اما رانيا بقى لمعت فى دماغها فكرة
رانيا"" اه يا بت يا راتوش دلوقتى قدامك سى الولهان افندى و عندية هانم و استاذ ابو الهول و الانسة سهوكة تعملى ايه يا راتوش تعملى ايه يا راتوش هما قالوا ايه زمان دليل الحب ايه اه هى دى""
رانيا: والله يا جماعه كان يوم جامد كنا محتاجين قوى قبل الامتحانات
ريم: عندك حق يا راتوش اهو هنتحبس تانى لحد ما نخلص الامتحانات
هنا اتضايق امجد معنى كده انه مش هيشوفها
رانيا: وليه يا حبيبتى الحبسة ما احنا طالعين رحلة يوم الجمعة الجاية والشلة اهى هتطلع وهيبقى يوم جامد قوى وبتبص لامجد ايه رائيك يا باشمهندس تحب تيجى معانا
الكل بلم من رانيا ازاى تعزم حد من غير ما تاخد رائيهم بس طبعا ولا كان حد بيبصلها
وتكمل رانيا: والله هيبقى يوم جامد قوى وادينا اكلنا عيش وملح قصدى بيتزا و سلاطات
امجد: اكيد طبعا انا نفسى فى حاجة زى دى من زمان هى الرحلة لفين؟
رانيا: دريم بارك ليك فيها ولا ايه؟
امجد:يااااااااه من زمان قوى مرحتهاش فاكر يا مروان اخر رحلة لينا فى المدرسة
مروان بصله و هز دماغه
رانيا:وانت بقى من النظام الى بيركب ولا بيتفرج
امجد: لا ما تقلقيش بركب حلو قوى
رانيا: الله يا ريمو هتلاقى حد ينافسك اهو اصل ريم بقى ماقولكش
طبعا سالى بتخبط فى رانيا من تحت الترابيزة و ياعينى بقى على ريم الى كانت الشوكة فى طريقها لبقها و فضلت فى الطريق و مقدرتش تكمله و متحنطة على الوضع ده والى زود الموضوع ان خالد بقى بدا يبص لريم و امجد ويشك و نظراته شجعت رانيا فى الكلام قوى لانه كده بيثبت انه مهتم
امجد جاله احساس ان رانيا مش عايزة تخليه يكلم ريم فعليا بس ده لسبب تانى يمكن علشان سالى و الضيقة الى على سالى بقت اكبر ووجهه كلامه كله لريم و بدات يحكيلها على مواقف حصلت ليه قبل كده وازاى مرة السير الحديد الى كان ماسك اللعبه اتفك و كان هيموتوا ولا مرة تانيه فضلوا متشعلقين فى الجو اكتر من ربع ساعه و مش عارفين ينزلوا وريم بتضحك لان فعلا كله حكايته مرحة و طريقة سرده للموضوع جميلة واندمجت معاه و خالد وسالى مبقوش على بعضهم واتفقوا امجد و ريم انهم يعملوا سباق ما بينهم فى اللعب و يشوفوا مين فيهم الى هيفوز و المكافاة ايه و كده هنا خالد نطق اخيرا وكان فاضله شوية ويجر ريم من ايديها
خالد: طيب استاذن انا بقى ولا انتم ناوين تقعدوا اكتر من كده
ريم: ليه يا خالد القعده بدات اهى تبقى حلوة
خالد اتنرفز و اتعصب: لا انا مش فاضى لحد انا عندى شغل و هاخد ياسمين معايا اروحها خليكم انتم
