جان اكو ثنين صحبان قررو يتزوجون بنفس المكان ونفس اليوم واحد اسمو جويسم والخ عليوي
تزوجو وزوجاتهم حملن بنفس الوقت ومرت الايام وصار وقت الولادة بنفس اليوم
جويسم اجا ولد سما اسد وفرح حيل ماشالتو الكاع من الفرحة وخلاه وراح على عليوي ها ولك عليوي بشر ؟
كالو الحمد لله طلعت زوجتي سالمة واجتني بنت سميتها نور
جويسم ضحك كالو يول شجاك اني اجاني ولد وكل الناس راح يصيحولي ابو اسد مو ابو نور وضحك جويسم
مرت الايام وحبلن سوى مرة الخ وجابن بالصدفة بنفس اليوم جويسم ركض على صديقو عليوي كالو ها بشر شنو اجاك؟
رد علي عليوي كالو الحمد لله مرتي طلعت سالمة و الله انعم عليا بطفل سالم اجتني بنت جنها الگمر ، ضحك جويسم باستهزاء كالو اجاني ولد ثاني تعرف شمعناها ؟
كالة عليوي لا والله معرف
كال يكولون اهلنه قبل الي يجي ولدين ورا بعض هاي معناها حللت مهرها كال زوجتي صارت عليا ببلاش وانت ضل عالبناات
مرت الايام وبعدهم على اتفاقهم انو يخلفون سوية وحبلن وجابن بنفس اليوم وجويسم صارلو ولد ثالث وراح لعليوي كالو بشر حمامة ؟غراب؟
رد عليوي: الحمد لله على رزقني ببنت ثالثة وهيه وامها بخير
ضحك جويسم بصوت عالي وكال اجاني ولد ثالث
وكال تعرف شنو معناها؟
كال جويسم :الي يصيرله 3 ولد يصيرولة مثل ركايز المُگد (المُگد الي هيه الچولة او البريمز)
يخلي عليهم جدر الاكل ويكعد مرتاح اني يكعد جدري بس انت وجدرك بالضيم
رد عليوي كال الحمد لله شيجي من الله الحمد لله
راحت ايام وجت ايام وكبرت البنات وتزوجو الولد وطلعو عزلو كلهم وعليوي ومرتو وجويسم ومرتو كبرو ف مرة عليوي راح على جويسم ولكا كاعد برا البيت كاعد بالضيم وجسمو ضعيف وملابسو وصخة ومبهدلة ف سالو عليوي كالو ها خوية شبيك؟اشو كتلت الضيم!
فجاوبو جويسم كالو اني كبرت ومابيا حيل اشتغل وولدي كبرو وتزوجو وفتحو بيوت وعافوني وزوجتي جبيرة ماتكدر تتحرك وماعدنه شي ناكلو وضلت الوادم الطيبة تساعدنه وناكل بس اكلك عليوي اشو انت ملابسك نضيفة وصحتك زينة ومبين عليك شبعان ومرتاح وانت هم مثلي بناتك تزوجن وراحن ومرتك تعبانه ماتكدر تكوم ، ماتحجيلي قصتك خوية!
عليوي كال شوف خوية الصبح بنتي الجبيرة تجيب الريوك وتغسللنا وتريكنه وتغسل ملابسنة وتنضف البيت وتمشي
وبنتي الوسطانية تجي الظهر تجيب الغدة وبيدها توكلنا وتنضف البيت وتغسل ملابسنة وتسبحنه وتنومنه وترجع لبيت زوجها
وبنتي الصغيرة هاي العزيزة تجي بالليل تجيب العشى وتوكلنا وهم تضل ويانه لحد ماننعس وترجع لبيت زوجها
ف علاوي كال خوية جويسم تعرف معناها هاي؟
جويسم كال لا والله
عليوي كال صارت بعكس ماانت چنت تگول،
فـ ضل جويسم مقهور ويتحسر لان جان يستهزء بصديقو عليوي وتمنى انو الله منطي بنات وعرف قيمة البنت شگد تحب اهلها وبالاخص ابوها وحس بذنبو وكام يبجي ومتندم لان جان يعترض على حكم الله ،
كال جويسم ياحيف عافوني ولدي الجنت ازامط بيهم يعليوي صابني الظيم وولادي بعاد اطلب سبع بنوات لو عمري ينعاد!.
العبرة من هالقصة انو ترضى بالنعمة الي الله انعمها عليك وماتتذمر لان ماتعرف شراح يصير بالمستقبل و الله ماينطي للشخص الا لمصلحتو اذا چان بالذرية او بغير شي و الي يقنع الله يزيدو.
القصة جنوبية بس ماگدرت اكتبها بلهجتهم شوية صعبة
وطبعاً بمساعدة الاخت HALA_24 والي كل شوية تضحك وتعيد القصة واني معرف اضحك لو اسمع كلامها واكتب 😹😹
ومع السلامة
