من يوم 6/6 بدأ دخول داعش للموصل وبهذا اليوم سقطت كلها
ليش هيچ بسرعة؟
لان نوري المالكي قبلها ب3 اشهر نقل القوات كلها وباليوم الي فاتو بي الدواعش الموصل چان بيها 40 جندي فقط، يعني التعبير الاصح هو انباعت الموصل مو سقطت.
خلي احچيلكم بالتفاصيل الي شفتو من يوم 6 بشهر السادس
يوم 6 الفجر گعدنا على صوت الطلقات والاشتباكات واحنه چنا متعودين لان چانو دائما الدواعش يضربون النقاط وينهزمون ف گلنا هسه تخلص وماخلصت ، مر يوم كامل والوضع موزين رمي واشتباكات
خلص هذا اليوم طلعنا ثاني يوم (يوم8)الصبح نشوف ناس بالشارع ملثمين ولابسين اسود وشايلين راياتهم
وگالو الجانب الايمن صار بيدنا(صار بيد الدواعش) احنه انصدمنا صدمة جبيرة لان اول مرة يصير هيج شي ، وشفنا ماكو جثث گلنا لعد ويا منو اشتبكو هاي اليومين ؟
اكو 4 مدارس براس فرعنا تبعد عنا جم متر بيت جيرانه قريب عنهم وجا يسولف بالمحلة يگول من البارحة محاصرين عثمان وهو وحدو فوك سطح المدرسة والدواعش كالولو سلم نفسك وهو يصيح يگول( اني ابن حرام اذا سلمت نفسي الكم) وضل يشتبك معاهم الا خلص عتاد وكتلو
(عثمان جان بشارع المدارس بالجيش العراقي مكلف بحراسة المدارس وجان اكو كومة ويا بس اجاهم امر انسحاب قبلها باسبوع ،
عثمان من الناصرية عمرو بالعشرينات
والاشتباك الثاني چان يم معمل الطحين هم الدواعش حاصرين جندي وماقبل يسلم نفسو تقريبا اشتباك طول من الظهر للمغرب واخير شي خلص عتادو واستشهد
هو من الجنوب بس مانعرف معلومات عنو لان جان بعيد عنا بس عثمان نسلم علي ونكف يمو مرات لان بفرعنا
يعني تخيلو 4 احياء ويا الحي مالنا مبقين بيها بس جنديين!
ثالث يوم قوات سوات والفرقة الذهبية والقوات الخاصة والمغاوير مال الاتحادية والشرطة الاتحادية كلهم اجاهم امر انسحاب وطلعو ارتال كومة على بغداد ومن طلعو ذولة هم الجانب الايسر سقط وبيوم 10
سقطن كامل الجانبين،
ف احنا ماضل عدنا امل صابتنا خيبة امل چبيرة بهالكم يوم ف طلعنا على بيت جدي على سنجار چانت بيد البيشمرگة والاسايش ف ضلينا فترة وهم جانت مليانة قوات سوات مال بيشمرگة وهم باعوها بيوم وليلة،
هم صار اشتباك خفيف والاستباك چان مع شرطي عادس مو شايل بس رشاش ومسدس جان بالاسواق الي يمنا وحسب ماكالو الي جانو هناك انو جو علي اهل المحلة جان ماخذ استراحة كالولو كوم انزع العسكري فاتو داعش وحلف گال اموت وماازت سلاحي وضل يشتبك واستشهد وسقطت سنجار ونواحيها
وبدت تتفجر الكنائس والايزيدية انكتلو والعسكريين الي جانو ماخذين اجازات ببيوتهم اعتقلوهم الدواعش لان معلوماتهم مبيوعة هم،
ومن هذا اليوم بدت معاناة دامت 3 سنوات اذا اعددهن مااخلص الى باچر..
محافظة كاملة ومن اكبر محافظات العراق انباعت كلها بأسبوع او اقل
ومن هذا اليوم كومة استشهدو وماتو بيها ناس وانفقدو بيها ناس اكو ناس اعتقلوهم الدواعش ولحد اليوم مانعرف عنهم شي وبعضهم عدموهم وبعضهم گصو روسهم ودزو مقاطعهم لاهلهم،
وهاي المعمعة كلها ماكفت الحاقدين لا! بتحرير الموصل صارت موجة دامية جديدة تشبه موجة داعش بس غير ناس والي همه الاحزاب
اعتقلو اكثر من 6 الاف شخص ونقلوهم على جرف الصخر الي هي مركز لمليشيات الاحزاب ومحد يعرف مصيرهم بس نعرف انو اسمهم مغيبين محد يعرف عايشين لو ميتين
كل هاي الاعداد انفقدت اثناء عمليات التحرير ، اكثر من 10 الاف شخص متخيلين حجم الكارثة؟
نينوى بس بأثناء الحروب خسرت ناس بالالاف من عدا الي كتلوهم الدواعش خلال ال3 سنوات
وكلها سببها الحكومة والاحزاب .
وهذا واحد من الاسباب الي يخليني اكره التبعية والذيول واكره الي يحبهم لان كومة فقدنا ناس بسببهم وهسه ماكو بيت بنينوى ماعدهم فقيد او شهيد كل هذا بس حتى المجرمين يحصلون مناصب وفلوس.
لكن الله يُمهل ولا يُهمل
