هلو شالاخبار 💜
عزيزي الي تفكر وتگول مع نفسك (اني مو مهم واني مامني فائدة بالحياة وعمري كذا والى حد الان ماسويت انجاز بحياتي ) هاي افكار سلبية تدمر نفسيتك وتتعب مخك وتشل افكارك الايجابية وتخليك تحس نفسك ان انت مالك فائدة بالحياة لكن بالحقيقة انت قوي وتگدر تسوي كلشي لان العمر گدامك طويل وتكدر كلشي تسوي ، انت ماتعرف اذا انت مهم او لا صح؟ انت تعرف انو اكو اشخاص مايكمل يومهم الا يشوفونك او يسمعون صوتك او تصلهم رسالة منك ؟! انت تعرف انو اكو ناس سعادتهم تكمل بوجودك؟! مو شرط تسوي فد شي چبير ومشهور والناس كلها تعرفك حته تسمي نفسد قوي ومسوي انجاز ابسط شي إذا تسعد احد او تخلي احد يبتسم إبتسامة صغيرة بس ف هذا بحد ذاته انجاز لانك خليت واحد يبتسم وينسه همه وراح تكبر بعين هالشخص حته اذا چان اول مرة يتكلم وياك او اول مرة يلتقي بيك، انت مهم مادام تگدر تساعد الناس وتگدر تكون ملجأ الهم لمن يكونون بوقت شدة وبوقت حزنهم ، انت مهم وراح تسوي اشياء زينه بالمستقبل من عدا الاشياء الايجابية والمهمة الي سويتها قبل وبهذا الوقت الحالي، وراح تفكر تكول اريد اعرف اني مهم لو لا ... من احد من اهلك او اصدقائك يطلب منك مساعدة وساعدته ف هذا انجاز وينحسب الك، هاي ابسط الانجازات الي ممكن تسويها ک انسان عادي،
تريد تسوي إنجاز چبير ؟ بدال ماتفكر هاي الافكار السلبية والي تحطمك وتكرهك بنفسك سوي مخطط لحياتك ولأعمالك الي تحب تسويها من هسه لان اذا بقيت على هاي الافكار والاحباط مالك ماراح تگدر تسوي أي انجاز بحياتك، حاول تخطط لشي بسيط تبدي بي ويكون خالي من الافكار السلبية والاحباط وشوف شلون راح ينجح، اول واهم خطوة تبدأ بيها هيا انو تطنش الكلام والاراء السلبية الي تتوجهلك من الناس الي يمك فقط اسمع الاراء الايجابية وطنش الكلام المُحبط وثاني شي سوي الشي الي تحبه والي تگدر علي والي انت مقتنع بي لاتسوي الشي الي الناس تحبه وتريدة لان هذا الشي راح تسوي لنفسك مو للناس همه لا راح ينضرون ولا راح يستفادون بس يحچون من فراغهم وخلي هالكلام بمخك اي واحد يوجهلك كلام سلبي وينتقدك ويحاول يحبطك هوا غيران منك لان الاشخاص الي ينتقدون 99% منهم يكونون مشوهين عقلياً وتفكيرهم مُعاق ويكونون فارغين،
تعرف منو هوا الشخص الي مو مهم والي مامنه فائدة بالحياة والمنبوذ؟
1-الشخص الي يضل كاعد بمكانة ومايتحرك حته يسوي انجازات.
2-الشخص الي بس ينتقد الناس ويدور على عيوب وهوا مليان عيوب.
انت مو فاشل مادام دتحاول تصعد بنفسك وتفكر تسوي انجازات ومادام دتگوم لمن تگع ومستمر بطريقك ومايوگفك لاسقوط ولا انتقاد ولا اي شي يكدر يكف بوجهك
تعرف منو الفاشل؟
الفاشل هوا الي يستسلم اول مايسقط ،الي يستسلم اول مايخسر بشي، الي يستسلم من اول عقية تواجهو، الفاشل هو الي يضعف ويستسلم من اول انتقاد واصغر انتقاد.
تعرف منو القوي ؟
القوي هوا الي كل ما يسقط يرجع ينهض مرة الخ، القوي الي مايستسلم من اول خسارة ، القوي الي يعبر كل العقبات الي تواجهو شلون ماچانت صعوبتها وقساوة ضروفها ، القوي الي مايضعفه اي انتقاد ولايسمع الكلام السلبي الي يجي من الناس.
هاي مقارنة گدامك بين الفاشل والقوي الناجح.
وشوف انت ياهو الاحسن؟!
انت الي تختار او تكون فاشل بحياتك او تكون قوي وناجح بحياتك لان انت الي راح تعيشها مو احد غيرك.
انت مهم لأن الله لم يخلق احد عبثاً💜
أنت مهم....»»--⍟--««
دُمتم بخير💜🍃💜
