#العشق_المتمرد "إختبار"
الجزء 108 القسم الثاني والأخير..
#جمان_فريد
🌟..
خش للمستشفى بش بياخد ولده من بعد ماوصى عليه واحد من الدكاترة اللي يعرفهم..
كان جوه ملخبط هلبه..
ماكانش حاسب حساب نهائي لحمل مرته..
هو صح معاش يكنلها اي مشاعر وعايفها فعلا..
بس هي مراة وهو راجل وعرفت كيف تستغل نقطة ضعفه وتخليه يستسلم قدامها..
لكن هي كلها مرة ومعاش تكررت..
ع قد ماحاولت كان يتهرب منها..
شعوره تجاهها مات ومعاش يحس تجاهها اي رغبه..
وللأسف اليوم ينصدم بأنه زاد ارتبط بيها اكثر..
"بابا"..
استاقض لولده اللي جاه ووقف قدامه..
فؤاد:بابا الدكتور قال خلاص معاش تجي لين تكبر..
ضحك الهادي وشد يده وقال:باهي تعال..
كيف بيمشي..
جاه صديقه..
:خلاص معاد في داعي تجيبه..
الهادي:مراجعاته تمن خلاص!؟
:ايه..وطبعا زي ماتعرف لازم تستمروا ع اهتمامكم بيه لعند مايوصل للسن المقرر عليه فيها العمليه..ونرجع نحذرك يالهادي لو ولدك حول النظارات مستقبلا حيكون في خطر ع عينه التانيه وتلحق الأولى والوضع يولي اصعب بواجد..
الهادي مسح ع راس ولده وقال:ماتوصي حريص ياشهاب..
الدكتور :كويس..شبح لفؤاد بإبتسامه وقال..ربي يحفظك يابطل..
ابتسم فؤاد..
الدكتور:هي نشوفوك ياهادي..سلام عليكم..
الهادي بإبتسامه:وعليكم السلام...
مشي الدكتور..
والهادي خدي ولده ومشوا..
فؤاد:بابا حقه اليوم في حفله..
الهادي:ايه..
فؤاد:بتجي حنين؟
تلاشت ابتسامة الهادي ..وفضل السكوت..
فؤاد:خيرها معاد تجينا؟
الهادي:هي تو بعد نطلعوا من هنى نعدوا للسوق نجيبوا حاجات ونروحوا..
فؤاد شبح لبوه شويه بعدين غير عيونه القدام وقعد ساكت..
كيف وصلوا لباب المستشفى..
جت فضيله خاشه..
هي شافتهم لكن دارت روحها ماشافتهمش..
والهادي قعد معاها بعيونه..
اما فؤاد..
"خالتي فضيله"..
هي اضطرت توقف..
غمضت عيونها بعدين فتحتهم ..
التفتت لفؤاد وهي مبتسمه وقالت:فوشه ش جو..
فؤاد: مليح..واشرلها بإبهامه وهو رافعه للأعلى..
هي ضحكت..بعدين قالت:يللا باي توا..
والتفتت طول ومشت بدون ماتعير لعبدالهادي اي اهتمام..
هو تنهد بعدين طلع بولده..
🍁🍁🍁🍁
الحمد لله يمي..
وخرت عن امها وقالت:المهم انتي شنو حالك..
فاطمه:الحمد لله مابياش..
زينب بإبتسامه:الحمد لله..
شبحت جنبها لقت بناتها حاضنات بعض بقوة ..
رباب:اني اكثر بهلبه ..
رانيا:ووك ع المكان اللي مخليتيه ياقرده..
ضحكت رباب من بين دموعها..
زينب:تي باهي خلاص حولي ..
ضحكت رانيا ووخرت وهي تمسح فدموعها
وجت رباب لأمها حضنتها وقالت:زوبتي..
ضحكت زينب..
غاليه وهي تمسح ع شعر روان:سلمها السمحه وسلم شعرها..
روان تشوف لخالتها بإبتسامه..
ع خشة رزان وهي مبتسمه قالت:السلام عليكم..
ردوا السلام...
قدمت رزان لرانيا مدت يدها..
رانيا صافحتها وهي تقول:شن جو..
رزان:تمام..شن جوك انتي..
رانيا:تمام..
وطلقوا ايديهم من بعض..
بعدين قدمت لسند ومدت يدها:شن جو سند..
صافحها وقال:تمام..شن جوك انتي..
رزان :تمام...
طلقت يده والتفتت لعمتها زينب لقتها مبعده ع رباب
قدمتلها وهي تقول:حمد لله ع سلامه عمتي..
زينب:الله يسلمك رزونه..
وسلموا ع بعض بالخد..
سمعوا اصوات كلاكس....
غاليه بإبتسامه:نعيمه..
لمياء؛ماشاء الله غاليه تميزي في الكلاكسات ..
سميه:حتى خطاوي الكرعين تميزهن..
شبحتلهم ع جنب وهي مبتسمه بريبه..
فاطمه:قولن ماشاء الله..
ضحكوا زينب وبناتها ورزان..
هما ابتسموا مجامله وقالوا مع بعض :ماشاء الله..
وسند يراقب فيهم وهو رافع حواجبه بضحكه..
ع خشة اسيا تجري..
كانت لابسه كبود وردي..
تحته سروال جينز..
وطاقيه صوف ورديه لماعه مغطيه وذانها..
والخديدات من الصقع حمر...
جت طول لسند وقالت:ثنودي..
ضحكوا..
وهو ضحك برفعة حواجب وطبس حضنها ورفعها فوق..
خشوا وراها امها وحناها وهما يضحكوا..
وبدوا يسلموا..
وبعدهم خشت نور ومعاها الولاد...
كلهم كانوا شادين حلوة لحاسه..
جواد و معمر يلحسوا فالحلوة متاعهم..
لكن مجد..
"هاكيها"
فرحت روان قريب طارت وخدت منه الحلوه..
مجد:نفتحهالك..
هي مدتهاله..
فتحها بعدين عطهالها..
خدتها وحطتها في فمها..
هالمشهد..
كانوا يراقبوا فيه رانيا وغاليه ودلال اللي كانوا هي ورباب يسلموا ع بعض..
شبحوا لبعضهم شويه..
بعدين:هههههههههههههههه...
بس رانيا من وسط ضحكتها كانوا دموعها معبيات دموعها🍃
سند:قولي سند..
اسيا:ثند ياودي ثند ياسر..
سند بضحكه:هاك قلتي ياسر عادي..
اسيا قلبت وجهها عنه عناد..
وهو يضحك عليها..
شويه..
وكذلك سمعوا كلاكسات...
طول لمياء شبحت لرزان ..
اللي كانت تحاول تخفي لهفتها..
لحظات..
وخشت كفايه بنورهان..
نورهان مشت تجري لغاليه..
وكفايه بعد سلمت ع سند وباست اسيا..
جتها رزان بتسلم عليها..فاتتها كفايه ومشت لأمها..
اللقطه صارت قدام سند مباشرة..
عيونه ع يد رزان الممدوده بعدين شبح لوجهها..
لقاه انخطف لونه ..
نزلت يدها وضمتها بيدها التانيه وحاولت تمسك دمعتها ع قد ماتقدر..
وعمتها غاليه قعدت تشوف لكفايه بضيق..
حتى نورهان سلمت ع الكل وفاتت رزان ..
كفايه وهي تسلم وصلت فزينب:اختي الكبيره..
زينب بضحكه:اختي الوسطانيه ..
وسلموا ع بعض..
كفايه:حي عليك اليوم تصكري 47عام تمتلك خلاص..
ضربتها زينب ع ظهرها وقالت:الأخت مواليد كم ترا..
كفايه:اصغر من نورهان بنتي بعام..
ضحكوا..
لمياء :الحق ماشاء الله عليكم الزوز مايبان عليكم عمركم..
جتها كفايه وسلمت عليها بالخد وهي تقول:نجي مرت خوي..
زينب بإبتسامه:تسلمي..
لمياء بإبتسامه وهي تسلم :ماقلت كان الحق..
غاليه قعدت مركزة بالنظر ع لمياء..
بعدين شبحت لرزان..
لقتها مشبكه ايديها فبعض وتحاول تتماسك وتتجاهل فنفس الوقت...
🍁🍁🍁🍁
في مكان العمل..
يتكلم بالتليفون..
محمد:ايه بيجن كلهن..
بلقيس:خسارة وكانك واخدني توا راني معاهم..
محمد برفعة حاجب:وانتي تبيني ناخدك بيش تولي معاهم؟
بلقيس وهي مبتسمه بمكر:مال شنو اكثر حاجه شجعتني نوافق عليك هي هلك وجوهم..
محمد برفعة حواجب:واني اكثر شي شجعني نخطبك هو هلي ..يحبوك واجد مش عارف ليش..
بلقيس:لأني حلم وامنية كل عيله..مافي عيله ماتتمنى بلقيس تكون كنتهم..
محمد:ماوالكه فروحك مقلب الزفت..
بلقيس:هدي حقيقه كيف الشمس واضحه...
محمد:الحقيقه اللي كيف الشمس لعند توا ماريناها..
بلقيس بضحكه:صايرلها كسوف..هههههههههه.
محمد بإزدراء:أخرلك مرة اديريها وتخففي دمك..
بلقيس:ههههههههههه..
"استاذ محمد"
بلقيس:عدي ياأستاذ شوف شغلك..مابعد اللي معاك منك..
محمد:اني اللي مابعدي..
ضحكت بلقيس..
"استاذ لو سمحت"..
بلقيس بإبتسامه:هي خلاص بالسلامه تو..
محمد:اصبري هييي..
بلقيس:نعم!؟
محمد:ماتطلعيش اليوم بكل حتى لجنان حوشكم صقع سم..تاكلي بردة ع صدرك...ديرلك الآزما ولا الربو ونقعد حاصل فيك..
"استاذ محمد"..
حول التليفون وقال:خيرك الزفت خيرك ماتشوفش فيا مشغول..شويه ونفضالك..مش هارب راني..
الراجل سكت وهو يشوفله بحده..
محمد رد التليفون ع وذنه وهو يقول:تقول الدنيا بطير..
بلقيس بضحكه:باهي يافصلان عدي لخدمتك توا خير مايلزوك ونقعد نراجي فيك عشر سنين اخرات...
محمد:اعووذ بالله من فالك الأسود..عدي والنبي عدي عدي..
بلقيس :هههههههههه..سلام يااحلى حصلة حصلتها فحياتي..نحبك..وصكرت..
هو وجهه ولا احمر..وقلبه تسارع فالنبض..
تلقائيا تنهد..
حول التليفون من ع وذنه..
وع وجهه مرسومه ابتسامه خفيفه..
الراجل:سقدنا ياخونا عندنا مانديروا راهو..
تبدلت ملامح وجهه للحده..
رفع عيونه فيه..
بعدين مد يده للراجل..
الراجل عطاه الوراق..
وهو خداهم بعنف وبدي يخدمله فيهم...
🍁🍁🍁🍁
مشي اول النهار من احلى مايكون..
مع الأجواء الشتويه الرائعه..
طبعا الرجاله حطوا نساوينهم وروحوا كل واحد عند ماشاغله..
لهدا..
داروا غداهم رشده لحس او برمه جاريه بالقديد من ايديات نعيمه..
كلوا بإيديهم ورجليهم لين عرفوها رشده..
وبعد غسلوا ماعينهم..
وتوا عالة الشاهي ..
والكانون اللي بيطيبوا عليه الشاهي..
وجهزوا مايعدوا بيه الشاهي..فطيرة وبريوش منزلي وكيكه..
وتقعميزتهم كانت فالصاله..
والصغويرة حداهم يلعبوا..
"حييييييييييي"..
زينب بضحكه:ياحنه وتعتر صابرين ع التليفون وتفتشه وتلقى الرسايل اللي فيهم تريا ونجمه نازلات في الحموات..
رباب بصدمه:نتخيل فوجه نجيه وهي تقرا فيهم..
ع جية غاليه حطت صفرة الميه وقعمزت وهي تقول:الرسايل شن مكتوب فيهن قلتي؟!
رانيا بضحكه:تريا مرت عمي خالد باعته رساله لنجمه مرت عمي سالم..قالتلها يجوا حمواتكوو ردت عليها نجمه وقالت ايه يجوا يترادسوا ويروحوا
غاليه:حييييي ع امهن..
كفايه:ايه باهي كملي بعد عترت فيهم صبريه شن صار..
زينب:صورتهم..وبعتتهم لهناء..
كلهم:هيييييييييييييي..
رانيا:ومن هناء طول لنجيه.
رباب:وبعدين؟!!
زينب:نجمه اطلقت وردوها
خبطوا بإيديهم ع وجوههم..
زينب:اما تريا...ووالله زي مانحكيلكم مانزيد عليكم كان نفس الا كبت ع ايديهم وع روسهم بش يرضوا
فتحوا عيونهم ع وسعها من الصدمه..
نعيمه:حرفيا هكي !!؟
زينب :قسما بالله العظيم..
كفايه:ياااربي..
فاطمه:ومبروكه وين من هدى كله ياكبدي.!؟
زينب:نافست بناتها وجت مع كناينها وهي اللي غصبت ولدها يرد نجمه ...لكن مع هدا ماقدرتش توقف بناتها عند حدهم..
غاليه:بنات عمتي مبروكه قادرات وحاكمات فخوتهن..
رباب:مش كلهم..مايقدروش ع بوي وعمي مفتاح..
زينب:صح خيري ومفتاح مايقدروش عليهم...
دلال:اسمعوا ياسميه ولميا واحمدوا ربي ع العيله الباهيه اللي طحتوا فيها وهالعزوز والحموات المقومات..
شبحت نعيمه لدلال..
ورفعت كفايه حواجبها وهي شاده ضحكتها..
زينب:ايه والله صدقت بنية اختي
فاطمه:حتى كناينا كويسات مافي وحده فيهن ادير العيب..
لمياء وسميه:تسلمي ياعمتي..
لمياء:ربي يعطي كل واحد ع قيس نيته..
سميه:صح..
دلال:الحمد لله..
بدي تبادل النظرات بين البنات..
ولمياء شبحت لدلال اللي كانت تشرب في الشاهي بحده..
شويه وقالت كفايه:ايه نعومه شن جو حماتك العروس..
نعيمه شبحت لبناتها وهما شبحولها وضحكوا..
غاليه بضحكه:إن شاء الله خير!
نعيمه:شن بنقوللكم..قريب تحكي للحيوط ع عليوه..
كفايه:اشيه...عليوه صار..
نور بضحكه:ومرات علوش..
ضحكوا..
دلال:اللي هناك تهدرز بيه كل حاقه كل حاقه ..
فهموا عليها وقعدوا يضحكوا..
متحفظين فالهدرزة قدام الحاجه فاطمه..
زينب:يللا..ربي يسعدها ويبعدها..
نعيمه :هو هدا...
فاطمه:قاعدين صغويرة دلال يعدوا لآمنه..
دلال:كل خميس وجمعه عندها..
فاطمه:جبرتي بخاطر عميمتك ربي يجبر بخاطرك يابنيتي..
ابتسمت دلال..
وكذلك هما قعدوا يشبحولها بإبتسامه..
طق باب البوابه..
"ياعويله"
غاليه:دفي الباب وخشي ياسعيده..
انفتح الباب وخشت سعيده..
مشت طول لباب المروحه وفتحاته وخشت وهي مبتسمه تقول:السلام عليكم..
ردوا عليها السلام..
خشت سلمت عليهم..
كلهم سلامهم باهي ماعدا سلام كفايه كان باليد..
سعيده تفاجئت من لقطتها ووجهها تغير..
ومشت قعمزت حدا غاليه..
غاليه عيونها ع كفايه اللي كانت ملامح وجهها حاده..ورافعه حاجبها وهي تشوف لخاتمها..
تنهدت وهي تقول"ربي يعدي هاليوم ع خير"..
ولمياء معاهم ع الخط...
🍁🍁🍁🍁
عرفتي كيف تستخدميها ولا؟
رزان:ايه قالي خالي كيف نخدمها..
حدهم:خيرك رزان امس كنتي متحمسه عكس توا..
رزان شبحتلها بضيق وقالت:عمتي كفايه اليوم..لما جيت بنسلم عليها هزبتني.
حدهم:قصدك مابتش تسلم عليك؟!
رزان بعيون مدمعه:ايه..
حدهم بضيق:ليش باهي!؟من الأول كانت عاديه بعد فسختي شن غيرها هكي؟!..
رزان بنبرة باكيه:واضح ياحدهم..عماد شكله..كرهني واجد..
تنهدت حدهم بعدين قالت:خلاص رزان مفروض بعد توصل لهني تنهيها حكاية عماد هادي ومعاش تتأملي منه شي خلاص..
رزان قعدت تشبح للكاميرا وهي ساكته والدموع ينزلوا..
حدهم تبي تغير الجو...
مسحت دموع رزان وقالت:كان نقولك امس طيبت وللمرة الأولى مكرونه بالبيشاميل..جت ممزرطه صح لكن طعمتها خيال..كليتها بروحي..
ضحكت رزان من بين دموعها وهي تشوفلها..
وحدهم تضحك وتقول:ماجتش شاده روحها مش عارفه علاش..
رزان:مرات مقادير البيشاميل مش مزبوطات..
حدهم:امم مش عارفه....نقولك شن درت.......
🍁🍁🍁🍁
الساعه 6:30بعد المغرب..
10دقايق ويعدي..وطلعت وسكرت الباب بالمفتاح..
زينب:علاش تصكر فالباب بالمفتاح؟!
كفايه:لامش هدا السؤال..السؤال علاش هي قاعده برا مش داخل معانا؟!
نعيمه:السؤال الاهم مكيف شنو اللي بيصلحوه والمكيف الوحيد الموجود فالحوش فالدار هادي..
شبحوا كلهم للمكيف..
والدار كلها تعبت بعلامات الإستفهام..
🍁🍁🍁🍁
تو نجيبلك حصتك انوسي ردبالك تتعشى..
ضحك وقال:حاضر..
رباب:وعد..
مؤنس خبط يده ع صدره وقال:كلمتي سند يا****
ضحكت وقالت:نحبببك..يللا باي ياسموح..ومشت طول بطريقها لحوش جدها..ومؤنس وراها لين خشت ممر فم البوابه..
بعدين مشي لسيارته ركبها وتحرك..
🍁🍁🍁🍁
خشت رباب مع رزان اللي تلاقت هي وياها فم البوابه..
لقوا غاليه ولمياء يتساعدوا فترتيب الوضع فالصاله..
شافتهم غاليه وقالت:بسرعه بسرعه رزان طلعي الطواسي..
رزان:حاضر... ومشت خشت للدار..
رباب وهي تشوف للتحضيرات:الله ع التنسيق روعه..
غاليه:وطي حسك..
رباب برفعة حواجب قالت بصوت واطي:وينهم..
اشرتلها لمياء وهي تضحك ع الدار المصكره..
ضحكت رباب..
🍁بعد بضع دقائق..
خش محمد:هاه شنو..
غاليه :افصل...
مشي محمد..
ثواني معدوده والضي انقطع..
في الدار...
الصغار عيطوا..
زينب فتحت فلاش تليفونها..
شافتها روان جتها تجري وحضنتها..
واسيا ونورهان مشوا لأمهاتهم..
اما الاولاد قعدوا فأماكنهم..
كفايه ؛تي هادوم شنو يديروا بالزبط!؟
نعيمه:خل نشرين ع غاليه...
كيف جايه بتتصل..
انفتح الباب وقالت غاليه؛اطلعن اطلعن بسرعه..
هما انخلعوا...
اللي هدا طبت عيلها وطلعت..
دلال بهمس:جو..
رانيا ونور ضحكوا بكتمان..
زينب:يانهاري شن في فهمونا روان تخاف من الظلام ترعش من الخوف راهو..
فجأة رجع الضي...
"زنوووووبيااااااا"..
قعدت مفنصه وهي تشوف حواليها..
تشوفلهم كيف يضحكوا..
وتشوف للصاله كيف كلها مزينه..
بس اكتر شي لفت نظرها
رقم 47اللي فنص ع هيئة بالونات منفوخه بحجم الحيط..
نزلت بنتها...ومشتله تجري..
شدت رقم اربعه وهي تقول:غالطين..واحد هني مش اربعه..
هما:هههههههههههههههه..
كفايه وهي تتحلف بيدها:الله مادخلي فيكم ومانعرفكم ديرولي زيها يعني اديرولي زيها..
ضحكوا عليها..
عمر وهوا يشوف للطاوله الممدوده المليانه بكل مالذ وطاب قال:تي هيا طفي الشماعي وسقدينا..
ضحكوا تاني..
وقدمت زينب للطاوله وهي واقفه مقابله الطورطا وابتسامة فرح ع وجهها وخواتها وخوتها حواليها وامها مقعمزة تشوفلهم..
ولعت غاليه الشماعي..
بعدين قالت لنور تطفي الضي..
طفاته نور..
وبدوا يغنوا...
سنة حلوة يازوبه..
سنة حلوة يازوبه..
سنه حلوة سنه حلوه سنه حلوه يازوبه
"ورحتي عزوز يازوبه ورحتي عزوز يازوبه
راك كبرتي راك كبرتي ورحتي عزوز يازوبه"
فتحت نور الضي..
شافوا كلهم لمحمد اللي كان ماد تليفونه..
متصل بهانيبال وفاتح المايك وخلاه يشاركهم الأجواء..
زينب بصوت عالي:ماصدقت انت عاد..
هانيبال:طفي شماعيك طفيهن..
ضحكوا..
وقربت زينب نفخت ع الشماعي طفتهم..
كلهم صفقوا وقالوا بصوت واحد:هيييييي..
هانيبال:بعد شاب..
زينب:بعد عينك يابو كرش..
ضحكوا عليهم..
هانيبال بضحكه:ياودي اتصلنا نهنوك ونشاركوك فرحتك رغم اني متأكد مليون في الميه انك ناسية تاريخ ميلادك وماتندري عليها منين زارقه..بس مافيش مشكله تعدي بجوها..
كلهم.ضحكوا..
وزينب قالت:هنيوه..خالتي برقه تسلم عليك..
هانيبال:هي بالسلامه..
وصكر فعلا...
كلهم ماتوا من الضحك...
زينب بضحكه:هدا دواه من اليوم وبرا غادي..
عمر بضحكه:تي باهي هيا قصيلنا الطورطه سقدي سقدي..
قالها وهو يصفق بإيديه وهما يضحكوا..
جت غاليه لزينب وعطتها الموس وقالت؛هي قصي..
زينب شبحتلها بإبتسامه وقالت:تخطيطك صح؟
ضحكت غاليه وهي تشوف للطورطا..
كفايه:مانعرفك ياغاليه اديري زيها وخير منها..
زينب:كتموتوا كتموتوا والحساد قريب يموتوا..
كفايه بغيظ:ايه بنطق من الحسد..
ضحكوا..
عمر ومحمد:تي هيااا عااااد..
ضحكوا تاني..
وبدت زينب تقص فيها..
💕بعد قصتها بدوا يهنوا فيها..
واللي هدا من اللي يعرفوا جابلها هديه..
وكلها كانت رمزيه وبسيطه..
بس رباب هديتها كانت غير..
لما حضنت امها قالت فوذنها بهمس:اني حامل..
زينب شهقت وهي تبعد فبنتها..
كلهم شبحولها..
ضحكت بفرح ..وحضنتها من جديد بقوة..
الشباب زبطوا ودارو جو العبط..
والنساوين فهموا القصه..
💕وبعد هدية رباب اللي كانت غير الغير..
جت هديه سند..
كانت خاتم ذهب حلو ولايق بأمه...
زينب:ليه عليك وليدي دسيت فلوسك لعمرك انت اولى..
سند:انتي اولى من نفسي عندي زنوبيا..
ضحكت من بين دموعها..
وهو خداها فحضنه..
وكلهم يشوفولهم بإبتسامه ومأثر فيهم الموقف هلبه..
اما الحاجه فاطمه فكانت تفرح وين تشوف مواقف زي هادي بين بناتها وصغارهم..
تطمن اكثر ع بناويتها ان ذريتهم جت صالحه وحيرعوا والديهم خير رعايه...
💕💕💕💕
وقت العشي..
كانت رزان ادور بكامرتها عليهم..
جت عند عمتها زينب وسألتها..
رزان:عمتي كنتي متوقعه شي كيف هدى؟!
زينب بضحكه:اني ناسياته تاريخ ميلادي بكل ولا كان خاطر ع بالي ان في حد مذكره..
ضحكت رزان بعدين قالت:باهي اليوم هدى شن يعنيلك..
زينب تنهدت وقالت:يعنيلي هلبه لين نموت ماننساه..
رزان:بعد عمر طويل..ع فكره..كله من الأول فكرة عمتي غاليه..
شبحت زينب لغاليه..
ورزان وجهت الكاميرا عليها..
كانت تاكل وتهدرز مع رانيا ودلال..
زينب بدموع:ربي يفرحها يارب..
وجهت رزان الكاميرا لعمتها وقالت:يارب..
🍁🍁🍁
صحه صحه نساوين عمامي..
لمياء وهي تمضغ:مانا..كلوش..برواحنا..
رزان :امم..صحتين..
سميه بلعت وقالت:وين امك؟
رزان:حدا حناي حدهم مريضه شوي..
الزوز ردوا وهما ياكلوا:لاباس..
🍁🍁🍁
عمي عمر تنفس ..
عمر وهو ياكل:عدي..يا..فرخه..
ضحكت رزان..
وجهت الكاميرا لمحمد...
رزان:حي ع اللباقه والأتيكيت نعترفلك عمي ديما تعجب فيا طريقتك في الماكله بهدوء وركازة..
محمد:ترا طيري من قدامي..
رزان بضحكه:نوريه لمرتك؟
محمد شبحلها بحده وقال:رزان عدي..
رزان ضحكت ومشت..
🍁🍁🍁
تمرر في الكاميرا ع البنات وعمتها غاليه وهي تقول:لاهيات بالقرمه انظر على من يحكن..
هما لما روها وجوههم تغيرت..
وابتسموا بسرعه وقعدوا يحيوا في الكاميرا بأيديهم وهي حست بشي..
بس مع هذا مشت كملت تصوير..
غاليه وهي تشوفلها:راجن شوي كان ماسمعتنه خطبها مانبدا اني غاليه..
دلال وهي تشوف للمياء:قادرات هادم..
رباب:ايه..شفتي كيف خلت عمر..خاتم فصبعها..
نور:مااعتقدش تقدر ع عماد ..
غاليه:تقدر ونص..شبحت لرزان وقالت..ربي يكون مع البنيه والله خايفه عليها..
رانيا تاكل ..وتسمع وهي تشوف لرزان..
🍁🍁🍁
واخر شي مع السمحين هديم وحناهم..
الصغار ياكلوا ويشوفوا للكاميرا..
فاطمه:قعمزي كولي يابنت..
ضحكت رزان وقالت:باهي..
نورهان:ماتاخديش من مشروبنا ..
شبحتلها..
فاطمه:شن الكلام هدى يانورهان..
نورهان:هادي وحده شريرة مانبيهاش تاخد من حاجتنا..
لفت رزان ومشت وقلبها يوجع فيها ع الآخر..
وقفت تشغيل الكاميرا...
ومشت طول طلعت من الحوش...
بدون ماحد يلاحظها...
فاطمه شبحت لنورهان بغضب بعدين ناضت وسيبت كل شي...وتوجهت لدارها..
وكلهم كانوا لاهيين ومالاحظوش..
نورهان:وحده كلبه هادي..
روان:مني؟
نورهان:رزان..
جواد:عيب هادي اكبر منك ..
نورهان:لاعيب لاعيبات..
خدت صونيتها ومشت حدا امها..
🍁🍁🍁🍁
خشت لدارها..
وهي تبكي بالعبرة....
ومش مصدقه لوين وصلت الحكايه..
لهدرجه!!!
لهدرجه كبيرحجم الأذى اللي تسبباته لقلب عماد!!؟
مادام هادي ردت فعل امه واخته الصغيره اللي ماتجاوزش عمرها 6سنوات...معناها هو قاعد يعاني من غيرها ومعاناته هما شاهدين عليها..
رزان ببكي:شن درت فيه ياربي شن درت فيه اني..💔
🍁🍁🍁🍁
الساعه 1:00ليلا..
الخوات التلاته راقدات فالدار ..
زينب معاها بنتها..
وكفايه معاها بنتها..
ونعيمه بحفيدتها...
وغاليه معاهم..
زينب:خديناها فوادي الربيع ناويين ان شاء نبنوا ع دورين الاول لينا والتاني للاولاد زوز شقق قدام بعض..
نعيمه:كويس..
كفايه:ربي ييسرلكم..
زينب:هدا علاش حمزة معاش يجي هلبه وحني بروحنا معاش نشوفوا فيه..خدمه فخدمه..
غاليه:ربي يفتح عليه..
كلهم قالوا:آمين..
كفايه:عماد ومروان مش جايين وراهم ماشاغلهم..اما مالك بالك يجي نهار الخميس..
غاليه:اممم...
سكتوا شويه..
بعدين قالت نعيمه..
"كلمت حميده"..
التلاته فزوا وشبحولها..
غاليه ناضت قعمزت والدموع طول نزلوا قالت:ردت عليك..
تنهدت نعيمه وقالت :ايه..
ليا مده طويله حلمت بيها حلم قبضلي قلبي..
قعدت طول الوقت مشغوله عليها اكثر من قبل..
فوتت نهارين واتصلت بيها من كثر ماقلبي كان واكلني عليها..
⚡فلاش باك..
كانت تغسل في الحوايج ع ايديها بالمية المصقعه..
تكد بعدين اطلع ايديها وتحطهم فبطنها وتحني فصدرها عليهم بش ادفيهم..
بعدين ترجع تكد من جديد..
شويه جتها بنتها بالتليفون اللي كان يرن..
حنين:ماما نقالك يورن..
حميده مسحت ايديها بقفطانها وهي مستغربه..
ناضت لبنتها خدت منها التليفون وشافاته..
اتفاجئت ع الآخر لما لقت المتصل نعيمه..
قعدت ترجف مع بعضها ودموعها طاحوا..
كانت تبي تسمع اي خبر عن اهلها اي شي..
واتصال نعيمه..كان بالنسبه ليها اشبه بالإنعاش لقلب يكاد يبلى من كثر الجروح والآلام ويتوقف...
بلعت ريقها..
وفتحت الخط وحطاته ع وذنها..
"الو..حميده"
دموعها نزلوا سيل...
حميده:باهي والله اللي قاعدين مذكرين ان عندكم اخت اسماها حميده..اللي يسمع بقطيعتكم ليا يقول هاربه مع صاحبي ولامدايرة كبيرة ..
نعيمه:اني متصله بيك بش نسأل ع حالك بس..لانبي من يلوم ولانبي نتعارك..
حميده تهكما:لاوالله صحيتي وبارك الله فيك..وكانك ع حالي..قولي اللي باعتك ان حميده عايشه مرتاحه وفخيار خيرها..وهي بالسلامه تو..
وصكرت عليها..
وطول انهارت بالبكي..
ماتبيش تبينلهم انهم صح وهي غلط..
تغلط وتكابر...وتزيد اضيع فنفسها اكثر..
⚡الوقت الحاضر..
ولت غاليه تمددت وحطت راسها ع المخده وهي تقول بدموع:كان غير حالها باهي بينها..
زينب وكفايه اكتفوا بالدموع...وماعلقوش بكلمه..
تنهدت نعيمه وقالت:إن شاء الله تكون هكي حق..🍃
🍁🍁🍁🍁
حالها باهي..
فرقة حالها...
راقده فالصقع هي وبنتها متغطيين بزوز بطاطين بس ماكانوش متقيين قوة الصقع اللي يخش للعظام..
كل اللي قاعده ادير فيه توا هي انها تحضن بنتها بقوة بش ادفيها..
اما لوطا..
ها شن هكي؟
حليمه:كويس الحرارة هكي ساد..
جي وخش حداها السرير..
خداها فحضنه وحط يده ع بطنها وقال:غير امتى يجي..
حليمه بضحكه:مازلت فالرابع بتراجي 5شهور اخرات..
الصديق:راجيت سنين مانراجي خمس شهور..
حليمه:انساهن هديكن السنين انساهن..
الصديق بضحكه:حاضر..
حليمه:نبي قبل نجيب اطلقها..
الصديق:حاضر..حاااضر..
زادت خشت حضنه وابتسمت ...
🍃🍃🍃🍃🍃
وعدت باقي ايام العطله حلوة..
خلالهم..
عزمت سعيده البنات يتغدوا عندها..
مشوا زينب ونعيمه بس..
كفايه قعدت مابي حد يكلمها نهائي
بس في شي كانت ملاحظاته..امها كانت جابده روحها منها..
اما سعيده ورزان..
فزادوا اضايقوا لإنها ماقبلتش العزومه..
وميلاد خوها خدي منها موقف..
🍁🍁🍁
بعد عزومة سعيده..
عزمتهم رباب...ومشوا كلهم..غدي..
تليها..
عزومه سميه...عشي..
وبهكي لمياء انحطت فموقف وانجبرت انها تعزمهم ع الغدي..
وياشينك عزومه..
مكرونه مسقيه حمصها مجرس وبصلها شبه مش طايب بالدجاج..
وسلاطه خيار وطماطم عاديه..
وعصير الريحان متاع البرتقال..
🍁🍁🍁🍁
الحق مش فيها هيا الحق فخوكم اللي عارف ان خواته معزومات عنده وماقدرهمش..
غاليه بضيق:ماتلومن ع عمر يازينب..راهو ماخلا ماجاب..لحم ومفروم ومشروب..
قاتله بدير كسكسي ومبطن..
انصدموا..
دلال:باهي وين مشي اللي جابه..
غاليه تنهدت وقالت:مدسوس كله..ووين نشدتها قات نتوحم وماقدرتش نطيب ومش عارفه شنو..ونسيب قطاف وكله كذب..
كفايه :لهالدرجه قفاصه!؟
دلال شبحت لخالتها وقالت:مش بس قفاصه ياخالتي..كذابه زياده..كذااابه وحطي تحت كذابه الف خط..
شبحوا لدلال..
وحسوها زي اللي تبي توصل رساله..
وكفايه عقلها ولى بيها لتالي هلبه..
نعيمه:عليك بخت بخته وخيي..
زينب بحزن:ياناري عليه..
🍁🍁🍁🍁
يوم الجمعه..
الساعه 11:00صباحا..
فساحة القطعه الكبيرة..
واقفين يهدرزوا..
محمد:واجد عليك ياراجل..
الهادي:غير كان قت قبلها..
أيمن:مادام هو اللي مخطط للزردة معناها بيتكفل بيها كامله ماحد يشاركه فشي..السي اصيل هدى مابنغبى فيه..
ضحكوا..
محمد بضحكه:مع هدا بنشاركوه غضب عنه..
اصيل رفع يده وهو يحلف:بالله..العزيز..الدايم..ماكام حطين فيها حتى شيشة ميه..
شبحوله بنظرات جانيبيه..
اصيل:نحنث تكسبوا اثمي..
مؤنس بضحكه:كله ولاتحنث ياسيدي المهم حصلنا من وراك زردة فالوادي بلاش..
ضحكوا...
وفعلا..تحركوا للوادي كلهم ..
كان الجو حلو ولطيف مش هداكا الصقع..
والسي اصيل كان عارف هالشي كويس لأن شايف اخبار الأرصاد الجويه مسبقا..
🍃بديع هالشب🍃
🍁🍁🍁🍁
يومها جماعة سرت عزموا حوش رمضان لحوشهم ..
مشوا كلهم..
ماعدا لمياء اللي اهلها جايين يتغدوا عندها..
وسعيده اللي كانت فرحانه بجية خوها حميدا بعيلته بعد روح من برا وهو متماثل للشفاء..
🍁🍁🍁🍁
الساعه 5:00عصرا..
كانت جايه لحوشهم من حوش جدها..
كيف وصلت قدام الباب شبحت قدامها...
لقت سيارته..
قلبها طار من فرحته..
ابتسمت بعيون مدمعه..
وكل مافيها ملهوف لشوفته..
ركزت هلبه ع السيارة..
وحست انها فاضيه..
للحظات خطر شي ع بالها..
ضحكت وهي تمسح فدموعها..
ومشت تجري بش تنفده..
خشت للجردينه وهي تراقب بعيونها حواليها..
هكي..
لين وصلت لشجرتها..
وبدت تقطف فزهر الليمون اللي كان بادي يتفتح..
عارفاته يحبه وياكم طلبه منها لكن هي كانت تتجاهل فطلبه استكترتهم عليه وقتها..
بعدت لمت اللي لماته فطرف وشاحها..
طلعت من الجردينه..
وصلت فالسيارة..
حطت يدها ع الباب..
بلعت ريقها وفتحاته..انفتح معاها..
ضحكت بفرح..
خشت السيارة وبدت تحط فالزهر ورا الدومان وزعاته بشكل حلو هلبه..
تنهدت..
وغمضت عيونها وهي تشم فريحته فيها ..
ماكانتش تبي تنزل..
بس لازم تنزل..
نزلت وصكرت الباب بحذر وهو تشوف هني وهني..
بعدين طول مشت تجري..
من فوق..
سناء"الحقيرة هادي..الحقيرة"..
شويه وطلع عماد من المربوعه وطلع بعده عمر..
عماد:برا لحق ع عقاب زردة الباشا..
عمر بضحكه:ايه طايرلها بعدين شوي..
ابتسم تهكما وقال:تآنسوا بعض..
لبس نظاراته ومشي لسيارته..
وعمر مشي من الجهة التانيه لسيارته وهو يضحك..
وصل عماد فالسياره..
شبح فوق..لقي سناء تشوفله بإبتسامه..
هو ابتسم واشرلها بيده يحي فيها..
وهي ردتله التحيه بنفس الحركه..
ورزان تشوفلهم من ورا الحيط وهي بتموت...
نزل عيونه بعدين فتح باب السياره..
جمد فمكانه وهو يشوف للزهر فسيارته..
شبح القدام..يدوب لمحها لأنها ادرقت..
قرن حواجبه بغضب..
بعدين..
رفع عيونه وقال لسناء:خشي داخل صقع عليك.
ضحكت وقالت:لالا مش صقع هلبه حلو الجو..
عماد:ولو قلت خشي ع خاطري...
ابتسمت بفرح وقالت:اكيد نخش..
عماد:باهي استني نمشي قبل بعدين خشي..
سناء:تمام..
رجع نزل عيونه وشاف القدام ماشبح شي..
بعدين شبح داخل سيارته..
طبس وخشلها بدون مايركب..
لم زهر الليمون بإيديه الزوز..
ونفضه برا..
ورجع خش لم الباقي ونفضه كله بنفس الطريقه..
بعدين خبط كفوفه ببعض وهوينفض فيهم..
شبح فوق حيا سناء مرة تانيه..
وهي ردتهاله وهي بتطير بفرحه..
نزل عيونه وركب سيارته..
وشغلها...
وتحرك..
والسيارة ماشيه..
عجلها الاماميه دهست الزهر دهش..
وكأنه يدهس فأجزاء قلبها المتحطم اللي نتاثر حطامه مع تناثر زهرها...
لو هو قلبه تحطم مرة..
هي تحطمت كلها مع بعضها الف مرة باللي شافاته..
مش عارفه كيف رجليها تحركوا ورفعوها للحوش..
كيف خشت بيهم..
كيف وصلت لدارها..
كيف فتحت بابها..
كيف وصلت لسريرها..
تمددت عليه..وهي حاسه بتعب وانهاك وكأنها كانت تخدم فأشغال شاقه..
دموعها ينزلوا..
ولحظات...
ورقدت..
هربت..
هربت بالنوم من شعور الألم الفضيع اللي كانت تحس بيه..
هربت ......🍃
🍁🍁🍁🍁
الساعه 7:00مساءا..
واقفه تسقد في اختها بعد سقدت امها..
لمياء:كلا رزان هادي حظها يفلق الصخر...تطلع من عماد يلاقيها اصيل السرتاوي وهداكا وين وعماد وين..كامل ومكمل....
سناء:تشبع بيه..المهم اني ناخد عماد ياقلبي..
لمياء بضحكه:إن شاء الله إن شاء الله..
صوت كلاكس..
لمياء:بسرعه انزلي فيسع قبل يولع فيك عامر..
سناء ضحكت وقالت: باهي..
كيف جايه بتمشي..
"آااه"..
التفتت لأختها..
لقتها حاطه يدها اسفل بطنها وعيونها متوسعات ووجهها لونه شاحب..
لمياء:آااااااااااه..
سناء بخلعه:خيييرك خييييرك!!؟
لمياء غمضت عيونها وعيطت بأعلى صوتها:ااااااااااااااااااااااااااه....
سناء اللي كانت تفرفش..
شبحت لوطا لقت بقعة دم...
انصدمت بقوة..
واختها قاعده تعيط بأعلى صوتها من قوة الألم اللي تحس بيه...
...يتبع...
