#العشق_المتمرد "اختبار"
#جمان_فريد
الجزء 116 القسم الثالث
🌟..
السمي اللي كانت صافيه..غيمت..
الجو اللي كان لطيف..ولى بارد..
هما الزوز واقفين برا في باحة المستشفى وسط هالجو اللي كان فيه الخريف قاعد يعطي اخر مايحمل فجعبته فشهره الأخير...
هي طلبت منه يطلعوا برا..بش تقول اخر ماعندها براحتها..
غاليه:نعم ..تفضل..
نجم:بالله عليك غاليه فكينا منه الاسلوب هدا.
غاليه:خيره اسلوبي عادي قاعده نتكلم معاك بكل احترام..
تنهد وقال:غاليه..غاليه كل اللي صار بسببك انتي..انتي اللي كل ما نحاول نفتح باب نخشلك منه انتي تصكريه فوجهي..
غاليه..ياغاليه..اني صادق معاك لأبعد وجاد لانلعب لانتسلى لانضيع فالوقت..
غاليه:اس..
قاطعها وقال:لو ع الخطبه وهديكا البنت ..خلاص موضوع وفض وتم ومشي ع حاله..خبط كفوفه ببعض وهو يقول..نهيته..
غاليه بضيق:افه...
قاطعها وقال:مش بيدي يابنت الناس اقسم بالله من قلبي حبيتك ياغاليه..
قلب غاليه انعصر عصر..
نجمي:لا همني فيك عمرك ولاظروفك..اني حبيت بنت كامله ناضجه واعيه حنينه لطيفه..انسانه بكل معنى الكلمه..نلقى راحتي معاها بس وين نكلمها..غاليه..افهمي..بلع ريقه ووزع نظره ع المكان بعدين شبحلها وقال..قلبي ماتوالفش الا معاك معاك انتي بس..افهميني الله يرحم والديك..
🍃كلامه حلو..اللي قاله يوجع القلب ويلمسه من داخل..كلام حسس غاليه بشعور خلاها تذكر انها مزالت انثى تستحق تكون محط اعجاب..أو تنحب..تمام..باهي.
وبعدين🍃
هي هكي قالتله:وبعدين!؟..
نجم بثقه:بنخطبك..
ضحكت غاليه..
بس ضحكتها ماكانتش ضحكه فرح لا..بل سخريه..
نجمي بنرفزة:عيبك الوحيد..قلة ثقتك بنفسك..
هدت غاليه ضحك وقالت:هدىماأسماش قلة ثقه بالنفس..هدى اسمه وعي..حطت سبابتها ع راسها لما قالتلها..اشرت عليه وقالت..انت مانكش واعي للي حواليك..مانكش واعي بالمحيط اللي عايش فيه..مانكش واعي لبعدين..بعدين اللي لما سألتك عنه...جاوبتني اجابه بينتلي انك حق مانكش وعي..
نجم :غ....
قاطعاته وقالت:خليني نكمل كلامي تربح..نفرض اني قتلك باهي..وانت ماصدقت وعديت لهلك وفتحت معاهم الموضوع هل ياترى حيفرحولك وقت تقوللهم اللي بناخدها اكبر مني ب16سنين..مش تلاته ولا اربعه سنين..16سنه!!ضحكت بتهكم وقالت..مظنهم اول حاجه يفكروا فيها اني ساحراتك..
نجم:الرسول اللي خير مني ومنهم..خير الخلق تزوج اللي اكبر منه بأكثر من 16سنه..
غاليه رفعت حواجبها وقالت:انت لانك الرسول..ولا الناس فهالوقت كيف ناس هداكا الوقت..
نجم بتهكم؛ايه صح ناس هالوقت مازال جاهلين اكثر من هداكا الوقت..
غاليه:المهم..هو هدى الموجود...
نجم:وحني بنعيشوا ع كيف الناس؟..
غاليه بعصبيه؛ايه..ايه بنعيشوا ع كيف الناس لاننا عايشين وسط الناس..لااني ولاانت بعدين حنرتاحوا نهائي مافي حد حيخلينا فحالنا..انت مش واعي حتى لعمري كم ..راني فتت 40 بالمفتشر..لايمكن تكون اب فاهم!!!.
قالت الكلمه هادي ودموعها طاحوا طول مسحتهم نزلت عيونها بعدين قالت بهدوء..نجمي...وخيي..اللي انت فيه توا..ضيقت عيونها وقالت..هيجة مشاعر ولاطياش مشاعر..مشاعر انت عطيتهم اكبر من حجمهم وقعدت ماشي وراهم كيف الاعمى اللي مش قادر يشوف الطريق اللي ماشي فيها وين رافعاته..ارجع لعقلك وقلبها فدماغك وحول العواطف ع جنب صدقني وقتها حتفهم ان ثقتي فنفسي كبيرة لأني مااستغليتش مشاعرك وخليتك تتزوجني لانك فرصه فريده من نوعها للي زيي بش يعوضن بيك اللي فاتهن
ويكملن بيك نقصهن فعيون الناس..اني راضيه بقسمي من الدنيا ومرتاحه فحياتي ..ومانبي شي غير اني نكملها زي ماهي لو مش مكتوبلي الأحسن..
قعد يشبحلها ويسمع ويشوف فعيونها النهايه الحقيقيه ليهم هما الزوز..خلاص...
دموعه عبوا عيونه لما سمعها قالت..
غاليه:ارجوك ياريت يكون هدى اخر لقاء بيني وبينك واخر مايصير بيني وبينك...
مسح عيونه قبل ينزلوا دموعه وغيرهم عنها..
غاليه بكل ماعندها من قوة قالت:ع فكرة..عمري ماحبيتك ولاحسيت اتجاهك بشعور غير شعور الاخوه..سامحني...
ولفت ومشت بسرعه..
وهي مش عارفه كيف كانت حركتها خفيفه وسريعه هكي وهي حاسه روحها من داخل بتموت..
خشت للمستشفى وقعدت تمشي وتمشي..
لعند ماوصلت تحت الدروج..
خشت تحتهم وانهارت بالبكي..
وفضيله اللي كان كل شي ع عيونها لحقتها وخشت معاها وخدتها فحضنها وهي تمسح ع ظهرها بدون ماتقول اي شي..
اما هو..
لما عطاته بظهرها..
انتابه شعور شديد باليأس..لو بينتله انها تبيه وتحبه راهو حارب ع خاطرها..لكن للأسف هي ماكانش قلبها عامر بحبه زي ماقلبه هو كان عامر بحبها..
لف ومشي لسيارته وهو مدمر تماما..
ركبها وتحرك بسرعه..
في الوقت اللي فيه سماء الخريف كانت تنزل فحبات المطر.. وكإنهم حبات دموع..وكإنها تبكي ع نهاية قصه ولدت مريضه..وتوا ماتت...
🍃وهدا كان اخر مايجمع نجم الدين..بغاليه🍃
🍁🍁🍁🍁
واقفه حدا الزيانه..
حاطه التليفون ع وذنها بيدها اليسار..
ويدها اليمين حاطتها ع الزيانه..وكانت تهز مع بعضها من الغل وهي تراجي امتى يرد اللي اتصلت بيه
بعد مانادى للمرة التالته انفتح الخط..
هي طول قالت..
لمياء:انتي عطيتي رقمي لعواطف جارة حوش عمتي..
نادره:ايه..شن قتليلها وشن قالتلك..
لمياء بحقد:عطيتهم ع راسهم لين سدوا هالسحارات الواطيات..
نادرة:يستاهلوا..
لمياء:مالا شنو!! اللي عايشه فيه اني توا بسببهم هما هالسحارات..والله والله لو عمر دارها وخدي عليا لما نسحرهم كلهم ببوهم بأمهم ..نخليهم يجروا ومايدروا عيت يونس الكلاب..
نادرة:العين بالعين والبادي اظلم..اني منين كلمتني عواطف وقالت تبي مدللاه لخوها وسالتني ع المشاكل اللي بينا وبينهم قتلها اسمعي كل شي من فم صاحبة الشأن اللي هي انتي وعطيتها رقمك..
لمياء برفعة حاجب:احسن مادرتي..
نادرة:باهي خلينا منهم وقوليلي خيرك مانكش فحوش متاعينك..
لمياء بضيق:ماخاطريش نمشي..
نادرة بنرفزة:خير دعوتك هكي موليه..
لمياء بعصبيه :تبيني نمشي ونقعد نسمع فالتلقيح ونشوف فشبحاتهم اللي تمرض!!
نادرة:لمياء انتي اللي ماكبرتيها ليك سنه بس متزوجه..سيورك تحملي وتجيبي.
لمياء:تقولي فيها عادي وكأني ماحملتش مرتين وطيحت وكأني مالياش شهور نجري ع الحمل وماخليت مادرت ومافيش نتيجه..وصلت بيا نذبح للقبور ..وشي ماحصلت شي..مااستفدت شي...سميه العزوز حملت..لطيفه العزوز حملت فعمرها هدا بعد اكثر 10سنين ..واني شني شي..واللي نمشيله يقولي ماعندك شي..كيف ماعندي شي...شن معناه هدا ياناس..بنهبل اني خلاص..
نادره بصدمه:لميا!!
لمياء ببكي:خليني فحالي يما خليني فحالي...خدت نفس وملامح وجهها تبدلت للحقد وهي تقول..لكن باهي ياعيت يونس باهي..كان مافلقتكمش مانبداش اني لميا باااهي..
وصكرت ع امها..
بعدين انهارت بالبكي ..
ع خشة عمر للحوش سمع صوت بكاها..
قلبه طاح..
مشي جري لدار النوم..لقاها تخبط وتبكي..
جاها شدها وقال بقهرة:يابنت الناس لعند امتى هالحال!!
لمياء ببكي:نبي نحمل ياعمر نبي صغار ياعمر نبي صغااار...نبي صغار..نبي صغار...وقعدت تخبط ع وجهها وعمر شد ايديها وهو يقول بنبرة باكيه:خلاص يالميا تربحي خلاص..
قعدت تبكي بصوت عالي..
وهو حضنها بكل قوته من كثر ماوجعتله قلبه..
شويه شويه صوتها بدي ينخفض..
لحظات واختفي..
وارتخت فحضنه..
عمر بخوف:لميا...!
🍁🍁🍁🍁
الساعه 1:00ظهرا..
حطت رزان اخر مقروضه نقشتها في الصفره..
وبهكي يكون اكتمل عدد المقروض في اول صفره..
نعيمه:الصفرة هادي كملناها من بيطلعها للكوجينه..
فاطمه:بقولي عماد مقعمز في المربوعه تو نضبح عليه..
وعاد معروفه حالة رزان فهاللحظه..
قلبها يقربع تقربيع..وبطنها وجعتها..
تسمع فحناها تنادي"تعال ياعماد"..
لازم تتصرف ماتقعدش مقعمزة قدامه..
ناضت بهدوء وانسحبت من الصاله ومشت للكوجينه..
ع خشته هولمحها وهي خاشه..
امه كانت ادير فالغريبه ومعاها رانيا..قعدت تشبحله..
نعيمه:تعال عماد ارفعها حطها فالكوشه اللي تحت الدروج..
عماد:حاضر..
حول سبيدروه..
وخش داخل..
قام الصفرة وطلع بيها..
رزان كانت تراقب من باب الكوجينه..شافاته مشي..
طلعت..
وولت للصاله وقعمزت فمكانها...
وعماتها كفايه ونعيمه يسرقولها فالنظر..
رانيا وهي تكركب فالغريبه:ان شاء الله مافيش فاسبوع العرس مطر..
كفايه:ايه والله هدا اللي نخمم فيه..كيف بنديروا للخيم..
نعيمه:كان نقولوا لميلاد زعمه يعطينا حوشه..
رزان:عرس خوه مابيقول لا ياعمتي..
نعيمه:ماهو مرات مايبيش الردس فحوشه..
رزان:مناسبه هدي..طببعي بيصير فيها هكي...
نعيمه:تو نقول لأمي تكلمه..
ع خشة فاطمه :ان شاء الله مايسيلش الوادي..
صكرت الباب..
نعيمه:يمي بنقولك..شن نديروا كان صبت المطر فاسبوع العرس..
قعمزت فاطمه وقالت:نخمم فالحكاية هدي من بكري..
كفايه:نعيمه قالت نكلموا ميلاد يعطينا حوشه..
فاطمه:مرات مايطيبش عليه لاهو ولاسعيده..
رزان:ليش ياحناي..
فاطمه وهي تحرك فسبحتها:تو يقول شورهم ماصدقوا عطينا الحوش لزينب فعرس بنتها..
اضايقت رانيا..
ورزان كذلك..
نعيمه:انتي كلميه يمي وخلاص..قال باهي باهي..قال لا خل ندبروا من توا كيف نديروا..
فاطمه:باهي باهي تو نكلمه..
ع خشة رفقه ونور ودلال ومعاهم حميده والبنات الصغار من فم البوابه يجروا..
كفايه:نورهان انبليتي؟
نورهان:لالاجريت بسرعه
مشت دلال ببنتها للدار
نعيمه بضحكه:اكيد لعبت تحت المطر الشنعب اسو..
دلال بعصبيه:مال شنو..
اسيا:شن هي شعنب!!..
دلال:اسكتي ترا..
وخشوا للدار وصكرت دلال الباب وهما يضحكوا ع شكل آسيا اللي شافوه وهي معصبه من امها قبل تخش الدار..
قعمزوا الباقي..
حميده:شن درتوا الغدي..
كفايه:رشده مبكبكه..
نور:احسن شي..
رفقه:اني نراجي عمتي غاليه تروح واديرلي رزها البلاو..
حميده:طيح سعدك ياطنه رز بلاو ماتعرفي اديريه!!
ضحكت رفقه وقالت:ايه..لكن نعرف ندير هامبورغا وشاورما..
حميده تهكما:ماشاء الله عيني ماضرك..
ضحكوا..
ورفقه تضحك معاهم..
سكتوا شويه بعدين..
كفايه حطت طرف غريبه كركباته وحطت عليها لوزة وبدت تغني..
هدا عرس صغير خوته...يستاهل قرنين وحوته..
غنوها وراها..
هدا عرس صغير خوته يستاهل قرنين وحوته..
نعيمه..
هدا فرح حميده نديروا ...فرحانين قريب نطيروا..
زغرطوا نور ورانيا..
بدت كفايه ادربك ع الطاوله ..
وهما يعاودوا فمقطع نعيمه ويصفقوا والحاجه فاطمه معاهم وهي توزع فنظرها عليهم بإبتسامه..
شويه انفتح باب الدار..
طلعت اسيا تجري..
وقفت فنص وقعدت ترقص..
كلهم :هههههههههههه..
وامها وزينب طالعين مع بعض من الدار وهما يضحكوا..
كفايه..
يامبروك علي غاليا...فرحانه من جد ونيه..
قعمزت زينب ع كرسي..
نعيمه:دلال اطلعي شوفي المقروض..
دلال:باهي...
مشت بسرعه للباب وطلعت وهما مازال يغنوا ويصفقوا وبنتها ترقص..
🍁🍁🍁
ايه...هو هدى كل شي..
فضيله بضيق:اففففف..
غاليه بحزن:وجعني واجد يافضيله..لكن اللي قلته واللي درته هو الصح..
شبحتلها بعدين ابتسمت وقالت:صح اللي درتيه هو الصح..نقولك حاجه غاليه..والله اللي كيفنا اني وياك حالنا خير بواجد من متزوجات بصغارهم..يخي تلقيهم يتمنوا يكونوا مكانا..
ضحكت غاليه بألم بعدين قالت:نقولك اني..مافي حد راضي باللي قسموهله ربي..
فضيله بإبتسامه:عن نفسي وربي شاهد راضيه تمام الرضا ديما نشوف للي عندي وغيري فاقده..نفرح واجد هكي..نرتاح من داخل..قالتها وهي حاطه يدها ع صدرها..
شبحتلها غاليه وابتسمت:ماني عارفه عيون التريس وين عن وحده كيفك..
فضيله بضحكه:اللي كيفنا اني وانتي واجد ع الرجاله واااجد..
ضحكت غاليه..وفضيله ضحكت معاها..❤
🍁🍁🍁🍁
درس سيارته فالقطعه..وهو فرحااان..
بس مش زي فرحتها هي..
فتحت الباب ونزلت وفيدها باكو حلويات..
وقعدت تمشي بسرعه وهي تضحك بفرح..
هو نزل من السيارة وقاللها بضحكه:بالشوي عليك..
التفتت شبحتله وهي تضحك قالت:ايه صح..
التفتت القدام وتأنت فمشيتها..
وصلت فممر فم البوابه...قعدت تمشي وهي تاخد فنفس من الفرحه اللي دهشتها..
وصلت فالبوابه خشت وهي تقول:عويله..
داخل..
كفايه:لمياء!..
كلهم وجهوا انظارهم لباب المروحه وهما يسمعوا فصوت كندرتها وهي تمشي..
انفتح الباب..
بانت عليهم وهي تضحك قالت:السلااام عليكم..
هما استغربوا لحالتها بس ردوا عليها السلام..
فاطمه:زاهيتلك الحمامه..
حولت كندرتها..
وقدمتلها بسرعه وهي تفتح فباكو الحلويات..
بعد فتحاته مداته لعزوزتها وهي تقول:اني حامل ياعمتي..
كلهم تفاجئوا..
وفاطمه فرحت ع الآخر..
ردت فعلها كانت تلقائيه..
فتحت ايديها للمياء وهي تقول:مبروك مبروك..
طبست لمياء وخشت حضن عزوزتها وهي شاده باكوا الحلويات وتضحك..
وعزوزتها تمسح ع ظهرها وتقول:مبروك يا مينتي مبروك تحلي عويناتك ع خير..
لمياء دمعوا عيونها وهي مبتسمه قالت:آمين..
وشويه اللي هادي ناضت من حمواتها والبنات يباركولها..
وعمر يشوفلهم من فم البوابه وهو مبتسم بفرح..بس كان متحشم يخش..
🍃يعني كيف تكافئت لمياء توا..بعد وصلت بيها تحاول توقف نصيب اخت ليلى!!..وزادت شوهت سمعتهم مع جيران حوش جدهم..وتبدا بالفعل هدا زادت رصيد الأعمال السيئة الظالمه اللي دارتها فحياتها..هل بعد هدا كله تتكافئ بفرحة زي هادي!!؟؟
نقولوا لمياء كانت فمرحلة اختبار..
بس للأسف لمياء مش من الطلبه اللي يقدروا ينجحوا في الإختبارات هادي..
رسبت...بإمتياز..
لهدا...
هي الآن طلعت من مرحلة الإختبار...وخشت في مرحلة..
العقاب...
ومش اي عقاب...اللهم جيرنا🍃
🍁🍁🍁🍁
الساعه 3:00بعد الظهر..
رفعت رانيا صفرة الغدي وطلعت من الدار..
وخلتهم يهدرزا ع طلعة اليوم وينسقوا مع بعض..
لمياء:نمشي اني ونعيمه وحميده مولى المحل نعرفوه من قبليتنا..
غاليه:باهي كان هكي يساعدنا فحكايه العلاقه هي بس اللي فضلت ..ما نوصيكنش حاجه صح نبيها تربحن..
حميده :ماتخافيش تو ناخدلها علاقه معتبرة..
غاليه بضحكه:عاد ماتشطحيش واجد..
حميده:تس تس ماتخافيش.
لمياء بضحكه:صاحب المحل معرفه ياميدا حيساعدنا اكيد..
حميده هزت راسها بإيجاب مسايرة..
زينب:باهي وحكايه الحوش شن صار فيها امي بتكلم ميلاد..
حميده:هي وياه فم البوابه تو..
🍁🍁🍁🍁
اكيد يمي..اصلا سعيده امس قالتلي ع حاجه كيف هدي..
فاطمه:يعني طايب عليكم..
ميلاد بضحكه:يمي اني فتحت حوشي لبنت اختي مانفتحه لخوي!..
ابتسمت فاطمه..
ع طلعت رانيا بتجيب المكنسه..
شبحلها ميلاد وقال:بنتي رانيا..
رانيا شبحتله وجهها ولااحمر وابتسمت بخجل:نعم خالي..
ميلاد:انتي امتى تكملي..
رانيا وخرت شعرها وقالت شهر 12..
ميلاد:خلاص بعدها تتخرجي..
رانيا:ايه..
ميلاد هز راسه بإيجاب وهو يشبح القدام بعدين قال:هي مال يمي اني بنعدي..
رانيا خشت بالمكنسه بسرعه..
وصلت الكوجينه وهي ترجف مع بعضها..
دلال:خيرك رانيا..
كفايه اللي كانت تخدم فالشاهي التفتتلها
رانيا:خالي ميلاد سألني امتى نكمل..
دلال بضحكه:شكله ناوي يكلم بوك..
ضحكت رانيا بخجل..
وكفايه ابتسمت بضيق والتفتت القدام وكملت تخديم الشاهي..
🍁🍁🍁🍁
في المربوعه..
توا تندمروا فمطاريحكم وترقدوا مانبيش نسمع حس اللي بنسمع حسه بنبطحه
ولاد دلال ونعيمه ومعاهم قصي رقدوا طول زيهم زي الرجاله الطيبين
عماد بضحكه:خطرت عليا ايام خالي هانيبال كان يديرلنا فنفس الشي.
محمد حط راسه وهو يضحك قال:هانيبال بطح طول مايعرفش يهدد..
ضحك عماد..
محمد شبح للسقف وقال:قديش تمنيته يحظر..
ابتسم عماد بأسف..
معمر:خالي حموده تعالى لقصي..
محمد بغضب:عارف روحي بنصبي نبطح اني..ت اندمروا خل نندمر شويه العشيه عندي دورة للمغرب مع نسوان الهم..
عماد:ههههههه..
محمد حط ذراعه ع عيونه وقال:اندمر حتى انت..
شويه وجاته مخده ع وجهه قال بنرفزة:عن شكلك ياعماد مرة وحده..
والصغار يشبحوله وهما يضحكوا بصمت..
🍁🍁🍁🍁
وجت العشيه..
وطلع محمد بخواته ولمياء..
طول للمحل اللي قالت عليه لمياء..
بعد شياط ريقهم هما وصاحب المحل مع حميده خدوا علاقة معتبرة ع قولتها..
بعد مشوار العلاقه..ضربوا مشوارين تلاته تانيات..
وقبل يروحوا خطموا ع قهوة عمر كان فيها عماد خدي محمد عشي للعيله وعماد خدي معاه وروحوا..
🍃🍃🍃
وعدوا يومين..
فيهم الإستعدادات كانت ع قدم وساق للعرس...
مش بس للعرس..
حتى لموعد افتتاح مقهى (AT star)
لمالكيه اصيل صبري...وتوفيق ميلاد..
افتتاحه يوم الخميس يعني قبل يبدا العرس بيومين..
وحني توا فيوم الثلاتاء..
حدا الفرن..
فيلم قديم لكن رعب الرعب..
رزان :شوقتيني..
حدهم:الليله نحضروه مع بعض..تباتي معانا نور..
نور:ايه..تشوقتله حتى اني..
رزان شبحت لرفقه بطرف عينها وقالت:لا حس ولامس..
رفقه بربكه:شن تبيني نقول..اني افلام الرعب مانحبهاش لأنها ممله..
التلاته شبحولها بنص عين وقالوا مع بعض:امممممم..
رفقه بمكابرة:بنسايركم وخلاص..
🍁🍁🍁🍁
صحيتي ماريه......تسلمي حبيبتي عقبالك....سلام..سلام..
وصكرت..
رانيا:هادي البنيه السوريه اللي تقرا معاك؟..
دلال:ايه خدومه وطيبه هلبه تصدقي صورتلي المحاضرات اللي فاتوني كلهم..
رانيا:فيها الخير..ريتي راجلها؟..
دلال:ايه ماشاء الله وين نشوفه يخطر عليا اورلاندو بلوم تعرفيه..
رانيا بضحكه:والله حتى اني..
ع خشة حميده للدار:صبن ياحناتي صبن ديرن الفطيرة..
دلال:قرصتيها..
حميده:بكرييي..هيا صبن..
ناضوا رانيا ودلال وهما يضحكوا..
هي ابتسمت ومشت للدولاب..
فتحاته وقعدت ادور فيه..لين طلعت كيسه صغيرة ملفوفه كان فيها خاتم ذهب...هدا ماقعدلها...بتمشي اليوم تصرفه وبدير بجزء من فلوسه حاجه..
🍁🍁🍁🍁
فوق..
ماشاء الله ماشاء الله ماشاء الله شقيقة تهبل..
محمد بإبتسامه:حاولت نخليها حاجه باهيه..
زينب:فوق الباهيه هادي..ماشاء الله..
محمد ضحك وقال:قعدت الشاشه ان شاء الله اليومين الجايات نطلع ناخد وحده..
كفايه:خليها هديتي ليك.
محمد:بالله العزيز الدايم ماك صارفه اكتر ماصرفتي وبعدين الشقه هدي اني بنسكن فيها ملزوم اني نكملها..
كفايه ابتسمت بعيون معبيات دموع:زينب ريتيه حمودي اللي كان فعرسك بيبي عمره سنتين بس يجري هني وهني وهبلنا بشطانته.. ريتيه كيف كبر وراح راجل ونعولوا لعرسه..
مسحت زينب دمعتها وهي تضحك:ريتي..
محمد بعيون مدمعه:خير بلاكن انتن لازم تقلبنها نكد..
كفايه ضرباته ع ذراعه:دموع فرح هادي يامنجوه..
ضحك وهو يشبحلها ع جنب..وزينب ضحكت معاه..💕
💕💕💕💕
لوطا ..
فالكوجينه..
عدن نعيمه وحميده..
سميه:اممم..
غاليه:وخيتي سلملي السمحه..طومه..طمطومه..شبحت لسميه وقالت..بيجن عيونها ملونات..
سميه:ايه..
دلال طرحت الفطيره فالطاجين وهي تقول:طلعوها ريحة الزيت مش باهيه ليها..
غاليه؛ايه صح..هي تعالي سميه..
سميه:هي..
طلعت غاليه بفاطمه الصغيره وهي فغمرها ووراها سميه ومشوا بطريقهم للدار..
كانت فيها الحاجه فاطمه كيف حاطه عالة الشاهي..
شبحت سميتها ابتسمت وقالت:نجي الخنفيسه..
ابتسموا سميه وغاليه وهما يقعمزوا..
ع خشة كفايه وزينب..
كفايه:طمطومه الصغيرة...مشتلها طول قعمزت حداها وقالت:هاتيها غاليه..
مدتها وهي مبتسمه لعمتها..
زينب قعمزت ع الفراش وهي تشوف لسميه...تبتسم بالسيف..
🍃اليوم اللي قبله سمعوا صوت عراكها هي وخوهم واصل لأخر الدنيا..الغريب هالمرة ان صوت الهادي ماكانش عالي هي تصيح وتعارك وهما ماسمعوا منك كان كلمه وحده..
"ياودي حاضر باهي..كيف ماتبي"..
الهادي معاش عنده هديكا الطاقه ع المشاكل..يبي المركب تمشي وخلاص بدال الزوز صغار ولوا تلاته...فضل يتنازل شويه ع خاطرهم..
التنازل مش بس للنساوين فكل الحالات في حالات استثنائيه نلقوا فيها الراجل يتنازل بإستمرار...ويحاول يحافظ ع اسرته ويحميها من التشتت🍃
🍁🍁🍁🍁
بعد كملوا رانيا ودلال حوسة الفطيرة..
جت رزان بترفع حصتهم ..
رزان:هما هادوم دلال..اشرت ع صونيه مسلفرة..
دلال:ايه ..
ولفت طلعت بصفرة فيها فطيرة وكعك حلو..
اما رزان قبل تطلع صبت ميه من الطرمس بتشرب..
فنفس الوقت..
عماد جي خاش من البوابه..
فات من حدا الكوجينه كان بابها مردود شويه بس بانت عليه بنية قلبه وهي عاطيه بالظهر وتشرب..
مشكله قلبه مولي حالة بزياده وين يشوفها يهبل هبال معاش قادر يتحمل بعدها يبيها...لكن..بيناتهم حواجز متينه من الصعب تنهد..
كملت شراب ميه..
ومشت للصونيه خدتها..
ولفت وطلعت بيها من الكوجينه ومنها لفم البوابه..
اما هو..
رجع طلع من باب المروحه بعد خش وادرق..
ومشي للكوجينه..
قعد يشوف للطاسه اللي شربت منها..
قلبه كان يرجف من اللهفه...
قدمله بالشويه وخداه..
صب فيه شويه ميه...
وشرب من وين ماشربت هي...وهو ملهوف وقلبه ذايب💓..
وعيونه مغمضهم..
بعد كمل..
مشي للشيشمه وغسله وحطه فالشباك...
وصدره يعلا ويهبط من قوة النفس..
ومشي طلع من الكوجينه ومنها من الحوش وهو ناسي علاش كان جاي اصلا..
فعز هالسكرة..
جت فوجهه الفكرة..
لمياء..
ابتسمت لما راته وقالت:هلا عماد شن جو..
بلع ريقه وقال:الحمد لله..انتي شن جوك..
لمياء:تمام..
هز راسه بإيجاب ومشي فات من حداها وهي ركزت بنظرها ع يده اليمين..ولأن دبلته مميزة اختفائها حيكون واضح ..
وفعلا الدبله ماكانتش موجوده..
رفعت حاجبها وكملت طريقها لداخل وهي تفكر بالذات بعد كلمتها سناء اليوم تشكي من برود عماد اللي رجع تجدد..
عقلها جابلها الخيانه طول..
لمياء"حسابك عندي يارزان"..
رسمت ع وجهها ابتسامه..
وين وصلت الدار وقالت:السلام عليكم..
🍁🍁🍁🍁
الساعه 7:00مساءا..
روحوا نعيمه وحميده وهما جايبين معاهم باقي الحاجات الناقصه وحاجه تانيه حميده جابتها..
غاليه بإبتسامه مفاجأة:ياااه..
ضحكت حميده وقالت:انتي تعطيهله..
غاليه:ماشكش منين شريتيها؟..
حميده:لا..لانه قعد يشوف معانا حتى هو عارفاته ماعنداش بيش ياخدها تو اللي هناك حطه..
ابتسمت غاليه..
حميده:عدي عطيهله..
غاليه هزت راسها بإيجاب..
قامت الشاشه بصعوبه شوي وطلعتها
وصلت بيها فم الحوش وقعدت تنادي
"يامحمد"..
هو فتح الباب وطلع لبس شبشبه وجاها..
محمد:خيرك؟..
غاليه بإبتسامه:خودها وحطها فشقتك هكي تكون كامله ماناقصتها حاجه..
رفع حواجبه واشر ع غاليه وهو يقول:وان شاء الله انتي شريتهلي!!
غاليه:لا مش اني..حميده..
انصدم محمد..
غاليه:سألتك بالله ماتردها ع أختك..هي قالت نبي نديرله حاجه وماقدرتش الا ع الشاشه..
هو قعد يشبح لغاليه بنظرة حزن ممزوجه بالكبر:منين جابت حقها..
غاليه:منين ماجاباته جاباته..
محمد:مانبي منها شي..
غاليه برجاء:بالله عليك ماتكسر بخاطرها..سلم وخيي..
محمد:ماطلبت من حد مساعده..
غاليه:مش مساعده..هدى ود رد جميل...محمد انت ماتخلي ماتجيب لحنين..ومهتم بيها تقول بوها..
محمد:مانبي منها تردلي شي..
قرنت غاليه حواجبها وقالت:بلاش عناد حمير خودها واسكت..
محمد فنص:غاليه!
غاليه بتفنيصه:خودها..
شبحلها شويه بعدين طبس قامها بعصبيه..
شبح لغاليه من فوق للوطا بعدين شبح القدام وركب..
اما هي لفت وخشت تضحك وتحرك فراسها ايمين ويسار..
قابلتها حميده..
اشرتلها براسها متسائله بمعنى"شن صار"
غاليه بإبتسامه:خداها..
ضحكت حميده بفرح وعيونها تعبوا بالدموع..
🍁🍁🍁🍁
الساعه 10:00ليلا..
مقعمزات الأربعه قدام التلفزيون وحاطين ع احدي القنوات اللي حتعرض ع شاشتها احد افلام الرعب..
الفيلم قديم..
بس رعب بمعنى الكلمه..
يحكي عن حوش انقتلوا فيه مراة وولدها اصولهم آسيويه..
الحوش مافيه حد سكن فيه الا ومات مقتول..
أخروحده سكنت فيه...
كانت ارواح الام وولدها تحوم في الحوش وخيالتهم المخيفه تطلع مرة مرة للبنت..
الام تحديدا قبل ظهور خيالها كان يسمع صوت مرعب ومقرف فنفس الوقت..بعدين تطلع..
الفيلم كان رعب رعب..
البنات خافوا..بس رفقه بزايد بتموت من الخوف..
بعد تم..
هدرزوا عليه شويه ورقدوا..
لكن رفقه قعدت فاتحه عيونها طول الليل لين طلع الصبح بش رقدت..
🍁🍁🍁🍁
اليوم اللي بعده..
الإربعاء ..
5:00عصرا..
وصلوا ..
حمزة وسند ومالك ومروان للقطعه..
نزلوا من السيارات..
وكان ف إستقبالهم..
محمد وعمر وعماد...
سلموا ع عماد وعمر عادي بعدين تلاقوا ع محمد وقعدوا يضربوا فيه وهما يقولوا..
"ايييه عريييس...ايييييه"
وعماد وعمر يضحكوا..
شويه وعمر انضملهم وقعد يضرب حتى هو..
ومحمد يقول بس..
"ياعن شكالكم...ياعن شكالكم"..
💕بعد ماباركوله بطريقتهم...
مشوا كلهم للمستراح..وهما يهدرزوا ويضحكوا..
وصلوا فم الحوش وخشوا..
ومشوا بطريقهم للدار..
حميده لما بان عليها مروان قالت:واخييييرا تواضعلنا المذيع وجانا..
ضحك مروان...
رانيا ودلال:وآلو ياليل..
سهران ياليل...
سهارى عيوني مع ولد الحداد..
كلهم:هههههههههههههههه..
ومروان يضحك بإحراج..
خشوا سلموا..
وفي اللي قعمز...وفي اللي قعد واقف وهما يهدرزوا..
شويه وجو رفقه ونور وخشوا للدار..
الزوز انصدموا..
كان باين عليهم عمر واقف قريب ع الفم..
ومحمد مقعمز مقابل..
مكانوش يندروا ع الباقي..
نور شبحت لمالك وشدت ابتسامتها بعدين نزلت عيونها وقالت :السلام عليكم..
ومشت طول قعمزت حدا حميده..
ومالك رد السلام وهو متجنب يشبحلها قدام امها..
والعيون عليهم..
رفقه دارت زيها ماتبيش تسلم باليد وتلقى روحها مجبرة تسلم ع مروان..
ومشت قعمزت حدا رانيا مدرقه عنه..
مروان؛اييه..شن جو وتيتوا كل شي!!؟..
محمد:لا نراجو فيك..
ضحكوا..
ومروان ضحك معاهم..
رفقه هداكا الوقت بعتت رساله لرزان "ماتجيش "لأن عماد موجود..
وعماد اللي كانت رفقه مقعمزة مقابلاته ركز عليها وحس انها تكلم فرزان..
محمد:احمم..ايه بنقوللكم..انتم توفيق عازم الكل ع افتتاح المقهى متاعه هو واصيل
تبدلت ملامح وجه عماد للكره..
عمر:بعد الإفتتاح دايرين عزومه فحوش ميلاد للشباب زينب:حتى ولاد امينه بيحضروها..
محمد:مال شنو خوهم يعتبر مولى المول..
فاطمه:اصيل هدى ماشاء الله عليه...ربي يجعل رزان من قسمه..
فنصوا كفايه وغاليه وشبحوا لعماد..
وساد الصمت المكان والأنظار توجهت ليه..
هو طول ناض..
وطلع من الدار..
عمر ضيق عيونه بإستغراب وشبح لغاليه..
غاليه شبحتله بعدين فيسع ماغيرت عيونها عنه..
وكفايه من التوتر قعدت تفرك يإبهامها باطن سبابتها وتفكر فولدها شنو يصير فيه لو اصيل خدي رزان..
امافاطمه اللي كملت هدرزتها مع احفادها..
ماكانش اللي قالاته عفوي ولاتلقائي منها قالت هكي قصدا بش اللي قاعد عايش في وهم يستاقض لروحه..
🍁🍁🍁🍁
اما هو بعد طلع..
مشي لسيارته وهو يلهب لهب من غيرته وغضبه..
ركب السيارة وصكر بابها ورواشنها..
وقعد يشبح لحوش خاله من بعيد..
شويه..
وطلعت..
كانت لابسه ماليه ع توتتهاووشاح ع راسها ومتوجهه بطريقها لحوش جدها عبدالله..
هو قعد معاها بعيونه العاشقه لين اختفت..
رجع يرن فودنه كلام حناه..
بغضب شديد قعد يضرب بيده ع الدومان وهو يتنفس بسرعه من قوة انفعاله...
🍁🍁🍁🍁
الساعه 2:00ليلا
الناس كلها رقدت
كلهم رقدوا..
حتى العشاق المتليعين جاهم نوم ورقدوا
ماعدا هي..
كانت بايته فحوش جدها مع البنات
متمدده ع الفراش لكن مش راقده عيونها يتحركوا هني وهني من الخوف وهي تتخيل فهديكا المراة متاع الفيلم طالعتلها من وحده من التراكين..
رفقه"ياربي نبي نرقد مش قادرة..حاستها بتطلعلي"..شبحت فوق الدولاب اللي مقابلها اذكرت لقطه من الفيلم..
لما شبح ولد المراة نقز من فوق دولاب فالفيلم..
توسعوا عيونها من الخوف
غيرت عيونها للي حواليها تبي تشوف بالك في وحده منهم نايضه تطمن بيها
لكن للأسف..كلهم كانوا غارقين فالنوم
رجعت شبحت لفوق الدولاب بخوف
واذ فهديكا اللحظه..
صرة كانت محطوطه ع حافه الدولاب من فوق
انزاحت شويه وكانت ع وشك السقوط
رفقه لما شافت الحركه..
ناضت قعمزت وقلبها قريب يوقف من الخوف..
وعيونها معلقات فوق وهي ترعش مع بعضها..
فجأة...
طاحت الصرة..
وتصكها عمتك رفقه عيطه..
صدحت فالقطعه كلها..
البنات اللي كانوا راقدات معاها..
تلقائيا..
ناضوا عيطوا معاها..
سبقت نور للباب فتحاته..
طلعت تجري وهما وراها..
تقابلوا مع النساوين طالعات يجروا من الدار التانيه ويعيطوا..
وقعدوا يجروا كلهم مع بعضهم هاربين..
...
عند الشباب
كلهم كانوا راقدين في المربوعه الخارجيه..
لما سمعوا العياط..
ناضوا بالتدريج..
اول من ناض وطلع يجري العريس..
وهما ناضوا فجرته وطلعوا يجروا..
تلاقوا مع الهادي طالع من حوشه وهو يجري..
وصلوا كلهم مع بعضهم للحوش..
خشوا من الفم القدامي..
ومن فم البوابه خشوا ميلاد وتوفيق مخلوعين..
وفروشن دار رمزي..
واقفات سعيده ورزان يشوفوا وهما ميتات من الخوف..
خشوا كلهم داخل..
ميلاد:شنو في..
"تعالولي"..
صوت زينب جاي من الدار..
مشولها بسرعه..
لقوها مقعمزة تبكي..
ميلاد:شنو في وينهن..
زينب ببكي:طلعوا يجروا وخلوني بروحي اني وبنتي..
🍃غير دقيقه هما وين مشوا اصلا!!؟..
مش فولا وحده من الديار..
ومش وراد انهم طلعوا من الحوش..
في الحمام..
لالا مستحيل..
في الكوجينه!؟...
ورا بابها تحديدا اللي كانت شاداته غاليه وهي مشفشفه وحالتها حاله..
التفتتلهم كلهم وقالت بتساؤل:شنو في؟!!..
شبحوا لبعضهم بإستغراب..
حميده:من عيط؟!..
كفايه:العياط جي من الدار اللي راقدات فيها البنات..
حميده وغاليه وكفايه شبحوا للبنات..
والبنات شبحوا لبعض..
اسيا:مش اني..
حنين:ماعيطش..
نورهان:اني سمعت وانخلعت معاكم..
رفقه كانت محرجه هلبه مش قادرة تتكلم..
نور:اني اول من سمع العيطه..
رانيا:حتى اني سمعتها ولما جيت نايضه شحيت دلال معاي لانها قعدت مقعمزة وتعيط..
دلال بإحراج:من الخلعه رجليا فشلوا..
رفعت غاليه حاجبها:رفقه..ماسمعنالكش حس..
شبحولها كلهم..
هي قامت عيونها فيهم بخجل وقالت:ايه اني عيطت..
غاليه:ليش..
رفقه نزلت عيونها وقالت:تخيلت حاجه..
ضحكت نور وقالت:قاعد مأثر عليك فيلم نهارتها..
سكتت رفقه ماعندهاش شن تقول..
وعماتها وباقي البنات يشبحولها بإمتعاض..
طق باب الكوجينه
"انتن داخل؟"..
فنصوا كلهم لما سمعوا صوت ميلاد..
غاليه التفتت وفتحت الباب بالشوي..
بانوا عليهم خوتهم والولاد..
وياعليك موقف انحطوا فيه..
يعني سؤال ميلاد بشن حيجاوبوا عليه..
"خيركن شن جاكن "
قعدوا يشبحوله ومش عارفين شن بيقولوا..
محمد بعصبيه:تي تكلمن الزفت..
غاليه بارتباك:رفقه عيطت..ع خاطر شافت خيال..ماثر فيها فيلم شورها..
الرجاله ضيقوا عيونهم بإزدراء..
محمد:وانتن؟؟؟..
كفايه:سمعناها عيطت..شبحت لخواتها وقالت..عيطنا معاها..
ميلاد:ماشاء الله عليكن!!..اقسم بالله قلبي قريب وقف..
الهادي:عندكن باهي كان صارت فيه حاجه ولاصارت فأمكن..
حميده؛حييي امييي!!..
غاليه:عدوا شوفوها فدارها..
محمد بتهديد :مخطركن اسود كان صارت فيها حاجه..
ومشي طول للدار..
طق الباب وهو ينادي:يمي..يمييي...يميي..
شويه وانفتح الباب وطلعت الحاجه فاطمه وهي تفتح فعيونها بالسيف:خيرك تقربع فالباب هكي فنصافات الليل شن في؟!.
محمد برفعة حواجب:قصدك هدى وين نضتي !!..
فاطمه دافاته وطلعت وهي تقول:تي شنو في خيركم شن صاير..شافت ولادها واحفادها واقفين يشبحولها زادت خافت هلبه.
🍁🍁🍁
نعدوا يمي نشوفوهم..
سعيده:اصبري شوي لين يجينا سيدك..
رزان:وكان طلعت صايرة حاجه كبيرة..
سعيده:حاجه موت لاقدر الله لا..لكن مرات صايرة عركه ولاحاجه نقعدوا هنى لين يجي سيدك خير..
هزت رزان راسها بإيجاب وهي ميته من القلق..
🍁🍁🍁🍁
وافقه مع الولاد تشوفلهم بإزدراء حتي هي..
فاطمه:ماتبن الا طريحه باهيه بالذات هالعزايز هدينا..
اشرت ع نعيمه وكفايه اللي ماتوا من الآحراج..
حميده:قصدك يمي ماسمعتي شي!..
فاطمه:وكان سمعت شن يقعدني فالدار لتو..
كفايه بضحكه:معناها كان اطيح علينا قديفه تفجرنا ماتجيبي نبانا..
شبحولها ميلاد والهادي بحده..
تلاشت ضحكتها ونزلت عيونها لوطا..
وولادها شدوا ضحكتهم..
فاطمه:زينب وين..
ميلاد:لقيناها تبكي فالدار هي وبنتها تقول طلعوا يجروا وخلونا برواحنا..خلينا حداها ولادها..
فاطمه :مصح وجوهكن كلكن رحتن جدات وماكبر فيكن عقل..
الهادي:كولن ع راسكن..
محمد:والله مفروض يكملن ليلتهن في الكوجينه..
ميلاد؛مفروض في الزريبه..
كلهم فنصوا وهما يشوفوا لميلاد..
وميلاد يشبحلهم بنفس نظرة الإزدراء..
🍁وبعد ماكلوا نصيبهم من الهزايب..
ولوا لديارهم..
والرجاله اللي هدا ولى وين ماكان..
🍁🍁🍁
تاني يوم..
الخميس...
الساعه 3:30بعد الظهر..
طول ماحني في الكليه نقرموا فيك ونضحكوا..
رزان بضحكه:نعرفها اني تخاف..
رفقه رفعت حاجبها:اممم..الله يرحم ايام زمان كيف كنتي ماترقديش الليل كله لما عمي محمد يحكي قصص رعب..
رزان وهي ترقص فحواجبها:كنت صغيره مش جحشه كيفك تو..
رفقه:اصلا اللي تحب افلام الرعب وتتفرج عليهم مافيهاش حتى شوية انوثه..
حدهم ورزان:ههههههه..
رزان :ياانوثه انت..
رفقه:تو تشوفي يارزان باااهي..ولفت ومشت طلعت من الكوجينه..
وحدهم مشت وراها وهي تضحك :غير تعالي يابنتي..
اما رزان قعدت تضحك عليها..
وهي تقرض فالدجاج بش بدير بيه كفته..
لعزومة اليوم..
اللي شغلت الكوجينتين اللي داخل واللي برا والكل تعاونوا عليها..
لان بيجوا فيها حتى صحاب الأولاد..
رزان فعز شغلها..
خشت عليها لمياء وفيدها صونيه معبيه فلفل رومي..
لمياء:باهي اللي شيشمه هادي فاضيه..
رزان شبحتلها شويه بعدين غيرت عيونها عنها..
لمياء حطت الصونيه تحت الشيشمه بعد فتحتها وقعدت تغسل فالفلفل وهي تقول:شن صار فموضوعك انتي واصيل..
رزان بجديه:ماصار شي..
لمياء وهي تشوف للفلفلات اللي تغسل فيهم قالت:ردي بالك ترفضيه عريس لئطه زي مايقولوا غبيه اللي ترد واحد زيه..
رزان قعدت تقرض بشي من العصبيه..
لمياء:كل حد يشوف مقسومه يارزونه..ويرضى باللي عنده ومايمشيش ورا اوهام وحاجات مستحيل تصير..
وقفت رزان تقريض وشبحتلها بحده وقالت:شن قصدك؟؟..
لمياء شبحتلها وقالت:اللي فهمتيه..
طفت الشيشمه وشبحت لرزان من فوق للوطا ولفت بتطلع وهي تقول بنبرة تهديد:لو حرشتي مش فصالحك..لاني اول حاجه حنقولها وقتها..رقم عماد شن مازال يدير معاها وعلاش مازال تكلم فيه..وتخش بعضها بعدين...
ومشت طلعت...
وخلت رزان مصدومه لأبعد حد..
وهي ترعش من الغضب ..
ودموعها ينزلوا...
