصاله كان في..
ميلاد..محمد...هانيبال ..الهادي ..سميه ..لميا..مرام..الحاجه فاطمه وغاليه...
هي طول مشت لعزوزتها:ها ياعمتي شن رايك في البازين.
محمد شبحلهم..
فاطمه وهي تاخد طاسة الشاهي:ربي يعطيك الصحه بازين لاقبله ولابعده..
ميلاد:الحق ينقال اول مرة ندوق بازين سمح هكي..
سميه ولميا يسحنوا..
هانيبال بعد خدي الطاسه:بعد طياب نعيمه وغاليه ومرام يجي طياب بلقيس ..
مرام ابتسمت..
بلقيس :حطيتني جنب كباتن ياهانيبال..
ضحكوا...
هانيبال :اللي قلته حق مانعرف نجامل..
محمد قريب ينوض يحضن بلقيس قدامهم من فرحته بيها..
ولت قعمزت..
فاطمه:ماكلة بلقيس ومرام احسن ماكله فكنايني اوكل..
سميه ولميا انصدموا..
لميا بضحكه:حيييي ياعمتي!!
فاطمه:قلت الحق يابنتي مانعرف نكذب..
الهادي يشبح لسميه وخايف...
وسميه قريب تتفجر..
لميا؛هههههه باهي يافطومه باهي..
شربت فاطمه الشاهي وتجاهلتها..
لهوا بالهدرزة...
شبحت بلقيس للمياء لقتها تشبحلها بحقد..
بلقيس شقلبت عيونها وشربت الشاهي..بعدين شبحت لمحمد لقاته يشبحلها..
هي استغلت انشغال اللي حواليها بالهدرزة..
غمزتله وضحكت..
هو ضم شواربه بش مايضحكش..حك مقدمة انفه ودار روحه لاهي مع ميلاد والهادي...
وهي تضحك بكتمان..
الحاجه فاطمه بضحكه :بلاش سفتله..
بلقيس :هههههههه
ومازال عيون لمياء بنظرات حاقده تشوفلها..
هانيبال:امتى يروحوا بالزبط ياميلاد؟..
ميلاد:نهار الإثنين إن شاء الله..
هانيبال:اممم..
الهادي:عمر عدى لكليتها شرحلهم ظرفها وهما قدروا الوضع وقالوا مافيش مشكله تخش ع الإمتحانات طول ..
ميلاد:ايه حكالي عمر..
هانيبال؛وينه هو؟..
الهادي؛قال عنده مشوار ضروري..
هانيبال شرب الشاهي وهو يشوف للهادي بعدين غير عيونه عنه وقعد يفكر..
ولمياء مركزة معاهم..
🍃🍃🍃🍃🍃
وعدوا يومين..
وروحوا توفيق وسليمان واللي معاهم لليبيا عن طريق مصراته..
وكانوا هانيبال ومرام فإستقبالهم غادي..
هانيبال خدي رزان فحضنه وماخلاهاش بكل لين ركبت السيارة وهو يناشب فيها ويعطي فيها فالكفوف وهي تضحك..
ركبوا معاه سعيده وغاليه..
اما سليمان وتوفيق ركبوا فسيارة سليمان اللي كان مخليها فالمطار..
روحوا طول ع حوش العيله..
ومن حضن هانيبال لحضن حناتها..
مرة فاطمه ومره حدهم..والدلع كله خداته رزان ..
بعدين خدوها صاحباتها بلقيس وحدود..
ع احضان وبوس..وضرب ومناشبه..
لما عرفت رزان بحمل بلقيس فرحت هلبه وقالت لبلقيس انها هي تبي تسميه او تسميها....
ردت عليها بلقيس..
"دلعانك لين فسدتي..بيسمي سيده ياحنه ريحي جمالك"..
❤❤❤
تاني يوم ..
من الصبح حميد جاب رفقه اللي كانت بتهبل ع شوفة رزان..
ولما شافتها دارت عزي..ورزان معاها فكوهم عن بعض بالسيف..
🍁قعدت معاها يومها ماخلتهاش بكل باتت معاها حتى البيتان..
وكملت رفقه باقي السبوع فالبلاد..
🍁زي ماباقي السبوع كملاته لمياء فحوشهم ع خاطر خوها ابراهيم كان مروح..
لالا انتي حمارة رسمي راهو..تبينا ناخدوها لخوك بش تقعد فخليقتك؟؟!!
سناء:اللي يسمعك يقول ابراهيم خريط مريط ع ليبيا صدقيني كان خداها معاد مروح..
لمياء برفعة حواجب:ماعاد مروح صار !!نقولك حاجه ديري مافي راسك لكن هاه ردي بالك تجيبني تشكي وتبكي بعدين..
عكرشت سناء وجهها وقالت:اصلا خوك فتح معاي الموضوع وقالي تكلمي مع عماد فيه..واني قتله يجينا اليوم..
لمياء ناضت من حداها وقالت بعصبيه؛والنبي معاش تكلميني بكل بكللل..
ومشت من حداها...
سناء شقلبت عيونها وقالت:تحساب روحها هي بس اللي تعرف تتصرف..
🌴🌴🌴🌴
فم بوابه الحوش القديم..
حطت ايديها فجيوب كبوطها من الصقع وقالت:هي اتصلي..
رفقه وهي ترجف:تعالي..نخشوا..صقع سم..
حدهم:باهي خشي هي..
خشوا الزوز..
ردت حدهم الباب وقالت:هي اتصلي..
خدت رفقه نفس..بعدين اتصلت..
نادى مرة ..اتنين بعدين انفتح الخط
"ايوه رفقه"..
رفقه؛هلا عماد شن جو..
عماد:فوتيني اني وقوليلي هي شن حالها توا..
ابتسمت رفقه وقالت:كويسه وتهبل..
ابتسم..
رفقه:عماد بكري قتلك فالرساله نبيك فموضوع مهم ولا..
عماد ضيق عيونه وقال:ايه شن هو؟..
رفقه؛عماد انت قتلي اليوم بتفظها مع سناء ولا..
عماد:ايه..وهي قالت خوي يبيك مايبيك..مش مشكله اساسا نبي اهلها كلهم يكونوا حاضرين نبي كل شي يمشي بطريقة وديه..
رفقه شبحت لحدهم اللي كانت تشوفلها بعدين قالت:عماد في شي ضروري جدا تعرفه حيكون ليك اكبر سبب قدام اهلها لفسخ الخطوبه..
قرن حواجبه بإستغراب وقال:شن هو..
رفقه خدت نفس وقالت:عماد سناء واختها لعبوا بيك انت ورزان لعبه مسخه..
🍁🍁🍁🍁
طلعت من الحمام بعد كانت ادوش..
ومشت بطريقها لدارها..
ع خشة توفيق للحوش شافها وقال؛رزان..
وقفت والتفتت..
جاها وقف عليها ومدلها حاجه وقال:هدي شفرتك الجديده..
ابتسمت وقالت:كويس..
توفيق:قصيتهالك بش تركب مع هاتفك الجديد..
رزان:تسلملي يارب..
ضحك بعدين لف ومشي..
وهي ضحكت..
ومشت لدارها..
فتحت الباب وخشت ..
استغربت لما مالقتش البنات..
رزان:وين عدن؟؟
مشت وين مافي تليفونها الجديد ع الزيانه..
حولت غطاه...
بعدين طلعت الشفره...
وركبتها فالتليفون..
بعد كملت..
رجعت الغطا...بعدين خدت نفس...وزفرت..
رفعت حاجبها وسرحت بتفكيرها شويه..
بعدين استاقضت..
حطت التليفون ع الزيانه..
وشبحت للمرايه وبدت تحول في المنشف من ع راسها..
🍁🍁🍁🍁
شن قالك..
رفقه:ولا كلمه صكر طول..
حدهم بشي من القلق:شن تتوقعي يصير توا..
رفقه بتوتر:والله ماني عارفه..رمشت عيونها بسرعه وقالت..اني كل همي توا نصلح اللي فسدته وان شاء الله تتقربع الدنيا بعدها..المهم عماد ورزان يولوا لبعض..
حدهم تنهدت وسكتت..
رفقه:خيرك خايفه هكي؟..
حدهم شبحتلها وقالت:مش خوف..بس نحس فرزان من ناحية عماد خلاص..
رفقه:ع خاطر حلفت ع رقمها الجديد مايوصله..وقالت مانبيش نسمع سيرته!؟..طبيعي يا حدهم قاعده واخده منه موقف..لكن فالنهايه قاعده تحبه..
حدهم:مش عارفه..ان شاء الله خير وخلاص..
رفقه:بإذن الله خير..هي تعالي نمشولها..
حدهم:هي..
فتحت رفقه الباب..
وطلعوا الزوز وتوجهوا لحوش ميلاد..
🍁🍁🍁🍁
شن صار في اللي قتلك عليه..
سناء بإبتسامه:اطمن قتله اليوم يجي وانت تكلمه بروحك..ومدتله مق النسكافيه..
خداه وقال:هي توا حالها باهي ولا؟..
سناء:ايه باهي..
شرب ابراهيم من النسكافيه وبعدين سرح بخياله لبعيد..
زي مااخته سرحت وهي تفكر زعمه يصير اللي تبيه ولا يجي ع راسها..قالت فنفسها"نفسيتي تعبت خلها تنحسم ونعرف اميته وين تصب"..
🍁🍁🍁🍁
الساعه 5:30عصرا..
بعد ماقطع مسافة الطريق وهو يفكر..وصل لشي ويبي ينفده..وبيه حينهي كل شي بهدوء..ويبانوا الطرفين هما اللي فضوها مع بعض..مش بس من جهته هو..
بعد وصل لحوش نساباته..
نزل من السيارة..
انفتح الباب ..
لقي سناء فإستقباله...
سناء بإبتسامه:ياهلا..
عماد بملامح وجه جامده:اهلا..
سناء:خش..
خش عماد..
وهي صكرت الباب وقالت:تفضل خش..
عماد مشي كم خطوه بعدين وقف..
حك عماد حاجبه وقال:شن الشي الضروري اللي تبيني فيه..
سناء بإبتسامه:خوي اللي يبيك مش اني..
انفتح باب الحوش الدخلاني وطلع ابراهيم..
ابراهيم :بونسيب..
ابتسم عماد مجامله..
قدم ابراهيم سلم ع عماد :اول لقاء..
هز عماد راسه بإيجاب ومازال محتفظ بابتسامته البارده..
سناء: وفيه غيره هلبه بإذن الله..
ضحك ابراهيم بعد طلق يد عماد وقال:إن شاء الله..
عماد:اممم..قالتلي اختك تبيني في موضوع مهم..
ابراهيم شبح لأخته:ماعطتيشي نبده..
سناء بضحكه:لا خليت الموضوع منك ليه..
عماد ضيق عيونه وقال:شن في بالزبط..
ابتسم إبراهيم بإحراج..
سناء ضحكت بعدين قالت لعماد:ياسيدي يبيك تتوسطله عند خالك ميلاد بش بيخطب بنته...
رفع حواجبه...
نار ولعت فيه من اسفل رجليه لأعلى راسه..
ولت ملامح وجهه تخوف...
قدم بإندفاع زي الوحش لإبراهيم وعطاه بوني ع وجهه جابه لوطا وهو يقول
بصوت كله غضب والبحه زايداته :يخطب امه..
وطاح فيه ضرب زي المجنون..
وسناء تعيط ع طول رقبتها...
وابراهيم وهو يتلقى فالبوكسات:غير..ااه..شن...اااه..شن..ااااااع..
سناء بعياط:حوووووول..حوووول..
ع طلعة بوها وخوها يجروا..
والجيران يطقوا ع الباب..
مشت تجري سناء فتحتلهم الباب..
ولمياء وامها يتفرجوا من فوق ويعيطوا...
وعماد مايفرز فشي يضرب وخلاص..
فكوه عنه بالسيف..
لدرجة ان المسكين ابراهيم اغمى عليه من الضرب..
مصباح بغضب:امشي اطلع واقلب وجهك من حوشي ماعنديش بنات نعطيهم لكلب زيك..
عماد بضحكه ساخره:بركه ياجامع اللي جت منك..
عامر:والله لما ندمك عليها..
عماد طلع سلاحه وقال:برا اسأل ع عماد الحداد كويس ياكتكوت..وتعرف بعدين من يندم مني
كلهم شافوله بخوف..
وهو وزع نظرات التهديد عليهم ..
بعدين لف ومشي..
وهو ماشي..
حول الدبله من يده ورماها وراه..
وصل فالباب فتحه وطلع..
🍁🍁🍁🍁
سناء قلبتها بكاوات وصارت فيها حاله..
ولمياء اتصلت بعمر وخبراته باللي صار وهي قريب تهبل..
مش هي بس..
حتى باقي العيله لما عرفوا..
🌴🌴🌴🌴
حي غبارة حي فشكارة..
حميده:يمي تربحي هدي روحك صار اللي صار خلاص تو..
فاطمه:وخوك ..خوك عمر كيف بيصير فيه هو وهله..
حميده:مايصير شي..بالك تحسابي لميا تسيبه ؟!تي هي ماخلت مادارت بيش حصلاته..
غاليه وبلقيس اللي كانوا شادين ضحكتهم ومتشمتين لما سمعوا كلام حميده تبدلت ملامح وجوههم للإستغراب وقعدوا يشبحولها..
🍁🍁🍁🍁
هالنهار عليه ندور هالنهار ربيع منور..
ادربك ع طاولة الكوجينه وتغني وولادها الزوز وبنتها يشبحولها ويضحكوا..
ع خشة راجلها للكوجينه قال بعصبيه؛وينه ولدك وين..
كفايه وهي مبتسمه بنصر:وين ماكان يكون شن عندك بدير معاه..
سعد برفعة حواجب:كفايه!!انتي مستوعبه اللي داره ولدك..
مالك:ايه مستوعبه وكلنا مستوعبين..ماحد ينكر انه غلط من البدايه في اللي داره وتوا صلحه..وصدقني يابوي توا خير من بعدين...
كفايه:وبعدين انت بروحك كنت تقول هو راجل كبير وعقله فراسه يعرف خلاصه ولا؟!..
سعد هز راسه بإيجاب وقال:توا تتحركي قدامي وتلبسي عبايتك خل نمشوا للناس اقلها نعتذروا منهم ع تصرف ولدك الارعن..
كفايه؛سعد!!
مروان:بوي مش فصالحكم المشيه هادي..
مالك؛وبعدين راهو مش حتغير شي عماد حسمها ونهاها..
سعد:بالشكل هدا!!؟؟.
مالك:تمام باهي..تو اني نتصل بيه ونقوله يجي ونفهموا منه قبل هو ليش هكي تصرف..
سعد شبح لمالك شويه بعدين قال:كلمه بسرعه..بعدين لف مشي وهو يقول...اني فالمربوعه..
مالك طلع تليفونه من جيبه وطول اتصل بخوه...
🍁🍁🍁🍁
هو حبي وبس اللي شبحه للعين ونس..
عليه نكبد بيه نحس الغالي يامطيب قلبه..
بصوت عالي غنى من عنده..
"هو بس نحبه"
وقعد يجري بالسيارة وهو يغني..
والروشن مفتوح ..
خطم حدا جماعة من الناس..
وحده قالت لماشافاته:شكله واخد حاجه..
ردت عليها التانيه: تلقيه ترامادول اصلي ولاحشيش فاخر..
💓والمدمن اللي يحكوا عنه مازال يغني وقالبها ع راسه وهو فقمة السعاده..
وتليفونه يرن وهو مايسمع فحاجه..غير صوت نبضات قلبه الطارب من السعاده..
شويه ووقف السيارة ع تركينه..
نقص صوت المسجل..
وطلع تليفونه من جيب الكبوط..
شافه لقي 40مكالمه لم يرد عليها..
هو بضحكه قال:مش وقتكم بكل..توا وقتي كله لحب قلبي بس..
مشي طول لسجلات المكالمات وطلع رقمها واتصل بيها..
حطه ع ودنه وهو ملهوف لهفه الدنيا كلها..
"الرقم المطلوب..غير مستعمل"..
حول التليفون من ع وذنه وهو يشوف للتليفون بقرنة حواجب..
رقمها ايه..هو رقمها..
لكن البداله قالت..
"غير مستعمل!"..
عاود مرة..اتنين..تلاته...
نفس الشي البداله ترد وتقول..
"غير مستعمل"..
بلع ريقه..
بعدين اتصل برفقه...
حطه ع ودنه وهو يسمع فيه ينادي..
__________
هي كانت تشوف لتليفونها بضيق..
وحدهم تشوف لرزان..
قامت رفقه عيونها فرزان..
رزان بحده:حلفت اني يارفقه..تبي تخسريني للأبد عطيه رقمي..
رفقه نزلت عيونها للتليفون..خداته وصكرت عليه بالحمرا..وقفلت التليفون بالمرة...
__________
هو الدموع عبوا عيونه..
قال بصوت غالبه عليه البحه:تو شن معناه هدا؟!..
عاود اتصل برفقه..عطاه مقفل..
وخر بيده شعره للخلف بعنف..
بعدين عاود اتصل برقم رزان..
وسمع للمره الخامسه..
"الرقم المطلوب غير مستعمل"..
نزل تليفونه من ع ودنه وهو يشبح القدام بعدم استيعاب..
جي بين عيونه فهديكا اللحظه نظرتها الأخيره ليه لما كانوا فتونس..
نزلت من عينه دمعه سخونه..
مسحها طول..وعاود اتصل بيها..
وعاودت البداله تقول..
"الرقم المطلوب غير مستعمل"..
🍂🍂🍂🍂🍂
الرقم اللي مطلوب انساه...
الحب نهاه..
ورقمك من النقال..محاه..
الرقم اللي مطلوب غدرته..
ماقدرته..
خنته ومن يدك..طيرته...
عاملته بإهمال خسرته..
وبعت غلاه
تجاهلته قصرت معاه..
الرقم اللي مطلوب يريد..
ايعيش وحيد..
وينسى موضوع التكبيد..
فوته ليش عليه اتزيد
ارجوك اخطاه..
وقول عليه..
الله..الله....
...يتبع...
